སེ་ར་དགོན་པ།དེ་ནི་ལྷ་ས་གྲོང་ཁྱེར་གྱི་བྱང་ངོས་རྒྱབ་རི་གླང་ཆེན་ཉལ་བ་ལྟ་བུའི་མདུན་དུ་རབ་བྱུང་བདུན་པའི་ས་ཕག་（༡༤༡༩）ལོར་བྱམས་ཆེན་ཆོས་རྗེ་ཤཱཀྱ་ཡེ་ཤེས་ཀྱིས་ཕྱག་བཏབ། དགོན་པ་ཐོག་མར་འདེབས་སྐབས་ཤིང་སེ་བའི་སྡོང་པོ་ར་བ་བསྐོར་བ་ལྟར་ཡོད་པས་སེ་བའི་ར་བས་བསྐོར་བ་ན་སེ་ར་ཞེས་བརྗོད། སེ་ར་དགོན་པ་མ་ཆགས་གོང་དུ་རྗེ་ཙོང་ཁ་པ་སེ་ར་ཆོས་སྡིངས་སུ་བཞུགས་ནས་སློབ་མ་མང་པོར་ཟབ་རྒྱས་ཆོས་ཀྱི་འཁོར་ལོ་བསྐོར་ཞིང་། ལྷག་པར་དབུ་མ་རྩ་བ་ཤེས་རབ་ཀྱི་ཊི་ཀ་ཆེན་རྩོམ་པར་དགོངད་ཏེ་ཟབ་མོ་སྟོང་པ་ཉིད་ལ་བརྟག་ཅིང་དཔྱད་པ་ན་གཟིགས་སྣང་ལ་ཤེར་ཕྱིན་གྱི་མདོའི་བརྗོད་བྱ་སྟོང་ཉིད་བཅུ་དྲུག་སོགས་ཨ་ཡིག་གི་རྣམ་པར་ཆར་བབས་པས་བྱེས་ཆོས་རའི་ནང་གི་རྡོ་ཕུང་ཞིག་ལ་བཅུ་གསུམ་ཐིམ་པར་གཟིགས་པ་ལྟར་བྲག་རྡོའི་སྟེང་དུ་ཨ་ཡིག་རྣམ་པ་འབུར་དོད་དུ་ཡོད་པ་དེང་སང་་ཡང་སེ་ར་བྱེས་ཀྱི་ཆོས་གྲྭའི་ནང་མཇལ་རྒྱུ་ཡོད། སྐབས་དེར་འཇམ་མགོན་བླ་མས་མ་འོངས་པར་གནས་དེར་དབུ་མ་ལ་མཁས་པའི་སྡེ་ཆེན་པོ་ཞིག་ཆགས་པར་འོང་ཞེས་ལུང་བསྟན། རྗེ་དབག་ཉིད་ཆེན་པོས་ཐ་མར་གནས་དེར་ཕེབས་ནས་རྒྱུད་ཀྱི་རྒྱལ་པོ་གསང་བ་འདུས་པ་དང་འཁོར་ལོ་བེད་མཆོག་གཉིསགཀྱི་རྩ་རྒྱུད་དབུ་ནས་ཆོས་ཐེངས་རེ་གསུངས། རྗེ་ཤེས་རབ་སེང་གེ་ལ་གསང་བ་འདུས་པའི་བསྟན་པ་གཏད། བྱམས་ཆེན་ཆོས་རྗེ་ལ་ཆོས་སྡེ་འདེབས་འགོས་པའི་བཀའ་བཀོད་མཛད་པ་བཞིན་སྣེའུ་རྫོང་དཔོན་ནམ་མཁའ་བཟང་པོས་མཐུན་རྐྱེན་སྦྱར་ནས་སེ་ར་ཐེག་ཆེན་གླིང་བཞེངས། སྐབས་དེར་ཚོགས་ཆེན་གཅིག་དང་། རིམ་བཞིན་གྲྭ་ཚང་གསུམ། ཁང་ཚན་སོ་གསུམ། གྲྭ་སྤྱིལ་སྟོང་ཕྲག་གསུམ་ལྷག་ཙམ་བར་འཕེལ་རྒྱས་བྱུང་། སྐབས་དེའི་ཚོགས་ཆེན་རྙིང་པ་དེ་རྒྱལ་པོ་ལྷ་བཟང་གིས་སྡེ་སྲིད་སངས་རྒྱས་རྒྱ་མཚོ་བཀྲོངས་ནས་སྲིད་དབང་བཟུང་རྗེས་སྐུ་རིམ་གྲྭ་ཚང་བཙུགས་ཏེ་ད་ལྟའི་སྔགས་པ་གྲྭ་ཚང་དེ་ཡིན། ཚོགས་ཆེན་གསར་པ་དེ་ནི་བཤད་སྲོལ་ལ་རྒྱལ་པོ་ལྷ་བཟང་གིས་སྡེ་སྲིད་བཀྲོངས་པའི་སྡིག་བཤགས་སུ་གསར་རྒྱག་བྱས་ཟེར། ད་ལྟའི་ཚོགས་ཆེན་ཀ་བགབརྒྱ་དང་བརྒྱད་ཡོད་པ་དེ་བཞེངས་རྗེས་སུ་གྲྭ་ཚོགས་ཇེ་རྒྱ་ཇེ་འཕེལ་དུ་སོང་ནས་གྲྭ་ཚང་བཞིར་གྱེས་ཏེ་རྒྱ། འབྲོང་སྟེང་། སྟོད་པ། སྨད་པ་བཅས་གྲྭ་ཚང་བཞི་ཡོད། དེ་ནས་ཡུན་རིང་མ་སོང་བར་རྒྱ་དང་འབྲོང་སྟེང་གྲྭ་ཚང་གཉིས་ཡོངས་རྫོགས་སྟོད་པ་གྲྭ་ཚང་དུ་བསྒྲིལ་ནས་རེ་ཞིག་བར་གྲྭ་ཚང་སྟོད་སྨད་གཉིས་ལས་མེད། རྗེས་སུ་དུས་རབས་བཅོ་ལྔ་པའི་འཀྱིལ་དུ་ཀུན་མཁྱེན་བློ་གྲོས་རིན་ཆེན་སེང་གེས་སེ་རའི་མཁན་པོ་མཛད་སྐབས་སེ་ར་བྱེས་གྲྭ་ཚང་ཕྱག་བཏབ་པ་ནས་སྟོད་པ་གྲྭ་ཚང་གི་ནང་གསེས་སྤོ་བོ་དང་གུང་རུ་ཁང་ཚན་གཉིས་མ་གཏོགས་ཡོངས་རྫོགས་དང་། རྒྱ་གྲྭ་ཚང་ཡོངས་རྫོགས། འབྲོམ་སྟེང་གྲྭ་ཚང་གི་ཁག་གཅིག་བཅས་ཚང་མ་གྲྭ་ཚང་འདིར་འགྲིལ་ནས་རྒྱལ་པོ་ལྷ་བཟང་གི་སྐབས་སྔགས་པ་གྲྭ་ཚང་གསར་དུ་བཙུགས་པ་བཅས་བསྣན་པའི་ད་ལྟའི་གྲྭ་ཚང་བཞི་བྱུང་། གྲྭ་ཚང་དེ་ཚོ་ཡང་གྲྭ་རྒྱུན་ཡོང་ཁུངས་ས་གནས་མི་འདྲ་བའི་དབང་གི་ཁང་ཚན་ཁག་སུམ་ཅུ་སོ་གསུམ་དུ་གྱེས་པ་གཤམ་དུ་གསལ། སྟོད་པ་གྲྭ་ཚང་རྗེ་ཙོང་ཁ་པའི་དངོས་སློབ་གུང་རུ་རྒྱལ་མཚན་བཟང་པོས་ཐོག་མར་འདེབས་པ་གནང་ཞིང་། དེང་སང་ཁང་ཚན་སྤོ་བོ་དང་། གུང་རུ་གཉིད་ཙམ་མ་གཏོགས་གཞན་དག་མེད་ཐོག། མཁན་པོ་ནི་མིང་ཙམ་ལས་གྲྭ་ཚང་ཟུར་ཚོགས་བྱེད་མཁན་མེད་པར་ལོ་མང་སོང་ཟིན་འདུག། སྨད་པ་གྲྭ་ཚང་རྗེ་ཙོང་ཁ་པའི་དངོས་སློབ་ཀུན་མཁྱེན་བྱང་ཆུབ་འབུམ་པས་ཕྱག་བཏབ་ཅིང་། གྲྭ་ཚོགས་ཇེ་རྒྱས་སུ་སོང་སྟེ་ཁང་ཚན་བཅུ་དྲུག་ཡོད་པ་སྟེ། ༡.སྨར་ཉུང་། ༢.ཐེ་བོ་ ༣.ཨ་ར། ༤.ཚ་རྡོར། ༥.གཞུང་པ་སྟེ་ཅོ་ནེ་ཁག་ལྔ་དང་། ༦.ཡེར་པ། ༧.རོང་པོ། ༨.སྤོ་བོ། ༩.གུང་རུ། ༡༠.ཚ་བ། ༡༡.སྤོ་འབོར། ༡༢.མི་ཉག། ༡༣.ཏཱ་དབེན། ༡༤.རྒྱལ་རོང་། ༡༥.གཙང་པ། ༡༦.ཀོང་པོ་བཅས་ཡིན་པས་སེར་སྨད་ཀྱི་གྲྭ་རྒྱུན་མང་ཆེ་བ་ནི་སྨད་མདོ་ཁམས་སྒང་གསུམ་གྱི་ནང་ཚན་བར་ཁམས་ཕལ་ཆེ་བ་དང་། ལྷོ་བརྒྱུད་ཡུན་ནན་ཞིང་ཆེན་ཁོངས་ནས་ལི་ཐང་། རྒྱལ་ཐང་། མུ་ལི། ཨ་མདོ། རྔ་པ་ཁོངས་ནས་རྒྱལ་རོང་རྒྱལ་ཁག་གསུམ། ཨ་མདོའི་ཁོངས་ནས་ཅོ་ནེ་ཡུལ་ཚོ་ལྔ། ཀོང་པོ་དང་། གཙང་ཁུལ་གྱི་དགོན་པཁག་གཅིག་བཅས་ཡིན། བར་སྐབས་དུས་རབས་བཅོ་བརྒྱད་པའི་འགོ་ཙམ་ནམ་རིམ་བཞིན་མདོ་སྨད་ཕྱོགས་ནས་དབུས་གཙང་དུ་གྲྭ་རྒྱུན་ཡོང་མཁན་ཉུང་དུ་སོང་རྐྱེན་ཨ་མདོའི་ཐོབ་ཁུངས་ཁང་ཚན་སོ་སོར་ལྷ་སའི་ཉེ་འཁོར་གྱི་འཕན་པོ་དང་སྟོད་ལུང་། ཟད། ཆུ་ཤུལ། འབྲི་གུང་། མལ་དྲོ་སོགས་ནས་མི་མང་པོ་སོ་སོའི་ངོ་ཤེས་འབྲེལ་བཏགས་བརྒྱུད་ནས་གྲྭ་པ་མང་པོ་གསར་དུ་ཞུགས་པ་ནས་གྲྭ་རྒྱུན་དང་ཉེ་འཁོར་བ་ཞེས་པའི་ཁྱད་པར་དེ་བྱུང་། ཚེ་སྨོན་གླིང་སྐུ་ཕྲེང་དང་པོ་ངག་དབང་ཚུལ་ཁྲིམས་བོད་ཀྱི་སྲིད་སྐྱོང་གནང་སྐབས་གོང་གསལ་གྱི་གནས་ཚུལ་དང་། རང་ཉིད་སྐུ་ན་གཞོན་དུས་ཨ་མདོའི་ཡུལ་ནས་གྲྭ་རྒྱུན་བྱས་ཏེ་སེ་རར་ཆོས་ཞུགས་སློབ་གཉེར་རྒྱུན་རིང་གནང་རིང་ཐག་རིང་ནས་ཡོང་བའི་གྲྭ་རྒྱུན་ཚོའི་དངོས་ཡོད་དཀའ་ངལ་མང་པོ་མྱོང་ཚོར་བྱུང་བར་གཞིགས་ཏེ་གདན་ས་གསུམ་གྱི་གྲྭ་རྒྱུན་རྣམས་ལ་གཞོན་ཁྲལ་རྒྱུག་མི་དགོས་པ་དང་། དུང་པ་རྒྱ་གླིང་གི་ཁྲལ་རྒྱུག་མི་དགོས་པའི་དམིགས་བསལ་ཡོད་པ་དང་། ཉེ་འཁོར་ནས་ཡོང་བའི་གྲྭ་པ་རྣམས་དཔེ་ཆ་བལྟ་མཁན་ཡིན་ན་དམིགས་བསལ་ཡོད་པའི་གཏན་འབེབསཐོག་མར་བཟོ་གནང་མཛད། རབ་བྱུང་བཅུ་གསུམ་པའི་ལྕགས་སྦྲུལ་(༡༧༦༡)ལོར་གྲྭ་ཚང་ལ་མེ་སྐྱོན་བྱུང་སྟེ། དེ་མོ་བདེ་ལེགས་རྒྱ་མཚོས་གསར་བཞེངས་གནང་། དེ་རྗེས་སླར་ཡང་རབ་བྱུང་བཅུ་དྲུག་པའི་འགོ་ཚུགས་ཙམ་ལ་ད་ལྟའི་གྲྭ་ཁང་འདིའི་ཉམས་གསོ་གསར་བཞེངས་དང་ཁྱད་མེད་བྱས། བྱེས་གྲྭ་ཚང་ནི་ཏཱ་ལའི་བླ་མ་སྐུ་ཕྲེང་དང་པའི་དངོས་སློབ་ཀུན་མཁྱེན་བློ་གྲོས་རིན་ཆེན་སེང་གེས་ཐོག་མར་ཕྱག་བཏབ། དེ་ནས་རེ་ཞིག་བར་དར་རྒྱས་ཆེ་ཙམ་བྱུང་ཡང་། ལྟན་མ་ངག་དབང་པ་ཆབ་མདོར་ཕེབས་པ་དང་། ཛྙ་ན་ཤྲི་སྐུ་གཤེགས་པ་བཅས་ཀྱི་རྐྱེན་ལས་འཆད་ཉན་བར་སྟོང་བྱུང་ཞིང་། དེ་རྗེས་རབ་བྱང་བརྒྱད་པའི་ལྕགས་གླང་(༡༤༨༡)ལོར་གཉལ་སྟོན་དཔའ་འབྱོར་ལྷུན་གྲུབ་སེ་རའི་ཁྲིར་ཕེབས་རྗེས་སྣེའུ་རྫོང་སྣེའུ་རྫོང་དཔོན་དཔའ་འབྱོར་རྒྱལ་པོ་དང་། དཔོན་མོ་བུ་ཁྲིད་དཔའ་འཛོམས་གཉིས་ཀྱིས་སྤྱིན་བདག་བྱས་ཏེ་སླར་ཡང་གྲྭ་ཚང་འདི་གསར་དུ་བཙུགས་ཤིང་སྟོད་གྲྭ་ཚང་ནས་སྤོ་བོ་ཁང་ཚན་དང་གུང་རུ་ཁང་ཚན་གཉིས་མ་གཏོགས་ཡོངས་རྫོགས་དང་འབྲོམ་སྟེང་གྲྭ་ཚང་གི་ཁག་གཅིག་བཅས་ཚང་མ་གྲྭ་ཚང་འདིར་འགྲིལ། ཐོག་མར་བཞུགས་ཡུལ་གཏན་འཇགས་མེད་པར་ཚལ་གུང་ཐང་དང་དབུས་སྟོད་སོགས་སུ་ཆོས་ཐོག་ལ་ཕེབས་པས་བྱེས་པ་གྲྭ་ཚང་དུ་གྲགས། དེ་ནས་མཁན་ཐོག་ཁ་ཤས་སོང་རྗེས་འཁོན་སྟོན་དཔའ་འབྱོར་ལྷུན་གྲུབ་ཀྱིས་གྲྭ་ཚང་འདིའི་མཁན་པོ་མཛད་སྐབས་ནས་བཟུང་སེ་རར་གཏན་ཆགས་སུ་བཞུགས་ཤིང་གྲྭ་ཚང་འདི་སེ་རར་བཞུགས་སྐབས་ཀྱི་ཐོག་མའི་བཞུགས་ཡུལ་ནི་འདུ་ཁང་སྦུག་གི་དུས་གསུམ་སངས་རྒྱས་བཞུགས་སའི་ལྷ་ཁང་འདི་ཡིན་ཅིང་། རྗེས་སུ་ཕོ་ལྷ་བསོས་ནམས་སྟོབས་རྒྱས་ཀྱིས་བོད་ས་གནས་ཀྱི་སྲིད་དབང་བཟུང་སྐབས་ད་ལྟའི་འདུ་ཁང་ཆེན་མོ་འདི་གསར་བཞེངས་བྱས་པ་དང་། དེའི་སྐབས་ཀྱི་ལྡེབས་བྲིས་རྣམས་ད་ལྟ་ཡང་མཐོང་རྒྱུ་ཡོབ་པ་འདི་ཡིན། གྲྭ་ཚང་འདིར་ཁང་ཚན་ཉི་ཤུ་རྩ་གཅིག་ཡོད་པ་སྟེ། ༡.ཧར་གདོང་། ༢.བསམ་བློ། ༣.བྱ་བྲལ། ༤.ཀྲེ་བོ། ༥.བྲ་ཏི། ༦.ཚ་བ། ༧.ལྷོ་པ། ༨.སྒོམ་སྡེ། ༩.ལ་བ། ༡༠.ལྡན་མ། ༡༡.མངའ་རིས་གུ་གེ། ༡༢.མངའ་རིས་དཔེ་ཐུབ། ༡༣.མངའ་རིས་ཟངས་དཀར། ༡༤.སྟག་མོ། ༡༥.གཙང་པ། ༡༦.རྒྱལ་བྱེད། ༡༧.ཨེ་པ། ༡༨.གཉལ་པ། ༡༩.དྭགས་པོ། ༢༠.རྩེད་ཐང་། ༢༡.སྤོ་བོ་བཅས་ཡིན། གྲྭ་རྒྱུན་ཡོང་ཁུངས་སྐོར་ཕྱི་སོག་དང་། ནང་སོག་ མགོ་ལོག་ ཧོར་ཚོ་པ་དྲུག་ཚ་བ་རོང་སོགས་བར་ཁམས་ཁུལ། འདན་མ་སྟོད་སྨད། མངའ་རིས་སྐོར་གསུམ། གཙང་ཁུལ་ནས་ཁག་གཅིག་ལྷོ་རྒྱུད་ཨེ་དང་། གཉལ་སྡེ་དྲུག། དྭགས་པོ་ཁུལ། འཕྱོངས་རྒྱས་ཁུལ། སྤོ་བོ་ཁུལ་བཅས་ཡིན་ཅིང་། དུས་རབས་བཅོ་བརྒྱད་པའི་འགོ་ཙམ་ནས་གོངགདུ་གསལ་བ་ལྟར་ལྷ་ས་དང་ཐག་ཉེ་བའི་བྱང་རྒྱུད་དང་། བར་ཁམས་གཙང་དང་། ལྷོ་ཁ་སོགས་འགའ་ཞིག་མ་གཏོགས། མན་ཆིང་སྲིད་གཞུང་གི་མངའ་འོག་ཏུ་ཡོད་པའི་བོད་སོག་གི་དགོན་པ་ཁག་ནས་གྲྭ་རྒྱུན་ཡོང་མཁན་ཧ་ཅང་ཉུང་དུ་སོང་འདུག། རྩ་ཆེའི་རིག་དངོད་རིགས་དུ་མ་ཡོད་པ་སྟེ། གདན་ས་འདིའི་སྐུ་གསུམ་ཐུགས་རྟེན་སྐོར་ཚོགས་ཆེན་འདུ་ཁང་ཆེན་མོའི་ནང་དུ་སྤྱན་རས་གཟིགས་བཅུ་གཅིག་ཞལ་དགེ་སློང་དཔའ་མོའི་ཐུགས་དམ་རྟེན་གུང་རུ་རྒྱལ་མཚན་བཟང་པོས་བཀའ་བསྒོ་ཕུག་ནས་གདན་དྲངས་པ་དེ་དང་། ཡང་དུར་ཁྲོད་ཆེན་པོ་བསིལ་པ་ཚལ་གྱི་རྡོ་ནག་ལས་གྲུབ་པའི་མགོན་པོ་ཕྱག་བཞི་པ་སོགས་དང་། ཐུགས་རྟེན་ཇོ་བོ་རྗེའི་ཚེམས་བཞུགས་པའི་གདུང་རྟེན་སོགས་ཉིས་བརྒྱ་དང་ཉི་ཤུ་བཞུགས་པའི་གདུང་རྟེན་སོགས་ཉིས་བརྒྱ་དང་ཉི་ཤུ་བཞུགས། གསུང་རྟེན་སྡེ་སྲིད་ཟངས་རི་བས་ཕུལ་བའི་བཀའ་འགྱུར་གསེར་དངུལ་འདྲེས་མས་བཞེངས་པ་དང་། ཆོས་སྐྱོང་སྐོར་གྱི་སྐུ་ཐང་བྱིན་ཅན་ལྔ། བྱམས་ཆེན་གྱི་ཞལ་རས་ལྷ་ཁང་དུ་ཇོ་བོ་རྗེའི་སྐུ་ནང་རྟེན་ནོར་བུ་བསམ་འཕེལ་དང་། རིང་བསྲེལ་སོགས་བཞུགས་པ་དང་། གཞན་ཡང་ཏཱ་མིང་རྒྱལ་པོས་བྱམས་ཆེན་ཆོས་རྗེར་ཕུལ་བའི་ཐུབ་དབང་གི་ཞལ་ཐང་མཁའ་འགྲོ་བཀྲལ་བཏགས་མ་དང་། བཀའ་འགྱུར་ལྷ་ཁང་དུ་རྟེན་གྱི་གཙོ་བོ་བྱམས་ཆེན་ཆོས་རྗེར་ལ་གོང་མ་ཏཱ་མིང་རྒྱལ་པོས་ཕུལ་བའི་པད་མ་ར་གའི་བཀའ་འགྱུར་ངོ་མཚར་ཅན། གོང་མ་ཏཱ་མིང་རྒྱལ་པོའི་ནང་བློན་སྐྱ་མིང་ལ་ཁུང་ཇེ་ཏཱ་བཞིན་དང་ཆོས་མིང་བུཎྚ་རི་ཀ་ཤྲི་ཞེས་པས་བརྒྱད་སྟོང་པའི་དོན་རྣམས་ཇི་ལྟ་བ་བཞིན་ཤེས་ནས་ཏཱ་ལའི་ལོ་མ་ལ་བྲིས་པའི་རྒྱ་གར་གྱི་དཔེ་ལ་མ་ཕྱི་བྱས་ནས་གསེར་འབའ་ཞིག་ལས་ལཉྪའི་ཡི་གེས་བརྒྱད་སྟོང་པ་ཚར་གཉིས་བཞེངས་པའི་གཅིག་རྒྱ་ནག་ཤར་ཕྱོགས་སུ་བཞུགས་གཅིག་རྒྱ་གར་དུ་གངན་འདྲེན་མཛད་རྩིས་མཛད་པ་དེ་འདིར་བཞུགས་པ་འདིའི་དཀར་ཆག་རྒྱ་ཡིག་དང་བོད་ཡིག་གཉིས་ཀ་ཡོད་པར་གསལ་བ་ལྟར་དང་། ཏཱ་ལའི་བླ་མ་སྐུ་ཕྲེང་ལྔ་པས་གནང་བའི་བཀའ་འགྱུར། བསྟན་འགྱུར་བྲིས་མ་རྙིང་པ་ཚར་གཅིག་དང་། མེ་དབང་ཇུན་དབང་ཕོ་ལྷ་ནས་ཀྱིས་གནང་བའི་བསྟན་འགྱུར་དཔར་མ་གཅིག་འབུམ་སོགས་པ་གསུང་་རབ་མང་དུ་བཞུགས། ཟ་དམ་ཀརྨ་ཆོས་རྫོང་ནས་གདན་དྲངས་པའི་གོས་སྐུ་གླིང་གསུམ་མ་ཆེན་པོ། ཁལ་ཁ་སན་ཁང་གིས་ཕུལ་བའི་གནས་བཅུའི་གོས་སྐུ་གླིང་གུསམ་མ། ཏཱ་མིང་རྒྱལ་པོས་བྱམས་ཆེན་ཆོས་རྗེས་ཕུལ་བའི་གནས་བཅུའི་གོས་ཐང་ཆེ་བ། རྗེ་རིན་པོ་ཆེ། ཐུབ་པ་ལོངས་སྐུ་མ། གོང་ས་ལྔ་པ། པཎ་ཆེན་བླ་བཟང་ཆོས་ཀྱི་རྒྱལ་མཚན། བྱམས་པའི་ལྡེམ་བཅས་ཀྱི་གོས་ཐང་ཆུང་ཀྱི་གོས་ཐང་ཆུང་བ་རེ་རེརྣམས་བཞུགས་སོ། བྱེས་གྲྭ་ཚང་དུ་ཀུན་མཁྱེན་བློ་གྲོས་རིན་ཆེན་སེང་གེའི་ཐུངས་དམ་རྟེན་རྟ་མགྲིན་ཡང་གསང་ཡབ་ཡུམ་ཡི་དམ་དངོས་དང་ཁྱད་པར་མེར་ཟེར་བའི་བྱིན་ཅན་ཞིག་དང་། གྲུབ་ཐོབ་འདར་ཕྱར་གྱི་ཕུར་པ་གཏེར་མ་བྱིན་ཅན་གཅིག་སོགས་དང་། བྱམས་ཁང་ནང་དུས་གསུམ་སངས་རྒྱས་དང་། ཉེར་སྲས་བརྒྱད་སོགས་ནང་རྟེན་དུ། ཀུན་མཁྱེན་པའི་ཤངས་མཚལ་ལས་གྲུབ་པའི་རྟ་མགྲིན་ཡང་གསང་གི་སྐུ་ཐང་། རྗེ་བཙུན་པའི་ཐུགས་དམ་འབྲལ་སྤངས་མགོན་དཀར་གྱི་སྐུ་ཐང་། རྗེ་དགེ་འདུན་རྒྭ་མཚོའི་ཕྱག་བྲིས་ལྕམ་སྲིང་གི་སྐུ་ཐང་། རྗེ་དཔོན་དར་མའི་ཐུགས་དམ་རྟེན་མགོནགཔོ་ཕྱག་དྲུག་པའི་སྐུ་ཐང་། རྗེ་ཕྱ་པ་ཆོས་ཀྱི་སེང་གེའི་ཐུགས་དམ་རྟེན་བརྒྱད་སྟོང་པ་གཡུ་ཕྲ་ཅན། ཕྱ་པའི་ཆོས་དུང་མི་འགྱུར་བའི་གཟེར་རྟགས་ཅན། རྗེ་བཙུན་ཙོང་ཁ་པའི་ཕྱག་སྦུབ། རྗེ་ཡོན་ཏན་རྒྱ་མཚོའི་རྡོ་རྗེ་རྩེ་ལྔ་གཏེར་བྱོན། མཁན་ཆེན་བྷོ་ངྷི་སཏཱའི་བཞེས་ཞལ་གཟི་དམར་ལས་གྲུབ་པ་ཟུར་བརྒྱད་པ་སོགས་དང་། གསུང་རྟེན་བཀའ་འགྱུར་ཚར་བཞི་དང་། བསྟན་འགྱུར་བྲིས་མ། དེ་མིན་སྐུ་རྟེན་ལི་མ་དང་གསེར་སྐུ་སོགས་མང་དུ་བཞུགས། སྨད་ཐོས་བསམ་ནོར་བུའི་གླིང་དུ་ཐུབ་དབང་གི་སྨན་སྐུ་ཐོག་ཚད་མ་འདིའི་ནང་བཞུགས་འཕེལ་གདུང་སོགས་མང་པོ་དང་། རྗེ་རིན་པོ་ཆེའི་ཤངས་མཚལ་གྱིས་བྲིས་པའི་རྗེ་ཉིད་འཁོར་དག་པ་རྣམ་བརྒྱད་ཀྱིས་བསྐོར་བ། ནག་པོ་སྐོར་གསུམ་རྣམ་སྲས་དང་བཅས་པས་བསྐོར་བ་འཁྲུལ་མེད། བསམ་ཡས་དགེ་རྒྱས་བྱེ་མ་གླིང་གི་རྟེན་གཙོ་ཛེེ་ཀྵིམ་ལས་གྲུབ་པའི་འཇིལས་བྱེད་སྐུ། རྗེ་རིན་པོ་ཆེའི་ཐུགས་དམ་རྟེན་འཇིགས་བྱེད་བདུན་ལས་རྣམ་རྒྱལ་སླེའུ་ཆུང་བའི་ཕྱག་བཟོ་སོགས་མང་དུ་བཞགས་སོ། འདུ་ཁང་གི་ཁོར་ཡུག་ཏུ་ཏཱ་ལའི་བླ་མ་སྐུ་ཕྲེང་བཅུ་གསུམ་པའི་དུས་སུ་གྲྭ་ཚང་འདི་ཉམས་གསོའི་སྐབས་བཞེངས་པའི་མཛད་བརྒྱ་དཔག་བསམ་འཁྲི་ཤིང་དང་མདོ་སྔགས་བརྒྱུད་པའི་བླ་མ་རྣམས་ཀྱི་ལྡེབས་བྲིས་ཧ་ཅང་བྲིས་ཆ་ལེགས་པོ་ཞིག་བཅས་ཡོད། ཚོགས་ཆེན་འདུ་ཁང་རྙིང་པའམ་དེང་སང་སྔགས་པ་གྲྭ་ཚང་དུ་ཡོད་པའི་ནང་རྟེན་ཐུབ་པ་འདུད་འདུལ་གཙོ་བོར་བྱས་པའི་འཕགས་པའི་གནས་བརྟན་བཅུ་དྲུག་དགེ་བརྙེན། ཧཱ་ཤང་། རྒྱལ་པོ་ཆེན་པོ་བཞི་དང་བཅས་པ་འདི་ནི་བྱམས་ཆེན་ཆོས་རྗེ་ཤཱཀྱ་ཡེ་ཤེས་ཞེས་མཁྱེན་པ་དང་བརྩེ་བའི་བདག་ཉིད་ཅན་དེ་རྗེ་ཙོང་ཁ་པ་ཆེན་པོའི་སྐུ་ཚབ་ཏུ་རྒྱ་ནག་ཏཱ་མིང་གི་ཡུང་ལོས་རྒྱལ་པའི་ཏི་ཤྲིར་ཕེབས་ཏེ་འགྲོ་དོན་རྒྱ་ཆེར་མཛད་ནས་ཙནྡན་དཀར་པོ་ལས་བཞེངས་སུ་མཛད་ནས་ལྷ་བཟོ་སྤྲུལ་སྐུ་སླེའུ་ཆུང་བས་བཞེངས་པ་སྟེ། ལོ་རྒྱུས་ཐོག་བཤད་སྲོལ་ལ་འདིའི་ནང་ནས་འཕགས་པ་ཡན་་ལག་འབྲུང་འདི་ཀུན་མཁྱེན་པ་སེ་རར་ཐོག་མར་ཕེམས་པའི་ཚེ། ཀུན་མཁྱེན་ཆེན་པོ་བྱོན་པ་ལེགས། བསྟན་པའི་རྒྱལ་མཚན་བཙུགས་པ་ལེགས་ཞེས་གསུང་བྱོན་ཞིང་། དེང་སང་ཡང་ཕྱག་གཉིས་ཕྱག་ཕེབས་ཞུ་བའི་ཚུལ་དུ་ཡོད་ལ། དགེ་བརྙེན་ངྷརྨ་ཏ་ལ་འདི་ཡང་ཕུག་པ་འདི་ཅུང་ཟད་དོག་འདུག་གསུངས་ནས་ཕུགཔའི་ནང་ནས་ཅུང་ཟད་མདུན་་དུ་བྱོན་པ་དང་། ད་དུང་ཀརྨ་པ་ཆོས་གྲགས་སྒྱ་མཚོ་དང་རིན་སྤུངས་པ་དོན་ཡོད་རྡོ་རྗེ་མཆོད་ཡོན་གྲོསམཐུན་གྱིས་སེ་འབྲས་གཉིས་ཀྱི་ཁ་གནོན་དུ་ལྷ་སའི་ཤར་ཕྱོགས་སུ་ཀརྨ་དགོན་གསར་བཏབ་ཐོག། དགེ་ལུགས་པའི་སྤྱིན་བདག་གཙོ་བོ་སྣེའུ་རྫོང་པ་ཡུལ་བཏོན་སྐབས། ཀརྨ་སྒར་པས་གསེར་གསོལ་ལ་སྙད་བཏགས་ནས་ནང་རྟེན་ཙནྡན་གྱི་སྐུ་རྣམས་གདན་འདྲེན་རྩིས་བྱས་པར་གསེར་གསོལ་བ་མ་བཞེས་པ་དང་། ནང་རྟེན་འདོན་པའི་ཐོག་མར་མ་ཕམ་པའི་ཐུགས་ཀར་གྲི་བཙུགས་པས་མ་ཕམ་པའི་ཞལ་ནས་ངེད་རྣམས་འདིར་བཞག་པ་འགྲོ་དོན་ཆེ་གསུངས་མ་ཐག་དེ་རྣམས་དཔའ་ཞུམ་སྟེ་རྟེན་རྣམས་ལ་གནོད་པར་མ་ནུས། མ་ཕམ་པ་འདིའི་ཐུགས་ཀར་དྲོད་རྟ་རྔ་ཙམ་ཡོད་པ་དང་། བསམ་སྦྱོར་ངན་པ་བྱས་པའི་བླ་དཔོན་འཁོར་བཅས་མི་རིང་བར་ན་ཤི་རྒུད་པས་ཟད་ནས་གསར་དུ་བཙིགས་པའི་དགོན་པ་དང་ལྷ་ཁང་ཡང་བདག་པོ་མེད་པར་གྱུར་ཏེ་རང་ཞིག་ཏུ་སོང་ཟེར་སྲོལ་ཡོད། སྔགས་པ་གྲྭ་ཚང་གི་འདུ་ཁང་གི་ནུབ་ངོས་ཀྱི་སྦུག་ཏུ་བྱམས་ཆེན་ཆོས་རྗེའི་སྨན་སྐུ་སོགས་དང་གཙོ་བོའི་གཡས་ཀ་རྒྱབ་ཏུ་དགེ་འདུན་འདུ་བའི་མཆོད་རྟེན་གྱི་ནང་དུ་མཚུངས་མེད་ཆོས་ཀྱི་རྗེ་རྒྱལ་མཚན་བཟང་པོའི་སྐུ་གདུང་རིལ་པོར་བཞུགས་པ། སྒོ་རྒྱན་ལ་རྗེ་དེ་ཉིད་ཀྱི་ཤངས་མཚལ་ལས་བཞེངས་པའི་རྒྱལ་བ་སེང་གེའི་ང་རོའི་སྐུ་དང་། སྒོ་ཁྱིམ་ནང་དུ་ཆོས་ཀྱི་རྗེ་དེ་ཉིད་རང་གིས་ཕྱག་བཟོ་མཛད་པའི་རྒྱལ་བ་ཙོང་ཁ་པ་ཆེན་པོའི་སྨན་སྐུ་བཞུགས་པ། སྔར་རིང་བསྲེལ་མང་དུ་འཛག་ཅིང་། གདོན་གྱིས་གཟིར་བ་རྣམས་ཀྱིས་མཇལ་བ་ཙམ་གྱིས་གདོན་ལས་གྲོལ་ནུས་པ་སོགས་བྱིན་རླབས་ཤིན་ཏུ་ཆེ་བ་ཞིག་ཡིན་ཞེས་ཟེར་སྲོལ་ཡོད་པ་བཅས་དེ་དག་ནི་དགོན་གནས་འདིའི་རྟེན་གྱི་གཙོ་བོ་ཡིན། ཚོགས་ཆེན་དང་། གྲྭ་ཚང་གསུམ། ཁང་ཚན་དང་མི་ཚན་གྱི་སྤྱི་ཁང་སོགས་སྐུན་ངོས་ཁྱོན་ཡོངས་ཀྱི་རྒྱ་ཁྱོན་ལ་སྤྱི་ཁྲེ་གྲུ་བཞི་མ་ཆིག་འབུམ་ཆིག་ཁྲི་བཞི་སྟོང་དགུ་བརྒྱ་དྲུག་ཅུ་རེ་བཞི་ཡོད། བྱམས་ཆེན་ཆོས་རྗེ་ནས་པཎ་ཆེན་བློ་བཟང་ཆོས་རྒྱན་བར་ཁྲི་ཐོག་བཅོ་བརྒྱད་བྱུང་ཞིང་། བཅུ་དགུ་པ་ཏཱ་ལའི་བླ་མ་སྐུ་ཕྲེང་ལྔ་པ་ནས་བཟུང་ཏཱ་ལའི་བླ་མ་སྐུ་ཕྲེང་ན་རིམ་ནས་སེ་རའི་ཁྲི་པའི་ཞེས་པས་ཁྲི་པ་ཟུར་དུ་འཛུགས་སྲོལ་མེད། དགོན་བདག་ཡིག་ཚང་ལས་ཁུངས་ཡིན་པ་དང་། རབ་བྱུང་བཅུ་དྲུག་པའི་ས་ཕག་ལོར་གྲྭ་གྲངས་༩༩༠༠སྐོར་ཡོད་ལགས།

རྩོམ་སྒྲིག་པ།ཤེས་རབ་རལ་གྲི།

གསལ་འདེབས།

རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།

དྲ་བའི་སྦྲེལ་ཐགhttp://www.tb1025.cn