རྒྱལ་བ་ལས་ནི་འཁོན་བྱུང་ཞིང་། །
ཕ་རོལ་ཕམ་པ་སྡུག་བསྔལ་འཐོབ། །
རྒྱལ་དང་ཕ་རོལ་ཕམ་སྤངས་ན། །
ཉེ་བར་ཞི་བའི་བདེ་བ་འཐོབ། །
གཞན་ལ་སྡུག་བསྔལ་བསྐྱེད་པ་ཡིས། །
གང་ཞིག་བདག་ནི་བདེ་འདོད་པ། །
དགྲ་དང་མི་འབྲལ་འགྲོགས་པ་དང་། །
དེ་ནི་སྡུག་བསྔལ་ལས་མི་འགྲོལ། །
བདེ་བ་འདོད་ཕྱིར་འབྱུང་པོ་ལ། །
གང་ཞིག་འཚེ་ཞིང་ཆད་པས་གཅོད། །
བདག་གི་བདེ་བ་འདོད་པ་དེ། །
ཕ་རོལ་ཏུ་ནི་བདེ་མི་འགྱུར། །
གང་ཞིག་བདེ་བ་འདོད་པ་དག །
འབྱུང་པོ་ལ་ནི་མི་འཚེ་ཞིང་། །
ཆད་པས་མི་གཅོད་བདེ་འདོད་པ། །
དེ་དག་ཕ་རོལ་བདེ་བ་འཐོབ། །
ཆོས་སྤྱོད་ལེགས་པར་སྤྱད་བྱ་ཞིང་། །
ཉེས་པར་སྤྱད་པ་དེ་མི་སྤྱོད། །
འཇིག་རྟེན་འདི་དང་ཕ་རོལ་ཏུ། །
ཆོས་སྤྱད་པས་ནི་བདེ་བ་འཐོབ། །
ཆོས་ལ་ལེགས་སྤྱོད་བདེ་སྐྱེད་པས། །
ཆོས་སྤྱོད་ཆོས་ཀྱིས་བསྲུང་བར་བྱ། །
ཆོས་སྤྱོད་ངན་འགྲོར་མི་འགྲོ་བ། །
ཆོས་ལ་ལེགས་སྤྱོད་ཕན་ཡོད་དེའོ། །
ཡངས་པའི་གདུགས་ཀྱིས་དབྱར་ཁ་ལྟར། །
ཆོས་སྤྱོད་ཆོས་ཀྱིས་བསྲུང་བར་བྱ། །
ཆོས་སྤྱོད་ངན་འགྲོར་མི་འགྲོ་བ། །
ཆོས་ལ་ལེགས་སྤྱོད་ཕན་ཡོད་དེའོ། །
བག་མེད་མི་ཡིས་ཆོས་མིན་སྤྱད་ན་ནི། །
འགྲོ་བ་གང་ཡང་རུང་བ་ངན་འགྲོར་འགྲོ། །
འདི་ན་སྦྲུལ་ནག་རྐེད་ནས་བཟུང་བ་ལྟར། །
ཆོས་མིན་སྤྱོད་པ་དེ་དག་བརླག་པར་འགྱུར། །
ཆོས་དང་ཆོས་མིན་གཉིས་ཀ་ཡི། །
རྣམ་སྨིན་འདྲ་བར་མི་འགྱུར་ཏེ། །
ཆོས་མ་ཡིན་པས་དམྱལ་བར་འགྲོ། །
ཆོས་ཀྱིས་བདེ་འགྲོ་ཐོབ་པར་བྱེད། །
སྦྱིན་པ་བྱེད་པའི་དུས་དང་གཡུལ་འགྱེད་དུས། །
རྒྱུ་ཡིས་ཡོངས་སུ་བཟུང་བར་འདྲ་བས་ན། །
སྦྱིན་པ་བྱེད་དང་གཡུལ་འགྱེད་འདྲ་ཞེས་གསུངས། །
ཡོན་ཏན་དེ་གཉིས་མི་ངན་རྟེན་མི་བྱེད། །
ཤིན་ཏུ་ལེགས་པར་ཆས་པ་གཅིག་པུས་ཀྱང་། །
ལེགས་པར་མ་ཆས་འཕྱེས་ལས་རྒྱལ་བྱེད་ལྟར། །
གལ་ཏེ་དད་བསྐྱེད་ཆུང་དུ་བྱིན་པས་ཀྱང་། །
དེས་ནི་དེ་དག་གཞན་དུ་བདེ་བར་འགྱུར། །
འདི་ན་ལན་བརྒྱར་གཡུལ་ཟློག་དཔའ་བོ་བས། །
སེར་སྣ་དགྲར་གྱུར་ཟིལ་གྱིས་མནན་ནས་སུ། །
གང་ཞིག་ཆགས་མེད་སེམས་ཀྱིས་སྦྱིན་བྱེད་པ། །
དེ་དག་ཆེས་དཔའ་ཡིན་པར་ངས་གསུངས་སོ། །
བསོད་ནམས་རྣམ་སྨིན་བདེ་བ་སྟེ། །
མངོན་པར་བསམས་པ་འབྱོར་པར་བྱེད། །
མྱུར་དུ་ཞི་བ་དམ་པ་ཡི། །
མྱ་ངན་འདས་པ་ཐོབ་པར་འགྱུར། །
བསོད་ནམས་བྱེད་པ་རྣམས་ལ་ནི། །
གཞན་ལས་བྱུང་བའི་གནོད་པ་དང་། །
ལྷ་དང་བདུད་ཀྱི་རིས་རྣམས་ཀྱིས། །
བར་ཆད་བྱ་བར་མི་ནུས་སོ། །
གལ་ཏེ་སྡུག་བསྔལ་ཟད་བྱའི་ཕྱིར། །
འཕགས་དང་ཤེས་རབ་གཏོང་ལྡན་ལ། །
དེ་ཡིས་འབད་རྩོལ་བྱས་ན་ནི། །
ལྷག་མཐོང་གིས་ནི་རེག་པར་འགྱུར། །
སེམས་ནི་རབ་ཏུ་རྣམ་དང་བས། །
ཆོས་ལ་དགའ་བྱེད་བདེ་བ་འཐོབ། །
འཕགས་པས་གསུངས་བའི་ཆོས་དག་ལ། །
མཁས་པ་རྟག་ཏུ་དགའ་བར་བྱེད། །
གང་དག་སེམས་ནི་བསམ་གཏན་དགའ། །
གང་ཞིག་སྐྱེ་མེད་དགའ་བ་དང་། །
དྲན་པ་ཉེ་བར་གཞག་བཞི་དང་། །
བྱང་ཆུབ་ཡན་ལག་བདུན་དག་དང་། །
རྫུ་འཕྲུལ་རྐང་པ་བཞི་རྣམས་དང་། །
ཡན་ལག་བརྒྱད་ལམ་གང་དགའ་བ། །
དེ་དག་ཆོས་གོས་འཆང་བ་དང་། །
བསོད་སྙོམས་བདེ་བར་ཟ་བར་བྱེད། །
དེ་དག་རི་དང་ནགས་ཚལ་ན། །
བདེ་བར་འཆག་པར་བྱེད་པ་དང་། །
དེ་དག་བདེ་འཐོབ་བདེ་བར་ནི། །
མཐོང་བའི་ཆོས་ལ་མྱ་ངན་འདའ། །
འཁོན་དང་འཇིགས་པ་ཀུན་འདས་ཞིང་། །
འཇིག་རྟེན་ཡུལ་གྱི་སྲིད་ལས་རྒལ། །
ཆོས་ཐོས་པ་དང་མཐོང་བ་དང་། །
དབེན་པར་དགའ་བ་བདེ་བ་སྟེ། །
འཇིག་རྟེན་སྲོག་ཆགས་འབྱུང་པོ་ལ། །
འཚེ་མེད་ཡང་དག་སྡོམ་པ་བདེ། །
འདོད་པ་རྣམས་ལས་རབ་འདས་ཤིང་། །
འཇིག་རྟེན་འདོད་ཆགས་བྲལ་བ་བདེ། །
ངའོ་སྙམ་པའི་ང་རྒྱལ་དག །
བཏུལ་བ་དེ་དག་མཆོག་ཏུ་བདེ། །
རྒས་ཁར་ཚུལ་ཁྲིམས་ལྡན་པ་བདེ། །
དད་ལ་རབ་ཏུ་གནས་པ་བདེ། །
དོན་ལྡན་ཚིག་ལ་དགའ་བ་བདེ། །
སྡིག་པ་མི་བྱེད་པ་དག་བདེ། །
འཇིག་རྟེན་ན་ནི་ཕར་འཛིན་བདེ། །
དེ་བཞིན་མར་ཡང་འཛིན་པ་བདེ། །
འཇིག་རྟེན་དགེ་སྦྱོང་འཛིན་པ་བདེ། །
དེ་བཞིན་བྲམ་ཟེར་འཛིན་པ་བདེ། །
སངས་རྒྱས་རྣམས་ནི་འབྱུང་བ་བདེ། །
དེ་བཞིན་ཆོས་རྣམས་བསྟན་པ་བདེ། །
དགེ་འདུན་རྣམས་ནི་མཐུན་པ་བདེ། །
མཐུན་པ་རྣམས་ཀྱི་དཀའ་ཐུབ་བདེ། །
ཚུལ་ཁྲིམས་ལྡན་པ་མཐོང་བ་བདེ། །
མང་དུ་ཐོས་པ་མཐོང་བ་བདེ། །
ཡང་སྲིད་རྣམ་པར་གྲོལ་བ་ཡི། །
དགྲ་བཅོམ་པ་དག་མཐོང་བ་བདེ། །
འཇུག་ངོགས་བདེ་བའི་ཆུ་ཀླུང་བདེ། །
ཆོས་ཀྱིས་རྒྱལ་བའི་སྐྱེ་བོ་བདེ། །
ཤེས་རབ་ཐོབ་པར་གྱུར་པ་བདེ། །
ང་འོ་ང་རྒྱལ་ཟད་པ་བདེ། །
འཕགས་པ་རྣམས་ནི་མཐོང་བ་བདེ། །
དམ་པ་དག་དང་འགྲོགས་པ་བདེ། །
བྱིས་པ་རྣམས་ནི་མ་མཐོང་ན། །
རྟག་ཏུ་བདེ་བ་ཉིད་དུ་འགྱུར། །
རྣམ་པ་ཀུན་ཏུ་དགྲ་འདྲ་བའི། །
བྱིས་དང་འགྲོགས་པ་སྡུག་བསྔལ་ཞིང་། །
བྱིས་པ་དག་དང་འགྲོགས་བྱེད་པ། །
ཡུན་རིང་རྗེས་སུ་འགྱོད་པར་འགྱུར། །
སྐྱེས་བུ་ཅང་ཤེས་དཀོན་པ་སྟེ། །
དེ་དག་ཀུན་ཏུ་འབྱུང་མ་ཡིན། །
བརྟན་པ་རྣམས་དང་འགྲོགས་པ་དག །
གཉེན་དང་ཕྲད་པ་ལྟ་བུར་བདེ། །
གང་དུ་བརྟན་པ་དེ་སྐྱེས་པ། །
དེ་ཡི་རིགས་ཀྱིས་བདེ་བ་འཐོབ། །
བྲམ་ཟེ་མྱ་ངན་འདས་པ་དག །
རྣམ་པ་ཀུན་ཏུ་བདེ་བར་འཇུག །
གང་ཞིག་འདོད་པས་མ་གོས་ཤིང་། །
ཟག་མེད་རབ་ཏུ་རྣམ་གྲོལ་བ། །
སྲེད་པ་ཐམས་ཅད་གཏུབས་པ་དག །
སྙིང་ལས་རིམས་ནད་རྣམ་པར་བསལ། །
སེམས་ཀྱིས་ཞི་བ་ཐོབ་པ་རྣམས། །
ཉེ་བར་ཞི་ཞིང་བདེ་བར་འཇུག །
གང་ཞིག་བདེ་བ་ཡངས་འདོད་ཅིང་། །
བདེ་བ་ཆུང་དུ་གཏོང་འདོད་པའི། །
བརྟན་པས་བདེ་ཆུང་སྤང་བྱས་ན། །
བདེ་བ་ཡངས་པ་ལེགས་པ་མཐོང་། །
འཇིག་རྟེན་འདོད་བདེ་གང་ཡིན་དང་། །
ལྷ་ཡུལ་བདེ་བ་གང་ཡིན་པས། །
སྲེད་པ་ཟད་པའི་བདེ་བ་དེའི། །
བཅུ་དྲུག་ཆར་ཡང་མི་ཕོད་དོ། །
ཁུར་གྱིས་སྡུག་བསྔལ་བླངས་པས་ན། །
ཁུར་བོར་ན་ནི་བདེ་བར་འགྱུར། །
ལྕི་བའི་ཁུར་དག་ངེས་བོར་ན། །
ཕྱི་ནས་གཞན་དག་ལེན་མི་འགྱུར། །
ཀུན་སྦྱོར་ཐམས་ཅད་ཟད་བྱའི་ཕྱིར། །
སྲེད་པ་ཐམས་ཅད་རབ་ཏུ་སྤོངས། །
ཕུང་པོ་ཐམས་ཅད་ཡོངས་ཤེས་ན། །
སྲིད་པ་ཕྱི་མར་འགྲོ་བ་མེད། །
དོན་རྣམས་བསྐྲུན་པ་ལ་ནི་གྲོགས་ལྡན་བདེ། །
སྲོག་དག་རབ་ཏུ་གཏུགས་ལ་བསོད་ནམས་བདེ། །
ངན་ལོན་ཙམ་གྱིས་ལེགས་པར་ཆོག་ཤེས་བདེ། །
སྡུག་བསྔལ་ཐམས་ཅད་ངེས་པར་ནུབ་པ་བདེ། །
འདི་ན་མེ་ནི་འབར་བ་ལ། །
ལྕགས་ཀྱི་ཐོ་བས་བརྒྱབ་པ་ཡིས། །
རིམ་གྱིས་ཉེ་བར་ཞི་འགྱུར་ཏེ། །
ཇི་ལྟར་སོང་བ་མི་ཤེས་ལྟར། །
འདོད་པའི་འདམ་རྫབ་ཆུ་བརྒལ་ཅིང་། །
གོ་འཕང་མི་གཡོ་ཐོབ་པ་དང་། །
ལེགས་པར་རྣམ་པར་གྲོལ་རྣམས་ཀྱི། །
འགྲོ་བ་གདགས་སུ་མེད་པ་ཡིན། །
གང་ཞིག་ཁོང་ན་འཁྲུག་པ་མེད་པ་དང་། །
གང་ཞིག་སྲེད་དང་སྲེད་མིན་ལས་ལོག་པ། །
དེ་དག་འཇིགས་བྲལ་བདེ་ཞིང་མྱ་ངན་མེད། །
ལྷས་ཀྱང་བལྟ་ཞིང་བསམ་དུ་མེད་པར་འགྱུར། །
འདི་ན་གང་དག་ཆོས་མང་ཐོས་པ་དང་། །
རྟོགས་ཤིང་ཅི་ཡང་མེད་པ་ཀྱེ་རེ་བདེ། །
སྐྱེ་བོ་སྐྱེ་བོའི་སེམས་ལ་རབ་ཆགས་ཤིང་། །
ཅུང་ཟད་ཡོད་པ་བརླག་པར་གྱུར་ལ་ལྟོས། །
འདི་ན་གང་དག་ཆོས་མང་ཐོས་པ་དང་། །
རྟོགས་ཤིང་ཅི་ཡང་མེད་པ་ཀྱེ་རེ་བདེ། །
སྐྱེ་བོ་སྐྱེ་བོའི་ལུས་ལ་རབ་ཆགས་ཤིང་། །
ཅུང་ཟད་ཡོད་པ་བརླག་པར་གྱུར་ལ་ལྟོས། །
སྐྱེ་བོ་ཅི་མེད་ཡོན་ཏན་རྟོགས་པ་དང་། །
སྐྱེ་བོ་ཅི་ཡང་མེད་པར་གྱུར་པ་བདེ། །
སྐྱེ་བོ་སྐྱེ་བོའི་སེམས་ལ་རབ་ཆགས་ཤིང་། །
ཅུང་ཟད་ཡོད་པ་བརླག་པར་གྱུར་ལ་ལྟོས། །
སྐྱེ་བོ་ཅི་མེད་ཡོན་ཏན་རྟོགས་པ་དང་། །
སྐྱེ་བོ་ཅི་ཡང་མེད་པར་གྱུར་པ་བདེ། །
སྐྱེ་བོ་སྐྱེ་བོའི་ལུས་ལ་རབ་ཆགས་ཤིང་། །
ཅུང་ཟད་ཡོད་པ་བརླག་པར་གྱུར་ལ་ལྟོས། །
གཞན་གྱི་དབང་གྱུར་ཀུན་སྡུག་སྟེ། །
རང་དབང་ཡོད་པ་ཐམས་ཅད་བདེ། །
སྦྱོར་བ་ཤིན་ཏུ་སྤང་དཀའ་བ། །
ཐུན་མོང་གྱུར་པས་བརླག་པར་ཟད། །
ཞེན་པར་གྱུར་པའི་མི་ནང་ན། །
ཞེན་པ་མེད་པར་གནས་པ་དང་། །
ཞེན་པའི་ནང་ན་མ་ཞེན་པ། །
ཀྱེ་མའོ་ཤིན་ཏུ་བདེ་བར་འཚོ། །
ནད་ཀྱིས་ཐེབས་པའི་མི་ནང་ན། །
ནད་མེད་པར་ནི་གནས་པ་དང་། །
ནད་པའི་ནང་ན་ནད་མེད་པ། །
ཀྱེ་མའོ་ཤིན་ཏུ་བདེ་བར་འཚོ། །
འཚེ་བ་ཅན་གྱི་མི་ནང་ན། །
འཚེ་བ་མེད་པར་གནས་པ་དང་། །
འཚེ་བའི་ནང་ན་འཚེ་མེད་པ། །
ཀྱེ་མའོ་ཤིན་ཏུ་བདེ་བར་འཚོ། །
གནོད་སེམས་ཅན་གྱི་མི་ནང་ན། །
གནོད་སེམས་མེད་པར་གནས་པ་དང་། །
གནོད་སེམས་ཅན་ནང་གནོད་མེད་པ། །
ཀྱེ་མའོ་ཤིན་ཏུ་བདེ་བར་འཚོ། །
ཤ་ཁོན་ཅན་གྱི་མི་ནང་ན། །
ཤ་ཁོན་མེད་པར་གནས་པ་དང་། །
ཤ་ཁོན་ཅན་ནང་འཁོན་མེད་པ།
།ཀྱེ་མའོ་ཤིན་ཏུ་བདེ་བར་འཚོ། །
མི་ཐི་ལ་དག་རབ་བསྲེགས་ཀྱང་། །
ང་ལ་ཅི་ཡང་ཚིག་པ་མེད། །
ང་ལ་གང་དག་ཅི་མེད་པས། །
ཀྱེ་མའོ་ཤིན་ཏུ་བདེ་བར་འཚོ། །
ང་ལ་ཅི་ཡང་མེད་མོད་ཀྱི། །
དགའ་བ་ཟ་བར་བྱེད་པས་ན། །
འོད་གསལ་གྱི་ནི་ལྷ་བཞིན་དུ། །
ཀྱེ་མའོ་ཤིན་ཏུ་བདེ་བར་འཚོ། །
འཇིག་ཚོགས་ལ་ནི་མི་རྟེན་པས། །
ང་ལ་ཅི་ཡང་མེད་མོད་ཀྱི། །
དགའ་བ་ཟ་བར་བྱེད་པས་ན། །
ཀྱེ་མའོ་ཤིན་ཏུ་བདེ་བར་འཚོ། །
ལེན་པའི་རྐྱེན་གྱིས་ཕྲད་ཅིང་རེག་འགྱུར་གྱི། །
ལེན་མེད་ཅི་དང་ཕྲད་ཅིང་རེག་མེད་པས། །
བདག་དང་གཞན་གྱིས་བསྐྱེད་པའི་བདེ་སྡུག་གིས། །
དགོན་པའམ་གྲོང་དུ་རེག་པར་མི་འགྱུར་རོ། །
འཇིག་རྟེན་འདི་ན་བདེ་དང་སྡུག་བསྔལ་གྱིས། །
སྐྱེས་བུ་དམ་པ་མཐོ་དམན་མི་འགྱུར་ཞིང་། །
བརྟན་རྣམས་འདོད་པའི་རྒྱུ་ཡིས་མི་འཁྱལ་བར། །
སྐྱེས་བུ་དམ་པ་ཀུན་ཏུ་འགྲོ་བར་བྱེད། །
བདེ་བའི་ཚོམས་ཏེ་སུམ་ཅུ་པའོ།། །།

                                                                                                                                                                        རྩོམ་སྒྲིག་པ། མང་ར་བ།
       གསལ་འདེབས།
             རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ། 
             དྲ་བའི་སྦྲེལ་ཐགhttp://www.tb1025.cn