དེའི་ཚེ་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་དགེ་སློང་གི་དགེ་འདུན་ལ་ཆོས་སྟོན་ཅིང་བཞུགས་སོ། །དེའི་ཚེ་ན་ཡུལ་དེ་ན་ཁྱིམ་བདག་ཅིག་གི་ཆུང་མ་ཞི་གལ་བུ་མོ་ཞིག་བཅས་ནས་བུ་མོ་གཞན་པས་འཕགས་པར་བཞིན་བཟང་བ། བལྟ་ན་སྡུག་པ། མཛེས་པ་ཞིག་སྟེ། ཐོག་མ་བཙས་ནས་རས་དཀར་པོ་འཇམ་པོས་དཀྲིས་ཏེ་བྱུང་ངོ༌། །དེ་ལ་ཕ་མ་ཡ་མཚན་དུ་གྱུར་ཏེ་མཚན་མཁན་ལ་བསྟན་ནས་མཚན་མཁན་གྱིས་བལྟས་ཏེ་བསོད་ནམས་ཆེན་པོ་དང་ལྡན་པར་རྟོགས་ནས་མིང་ཡང་དཀར་མོ་ཞེས་བཏགས་སོ། །བུ་མོ་དཀར་མོ་ཇི་ཙམ་དུ་སྐྱེས་པ་བཞིན་རས་ཀྱང་ལུས་ཀྱི་ཚད་དུ་སྐྱེས་སོ། །བུ་མོ་དེ་ཕྱིས་ཆེར་སྐྱེས་ནས་ཡུལ་མི་ལས་མང་དུ་ཆུང་མར་སློང་བ་དང༌། ཕ་མས་ཀྱང་བུ་མོ་བག་མར་གཏང་བའི་རྒྱན་རྣམས་བརྡུང་སྙམ་ནས་མགར་བ་གཉེར་ཏེ་གསེར་དངུལ་བཅལ་ཏོ། །བུ་མོས་གསེར་དངུལ་བཅལ་བ་མཐོང་ནས་འདི་ཅི་ཞིག་བྱ་ཞེས་ཕ་མ་ལ་དྲིས་པ་དང༌། འདི་ནི། ཁྱོད་བདག་མར་གཏང་བའི་རྒྱན་རྣམས་བརྡུང་ངོ༌། །ཞེས་སྨྲས་སོ། །བུ་མོས་སྨྲས་པ། བདག་ནི། རབ་ཏུ་འབྱུང་བར་དད་ཀྱི། བག་མར་མཆི་བར་མི་དགའོ། །ཕ་མས་ཀྱང་བུ་མོའི་ཡིད་དང་སྦྱར་ནས་དེ་མ་ཐག་ཏུ་རས་ཕྱུང་སྟེ་ཆོས་གོས་དྲུབ་པར་བཤམས་པ་ལས། བུ་མོས་རས་འདིས་ཅི་ཞིག་བྱ་ཞེས་དྲིས་པ་དང༌། ཁྱོད་ཀྱི་གོས་འདྲུབ་བོ་ཞེས་སྨྲས་སོ། །བུ་མོས་སྨྲས་པ། བདག་གོས་གྱོན་པ་ཡོད་ཀྱི། དྲུབ་མི་དགོས་སོ། །བདག་བཅོམ་ལྡན་འདས་གང་ན་བཞུགས་པར་ཁྲིད་དེ་འདོང་ངོ༌། །ཞེས་སྨྲས་ནས་བཅོམ་ལྡན་འདས་ཀྱི་སྤྱན་སྔར་ཁྲིད་དོ། །

        སངས་རྒྱས་གང་ན་བདེར་ཕྱིན་པ་དང༌། བཅོམ་ལྡན་འདས་ལ་མགོ་བོས་ཕྱག་འཚལ་ཏེ་རབ་ཏུ་འབྱུང་བར་གསོལ་ཏེ། བཅོམ་ལྡན་འདས་ཀྱིས་ཀྱང་ལེགས་པར་འོངས་སོ། །ཞེས་བཀའ་སྩལ་པས། སྐྲ་རང་བྱི་སྟེ་ལུས་ལ་གྱོན་པའི་གོས་དཀར་པོ་ཡང་ཆོས་གོས་སྨད་ལྔར་གྱུར་ནས་དགེ་སློང་མ་སྐྱེ་རྒུའི་བདག་མོ་ལ་གཏད་དོ། །དགེ་སློང་མ་དེས་བརྩོན་འགྲུས་བརྩམས་པས། རིང་པོ་མ་ལོན་པར་དགྲ་བཅོམ་པར་གྱུར་ཏོ། །ཀུན་དགའ་བོས་བཅོམ་ལྡན་འདས་ལ་གསོལ་པ། དགེ་སློང་མ་དཀར་མོས་སྔོན་བསོད་ནམས་ཅི་ཞིག་བགྱིས་ན། ཁྱིམ་བདག་གི་ཁྱིམ་དུ་སྐྱེས་ཏེ་ལུས་ལ་རས་ཀྱང་མཆིས་ལ། རབ་ཏུ་བྱུང་ནས་རིང་པོ་མ་ལགས་པར་དགྲ་བཅོམ་པར་གྱུར། བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། སྔོན་འདས་པའི་དུས་ན་སངས་རྒྱས་བསོད་སྐྱབས་འཇིག་རྟེན་དུ་གཤེགས་ཏེ། ཉེ་གནས་དང་བཅས་ནས་སེམས་ཅན་གྱི་དོན་ལ་གཤེགས་པ་ལས། ཡུལ་མི་ཐམས་ཅད་ཀྱིས་མཆོད་པ་རྒྱས་པར་བྱས་སོ། །དེའི་ཚེ་དགེ་སློང་གཅིག་ཅིག་འགྲོ་བ་མང་པོའི་དོན་དུ་ཡུལ་མི་ཐམས་ཅད་སངས་རྒྱས་ལ་ཆོས་ཉན་པ་དང༌། སྦྱིན་པ་བྱེད་པར་སྐུལ་ལོ། །དེའི་ཚེ་བུད་མེད་དཱ་ནི་ཀེ་ཞེས་བྱ་བ་རབ་ཏུ་དབུལ་ཕོངས་པ་ཞིག་སྟེ། ཁྱོ་ཤུག་གཉིས་ལ་གོས་སུ་རས་ཡུག་གཅིག་ལས་མི་བདོག་སྟེ་ཁྱོ་དོན་གཉེར་དུ་འགྲོ་ན། རས་ཁྱོས་གྱོན་ཏེ་ཆུང་མ་སྒྲེན་མོར་རྩྭའི་སྟེང་ན་འདུག་གོ །ཆུང་མདོན་གཉེར་ན། རས་ཆུང་མས་གྱོན་ཏེ་ཁྱོ་རྩྭ་ཕུང་གི་ནང་ན་སྒྲེན་མོར་འདུག་གོ །ཕྱིས་ཀུན་གྱི་དོན་བྱེད་པའི་དགེ་སློང་དེ། དེའི་སྒོར་འོངས་ནས་བུད་མེད་དེ་དང་ཕྲད་དེ། བུད་མེད་དེ་ལ་ཁྱོད་སངས་རྒྱས་ལ་ཕྱག་འཚལ་དུ་སོང་ཞིག །ཡོན་ཕུལ་ཅིག་ཅེས་སྦྱིན་པའི་ཡོན་ཏན་བསྔགས་ཏེ་སེར་སྣ་བྱེད་པའི་རྣམ་པར་སྨིན་པ་བསྟན་ནས་སངས་རྒྱས་འཇིག་རྟེན་དུ་འབྱུང་བར་དཀའ་བ་དང༌། ཆོས་ཐོས་པར་དཀའ་བ་དང༌། མི་ལུས་ཐོབ་པར་དཀའ་བའི་གཏམ་རྒྱས་པར་བྱས་ནས་ཆོས་ཉན་དུ་སོང་ཞིག་ཅེས་བསྐུལ་བ་དང༌། བུད་མེད་དེས་སྨྲས་པ། བཙུན་པ། ཅུང་ཟད་བཞུགས་ཤིག །བདག་སླར་མཆིའོ། །ཞེས་སྨྲས་ནས་ཁང་པའི་ནང་དུ་སོང་སྟེ། ཁྱོ་ལ་འདི་སྐད་ཅེས་སྨྲས་སོ། །སྒོ་ན་དགེ་སློང་ཞིག་ཁྱོད་སངས་རྒྱས་ལ་ཕྱག་འཚལ་དུ་སོང་ཞིག །ཆོས་ཉོན་ཅིག །སྦྱིན་པ་གྱིས་ཤིག་ཅེས་མཆིའོ། །བདག་ཅག་ཚེ་སྔ་མ་ལ་སྦྱིན་པ་མ་བྱས་པས་འདི་ལྟར་དབུལ་ཕོངས་པར་གྱུར་ཏེ་ད་ཡང་ཅི་ཞིག་གིས་ཚེ་ཕྱི་མའི་ཚོགས་སུ་འགྱུར་བར་བྱ། ཁྱོས་སྨྲས་པ། འདི་ལ་ནི། སྦྱིན་པར་འོས་ན་བདག་ཅག་དབུལ་ཕོངས་ཏེ་ཅི་ཡང་མེད་ན། ཅི་ཞིག་སྦྱིན་པར་བྱ། ཆུང་མས་སྨྲས་པ། ཚེ་སྔ་མ་ལ་ཡང་སྦྱིན་པ་མ་བྱས་པས། འདི་ལྟར་དབུལ་བར་གྱུར་ན་ད་ཡང་སྦྱིན་པ་མ་བྱས་ན། ཚེ་ཕྱི་མ་ལ་གར་འགྲོ་སྟེ། བདག་ནི། སྦྱིན་པ་ཞིག་བྱེད་ཀྱི། ཁྱོད་ཀྱིས་གནོང་ཞིག །ཁྱོས་བསམ་པ། འདི་ལ་ནི། ནོར་ཁུད་པ་ཞིག་ཡོད་པ་གདའ་སྟེ། སྦྱིན་པ་གྱིས་ཤིག་ཅེས་སྨྲས་པ་དང༌། ཆུང་མས་བདག་གིས་རས་འདི་སྦྱིན་པར་དགའོ། །ཞེས་སྨྲས་སོ། །

        ཁྱོས་སྨྲས་པ། བདག་ཅག་ཁྱོ་ཤུག་གཉིས་ལ་རས་འདི་ལས་མེད་དེ། འདིས་དོན་གཉེར་ཞིང་འཚོ་བར་ཟད་ན། ད་སྤྱིན་པར་བྱས་ན་གཉི་ག་སྡོད་དམ་ཅི། ཆུང་མས་སྨྲས་པ། མི་ཞིག་སྐྱེས་པ་ལ་ཚེ་འཕོ་བ་ཡོད་པས། འདི་མ་བྱིན་ཡང་ཚེ་འཕོ་ལ། བྱིན་ཡང་འཆི་འཕོ་བས་ཉིས་ན་སྦྱིན་པ་བྱས་ཏེ་ཚེ་འཕོས་ན། ཚེ་ཕྱི་མ་ལ་རེ་བ་ཡོད་པས་སྦྱིན་པ་བྱས་ན་ཚེ་འཕོས་ཀྱང་བླའོ། །ཁྱོ་ཡང་དགའ་བཞིན་དུ་སྦྱིན་པ་གྱིས་ཤིག་ཅེས་བསྒོ་ནས་ཆུང་མ་ཕྱི་རོལ་ཏུ་སོང་སྟེ། དགེ་སློང་ལ་འདི་སྐད་ཅེས་སྨྲས་སོ། །བཙུན་པ། ཅུང་ཟད་མ་གཟིགས་ཤིག །བདག་སྦྱིན་པ་བགྱིའོ། །ཞེས་སྨྲས་པ་དང༌། དགེ་སློང་གིས་ཁྱོད་སྦྱིན་པ་བྱེད་ན། མངོན་སུམ་དུ་ལག་གིས་བྱིན་ཅིག །སྦྱིན་པའི་ཚིགས་བཅད་བྱའོ། །ཞེས་བསྒོའོ། །བུད་མེད་དེས་སྨྲས་པ། ལུས་ལ་རས་འདི་ལས་མེད་དེ། འོག་ན་གོས་གཞན་མེད་པས། བུད་མེད་ཀྱི་ལུས་རྩོག་པ་དྲི་མ་མནམ་པོ་འདི་གཟིགས་པར་མ་འོས་ཀྱི། ནང་ནས་དབུལ་ལོ། །ཞེས་སྨྲས་པ་དང༌། ནང་རོལ་ནས་རས་ཕུད་དེ་དགེ་སློང་དེ་ལ་ཕུལ་ལོ། །དགེ་སློང་དེས་སྦྱིན་པའི་ཚིགས་བཅད་པས་ནས་རས་དེ་ཐོགས་ཏེ་སངས་རྒྱས་གང་ན་བ་དེར་སོང་སྟེ་ཕྱིན་པ་དང༌། བཅོམ་ལྡན་འདས་ཀྱིས་དགེ་སློང་དེ་ལ་བུད་མེད་ཀྱིས་ཕུལ་བའི་རས་དེ་འོན་ཅིག་ཅེས་བཀའ་སྩལ་ཏོ། །དགེ་སློང་དེས་ཀྱང་རས་དེ་སངས་རྒྱས་ལ་ཕུལ་ནས་བཅོམ་ལྡན་འདས་ཀྱིས་ཕྱག་གིས་བཞེས་སོ། །རས་རྙིང་ཞིང་དྲི་མས་གོས་པས་རྒྱལ་པོའི་འཁོར་རྣམས་རས་དྲི་མ་ཅན་ཕྱག་ཏུ་བཞེས་པ་ལ་འཕྱའོ། །

        བཅོམ་ལྡན་འདས་ཀྱིས་འཁོར་མང་པོའི་བསམ་པ་མཁྱེན་ནས་འདི་སྐད་ཅེས་བཀའ་སྩལ་ཏོ། །ངས་བལྟས་ན་འཁོར་འདིའི་ནང་ན་སྦྱིན་པ་རྣམ་པར་དག་པ་ནི། འདི་ལས་འདའ་བ་མེད་དོ། །ཞེས་བཀའ་སྩལ་ཏོ། །འཁོར་མང་པོ་ངོ་མཚར་དུ་གྱུར་ཏོ། །དེ་ནས་རྒྱལ་པོའི་བཙུན་མོ་རབ་ཏུ་དགའ་སྟེ་ལུས་ལ་གྱོན་པའི་གོས་དང་རྒྱན་རྣམས་ཕུད་ནས་བུད་མེད་ལ་བསྐྱལ་ཏོ། །རྒྱལ་པོས་ཀྱང་གོས་དང་རྒྱན་ཕུད་ནས་དེའི་ཁྱིམ་ཐབ་ལ་བསྐྱལ་ཏེ་ཁྱོ་ཤུག་གཉིས་འཁོར་གྱི་ནང་དུ་ཤོག་ཅིག །ཅེས་བསྒོའོ། །སངས་རྒྱས་བསོད་སྐྱབས་ཀྱིས་འཁོར་མང་པོ་ལ་ཆོས་བསྟན་པས་ཕལ་ཆེར་རྣམ་པར་གྲོལ་བར་གྱུར་ཏོ། །བཅོས་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། དེའི་ཚེ་དེའི་དུས་ན་བུད་མེད་དབུལ་མོ་དེ་ནི། དགེ་སློང་མ་དཀར་མོ་འདི་ཡིན་ནོ། །དེའི་ཚེ་བསམ་པ་དག་པས་རས་བྱིན་པའི་དབང་གིས་བསྐལ་པ་དགུ་བཅུ་རྩ་གཅིག་གི་བར་དུ་གང་ནས་གང་དུ་སྐྱེས་ཀྱང་རྟག་ཏུ་རས་དང་བཅས་སུ་སྐྱེས་ཏེ། བྲེལ་ཕོངས་པ་མེད་ཅིང་ཡིད་བཞིན་དུ་འབྱོར་པར་གྱུར་ཏོ། །

        སངས་རྒྱས་དེ་ལས་དམ་པའི་ཆོས་ཐོས་ནས་རྣམ་པར་གྲོལ་བར་སྨོན་ལམ་བཏབ་པས་འདིར་ང་དང་ཕྲད་དེ་དགྲ་བཅོམ་པར་གྱུར་ཏོ། །དེ་བས་ན་ཁྱོད་ཀྱང་ཆོས་མཉན་པ་དང༌། སྦྱིན་པ་བྱེད་པ་ལ་བརྩོན་འགྲུས་གྱིས་ཤིག་ཅེས་བཀའ་སྩལ་ནས་འཁོར་མང་པོ་བཅོམ་ལྡན་འདས་ཀྱིས་དེ་སྐད་ཅེས་གསུངས་པ་ལ་ཡི་རང་ནས་མངོན་པར་དགའོ། །དབུལ་མོས་རས་ཕུལ་བའི་ལེའུ་སྟེ་བཅོ་བརྒྱད་པའོ།། །།

                                                                       རྩོམ་སྒྲིག་པ། མང་ར་བ།
        གསལ་འདེབས།
               རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
               དྲ་བའི་སྦྲེལ་ཐགhttp://www.tb1025.cn