ཆེད་དུ་བརྗོད་པའི་ཚོམས་ལས་རྟ་ཡི་ཚོམས།
ཇི་ལྟར་རྟ་བཟང་ལྕག་གིས་གཞུས་པ་ན། །
སྐྲག་ཅིང་ཤུགས་དྲག་འགྲོ་བྱེད་ཇི་བཞིན་དུ། །
དད་པ་ཚུལ་ཁྲིམས་ཏིང་འཛིན་ལྡན་པ་དང་། །
ཆོས་རྣམས་རྣམ་པར་གཏན་ལ་འབེབས་ལྡན་ཞིང་། །
དབང་པོ་མཉམ་གཞག་བཟོད་ལྡན་འགྲོགས་བདེ་བ། །
སྐྱོབ་པ་དེ་རྣམས་སྲེད་པ་མ་ལུས་སྤོང་། །
ཇི་ལྟར་རྟ་བཟང་ལྕག་གིས་གཞུས་པ་ན། །
སྐྲག་ཅིང་ཤུགས་དྲག་འགྲོ་བྱེད་ཇི་བཞིན་དུ། །
དད་པ་ཚུལ་ཁྲིམས་ཏིང་འཛིན་ལྡན་པ་དང་། །
ཆོས་རྣམས་རྣམ་པར་གཏན་ལ་འབེབས་ལྡན་ཞིང་། །
རིག་དང་རྐང་པར་ལྡན་ཞིང་དྲན་ལྡན་པའི། །
སྐྱོབ་རྣམས་སྡུག་བསྔལ་མ་ལུས་སྤོང་བར་མཛད། །
འདུལ་སྦྱོད་བྱེད་པས་ལེགས་བརྟུལ་རྟ་ལྟ་བུར། །
གང་ཞིག་དབང་པོ་ལེགས་པར་སྡོམ་པ་ཡིས། །
ཁྲོ་བ་སྤོང་ཞིང་ཟག་པ་ཟད་བྱེད་པ། །
ཐུབ་དེ་རྣམས་ཀྱིས་ལྷ་ཡི་བར་དུ་མྱོང་། །
བག་ཡོད་པ་ཡིས་བག་མེད་དང་། །
མི་ཉལ་མང་པོས་གཉིད་ལོག་དང་། །
རྟ་བཟང་གིས་ནི་རྟ་རྒོད་ལྟར། །
ཤིན་ཏུ་མཁས་པས་སྤངས་ནས་འགྲོ། །
རྟ་བཟང་ལ་ནི་ལྕག་བཞིན་དུ། །
གང་ཞིག་ངོ་ཚ་ཤེས་སྟེན་ཅིང་། །
ཤེས་རབ་ལེགས་པར་མཉམ་བཞག་པ། །
དེས་ནི་སྡིག་པ་སེལ་བར་བྱེད། །
དུལ་བ་འདུན་སར་འགྲོ་བྱེད་ཅིང་། །
དུལ་བ་རྒྱལ་པོ་ལྷག་པར་ཞོན། །
གང་ཞིག་ཚིག་ནང་བཟོད་བྱེད་པ། །
དུལ་བ་མི་ཡི་ནང་ན་མཆོག །
གླང་པོའི་ནང་ན་གླང་ཆེན་དང་། །
སིན་དུའི་ཅང་ཤེས་རྟ་དང་ནི། །
དྲེའུ་འདུལ་བྱེད་པ་གང་ཡིན་པ། །
དེ་བས་བདག་ཉིད་འདུལ་བ་མཆོག །
བདག་ཉིད་ལེགས་འདུལ་གང་ཡིན་པའི། །
མཁས་དེས་ཞི་བ་ཐོབ་འགྱུར་གྱི། །
བཞོན་པ་དེ་དག་རྣམས་ཀྱིས་ནི། །
ས་དེ་མངོན་པར་འཐོབ་མི་སྲིད། །
གླང་པོའི་ནང་ན་གླང་ཆེན་དང་། །
སིན་དུའི་ཅང་ཤེས་རྟ་དང་ནི། །
དྲེའུ་འདུལ་བྱེད་པ་གང་ཡིན་པ། །
དེ་བས་བདག་ཉིད་འདུལ་བ་མཆོག །
བདག་ཉིད་ལེགས་འདུལ་དྲན་ལྡན་གང་། །
དེས་ནི་སྡུག་བསྔལ་མཐར་ཕྱིན་གྱི། །
བཞོན་པ་དེ་དག་རྣམས་ཀྱིས་ནི། །
ས་དེ་མངོན་པར་འཐོབ་མི་སྲིད། །
གླང་པོའི་ནང་ན་གླང་ཆེན་དང་། །
སིན་དུའི་ཅང་ཤེས་རྟ་དང་ནི། །
དྲེའུ་འདུལ་བྱེད་པ་གང་ཡིན་པ། །
དེ་བས་བདག་ཉིད་འདུལ་བ་མཆོག །
བདག་ཉིད་ལེགས་འདུལ་དྲན་ལྡན་གང་། །
དེས་ནི་འགྲོ་རྣམས་སྤོང་འགྱུར་གྱི། །
བཞོན་པ་དེ་དག་རྣམས་ཀྱིས་ནི། །
ས་དེ་མངོན་པར་འཐོབ་མི་སྲིད། །
གླང་པོའི་ནང་ནི་གླང་ཆེན་དང་། །
སིན་དུའི་ཅང་ཤེས་རྟ་དང་ནི། །
དྲེའུ་འདུལ་བྱེད་པ་གང་ཡིན་པ། །
དེ་བས་བདག་ཉིད་འདུལ་བ་མཆོག །
བདག་ཉིད་ལེགས་འདུལ་གང་ཡིན་དེས། །
འཆིང་བ་བཅད་ནས་འགྲོ་འགྱུར་གྱི། །
བཞོན་པ་དེ་དག་རྣམས་ཀྱིས་ནི། །
ས་དེ་མངོན་པར་འཐོབ་མི་སྲིད། །
འདུལ་སྦྱོང་བྱེད་པས་རྟ་བཟང་ལྟར། །
བདག་ཉིད་ཁོ་ན་གདུལ་བར་བྱ། །
བདག་མེད་ལེགས་པར་འདུལ་བ་ཡིས། །
སྡུག་བསྔལ་རྣམས་ཀྱི་ཕ་མཐར་ཕྱིན། །
བདག་ཉིད་ཁོ་ན་བདག་གི་མགོན། །
བདག་ཉིད་བདག་གི་སྐྱབས་ཡིན་པས། །
འདུལ་སྤྱོད་བྱེད་པས་རྟ་བཟང་ལྟར། །
དེ་བས་བདག་ཉིད་གདུལ་བར་བྱ། །
རྟ་ཡི་ཚོམས་ཏེ་བཅུ་དགུ་པའོ།། །།
རྩོམ་སྒྲིག་པ། མང་ར་བ།
གསལ་འདེབས།
རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
དྲ་བའི་སྦྲེལ་ཐགhttp://www.tb1025.cn