འཕགས་པ་བཀྲ་ཤིས་བརྩེགས་པ་ཞེས་བྱ་བ་བཞུགས་སོ།།

ཡོང་ཁུངས།   ངེད་དགེ་ལུགས་པའི་དྲ་བ།     སྤེལ་དུས།  2016-07-30 21:43:25     རྩོམ་པ་པོ།   སྟོན་པ་བཅོམ་ལྡ་འདས།    ཀློག་ཐེངས།  

 

771037911695233280.jpg

       

༄༅།།རྒྱ་གར་སྐད་དུ།ཨཱརྱ་མངྒལ་ཀཱུ་ཊ་ནཱ་མ་མ་ཧཱ་ཡཱ་ན་སཱུ་ཏྲ།བོད་སྐད་དུ། འཕགས་པ་བཀྲ་ཤིས་བརྩེགས་པ་ཞེས་བྱ་བ་ཐེག་པ་ཆེན་པོའི་མདོ།

སངས་རྒྱས་དང་བྱང་ཆུབ་སེམས་དཔའ་ཐབས་ཅད་ལ་ཕྱག་འཚལ་ལོ།

འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རི་བོ་མཆོག་གི་གནས། བཀྲ་ཤིས་བརྩེགས་པའི་ཕོ་བྲང་། མེ་ཏོག་བརྩེགས་པའི་ཚལ།རྡོ་རྗེ་བརྩེགས་པའི་གུར་ཁང་། རིན་ཆེན་སྤུངས་པའི་ཁྲི།གེ་སར་པདྨའི་གདན་ལ་བཞུགས་ཏེ། བཀྲ་ཤིས་པའི་འཁོར་མང་བོ་དང་ལྡན་པ། བྱང་ཆུབ་སེམས་དཔའ་སེམས་དཔའ་ཆེན་པོ་སྟོང་རྩ་བརྒྱད་ཀྱིས་བསྐོར་བ་ནི། འདི་ལྟ་སྟེ།བྱང་ཆུབ་སེམས་དཔའ་བཀྲ་ཤིས་མཆོག་དང་། བྱང་ཆུབ་སེམས་དཔའ་བཀྲ་ཤིས་སྡུད་དང་། བྱང་ཆུབ་སེམས་དཔའ་བཀྲ་ཤིས་རྒྱན་དང་། བྱང་ཆུབ་སེམས་དཔའ་བཀྲ་ཤིས་ཀུན་ཏུ་གཟིགས་དང་།བྱང་ཆུབ་སེམས་དཔའ་བཀྲ་ཤིས་ཡོངས་སུ་ཁྱབ་པ་དང་། བཀྲ་ཤིས་བྱང་ཆུབ་སེམས་དཔའ་ནམ་མཁའི་སྙིང་བོ་དང་། བཀྲ་ཤིས་བྱང་ཆུབ་སེམས་དཔའ་སའི་སྙིང་བོ་དང་། བཀྲ་ཤིས་བྱང་ཆུབ་སེམས་དཔའ་རླུང་གི་སྙིང་བོ་དང་། བཀྲ་ཤིས་བྱང་ཆུབ་སེམས་དཔའ་མེའི་སྙིང་བོ་དང་། བཀྲ་ཤིས་བྱང་ཆུབ་སེམས་དཔའ་ཆུའི་སྙིང་བོ་དང་། བཀྲ་ཤིས་བྱང་ཆུབ་སེམས་དཔའ་རྡོའི་སྙིང་བོ་དང་། བཀྲ་ཤིས་བྱང་ཆུབ་སེམས་དཔའ་རིན་པོ་ཆེའི་སྙིང་བོ་དང་། བཀྲ་ཤིས་བྱང་ཆུབ་སེམས་དཔའ་བཀོད་པ་མཐའ་ཡས་དང་། དེ་བཞིན་དུ་རྣམ་པར་གཟིགས་དང་། བློ་གྲོས་མཆོག་དང་། འོད་དཔག་མེད་དང་། ཚེ་དཔག་མེད་དང་། སངས་རྒྱས་འོད་སྲུང་དང་། བཀྲ་ཤིས་དམ་པའི་ཏོག་ཅན་དང་། བཀྲ་ཤིས་མཐུ་སྟོབས་དང་ལྡན་པ་ལག་ན་རྡོ་རྗེ་དང་། བཀྲ་ཤིས་མཁྱེན་པ་དང་ལྡན་པ་འཇམ་དཔལ་དང་། བཀྲ་ཤིས་ཐུགས་རྗེ་དང་ལྡན་པ་སྤྱན་རས་གཟིགས་དབང་ཕྱུག་དང་། ཤཱ་རིའི་བུ་དང་། རབ་འབྱོར་ལ་སོགས་པ་བཀྲ་ཤིས་པའི་འཁོར་སྟོང་རྩ་བརྒྱད་དང་། གཞན་ཡང་ལྷ་དང་ཀླུ་དང་། གནོད་སྦྱིན་དང་། དྲི་ཟ་དང་། གྲུལ་བུམ་དང་། མི་དང་མི་མ་ཡིན་པའི་ཚོགས་རབ་ཏུ་མང་བོ་དང་ཐབས་གཅིག་ཏུ་བཞུགས་ཏེ། དེའི་ཚེ་དེའི་དུས་ན་འཇམ་དཔལ་གཞོན་ནུར་གྱུར་པ་སྟན་ལས་ལངས་ཏེ། བཅོམ་ལྡན་འདས་ལ་བསྐོར་བ་མང་དུ་མཛད་དེ། པུས་མོ་གཡས་པའི་ལྷ་ང་ས་ལ་བཙུགས་ཏེ།བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བཀྲ་ཤིས་དང་ལྡན་པའི་འཁོར་མང་བོ་བཞུགས་པའི་སྐབས་འདིར་ཐོག་མར་བཀྲ་ཤིས་ཤིང་དགེ་བ།བར་དུ་བཀྲ་ཤིས་ཤིང་དགེ་བ། ཐ་མར་བཀྲ་ཤིས་ཤིང་དགེ་བ། བཀྲ་མི་ཤིས་པ་ཐམས་ཅད་ཞི་བར་བྱེད་པ། བཀྲ་ཤིས་པ་ཐམས་ཅད་ཡོངས་སུ་འདུ་བར་བྱེད་པ། ཉེས་སྐྱོན་སེལ་བ་ལེགས་པའི་ཡོན་ཏན་ཐམས་ཅད་ཡོངས་སུ་འདུ་བར་བྱེད་པ། དཔལ་དང་སྐལ་བ་བཟང་བོར་བྱེད་པའི་མདོ་ཞིག་བསྟན་དུ་གསོལ་ཞེས་ཞུས་པ་དང་། བཅོམ་ལྡན་འདས་ཀྱི་ཞལ་འཛུམ་པ་མཛད་ནས།འདི་སྐད་ཅེས་བཀའ་སྩལ་ཏོ། །འཇམ་དཔལ་གཞན་ཡང་བཀྲ་ཤིས་དང་ལྡན་པའི་འཁོར་རྣམས་ཉོན་ཅིག ངས་སྔོན་བྲམ་ཟེའི་ལུས་ཀྱིས་མི་མཇེད་ཀྱི་འཇིག་རྟེན་གྱི་ཁམས་འདིར་ཚེ་ལོ་སྟོང་ཐུབ་པའི་ཚེ། ཡང་དག་པར་རྫོགས་པའི་སངས་རྒྱས་བཀྲ་ཤིས་ཐམས་ཅད་འབྱུང་བའི་དཔལ་གཟི་བརྗིད་ཅེས་བྱ་བ་ལ་བཀྲ་ཤིས་བརྩེགས་པ་ཞེས་བྱ་བ་ཐེག་པ་ཆེན་པོའི་མདོ། ཡོན་ཏན་སྟོང་ལྡན་ཞེས་བྱ་བའི་ཆོས་ཀྱི་རྣམ་གྲངས་འདི་ཐོས་ཏེ། བཟུང་ཞིང་བཅངས་ཏེ་བཀླགས་ཤིང་བཤད་དེ། འཇིག་རྟེན་གྱི་ཁམས་འདི་ལས་ལེགས་ཉེས་ཀྱི་དབང་གིས་བཀྲ་མི་ཤིས་པའི་རྟགས་མང་དུ་བྱུང་སྟེ། དུས་ཚོད་ཉེས་པ་དང་། སྐྱེ་བ་ཉེས་པ་དང་། ལོ་ཟླ་མི་ཤེས་པ་ལ་སོགས་པ་དང་། ལས་བྱ་ཉེས་པ་དང་།ཟས་ཟ་ཉེས་པ་དང་། གོས་བཙེམ་ཉེས་པ་དང་། ཁྱིམ་དབུབས་ཉེས་པ་དང་། གྲོགས་བཙལ་ཉེས་པ་དང་། ནོར་བསྲེལ་ཉེས་པ་དང་། རྟ་ཕྱུགས་བསྲེལ་ཉེས་པ་དང་། ན་ཉེས་པ་དང་། ཤི་ཉེས་པ་དང་། ལམ་དུ་འཇུག་པ་ཉེས་པ་དང་། རོ་དྲངས་ཉེས་པ་དང་། གཤིད་བྱ་ཉེས་པ་དང་། དུར་གདབ་ཉེས་པ་ལ་སོགས་ཏེ་བཀྲ་མི་ཤིས་པ་ཐམས་ཅད་རབ་ཏུ་ཞི་བར་བྱེད་པ།བཀྲ་ཤིས་པ་ཐམས་ཅད་རབ་ཏུ་འདུ་བར་བྱེད་པ། ཉེས་སྐྱོན་ཐམས་ཅད་རབ་ཏུ་སེལ་བ།ལེགས་པའི་ཡོན་ཏན་ཐམས་ཅད་ཡོངས་སུ་འདུ་བར་བྱེད་པ། དཔལ་དང་སྐལ་བ་བཟང་བོར་གྱུར་པ། ཐོག་མཐའ་བར་དུ་དགེ་བ། བསོད་ནམས་ཐམས་ཅད་ཡོངས་སུ་སྡུད་པ། བཀྲ་ཤིས་ཀྱི་ཚོགས་ཐམས་ཅད་འཆར་ཞིང་ཤེས་པ།སྡིག་སྒྲིབ་ཐམས་ཅད་མེད་པར། འཕགས་པ་བཀྲ་ཤིས་བརྩེགས་པ་ཆེན་པོའི་མདོ་ངས་ཁྱོད་ལ་བསྟན་གྱིས། འདི་ཐོས་སམ་བརྩམས་ཤིང་བརྗོད་པ་ཙམ་གྱིས། བཀྲ་མི་ཤིས་པ་ཐམས་ཅད་རབ་ཏུ་ཞི་བར་བྱེད་པ། མོ་ངན་པ་དང་། རྨི་ལྟས་ངན་པ་དང་། པྲ་རྟགས་ངན་པ་དང་། ལྟས་ངན་པ་ཐམས་ཅད་ཟློག་པར་བྱེད་པའི་མདོ་སྡེ་སེམས་ཅན་ཐམས་ཅད་ལ་ཕན་པ་དང་། སྨན་པ་དང་། བདེ་བའི་ཕྱིར་ཁྱོད་ལ་ངས་བསྟན་གྱིས། རབ་ཏུ་ཉོན་ལ་ཡིད་ལ་ཆོངས་ཤིག་ཅེས་བཀའ་སྩལ་ཏོ།

དེ་ལ་འཇམ་དཔལ་གྱིས་ལེགས་སོ་ལེགས་སོ། །བཅོམ་ལྡན་འདས་སེམས་ཅན་ཐམས་ཅད་ཀྱི་བཀྲ་མི་ཤིས་པ་ཐམས་ཅད་ཟློག་པར་བྱེད་པའི་དོན་དུ་བཀྲ་ཤིས་བརྩེགས་པ་ཞེས་བྱ་བའི་མདོ་སྡེ་ཡོན་ཏན་བཀོད་པའི་རྒྱལ་བོ་ཆོས་ཀྱི་ཕུང་བོ་དེ་བདག་ཅག་རྣམས་ལ་བཤད་དུ་གསོལ་ཞེས་ཞུས་པ་དང་། བཅོམ་ལྡན་འདས་ཀྱིས་བཀའ་སྩལ་བ། འཇམ་དཔལ་གཞན་ཡང་བཀྲ་ཤིས་དང་ལྡན་པའི་འཁོར་དག་སྐྱེ་འགྲོ་མཐའ་དག་ལ་ལས་དང་། བསོད་ནམས་འཕེལ་ཤུགས་ཀྱིས་བཀྲ་ཤིས་པ་དང་མི་ཤིས་པ་གཉིས་སུ་བྱུང་སྟེ །སེམས་ཅན་གྱི་ནང་ནས་ཀྱང་མིའི་རིགས་སུ་གྱུར་པ་ལ། བཀྲ་མི་ཤིས་པའི་རྟགས་ནི་བཀླག་ཉེས་པ་དང་། བྲི་ཉེས་པ་དང་། བཤད་ཉེས་པ་དང་། སྒོམ་ཉེས་པ་དང་། སྐྱེས་མ་ཐག་ཏུ་འཆི་བ་དང་། དམུས་ལོང་ཅན་དང་། ཤ་བཀྲ་ཅན་དང་། གླང་ཤ་ཤ་རོ་དང་། ཤོ་རེ་དྭ་སྒལ་ཞར་སྒུར་དང་། གཟི་མིག་དྲུག་ལག་གདོང་སྨེ་ཅན། །ཝ་བ་ཤ་ལྷག་ཤ་མཚན་དང་། གཙུག་ངན་པ་དང་ཤ་འཛེར་ཅན། ཡན་ལག་ཆད་ལྷག་བྱུང་བ་རྣམས་བཀྲ་མི་ཤིས་པའི་སྐྱོན་ཡིན་ཏེ། དེ་བཞིན་ཕྱུགས་དང་སྒོ་ཁྱི་དང་ཞིང་ཁང་ནོར་རྫས་ཀུན་ལ་ཡང་། བཀྲ་མི་ཤིས་པའི་སྐྱོན་མང་དུ་བྱུང་སྟེ། དེའི་མཚན་མ་ངན་པ་དང་རྟགས་སོགས་བཀྲ་མི་ཤིས་པ་ཀུན།ཐམས་ཅད་བཟློག་ཅིང་བསྒྱུར་པ་སྟེ། ཉེས་སྐྱོན་མེད་པར་བྱ་བའི་ཕྱིར་བཀྲ་ཤིས་དོན་གྱི་ལྷ་ལྔ་ལ་ཕྱག་འཚལ་ལོ།། བཀྲ་ཤིས་མཆོག་གི་ལྷ་ཕྱོགས་སྐྱོང་མགོན་པོ་རྣམས་ལ་ཕྱག་འཚལ་ལོ།། བཀྲ་ཤིས་པར་བྱེད་པའི་སྔགས་བརྗོད་པར་བྱའོ།། སྱཱ་ད་ཡ་ཐེ་ད་ན་བྷི་ཛྙཱ་ཡེ་བྷི་ཛྙཱ་ཡེ། ཨུག་གེ་ཨུག་གེ་སྭ་སྟི་ཀྲ་བ་ཏི། ཨུ་མུ་ཁྷི་པྲ་སྭ་ར་དྭ། སྭ་སྟི་སྭ་སྟི། བྲུཾ་བྲུཾ་བྲུཾ་པྲ་ཧཀྵེ། མུ་ནེ་མུ་ནེ། གུ་ར་ནེ་གུ་ར་ནེ། ཨ་ཁེ་མུ་ཁེ། མུ་ར་ཀེ་མུ་ར་ཀེ ཨ་མ་ཏི་གུ་ར་ན་ཡ། སྭ་སྟི་སྭ་སྟི་སྭ་སྟི།གུ་ལེ་མུ་ལེ།ཀེ་ཤེ་ཀེ་ཤེ།ཙུར་ན་ཙུར་ན། བྷི་ར་མ་ལེ་སྭཱཧཱ། ཞེས་ཚིག་འདི་རབ་ཏུ་བརྗོད་དོ། །

སངས་རྒྱས་ཆོས་དང་དགེ་འདུན་ལ། །ཕྱག་འཚལ་སྐྱབས་གསོལ་ཤིས་གྱུར་ཅིག །

ཕྱི་ནང་གསང་བའི་བཀྲ་ཤིས་རྣམས། །དེང་འདིར་འབྱུང་ཞིང་འབབ་གྱུར་ཅིག །

ཕྱི་རུ་བཀྲ་ཤིས་ནམ་མཁའ་དག་པའི་མཁའ། །ནང་དུ་བཀྲ་ཤིས་སེམས་ཉིད་དག་པའི་ཀློང་། །

གསང་བའི་བཀྲ་ཤིས་ཆོས་ཉིད་དག་པའི་དབྱིངས། །མཁའ་ཀློང་དབྱིངས་གསུམ་བཀྲ་ཤིས་གང་ཡིན་པ། །

བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །གནམ་ལ་བཀྲ་ཤིས་ཉི་ཟླ་གཉིས། །

གཟའ་སྐར་མང་བོའི་ཚོགས་ཀྱིས་བསྐོར། །ས་ལ་བཀྲ་ཤིས་འབྱུང་བ་ལྔ། །

མེ་ཆུ་ས་རླུང་ཚོགས་ཀྱིས་བསྐོར། །བར་ན་བཀྲ་ཤིས་དཀོན་མཆོག་གསུམ། །

ཕྱོགས་བཅུའི་སངས་རྒྱས་ཚོགས་ཀྱིས་བསྐོར། །དཀོན་མཆོག་གསུམ་གྱི་བཀྲ་ཤིས་གང་ཡིན་པ། །

བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །

ན་མོ་བུད་དྷཱ་ཡ། ན་མོ་དྷརྨཱ་ཡ། ན་མོ་སངྒྷཱ་ཡ།

གནམ་ས་བར་གྱི་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །

དབུས་ན་བཀྲ་ཤིས་དོན་གྱི་ལྷ། །རྣམ་པར་སྣང་མཛད་བཀྲ་ཤིས་དོན་གྱི་ལྷ། །

རྣམ་པར་སྣང་མཛད་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །

ཤར་ན་བཀྲ་ཤིས་དོན་གྱི་ལྷ། །རྡོ་རྗེ་སེམས་དཔའི་བཀྲ་ཤིས་གང་ཡིན་པ། །

བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །

ལྷོ་ན་བཀྲ་ཤིས་དོན་གྱི་ལྷ། །རིན་ཆེན་འབྱུང་གནས་བཀྲ་ཤིས་གང་ཡིན་པ། །

བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ནུབ་ན་བཀྲ་ཤིས་དོན་གྱི་ལྷ། །

སྣང་བ་མཐའ་ཡས་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །

བྱང་ན་བཀྲ་ཤིས་དོན་གྱི་ལྷ། །དོན་ཡོད་གྲུབ་པའི་བཀྲ་ཤིས་གང་ཡིན་པ། །

བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །

ཨོཾ་བུད་དྷཱ་ཡ་དྷུ། ཨོཾ་བཛྲཱ་ཡ་དྷུ། ཨོཾ་རཏྣཱ་ཡ་དྷུ། ཨོཾཔདྨ་ཡ་དྷུ། ཨོཾ་ཀརྨཱ་ཡ་དྷུ།

བདག་དང་སྐལ་ལྡན་རིགས་ཀྱི་བུ། །དེང་གི་རྒྱུ་སྦྱོར་ཡོན་གྱི་བདག །

སངས་རྒྱས་རྣམས་ཀྱིས་བྱིན་བརླབས་ནས། །བཀྲ་ཤིས་དམ་པའི་མདོ་སྡེ་འདི། །

ང་ཡིས་བརྗོད་པའི་བསོད་ནམས་ཀྱིས། །ནམ་མཁའ་ལྟ་བུར་ཀུན་ཁྱབ་ཅིང་། །

ཉི་ཟླ་ལྟ་བུར་ཀུན་གསལ་ཏེ། །སྐར་ཚོགས་ལྟ་བུར་གྲངས་མང་ཞིང་།

སྤྲིན་ཚོགས་ལྟ་བུར་ལྷུན་གྲུབ་སྟེ། །འཇའ་ཚོན་ལྟ་བུར་མཛེས་སྡུག་ཅིང་། །

རི་རབ་ལྟ་བུར་བརྟན་བརྗིད་ཆེ། །ས་གཞི་ལྟ་བུར་ཀུན་བསྐྱེད་ཅིང་། །

རྒྱ་མཚོ་ལྟ་བུར་གཏིང་ཟབ་པའི། །ལྗོན་ཤིང་ལྟ་བུར་འདབ་རྒྱས་ཏེ། །

ཡིད་བཞིན་ནོར་བུ་རིན་ཆེན་ལྟར། །དགོས་འདོད་བཀྲ་ཤིས་ཆར་ལྟར་འབབ་གྱུར་ཅིག །

ཨོཾཨཱཿཧཱུཾ།རཏྣ་བྲུཾ་ནི་ཨ། བཀྲ་ཤིས་པར་གྱུར་ཅིག

དམིགས་པ་མེད་པ་སྦྱིན་པའི་ཕ་རོལ་ཕྱིན། །སྦྱིན་པ་ཆེན་པོའི་བཀྲ་ཤིས་གང་ཡིན་པ། །

བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །འཆལ་བ་མེད་པ་ཚུལ་ཁྲིམས་ཕ་རོལ་ཕྱིན། །

ཚུལ་ཁྲིམས་ཆེན་པོའི་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །

བྱུང་ཚོར་མེད་པ་བཟོད་པའི་ཕ་རོལ་ཕྱིན། །བཟོད་པ་ཆེན་པོའི་བཀྲ་ཤིས་གང་ཡིན་པ། །

བཀྲ་ཤིས་དེས་ཀྱང་དེང་འདིར་བདེ་ལེགས་ཤོག།ལེ་ལོ་མེད་པ་བརྩོན་འགྲུས་ཕ་རོལ་ཕྱིན།

བརྩོན་འགྲུས་ཆེན་པོའི་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །

འགྱུར་ལྡོག་མེད་པ་བསམ་གཏན་ཕ་རོལ་ཕྱིན། །བསམ་གཏན་ཆེན་པོའི་བཀྲ་ཤིས་གང་ཡིན་པ། །

བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །གང་ཡང་མ་འགག་ཐབས་ཀྱི་ཕ་རོལ་ཕྱིན། །

ཐབས་ཆེན་མཆོག་གི་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །

མ་ཆགས་ཐོགས་མེད་སྟོབས་ཀྱི་ཕ་རོལ་ཕྱིན། །སྟོབས་ཆེན་ཤུགས་ཀྱི་བཀྲ་ཤིས་གང་ཡིན་པ། །

བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །རེ་དོགས་མེད་པ་སྨོན་ལམ་ཕ་རོལ་ཕྱིན། །

སྨོན་ལམ་ཆེན་པོའི་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །

འཁྲུལ་བ་མེད་པ་ཤེས་རབ་ཕ་རོལ་ཕྱིན། །ཤེས་རབ་ཆེན་པོའི་བཀྲ་ཤིས་གང་ཡིན་པ། །

བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ཕ་རོལ་ཕྱིན་བཅུའི་བཀྲ་ཤིས་གང་ཡིན་པ། །

བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །བདེ་ལེགས་ཐམས་ཅད་མྱུར་ཐོབ་ཤོག །

ཨོཾ་སྭ་སྟི། ཏདྱ་ཐཱ། ག་ཏེ་ག་ཏེ། པཱ་ར་ག་ཏེ། པཱ་ར་སངྒ་ཏེ་བོདྷི་སྭཱ་ཧཱ།

མ་ཆགས་ཐོགས་མེད་འཁོར་ལོ་རིན་པོ་ཆེ།།འཁོར་ལོ་རིན་ཆེན་བཀྲ་ཤིས་གང་ཡིན་པ།

བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ཐེག་ཆེན་སྟོབས་ལྡན་གླང་བོ་རིན་པོ་ཆེ། །

གླང་བོ་རིན་ཆེན་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །

ཅང་ཤེས་ཤུགས་ལྡན་རྟ་མཆོག་རིན་པོ་ཆེ། །རྟ་མཆོག་རིན་ཆེན་བཀྲ་ཤིས་གང་ཡིན་པ། །

བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ཀུན་ལ་དབང་སྒྱུར་བློན་པོ་རིན་པོ་ཆེ། །

བློན་པོ་རིན་ཆེན་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །

ལོག་རྟོག་དཔུང་འཇོམས་དམག་དཔོན་རིན་པོ་ཆེ། །དམག་དཔོན་རིན་ཆེན་བཀྲ་ཤིས་གང་ཡིན་པ། །

བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ཐམས་ཅད་ཀུན་སྐྱེད་བཙུན་མོ་རིན་པོ་ཆེ། །

བཙུན་མོ་རིན་ཆེན་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །

དེ་མ་ཐག་ཏུ་བདག་ཅག་བདེ་ལེགས་ཤོག །བསམ་འཕེལ་དོན་གྲུབ་ནོར་བུ་རིན་པོ་ཆེ། །

ནོར་བུ་རིན་ཆེན་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །

ཨོཾ་བྷེ་ཤི་ཏི། རཏྣ་ན་བྷེ་ཤི་ཏི། སམ་མུད་ག་ཏི་ཡེ་སྭཱཧཱ། ཨོཾ་བརྱ་སུ་ལེ་བྷྲ་མ་ཁྲཾ་ཙེ། སྨྲ་ར་ཙྪད་ནཱཉྩེ་སྭཱཧཱ།

ན་མོ་དབུ་ལ་བཀྲ་ཤིས་གདུགས་ལྟར་སྐྱོབ། །སྐུ་ལ་བཀྲ་ཤིས་མི་ནུབ་རྒྱལ་མཚན་མཆོག །

གསུང་ལ་བཀྲ་ཤིས་ཆོས་དུང་གཡས་སུ་འཁྱིལ། །ཐུགས་ལ་བཀྲ་ཤིས་དཔལ་གྱི་བེའུ་གསལ། །

སྤྱན་ལ་བཀྲ་ཤིས་རིན་ཆེན་གསེར་གྱི་ཉ། །ལྗགས་ལ་བཀྲ་ཤིས་པདྨོ་ལོ་འདབ་རྒྱས། །

མགུལ་ལ་བཀྲ་ཤིས་རིན་ཆེན་བུམ་པ་འཁྱིལ། །ཕྱག་ན་བཀྲ་ཤིས་ཡོན་ཏན་ནོར་བུ་མཆོག །

ཞབས་ལ་བཀྲ་ཤིས་འཕྲིན་ལས་འཁོར་ལོ་མངའ། །བཀྲ་ཤིས་རྫས་བརྒྱད་དངོས་གྲུབ་དམ་པའི་མཆོག །

རྫས་མཆོག་བརྒྱད་ཀྱི་བཀྲ་ཤིས་གང་ཡིན་པ། །དེང་འདིར་བདག་ཅག་རྣམས་ལ་བཀྲ་ཤིས་ཕོབ། །

བཀྲ་ཤིས་དེས་ཀྱང་རྟག་ཏུ་བདེ་ལེགས་ཤོག །

ཨོཾ་སརྦ་ཨཱ་ཡུརྫྙཱ་ན་རཏ་ན་ཧ་མུ་ཀི བྲུཾ་བྲུཾ་བྲུཾ། ཧཱུཾ་ཧཱུཾ་ཧཱུཾ། སྭ་སྟི།

སངས་རྒྱས་ཞལ་ནས་གསུངས་པ་ཡི། །བཀྲ་ཤིས་བརྩེགས་པའི་སྨོན་ལམ་མདོ། །

ཚེ་འདིར་བདེ་སྐྱིད་ཚེ་རིང་ཞིང་། །བཀྲ་ཤིས་དཔལ་དང་ལོངས་སྤྱོད་ཐོབ། །

བསོད་ནམས་ཕུན་སུམ་ཚོགས་ལྡན་ཐོབ། །ཕྱི་མ་བླ་མེད་རྫོགས་སངས་རྒྱས། །

ཞེས་བཅོམ་ལྡན་འདས་ཀྱིས་བཀའ་སྩལ་བ་དང་། བཀྲ་ཤིས་དང་ལྡན་པའི་འཁོར་དེ་དག་དང་། ལྷ་དང་མི་དང་ལྷ་མ་ཡིན་དང་དྲི་ཟར་བཅས་པ་དེ་དག་བཅོམ་ལྡན་འདས་ཀྱིས་གསུངས་པ་ལ་རྗེས་སུ་ཡི་རང་ནས། དེ་བཞིན་གཤེགས་པ་ལ་མངོན་པར་བསྟོད་དོ། །

དེའི་ཚེ་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་གསོལ་བ། བཅོམ་ལྡན་འདས་ཀྱི་མདོ་སྡེ་འདིའི་ཇི་ལྟར་ལས་ཆོ་ག་དང་ལྡན་པར་བགྱི། དེའི་ཆོ་ག་ནི་ཇི་ལྟར་བགྱི་ཞེས་གསོལ་བ་དང་། བཅོམ་ལྡན་འདས་ཀྱིས་བཀའ་སྩལ་བ། འཇམ་དཔལ་འདིའི་ཆོ་ག་ནི་དཀོན་མཆོག་གི་ཕོ་བྲང་བཞེང་བ་དང་། ལྷ་ཁང་བཞེང་བ་དང་། གཙུག་ལག་ཁང་བཞེང་བ་དང་། མཆོད་རྟེན་བཞེང་བ་དང་། འབུམ་པ་བཞེང་བ་དང་། སྐུ་གདུང་དང་།གསུང་རབ་དང་། གླེགས་བམ་ལ་རབ་གནས་བྱེད་པ་དང་། ཡུལ་མཁར་གང་དུ་རྩིག་པ་དང་། ཁང་ཁྱིམ་གསར་བ་འབུབས་པ་དང་། བུ་ཁྱེའུ་བཙས་པ་དང་།བག་མ་གཏོང་ལེན་བྱེད་པ་དང་། རོ་འདོན་པ་དང་། གཤིད་བྱེད་པ་དང་། དུར་གདབ་པ་དང་། བཀྲ་མི་ཤིས་པ་དང་ལྟས་ངན་པ་དག་ཟློག་པར་བྱེད་པ། སྒྱུར་བར་བྱེད་པ་འདི་ནི་ཁ་ཟས་གཙང་ཞིང་རོ་བྲོ་བར་བྱེད་པའམ། ནས་འབྲས་ཏིལ་ལ་སོགས་པའི་འབྲུ་སྣ་ལྔའམ། ཤིང་ཐོག་གམ། འབྲུ་བཅུད་དམ། སྦྲང་རྩིའམ། འབྲང་རྒྱས་ལྟ་བུ་ལ་བརྗོད་པར་བྱའོ། །

དེའི་ཕན་ཡོན་ནི་བཀྲ་མི་ཤིས་པ་ཐམས་ཅད་རབ་ཏུ་ཞི་ནས།ཚེ་འདིར་བཀྲ་ཤིས་ཀུན་ལྡན་ཞིང་། །བླ་མེད་འབྲས་བུ་ཐོབ་ཅེས་བཀའ་སྩལ་ཏོ། །

སྐུ་ཡི་བཀྲ་ཤིས་སྐྱེ་མེད་ཆོས་ཀྱི་སྐུ།།གསུང་གི་བཀྲ་ཤིས་དམ་ཆོས་བདུད་རྩིའི་སྒྲ།

ཐུགས་ཀྱི་བཀྲ་ཤིས་མཉམ་ཉིད་འཁྲུལ་བ་མེད། །ཡོན་ཏན་བཀྲ་ཤིས་འགྲོ་དྲུག་གནས་ནས་འདྲེན། །

འཕྲིན་ལས་བཀྲ་ཤིས་རྩོལ་མེད་ལྷུན་གྱིས་གྲུབ། །ཉིན་ཡང་བཀྲ་ཤིས་མཚན་ཡང་བཀྲ་ཤིས་ཤོག །

ཉིན་མཚན་རྟག་ཏུ་བཀྲ་ཤིས་བདེ་ལེགས་ཤོག །རྐང་གཉིས་ཁྱེད་ཅག་བདེ་ལེགས་ཤོག །

རྐང་བཞི་ཁྱེད་ཅག་བདེ་ལེགས་ཤོག །ད་ལྟར་བྱུང་རྣམས་བདེ་ལེགས་ཤོག །

ཀུན་ཀྱང་བདེ་སྐྱིད་མཆོག་ཐོབ་ཤོག །ཨོཾ་སྐམ་ཀ་ར་སྐམ་ཀ་ར་ནིར་གད་ཙ་ཏ། ཨོཾ་སྭ་སྟི། འཕགས་པ་བཀྲ་ཤིས་བརྩེགས་པ་ཆེན་པོའི་མདོ་ལས་ཆོ་ག་དང་བཅས་པ་རྫོགས་སོ། །སརྦ་མངྒལཾ།།།།
        ཤིས་པར་བརྗོད་པའི་ཚིགས་སུ་བཅད་པ།

དཀོན་མཆོག་གསུམ་ལ་ཕྱག་འཚལ་ལོ། །ལྷ་ཡི་བཀྲ་ཤིས་དོན་གྲུབ་ཅིང་། །

ཕྱོགས་རྣམས་བཀྲ་ཤིས་བྱེད་པ་དེས། །ཁྱེད་ཀྱི་དོན་རྣམས་གྲུབ་གྱུར་ཅིག །

ཐམས་ཅད་མྱུར་དུ་མཐུན་པར་ཤོག །ཕྲེང་བ་མགོ་ལ་འདུག་པ་ལྟར།

ལག་པ་གཡས་ན་དཔལ་ཡོད་ཤོག །གཡོན་ནའང་དཔལ་ནི་གནས་གྱུར་ཅིག །

ཡན་ལག་ཀུན་ལའང་དཔལ་ཡོད་ཤོག །ཚོང་བ་དང་ནི་ནོར་ཚོལ་ཞིང་།

ཕྱོགས་བཅུ་དག་ཏུ་འགྲོ་བ་རྣམས། །རྙེད་པ་ཆེན་པོ་རྙེད་གྱུར་ཅིག །

དེ་དག་བདེ་བ་སྐྱིད་པར་ཤོག །དགོས་པ་ལ་ལ་གང་གི་ཕྱིར།

ཤར་ཕྱོགས་སུ་ནི་འགྲོ་བ་ན། །གང་དག་ཕྱོགས་དེར་གནས་པ་ཡི།

རྒྱུ་སྐར་ཁྱེད་ལ་སྐྱོང་གྱུར་ཅིག །སྨིན་དྲུག་དང་ནི་སྣར་མ་དང་། །

མགོ་དང་ལག་དང་ནབས་སོ་དང་། །རྒྱལ་དང་སྐག་ཅེས་བྱ་བ་སྟེ།

དེ་དག་རྣམས་ནི་ཤར་ཕྱོགས་པ། །རྒྱུ་སྐར་བདུན་པོ་དེ་དག་ནི།

འཇིག་རྟེན་སྐྱོང་བ་གྲགས་ལྡན་པ། །ཤར་ཕྱོགས་ལོགས་ན་ཡོད་ཅེས་བསྟན། །

དེ་དག་ཁྱེད་ལ་ཀུན་ཏུ་སྲུངས། །དེ་དག་བདག་པོ་རྒྱལ་བོ་ནི།

ཡུལ་འཁོར་སྲུང་ཞེས་གྲགས་པ་དེ། །དེ་ནི་དྲི་ཟ་ཀུན་གྱི་བདག

ཉི་མ་ལྷན་ཅིག་སྲུང་བར་ཤོག །དེ་ལ་བུ་ནི་མང་ཡོད་ལ།

མཁས་ཤིང་མིང་ཡང་མཐུན་པ་སྟེ། །དགུ་བཅུ་རྩ་གཅིག་ཟད་པར་ཡང་།

དབང་བོ་ཞེས་བྱ་སྟོབས་པོ་ཆེ།།དེ་རྣམས་ཁྱེད་ལ་ནད་མེད་ཅིང་།

ཤིས་པ་ལྷག་པར་སྐྱོང་གྱུར་ཅིག །ཤར་ཕྱོགས་ལོགས་ཀྱི་ཕྱོགས་ཆ་ན། །

ལྷ་མོ་གཞོན་ནུ་བརྒྱད་ཡོད་དེ། །རྒྱལ་དང་རྣམ་པར་རྒྱལ་མ་དང་།

དོན་གྲུབ་མ་དང་མི་ཕམ་དང་། །དགའ་མཆོག་མ་དང་དགའ་བདེ་མ།

དགའ་ཅན་མ་དང་དགའ་འཕེལ་མ། །དེ་དག་ཁྱེད་ལ་ནད་མེད་ཅིང་།

ཤིས་པ་ལྷག་པར་སྐྱོང་གྱུར་ཅིག །ཤར་ཕྱོགས་ལོགས་ཀྱི་ཕྱོགས་ཆ་ན། །

གཞི་འཛིན་ཅེས་བྱའི་མཆོད་རྟེན་ཡོད། །རྒྱལ་བ་སྐྱོབ་པ་དགྲ་བཅོམ་པ། །

དེ་རྣམས་ཀྱིས་ནི་བཞུགས་ཤིང་མཁྱེན། །དེ་ཡང་ཁྱེད་ལ་ནད་མེད་ཅིང་། །

ཤིས་པ་ལྷག་པར་སྐྱོང་གྱུར་ཅིག །ཕྱོགས་ན་ཁྱེད་ཅག་བདེ་བར་ཤོག

ཁྱེད་ཅག་སྡིག་པར་མ་གྱུར་ཅིག །ལྷ་རྣམས་ཀུན་གྱིས་རབ་བསྲུངས་ནས། །

ནོར་རྣམས་རྙེད་དེ་ལྡོག་པར་ཤོག །དགོས་པ་ལ་ལ་གང་གི་ཕྱིར།

ལྷོ་ཕྱོགས་སུ་ནི་འགྲོ་བ་ན། །གང་དག་ཕྱོགས་དེར་གནས་པ་ཡི།

རྒྱུ་སྐར་ཁྱེད་ལ་སྐྱོང་གྱུར་ཅིག །མཆུ་དང་གྲེ་དང་དབོ་དང་ནི།

མེ་བཞི་ནག་པ་ལྔ་བ་ཡིན། །ས་རི་དང་ནི་ས་ག་སྟེ། །

དེ་དག་རྣམས་ནི་ལྷོ་ཕྱོགས་པ། །རྒྱུ་སྐར་བདུན་པོ་དེ་དག་ནི།

ཛའཇིག་རྟེན་སྐྱོང་བ་གྲགས་ལྡན་པ།།ལྷོ་ཕྱོགས་ལོགས་ན་ཡོད་ཅེས་བསྟན།།

དེ་དག་ཁྱེད་ལ་ཀུན་ཏུ་སྲུངས།།དེ་དག་བདག་པོ་རྒྱལ་བོ་ནི།།

འཕགས་སྐྱེས་པོ་ཞེས་བྱ་བར་བརྗོད།།དེ་ནི་གྲུལ་བུམ་ཀུན་གྱི་བདག།

གཤིན་རྗེ་ལྷན་ཅིག་སྲུང་བར་ཤོག།དེ་ལ་བུ་ནི་མང་ཡོད་ལ།།

མཁས་ཤིང་མང་ཡང་མཐུན་པ་སྟེ།།དགུ་བཅུ་རྩ་གཅིག་ཟད་པར་ཡང་།།

དབང་བོ་ཞེས་བྱ་སྟོབས་པོ་ཆེ།།དེ་རྣམས་ཁྱེད་ལ་ནད་མེད་ཅིང་།།

ཤིས་པ་ལྷག་པར་སྐྱོང་གྱུར་ཅིག།ལྷོ་ཕྱོགས་ལོགས་ཀྱི་ཕྱོགས་ཆ་ན།།

ལྷ་མོ་གཞོན་ནུ་བརྒྱད་ཡོད་དེ།།དཔལ་ལྡན་མ་དང་གྲགས་ལྡན་མ།།

གྲགས་པ་ཐོབ་དང་གྲགས་འཛིན་དང་།།ལེགས་པར་ལངས་དང་རབ་སྔ་དང་།།

ལེགས་པར་སད་དང་བདེ་སྒྲུབ་མ།།དེ་དག་ཁྱེད་ལ་ནད་མེད་ཅིང་།།

ཤིས་པ་ལྷག་པར་སྐྱོང་བར་ཤོག།ལྷོ་ཕྱོགས་ལོགས་ཀྱི་ཕྱོགས་ཆ་ན།།

པདྨ་ཞེས་བྱའི་མཆོད་རྟེན་ཡོད།།རྟག་ཏུ་གཟི་བརྗིད་ཀྱིས་ཀྱང་འབར།།

རྟག་ཏུ་ཐམས་ཅད་གསལ་བར་བྱེད།།དེ་ཡང་ཁྱེད་ལ་ནད་མེད་ཅིང་།།

ཤིས་པ་ལྷག་པར་སྐྱོང་གྱུར་ཅིག།ཕྱོགས་ན་ཁྱེད་ཅག་བདེ་བར་ཤོག།

ཁྱེད་ཅག་སྡིག་པ་མ་གྱུར་ཅིག།ལྷ་རྣམས་ཀུན་གྱིས་རབ་བསྲུངས་ནས།།

ནོར་རྣམས་རྙེད་དེ་ལྡོག་པར་ཤོག།དགོས་པ་ལ་ལ་གང་གི་ཕྱིར།།

ནུབ་ཕྱོགས་སུ་ནི་འགྲོ་བ་ན།།གང་དག་ཕྱོགས་དེར་གནས་པ་ཡི།།

རྒྱུ་སྐར་ཁྱེད་ལ་སྐྱོང་གྱུར་ཅིག།ལྷ་མཚམས་དང་ནི་སྣྲོན་དང་ཡང་།།

བརྩོན་འགྲུས་བརྟན་ལྡན་སྣྲུབས་དང་ནི།།ཆུ་སྟོད་ཆུ་སྨད་བྱི་བཞིན་དང་།།

གྲོ་བཞིན་དེ་ནི་བདུན་པ་ཡིན།།རྒྱུ་སྐར་བདུན་པོ་དེ་དག་ནི།།

འཇིག་རྟེན་སྐྱོང་བ་གྲགས་ལྡན་པ།།ནུབ་ཕྱོགས་ལོགས་ན་ཡོད་ཅེས་བསྟན།།

དེ་དག་ཁྱེད་ལ་ཀུན་ཏུ་སྲུངས།།དེ་དག་བདག་པོ་རྒྱལ་བོ་ནི།།

མིག་མི་བཟང་ཞེས་བྱ་བར་ཤེས།།དེ་ནི་ཀླུ་རྣམས་ཀུན་གྱི་བདག།

ཆུ་ལྷ་ལྷན་ཅིག་བསྲུང་བར་ཤོག།དེ་ལ་བུ་ནི་མང་ཡོད་ལ།།

མཁས་ཤིང་མིང་ཡང་མཐུན་པ་དེ།།དགུ་བཅུ་རྩ་གཅིག་ཟད་པར་ཡང་།།

དབང་བོ་ཞེས་བྱ་སྟོབས་པོ་ཆེ།།དེ་དག་ཁྱེད་ལ་ནད་མེད་ཅིང་།།

ཤིས་པ་ལྷག་པར་སྐྱོང་གྱུར་ཅིག།ནུབ་ཕྱོགས་ལོགས་ཀྱི་ཕྱོགས་ཆ་ན།།

ལྷ་མོ་གཞོན་ནུ་བརྒྱད་ཡོད་དེ།།རྣ་ཆ་སྲ་མཁྲེགས་མ་དང་ནི།།

པདྨ་དཀར་དང་སྐྱ་རེངས་དང་།།ཆ་མེད་གཅིག་དང་དགུ་བ་དང་།།

རོལ་དང་གནག་དང་སྟོབས་མྱུར་སྲིད།།དེ་དག་ཁྱེད་ལ་ནད་མེད་ཅིང་།།

ཤིས་པ་ལྷག་པར་སྐྱོང་བར་ཤོག།ནུབ་ཕྱོགས་ལོགས་ཀྱི་ཕྱོགས་ཆ་ན།།

ནུབ་ཅེས་བྱ་བའི་རི་བོ་ཡོད།།ཉི་མ་ཟླ་བ་གཉིས་ཀའང་ནུབ།།

ནུབ་པའང་ཁྱེད་ལ་ནོར་སྦྱིན་འགྱུར།།དེ་ཡང་ཁྱེད་ལ་ནད་མེད་ཅིང་།།

ཤིས་པ་ལྷག་པར་སྐྱོང་གྱུར་ཅིག།ཕྱོགས་ན་ཁྱེད་ཅག་བདེ་བར་ཤོག།

ཁྱེད་ཅག་སྡིག་པ་མ་གྱུར་ཅིག།ལྷ་རྣམས་ཀུན་གྱིས་རབ་བསྲུངས་ནས།།

ནོར་རྣམས་རྙེད་དེ་ལྡོག་པར་ཤོག།དགོས་པ་ལ་ལ་གང་གི་ཕྱིར།།

བྱང་ཕྱོགས་སུ་ནི་འགྲོ་བ་ན།།གང་དག་ཕྱོགས་དེར་གནས་པ་ཡི།།

རྒྱུ་སྐར་ཁྱེད་ལ་སྐྱོང་གྱུར་ཅིག།མོན་གྲུ་དང་ནི་མོན་གྲེ་དང་།།

ཁྲུམས་སྟོད་དང་ནི་ཁྲུམས་སྨད་དང་།།ནམ་གྲུ་དང་ནི་ཐ་སྐར་དང་།།

བྲ་ཉེ་དང་ནི་བདུན་པ་ཡིན།།རྒྱུ་སྐར་བདུན་པོ་དེ་དག་ནི།།

འཇིག་རྟེན་སྐྱོང་བ་གྲགས་ལྡན་པ།།བྱང་ཕྱོགས་ལོགས་ན་ཡོད་ཅེས་བསྟན།།

དེ་དག་ཁྱེད་ལ་ཀུན་ཏུ་སྲུངས།།དེ་དག་བདག་པོ་རྒྱལ་བོ་ནི།།

མི་ལ་ཞོན་པ་ལུས་ངན་པ།།གནོད་སྦྱིན་ཀུན་གྱི་བདག་པོ་སྟེ།།

ནོར་བཟང་ལྷན་ཅིག་སྲུང་བར་ཤོག།དེ་ལ་བུ་ནི་མང་ཡོད་ལ།།

མཁས་ཤིང་མིང་ཡང་མཐུན་པ་སྟེ།།དགུ་བཅུ་རྩ་གཅིག་ཟད་པར་ཡང་།།

དབང་བོ་ཞེས་བྱ་སྟོབས་པོ་ཆེ།།དེ་དག་ཁྱེད་ལ་ནད་མེད་ཅིང་།།

ཤིས་པ་ལྷག་པར་སྐྱོང་གྱུར་ཅིག།བྱང་ཕྱོགས་ལོགས་ཀྱི་ཕྱོགས་ཆ་ན།།

ལྷ་མོ་གཞོན་ནུ་བརྒྱད་ཡོད་དེ།།རབ་ཆགས་ལྷ་མོ་སྟོང་ལྷ་མོ།།

ས་དང་དེ་བཞིན་པདྨ་ཅན།།རྒྱལ་བོ་ཆེ་ལ་ཉེ་གནས་དང་།།

རེ་དང་ཁྲེལ་ཡོད་དཔལ་ལྡན་མ།།དེ་དག་ཁྱེད་ལ་ནད་མེད་ཅིང་།།

ཤིས་པ་ལྷག་པར་སྐྱོང་བར་ཤོག།བྱང་ཕྱོགས་ལོགས་ཀྱི་ཕྱོགས་ཆ་ན།།

སྤོས་ངད་ལྡན་པའི་རི་བོ་ཡོད།།གནོད་སྦྱིན་འབྱུང་བོ་ཀུན་གྱི་གནས།།

རྩེ་མོ་སྣ་ཚོགས་ལྟ་ན་སྡུག།དེ་ཡང་ཁྱེད་ལ་ནད་མེད་ཅིང་།།

ཤིས་པ་ལྷག་པར་སྐྱོང་གྱུར་ཅིག།ཕྱོགས་ན་ཁྱེད་ཅག་བདེ་བར་ཤོག།

ཁྱེད་ཅག་སྡིག་པ་མ་གྱུར་ཅིག།ལྷ་རྣམས་ཀུན་གྱིས་རབ་བསྲུངས་ནས།།

ནོར་རྣམས་རྙེད་དེ་ལྡོག་པར་ཤོག།རྒྱ་སྐར་ཉི་ཤུ་རྩ་བརྒྱད་པོ།།

ཕྱོགས་བཞི་དག་ན་བདུན་བདུན་གནས།།ལྷ་ཡི་བུ་མོ་སུམ་ཅུ་གཉིས།།

ཕྱོགས་བཞི་དག་ན་བརྒྱད་བརྒྱད་གནས།།

དགེ་སྦྱོང་བརྒྱད་དང་བྲམ་ཟེ་བརྒྱད།།ཡུལ་རྣམས་ན་ནི་གྲོང་རྡལ་བརྒྱད།།

དབང་བོར་བཅས་པའི་ལྷ་བརྒྱད་རྣམས།།དེ་དག་ཁྱེད་ལ་ཀུན་ཏུ་སྲུངས།།

ཁྱེད་ཅག་འགྲོ་ནའང་བཀྲ་ཤིས་གྱུར།།ལྡོག་པ་ན་ཡང་བཀྲ་ཤིས་ཤོག།

གཉེན་ལ་ལྟ་བ་བཀྲ་ཤིས་ཤོག།གཉེན་གྱིས་ལྟ་བའང་བཀྲ་ཤིས་ཤོག།

དབང་བཅས་གནོད་སྦྱིན་རྒྱལ་ཆེན་དང་།།དགྲ་བཅོམ་པ་དག་སྙིང་བརྩེ་བས།།

ཐམས་ཅད་དུ་ནི་བཀྲ་ཤིས་དང་།།བདུད་རྩི་ཤིས་པ་ཐོབ་པར་ཤོག།

ཚངས་པ་དང་ནི་དེ་བཞིན་ནོར་རྒྱས་དང་།།ཟག་པ་མེད་པ་རྣམ་པར་གྲོལ་རྣམས་དང་།།

ཀླུ་དང་གནོད་སྦྱིན་རྟག་ཏུ་སྙིང་རྗེས་སྲུངས།།སྟོན་བརྒྱ་མཚུངས་པར་ཚེ་ནི་སྐྱོང་བར་ཤོག།

འཕགས་པ་རྒྱ་ཆེའི་རོལ་བའི་མདོའི།ཚོང་དཔོན་ག་གོན་དང་བཟང་བོའི་ལེའུ་ལས་བྱུང་བ།ཤིས་པར་བརྗོད་པའི་ཚིགས་སུ་བཅད་པ་རྫོགས་སོ། །སརྦ་མངྒལཾ། །ཤུ་བྷཾ།།།།

    ཞེས་པ་འདི་ཡང་ཆོས་སྡེ་ཆེན་པོ་བླ་བྲང་བཀྲ་ཤིས་འཁྱིལ་གྱི་ཤིང་དཔར་ལས་བཤུས་པའོ།།


                                                          རྩོམ་སྒྲིག་པ། མང་ར་བ།
        གསལ་འདེབས། 
             རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
             དྲ་བའི་སྦྲེལ་ཐགhttp://www.tb1025.cn

བརྒྱུད་འགོད།