བམ་པོ་གསུམ་པ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ཀུན་དགའ་བོ་བསོད་སྙོམས་ཀྱི་བྱ་བ་བྱས་ནས་ཚལ་ཞིག་གི་ནང་ན་བསམ་གཏན་དུ་འདུག་སྟེ་འདི་སྙམ་དུ་རྟོག་པ་སྐྱེས་སོ། །སངས་རྒྱས་བཅོམ་ལྡན་འདས་འཇིག་རྟེན་དུ་གཤེགས་པ་ངོ་མཚར་ཆེ་སྟེ། སེམས་ཅན་མང་པོ་ཡང་རབ་ཏུ་བདེ་བ་ལ་བཀོད། ཀཽཎྜི་ནྱ་ལ་སོགས་པའི་དགེ་སློང་ལྔ་སྡེས་དགེ་བའི་རྩ་བ་ཅི་བསགས་ན། ཆོས་ཀྱི་སྒོ་རྣམ་པར་ཕྱེ་མ་ཐག་ཏུ་འཇུག་པར་གྱུར། ཆོས་ཀྱི་རྔ་བརྡུངས་མ་ཐག་ཏུ་ཐོག་མར་ཐོས་པར་གྱུར། ཆོས་ཀྱི་བདུད་རྩིས་ཐོག་མར་ངོམས་པར་གྱུར་སྙམ་དུ་རྟོག་པ་སྐྱེས་ནས་འདུག་པ་ལས་ལངས་ཏེ་སངས་རྒྱས་གང་ན་བ་དེར་སོང་ནས་ཕྱིན་པ་དང༌། ཇི་ལྟར་བསམ་པ་བཞིན་དུ་བཅོམ་ལྡན་འདས་ལ་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་ཀཽཎྜི་ནྱ་ལ་སོགས་པ་ནི།སྔོན་འདས་པའི་དུས་ན་ཡང་ངས་ཤ་དང་ཁྲག་གིས་བཀྲེས་སྐོམ་པ་ལས་ཆོག་པར་བྱིན་ཏེ་བདེ་བར་བྱས་པས་དེ་བས་ན། མངོན་པར་སངས་རྒྱས་ནས་ཀྱང་སྔར་རྣམ་པར་གྲོལ་བ་ལ་བཀོད་དེ། རྒྱུ་དང་རྐྱེན་མེད་པ་མ་ཡིན་ནོ། །

        ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ལ་གསོལ་པ། སྔོན་འདས་པའི་དུས་ན་ཇི་ལྟ་བུར་བཀྲེས་སྐོམ་པ་ལས་བདེ་བར་མཛད་པ་བསྟན་དུ་གསོལ། འཁོར་མང་པོ་འདི་དག་གིས་ཐོས་ནས་རྟོགས་པར་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། སྔོན་འདས་པའི་དུས་ན་བསྐལ་པ་གྲངས་མེད་པའི་ཕ་རོལ་ན་ཛམྦུའི་གླིང་འདིར་རྒྱལ་པོ་བྱམས་པའི་སྟོབས་ཞེས་བྱ་བ་ཛམྦུའི་གླིང་གི་རྒྱལ་ཕྲན་བརྒྱད་ཁྲི་བཞི་སྟོང་རྙེད་ལ་དབང་བྱེད་པ་ཞིག་བྱུང་ངོ༌། །རྒྱལ་པོ་དེ་ལ་བཙུན་མོ་ནི། སྟོང་ཕྲག་ཉི་ཤུ་ཡོད་དོ། །བློན་པོ་ནི། སྟོང་ཕྲག་བཅུ་ཡོད་དོ། །རྒྱལ་པོ་དེ་བྱམས་པ་དང་སྙིང་རྗེར་ལྡན་ཏེ་ཚད་མེད་པ་བཞི་སྤྱོད་ཅིང་འགྲོ་བ་ཐམས་ཅད་ལ་སྙིང་བརྩེ་བས་དགེ་བ་བཅུས་སྲིད་འཛིན་ཏེ། ཐམས་ཅད་ཀྱིས་བཀུར་བ། ཡུལ་ན་དགྲ་མེད་ཅིང་ལོ་ལེགས་པ། འབྱོར་པ། བདེ་བ། སྐྱིད་པ་དང་ལྡན་པ་སྟེ། རིམས་གཏོང་བའི་ཡི་དྭགས་དག་མིའི་ཁྲག་དང་མདངས་འཕྲོག་ཅིང་ཟབ་ལས། དེའི་ཚེ་ན་ཡུལ་མི་ཐམས་ཅད་ལུས་དང་ངག་དང་ཡིད་སྲུང་སྟེ་དགེ་བ་བཅུ་ལ་གནས་པས་ཡི་དྭགས་མ་རུངས་པ་དག་བཟའ་བ་མ་རྙེད་ནས་ཀུན་ལྟོགས་ཏེ་མཐུ་མེད་པར་གྱུར་ཏོ། །

        དེའི་ཚེ་གནོད་སྦྱིན་ལྔ་ཞིག་རྒྱལ་པོའི་དྲུང་དུ་འོངས་ནས་འདི་སྐད་ཅེས་སྨྲས་སོ། །བདག་ཅག་གི་ཟས་ནི། མིའི་མདངས་དང་ཁྲག་ལ་ལྟོས་ཏེ་ལུས་དང་སྲོག་འཚོ་བ་ལས། རྒྱལ་པོས་བཀར་བཏགས་ཏེ་ཐམས་ཅད་དགེ་བ་བཅུ་ལ་གནས་པས་བདག་ཅག་ཟས་དང་སྐོམ་མ་རྙེད་དེ། ཉམ་ཐག་ནས་སྲོག་ལ་བབ་བོ། །རྒྱལ་པོ་ཆེན་པོ། བདག་ཅག་ལ་ཡང་ཐུགས་མི་བརྩེའམ་ཞེས་གསོལ་ནས་རྒྱལ་པོས་ཀྱང་དེ་དག་ལ་སྙིང་བརྩེ་བའི་ཕྱིར་ལུས་ཀྱི་ཡན་ལག་ལྔ་ལས་རྩ་ལྔ་བཅད་ནས་གནོད་སྦྱིན་རྣམས་སོ་སོ་ནས་སྣོད་བཟེད་དེ་ཁྲག་ལས་ངོམས་པར་འཐུང་དུ་བཅུག་གོ །དེ་དག་ཁྲག་གིས་ངོམས་ནས་ཤིན་ཏུ་དགའ་བར་གྱུར་ཏོ། །དེ་དག་ཁྲག་གིས་ངོམས་ནས་དགེ་བ་བཅུ་ལ་ཅི་ནུས་སུ་སྤྱོད་ཅིག་ཅེས་བསྐུལ་ཏོ། །

        ད་ལྟར་ངའི་ལུས་ལས་ཁྲག་ཕྱུང་སྟེ་ཁྱོད་ངོམས་ཤིང་བདེ་བར་བྱས་པ་ལྟར་ཕྱིས་མངོན་པར་སངས་རྒྱས་པ་ན་ཆོས་ཀྱི་སྐུའི་ཚུལ་ཁྲིམས་དང༌། ཏིང་ངེ་འཛིན་དང༌། ཤེས་རབ་ཀྱིས་ཁྱེད་ཀྱི་དུག་གསུམ་བསལ་ཏེ་འདོད་པས་གདུངས་པ་ལས་ཤིན་ཏུ་བདེ་བའི་མྱ་ངན་ལས་འདས་པ་ལ་འགོད་པར་ཤོག་ཅིག་ཅེས་སྨྲས་སོ། །ཀུན་དགའ་བོ། དེའི་ཚེ་དེའི་དུས་ན་རྒྱལ་པོ་བྱམས་པའི་སྟོབས་དེ་ནི། དེ་ལྟར་ང་ཡིན་ནོ། །གནོད་སྦྱིན་ལྔ་པོ་དེ་ནི། ཀཽཎྜི་ནྱ་ལ་སོགས་པ་དགེ་སློང་ལྔ་ཡིན་ནོ། །ངས་གང་ནས་གང་དུ་སྐྱེས་པར་དེ་དག་ཐོག་མར་བསྒལ་བར་སྨོན་ལམ་བཏབ་བོ། །དེ་བས་ན་ངས་ཐོག་མར་ཆོས་བསྟན་མ་ཐག་ཏུ་རྣམ་པར་གྲོལ་བར་གྱུར་ཏོ། །ཚེ་དང་ལྡན་པ་ཀུན་དགའ་བོ་དང༌། འཁོར་མང་པོ་རྣམས་སངས་རྒྱས་ཀྱིས་གསུངས་པ་ལ་ཡི་རང་ནས་མངོན་པར་དགའོ། །རྒྱལ་པོ་བྱམས་པོའི་སྟོབས་ཀྱིས་སྦྱིན་པའི་ལེའུ་སྟེ་བཅུ་གཉིས་པའོ།། །།
                                                                                                                            རྩོམ་སྒྲིག་པ། མང་ར་བ།
              གསལ་འདེབས། 
                       རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                      དྲ་བའི་སྦྲེལ་ཐགhttp://www.tb1025.cn