དེའི་ཚེ་བཅོམ་ལྡན་འདས་མཉན་ཡོད་ན་རྒྱལ་པུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་དགེ་སློང་ཆེན་པོའི་དགེ་འདུན་དང་ཐབས་ཅིག་ཏུ་བཞུགས་ཏེ་ཆོས་སྟོན་ཏོ། །དེའི་ཚེ་ཡུལ་དེ་ན་ཁྱིམ་བདག་ཆེན་པོ། ཕྱུག་པ། ནོར་མང་བ། གསེར་དང༌། དངུལ་དང༌། རིན་པོ་ཆེ་སྣ་བདུན་དང༌། གླང་པོ་ཆེ་དང༌། རྟ་དང༌། བ་ལང་དང༌། ལུག་དང༌། བྲན་ཕོ་དང༌། བྲན་མོ་དང༌། ལས་བྱེད་པའི་མི་རབ་ཏུ་མང་བ། བང་མཛོད་རབ་ཏུ་མང་བ། བང་མཛོད་རབ་ཏུ་གང་བ་ཞིག་ལ་བུ་ཁྱེའུ་ནི། མེད་མོད་ཀྱི། བུ་མོ་ནི། ལྔ་ཡོད་དེ། དེ་ཡང་མངའ་བྱད་མཛེས་པ། ཤེས་པའི་བློ་དང་ལྡན་པ་ཤ་སྟག་གོ །དེའི་ཚེ་ཁྱིམ་བདག་དེའི་ཆུང་མ་སྦྲུམ་པ་ལས་ཁྱིམ་བདག་དེ་ཚེ་འཕོས་པར་གྱུར་ཏོ། །དེའི་ཚེ་ན་རྒྱལ་པོའི་ཡུལ་ཆོས་ཀྱིས་བུ་ཕོ་མེད་ན། ལོངས་སྤྱོད་ཅི་བདོག་པ་ཐམས་ཅད་རྒྱལ་པོས་བཞེས་ཏེ། རྒྱལ་པོས་ཀྱང་བློན་པོ་ཆེན་པོ་གཅིག་དེའི་ནོར་ཕྱུགས་དང་ལོངས་སྤྱོད་ཅི་ཡོད་པ་ཐམས་ཅད་བརྩིས་ཏེ་བླར་བཞེས་པར་བཀའ་སྩལ་པ་དང༌། བུ་མོ་དེ་དག་གིས་བསམ་པ། བདག་ཅག་གི་མའི་རུམ་མི་བདེ་བ་ཕོའམ། མོ་ཡང་གཏོལ་མེད་དེ། བུ་མོ་ཞིག་བཙས་ན་ནི། ནོར་ཕྱུགས་ཀྱང་རྒྱལ་པོས་བཞེས་པར་ཟད་ན། གལ་ཏེ་ཁྱེའུ་ཞིག་བྱུང་ན་ཁོ་ནོར་བདག་དངོས་ཡིན་ནོ་སྙམ་བསམ་ནས་རྒྱལ་པོ་ལ་འདི་སྐད་ཅེས་གསོལ་ཏོ། །བདག་ཅག་གི་ཕ་གུམ་པས་བུ་ཕོ་མ་མཆིས་པའི་སླད་དུ་ནོར་ཕྱུགས་རྒྱལ་པོས་བཞེས་པ་འདི་ད་ལྟར་བདག་ཅག་གི་མའི་རུམ་མི་བདེ་བ་བྱེ་བྲག་མ་ཕྱེའི་བར་དུ་བཞག་ཅིང༌། གལ་ཏེ་བུ་མོ་ཞིག་ལགས་ན། བཞེས་པས་ཀྱང་སླེབ་སྟེ། གལ་ཏེ་ཁྱེའུ་ཞིག་ལགས་པར་གྱུར་ན། ནོར་བདག་དངོས་ལགས་སོ། །རྒྱལ་པོ་རབ་གསལ་རྒྱལ་དེ་ཡང་དྲང་ཞིང་ཆོས་ཀྱིས་སྲིད་འཚོ་བས། བུ་མོ་དེ་དང༌། གིས་གསོལ་པ་བཞིན་དུ་བྱས་སོ། །

        དེ་ནས་རིང་པོ་མ་ལོན་པར་ཟླ་བ་དགུ་ཚང་ནས་བུ་ཕོ་ཞིག་བྱུང་སྟེ། དེ་ལ་རྣ་བ་ཡང་མེད། མིག་ཀྱང་མེད། སྣ་ཡང་མེད། ལྕེ་ཡང་མེད། རྐང་ལག་ཀྱང་མེད་དེ། ཕོ་མཚན་འབའ་ཞིག་ཡོད་པའི་གོང་གོང་པོ་ཞིག་བྱུང་བས། དེའི་མིང་ཡང་མན་ཛི་བྱི་ལ་ཞེས་བྱ་བར་བཏགས་སོ། །དེ་ནས་བུ་མོ་དེ་དག་གིས་ཁྱེའུ་ཞིག་བྱུང་ངོ༌། །ཞེས་གསོལ་པ་དང༌། རྒྱལ་པོས་བསམ་པ། མིག་དང༌། རྣ་བ་དང༌། སྣ་དང༌། ལྕེ་དང༌། རྐང་ལག་ལ་སོགས་པ་ཡོད་པས་ནི། ནོར་བདག་ཏུ་མི་འགྱུར་གྱི། གང་ཕོ་མཚན་དང་ལྡན་པ་དེ་ནོར་བདག་ཏུ་འགྱུར་ཏེ། བུ་འདི་ཡང་ཕོ་མཚན་ཡོད་པས་ཕའི་ནོར་བདག་ཏུ་འགྱུར་རོ་སྙམ་བསམས་ནས་བུ་མོ་དེ་དག་ལ་ནོར་ཕྱུགས་དང༌། ལོངས་སྤྱོད་ཅི་བདོག་པ་ཁྱོད་ཀྱི་མིང་པོ་དབང་སྟེ། མི་བཞེས་སོ། །ཞེས་བཀའ་སྩལ་ཏོ། །དེའི་ཚེ་བུ་མོ་ཆེན་མོ་རིགས་མཐུན་པ་ལ་བག་མར་བཏང་ནས་བུ་མོ་དེས་ཁྱིམ་ཐབ་དེ་ལ་བཀུར་སྟི་བསྐྱེད་ནས་སྟན་གདིང་བ་དང༌། མལ་བྱེད་པ་དང༌། ཕྱག་དར་དོར་བ་དང༌། ཁ་ཟས་སྦྱོར་བ་དང༌། བསུ་བ་དང༌། སྐྱེལ་བ་དང༌། ཕྱག་འཚལ་བ་དང༌། གསོང་ཕོར་སྨྲ་བ་ལ་སོགས་ཏེ། ལས་བྱེད་པ་ཐམས་ཅད་ལ་ཇི་ལྟར་བྲན་མོ་དག་རྗེ་བོའི་ལས་བྱེད་པ་བཞིན་དུ་བུ་མོ་དེ་ཡང་ཁྱིམ་ཐབ་དེའི་བཀུར་སྟི་བྱེད་པས། ཁྱིམ་ཐབ་ཀྱིས་ཆུང་མ་ལ་འདི་སྐད་ཅེས་སྨྲས་སོ། །ཁྱོ་ཤུག་ཅེས་བྱ་བ་བདག་ཅག་ཏུ་མ་ཟད་དེ། ཀུན་ལ་ཡང་སྲིད་ན་ཁྱོད་འབའ་ཞིག་ཅིའི་ཕྱིར་འདི་ལྟར་བྱེད་ཅེས་སྨྲས་སོ། །ཆུང་མས་སྨྲས་པ། བདག་གི་ཕ་ལ་ནོར་ཕྱུགས་གྲངས་མེད་པ་ཞིག་ཡོད་དེ། གུམ་པའི་འོག་ཏུ་བུ་མོ་ལྔ་ཡོད་ཀྱང་ནོར་ཐམས་ཅད་རྒྱལ་པོས་བཞེས་བར་ཆད་པ་ལས་མའི་རུམ་མི་བདེ་བ་ཟླ་བ་ཚད་ནས་མིང་པོ་བཙས་ན། མིག་ཀྱང་མེད། རྣ་བ་དང༌། སྣ་དང༌། ལྕེ་དང༌། རྐང་པ་དང༌། ལག་པའང་མེད་དེ། སྐྱེས་པའི་མཚན་མ་འབའ་ཞིག་ཡོད་པས་ནོར་བདག་ཏུ་གྱུར་ཏོ། །

        དེ་བས་ན་དབང་པོ་ཅི་ཡོད་ཀྱང་སྐྱེས་པའི་མཚན་གཅིག་ཙམ་ལ་ཡང་མི་ཕོད་དེ། བདག་ཁྱེད་ལ་བཀུར་སྟི་བྱེད་པ་ཡིན་ནོ། །ཁྱིམ་བདག་དེས་ཆུང་མས་སྨྲས་པ་ཐོས་ནས་ངོ་མཚར་ཏུ་གྱུར་ཏེ་ཆུང་མ་དང་འགྲོགས་ནས་བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང༌། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། ཅིའི་སླད་དུ་ཁྱིམ་བདག་གི་བུ་དེ་ལ་མིག་དང༌། རྣ་བ་དང༌། སྣ་དང༌། ལྕེ་དང༌། རྐང་པའང་མ་མཆིས་ཏེ། བཙས་མ་ཐག་ཏུ་ཤིན་ཏུ་ཕྱུག་པོའི་ཁྱིམ་དུ་ནོར་གྱི་བདག་པོར་གྱུར། བཅོམ་ལྡན་འདས་ཀྱིས་ཁྱིམ་བདག་ལ་བཀའ་སྩལ་པ། ཁྱོད་ཀྱིས་འདི་དག་ཞུས་པ་ལེགས་ཀྱི། ཤིན་ཏུ་ལེགས་པར་ཉོན་ལ་ཡིད་ལ་ཟུངས་ཤིག་དང༌། ཁྱོད་ལ་བསྟན་ཏོ། །ཞེས་བཀའ་སྩལ་ནས་ཁྱིམ་བདག་གིས་དེ་བཞིན་དུ་ཐོས་པར་འཚལ་ཞེས་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། སྔོན་འདས་པའི་དུས་ན་ཁྱིམ་བདག་ཅིག་ལ་བུ་ཁྱེའུ་སྤུན་གཉིས་ཤིག་ཡོད་དེ། གཅིག་ནི། སྦྱིན་པ་ཞེས་བྱ། གཅིག་ནི། ཚུལ་ཁྲིམས་ཞེས་བྱ་སྟེ། ཁྱེའུ་སྤུན་གཉིས་ཆུང་དུ་ནས་ཆུ་གང་དང་ཁྲེལ་ལྟས་ཆེ་ལ་ཚིག་བདེན་པར་སྨྲ་བ། རྟག་ཏུ་སྦྱིན་པ་ལ་དགའ་བ། དབུལ་ཕོངས་པ་ལ་མགོན་བྱེད་དོ། །དེ་ལྟར་དད་པ་ཆེ་ཞིང་དགེ་བས་ཡུལ་མིས་ཀྱང་བསྔགས་ཏེ། རྒྱལ་པས་ཀྱང་ཞལ་ཆེ་བར་བཅུག་ནས་ཉེས་པ་དང༌།མཉེས་པ་དཔྱོད་དོ། །

        དེའི་ཚེ་ན་རྒྱལ་པོའི་ཡུལ་ཁྲིམས་ཀྱིས་ཡུལ་མི་དག་གཅིག་ལ་གཅིག་ཅི་བསྐྱིས་ཀྱང་ཞལ་ཆེ་བའི་དྲུང་དུ་ལྷགས་ནས་དཔང་འཛུགས་ཀྱི། གཏན་ཚིགས་གཞན་མི་བྱེད་དོ། །དེའི་ཚེ་ཚོང་ཕ་ཞིག་རྒྱ་མཚོར་འགྲོ་བ་ལས་དེའི་ནུ་བོ་ཚུལ་ཁྲིམས་ཞེས་བྱ་བ་ལ་ནོར་དབྱིག་མང་པོ་ཞིག་བསྐྱིས་ཏེ། ཅི་དགོས་པར་སྤྱོད་དོ། །དེའི་ཚེ་ན་ཚུལ་ཁྲིམས་དེ་ལ་བུ་གཅིག་བུ་ཞིག་ཡོད་པའང་གཞོན་ལ་ཆུང་བས་ཚུལ་ཁྲིམས་ཀྱིས་བུ་དེ་ཡང་ཁྲིད་ཅིང༌། སྦྱིན་པར་བྱས་པའི་ནོར་རྫས་ཀྱང་ཁྱེར་ནས་ཕུ་བོའི་གན་དུ་སོང་སྟེ་འདི་སྐད་དུ་ཚོང་པ་འདིས་བདག་ལ་ནོར་འདི་སྙེད་ཅིག་སྔ་སྐྱིན་དུ་འཚལ་ཏེ། རྒྱ་མཚོ་ནས་ནམ་སླར་འཁོར་བ་ན་སྩལ་བར་བགྱིས་པས། གལ་ཏེ་བདག་གུམ་ནའང་བུ་ལ་སྩལ་བར་བགྱིས་ཀྱི། གཅེན་མཁྱེན་པར་མཛོད་ཅིག །ཕུ་བོས་ཀྱང་དེ་བཞིན་དུ་བྱའོ། །ཞེས་སྨྲས་སོ། །དེ་ནས་རིང་པོར་མ་ལོན་པར་ཁྱིམ་བདག་ཚུལ་ཁྲིམས་ནི། ཚེའི་དུས་བྱས་སོ། །ཚོང་དཔོན་དེའང་རྒྱ་མཚོའི་ནང་དུ་རླུང་གིས་གྲུ་ཞིག་སྟེ་ཚོང་པ་འབའ་ཞིག་ཤིང་ལེབ་ཅིག་ལ་འཇུས་ནས་ཕྱིར་ཡུལ་དུ་ཕྱིན་ཏོ། །དེའི་ཚེ་ན་ཁྱིམ་བདག་གིས་ཀྱང་ཚོང་པ་དེ་གྲུ་ཞིག་ནས་ནོར་ནི། འཁྱམས་ཏེ་གཅིག་པུ་ཕྱིར་འཁོར་ཏེ་བདག་གི་ནོར་རྫས་འདི་སྙེད་ཅིག་ཆགས་མོད་ཀྱི། བདར་མེད་དོ་སྙམ་བསམས་སོ། །དེ་ནས་ཡང་ཚོང་པ་དེས་གཞན་ལ་བསྐྱི་བརྙ་བྱས་ནས་ཕྱིར་རྒྱ་མཚོར་ཞུགས་པ་དང༌། ནོར་བུ་རིན་པོ་ཆེ་མང་དུ་རྙེད་དེ་བདེ་བར་ཕྱིར་འཁོར་ནས་འདི་སྙམ་དུ་བསམས་སོ། །ཁྱིམ་བདག་གི་བུ་འདི་སྔར་ཡང་བདག་ལ་བུ་ལོན་མི་འདོད་པ་ལས་ན། མི་འདི་ཆུང་ཆེས་བས་གལ་ཏེ་ན་བརྗེད་དེ་མི་དྲན་ནམ། འོན་ཏེ་བདག་ལ་ཅི་ཡང་མི་བདོག་པས་བུ་ལོན་མི་འདེད་པ་བག་མ་མོ་སྙམ་བསམས་ནས་རྟ་བཟང་པོ་ཞིག་ལ་ཞོན་ཏེ་གོས་རིན་པོ་ཆེ་གྱོན་ནས་ཚོང་དུས་སུ་སོང་ངོ༌། །

        ཁྱིམ་བདག་གི་བུ་དེས་ཀྱང་ཚོང་པ་དེ་གོས་བཟང་པོ་གྱོན་ཅིང་རྟ་བཟང་པོ་ཞོན་པ་མཐོང་ནས་བསམ་པ། འདི་ནི། ལོངས་སྤྱོད་དང་ལྡན་པར་གྱུར་པ་ལྟ། བུ་ལོན་བདའོ་སྙམ་བསམས་ནས་མི་ཞིག་ལ་བུ་ལོན་ཆགས་པ་རྣམས་དེ་ཕྱིར་མི་སྦྱིན་ནམ་ཞེས་སྤྲིངས་ནས་དེས་ཀྱང་དེ་བཞིན་དུ་བྱའོ། །ཞེས་སྨྲས་སོ། །དེ་ནས་ཚོང་པ་དེས་བསམ་པ། ཁྱིམ་བདག་འདི་ལ་ནོར་དབྱིག་མང་དུ་བསྐྱིས་པས། བདག་ལ་ལོངས་སྤྱོད་ཅི་བདོག་པ་ཐམས་ཅད་གཏུགས་ཀྱང་མི་འཁོར་ཏེ། བདག་གིས་ཐབས་ཤིག་བྱའོ་སྙམ་བསམས་ནས་ཚོང་པ་དེ་ནོར་བུ་རིན་པོ་ཆེ་གཅིག་ཐོགས་ཏེ་ཞལ་ཆེ་བ་དེའི་ཆུང་མའི་གན་དུ་སོང་ནས་འདི་སྐད་ཅེས་གསོལ་ཏོ། །བཙུན་མོ་མཁྱེན་པར་མཛོད་ཅིག །བདག་གི་སྔོན་ཁྱིམ་བདག་ཚུལ་ཁྲིམས་ལས་ནོར་རྫས་ཅུང་ཟད་ཅིག་བསྐྱིས་ཏེ། དེ་ཁྱིམ་བདག་གི་བུ་བདག་ལ་བུ་ལོན་དེ་ད་ན། ནོར་བུ་རིན་པོ་ཆེ་སྲང་ཁྲི་རི་པ་འདི་བཞེས་ཏེ། ཞལ་ཆེ་བ་ལ་བདག་ཅག་གཉིས་འདྲིར་འོངས་ན། མ་མཐོང་ངོ༌། །ཞེས་བྱ་བར་གསོལ་བར་གྱིས་ཤིག་ཅེས་གསོལ་ཏོ། །ཆུང་མས་སྨྲས་པ། བདག་གི་ཁྱིམ་ཐབ་འདི་ནི། ཤིན་ཏུ་དྲང་སྟེ། རྫུན་མི་ཟེར་བས་མི་བཏུབ་ཏུ་ངེས་ན། འོན་ཀྱང་གསོལ་བར་བྱའོ། །ཞེས་ནོར་བླངས་ཏེ་ཁྱིམ་ཐབ་ནུབ་མོ་སླར་འཁོར་བ་དང༌། ཚོང་པས་གསོལ་པ་བཞིན་དུ་རྒྱས་པར་སྨྲས་སོ། །ཁྱིམ་ཐབ་ཀྱིས་སྨྲས་པ། བདག་ནི། ཆུ་གང་དང་ཁྲིལ་ལྟས་ཀྱིས་འཚོ་སྟེ། རྫུན་མི་ཟེར་བས་རྒྱལ་པོས་ཀྱང་ཞལ་ཆེ་བར་བཅུག་གོ །གལ་ཏེ་བདག་གིས་རྫུན་སྨྲས་ན་ནི། རིགས་པ་དང་གཤའ་བ་མ་ཡིན་ནོ། །ཞེས་སྨྲས་སོ། །ཕྱི་དེ་ཉིན་ཡང་ཚོང་པ་འོངས་ནས་ཆུང་མས་ཀྱང་དེ་བཞིན་དུ་གཏམ་རྒྱས་པར་སྨྲས་ཏེ། ནོར་བུ་ཕྱིར་བྱིན་པ་ལས་ཚོང་པ་དེས་ནོར་བུ་ཡིན་པོ་ཆེ་སྲང་སྟོང་ཕྲག་ཉི་ཤུ་རི་བ་ཞིག་ཀྱང་ཕུལ་ཏེ། འདི་སྙམ་དུ་དོན་ཅུང་ཟད་ཀྱི་ཕྱིར་ཆིག་གཅིག་ཙམ་སྨྲས་པས། སྲང་སྟོང་ཕྲག་སུམ་ཅུ་རྙེད་པར་འགྱུར་རོ། །ཕ་རོལ་པོ་ནི།ཚ་བོ་ཡིན་ཏེ། རྒྱལ་བར་གྱུར་ན་ཡང་དོང་ཚེ་གཅིག་ཙམ་ཡང་ཐོབ་པར་མི་འགྱུར་རོ། །ཞེས་སྨྲས་ནས་འདི་ནི། རིགས་པ་ཡིན་ནོ་སྙམ་སྟེ་ནོར་བུ་རིན་པོ་ཆེ་ལ་ཆགས་པས་ཚོང་པས་བཅོལ་བ་སྒྲུབ་པར་ཁས་བླངས་སོ། །དགོང་དུ་ཁྱིམ་ཐབ་ཕྱིར་འཁོར་བ་དང༌། ཁར་སྩང་བདག་གིས་གསོལ་པ་དེ་རུང་བ་འདྲ་ན། དེ་བཞིན་མཛད་དུ་གསོལ། ཁྱིམ་བདག་གིས་སྨྲས་པ། འདི་ནི། རིགས་པ་མ་ཡིན་ཏེ། བདག་རྫུན་མི་ཟེར་བས་ཞལ་ཆེ་བར་བཅུག་གོ །གལ་ཏེ་རྫུན་ཞིག་སྨྲས་ན་ཡང་ཚེ་འདི་ལ་འཇིག་རྟེན་པ་ཀུན་གྱིས་ཡིད་ཆེས་པར་མི་འགྱུར། ཚེ་ཕྱི་མ་ལ་ཡང་བསྐལ་པ་གྲངས་མེད་པའི་བར་དུ་སྡུག་བསྔལ་མྱོང་བར་འགྱུར་རོ། །ཞེས་བསྒོའོ། །

        དེའི་ཚེ་ན་ཁྱིམ་བདག་དེ་ལ་བུ་ཁྱེའུ་འགྲོ་མི་ནུས་པ་གོག་བ་ཙམ་ཞིག་ཡོད་དེ། ཁྱིམ་བདག་གི་ཆུང་མས་ཁྱིམ་བདག་ལ་འདི་སྐད་ཅེས་སྨྲས་སོ། །བདག་ནི། ཁྱོད་དང་ཁྱོ་ཤུག་ཏུ་གྱུར་པས་སྲོག་ལ་བབ་པ་ཞིག་སྨྲས་ན་ཡང་ཕྱིར་མི་ཟློག་ཏུ་རེ་ན། འདི་ལྟ་བུའི་དོན་ཆུང་དུ་གཅིག་ལ་ཡང་ཚིག་བརྟུལ་ཏེ་མི་ཟློག་ན། བདག་གསོན་ཏེ་ཡང་ཅི་རུང༌། བདག་གིས་གསོལ་པ་བཞིན་དུ་མ་གྱུར་ན། བུ་ཡང་བསད་ལ་དེའི་འོག་ཏུ་བདག་ཀྱང་འཆིའོ། །ཁྱིམ་བདག་གིས་དེ་སྐད་ཅེས་སྨྲས་པ་ཐོས་ནས་དཔེར་ན། མི་བརྣངས་པ་སྐྱུག་ཏུ་མེད་ལ། མིད་དུ་ཡང་མེད་པ་ལྟར་བདག་ལ་བུ་འདི་གཅིག་བུར་ཟད་དེ། གལ་ཏེ་ཤི་བར་གྱུར་ན་ནོར་གྱི་བདག་པོ་ཡང་མེད་པར་འགྱུར། གལ་ཏེ་བུད་མེད་ཀྱིས་སྨྲས་པ་བཞིན་དུ་བྱས་ན་ཡང་འཇིག་རྟེན་བ་ཀུན་གྱིས་སྨྲས་པ་ཡིད་མི་ཆེས་ཏེ།མ་འོངས་པའི་དུས་སུ་ཡང་སྡུག་བསྔལ་མང་པོ་མྱོང་བར་འགྱུར་རོ་སྙམ་བསམས་ནས་མ་རངས་བཞིན་དུ་ཆུང་མས་སྨྲས་པ་བཞིན་བྱས་པས། ཆུང་མ་ཡང་རབ་ཏུ་དགའ་ནས་ཚོང་པ་ལ་སྨྲས་པ། ཁོ་མོའི་ཁྱོ་ཡང་གནང་གི །དེ་བཞིན་དུ་གྱིས་ཤིག་ཅེས་བསྒོའོ། །ཚོང་པ་ཡང་རབ་ཏུ་དགའ་ནས་ཕྱིར་ཁྱིམ་དུ་སོང་སྟེ་གླང་པོ་ཆེ་ཆེན་པོ་གཅིག་རིན་པོ་ཆེ་སྣ་ཚོགས་ཀྱིས་བརྒྱན་ནས་གོས་རིན་པོ་ཆེ་གྱོན་ཏེ་གླང་པོ་ཆེ་དེ་ལ་ཞོན་ནས་ཚོང་དུས་སུ་འོངས། ཁྱིམ་བདག་གི་བུ་དེས་དེ་ལྟ་བུ་མཐོང་ནས་དགའ་སྟེ། ཡིད་ལ་ད་ནི། མི་འདི་ལོངས་སྤྱོད་མང་པོ་དང་ལྡན་གྱི། བདག་གི་བུ་ལོན་བདའོ་སྙམ་བསམས་ནས་དྲུང་དུ་སོང་སྟེ་སར་འཕགས་པ་ལ་འདི་སྐད་ཅེས་སྨྲས་སོ། །ཁྱིམ་བདག་མཁྱེན་ཏམ། བདག་གིས་བུ་ལོན་ཆགས་པ་རྣམས་ད་སླར་སྩོལ་ཅིག་ཅེས་སྨྲས་ན། ཁྱིམ་བདག་དེ་སྡངས་པ་ལྟར་བྱེད་དེ། ཁྱོད་ཀྱི་བུ་ལོན་ཆགས་སུ་མི་དྲན་ནོ། །བུ་ལོན་ཅི་ཞིག་ཆགས་སུ་མཐོང་ཞེས་སྨྲས་སོ། །ཁྱིམ་བདག་གི་བུས་སྨྲས་པ། ལོ་དང་ཟླ་བའི་ངོ་ཆེ་གེ་མོ་ཞིག་ལ་བདག་གི་ཕ་ལས་ནོར་བསྐྱིས་ཏེ་བདག་གི་ལག་ནས་ནོར་ཁྱེར་བར་ཞལ་ཆེ་བ་ཡང་ཤེས་ན། ཅིའི་ཕྱིར་བསྙོན་ཞེས་སྨྲས་སོ། །ཚོང་པས་སྨྲས་པ། བདག་གིས་ནི། ཁྱོད་ཀྱི་ནོར་བསྐྱིས་པར་མི་དྲན་ནོ། །མཐོང་བ་ཞིག་ཡོད་ན་མཐོང་བའི་ཐད་དུ་གཏུགས་སུ་འདོང་ངོ༌། །ཞེས་སྨྲས་ནས་ཞལ་ཆེ་བའི་ཐད་དུ་ཕྱིན་ནས་མི་འདིས་སྔོན་བདག་གི་ཕ་ལས་ནོར་འདི་སྙེད་ཅིག་བསྐྱིས་ཏེ་ཁུ་བོས་ཀྱང་མཐོང་ན། མི་འདིས་བདག་གི་ཕ་ལས་ནོར་མ་འཚལ་ཏམ་ཞེས་དྲིས་ན། ཁུ་བོས་ཀྱང་བདག་ལ་གཏོལ་མེད་ཅེས་སྨྲས་སོ། །ཚ་བོ་དངངས་ནས་དེའི་ཚེ་བདག་གི་ནོར་ཅི་བསྐྱིས་པ་ཁུ་བོས་ལག་བས་བསྡོས་ཏེ་མི་འདི་བྱིན་པར་མི་དྲན་ནམ། སྨྲས་པ། དེ་ལྟ་བུ་མེད་དོ། །ཞེས་སྨྲས་སོ། །

        དེ་ནས་ཁྱེའུ་དེ་ཁུ་བོ་ལ་ཁྲོས་ནས་ཁྱོད་དྲང་པའི་ཕྱིར་ཀུན་གྱི་ཞལ་ཆེ་བར་རྒྱལ་པོས་བཅུག་སྟེ་ཡུལ་མི་ཐམས་ཅད་ཀྱིས་དྲང་པོ་ཞེས་བྱས་ན། བདག་ཚ་བོ་ལ་ཡང་འདི་ལྟར་བྱེད་ན། གཞན་དག་ལ་ཐོག་ཏུ་བབ་ཅིང་གཏམ་ལས་བཅད་པ་ལྟ་ཅི་སྨོས་ཏེ། འདི་བདེན་ནམ་རྫུན་པ་དེའུ་རེ་མངོན་ནོ། །ཞེས་སྨྲས་སོ། །བཅོམ་ལྡན་འདས་ཀྱིས་ཁྱིམ་བདག་ལ་བཀའ་སྩལ་པ། དེའི་ཚེ་ཞལ་ཆེ་བ་དེ་ཤེས་པར་འདོད་ན། གཞན་ཡིན་ནོ་སྙམ་དུ་མ་སེམས་ཤིག །དེ་ནི། མཛི་བྱི་ལ་དབང་པོ་རྣམས་མེད་བ་འདི་ཡིན་ནོ། །དེའི་ཚེ་ན་རྫུན་གཅིག་བྱས་པས་སེམས་ཅན་དམྱལ་བ་ཆེན་པོར་སྐྱེས་ནས་སྡུག་བསྔལ་སྣ་ཚོགས་མྱོང་སྟེ། དམྱལ་བ་ལས་ཐར་ནས་སྐྱེ་བ་ལྔ་བརྒྱའི་བར་དུ་དབང་པོ་ཅི་ཡང་མེད་པའི་ཤ་གོང་གོང་པོར་སྐྱེས་སོ། །

        དེའི་ཚེ་སྦྱིན་པ་ལ་དགའ་བའི་དབང་གིས་རྟག་ཏུ་ཕྱུག་པོའི་ཁྱིམ་དུ་སྐྱེས་ནས་ནོར་གྱི་དབང་པོར་གྱུར་ཏོ། །དགེ་བའི་ལས་དང༌།སྡིག་པའི་ལས་ནི། ཡུན་རིང་པོར་ལོན་ཀྱང་མེད་ཅིང་ཞིག་པར་མི་འགྱུར་རོ། །དེ་བས་ན་ཁྱེད་རྣམས་བརྩོན་འགྲུས་སུ་ལུས་དང་ངག་དང་ཡིད་བསྡམས་ཏེ་སྡིག་པ་ནི། མི་བྱའོ། །དེའི་ཚེ་འཁོར་མང་པོ་རྣམས་བཅོམ་ལྡན་འདས་ཀྱིས་གསུངས་པ་ཐོས་ནས། ལ་ལ་ནི། འབྲས་བུ་དང་པོ་ནས་འབྲས་བུ་བཞི་པའི་བར་དུ་ཐོབ་པར་གྱུར། ལ་ལ་ནི། བླ་ན་མེད་པའི་བྱང་ཆུབ་ཏུ་སེམས་བསྐྱེད་དེ་རྗེས་སུ་ཡི་རང་ནས་མངོན་པར་དགའོ། །ཁྱིམ་བདག་དབང་པོ་མེད་པའི་ལེའུ་སྟེ་བཅུ་བདུན་པའོ།། །།