ཆེད་དུ་བརྗོད་པའི་ཚོམས་ལས་མེ་ཏོག་གི་ཚོམས།

ཡོང་ཁུངས།   ངེད་དགེ་ལུགས་དྲ་བ།     སྤེལ་དུས།  2016-07-18 10:16:07     རྩོམ་པ་པོ།   དགྲ་བཅོམ་པ་ཆོས་སྐྱོབས།    ཀློག་ཐེངས།  

ལྷར་བཅས་གཤིན་རྗེའི་འཇིག་རྟེན་འདི། །

ས་སྟེང་ལས་རྒྱལ་གང་ཞིང་ལགས། །

མེ་ཏོག་ལྟ་བུར་རབ་འདོད་པའི། །

ཆོས་བཞི་ལེགས་པར་སྟོན་མཁས་གང་། །

ལྷར་བཅས་གཤིན་རྗེའི་འཇིག་རྟེན་འདི། །

ས་སྟེང་ལས་རྒྱལ་སློབ་པ་ཡི། །

མེ་ཏོག་ལྟ་བུར་རབ་འདོད་པའི། །

ཆོས་བཞི་ལེགས་པར་སྟོན་མཁས་དེ། །

ནགས་ཚལ་ལས་ནི་འཇིགས་སྐྱེས་ཕྱིར། །

ནགས་ཚལ་གཅད་ཀྱི་ཤིང་མ་ཡིན། །

ནགས་དང་ནགས་སྦྱོར་ཆོད་ཅིག་དང་། །

དགེ་སྦྱོང་མྱ་ངན་འདའ་བར་འགྱུར། །

གལ་ཏེ་ནགས་སྦྱོར་མ་བཅད་ན། །

ཕྲ་རབ་ཀྱིས་ཀྱང་མི་རྣམས་སྐྱེ། །

མ་དྲུང་ནུ་ཞོ་འདོད་བེའུ་ལྟར། །

དེ་ཡིས་ཡིད་ནི་རབ་ཏུ་འཆིང་། །

ལག་པས་སྟོན་གའི་པདྨ་ལྟར། །

བདག་ལ་དགའ་བ་བཅད་ནས་སུ། །

རྒྱལ་གསུངས་མྱ་ངན་འདས་པའི་ཕྱིར། །

ཞི་བའི་ལམ་ཉིད་བསྐྱེད་པར་གྱིས། །

ཇི་ལྟར་མེ་ཏོག་ཡིད་འོང་བ། །

ཁ་དོག་བཟང་ཡང་དྲི་མེད་ལྟར། །

དེ་བཞིན་ལེགས་པ་གསུངས་པའི་ཚིག །

འབྲས་བུ་མེད་པར་མ་བྱེད་ཅིག །

ཇི་ལྟར་བུང་བ་མེ་ཏོ་གི །

ཁ་དོག་དྲི་ལ་མི་གནོད་པར། །

ཁུ་བ་བཞིབས་ནས་འཕུར་བ་ལྟར།

།དེ་བཞིན་ཐུབ་པ་གྲོང་དུ་རྒྱུ། །

གཞན་གྱི་སྐྱོན་ལ་མི་བརྟག་ཅིང་། །

གཞན་གྱི་བྱས་དང་མ་བྱས་མིན། །

བདག་ཉིད་ཀྱིས་ནི་རིགས་པ་དང་། །

མི་རིགས་པ་ལ་བརྟག་པར་བྱ། །

ཇི་ལྟར་ཕྱག་དར་ཕུང་པོ་དག །

མི་གཙང་ཆུ་ནི་མེད་འདི་ལས། །

པདྨ་ཁ་བྱེ་གཙང་བ་དང་། །

དྲི་ཞིམ་ཡིད་འོང་རབ་སྐྱེས་ལྟར། །

དེ་བཞིན་སོ་སོ་སྐྱེ་བོ་དག །

ལྡོངས་གྱུར་ཕྱག་དར་ཕུང་འདི་ལས། །

རྫོགས་སངས་རྒྱས་ཀྱི་ཉན་ཐོས་དག །

ཤེས་རབ་ཀྱིས་ནི་གསལ་བ་འབྱུང་། །

ཇི་ལྟར་མེ་ཏོག་ཕུང་པོ་ལས། །

མེ་ཏོག་ཕྲེང་རྒྱུད་མང་བྱེད་ལྟར། །

དེ་བཞིན་མིར་ནི་སྐྱེས་པ་ཡི། །

དགེ་བ་ཕལ་ཆེན་རྣམས་ཀྱང་བྱ། །

ཇི་ལྟར་དབྱར་ཁ་བ་ཀུ་ལའི། །

མེ་ཏོག་རབ་ཏུ་རྣམ་འབྲུལ་ལྟར། །

དེ་བཞིན་དགེ་སློང་འདོད་ཆགས་དང་། །

ཞེ་སྡང་གཏི་མུག་སྤང་བར་གྱིས། །

མི་ཡི་ཡིད་ལ་རྣམ་ཆགས་དང་། །

མེ་ཏོག་བཞིན་དུ་རབ་བསགས་པ། །

འཆི་བདག་གིས་ནི་བླངས་ནས་འགྲོ། །

ཉལ་འགྲོ་ཆུ་བོས་བཅས་པ་བཞིན། །

མི་ཡི་ཡིད་ལ་རྣམ་ཆགས་དག །

མེ་ཏོག་བཞིན་དུ་རབ་བསགས་པ། །

འདོད་པ་རྣམས་ཀྱིས་མི་ངོམས་ཤིང་། །

འཆི་བདག་གིས་ནི་དབང་དུ་བྱེད། །

མི་ཡི་ཡིད་ལ་རྣམ་ཆགས་དག །

མེ་ཏོག་བཞིན་དུ་རབ་བསགས་པ། །

ལོངས་སྤྱོད་སྐྱེ་བར་མི་འགྱུར་ཞིང་། །

འཆི་བདག་གིས་ནི་དབང་དུ་བྱེད། །

མི་ཡི་ཡིད་ལ་རྣམ་ཆགས་དག །

མེ་ཏོག་བཞིན་དུ་རབ་བསགས་པ། །

བྱ་བ་མཐར་ནི་མ་ཕྱིན་བར། །

འཆི་བདག་གིས་ནི་དབང་དུ་བྱེད། །

ལུས་འདི་བུང་བ་འདྲ་བར་རྟོགས་བྱས་ཤིང་། །

དེ་བཞིན་ཆོས་རྣམས་སྨིག་རྒྱུ་འདྲར་ཤེས་ནས། །

བདུད་ཀྱི་མེ་ཏོག་མཆོག་ནི་འདིར་གཅོད་པ། །

འཆི་བདག་རྒྱལ་པོས་བལྟར་ཡང་མེད་པར་འགྲོ། །

འཇིག་རྟེན་འདི་དག་བུང་བ་འདྲར་རྟོགས་ཤིང་། །

དེ་བཞིན་ཆོས་རྣམས་སྨིག་རྒྱུ་འདྲར་ཤེས་ནས། །

བདུད་ཀྱི་མེ་ཏོག་མཆོག་ནི་འདིར་གཅོད་པ། །

འཆི་བདག་རྒྱལ་པོས་བལྟར་ཡང་མེད་པར་འགྲོ། །

ལུས་འདི་དབུ་བ་འདྲ་བར་རྟོགས་བྱས་ཤིང་། །

དེ་བཞིན་ཆོས་རྣམས་སྨིག་རྒྱུ་འདྲར་ཤེས་ནས། །

བདུད་ཀྱི་མེ་ཏོག་མཆོག་ནི་འདིར་གཅོད་པ། །

འཆི་བདག་རྒྱལ་པོས་བལྟར་ཡང་མེད་པར་འགྲོ། །

འཇིག་རྟེན་འདི་དག་དབུ་བ་འདྲར་རྟོགས་ཤིང་། །

དེ་བཞིན་ཆོས་རྣམས་སྨིག་རྒྱུ་འདྲར་ཤེས་ནས། །

བདུད་ཀྱི་མེ་ཏོག་མཆོག་ནི་འདིར་གཅོད་པ། །

འཆི་བདག་རྒྱལ་པོས་བལྟར་ཡང་མེད་པར་འགྲོ། །

སྲིད་པ་ཨུ་དུ་མ་བཱ་རའི་མེ་ཏོག་ལྟར། །

སྙིང་པོ་མེད་པར་སེམས་པའི་དགེ་སློང་གང་། །

དེ་ནི་ཕ་རོལ་མིན་པའི་ཕ་རོལ་པོ། །

སྤོང་སྟེ་སྤྲུལ་རྒས་པགས་རྙིང་རྗེ་བ་བཞིན། །

ཆུ་སྐྱེས་རྩ་བའི་མེ་ཏོག་ཆུ་གནས་ལྟའི། །

འདོད་ཆགས་མ་ལུས་གཅོད་བྱེད་དགེ་སློང་གང་། །

དེ་ནི་ཕ་རོལ་མིན་པའི་ཕ་རོལ་པོ། །

སློང་སྟེ་སྦྲུལ་རྒས་པགས་རྙིང་རྗེ་བ་བཞིན། །

ཆུ་སྐྱེས་རྩ་བའི་མེ་ཏོག་ཆུ་གནས་ལྟའི། །

ཞེ་སྡང་མ་ལུས་གཅོད་བྱེད་དགེ་སློང་གང་། །

དེ་ནི་ཕ་རོལ་མིན་པའི་ཕ་རོལ་པོ། །

སྤོང་སྟེ་སྦྲུལ་རྒས་པགས་རྙིང་རྗེ་བ་བཞིན། །

ཆུ་སྐྱེས་རྩ་བའི་མེ་ཏོག་ཆུ་གནས་ལྟའི། །

གཏི་མུག་མ་ལུས་གཅོད་བྱེད་དགེ་སློང་གང་། །

དེ་ནི་ཕ་རོལ་མིན་པའི་ཕ་རོལ་པོ། །

སྤོང་སྟེ་སྦྲུལ་རྒས་པགས་རྙིང་རྗེ་བ་བཞིན། །

ཆུ་སྐྱེས་རྩ་བའི་མེ་ཏོག་ཆུ་གནས་ལྟའི། །

ང་རྒྱལ་མ་ལུས་གཅོད་བྱེད་དགེ་སློང་གང་། །

དེ་ནི་ཕ་རོལ་མིན་པའི་ཕ་རོལ་པོ། །

སྤོང་སྟེ་སྤྲུལ་རྒས་པགས་རྙིང་རྗེས་བཞིན། །

ཆུ་སྐྱེས་རྩ་བའི་མེ་ཏོག་ཆུ་གནས་ལྟའི། །

ཆགས་པ་མ་ལུས་གཅོད་བྱེད་དགེ་སློང་གང་། །

དེ་ནི་ཕ་རོལ་མིན་པའི་ཕ་རོལ་པོ། །

སྤོང་སྟེ་སྦྲུལ་རྒས་པགས་རྙིང་རྗེ་བ་བཞིན། །

ཆུ་སྐྱེས་རྩ་བའི་མེ་ཏོག་ཆུ་གནས་ལྟའི། །

སྲེད་པ་མ་ལུས་གཅོད་བྱེད་དགེ་སློང་གང་། །

དེ་ནི་ཕ་རོལ་མིན་པའི་ཕ་རོལ་པོ། །

སྤོང་སྟེ་སྦྲུལ་རྒས་པགས་རྙིང་རྗེ་བ་བཞིན། །

མེ་ཏོག་གི་ཚོམས་ཏེ་བཅོ་བརྒྱད་པའོ།། །།

                       རྩོམ་སྒྲིག་པ།  མང་ར་བ།

གསལ་འདེབས།

                    རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།

                     དྲ་བའི་སྦྲེལ་ཐགhttp://www.tb1025.cn


བརྒྱུད་འགོད།