བམ་པོ་དགུ་པ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་ལྷ་སྦྱིན་རབ་ཏུ་བྱུང་མོད་ཀྱི། རྙེད་པ་ལ་ཆགས་པས་མཚམས་མེད་པའི་ལས་ཀྱིས་རི་བསྙིལ་ནས་སངས་རྒྱས་མནན་པ་དང༌། ཞབས་ལ་ཤིང་གི་ཚལ་པ་འཇུགས་པ་དང༌། གླང་པོ་ཆེ་སྨྱོན་པ་བཏང་བ་དང༌། མཐུན་པའི་དགེ་འདུན་གྱི་དབྱེན་བྱས་པ་དང༌། ཟག་པ་ཟད་པའི་དགེ་སློང་མ་བསད་པ་དང༌། མི་དགེ་བའི་ལས་འདི་དག་བྱས་ནས་སྐྱེ་བ་ཕྱི་མའི་རྣམ་པར་སྨིན་པས་འཇིགས་ཏེ་མུ་སྟེགས་ཅན་གྱི་སྟོན་པ་དྲུག་གི་ཐད་དུ་སོང་ནས་དྲིས་སོ། །སྟོན་པ་དྲུག་གིས་ཀྱང་ངན་པར་ལྟ་བའི་ཆོས་སྡིག་པ་བྱས་ཀྱང་སྡིག་པར་མི་འགྱུར་ལ། དགེ་བ་བྱས་ཀྱང་བསོད་ནམས་སུ་མི་འགྱུར་བའི་ཆོས་བསྟན་ནས་དེ་ལ་ཡིད་ཆེས་ཏེ་དགེ་བའི་རྩ་བ་བཅད་དོ། །

        དེའི་ཚེ་ན་ཀུན་དགའ་བོས་ཕུ་ནུ་བོ་ལ་སྙིང་བརྩེ་བའི་ཕྱིར་རབ་ཏུ་མི་དགའ་སྟེ་དུས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ལྷས་སྦྱིན་གཏི་མུག་ཅན་ནི། མི་དགེ་བའི་ལས་ཁ་ན་མ་ཐོབ་བགྱིས་ཏེ་དགེ་བའི་རྩ་བ་བཅད་ནས་ཤཱཀྱའི་རིགས་རྣམས་ཀྱང་སུན་འབྱིན་པར་བགྱིས་སོ། །བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། ལྷ་སྦྱིན་འདི་ནི། ཚེ་འདི་འབའ་ཞིག་ལ་རྙེད་པ་དང་གྲགས་པའི་ཕྱིར་དགེ་བའི་རྩ་བ་བཅད་པར་མ་ཟད་ཀྱི། འདས་པའི་དུས་ན་ཡང་རྙེད་པ་དང༌། གྲགས་པའི་ཕྱིར་ལུས་དང་སྲོག་ཀྱང་སྟོར་བའི་ལས་བྱས་སོ། །དགེ་སློང་དག་ཐེ་ཚོམ་དུ་གྱུར་ནས་ཀུན་དགའ་བོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ལྷ་སྦྱིན་གྱིས་འདས་པའི་དུས་ན་ཡང་རྙེད་པ་དང་གྲགས་པའི་སླད་དུ་ལུས་དང་སྲོག་སྟོར་བའི་ལས་བགྱིས་པ་ཇི་ལྟ་བུ་ལགས་ཞེས་གསོལ་པ་དང༌། བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། ཀུན་དགའ་བོ། སྔོན་འདས་པའི་དུས་ན་བསྐལ་པ་གྲངས་མེད་དཔག་ཏུ་མེད། བསམ་གྱིས་མི་ཁྱབ་པའི་ཕ་རོལ་ན་འཛམ་བུའི་གླིང་འདིར་ཡུལ་ཝ་ར་ཎ་སི་ན་བྲམ་ཟེ་ཧ་ཡི་ཞེས་བྱ་བ་ཞིག་ཡོད་དེ། དེས་རིགས་མཉམ་པ་ལས་ཆུང་མ་བླངས་ནས་རིང་པོ་མ་ལོན་པར་ཆུང་མ་སེམས་ཅན་དང་ལྡན་པར་གྱུར་ཏེ་ཟླ་བ་དགུ་ཚང་བ་ན་བུ་ཁྱེའུ་ཞིག་བཙས་སོ། །

        དེ་ནས་བཙས་སྟོན་ཆེན་པོ་བྱས་ནས་བུའི་མིང་ཡང་ལེགས་ཚོལ་ཞེས་བྱ་བར་བཏགས་ཏེ་མ་མ་ལ་གཏད་ནས་གསོས་སོ། །དེ་ནས་ཡང་སེམས་ཅན་དང་ལྡན་པར་གྱུར་ཏེ། སྔོན་མ་དེ་མཉེན་ཞིང་དེས་པ་ལས། སེམས་ཅན་དང་ལྡན་པའི་འོག་ཏུ་གཏུམ་ཞིང་ཁྲོ་བར་གྱུར་ཏོ། །དེ་ནས་ཟླ་བ་ཚང་བ་དང་ཁྱེའུ་ཞིག་བཙས་ཏེ། དེ་ལྟར་མ་ཡང་སྔོན་ལས་གྱུར་པས། བུའི་མིང་ཡང་ཉེས་ཆོལ་ཞེས་བྱ་བར་བཏགས་ཏེ་མ་མ་ལ་གཏད་ནས་གསོས་སོ། །ཁྱེའུ་སྤུན་གཉིས་ཕྱིས་ཆེར་སྐྱེས་ནས་སྤུན་གཉིས་རྒྱ་མཚོར་རིན་པོ་ཆེ་ལེན་པར་དད་དེ་སོ་སོ་ནས་འཁོར་དང་གྲོགས་ལྔ་བརྒྱ་ལྔ་བརྒྱ་རྙེད་ནས་སྔ་ཕྱིར་ལམ་དུ་ཞུགས་སོ། །ལམ་རིང་བས་ན་ཞག་བདུན་གྱི་གནས་སུ་མ་ཕྱིན་པར་རྒྱགས་ཆད་དེ་སྲོག་དང་བྲལ་དུ་ཉེ་ནས་ལེགས་ཚོལ་དང་གྲོགས་ཚོང་པ་གྲོགས་པོ་རྣམས་ཉམ་ཐག་སྟེ། ཐམས་ཅད་ལྷ་རྗེད་ཅིང་ལྷ་རྣམས་ལ་མཆོད་པ་བྱེད་དོ། །དེ་ནས་འབྲོག་སྟོང་དེ་ན་རྒྱང་མ་ནས་སྐྱེད་ཤིང་བཟང་པོ་ཞིག་མཐོང་ནས་ཐམས་ཅད་སྐྱེད་ཤིང་དྲུང་དུ་ལྷགས་པ་དང༌། ཤིང་གི་དྲུང་ན་ཆུ་མིག་བཟང་པོ་ཞིག་ཀྱང་ཡོད་དེ། ཚོང་པ་རྣམས་ཆུ་མིག་དེ་ལ་འཐུངས་ནས་བདག་ཅག་གིས་ལྷ་མཆོད་པའི་རྟགས་འདིའོ། །ཞེས་སྨྲས་པ་དང༌། ལྷས་མངོན་སུམ་དུ་སྨྲས་ཏེ་སྐྱེད་ཤིང་གི་ཡལ་ག་ཆོད་ཅིག་དང༌། འདོད་པ་ཐམས་ཅད་འབྱུང་ངོ༌། །ཞེས་བསྒོའོ། །

        དེ་ནས་ཡལ་ག་གཅིག་བཅད་པ་དང༌། བཏུང་བ་ཞིམ་པོ་བྱུང་ངོ༌། །དེ་ནས་ཡལ་ག་གཅིག་བཅད་པ་དང༌། ཁ་ཟས་རོ་བརྒྱ་དང་ལྡན་པ་ཐམས་ཅད་བྱུང་ནས་དེ་དག་ཀུན་གྱིས་ཚིམ་པར་ཟོས་སོ། །དེ་ནས་ཡང་ཡལ་ག་གཅིག་བཅད་པ་དང༌། གོས་རྣམ་པ་སྣ་ཚོགས་བྱུང་ངོ༌། །དེ་ནས་ཡལ་ག་གཅིག་བཅད་པ་དང༌། ནོར་བུ་རིན་པོ་ཆེ་སྣ་ཚོགས་བྱུང་སྟེ་ཁལ་ཐམས་ཅད་ལོངས་སོ། །དེ་ནས་ཉེས་ཚོལ་ལ་སོགས་པ་ཐམས་ཅད་དེར་ལྷགས་ཏེ་སྔ་མའི་ཡལ་ག་བཅད་པ་ལས་རིན་པོ་ཆེ་སྣ་ཚོགས་ཁལ་ལོངས་པ་མཐོང་ནས་འདི་སྙམ་དུ་བསམས་སོ། །སྔ་མ་འདི་དག་གིས་ཡལ་ག་ལས་ཀྱང་རིན་པོ་ཆེ་ཆོག་པར་རྙེད་ན། ཤིང་འདིའི་རྩ་བ་ཕྱུང་ན་ནི། རིན་པོ་ཆེ་སྣ་ཚོགས་མང་དུ་རྙེད་དོ་སྙམ་བསམས་ནས་ཤིང་གི་རྩ་བ་རྐོ་བར་གཟས་སོ། །དེ་ནས་ལེགས་ཚོལ་མི་དགའ་སྟེ་སྨྲས་པ། བདག་ཅག་ནི། ཕོངས་ཏེ། སྲོག་དང་བྲལ་བ་ལས་ཤིང་འདིས་བདག་ཅག་སྲོག་གསོས་ཀྱི། ཁྱོད་ཀྱིས་ཤིང་འདི་མ་གཅོད་ཅིག་ཅེས་སྨྲས་ན། ཉེས་ཚོལ་མ་ཉན་ཏེ་ཤིང་གི་རྩ་བ་བཅད་དོ། །དེ་ནས་ལེགས་ཚོལ་ཡང་མཐོང་མི་འདོད་པར་ཁལ་དང་བཅས་པ་སོང་བའི་འོག་ཏུ་ཤིང་གི་རྩ་བ་ནས་སྲིན་པོ་ལྔ་བརྒྱ་བྱུང་སྟེ་ཉེས་ཚོལ་དང༌།ཚོང་པ་ཀུན་ཟོས་སོ། །ཀུན་དགའ་བོ། དེའི་ཚེ་དེའི་དུས་ན་ལེགས་ཚོལ་དེ་ནི། ད་ལྟར་ང་ཡིན་ནོ། །

        དེའི་ཕ་དེ་ནི། ད་ལྟར་ངའི་ཡབ་ཟས་གཙང་མ་ཡིན་ནོ། །དེའི་མ་དེ་ནི། ད་ལྟར་ངའི་ཡུ་མ་ལྷ་མཛེས་མ་ཡིན་ནོ། །ཉེས་ཚོལ་ནི། ད་ལྟར་གྱི་ལྷ་སྦྱིན་འདི་ཡིན་ཏེ། ཀུན་དགའ་བོ། ལྷ་སྦྱིན་གྱིས་དེ་ལྟར་འབའ་ཞིག་ང་ལ་གནོད་པར་མ་ཟད་དེ། རྙེད་པ་དང༌། གྲགས་པའི་ཕྱིར་སྐྱེ་བ་ཐམས་ཅད་དུ་ང་ལ་གནོད་པ་བྱས་ན། ངས་ཕན་པའི་ཆོས་བསྟན་ཏེ་ཕན་པར་བྱས་ཀྱང་ལྷ་སྦྱིན་ནི། ང་ལ་དགྲར་འཛིན་ཏོ། །བཅོམ་ལྡན་འདས་ཀྱིས་དེ་སྐད་ཅེས་གསུངས་ནས་འཁོར་མང་པོ་རྣམས་རྗེས་སུ་ཡི་རང་སྟེ་མངོན་པར་དགའོ། །ལེགས་ཚོལ་དང་ཉེས་ཚོལ་གྱི་ལེའུ་སྟེ་སུམ་ཅུ་གཉིས་པའོ།། །།

                                                                         རྩོམ་སྒྲིག་པ། མང་ར་བ།
        གསལ་འདེབས། 
              རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
              དྲ་བའི་སྦྲེལ་ཐགhttp://www.tb1025.cn