ཆེད་དུ་བརྗོད་པའི་ཚོམས་ལས་དེ་བཞིན་གཤེགས་པའི་ཚོམས།
འཇིག་རྟེན་འདི་ན་ཀུན་རིག་ཀུན་ཟིལ་གནོན། །
འདི་ནི་ཆོས་རྣམས་ཀུན་གྱིས་མ་གོས་ཤིང་། །
ཀུན་སྤངས་སྲེད་ཟད་རབ་ཏུ་རྣམ་གྲོལ་བ། །
ཉིད་ཀྱིས་མངོན་མཁྱེན་པ་ལ་སུ་ཡིད་བསྟན། །
དེ་བཞིན་གཤེགས་པ་ལྷ་མིའི་སྟོན་པ་སྟེ། །
སྟོབས་རྣམས་ཀུན་ལྡན་ཐམས་ཅད་མཁྱེན་པ་ང་། །
བྱང་ཆུབ་བརྙེས་ནས་ཉིད་ཀྱིས་རབ་སྟོན་པ། །
མཚུངས་མེད་མཉམ་མེད་ང་ལ་སུ་ཡིས་བསྟན། །
ང་ནི་འཇིག་རྟེན་དགྲ་བཅོམ་སྟེ། །
འཇིག་རྟེན་དག་ན་བླ་མེད་དང་། །
ལྷ་དང་བཅས་པའི་འཇིག་རྟེན་ན། །
བདུད་རྣམས་ཟིལ་གནོན་རྒྱལ་བ་ང་། །
ང་དང་འདྲ་བ་མེད་པས་ན། །
ང་ལ་སློབ་དཔོན་སུ་ཡང་མེད། །
འཇིག་རྟེན་འདི་ནི་གཅིག་པུ་ཡིས། །
རྫོགས་པའི་བྱང་ཆུབ་བླ་མེད་བརྙེས། །
གང་ཞིག་ཟག་པ་ཟད་བརྙེས་པ། །
རྒྱལ་བ་ང་འདྲར་ཤེས་པར་གྱིས། །
སྡིག་པའི་ཆོས་ལས་ང་རྒྱལ་བས། །
དེ་བས་ཉེ་འགྲོ་ང་རྒྱལ་བ། །
འཇིག་རྟེན་ཡུལ་སྲེད་བརྒལ་བ་ཡི། །
ཀུན་མཁྱེན་སངས་རྒྱས་མྱ་ངན་འདས། །
འཇིག་རྟེན་པ་ལ་མ་བསྟན་པར། །
ཀུན་ནས་འབྱུང་བ་མི་ཤེས་པས། །
ཝཱ་ར་ཎཱ་སིར་སོང་ནས་སུ། །
ངས་ནི་ཆོས་ཀྱིས་རྔ་བརྡུང་ཞིང་། །
འཇིག་རྟེན་སུས་ཀྱང་མ་བསྐོར་བའི། །
ཆོས་ཀྱི་འཁོར་ལོ་བསྐོར་བར་བྱ། །
དཔའ་བོ་དེ་བཞིན་གཤེགས་པ་རྣམས། །
འདི་ན་ཆོས་ཀྱིས་འདུལ་བར་མཛད། །
དེ་དག་ཆོས་ཀྱིས་བཏུལ་བ་ལ། །
མཁས་པ་སུ་ཡང་སྨོད་མི་བྱེད། །
བརྟན་གང་ཏིང་འཛིན་ལ་ཞུགས་ཤིང་། །
ངེས་འབྱུང་ཞི་ལ་དགའ་བ་དང་། །
སྐུ་ཡི་ཐ་མ་འཛིན་པ་ཡི། །
རྫོགས་པའི་སངས་རྒྱས་གྲགས་ལྡན་པ། །
ཤེས་རབ་མྱུར་བ་དེ་དག་ལ། །
ལྷ་དང་མི་རྣམས་དགའ་བར་བྱེད། །
གང་དག་འདས་པའི་སངས་རྒྱས་དང་། །
གང་དག་མ་བྱོན་སངས་རྒྱས་དང་། །
གང་དག་ད་ལྟར་རྫོགས་སངས་རྒྱས། །
མང་པོའི་མྱ་ངན་སེལ་མཛད་པ། །
བཞུགས་པར་གྱུར་ཅིང་བཞུགས་པ་དང་། །
དེ་བཞིན་བཞུགས་པར་འགྱུར་ཀུན་གྱིས། །
དམ་ཆོས་བླ་མ་མཛད་པ་འདི། །
རྫོགས་སངས་རྒྱས་ཀྱི་ཆོས་ཉིད་ཡིན། །
དེ་བས་འདི་ན་བདག་དགའ་ཞིང་། །
བདག་ཉིད་ཆེན་པོ་མངོན་འདོད་པས། །
སངས་རྒྱས་བསྟན་པ་དྲན་བྱས་ཏེ། །
དམ་པའི་ཆོས་ལ་བླ་མར་བྱ། །
མི་གང་སངས་རྒྱས་བསྟན་པ་ལ། །
དད་པ་མ་སྐྱེས་བྱིས་པ་དེ། །
རྒུད་པའི་གནས་སུ་འགྲོ་འགྱུར་ཏེ། །
སྲིན་མོ་རྣམས་ཀྱིས་ཚོང་པ་བཞིན། །
མི་གང་སངས་རྒྱས་བསྟན་པ་ལ། །
དད་པ་བསྐྱེད་པ་ཤེས་རབ་ཅན། །
དེ་ནི་བདེ་བར་ཕ་རོལ་འགྲོ། །
སྤྲིན་ཤུགས་ལྡན་པས་ཚོང་པ་བཞིན། །
དེ་བཞིན་གཤེགས་པ་མཉམ་མེད་མཚུངས་པ་མེད། །
བདེ་བར་རྣམ་རྟོག་དེ་བཞིན་རབ་དབེན་པའི། །
རྣམ་རྟོག་གཉིས་པོ་སྤྱོད་པའི་སངས་རྒྱས་རྣམས། །
མུན་བསལ་ཕ་རོལ་གཤེགས་ཤིང་གྲགས་དང་ལྡན། །
དེས་ནི་བརྙེས་བྱ་བ་རྙེས་ཤིང་ཡིད་དབང་གྱུར། །
ཀུན་གྲོལ་ཟག་ཟད་རབ་ཏུ་རྣམ་པར་གྲོལ། །
རྣམ་གྲོལ་ཐུགས་ལྡན་ཐ་བ་ཟག་མེད་རྣམས། །
ལུས་ཅན་འཇིག་རྟེན་རྣམས་ལ་ཕན་ཕྱིར་གཟིགས། །
འགའ་ཞིག་རི་བོའི་སྤོ་ལ་འདུག་ནས་སུ། །
འགྲོ་བ་རྣམས་ལ་ཀུན་ཏུ་ལྟ་བ་ལྟར། །
དེ་བཞིན་བློ་བཟང་མྱ་ངན་བྲལ་བ་དག །
ཆོས་ལས་བྱུང་བའི་ཁང་བཟང་སྟེང་གཤེགས་ནས། །
སྐྱེ་བོ་སྐྱེ་རྒས་ཟིལ་གནོན་མྱ་ངན་གྱིས། །
གདུངས་པ་རྣམས་ལ་ཀུན་ཏུ་སྤྱན་གཟིགས་ནས། །
འཆི་བ་མེད་པའི་སྒོ་མོ་འབྱེད་མཛད་ཀྱི། །
གང་དག་ཉན་འདོད་ཐེ་ཚོམ་བསལ་བར་གྱིས། །
དེ་བཞིན་གཤེགས་པའི་ཚོམས་ཏེ་ཉི་ཤུ་གཅིག་པའོ།། །།
རྩོམ་སྒྲིག་པ། མང་ར་བ།
གསལ་འདེབས།
རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
དྲ་བའི་སྦྲེལ་ཐགhttp://www.tb1025.cn
