ཨ་རིག་གུར་སྒར་རམ་ཨ་རིག་དགོན་ཆེན་དགའ་ལྡན་ཆོས་འཕེལ་གླིང་།

ཡོང་ཁུངས།   ངེད་དགེ་ལུགས་པའི་དྲ་བ།     སྤེལ་དུས།  2016-11-23 13:31:46     རྩོམ་པ་པོ།   ཞོ་བཟང་དགེ་འདུན་ཚུལ་ཁྲིམས།    ཀློག་ཐེངས།  

啊热.jpg 

༄༅།།ཨ་རིག་གུར་སྒར་རམ་ཨ་རིག་དགོན་ཆེན་དགའ་ལྡན་ཆོས་འཕེལ་གླིང་ནི།  དུས་རབས་དང་ཕྱི་ལོ་ནམ་ཞིག་ལ་བླ་མ་སུ་ཞིག་གིས་བཏབ་པ་ཡིན་པར་ཁ་ཚོན་གཅོད་མི་ཐུབ་མོད།  ཨ་རིག་པ་རྣམས་ཀྱི་ངག་རྒྱུན་ལ་ཨ་རིག་དགོན་ཆེན་ལ་མི་ལོ་ལྔ་བརྒྱ་ལྷག་གི་ལོ་རྒྱུས་ཡོད་པར་བཤད་ལ།  དེ་ཡང་བདེན་པར་ངེས་ཏེ།  སྔོན་དང་པོ་ཨ་རིག་གུར་སྒར་ཀེ་ཐོ་རི་འདབས་སུ་དགོན་པ་ཆགས་ཡོད་དུས་ཡོན་ཏན་དབང་ཕྱུག་ཏུ་གྲགས་པ་སྔར་དགེ་སློང་ཡིན་པ་ལ་ཕྱིས་འགྲོ་དོན་གྱི་ཆེད་དུ་ཨ་རིག་ས་ཆ་ནས།  མཁའ་འགྲོ་སེང་གེ་གདོང་བ་ཅན་གྱི་སྤྲུལ་བ་སྐྱིད་མོ་ཡག་ཟེར་བ་དབང་དུ་བསྡུས་ནས།  ལྟར་སྣང་ཁྱིམ་པའི་ཚུལ་མཛད་དེ་ཡབ་ཡུམ་གཉིས་གཉན་ཆེན་ཀེ་ཐོའི་མཚམས་ཁང་དུ་བསྙེན་མཚམས་ལ་བཞུགས།

རབ་བྱུང་དགུ་བའི་ཤིང་བྱི༼ཕྱི་ལོ༡༥༦༤༽ལོར་ཁོ་གཉིས་ལ་སྲས་ཤིག་འཁྲུངས།  ཉིན་ཞིག་མཚམས་ཁང་དུ་བྱིས་པ་ངུ་བའི་སྒྲ་དགོན་པའི་གྲྭ་བ་ཚོས་ཐོས་ནས་ཁོ་གཉིས་ལ་སྡིགས་དམོད་མང་པོ་བྱས།  གྲུབ་ཆེན་ཉོབ་བམ་ཡོན་ཏན་དབང་ཕྱུག་ཚང་གིས་དགོན་པར་བཤད་རྒྱུར།  བྱིས་པ་འདི་ཁྱོད་ཚོར་མི་མཁོ་ན་ང་ལའང་དགོས་མཁོ་ཅང་མེད་ཟེར་ནས་གཡང་གཟར་དུ་འཕངས་པ་ན་རྡོ་ཕ་བོང་ཞིག་གི་སྟེང་དུ་བརྒྱབ་པས་འདམ་བརྫིས་པ་ལྟར་བྱིས་པའི་རྗེས་གསལ་བར་བྱུང་།  བྱིས་པས་ཡི་གེ་དྲུག་མ་དང་ཨ་ར་པ་ཙ་ནའི་སྔགས་གསུངས་ནས་འཛུམ་པ་མཛད་པས།  ཐམས་ཅད་ཀྱིས་གྲུབ་ཐོབ་ཀྱི་སྲས་གྲུབ་ཐོབ་ངེས་སོ་ཞེས་གླེང་།  རྗེས་མར་བྱིས་པ་དེ་ནི་ཀི་རྟི་སྐུ་ཕྲེང་གསུམ་པ་བསྟན་པ་རབ་རྒྱས་མཆོག་ཡིན་ལ།  ད་ལྟ་ཡང་བྱིས་པ་མར་འཕངས་སའི་རྡོ་ཕ་བོང་དེའི་སྟེང་དུ་རྡེའུ་འབུམ་ཞིག་བླུགས་ནས་ཡོད་པ་བྲག་ཀེ་ཐོའི་རི་འདབས་སུ་མཇལ་རྒྱུ་ཡོད་དོ།།

ཡང་རབ་བྱུང་བཅུ་གཅིག་པའི་ལྕགས་ཡོས༼  ཕྱི་ལོ༡༦༥༡  ༽ལོར་དགེ་བཤེས་བསྟན་པ་རིན་ཆེན་མཆོག་ཨ་རིག་ཡུལ་དུ་སྐུ་འཁྲུངས།  ཆུང་ངུའི་དུས་ནས་ཨ་རིག་དགོན་ཆེན་དུ་བཞུགས་ནས་ཡི་གེ་འབྲི་ཀློག་སོགས་ལ་སྦྱངས།  ཞེས་དང་།  སུམ་པ་པཎྜི་ཏ་ཡེ་ཤེས་དཔལ་འབྱོར་གྱི་རང་རྣམ་ལས།  མདོ་སྔགས་གང་ལའང་རྣམ་དཔྱོད་ཐོགས་པ་མི་མངའ་བའི་མཁས་དབང་ཐར་ཤུལ་ཆོས་སྐྱོང་རྒྱ་མཚོ་ཁོང་རབ་བྱུང་བཅུ་གཅིག་པའི་ལྕགས་ཕག༼ ཕྱི་ལོ༡༦༧༡  ༽ལོར་རང་ཡུལ་དུ་བྱོན་ནས་འབལ་མང་རའི་རྒྱབ་ཏུ་གུར་དགོན་དུ་བཞུགས་ནས་སྒྲུབ་པ་ཁོ་ན་མཛད་ཅེས་པ་སོགས་ལ་གཞིགས་ན། རབ་བྱུང་དགུ་བའི་མཇུག༼  ཕྱི་ལོ༡༥༦༤  ༽ལ་ཨ་རིག་གུར་དགོན་བཏབ་ཡོད་པར་འདོད་ལ། 

 

ཨ་རིག་གི་རྒན་རབས་པ་དག་གིས་ཀྱང་ཨ་རིག་གུར་སྒར་ནི་ཨ་རིག་གི་མ་དགོན་ཡིན་པར་བཤད་པ་དང་།  དེ་བས་སྔོན་ཨ་རིག་དགོན་ཆེན་གྱི་གྲྭ་བ་ཞིག་ཡིན་ན་ཨ་རིག་རྭ་རྒྱ་དགོན་པ་དང་ཨ་རིག་གཙང་དགོན་པ་སོགས་ལ་ཕེབས་ཚེ་འཇུག་སྒོ་སོགས་ཅི་ཡང་མེད་པའི་སྒོ་ནས་ཐད་ཀར་དུ་ཚོགས་ལ་ཕེབས་ཆོག་པ་དང་།  ཨ་རིག་རྭ་རྒྱ་དགོན་པ་དང་ཨ་རིག་གཙང་དགོན་པ་སོགས་ཀྱི་གྲྭ་བ་ཞིག་ཡིན་ན་ཨ་རིག་དགོན་ཆེན་གྱི་ཚོགས་ལ་ཕེབས་དགོས་ཚེ་ཐོག་མར་དགེ་སྐུལ་སོགས་ལ་འཇུག་སྒོའི་རིམ་པ་རྣམས་ཞུས་རྗེས་མ་གཏོགས་ཚོགས་ལ་ཕེབས་མི་ཆོག་ཟེར།   

ཨ་རིག་གུར་སྒར་ནི་སྔོན་བཤད་སྒྲུབ་གཉིས་འཛོམས་ཀྱི་ཆོས་སྡེ་ཆེན་པོ་ཞིག་ཡིན་པས་ཨ་རིག་དགོན་ཆེན་དུ་གྲགས་པར་བཤད་དོ།།

ཡིན་ནའང་།  བྲག་དགོན་པ་དཀོན་མཆོག་བསྟན་པ་རབ་རྒྱས་མཆོག་གིས་མཛད་པའི་མདོ་སྨད་ཆོས་འབྱུང་ལྟར་ན།  བྱ་བྲལ་དགེ་བཤེས་ངག་དབང་བསོད་ནམས་མཆོག་གིས་རབ་བྱུང་བཅུ་གསུམ་པའི་ས་ཕག༼  ཕྱི་ལོ༡༧༧༩  ༽ལོའི་ལོ་འགའི་སྔོན་ལ་ཨ་མྱེས་ཁྲབ་ཆེན་རི་བོའི་མདུན་རོལ་གྱི་རྡོ་རྫོང་གད་པ་གཡང་ར་ནས་རི་ཁྲོད་པའི་དགོན་པ་ཨ་རིག་རྡོ་རྫོང་དགོན་པ་བཏབ་ནས་མཚན་ཉིད་ཀྱང་རྒྱས་པར་བཙུགས།  

ཁོང་གིས་བསྡུས་གྲྭ་ཞིག་ཀྱང་བརྩམས་ཏེ་དགོན་པ་ལེགས་པོ་བྱུང་མཚམས་སུ་སྐུ་སྙུང་བཞེས།  མཚན་ཉིད་བཞག་ནས་བླ་བྲང་བཀྲ་ཤིས་འཁྱིལ་དུ་ཕེབས་ནས་ཀུན་མཁྱེན་མཆོག་ལ་གསང་འདུས་ཀྱི་དབང་ཞུས།  འབུལ་བ་གཏོས་ཆེ་བ་བཏེགས།  གྲྭ་ཚང་དུ་རྒྱུད་མཚན་ཉིད་གང་བཙུགས་ན་ལེགས་ཞུས་པར་མཚན་ཉིད་བཙུགས་ན་ལེགས་ཤིང་དགོན་པ་ཡུན་རིང་དུ་གནས་བ་དང་དགོན་མིང་ལ་དགའ་ལྡན་ཆོས་འཕེལ་གླིང་ཐོགས་གསུངས།  དེང་སང་དགོན་པ་མཚོ་སྔོན་གྱི་སྟོད་དུ་ཡོད་པ་ལ་ཨ་རིག་གུར་སྒར་ཞེས་འབོད་སྲོལ་ཡོད།  ཅེས་དང་།  དབལ་མང་པཎྜི་ཏའི་རྣམ་ཐར་ལས་ཀྱང་།  ནགས་རྡོ་རྫོང་སོགས་ཨ་རིག་གི་ས་ཕྱོགས།  འབལ་གཞུང་སྟོད་སྨད་སོགས་དེ་ཕྱོགས་དབྱིབས་བཀོད་གོ་བ་རགས་ཙམ་ཆགས།  དངོས་པོའི་ཆེ་ཆུང་གི་འབྲེལ་ལྡན་ཐམས་ཅད་ལ་བྱམས་པས་དམ་བཅས་པའི་གཟུངས་སོགས་རྣ་བར་བསྒྲགས་ཅི་ཐུབ་བྱས།  ཉེ་ཞོ་མེད་པར་སྟོན་མཇུག་གདན་སར་འབྱོར།  གང་རྙེད་བླ་བྲང་ལ་ཕུལ།  བསམ་སྦྱོར་རྣམ་དག་གི་སྒོ་ནས་སྐྱབས་འཇུག་ཞུས་པར་སླར་སྨོན་ལམ་བཏབ་ཆོག་གསུངས།  འདི་དུས་མཚོ་སྔོན་ནས།  བྱ་བྲལ་དགེ་བཤེས་བསོད་ནམས་དང་མཇལ།  སེར་འབྲས་དགེ་གསུམ་ལ་གྲགས་པའི་དགེ་བཤེས་འགྲན་ཟླ་མེད།  ཨ་རིག་བེ་ཧུ་མཁས་གྲུབ་ཀྱིས་བཀུར་ནས་མཚན་ཉིད་གྲྭ་ཚང་གུར་སྒར་ཞིག་ཀྱང་བཏབ་ཅེས་གསུངས་འདུག་མོད་བྱ་བྲལ་ཚང་དབུས་ནས་ཨ་རིག་ཡུལ་དུ་ཕེབས་ནས་ཨ་རིག་གུར་སྒར་གྱི་ཆོས་འཆད་ཉན་ཡར་རྒྱས་སུ་བཏང་བ་ཙམ་མ་གཏོགས་གསར་དུ་བཏབ་པ་མིན་པར་སྙམ་སྟེ།  བཤད་རྒྱུན་ལའང་།  ཨ་རིག་དགོན་ཆེན་ནི་ཨ་རིག་གི་མ་དགོན་ཡིན་ཟེར་བ་དང་ཨ་རིག་དགོན་ཆེན་ལ་མི་ལོ་ལྔ་བརྒྱ་ལྷག་གི་ལོ་རྒྱུས་ཡོད་ཟེར་བའི་བཤད་རྒྱུན་ལས་ཅུང་འཕྱི་ཡོད་པར་འདོད་པས་དཔྱོད་ལྡན་དག་གིས་དཔྱད་གཞིར་སྣང་ངོ་།།

  རྡོ་རྫོང་གད་པ་གཡང་ར་ཞེས་པའི་མིང་ཐོགས་དོན་ནི།  ཨ་རིག་གི་མེས་པོའི་གཉེན་སྟོན་སྐོར་གྱི་བཤད་པ་གཏམ་གྱི་རུ་མ་ལས།   བློན་ཆེན་པོས་གོ་ཁྲབ་གྱོན་འདྲ་ཞིག་ཡོད་ནོ།།  ས་རྡོ་རྫོང་ཨ་མྱེས་ཁྲབ་ཆེན་ཡིན་ནས་ཟེར་གི།  ཕྱག་དར་དཀར་ཐད་ལ་འཐེན་འདྲ་ཞིག་ཡོད་ནོ།།  ས་རྡོ་རྫོང་ཁ་ལམ་རིང་མོ་ཡིན་ནས་ཟེར་གི།  རྟ་ར་རར་སྲུང་རྟགས་བཏགས་འདྲ་ཞིག་ཡོད་ནོ།།  ས་རྡོ་རྫོང་གད་པ་གཡང་ར་ཡིན་ནས་ཟེར་གི།  འདི་ཨ་རིག་དགོན་ཆེན་ཆགས་སའི་གནས་གཞི་ཡིན་ནས་ཟེར་གི།  ཞེས་པའི་སྟོན་བཤད་འདི་ལས་ཀྱང་སྐབས་དེའི་ཨ་རིག་དགོན་ཆེན་ཆགས་ཡོད་སར་ཨ་མྱེས་ཁྲབ་ཆེན་རི་བོ་དང་རྡོ་རྫོང་ཁ་ལམ་རིང་མོ།  རྡོ་རྫོང་གད་པ་གཡང་ར་སོགས་ཀྱི་ཆགས་དབྱིབས་སོགས་ཀྱང་གསལ་བོར་བསྟན་ཡོད་དོ།། 

མངའ་རིས་སྐུ་ཕྲེང་གཉིས་པ་ཧུ་ཐོག་ཐུ་བསྟན་པ་རབ་རྒྱས་ཚང་ཨ་རིག་ཏུ་སྐུ་འཁྲུངས་པ་མངའ་རིས་ཚང་གིས་མ་བླུས་པས་ཨ་རིག་དགོན་ཆེན་དུ་ཕེབས་ནས་འཆད་ཉན་གྱི་གྲུ་ཆར་བར་མེད་དུ་ཕབ།  སྐབས་དེར་རེབ་གོང་རྫོང་སེར་དགོན་པ་ཡང་འཐོར་ཞིག་ཏུ་སོང་བས་རྫོང་སེར་ཚང་གིས་བྱ་བྲལ་དགེ་བཤེས་བསོད་ནམས་གྲགས་པར་དགོན་པ་གྲགས་ཆེན་ཞིག་ཡོད་པ་གོ་ནས་དགོན་པར་ཚོགས་དུང་གཉིས་ཡོད་པ་ཁྱེར་ཡོང་སྟེ་ཨ་རིག་གུར་སྒར་ལ་ཕུལ་ཏེ་དགོན་དེའི་ཆོས་གྲྭར་ཞུགས་ནས་བསྡད།  རྡོ་རྫོང་གད་པ་གཡང་ར་ནས་ལོ་ངོ་སུམ་ཅུ་ལྷག་ཏུ་བསྡད་རྗེས།  ཨ་རིག་གི་རུ་བ་རྣམས་དུས་རབས་བཅུ་དགུ་བའི་དུས་མགོ་རབ་བྱུང་བཅུ་གསུམ་པའི་ཤིང་གླང༼  ཕྱི་ལོ༡༨༠༥  ༽ལོའི་སྔོན་ལ་མཚོ་སྔོན་པོའི་ཕྱོགས་སུ་རུ་སྤོས་པ་དང་ལྷན་དུ་ཨ་རིག་གུར་སྒར་ཡང་རུ་བ་རྣམས་དང་ལྷན་དུ་གནས་དེར་འབྱོར།

དེ་ནས་རིམ་བཞིན་ཧྭང་ངེའི་རི་རྒན་དང་།  ཧོལ་ཁའི་ཤྭ་ར་ལ་ཙེ།  བློན་པོ་གསེར་ཆེན་གྱི་མདུན་ལུང་། བོ་རོ་ཆུ་འགགཐུར་རྒོན་མདོ།  ལུང་རྒན་ཐང་།  བ་ལུ་མ།  ད་ལྟའི་དགོན་ཤུལ་རྒྱབ་ལུང་མདོ།  གྲམ་དཀར།  དུང་སོ།  མུ་རི་ཁེར་རྩ།  ལམ་ལུང་ཞོལ་མ་སོགས་སུ་གནས་སྤར་བ་དང་། རབ་བྱུང་བཅུ་དྲུག་པའི་མེ་ཁྱི༼  ཕྱི་ལོ༡༩༤༦ ༽ལོར་ཡང་བསྐྱར་ད་ལྟའི་དགོན་ཤུལ་འདི་ནས་གཏན་སྡོད་བྱས་ཏེ་བྱ་བྲལ་ཚང་དང་། མངའ་རིས་ཚང་། ཕག་སེ་ཚང་སོགས་ཀྱིས་རེས་མོས་སུ་བསྐྱངས་སོ།།

རབ་བྱུང་བཅོ་ལྔ་བའི་ཆུ་སྟག༼  ཕྱི་ལོ༡༩༠༢  ༽ལོར་ཨ་རིག་དགོན་པའི་ཨ་ལགས་ཕག་སེ་ཚང་སྐུ་མྱ་ངན་ལས་འདས་ནས་རྫོང་སེར་ཚང་དང་རྒན་པ་ཁ་ཤས་ཞྭ་དམར་པཎྜི་ཏ་དགེ་འདུན་བསྟན་འཛིན་རྒྱ་མཚོའི་སྐུ་མདུན་དུ་ཕེབས་ནས།  ཨ་ལགས་ཕག་སེ་ཚང་གི་བསྔོ་ཞུས་དང་།  རྫོང་སེར་སྤྲུལ་སྐུ་བསྙེན་བསྒྲུབ་བྱས།  ཕག་སེ་ཚང་ཞལ་མ་བཞུགས་ཤིང་མངའ་རིས་སྤྲུལ་སྐུ་བག་ཡངས་མཛད་སྟབས་ཨ་རིག་དགོན་པའི་ཆོས་སྲིད་ཀྱི་སྐུ་དོན་ལ་བཀོད་ཁྱབ་བྱེད་མཁན་རྫོང་སེར་ཚང་དང་།  བྱ་བྲལ་ཚང་།  མ་ཁྱེ་ཆུང་བ་གསུམ་གང་འོས་ཀྱི་ཞུ་བར་ཞལ་བཀོད་ཞུས་པར།  སྒྲིག་ལམ་གཙོ་བོར་གྱུར་བའི་སྐུ་དོན་གང་ཡོད་རྒན་མང་ཚོགས་འདུས་ཀྱིས་་ཁུར་བཞེས་མཛད་དེ་ཤ་གང་ཚ་དང་གྲོས་མཐུན་དགོས་གསུངས་པ་བཞིན།  ཨ་རིག་དགོན་ཆེན་གྱི་ལས་དོན་ཐམས་ཅད་རབ་བྱུང་བཅུ་དྲུག་པའི་ས་ཁྱི༼  ཕྱི་ལོ༡༩༥༨  ༽ལོའི་བར་དུ་དགོན་པའི་རྒན་པ་བཅུ་གསུམ་གྱིས་ཐག་གཅོད་བྱས་པས་ཐུགས་མཐུན་ཁྲིམས་གཙང་གི་དགོན་པ་འདི་ལྟ་བུ་དཀོན་ཞེས་སྔོན་རབས་པ་དག་གིས་གླེང་།  

འདི་དུས་ཨ་རིག་དགོན་ཆེན་ལ་འདུ་ཁང་ཆེན་མོ་སྦྲེ་འདོམ་ཆིག་སྟོང་སུམ་བརྒྱ་ལས་གྲུབ་པ་གཅིག་དང་མཆོད་པའི་འདུ་ཁང་གཅིག་དང་།  སྨྱུང་གནས་འདུ་ཁང་།  དགེ་ཕྱུག་སྟོང་དཔོན་ཐུབ་བསྟན་གྱིས་བཞག་པའི་འདུ་ཁང་།  དབྱར་གནས་འདུ་ཁང་བཅས་རིན་ཐང་བྲལ་བའི་རྟེན་དང་བརྟེན་པ་མང་པོ་བཞུགས།  ཐོས་བསམ་གླིང་དང་རྒྱུད་སྡེ་གཅིག་ལྕོགས་སུ་བཙུགས་ཡོད་པས་མཚོ་སྔོན་པོ་ཕྱོགས་ཀྱི་དགེ་ལུགས་པའི་དགོན་པ་ཆེ་གྲས་དང་ཐུགས་མཐུན་ཁྲིམས་གཙང་གི་དགོན་པ་མིང་གྲགས་ཅན་ཞིག་ཡིན་པས།  དཔའ་རིས་དགེ་བཤེས་བློ་བཟང་རབ་གསལ་ཚང་གིས་ཀྱང་།  གངས་ཅན་བོད་ཀྱི་དྭངས་མ་ཨ་རིག་གི།  དགོན་ཆེན་ཁྲིམས་ལྡན་འདུས་པའི་རྒྱ་མཚོ་ཆེ།།  ཞེས་དོན་མཐུན་གྱིས་བསྔགས་བརྗོད་མཛད་ཡོད་དོ།།

སྔ་གཞུག་ཏུ་དགོན་འདི་ལ་རྗེ་གསེར་ཁང་པ་བློ་བཟང་བསྟན་འཛིན་རྒྱ་མཚོ་དང་།  སྐུ་མཆེད་བློ་བཟང་བསྟན་པ་རྒྱ་མཚོ།  ཤིང་བཟའ་བློ་བཟང་བསྟན་པའི་དབང་ཕྱུག  ཞྭ་དམར་པཎྜི་ཏ་དགེ་འདུན་བསྟན་འཛིན་རྒྱ་མཚོ།  སྐུ་མཆེད་དགེ་འདུན་བསྟན་པ་རབ་རྒྱས།  དཔའ་རིས་དགེ་བཤེས་བློ་བཟང་རབ་གསལ།  ལྡེ་ཚའི་ཨ་ཁུ་གྲགས་པ་དར་རྒྱས།  ཨ་རོལ་བློ་བཟང་ལུང་རྟོགས་བསྟན་པའི་རྒྱལ་མཚན།  ཐར་ཤུལ་དགེ་འདུན་ཆོས་སྐྱོང་རྒྱ་མཚོ།  དངུལ་རྭའི་དགེ་བཤེས་བསྟན་འཛིན་རྒྱ་མཚོ་སོགས་མཁས་གྲུབ་གཉིས་ལྡན་གྱི་སྐྱེས་ཆེན་དམ་པ་མང་པོ་ཕེབས་ནས་ཆོས་ཀྱི་འཁོར་ལོ་རྒྱ་ཆེར་བསྐོར་རོ།།

ང་བརྒྱད་ལོར་ཆོས་ལུགས་བསྒྱུར་བཀོད་བྱེད་དུས་དགོན་སྡེ་འདིར་ཁྲི་ཆེན་དང་ཁྲི་ཆུང་ཞེས་གཉིས་ཡོད་པ་ལས།  མཁན་པོ་དང་ཧུ་ཐོག་ཐུའི་ཆོ་ལོ་ཡོད་པ་ལྟ་བུ་ཞིག་ཡིན་ཚེ་ཁྲི་ཆེན་གྱི་གོ་གནས་ཡོད་ལ་དེ་དག་ནི།  བྱ་བྲལ་ཚང་དང་།  མངའ་རིས་ཚང་།  རྫོང་སེར་ཚང་། ལྷོ་བ་ཧུ་ཐོག་ཐུ་ཚང་།  ཕག་སེ་ཚང་།  མ་ཁྱེ་ཆེ་བ་ཚང་།  དགོན་ལུང་མཁན་ཟུར་རྡོ་བ་ཚང་སོགས་ཡིན།  རབ་འབྱམས་པའི་མཚན་བཏགས་ལྟ་བུ་ཐོབ་པའི་དགེ་བཤེས་ཞིག་ཡིན་ཚེ་ཁྲི་ཟུར་རམ་ཁྲི་ཆུང་གི་གོ་གནས་ཡོད་ལ་དེ་དག་ནི།  སོག་རྩ་ཚང་།  བཙན་པོ་ཚང་།  སྨྲ་ཁམས་ཚང་། ཧོར་ཚང་། ལྡོང་ཚང་། གླིང་ཚང་། ཆོས་མཛད་ཚང་། མ་ཁྱེ་ཆུང་བ་ཚང་། རུ་སར་ཚང་བཅས་ཡིན།  ད་དུང་དགོན་པ་འདི་ནས་ཧོར་དགེ་བཤེས་བསོད་ནམས་གྲགས་པ་དང་།  གླིང་དགེ་བཤེས་འཇམ་དབྱངས་རྒྱ་མཚོ།  སྨྲ་ཁམས་དགེ་བཤེས་བློ་བཟང་ཡར་འཕེལ།  རུ་སར་དགེ་བཤེས་བློ་བཟང་ཆོས་འཕེལ།  ཨ་གནམ་དགེ་བཤེས་སྐལ་བཟང་རྒྱ་མཚོ།  ཤིང་སྡེ་དགེ་བཤེས་འཇམ་དབྱངས་ལེགས་བཤད་སོགས་མཁས་པའི་ཁྱུ་མཆོག་སྟག་སེང་ཁ་སྤྲད་པ་ལྟ་བུ་མང་པོ་བྱུང་ངོ་།། སྔོན་ཆད་དགོན་འདི་ལ་སྒར་བ་བཅུ་དྲུག་དང་གྲྭ་བ་ཉིས་བརྒྱ་ལྷག་ཡོད་པ་དག་གིས་རིན་ཐང་གཞལ་དུ་མེད་པའི་སྐུ་གསུང་ཐུགས་རྟེན་ཡོངས་སུ་རྫོགས་པ་ང་བརྒྱད་དང་རིག་གནས་གསར་བརྗེ་ཆེན་པོའི་སྐབས་སུ་ལྷག་ལུས་མེད་པར་བྱས་སོ།།

དེ་ཡང་རབ་རྒྱན་དུས་ཀྱི་ཕོ་ཉ་ཞེས་པ་ས་རྟ༼  ཕྱི་ལོ༡༩༧༨  ༽ལོར་ཆོས་དད་རང་མོས་ཀྱི་མགོ་བརྩམས་ཏེ།  བདེ་སྐྱིད་ཀྱི་ཉི་མ་གཞོན་ནུ་འཛིན་མའི་ཁྱོན་ལ་སྤྲོས་པར་བརྟེན།  ཨ་རིག་ཡུལ་དུ་འང་རབ་བྱུང་བཅུ་དྲུག་པའི་ལྕགས་སྤྲེལ༼  ཕྱི་ལོ༡༩༨༠  ༽ལོར་རྣམ་འདྲེན་ཐུབ་པའི་དབང་བོ་ལྷ་ལས་བབས་པའི་དུས་ཆེན་ཧོར་ཟླ་དགུ་བའི་ཚེས་ཉེར་གཉིས་ཉིན་རྗེ་སྨྲ་ཁམས་བློ་བཟང་ཚུལ་ཁྲིམས་བསྟན་འཛིན་གཙོ་བྱས།  མངའ་རིས་བློ་བཟང་ལུང་རྟོགས་རྒྱ་མཚོ་དང་།  ཧོར་སྐལ་བཟང་ལེགས་བཤད་རྒྱ་མཚོ།  མ་ཁྱེ་སྐལ་བཟང་བསྟན་འཛིན་རྒྱ་མཚོ།  ཞབས་དྲུང་བློ་བཟང་ལུང་རིགས་རྒྱ་མཚོ།  ལྡོང་བློ་བཟང་བསྟན་པའི་རྒྱལ་མཚན།  དགེ་སློང་བཀྲ་ཤིས་རྒྱ་མཚོ།  དབུ་མཛད་རབ་རྒྱས།  རྒྱ་ཉག་ཤེས་རབ།  རྒྱ་ཉག་བཤད་སྒྲུབ་སོགས་ཀྱིས་གུར་གྱི་བཙན་ཁང་དང་།  རེ་འདོམ་དྲུག་བརྒྱ་ལྷག་གི་འདུ་ཁང་གསར་དུ་ཕུབ་སྟེ་ཆོས་ཀྱི་སྒོ་མོ་དངོས་སུ་ཕྱེས་པ་དང་ལྷན་དུ་བླ་གྲྭ་རྣམས་འཁོར་ལོ་གསུམ་གྱི་བྱ་བས་དུས་འདའ་བ་ལ་མངོན་པར་ཕྱོགས་པར་གྱུར་ཏོ།།

ལོ་འདིར་ཨ་རིག་དགོན་ཆེན་གྱི་ཆོས་ཁྲིམས་པ་ལྡོང་བཀྲ་ཤིས་རྒྱ་མཚོ་དང་།  དབུ་མཛད་རྒྱ་ཉག་ཤེས་རབ།  སྦྱིན་བདག་བསོད་ནམས་སོགས་ཀྱིས་བཟང་གོས་དང་ལྷ་རྫས་ཀྱི་དངོས་པོའི་སྐྱེས་དང་བཅས་སྔོན་ཆད་དགོན་སྡེ་འདིར་དགེ་བའི་བཤེས་བཤེས་གཉེན་ཆེན་མོ་དཔའ་རིས་བློ་བཟང་རབ་གསལ་ཚང་གིས་བརྩམས་པའི་རྗེའི་རྣམ་ཐར་གྱི་བཤད་པ་ཞིག་ཆོ་འཕྲུལ་སྨོན་ལམ་ཆེན་མོའི་སྐབས་སུ་ཚོགས་སུ་འདོན་སྲོལ་ཡོད་པ་བསྟན་པ་ཉམས་འགྲིབ་ཀྱི་སྐབས་སུ་དཔེ་ཡང་ཆུད་ཟོས་སུ་གྱུར།   

དེར་མ་ཟད་བློ་ན་ཡོད་པའང་ཆལ་ཆོལ་དུ་གྱུར་བས་གསར་བ་ཞིག་རྩོམ་དགོས་པའི་སྐུལ་མ་དང་དོན་གཉེར་ནན་ཏན་མཛད་པའི་ངོར།  མཁས་པའི་དབང་བོ་ཚེ་ཏན་ཞབས་དྲུང་འཇིགས་མེད་རིག་པའི་བློ་གྲོས་ཚང་གིས་ཁམས་གསུམ་ཆོས་ཀྱི་རྒྱལ་བོ་ཙོང་ཁ་པ་ཆེན་པོའི་རྣམ་པར་ཐར་བ་རྒྱ་མཚོ་ལྟ་བུ་ལས་ཆུ་ཐིགས་ཙམ་ཞིག་བཀོད་པའི་རབ་ཏུ་བྱེད་པ་དད་པའི་སྒོ་འབྱེད་ཅེས་བྱ་བ་ཧོར་ཟླ་བཅུ་བའི་ཚེས་ཉེར་ལྔ་ལ་གྲུབ་པར་མཛད།

ཟད་པ་ཞེས་པ་མེ་སྟག༼  ཕྱི་ལོ༡༩༨༦  ༽ལོར་མངའ་རིས་ཚང་དང་ལྡོང་བཀྲ་ཤིས་རྒྱ་མཚོ།  རྒྱ་ཉག་བཤད་སྒྲུབ།  ལུག་མང་ཚུལ་ཁྲིམས་སོགས་མི་སྣ་བཅུ་གསུམ་ལ་འགོ་བའི་མིང་བཏགས་ནས་འདུ་ཁང་སྟེང་འོག་ཡོངས་ལ་གྱན་དྲུག་ཅུ་ཅན་ཞིག་གསར་བཞེངས་བྱས་ནས་སྐྱ་བཟོ་ཕལ་ཆེར་ལེགས་འགྲུབ་བྱུང་བ་དང་འདི་ནས་བཟུང་ཨ་རིག་གུར་སྒར་ནི་ཁང་དགོན་དུ་གྱུར། 

རྗེས་སོར་རིམ་གྱིས་དགོན་དེར་བཙན་ཁང་ཆེན་མོ་དང་།  མ་ཎི་འཁོར་ཁང་།  བདེ་གཤེགས་མཆོད་རྟེན་བརྒྱད།  རྨི་གྲུ་བཞི་མ་སུམ་བརྒྱ་ལྷག་ཡོད་པའི་སྦྲ་གུར་ཆེན་མོ།  བཙུན་མོ་དམར་ཡག་མའི་རིའི་སྟེང་གི་དབྱེན་ཟླུམ་མཆོད་རྟེན།  མངའ་རིས་ཚང་གིས་སོག་གུར་གྱི་དབྱིབས་ལྟར་བཞེངས་པའི་བྱམས་ཁང་།  སྨྲ་ཁམས་ཚང་གིས་བཞེངས་པའི་ཨ་རིག་ཇོ་ཁང་ཆེན་མོ།  ད་ལྟ་མང་ཚོགས་དང་གོང་རིམ་མཉམ་འབྲེལ་འོག་གསར་དུ་བཞེངས་བཞིན་པའི་འདུ་ཁང་ཆེན་མོ་བཅས་ཡོད།

ཁྱུ་མཆོག་ཅེས་པ་ལྕགས་སྦྲུལ༼  ཕྱི་ལོ༢༠༠༡  ༽ལོའི་དཔྱིད་ཀར་ལ་མོ་ཡོངས་འཛིན་བློ་བཟང་མཁས་གྲུབ་རྒྱ་མཚོ་མཆོག་ཨ་རིག་དགོན་ཆེན་དུ་ཕེབས་ནས་ཕྱག་དབང་སོགས་བསྩལ།  ལོ་འདིར་དགེ་སློང་དམ་ཆོས་ཡར་འཕེལ་གཙོ་བྱས་གྲྭ་བཙུན་སྐོར་ཞིག་གིས་དམར་ཟས་བཅད་པ་མ་ཟད།  འདུ་ཁང་དང་བཙན་ཁང་།  ཇ་ཁང་བཅས་ཀྱི་ནང་དུ་དམར་ཟས་འཁྱེར་མི་ཆོག་ཅེས་ཐག་བཅད་པར།  ས་ཕྱོགས་མང་པོ་ནས་གཟུར་གནས་མཁས་པ་དག་གིས་བསྔགས་བརྗོད་བླ་མེད་ཐོབ། 

ད་ལྟ་དགོན་པ་འདི་ལ་གྲྭ་ཤག་བཞི་བཅུ་ལྷག་དང་བླ་གྲྭ་སུམ་ཅུ་ལྷག་གིས་འཁོར་ལོ་གསུམ་གྱིས་བྱ་བས་དུས་འདའ་བཞིན་ཡོད་དོ།། 

ཆོས་ཐོག་གི་སྐོར་ལ། སྔར་སྲོལ་ལྟར་རྒྱ་ལོ་སྨོན་ལམ་དང་། བཞི་བའི་སྨྱུང་ཆེན།  དྲུག་པའི་མཆོད་པ།  དབྱར་གནས་ཆེན་མོ།དགུ་བའི་མ་ཎི། བཅུ་བའི་ལྔ་མཆོད་སོགས་ཡོད་ལ།  ང་བརྒྱད་ཡར་སྔོན་ལ་ཐོས་བསམ་གླིང་བའི་དུས་བཞིའི་ཆོས་ཐོག་ལ་རྩོད་པ་དང་སྐུ་རིམ་རྣམ་གསུམ་བཅས་ཡོད།  ཆོས་ཐོག་མེད་པའི་སྐབས་སུའང་རྒྱུན་ཇ་འཚོགས་ནས་མ་ཎི་དང་བསང་གསེར་སྐྱེམས་བཅས་ཉིན་རྒྱུན་གསུངས་བཞིན་ཡོད་དོ།།

啊热1.jpg

  དགོན་འདི་ནི་ད་ལྟའི་མཚོ་སྔོན་ཞིང་ཆེན་མཚོ་བྱང་ཁུལ་མདོ་ལ་རྫོང(祁连县)ཨ་རིག་ཡུལ་ཚོ་དང་འདབས་འབྲེལ་ནས་ཆགས་ཡོད། 

༧རྩོམ་ཡིག་འདི་ནི་ཨ་རིག་གི་ལོ་རྒྱུས་རྒན་པོའི་ངག་སྒྲོས་ལས་བཤུས་པའོ།།

 

 

 

 

                                                                                           རྩོམ་སྒྲིག་པ།  ཤེས་རབ་རལ་གྲི། 
གསལ་འདེབས། 
                  
རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ། 
                    
དྲ་བའི་སྦྲེལ་ཐགhttp://www.tb1025.cn

 

 

བརྒྱུད་འགོད།