གྲྭ་ཚང་དེ་ནི་རྗེ་ཙོང་ཁ་པའི་དངོས་སློབ་ཧོར་སྟོན་ནམ་མཁའ་དཔལ་བཟང་པོས་བཏབ་སྟེ་བླ་ས་བཟུང་ནས་ཆོས་ཟུར་འཆད་མཛད་པས་རྗེ་དགེ་འདུན་གྲུབ་པ་སོགས་མཁས་གྲུབ་མང་པོས་ཆོས་ཞུས་པ་སོགས་བྱུང༌། གྲྭ་ཁང་རྒྱབ་ངོས་ཐོག་བརྩེགས་བཞི་དང༌། མདུན་ངོས་ཉིས་ཐོག སྒོ་འཕྱོར་ཀ་བ་བརྒྱད། འདུ་ཁང་ཀ་རིང་བརྒྱད་དང་བཅས་ཀ་བ་བརྒྱད་ཅུ་རྒྱ་བཞི། འདུ་ཁང་ནང་རྟེན་གཙོ་ཐུབ་དབང་ཚུལ་ཁྲིམས་མ་དང༌། རྗེ་ཚུལ་ཁྲིམས་ཆོས་འཕེལ་གྱི་འདྲ་སྐུ་སོགས་སྐུ་གསུང་ཐུགས་རྟེན་དུ་མ། གྱང་ལྡེབས་སུ་གཞི་སེར་པོར་མཚལ་བྲིས་ཀྱི་ཚེ་དཔག་མེད་དང༌། སྒོ་འགྲམ་གཡས་གཡོན་དུ་ཞལ་ཡར་གཟིགས་སུ་ཆོས་སྲུང༌། གསེང་གཡབ་ཏུ་རྗེ་རིན་པོ་ཆེ་སོགས། སྒོ་འཕྱོར་དུ་རྒྱལ་ཆེན་བཞི་སོགས་ཀྱི་བྲིས་སྐུ། སྒོ་འཕྱོར་སྟེང་རབ་གསལ། གསེང་གཡབ་ཀྱི་ཁོར་ཡུག་དང༌། ཐོག་བརྩེགས་གསུམ་པ་ཡན་དཔེ་མཛོད་ཁང་དང་ལས་ཤག་ལེ་ལག་ཁག ཐོག་བརྩེགས་བཞི་པར་རྒྱལ་བའི་གཟིམ་ཆུང་སོགས་དང༌། གྲྭ་ཁང་གི་ཕྱིའི་ལྷོ་ནུབ་མཚམས་སུ་ཆོས་ར་བཅས་ཡོད། གྲྭ་ཁང་རྙིང་པ་འདུ་ཁང་ཀ་རིང་བཞི་དང་བཅས་ཀ་བ་སུམ་ཅུ་དང༌། འདུ་ཁང་ནང་གནས་བརྟན་བྲག་རིའི་འཇིམ་བརྙན་བྱོན་ལེགས། ལྷ་མོ་ཁང་དུ་དཔལ་ལྡན་ལྷ་མོ་སོགས་ཀྱི་སྐུ་བརྙན། ཡང་སྟེང་དུ་མཁན་པོའི་བཞུགས་ཁང་སོགས་ཡོད། ཧོར་སྟོན་ནམ་མཁའ་དཔལ་ནས་བཟུང་དོན་གྲུབ་རྒྱ་མཚོ་བར་བེ་སེར་ནང་མཁན་རབས་ཉི་ཤུ་རྩ་དགུའི་མཚན་གསལ་བ་དང༌། རབ་བྱུང་བཅུ་དྲུག་པའི་ས་ཕག་ལོ་མཁན་པོ་ལས་ཐོག་གོ་བོ་ཡེ་ཤེས་དགའ་བ་ཡིན། རྒྱུན་དུ་འཆད་ཉན་ཡིག་ཆ་གཙོ་བོ་རྗེ་ཡབ་སྲས་དང༌། སེ་ར་རྗེ་བཙུན་པའི་ཡིག་ཆ་རྣམས་ཡིན། སྲུང་མའི་གཙོ་བོ་དཔལ་ལྡན་ལྷ་མོ་བསྟེན། སྟག་རྩེ་སྒྲུབ་མཆོད་སྐབས་འདོན་བཟང་པ་རྣམས་ནས་གསང་འདུས་མི་བསྐྱོད་པའི་རྡུལ་ཚོན་སྒྲུབ་མཆོད་ཚུགས་སྲོལ།

རྩོམ་སྒྲིག་པ།ཤེས་རབ་རལ་གྲི།

གསལ་འདེབས།

རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།

དྲ་བའི་སྦྲེལ་ཐགhttp://www.tb1025.cn