ཁོ་ཚེ་གུར་སྒར་དགའ་ལྡན་ཆོས་འཕེལ་གླིང་།

ཡོང་ཁུངས།   མདོ་ལྷོ་དྲ་བ།     སྤེལ་དུས།  2018-10-24 21:32:01         ཀློག་ཐེངས།  

ཁོ་ཚེ་གུར་སྒར་ཏེ་དགའ་ལྡན་ཆོས་འཕེལ་གླིང་ནི་ཀུན་མཁྱེན་སྐུ་ཕྲེང་གཉིས་པ་རྗེ་       འཇིགས་མེད་དབང་བོའི་སྐུ་དུས་ཁོ་ཚེ་ལྷ་སྡེ་གསར་དུ་ཆགས། ཕྱིས་ཆེ་མ་འགྱངས་པ་ནས་སེར་ཁྱིམ་པ་རེ་ཟུང་ཡོད་པ་ལ་སྐུ་ཕྲེང་གསུམ་པས་འཐུ་ཁུམ་ཐང་དུ་ཨརྒེ་གུར་རྒན་ཕུབ་ནས་སེར་སྡེ་ཚུགས་པར་གྲགས་ལ། ཁོང་གི་རྣམ་ཐར་དུའང་ཟུར་ཙམ་གསལ། དེ་ཕྱིས་ཤིག་ནས་ད་ལྟའི་   གནས་འདིར་གུར་སྒར་ཆགས་པས་ཁོ་ཚེ་གུར་སྒར་ཞེས་པའི་མིང་ཡང་དེ་ནས་བྱུང་བར་མངོན། རབ་བྱུང་བཅོ་ལྔ་བའི་ཤིང་རྟསྤྱི་ལོ༡༨༩༤ལོར། ཀུན་མཁྱེན་སྐུ་ཕྲེང་བཞི་བ་ཆེན་པོ་ཕེབས་ཐེངས་དང་པོའི་སྐབས་ཧོར་ཟླ་བདུན་པའི་ཚེས་བཅུ་ལ་བདེ་མཆོག་དྲིལ་བུ་ལྷ་ལྔའི་བདག་འཇུག་ཚོགས་འཁོར་སོགས་གནང་། ལྕགས་གླང་ལ་ཕེབས་དུས་ཁོ་ཚེའི་འགོ་གཉེར་གུར་གང་བོ་སོགས་ཐུན་མོང་གིས་ཞུས་ལན་གྱི་བཀའ་བཀོད་ལྟར་ལོ་དེའི་ལྔ་བའི་ཚེས་བཞིར་ས་འདུལ་བྱ་རྒྱུ་དང་། གྲྭ་མང་འཚོགས་དབུས་སུ་ལྷན་ཚོགས་གནང་རྒྱུ་དང་འདོན་ཆའི་སྐོར་བཅས་ཆས་པ་རྒྱ་  མཁར་སྐུ་ཞབས་དགེ་འདུན་འཇམ་དཔལ་གྲུབ་པའི་རྡོ་རྗེ་ལ་བཀའ་ཕེབས་བཞིན། དགོན་ས་ ངོས་འཛིན། ས་བརྟག་བསླང་དང་ལྟོ་འཕྱེའི་ཐིག་འདེབས་པ་གནང་། སྲུང་མར་བཙན་རྒོད་ཡམ་ཤུད་དམར་པོ་རང་ཤུགས་ཀྱིས་འགོ་བའི་ལྟས་ཤར། རྟེན་འབྲེལ་ངང་གིས་འགྲིག་ཅིང་སྡེ་གཞུང་གིས་འདུ་ཁང་གསར་བཞེངས་ཀྱི་འགོ་ བརྩམས་པ་མ་འགྱངས་པར་གྲུབ། དགུན་བླ་བྲང་རང་ནས་སྐུ་གསུང་ཐུགས་རྟེན་དང་། བདག་འཇུག་གི་གཏོང་ཐེབས་བཅས་སྦྱོར་འཇགས་དང་།   དགོན་པའི་མཚན་ལ་དགའ་ལྡན་ཆོས་འཕེལ་གླིང་ཞེས་བསྩལ་ཅིང་བཅའ་ཡིག་ཕན་ བདེའི་འདབ་བརྒྱ་བཞད་པའི་ཉིན་བྱེད་ཅེས་པ་གསུངས། རི་ཁྲོད་ཡིད་དགའ་ཆོས་འཛིན་ནས    བླ་བྲང་གི་རི་ཁྲོད་ཞོལ་མགྲྭ་ཚང་དང་ནང་ཁག་བཅས་ལ་ཆོས་སྤྱོད་ཀྱི་ཡོ་བྱད་དུ་མ་སྦྱོར་   འཇགས་བྱེད་དུ་བཅུག དེའི་ཕྱི་ལོར་དབང་ལུང་ཁྲིད་གསུམ་གྱི་གཏེར་མཛོད་སྒོ་མང་བློ་བཟང་ཚུལ་ཁྲིམས་རྒྱ་མཚོ་ཁྲིའི་ཐོག་མར་ཕེབས། གཞི་གསུམ་གྱི་ཕྱག་ལེན་ཚུགས། ཆོས་འདུལ་བ་དང་མཐུན་པའི་སྒྲིག་ལམ་ཞིབ་ཚགས་པ་མཛད། སྔོན་མ་ཅིག་ལབ་སྒྲོན་ཡུམ་སྲས་གཡའ་རིའི་རྨོག་ལུང་དུ་གཏེར་སྦ་བར་ཕེབས་སྐབས་ ཞལ་སྐལ་གྱི་གནས་ཁྱད་པར་ཅན་ཡིན་པས་གཅོད་དབང་ཁྲིད་སྦྱིན་སྲེག་སོགས་ཕྱག་ ལེན་ཞིབ་པར་བསླབས། ཆུ་སྟག་གི་དབྱར། ཀུན་མཁྱེན་ཆེན་པོས་ མགོན་པོ་ཕྱག་དྲུག་པ་དང་བཙན་རྒོད་ཡམ་ཤུད་དམར་པོའི་ཞལ་ཐང་དང་བཅས་ དགོན་པའི་སྲུང་མར་གནང་།ཁྲི་བ་བྲག་དཀར་ཞབས་དྲུང་གི་སྐབས་མི་ཤེད་ཅན་ འགས་འཐེན་འཁྱེར་གྱིས་དགོན་གནས་ཅོ་ནེ་ཆ་ཐོག་ཟེར་བར་སྤར། དེ་རྗེས་གུང་ཐང་འཇམ་པའི་དབྱངས་རྗེ་བསྟན་པའི་ཉི་མ་བསྐོ་བཞག་གནང་། ཕྱི་ལོར་དགོན་པ་སྔར་གནས་སུ་ཕྱིར་སྤོས་ཏེ་འདུ་ཁང་བསྐྱར་བཞེངས་དང་རྗེ་ཉིད་ ཀྱི་མཚམས་ཁང་ལེགས་པར་གྲུབ་ཟིན། མེ་ཡོསསྤྱི་ལོ༡༩༢༧ལོའི་ལོ་མཇུག་ལ་སྐྱབས་མགོན་སྐུ་ཕྲེང་ལྔ་བ་ཆེན་མོ་ཕེབས།ཕྱི་ལོའི་ཆོ་འཕྲུལ་ཟླ་བའི་ བཅོ་ལྔའི་གསུང་ཆོས་ལ་ཆོས་སྦྱིན་གྱི་བདུད་རྩིའི་བགོ་སྐལ་ཐོག་མར་བསྩལ། སྐུ་གོང་མའི་གཟིམ་ཆུང་སྒྲུབ་ཁང་དུ་ཕྱག་རྗེས་ཀྱང་བཏབ།རྗེའི་གསུང་བཀོད་ལྟར་ ཚོགས་འདོན་ཁ་ཤས་དང་། ཙི་དུང་ཞིབ་ཁྲིད་བྱེད་འཇུག་པ་གནང་། མེ་སྤྲེལསྤྱི་ལོ༡༩༥༦ལོར་གུང་ཐང་སྐུ་ཕྲེང་དྲུག་པ་རྗེ་འཇིགས་མེད་བསྟན་པའི་དབང་ཕྱུག་མཆོག་གིས་ ཐུགས་ཁུར་མཛད་དེ།འདུ་ཁང་ཞིག་རལ་དུ་འགྱུར་བཞིན་པའི་ར་སྐོར་རུང་ཁང་དང་ བཅས་པ་ནང་ཆེན་རང་གིས་བསྐྱར་བཞེངས་དང་བླ་མ་སེ་ལུ་ཚང་གིས་གསེར་ཚོན་ཕུལ། འདུ་ཁང་བསྐྱར་གྲུབ་ཀྱི་སྟོན་མོར། འཇིགས་བྱེད་དང་    གདུགས་དཀར་བྱད་གྲོལ་སོགས་དབང་ལུང་གི་ཆོས་ཆར་ཕབ།

སྐུའི་རྟེན་ལ།སྐྱབས་མགོན་ཐར་མདོ་རྒྱ་མཚོས་གནང་བའི་གསེར་ཟངས་ལས་གྲུབ་པའི་ཚེ་དཔག་མེད་གསུང་འབྱོན།སྲས་ངག་དབང་བཀྲ་ཤིས་ཀྱི་ཐུགས་དམ་གྱི་རྟེན་གཙོ་ལུང་སྟོན་བྱམས་པའི་ཞལ་ཐང་།བླ་ཁོ་རིན་པོ་ཆེ་འཇིགས་མེད་འཕྲིན་ལས་རྒྱ་ མཚོས་གནང་བའི་མ་ཅིག་སྐུ་བྱིན་ཅན།བྱམས་ཆེན།རྗེ་སྟོང་སྐུའི་གསེར་ཐང་སོགས་བྲིས་འབག་གི་སྐུ་བརྙན་ཤིན་ཏུ་མང་བོ་དང་།བཀའ་འགྱུར་དང་མདོ་སྡེ་བསྐལ་བཟང་གསེར་བྲིས་ཚར་རེ། གཞན་བཀའ་འགྱུར་སྐྱར་དཔར་དང་རྗེ་ཡབ་སྲས། ཀུན་མཁྱེན་ཡབ་སྲས་སོགས་ཀྱི་གསུང་འབུམ་གྲངས་མང་བཞུགས་ཤིང་། རྗེ་གུང་ཐང་སྐུ་ཕྲེང་ལྔ་བའི་གདུང་རུས་ཀྱི་ཆ་ཤས་སོགས་ནང་བཞུགས་ཀྱི་    གསེར་ཟངས་ལས་གྲུབ་པའི་མཆོད་རྟེན་ཕྲ་ཚོམ་ལྡན་པ། སྐྱོར་དཔོན་ཚང་སེ་ལུང་ཚང་གི་གདུང་རྟེན་སོགས་ཐུགས་རྟེན་མི་ཉུང་ངོ་།།

ལོ་གཅིག་ལ་སྨོན་ལམ་ཉིན་བཅོ་ལྔ་དང་གཅོད། བདེ་མཆོག་གི་སྒྲུབ་མཆོད། དུས་ཚིགས་ བཞིའི་ཆོས་ཐོག་ཐོགས་སྡོམ་ཉིན༡༤༧ལ་ཆོས་སྤྱོད་ལོ་ལྟར་མ་ཆག་པ་བྱ་དགོས།

སྤྱིར་ཁོ་ཚེ་འདིར་ཞང་སྟོན་བསྟན་པ་རྒྱ་མཚོ། ཟམ་ཚ་གསེར་ཁྲི། གུང་ཐང་སྐུ་ཕྲེང་ལྔ་བ་  སོགས་སྐྱེས་ཆེན་ཁ་ཤས་འཁྲུངས་ཤིང་།གཞན་བཙན་པོ་དོན་གྲུབ་རྒྱ་མཚོ་དང་རྭ་བསོད་ནམས་དབང་རྒྱལ།ཀིརྟི་བློ་བཟང་འཕྲིན་ལས་གསུམ་འཁྲུངས་ཡུལ་ཆོ་ཧོར་ཡིན་ཀྱང་སྐུ་ན་ཕྲ་དུས་ཁྱིམ་ཚང་ཁོ་ཚེར་བླངས་ཏེ་སྐུ་ནར་སོན་ཚུལ་ཀུན་མཁྱེན་གསུམ་པའི་རྣམ་ ཐར་དུ་གསལ་བ་ལྟར་དམ་པ་དུ་མས་བྱིན་གྱིས་བརླབས་པའི་ཡུལ་ཞིག་གོ།

འདུ་ཁང་།བཙན་ཁང་།སློབ་དཔོན་ལྷ་ཁང་བཙུགས་ཤིང་རྭ་བས་བསྐོར་བ་དང་།གུང་ཐང་ཚང་།སྐྱོར་དཔོན་ཚང་།དབལ་མང་ཆུང་བ་ཚང་གསུམ་གྱི་གཟིམ་ཁང་ཡོད་པར་སོ་ སོར་རྟེན་གསུམ་གྲངས་མི་ཉུང་ངོ་།།  ༡༩༨༥ལོར་གྲྭ་བ༡༥༠བཞུགས་ཡོད་པ་འདྲ།།


བརྒྱུད་འགོད།