རྒན་རྒྱའི་བྲག་དཀར་གྱི་གནས་བསྟོད།

ཡོང་ཁུངས།   ངེད་དགེ་ལུགས་དྲ་བ།     སྤེལ་དུས།  2016-05-19 23:20:39     རྩོམ་པ་པོ།   དུང་དཀར་བློ་བཟང་འཕྲིན་ལས།    ཀློག་ཐེངས།  

20100717094818703.jpg

ཕུན་ཚོགས་རིན་ཆེན་གཏེར་བརྒྱས་རབ་ཕྱུག་ཅིང་། །
འཛམ་བུའི་སྒྲ་དབྱངས་ལྡན་པའི་གླིང་ཆེན་གྱི། །
རྩེ་མོར་མངོན་མཐོ་རྒྱ་ཆེའི་བོད་ལྗོངས་སུ། །
བལྟ་ན་ཉམས་དགའི་ངོ་མཚར་བརྗོད་ལས་འདས། །
ཕྱོགས་མཚམས་རི་ཕྲན་མང་པོས་ཡོངས་བསྐོར་ཞིང་། །
ལྗོངས་ཀུན་ལོ་ལེགས་ཞིང་ཁའི་དྲ་བ་དང་། །
རྒྱ་ཁྱོན་ས་མཐའ་བྲལ་བའི་རྩྭ་ཐང་གིས། །
རབ་མཛེས་གཡུ་གཞོང་ས་ལ་བཀྲམ་པ་ལྟའི། །
དགེ་བཅུ་ཀུན་ཚང་གན་རྒྱའི་ཡུལ་ཁམས་དེའི། །
དབང་ལྡན་ཕྱོགས་སུ་གཉའ་གོང་བྲག་དཀར་ཞེས། །
བདེ་ཆེན་རྒྱལ་པོ་བཅོམ་ལྡན་ཧེ་རུ་ཀའི ། །
བྱིན་རླབས་ཅན་གྱི་གནས་མཆོག་དམ་པ་ཉིད། །
བརྗིད་ཆགས་བྲག་རི་དགུང་སྔོན་དབྱིངས་སུ་སྙེགས། །
ལང་ལོང་སྤྲིན་དཀར་མཛེས་པའི་སྟོད་གཡོགས་བཅིངས། །
རྩ་བར་སྨན་ལྗོངས་ནགས་ཚལ་སྟུག་པོས་ཁེབས། །
དྭངས་གཙང་ཆུ་རྒྱུན་དལ་གྱིས་འབབ་པའི་ཁྲོད། །
ཟུང་འཇུག་སྐུ་བརྙེས་གྲུབ་དབང་མི་ལ་ཉིད། །
སླར་ཡང་བྱོན་འདྲའི་དཀའ་སྤྱད་བརྟུལ་ཞུགས་ཀྱིས། །
སྐལ་ལྡན་གདུལ་བྱ་རྒྱ་མཚོ་སྐྱོང་བའི་མགོན། །
ཡུན་རིང་བཞུགས་གནས་ཉམས་དགའི་ཕུག་པ་དེར། །
ཀུན་རྟོག་གཡོ་བྱེད་འགྲོ་འོང་མ་ལུས་པ། །
དབྱིངས་སུ་བཅོམ་ནས་ཟུང་འཇུག་རྡོ་རྗེའི་སྐུར། །
བཞེངས་པའི་རང་རྟགས་ཕྱི་རུ་མངོན་པ་བཞིན། །
སྲ་མཁྲེགས་བྲག་ལས་དྭངས་བསིལ་ཆུ་རྒྱུན་འབབ། །
དེ་དང་ཉེ་བར་མཐོ་བརྗིད་ཤར་རིའི་ངོས། །
རྡོ་ཡི་སྤྱིལ་ཆུང་རང་ཤོང་ཕུག་པ་ཞིག །
རང་བྱུང་སྐྱིད་པའི་གནས་ཁང་འདིར་ཡོད་ཅེས། །
སྒྲུབ་པ་པོ་ལ་མགྲོན་དུ་འབོད་པ་བཞིན། །
རྒྱལ་བས་བསྔགས་པའི་དབེན་གནས་འདི་འདྲ་རུ། །
དམ་ཆོས་སྒྲུབ་པའི་སྙིང་རུས་ལྡན་གྱུར་ན། །
ཐ་མལ་བུད་མེད་ལུས་སུ་སྐྱེས་པ་ཡང་། །
ཚེ་འདིར་ཟུང་འཇུག་འགྲུབ་པའི་སྐལ་ལྡན་ཞེས། །
མཁའ་སྤྱོད་ཞིང་གི་རྡོ་རྗེ་བཙུན་མོ་དངོས། །
མཐུན་སྣང་མི་མོའི་རྣམ་པར་རོལ་བའི་གར། །
གུང་རི་མཁའ་འགྲོའི་མཚན་ཅན་སྐྱེས་མཆོག་གི །
སྐུ་ཕྲེང་རིམ་པས་བསྟན་འགྲོའི་དོན་ཆེན་མཛད། །
དམ་པའི་སྐྱེས་མཆོག་ཉི་ཟླ་ཟུང་གཅིག་གི ། །
ཐུགས་བསྐྱེད་འོད་སྣང་འཕྲོ་བའི་རང་གཟུགས་ལས། །
ལེགས་འོངས་རིག་སྔགས་འཆང་བའི་དགེ་འདུན་སྡེ། །
འཁོར་ལོ་གསུམ་གྱི་མཛད་པས་ཉིན་བཞིན་བྲེལ། །
ཨེ་མ་ཆོས་བྱེད་མཐུན་རྐྱེན་ཀུན་འཛོམས་པའི། །
དབེན་གནས་འདི་འདྲར་ཐོས་བསམ་སྒོམ་གསུམ་གྱི། །
ཉམས་ལེན་ཟུང་དུ་འབྲེལ་བར་ལེགས་སྐྱོང་བའི། །
གོ་སྐབས་རྙེད་འདི་ལྷག་པར་སྐལ་བ་བཟང་། །
དེ་ལྟར་གནས་མཆོག་འདི་ཡི་ངོ་མཚར་ཆོས། །
ཉུང་ངུའི་ཚིག་གིས་བརྗོད་པར་མི་ནུས་ཀྱང་། །
སྔོན་བྱོན་དམ་པའི་རྣམ་ཐར་མཛད་འཕྲིན་ལ། །
མོས་པའི་སེམས་ཀྱིས་ཅུང་ཟད་སྨྲས་པ་འདིས། །
བསྟན་འཛིན་དམ་པའི་གྲལ་དུ་སྙེགས་ན་ཡང་། །
ཆོས་བྱེད་སྐལ་བས་ཕོངས་པའི་བླ་གཟུགས་བདག །
རྙེད་དཀའི་རྟེན་བཟང་ལན་ཅིག་ཐོབ་དུས་འདིར། །
དོན་ལྡན་སྙིང་པོ་མྱུར་དུ་ལོན་པར་ཤོག །
 

   གསལ་འདེབས། 
                 རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ། 
                 རྩོམ་ཁུངས། རྩོམ་འདིའི་སྦྲེལ་ཐགhttp://www.tb1025.cn

 

བརྒྱུད་འགོད།