སྡོམ་ལ། མི་རྟག་འདོད་དང་སྲེད་པ་དང་། །
བག་ཡོད་དེ་བཞིན་དགའ་བ་དང་། །
ཚུལ་ཁྲིམས་ལེགས་སྤྱོད་ཚིག་དག་དང་། །
ལས་དང་དད་པ་དེ་དག་བཅུ། །
བྲམ་ཟེས་འདོད་པ་རབ་སྤང་ཞིང་། །
བརྩོན་འགྲུས་ཀྱིས་ནི་རྒྱུན་ཆོད་ཅིག །
འདོད་པ་རབ་ཏུ་མ་སྤངས་པར། །
ཐུབ་པ་གཅིག་གིས་མ་ཐོབ་བོ། །
ཀུན་ཏུ་རྒྱུ་བ་ཞན་པ་དག །
ཉོན་མོངས་ཕྱིར་ཡང་ཀུན་གསོག་པས། །
བརྩོན་འགྲུས་བརྟན་པོ་ཁོ་ན་ཡིས། །
བྱ་བ་དེ་ཉིད་བྱེད་ལ་རག །
ཞན་པའི་ལས་ནི་ཇི་སྙེད་དང་།
།ཚངས་སྤྱོད་ཡོངས་སུ་མ་དག་དེ། །
དོན་ཆེན་འགྱུར་སྙམ་མི་བྱེད་དོ། །
ཇི་ལྟར་མདའ་ནི་གཟུང་ཉེས་པས། །
ལག་པ་ཆོད་པར་གྱུར་པ་ལྟར། །
དགེ་སློང་བསྲུང་པ་བྱ་ཉེས་དང་། །
དམྱལ་བར་ཉེ་བར་ཁྲིད་པར་བྱེད། །
ཇི་ལྟར་མདའ་ནི་བཟུང་ལེགས་པས། །
ལག་པ་ཆོད་པར་མི་འགྱུར་ལྟར། །
དགེ་སྦྱོང་བསྲུང་བ་བྱ་ལེགས་ན། །
མྱ་ངན་འདས་པར་ཉེ་བར་འདྲེན། །
དགེ་སྦྱོང་རྣམ་པར་མ་ཤེས་དང་། །
རྒལ་བར་དཀའ་དང་བཟོད་དཀའ་དང་། །
གང་དག་ཞན་པ་འགྱོད་འགྱུར་བའི། །
སྡུག་བསྔལ་མང་པོ་དེ་དག་འབྱུང་། །
ཡང་དང་ཡང་དུ་འགྱོད་པ་ཡི། །
ཀུན་རྟོག་དབང་དུ་འགྲོ་བ་ཡི། །
སེམས་ནི་ཟློག་པ་མ་བྱས་པར། །
དགེ་སྦྱོང་སྤྱོད་པ་ཇི་ལྟར་བྱ། །
ཉེས་པར་རབ་བྱུང་ཉེས་དགའ་བ། །
ཁྱིམ་འདུག་ཉེས་རྩོམ་བྱེད་པ་དག །
སྡུག་བསྔལ་མཉམ་མེད་སྟེན་པ་དང་། །
ཡང་སྲིད་སྡུག་བསྔལ་སོགས་པར་ཟད། །
ཚེམ་བུ་དུར་སྨྲིག་གྱོན་པ་དང་། །
ཕལ་ཆེར་ཡང་དག་མི་སྡོམ་ཞིང་། །
སྡིག་པའི་ཆོས་ཅན་སྡིག་ལ་དགའ། །
སྡིག་ཅན་དེ་དག་ངན་འགྲོར་འགྲོ། །
སཱ་ལའི་ཤིང་ལ་འཁྲི་ཤིང་ལྟར། །
གང་ཞིག་ཤིན་ཏུ་ཁྲིམས་འཆལ་ཏེ། །
ཇི་ལྟར་རང་ལ་དགྲ་བཞིན་དུ། །
དེ་ནི་དེ་ལྟར་བྱེད་པར་འདོད། །
མགོ་བོ་སྐྱ་བོར་གྱུར་པར་དུ། །
དེ་དུང་རྒན་རབས་མ་ཆུད་པ། །
དེ་ནི་ལང་ཚོ་གཏུགས་པ་སྟེ། །
དེ་ནི་རྒན་བླུན་ཞེས་བྱའོ། །
གང་ཞིག་དགེ་དང་སྡིག་པ་དག །
སྤངས་ཤིང་ཚངས་པར་སྤྱོད་པ་དང་། །
སྡེ་ཚོགས་སྤངས་ནས་སྤྱོད་བྱེད་པ། །
དེ་ནི་རྒན་རབས་ཞེས་བྱའོ། །
བརྟུལ་ཞུགས་མེད་ཅིང་བརྫུན་སྨྲ་ན། །
མགོ་བོ་བྲེགས་ཙམ་དགེ་སྦྱོང་མིན། །
རྨོངས་པ་འདོད་ལ་ཞུགས་པ་དག །
ཇི་ག་དགེ་སྦྱོང་ཡིན་ནམ་ཀྱེ། །
བརྩུལ་ཞུགས་མེད་ཅིང་བརྫུན་སྨྲ་ན། །
མགོ་བོ་བྲེགས་ཙམ་དགེ་སྦྱོང་མིན། །
གང་ཞིག་སྡིག་པ་ཞི་གྱུར་ཏེ། །
མཁས་པས་དགེ་སྦྱོང་ཡིན་པར་ཤེས། །
བརྟུལ་ཞུགས་མེད་ཅིང་བརྫུན་སྨྲ་ན། །
མགོ་བོ་བྲེགས་ཙམ་དགེ་སྦྱོང་མིན། །
གང་དག་སྡིག་པ་ཆེ་ཕྲ་དག །
ཀུན་ལ་བརྟགས་ནས་བྱེད་པ་དང་། །
སྡིག་པ་ཞི་བ་དེ་དག་ནི། །
དགེ་སྦྱོང་ཉིད་ཅེས་བརྗོད་པར་བྱ། །
སྡིག་པ་སྤངས་པ་བྲམ་ཟེ་སྟེ། །
ཞི་བར་བྱེད་པ་དགེ་སྦྱོང་ཡིན། །
བདག་གི་དྲི་མ་རབ་སྤངས་པ། །
དེས་ན་རབ་ཏུ་བྱུང་ཞེས་བརྗོད། །
དགེ་སྦྱོང་གི་ཚོམས་ཏེ་བཅུ་གཅིག་པའོ།། །།