གནས་ཆེན་བྲག་དཀར་སྤེལ་རྫོང་།

ཡོང་ཁུངས།   ངེད་དགེ་ལུགས་པའི་དྲ་བ།     སྤེལ་དུས།  2018-05-31 14:50:59     རྩོམ་པ་པོ།   བྲག་སྒོམ་པ།     ཀློག་ཐེངས།  

 

ཧང་ངེ་བྱ་མདོའི་དགོན་དང་ཉེ་བར་སྤེལ་ཐང་དུ། ཙ་རི་དང་བྱིན་རླབས་མཉམ་པར་གྲགས་པའི་གནས་ཆེན་བྲག་དཀར་སྤེལ་རྫོང་ནི། དེའི་དཀར་ཆག་འབྲི་ཁུང་དབུར་སྨྱོན་ཆོས་ཀྱི་གྲགས་པ། མཚན་གཞན་རིག་འཛིན་དཀོན་མཆོག་བསྟན་སྐྱོང་བཟང་པོས་ཀར་མའི་གསུང་རྒྱུན་བཞིན་བསྒྲིགས་པ་ལས། མ་འོངས་སྙིགས་མ་ལྔ་ཡི་དུས།།སློབ་དཔོན་པད་མ་འབྱུང་གནས་ཉིད། །ཁྲི་གཤོག་རྒྱལ་མོའི་མཚོ་ལ་ཕེབས། །མཚོ་མཐའ་གཡེར་མོ་ཐང་གི་དཀྱིལ། །དམ་སྲི་སྤུན་དགུ་དམ་ལ་བཏགས། །བླ་གཏེར་ཆོས་གཏེར་མང་དུ་སྦས། །གནས་སྒོ་ཆོས་སྒོ་གསལ་བར་མཛད། དེ་ནས་སྲོད་དང་ཐོ་རངས་ལ།།སྲིན་པོ་ཁྲག་གི་རལ་བ་ཅན། །སྲིན་མོ་མི་སྡུག་མཆེ་བ་ཅན། །དེ་གཉིས་བཅས་པའི་འདྲེ་སྲིན་བདུན།།བྲོས་ནས་སྤྲེལ་རྫོང་བྲག་ལ་གནས། །བྲག་ཕུག་སྒྲུབ་པ་མཛད་པ་དང་། །སློབ་དཔོན་དབང་དྲག་འབར་བ་ཡིས། །ཏིང་ངེ་འཛིན་ལ་བཞུགས་པའི་ཚེ། །སྲིན་པོས་བྲག་སྒོ་ཕ་བོང་བཀབ། །རྡོ་རྗེ་གསོར་བས་སྟེང་ནས་བྱོན། །ཏིང་འཛིན་ཐུགས་ཀྱིས་ངང་ནས་ཀྱང་། །འདུས་མོའི་རྫོང་གི་གཡོན་ཕྱོགས་ཀྱི།།བྲག་སྟོད་མེ་ལྕེ་མཆེད་འདྲ་ལ། །བྲག་ཞབས་མུན་པ་འཁྲིགས་པ་ཡི། །མཚམས་སུ་ལྡང་ནས་ཡོད་པ་ལ།།གནམ་ལྕགས་རྡོ་རྗེ་བརྒྱབ་ནས་ཀྱང་། །ཐལ་བའི་རྡུལ་ཕྲན་བཞིན་དུ་བརླགས། །དེ་ལྟར་བསྒྲལ་བའི་རྗེས་ཤུལ་དང་། །སྲིན་པོ་ཕོ་གདོང་མོ་གདོང་སོགས།།ད་ལྟ་མངོན་སུམ་གསལ་བར་ཡོད། སྲིན་པོ་ཡིད་ཀྱིས་སྨོན་ལོག་བྲོ། །དེ་ཡི་དབང་གིས་མ་འོངས་དུས། །སྲིན་པོས་སྤྲུལ་བའི་མི་རྣམས་འགས། །ཆོས་དང་ཡི་གེ་སྒྲོགས་པ་དང་། །བསྟན་པ་གནོད་བྱེད་ཚུལ་འཆལ་རྣམས། །མི་སྙན་སྣ་ཚོགས་བྱེད་པ་དང་།།བཤན་པ་ལག་དམར་ཡུལ་འགའ་ཕུང་།།དེ་ཉིད་འདུལ་བའི་གཉེན་པོ་རུ། །སློབ་དཔོན་སྤྲེལ་རྫོང་བྲག་དཀར་གྱི། །ཡང་རྫོང་བྲག་གི་ཕུག་ཏུ་བཞུགས། །རྡོ་རྗེ་ཀློ་དཀར་ཕོ་བྲང་ནས། །སྒྲུབ་པ་མཛད་ནས་བཞུགས་པའི་ཚེ། །ལུས་པོ་མི་ཡི་ལུས་པོ་ལ། །མགོ་བོ་སྤྲེལ་གྱི་མགོ་ཅན་བྱུང་། །གནས་འདིའི་སྲུང་མ་ང་ཡིན་ཟེར། །དམ་ལ་བཏགས་ནས་བསྟན་བསྲུང་བཅོལ། །དབང་བསྐུར་དམ་བཏགས་མཚན་གསོལ་བ།།གཉེན་སྤྲེལ་ཟླ་བ་ཆེན་པོའོ། །དེ་ནས་པདྨ་འབྱུང་གནས་ཀྱིས། །མ་འོངས་དམ་སྲི་སྲིན་པོ་ཡི།།གནོད་པ་མི་འབྱུང་སྨོན་ལམ་བཏབ། །གཏེར་ཁ་ལ་སོགས་མང་དུ་སྦས། །བསྒྲུབ་པའི་གཏོར་མ་བརྒྱབ་པའི་ཚེ། །ཞབས་བྲོལ་སོགས་མཛད་པ་ཡི།།ཞབས་རྗེས་བྲག་ལ་མང་དུ་བྱུང་། །ཕྱོགས་བཞིའི་བྲག་ལ་ཞབས་རྗེས་བཞག །ལུང་གསུམ་འདུས་པའི་སྤྲེལ་རྫོང་བྲག་དཀར་འདི། །སྔོན་དུས་སྲིན་པོ་འདུལ་བའི་གནས་ཡིན་པས། །མཐའ་འདུལ་གནས་ཀྱི་ནང་ནས་ཆེ་བ་འོ། ༈ །གནས་མཆོག་རྡོ་རྗེ་ཀློ་དཀར་གསལ་བའི་ནང་། །རིགས་ལྔ་ས་བོན་དབུ་མ་རོ་རྐྱང་ཚུལ། །སྐུ་གསུམ་ཡི་གེ་རིགས་དྲུག་སྐྱེ་སྒོ་གཅོད། །གུ་རུ་སིད་རྡྷི་རང་བྱོན་འབུར་དོད་བཞུགས། །དེའི་ནང་སྟོད་ལ་བདེ་གཤེགས་དཀྱིལ་འཁོར་ཁང་། །འགྲོ་ན་ལུས་རྒྱན་བཀྲོལ་ནས་གོས་སྲབ་གྱོན། །མར་མེ་དཔལ་འབར་བཟུང་ནས་སོང་གྱུར་ཏེ། །སྟེང་གི་ནམ་མཁའ་དག་ལ་མཇལ་བ་ན། །བདེ་མཆོག་གསང་འདུས་ཀྱཻ་རྡོར་འཇིགས་བྱེད་སོགས། །རྒྱུད་སྡེ་བཞི་ཡི་དཀྱིལ་འཁོར་འབུར་དོད་བཞུགས། །དེ་ནས་ཕྱིར་བུད་གཡོན་གྱི་ཕྱོགས་སོང་དང་། །དག་པ་ཤྲིའི་ཤེལ་གྱི་ཕུག་པ་ཡོད། །མར་མེ་དཔལ་འབར་གསལ་ནས་དེར་སོང་དང་། དག་པ་མཁའ་སྤྱོད་དཔལ་གྱི་ཙ་རུ་ཏྲ། །མངོན་སུམ་ལྷུན་གྱིས་གྲུབ་པའི་གཞལ་ཡས་ཁང་། །རང་བྱུང་འབུར་དུ་བྱོན་ནས་བཞུགས་པ་ལ། །རོང་ཆེན་བཞི་དང་མཚོ་བཞི་རང་བྱོན་བཞུགས། །ལྷ་ཚོགས་ཉིས་སྟོང་བརྒྱད་བརྒྱ་འབུར་དོད་བཞུགས། །རྩེ་ལ་མཁའ་འགྲོ་གདོང་ཆེན་བཞི་སོགས་གསལ། །མཐོང་བ་ཙམ་གྱིས་ངན་སོང་སྒོ་མོ་འགགས། །དེ་ནས་ཕྱིར་བུད་སྔར་ལྟར་མར་མེ་དང་། །ཤིང་རིང་རྩེ་ལ་དཔལ་འབར་གསལ་བོར་བྱེད། །གོང་དུ་སོང་དང་ཁང་བརྩེགས་གསུམ་ཚད་ལ། །བདེ་གཤེགས་ཐུགས་སྤྲུལ་བྱ་ཁྱུང་ག་རུ་ཊ། །དབུ་གཟེངས་བར་སྣང་དག་ལ་འཕྱོ་བ་ལ།།རྭ་ཕྲག་ཡིད་བཞིན་ནོར་བུས་སྤྲས་པ་ཡི། །ནོར་བུ་མཐོང་བས་དབུལ་ཕོངས་སྡུག་བསྔལ་སེལ། །གཤོག་པ་གཡས་གཡོན་ཕྱོགས་སུ་བརྒྱང་བ་ལ། །ཕྱག་ཞབས་མཇུག་སྒྲོ་ལ་སོགས་གསལ་བར་བཞུགས། །མཐོང་བ་ཙམ་གྱིས་ཀླུ་དང་ས་བདག་སོགས། །གདུག་པའི་ནད་རིགས་ཀུན་ལས་གྲོལ་བར་འགྱུར། །ཁྱུང་གི་གཡས་ཕྱོགས་སངས་རྒྱས་སྟོང་སྐུ་བཞུགས། །གཡོན་ཕྱོགས་འབྲི་གུང་འཇིག་རྟེན་གསུམ་མགོན་བཞུགས། །དེ་ཡི་གཡས་ཕྱོགས་ཕུག་པའི་ལོགས་ངོས་ཀྱི། །ཞབས་རྗེས་སྟེང་ནས་དཔལ་འབར་ཡར་ལ་བསྟན། །དཀྱིལ་འཁོར་ཞབས་ནས་ཡར་ལ་མཇལ་བ་དང་། །འོག་མིན་ཆོས་དབྱིངས་ཕོ་བྲང་ངོ་མཚར་ཆེ། །ཕྱོགས་བཞི་དབུས་ལྔ་རྒྱལ་བ་རིགས་ལྔ་བཞུགས། །དབུས་དང་ཕྱོགས་མཚམས་ཆེ་མཆོག་རིགས་ལྔ་བཞུགས། །འདི་ལ་མཐོང་ཚུལ་སྣ་ཚོགས་འབྱུང་བར་འགྱུར། །དེ་ཡི་ཕྱི་ལོགས་ངོས་ཀྱི་བྲག་ངོ་ལ། །ཨུ་རྒྱན་པད་མ་འབྱུང་གནས་གསལ་བར་བཞུགས། །དེ་ཡི་གཡོན་ཕྱོགས་བཀའ་བརྒྱད་སྒྲོམ་བུའི་ཚུལ། །ཆོས་འཁོར་གདུགས་དང་ཏོག་གིས་མཛེས་པ་ལ། །ཞི་ཁྲོ་དམ་པ་རིགས་བརྒྱ་གསལ་བར་བཞུགས། །དེའི་གཡོན་ཁྲོ་བོ་བཅུ་སོགས་གསལ་བར་ཡོད། །དེའི་གཡོན་དཔལ་ལྡན་ལྷ་མོ་གསལ་བར་བཞུགས། །ཟུར་གྱི་ཕུགས་ལ་ཨུ་རྒྱན་སྒྲུབ་ཆུ་བཞུགས། །འཐུང་དང་ཁྲུས་བྱས་ནད་གདོན་སྡིག་སྒྲིབ་དག །འདི་ཉིད་ཕུག་ལ་གནས་སྒོ་འདི་གསུམ་གསལ།།དེ་ནས་ཕྱིར་ཐོན་སྒོར་སོང་གཡས་གཡོན་གྱི། །སྒོ་འགྲམ་ཕྱི་རིམ་རྒྱལ་ཆེན་སྡེ་བཞི་ཡོད། །དེ་ཡི་ལོགས་གཅིག་གཡོན་གྱི་ལུང་པ་ལ། །ཕུག་སྒོ་ཤར་ལྷོ་མཚམས་སུ་ལྟ་བ་ཡོད། །དེ་ཡི་སྟེང་ནས་ཡར་བལྟས་མཇལ་བ་ན། །སྟག་སྒྲོལ་ཐིག་ལེ་བརྒྱད་ཅུའི་དཀྱིལ་འཁོར་བཞུགས། །སྒོ་ངོས་གཡས་ལ་གླང་པོ་རིན་ཆེན་དང་། །སྒོ་ཡི་སྟེང་ན་ཇོ་བོ་བཅུ་གཅིག་ཞལ།།པད་མ་འབྱུང་གནས་བདུད་རྩི་འཁྱིལ་བ་དང་། །རྗེ་བཙུན་མི་གཡོ་ལ་སོགས་གསལ་བར་བཞུགས། །ཟུར་གྱི་ངོས་ལ་ཚེ་དཔག་མེད་མགོན་དང་། །རྡོ་རྗེ་ཕག་མོ་ལ་སོགས་གསལ་བར་བཞུགས། །སྒོ་ཟུར་ཡེལ་ཁའི་ཚུལ་གྱིས་རྡོ་ལ་བརྡུང་། །ལྷ་གནས་ཀུན་ཏུ་བསྒྲག་པའི་འཇལ་དང་མཚུངས། །ཟུར་ནས་ཀས་གདོང་གོང་ལ་ཡར་མཇལ་ན། །སྤྱན་རས་གཟིགས་དང་ཆོས་མཆོག་གསལ་བ་དང་། །གཟའ་མཆོག་རྭ་ཧི་ལ་ནི་གསལ་བར་ཡོད། །གནས་དེའི་སྒོ་རྣམས་སྐབས་ཤིག་དབྱེ་བར་འགྱུར།།སྒོ་ངོས་མཐོང་ལ་མར་བ་ལོ་ཙཱ་དང་། །དམ་པ་སངས་རྒྱས་པ་སོགས་གསལ་བར་བཞུགས། །སྒོ་འགྲམ་བར་མཚམས་སྟེང་ནས་ཨུ་རྒྱན་གྱི།།ཞབས་རྗེས་རྡོ་ཡོད་དེ་ལ་གུས་པར་མཛོད། །དེ་ནས་སྒྲིབ་ཀྱི་ངོས་ལ་ཕུག་པ་ནི། །ཞལ་གྱི་སྒོ་ཕྱོགས་བྱང་ལ་ལྟ་བ་ཡོད། །དེར་སོང་མར་མེ་དཔལ་འབར་སོགས་ཁྱེར་ན། །སློབ་དཔོན་པདྨ་འབྱུང་གནས་ལྷུང་བཟེད་ལ། །རྒྱ་ཡིག་རང་བྱོན་མངོན་སུམ་གསལ་བར་ཡོད།བསྐལ་བ་ཡར་དར་ཁ་ཡར་བསྟན་ནས་ཡོད། །དེ་འོག་བསྐལ་བ་བར་སྐགས་ཁ་བཟུར་ཡོད། །ད་ལྟ་བསྐལ་བའི་སྙིགས་མར་སྦུབ་ནས་བཞུགས། །དུས་དང་བསྐལ་བའི་རྟགས་སོགས་དེ་ལས་བསྟན། །དེ་ནས་སོང་བར་གཤོང་ལ་མཚོ་འཁྱིལ་ཡོད། །དེ་ཡི་ཐུར་ནས་ཡར་ལ་སོང་བའི་དུས། །མཁའ་འགྲོས་ཕུལ་བའི་ཚོགས་དང་མཆོད་པ་ཡོད། །དེ་ཡི་མདུན་ངོས་ཨུ་རྒྱན་བཞུགས་ཁྲིའི་ཚུལ། །དེ་ཡི་འོག་ཏུ་དཔལ་འབར་གསལ་བ་ལ། །གཏེར་གྱི་སྒྲོམ་བུའི་སྟེང་དུ་གཏེར་ཡིག་གསལ། །དེ་ནས་ཕར་སོང་གཡོན་ཕྱོགས་ལོགས་ངོས་ལ།།ཤེལ་གྱི་བྲག་ལ་གཡུ་མདོག་ཆགས་པ་ཡོད། །དེ་དཀྱིལ་སྟེང་ལ་སངས་རྒྱས་སྨན་བླ་ཡི། །བཻཌཱུརྻ་ཡི་ལྷུང་བཟེད་ངོས་བཞིའི་ནང་། །རིན་ཆེན་སྣ་ཚོགས་སྨན་གྱིས་བཀང་ནས་ཀྱང་། །རིན་ཆེན་གསེར་དངུལ་སྒྲོམ་བུའི་ནང་དུ་རྫོངས། །རྒྱ་ནི་རིམ་པ་བདུན་གྱིས་བཏབ་ནས་བཞུགས། །རེག་མཐོང་མུ་གེ་ནད་ལས་གྲོལ་བར་འགྱུར། །སྟེང་ཕྱོགས་གཡོན་ངོས་རང་བྱོན་འབུར་དོད་དུ། །སངས་རྒྱས་སྨན་བླ་མཆེད་བརྒྱད་གསལ་བོར་བཞུགས། །དུག་གསུམ་ནས་སེལ་སངས་རྒྱས་སྨན་གྱི་བླས། །བཞི་བརྒྱ་རྩ་བཞིའི་ནད་ཀུན་གྲོལ་བར་བྱེད། །དེ་ནས་ཡར་སོང་ཕུག་པའི་སེ་ངོས་ལ། །ཕུག་པ་ཅུང་ཙམ་ཡོད་པ་དེར་སོང་དང་།།ཕྱོགས་རྣམས་ཀུན་ལ་ལྷ་ཚོགས་རང་བྱོན་བཞུགས། །སྐྱེས་བུ་ལས་ངག་རྣམས་ཀྱིས་མཐོང་བར་འགྱུར།།ཕལ་བ་རྣམས་ཀྱིས་དེ་ཉིད་མཐོང་བ་དཀའ།།དེ་ནས་ཕྱིར་ཐོན་གཡོན་གྱི་ངོས་ཕྱོགས་ན། །ཕུག་སྒོ་ཤར་ལྷོ་མཚམས་སུ་ལྟ་བ་ཡོད། །དེ་ལ་མར་མེ་དཔལ་འབར་གསལ་ཁེར་ན། །ལམ་གྱི་གཡས་ཕྱོགས་བྲག་གི་ངོས་ལོགས་ལ། །དྲག་པོ་ཕུར་བ་ཕུར་སྲུང་བཅུ་དྲུག་བཞུགས། །དེ་ནས་ཡར་ལ་རིམ་གྱིས་སོང་བའི་ཚེ། །གཡོན་ཕྱོགས་ངོས་ལ་རྒྱུས་ཡོད་ཀྱིས་བལྟས་ན། །གཙུག་ལག་ཁང་དང་གཞལ་ཡས་ཁང་གྲུབ་ལ།།རྟ་བབས་སྒོ་ཁང་ཀ་བ་བཞི་སོགས་གསལ།།ཆོས་འཁོར་གདུགས་དང་རྒྱལ་མཚན་གསལ་བའི་དབུས། །ཐུབ་པ་གནས་བརྟན་བཅུ་དྲུག་ལྷུན་གྲུབ་བཞུགས། །སྒོ་འགྲམ་རྒྱལ་ཆེན་སྡེ་བཞི་གསལ་བར་བཞུགས། །ཕུག་ལམ་འདོད་འཇོ་བ་ཡི་ནུ་མ་ཡོད། །ལས་ཅན་རྣམས་ལ་འོ་མ་དངོས་སུ་ཡོད། །འགྲོ་བ་གང་གི་ཁོང་དུ་དེ་སོང་ན། །ཚེ་འདི་འདོད་པའི་དོན་རྣམས་ཡིད་བཞིན་འགྲུབ། །དེ་ཡི་ཕུག་སོང་འདོམ་གསུམ་བབས་མཚམས་ན། །དབྱར་གྱི་དུས་སུ་ཆུ་འཁྱིལ་ལམ་མི་ཐར། །སྟོན་དང་རྒྱུན་དུ་སོང་ན་ཐོན་ཙམ་ཡོད། །དེ་ན་གནས་སྒོ་གཏེར་ཁ་འགའ་ཞིག་ཡོད། །དེ་ནས་ཕྱིར་བུད་ལམ་གྱི་སྒོ་འགྲམ་ལ། །གཡས་ཕྱོགས་བར་དོའི་འཕྲང་ལ་འཛུལ་བུད་ན། །ཕྱི་མ་བར་དོའི་དངངས་སྐྲག་ཞི་བར་འགྱུར། །ཕར་ཚུར་བྲག་གི་ངོས་ལ་གནས་སྒོ་མང་། དེ་རྣམས་གཏེར་ཁ་མང་དུ་ཡོད་པ་ལ། །མཇལ་བའི་སྐལ་བ་རང་རང་ལས་ཀྱིས་ཤེས། །ཤར་གྱི་གནས་འདིའི་སྒོ་ལ་འོང་བའི་དུས། །སྒོ་འགྲམ་གཡས་དང་གཡོན་གྱི་བྲག་རི་ནི། །དར་དཀར་ཡོལ་བ་འཐེན་འདྲ་གཉིས་ཀྱི་བར། །ནམ་མཁའ་མཐོང་ཙམ་ཡོད་པའི་གཡས་ཕྱོགས་ངོས།།ལྷོ་ངོས་ལུང་པ་མགོ་བྱང་བསྟན་པ་ཡོད།སོང་དང་བྲག་ཀྱང་དར་ཕྱག་འདྲ་བའི་གནས། །ཕུག་པ་ཁ་ནི་ལྷོ་རུ་བལྟ་བ་ཡོད། །དཔལ་འབར་གསལ་བར་བྱས་ནས་མཇལ་བ་ན། །རྒྱ་བ་བྱམས་པ་ཉེ་བའི་སྲས་བརྒྱད་བཞུགས། །དེ་ནས་ཕྱིར་ཐོན་ལྷོ་ཕྱོགས་ངོས་ལོགས་སུ། །ལམ་ངོ་ཤེས་ཙམ་ཡོད་པ་དེར་སོང་ན། །ནུབ་ཕྱོགས་བྲག་དཀར་དར་ཕྱར་ལྟ་བུ་ཡོད། །དེའི་ངོས་ཕུག་པ་ཁ་ཤར་བལྟ་བ་ཡོད། །མར་མེ་གསལ་བར་བྱས་ནས་མཇལ་བ་ན། བདེ་བ་ཅན་གྱི་ཞིང་བཀོད་གསལ་བར་བཞུགས། །དེ་ཡི་ངོས་ལ་རང་བྱོན་མང་དུ་ཡོད། །དེ་ཕྱིར་སྐོར་ལམ་ཞུགས་ནས་གཡས་ངོས་ལ།།མཐོ་རིས་ཐར་བའི་ཐེམ་སྐས་ཞེ་དགུ་ལ། །གོམ་དོར་རེ་རེས་འཁོར་བ་རྒྱབ་ཀྱིས་ཕྱོགས། །དེར་ཐོན་གཡོན་ཕྱོགས་བྲག་ངོས་སྤྱན་རས་གཟིགས། །རིགས་ཀྱི་བུ་ཁྱོད་བདེ་བ་ཅན་དུ་འགྲོ། །ཞེས་གསུངས་ལུང་བསྟན་མོས་ལ་གསོལ་བ་ཐོབས། །རྒྱབ་ཕྱོགས་སྤང་དང་བྲག་གི་སྒོ་མཚམས་སུ། །ཕུག་སྒོ་ཡོད་པ་མར་མེ་གསལ་བྱས་ནས། །བཅོམ་ལྡན་རྣམ་སྣང་སེམས་དཔའ་བརྒྱད་འཁོར་བཞུགས། །དེ་ནས་ཚུར་ཐད་ལམ་ལ་འོང་བའི་དུས། །བྲག་ནག་འཇིགས་རུང་ཞིག་ཡོད་དེ་ཡི་སྟོང་།།ཨུ་རྒྱན་པདྨའི་་ཞབས་རྗེས་དངོས་སུ་ཡོད། །དེ་ནས་བྲག་གི་གོང་ནས་ཡར་སོང་ན། །བྲག་སྟོད་མེ་ལྕེ་འབར་འདྲ་ཡོད་གཤམ་ལ། །གཤིན་རྗེ་ཕོ་དོང་མི་དོང་འཇིགས་པ་ཡོད། འདྲེ་སྲིང་བསྒྲལ་བའི་རྗེས་ཤུལ་ལ་སོགས་ཡོད། །དེ་ཡི་སྐོར་ལམ་མཐའ་ཡས་བྲག་ཕུག་གསུམ། ངན་སོང་གསུམ་གྲོལ་གདོན་སྲི་དེ་ལ་འཛུལ། །དེ་ནས་ཡར་གོང་རྩེ་ལ་སོང་གྱུར་ན། །ཁྱད་པར་ཅན་གྱི་སྒྲུབ་གནས་མང་དུ་ཡོད། །ཕུག་པའི་དབུས་ལ་ཨུ་རྒྱན་བཞུགས་པ་ལ།མཆོད་བཤམ་ཕྱག་རྔ་སོགས་ཀྱི་རྗེས་རྣམས་ཡོད། །བྲག་དམར་རིན་ཆེན་ཤེལ་གྱི་གཞལ་ཡས་ཁང་། །རིགས་ལྔ་རིགས་གསུམ་དམ་པ་རིགས་བརྒྱ་བཞུགས། །རང་སྣང་དག་པ་རབ་འབྱམས་གཞལ་ཡས་སུ། །བཀའ་བརྒྱད་ལྷ་ཚོགས་བདུན་བརྒྱ་ཉི་ཤུ་བཞུགས། །ཕུག་པ་གཞན་ལ་རིགས་ལྔའི་ཞིང་ཁམས་བཞུགས། །ལྷ་ཚོགས་བཀོད་པ་དཔག་ཏུ་མེད་པ་བཞུགས། །གུ་རུ་མཚན་བརྒྱད་ལ་སོགས་གསལ་བར་བཞུགས། ཕྱི་ལ་རིགས་གསུམ་མགོན་པོའི་སྙིང་བོ་སོགས། །རང་བྱོན་ཡི་གེ་ལ་སོགས་གསལ་བ་བཞུགས། །བསྒྲུབ་པ་བཀའ་བརྒྱད་དཀྱིལ་འཁོར་ཡོངས་རྫོགས་ལ། །སྒྲོམ་བུ་དགུ་བསྐོར་གཏེར་གནས་མང་དུ་བཞུགས། །རྒྱུས་ཡོད་རྣམས་ཀྱིས་བལྟས་ནས་བླངས་གྱུར་ན། །སིནྡྷུ་ར་ཞེས་བྱང་སེམས་དཀར་དམར་ཡོད། །རང་རང་འདོད་པ་གང་དགོས་ལེན་རྒྱུ་ཡོད། །ལོ་རྒྱུས་གསོ་རིག་བཤད་རྒྱུད་འགྲེལ་བར་གསལ། །ནུབ་བྱང་མཚམས་སུ་ཐར་ལམ་ཐེམ་པའི་སྐས། །ལམ་གསུམ་བགྲོད་པས་སྒྲིབ་གསུམ་བྱང་བར་འགྱུར། །དེའི་ཐད་སྨད་ལ་གཤིན་རྗེ་ཆོས་རྒྱལ་དང་། །དམྱལ་བ་ཚ་གྲང་བདུད་སྲིན་སྒྲ་སྐད་སྒྲོགས། །བློ་གསལ་སྐྱེ་བོས་དཔྱད་ན་གསལ་བར་ཡོད། །འགྲོ་དུས་ཐལ་མ་གྱུར་བ་ཐེན་པར་བྱང་། །གནས་སྒོ་གཡོན་ཕྱོགས་རི་ཟུར་གདའ་བའི་གཤམ།།སྨན་ཆུ་བདུད་རྩི་རོ་དྲུག་ནུས་ལྡན་འབབ། །འཐུང་དང་ཁྲུས་བྱས་ཡོན་ཏན་བཅུ་བདུན་སྟེར། །ནད་གདོན་སྡིག་སྒྲིབ་འདག་པར་ཐེ་ཚོམ་མེད། །དེ་ནས་རི་ཟུར་ཕྱག་རྗེས་ལ་སོགས་དང་། རང་བྱོན་ཡིག་འབྲུ་རང་གིས་བལྟས་ན་གསལ། །གཡས་ཀྱི་ཕྱོགས་སུ་ཆུ་བཟང་བྲག་དཀར་ཞེས། །ཕོ་རི་དཔའ་བོ་རྣམས་ཀྱི་བཞུགས་གནས་ཡིན། །ལུང་པ་གཅིག་ལ་རྨ་ཆེན་སྦོམ་ར་དང་།།ཞབས་རྗེས་གསལ་བ་མི་ཕྱུགས་ནད་རིམས་གྲོལ། །གཡོན་གྱི་ཕྱོགས་ན་སྤེལ་མོ་བྲག་ཅེས་པ། །མོ་རི་དཔའ་བོ་རྣམས་ཀྱི་བཞུགས་གནས་ཡིན། །མདུན་གྱི་ཕྱོགས་སུ་ཞིང་སྐྱོང་རལ་བ་ཅན། །གཡོན་གྱི་ཕྱོགས་སུ་བཙུན་མོ་བྲང་དམར་མ། །གཉིས་པོ་བཀའ་སྲུང་ཞིང་སྐྱོང་ཡབ་ཡུམ་ཡིན། །ཞེས་འབྱུང་ལ། ཡིག་སྐྱོན་ཡིན་ནམ་དཔྱད་མི་བཟོད་པ་རེ་གཉིས་སྣང་བའང་སོར་གནས་སུ་བཀོད་ཅིང་། །ཕྱོགས་བཞི་མཚོ་བཞི་དང་།།མཚམས་བཞི་ལྷ་རི་གཉེན་པོ་བཞི་ནང་དུ་ཚུད་པའི་ཕྱི་བསྐོར། །བར་སྐོར་དཔག་ཚད་གསུམ།།ནང་བསྐོར་ད་ལྟའི་བསྐོར་ལམ་འདི་ལ་རྒྱང་གྲགས་དྲུག་གི་དབང་དུ་བྱས་པའི་བསྐོར་ཚན་དང་། ཕན་ཡོན་སོགས་མང་དུ་བཤད་སྣང་ཡང་ཚིག་ཚོགསལ་འཛེམས་ནས་མ་བྲིས།

རྩོམ་སྒྲིག་པ།  ཤེས་རབ་རལ་གྲི།  

གསལ་འདེབས། 

རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།  

 

 

དྲ་བའི་སྦྲེལ་ཐགhttp://www.tb1025.cn            

བརྒྱུད་འགོད།