རང་སྡེའི་གྲུབ་མཐའ་དེ་རྣམས་ཀྱི་གཞི་ལམ་འབྲས་བུའི་རྣམ་བཞག་འདོད་ཚུལ་ལ་མི་འདྲ་བ་མང་དུ་ཡོད་ཀྱང་དེ་ཐམས་ཅད་ཞིབ་ཏུ་བཀོད་ན་ཡིག་ཚོགས་ཆེ་བར་འགྱུར་བ་དང༌།གྲུབ་མཐའི་བསྟན་བཅོས་གཞན་རྣམས་ལས་རྒྱ་ཆེར་བཤད་པའི་ཕྱིར་འདིར་མི་སྤྲོ་ལ།གྲུབ་མཐའ་ཐ་དད་པར་འཇོག་པ་ལྟ་བའི་སྒོ་ནས་ཡིན་པས་ན་འདིར་སོ་སོའི་ལྟ་བའི་འདོད་ཚུལ་མདོ་ཙམ་ཞིག་བཤད་པར་བྱའོ།།འདི་ལ་གཉིས།སོ་སོའི་ལུགས་ཀྱི་དགག་བྱའི་འདོད་ཚུལ་དང༌།བདག་མེད་ཕྲ་རགས་འཇོག་ཚུལ་ལོ།།

༡གྲུབ་མཐའ་སྨྲ་བ་བཞིའི་སོ་སོའི་ལུགས་ཀྱི་དགག་བྱའི་འདོད་ཚུལ།

དེ་ཡང་རང་སྡེ་ཐམས་ཅད་ཀྱིས་རྟེན་འབྱུང་ཁས་ལེན་པ་ལ་ཁྱད་པར་མེད་མོད།འོན་ཀྱང་རང་རྒྱུད་པ་མན་ཆད་ཀྱིས་ཕྱི་རོལ་པའི་འདོད་པ་ལྟར་གྱི་ཕུང་པོ་ལས་དོན་གཞན་དུ་གྲུབ་པའི་བདག་མི་འདོད་ཀྱང༌།ཕུང་པོ་ཉིད་བདག་ཏུ་འཇོག་པར་བྱེད་དེ།བྱེ་སྨྲའི་ནང་ཚན་མང་བཀུར་བ་འགའ་ཞིག་གིས་ཕུང་པོ་ཚོགས་པ་བདག་ཏུ་འཇོགཁ་ཆེ་བྱེ་བྲག་ཏུ་སྨྲ་བ་དང༌།མདོ་སྡེ་པ་གཉིས་ཀྱིས་རྣམ་པར་ཤེས་པའི་རྒྱུན་གང་ཟག་ཏུ་འཇོགསེམས་ཙམ་པས་ཀུན་གཞིའི་རྣམ་ཤེས་གང་ཟག་ཏུ་འཇོགདབུ་མ་རང་རྒྱུད་པས་ཡིད་ཀྱི་རྣམ་ཤེས་གང་ཟག་ཏུ་འཇོགཐལ་འགྱུར་བས་ནི་འཇོག་ཚུལ་དེ་ཐམས་ཅད་མི་བཞེད་དོ།།དེ་ཡང་བྱེ་སྨྲ་ནས་རང་རྒྱུད་པའི་བར་གྱིས་ལས་འབྲས་ཀྱི་རྟེན་དུ་གྱུར་པའི་བདག་འཇོག་ཚུལ་འདི་ཡང་གང་ཟག་སོགས་ཐ་སྙད་དུ་རང་ངོས་ནས་གྲུབ་པར་འདོད་པའི་དབང་གིས་ཡིན་ཏེ།ཕུང་པོ་ལ་བརྟེན་ནས་ངའོ་ཞེའམ།གང་ཟག་གོ་ཞེས་ཐ་སྙད་བཏགས་པ་ཙམ་གྱིས་མ་ཚིམ་པར།གང་ཟག་དེ་ཕུང་པོ་རེ་རེ་བ་དང༌།ཚོགས་པ་དང༌།དེ་ལས་དོན་གཞན་པ་གང་དུ་གྲུབ་ཅེས་བཙལ་ན་དེ་དག་གང་རུང་ཞིག་གང་ཟག་ཏུ་རྙེད་པར་བསམས་ནས་བཞག་པ་ཡིན་ནོ།།དེ་ལྟར་འཛིན་པ་ལ་རང་ངོས་ནས་གྲུབ་པར་འཛིན་པ་དང༌།དེའི་ཡུལ་དེ་ལ་རང་ངོས་ནས་གྲུབ་པ་ཞེས་འདོགས་པར་བྱེད་ཅིང༌།འཚོལ་ལུགས་དེས་བཙལ་ནས་མི་རྙེད་ན་གང་ཟག་འཇོག་མི་ནུས་པས་ཆད་པར་ཐལ་བའི་སྐྱོན་དུ་འགྱུར་རོ་སྙམ་དུ་དགོངས་པར་སྣང་ངོ༌།།

དེའི་དབང་གིས་དངོས་སྨྲ་བ་རྣམས་ཀྱིས་ཀྱང༌།བདེན་པར་གྲུབ་པ།ཡང་དག་པར་གྲུབ་པ།དོན་དམ་པར་གྲུབ་པ།དེ་ཁོ་ན་ཉིད་དུ་གྲུབ་པ།རང་གི་མཚན་ཉིད་ཀྱིས་གྲུབ་པ།རང་བཞིན་གྱིས་གྲུབ་པ།ངོ་བོ་ཉིད་ཀྱིས་གྲུབ་པ།རྫས་སུ་གྲུབ་པ་རྣམས་ཐ་སྙད་དུ་གྲུབ་པར་བཞེད་པ་སོགས་ཀྱི་ཁྱད་པར་ཡང་ཤེས་དགོས་ཏེ།དེ་ཡང་བྱེ་སྨྲས་གཟུགས་དང་ཤེས་པ་སོགས་དཔྱད་མཐར་རྙེད་དགོས་པར་བཟུང་ཞིང༌།དེ་ཡང་མཐར་གཏུགས་ན་རྡུལ་ཕྲ་རབ་ཆ་མེད་དང༌།རྒྱུན་གྱི་ཐུང་མཐའ་སྐད་ཅིག་ཆ་མེད་ཅིག་ཡོད་དགོས་པར་མཐོང་ནས་རགས་པ་རྣམས་ལ་རྩོམ་གཞི་རྡུལ་ཆ་མེད་དང༌།རྒྱུན་གྱི་རྩོམ་གཞིར་སྐད་ཅིག་ཆ་མེད་ཁས་བླངས་ནས་ཆ་མེད་དང་ནམ་མཁའ་སོགས་བཅོམ་པ་དང་གཞིག་པས་རང་འཛིན་གྱི་བློ་མི་འདོར་བ་རྣམས་རྫས་ཡོད་དང༌།དོན་དམ་བདེན་པ་དང༌།དོན་དམ་པར་ཡོད་པ།བཅོམ་གཞིག་གིས་རང་འཛིན་གྱི་བློ་འདོར་བ་རྣམས་བཏགས་ཡོད་དང༌།ཀུན་རྫོབ་ཏུ་ཡོད་པ་དང༌།ཀུན་རྫོབ་ཏུ་བདེན་པ་ཡིན་ལ།བདེན་གཉིས་ཀྱི་དངོས་པོ་ཐམས་ཅད་དོན་བྱེད་ནུས་པའི་རྫས་སུ་གྲུབ་པར་འདོད།མདོ་སྡེ་པས་དོན་དམ་པར་འབྲས་བུ་སྐྱེད་ནུས་པ་རྣམས་རང་མཚན་དང་དོན་དམ་བདེན་པ་དང༌།རང་གི་མཚན་ཉིད་ཀྱིས་གྲུབ་པ་དང༌།དོན་དམ་པར་དོན་བྱེད་མི་ནུས་པའི་ཆོས་རྣམས་སྤྱི་མཚན་དང༌།རང་གི་མཚན་ཉིད་ཀྱིས་མ་གྲུབ་པ་དང༌།ཀུན་རྫོབ་བདེན་པར་འདོད་ལ།རང་སྤྱི་གཉིས་ཀ་ཡང་རང་ངོས་ནས་མ་གྲུབ་ན་མེད་དགོས་པར་འདོད་དོ།།ཕྲ་རྡུལ་ཆ་མེད་སོགས་ཀྱང་བྱེ་སྨྲ་དང་འདྲ་བར་ཁས་ལེན་པས།བདག་གི་བླ་མ་ཐམས་ཅད་མཁྱེན་པའི་ལྟ་མགུར་དུ།བེམ་པོ་འཛུམ་རིས་ཀྱི་རྒྱ་སྟག་ཁྲ་བོ།ཞེས་གསུངས་སོ།།

སེམས་ཙམ་པ་རྣམས་ཀྱིས་རྟོག་པས་བཏགས་པ་ཙམ་མ་ཡིན་པར་རང་ངོས་ནས་གྲུབ་པ་ནི་རང་མཚན་དང་རང་གི་མཚན་ཉིད་ཀྱིས་གྲུབ་པ་དང༌།བདེན་གྲུབ་ཡིན་ལ།རྟོག་པས་བཏགས་ཙམ་དུ་གྲུབ་པའི་ཆོས་ནི་དེ་ལས་ཟློག་པར་འདོད་དེ་གཞན་དབང་ཡོངས་གྲུབ་གཉིས་དང་པོ་དང༌།ཀུན་བཏགས་ཕྱི་མར་འདོད་དོ།།དེས་ན་ཀུན་བཏགས་ཀྱི་ཆོས་རྣམས་སེམས་ཙམ་པ་རང་ལུགས་ཀྱི་རང་མཚན་གྱིས་མ་གྲུབ་པར་འདོད་ཀྱང༌།ཆོས་གང་ཡང་རང་ངོས་ནས་མ་གྲུབ་ན་མེད་དགོས་པར་འདོད་པས།ཐལ་འགྱུར་བ་ལྟར་གྱི་རང་མཚན་གྱི་དོན་ནི་ཀུན་བཏགས་ཀྱི་སྟེང་དུ་ཡང་ཁས་ལེན་པ་ཡིན་ཏེ།ལེགས་བཤད་སྙིང་པོར།གཞི་འགའ་ཞིག་སྔ་མ་ལྟར་མི་འཛིན་ཀྱང༌།ཕྱི་མ་ལྟར་འཛིན་པ་ནི་ཡོད་དོ།།ཞེས་སོ།།འོན་ཀྱང་བྱེ་མདོ་ལྟར་ཆ་མེད་ཀྱིས་རགས་པ་མི་རྩོམ་པར་མ་ཟད་གཟུགས་སོགས་འདུས་བྱས་ཀྱི་ཆོས་རྣམས་ནང་ཤེས་པའི་རྫས་ཀྱི་སྟེང་ནས་སྐྱེས་ཤིང༌།འདུས་མ་བྱས་རྣམས་ཀྱང་རང་འཛིན་ཚད་མ་དང་བདག་ཉིད་གཅིག་ཏུ་འདོད་པས།གཟུང་འཛིན་རྫས་གཞན་གྱིས་སྟོང་ཞིང་ཕྱི་དོན་དུ་མེད་པར་བཞེད་དོ།།ཤེས་པ་སྔ་མའི་སྟེང་གི་ནུས་པས་ཤེས་པ་ཕྱི་མ་ཡུལ་གྱི་རྣམ་ལྡན་དུ་སྐྱེད་པས་ཡུལ་དང་ཡུལ་ཅན་དུས་མཉམ་པར་རྫས་གཅིག་ཏུ་སྐྱེ་ལ་དེ་འདྲའི་ནུས་པ་ལ་དམིགས་རྐྱེན་དུ་འདོད་དོ།།དམིགས་རྐྱེན་གྱིས་ཤེས་པ་ཡུལ་གྱི་རྣམ་ལྡན་དུ་སྐྱེད་ཀྱང་ཡུལ་དེའོ་སྙམ་དུ་རྟོག་པས་འཛིན་པ་ནི་བརྡ་སྦྱོར་བ་ལ་ལྟོས་པས།ཆོས་རྣམས་རང་འཛིན་རྟོག་པའི་ཞེན་གཞིར་རང་མཚན་གྱིས་མ་གྲུབ་པར་འདོད་དེ།དོན་སྨྲ་ལ་ལྟོས་ན་དབུ་མའི་ལུགས་དང་ཤིན་ཏུ་ཉེའོ།།སེམས་ཙམ་པ་རང་གི་འདོད་པ་ལྟར་གྱི་ཕྱི་དོན་མེད་པར་གྲུབ་པས་ནི་དོན་སྨྲ་གཉིས་ཀྱི་ཕྱི་དོན་ཁེགས་ཀྱང༌།དོན་སྨྲ་གཉིས་ཀྱི་ཕྱི་དོན་ཁེགས་ཙམ་གྱིས་རྣམ་རིག་ཙམ་དུ་གྲུབ་པ་མིན་ཏེ།འདི་འདྲའི་ཁྱད་པར་གྲུབ་མཐའ་གོང་འོག་གི་སྐབས་ཀུན་ཏུ་ཤེས་དགོས་སོ།།

དབུ་མ་རང་རྒྱུད་པས་རང་གི་མཚན་ཉིད་ཀྱིས་གྲུབ་པ་སོགས་གསུམ་ཐ་སྙད་དུ་གྲུབ་པར་བཞེད་ཀྱང༌།བདེན་པར་གྲུབ་པ་སོགས་ལྔ་ནི་ཐ་སྙད་དུ་ཡང་མི་བཞེད་དོ།།རང་རྒྱུད་པ་མན་ཆད་ཀྱིས་ཕྱི་རོལ་པ་འདོད་པ་ལྟར་གྱི་རྟག་གཅིག་རང་དབང་ཅན་གྱི་བདག་ཏུ་འཛིན་པ་གང་ཟག་གི་བདག་འཛིན་རགས་པ་དང༌།གང་ཟག་རང་སྐྱ་ཐུབ་པའི་རྫས་ཡོད་དུ་འཛིན་པ་གང་ཟག་གི་བདག་འཛིན་ཕྲ་མོར་འདོད་དོ།།དེ་ཡང་སྔ་མ་དེ་མུ་སྟེགས་ཀྱིས་སྒྲོ་བཏགས་པའི་ཀུན་བཏགས་ཁོ་ན་དང༌།ཕྱི་མ་ལ་གནས་མ་བུ་བས་གྲུབ་མཐའི་དབང་གིས་འཛིན་པ་ལྟ་བུའི་རིགས་པ་ལྟར་སྣང་ལ་བརྟེན་ནས།རང་སྐྱ་ཐུབ་པའི་རྫས་ཡོད་དུ་འཐད་སྙམ་དུ་འཛིན་པ་རྣམས་ཀུན་བཏགས་དང་གྲུབ་མཐའ་སྒྲོ་བཏགས་པ་ལ་མ་ལྟོས་པར་ངང་ངམ་ཤུགས་ཀྱིས་འབྱུང་བ་ནི་ལྷན་སྐྱེས་ཏེ།འདིའི་ཞེན་ཡུལ་བཀག་པ་ལས་ལྷག་པའི་ཕྲ་བའི་བདག་མེད་བྱེ་མདོ་གཉིས་ཀྱིས་འཇོག་མི་ཤེས་སོ།།

དེས་ན་གང་ཟག་དང་ཕུང་པོ་རྗེ་ཁོལ་ལྟར་མཚན་ཉིད་མི་མཐུན་པའི་རང་སྐྱ་བར་སྣང་བ།སྣང་བ་ལྟར་དུ་གྲུབ་པར་འཛིན་པ་ནི་གང་ཟག་རང་སྐྱ་ཐུབ་པའི་རྫས་ཡོད་དུ་འཛིན་པའི་འཛིན་ཚུལ་ཡིན་ཅིང༌།འཛིན་པ་དེའི་ཞེན་ཡུལ་གང་ཟག་ཕུང་པོ་ལ་མ་ལྟོས་པའི་རང་སྐྱ་བ་དེ་བཀག་ནས།གང་ཟག་ཕུང་པོ་ལ་བརྟེན་ནས་བཏགས་པ་ཙམ་དུ་བཞེད་པ་ལ་མང་བཀུར་བ་མ་གཏོགས་རང་རྒྱུད་པ་མན་ཆད་འདྲའོ།།

ཕུང་པོ་ལ་བརྟེན་ནས་བཏགས་པ་ཙམ་གྱི་ཙམ་སྒྲས་ནི།ཕུང་པོ་ལས་དོན་གཞན་པའི་བདག་བཀག་ནས་གང་ཟག་བཏགས་ཡོད་དུ་བཞེད་པར་མཐུན་ལ།ཕུང་པོ་ལ་བརྟེན་ནས་བཏགས་ལུགས་ནི།ཡིད་ཀྱི་རྣམ་པར་ཤེས་པ་དང༌།ཀུན་གཞིའི་རྣམ་ཤེས་དང༌།རྣམ་པར་ཤེས་པའི་རྒྱུན་ཅི་རིགས་ལ་བརྟེན་ནས་གང་ཟག་འདོགས་པར་བྱེད་ཅིང༌།དེ་ཡང་ཕུང་པོ་རེ་རེ་བ་བདག་ཏུ་བཞེད་པ་དང༌།མང་བཀུར་བ་ཁ་ཅིག་གིས་ཕུང་པོ་ལྔ་ཆར་ལ་བརྟེན་ནས་གང་ཟག་འདོགས་པར་བྱེད་དོ།།རང་རྒྱུད་པ་མན་ཆད་ཀྱིས་གང་ཟག་ཕུང་པོ་ལ་བརྟེན་ནས་བཏགས་པ་ཙམ་དུ་བཞེད་ནའང༌།ཕུང་པོ་གང་ཟག་གི་གདགས་གཞི་ཡིན་ན་ཕུང་པོ་གང་ཟག་ཡིན་དགོས་སྙམ་པ་དང༌།ཕུང་པོ་གང་ཟག་ཡིན་པར་བཏགས་པ་ཡིན་སྙམ་དུ་བསམས་པར་འདུག་ཅིང༌།གང་ཟག་གི་བཏགས་དོན་བཙལ་ནས་ཀྱང་རྙེད་པར་འདོད་པའི་ཕྱིར་བཏགས་ཡོད་ཀྱི་དོན་ཀྱང་མ་ཚང་བར་གསལ་ལོ།།

ཐལ་འགྱུར་བས་ནི།ཕུང་པོ་ལ་བརྟེན་ནས་བཏགས་པའི་བདག་འཇིག་ལྟ་ལྷན་སྐྱེས་ཀྱི་དམིགས་པར་གསུངས་པ།ཕུང་པོ་བདག་མ་ཡིན་པར་མ་ཟད་བཏགས་དོན་བཙལ་ནས་རྙེད་པའི་ཆོས་གཅིག་ཀྱང་མི་བཞེད་ཅིང༌།རང་རྒྱུད་པ་མན་ཆད་ཀྱིས་འདོད་ཚུལ་དེ་ལྟ་ན་རྟེན་འབྱུང་ཁས་བླངས་པ་ཉམས་པར་བཞེད་དེ་ཤིན་ཏུ་གནད་ཆེ་ཡང་འདིར་ཞིབ་ཏུ་མི་སྤྲོའོ།།

ཐལ་རང་གཉིས་ཀ་གང་ཟག་རིགས་པས་དཔྱད་མི་བཟོད་དུ་གྲུབ་པར་བཞེད་པ་མཐུན་མོད་ཀྱང༌།ཅི་ཙམ་ནས་རིགས་པས་དཔྱད་བཟོད་མི་བཟོད་ཀྱི་མཚམས་དང༌།དོན་དམ་དཔྱོད་པའི་མཚམས་སུ་སོང་མ་སོང་སོགས་ལ་མི་མཐུན་ཏེ།ཐལ་འགྱུར་བས་ནི།ངས་ལས་འདི་བསགས།འབྲས་བུ་འདི་མྱོང་ཞེས་ཐ་སྙད་བཏགས་པ་ཙམ་གྱིས་མ་ཚིམ་པར།ཐ་སྙད་བཏགས་པའི་དོན་དེ་ཕུང་པོ་རེ་རེ་བ་དང༌།ཚོགས་པ་དང༌།དེ་ལས་དོན་གཞན་གང་དུ་གྲུབ་ཅེས་འཚོལ་བ་ནས་དོན་དམ་དཔྱོད་པའི་མཚམས་དང༌།འཚོལ་ལུགས་དེས་བཙལ་ནས་དཔྱད་གཞི་དེ་རྙེད་རྒྱུ་བྱུང་ན་རིགས་པས་དཔྱད་བཟོད་དུ་གྲུབ་པར་བཞེད།རང་རྒྱུད་པས་དེ་འདྲ་བའི་རིགས་པ་དེ་ཐ་སྙད་པའི་ཚད་མ་ཡིན་གྱི།དོན་དམ་དཔྱོད་པའི་རིགས་པ་མིན་ལ།དེས་བཙལ་ནས་རྙེད་ན་རིགས་པས་དཔྱད་བཟོད་དུ་གྲུབ་པའང་མ་ཡིན་པར་བཞེད་དེ།དེས་བཙལ་བ་ན་ཡིད་ཀྱི་རྣམ་ཤེས་གང་ཟག་ཏུ་རྙེད་པའི་དབང་དུ་བྱས་ནས་འཇོག་པར་སྣང་ངོ༌།།

དེས་ན་རང་རྒྱུད་པས།ཆོས་རྣམས་བློ་གནོད་མེད་ལ་སྣང་བའི་དབང་གིས་ཕར་བཞག་པ་མ་ཡིན་པར་དོན་རང་གི་སྡོད་ལུགས་ཀྱི་ངོས་ནས་གྲུབ་མ་གྲུབ་དཔྱོད་པ་ནས་དོན་དམ་དཔྱོད་པའི་མཚམས་དང༌།དེས་བཙལ་ནས་དཔྱད་གཞི་དེ་རྙེད་རྒྱུ་བྱུང་ན་རིགས་པས་དཔྱད་བཟོད་དུ་གྲུབ་པར་བཞེད་དོ།།དངོས་སྨྲ་བ་རྣམས་ཀྱིས་དེ་ཙམ་ཡང་དོན་དམ་དཔྱོད་པའི་མཚམས་དང༌།རིགས་པས་དཔྱད་བཟོད་དུ་གྲུབ་པར་མི་འདོད་པར།རིགས་པས་བཙལ་བའི་ངོར་འདུས་མ་བྱས་དང་རྡུལ་ཕྲན་ཆ་མེད་དང༌།སྐད་ཅིག་ཆ་མེད་ལྟ་བུ་གང་རུང་རྙེད་རྒྱུ་བྱུང་ན་རིགས་པས་དཔྱད་བཟོད་དུ་གྲུབ་པར་འདོད་དོ།།དེས་ན་གྲུབ་མཐའ་གང་དང་གང་གི་ལུགས་ལ་ཡང་ཆོས་རང་རང་གི་གནས་ཚུལ་ལ་དཔྱད་པ་ན་ཀུན་རྫོབ་དང་དོན་དམ་དཔྱོད་པར་སོང་མ་སོང་གི་མཚམས་ཟིན་པ་འདི་ཤིན་ཏུ་གལ་ཆེའོ།།

རང་རྒྱུད་པས་ཆོས་རྣམས་བློ་གནོད་མེད་ལ་སྣང་བའི་དབང་གིས་ཕར་བཞག་པ་ཙམ་མ་ཡིན་པར་ཡུལ་རང་གི་ངོས་ནས་གྲུབ་པར་འཛིན་པ་ནི་བདེན་འཛིན་ཕྲ་མོ་ཡིན་ལ།དེ་ལ་སེམས་ཙམ་པའི་གྲུབ་མཐའི་དབང་གིས་འཛིན་པ་ལྟ་བུའི་ཀུན་བཏགས་དང༌།གྲུབ་མཐའ་ལ་མ་ལྟོས་པའི་ལྷན་སྐྱེས་གཉིས་ཡོད་ཀྱང་གཉིས་ཀའི་ཞེན་ཡུལ་ལ་བདེན་པར་གྲུབ་པ།ཡང་དག་པར་གྲུབ་པ།དོན་དམ་པར་གྲུབ་པ།དེ་ཁོ་ན་ཉིད་དུ་གྲུབ་པ་ཞེས་བྱ་ཞིང༌།དེ་བཞིར་གྲུབ་པ་ཐ་སྙད་དུ་ཡང་མེད་པར་བཞེད་དོ།།རང་གི་མཚན་ཉིད་ཀྱིས་གྲུབ་པ་དང༌།རང་བཞིན་གྱིས་གྲུབ་པ་དང༌།ངོ་བོ་ཉིད་ཀྱིས་གྲུབ་པ་ནི་ཐ་སྙད་དུ་གྲུབ་པར་བཞེད་དེ།དེར་མ་གྲུབ་ན་ཆད་ལྟར་འགྲོ་བར་འདོད་དོ།།དངོས་སྨྲ་བ་རྣམས་དེ་བརྒྱད་ཀ་ཚད་གྲུབ་ཏུ་འདོད་མི་འདོད་ཁྱད་པར་གོང་དུ་བཤད་པ་ལྟར་རོ།།དབུ་མ་པས།ཆོས་རྣམས་བློ་ལ་སྣང་བའི་དབང་གིས་བཞག་པ་མ་ཡིན་པའི་སྡོད་ལུགས་མེད་པར་མཐོང་ན་དགག་བྱ་ཁེགས་པར་བཞེད་ཅིང་དེ་འདྲའི་དགག་བྱ་དང་དེ་འཛིན་པའི་རྟོག་པ་བདེན་འཛིན་དུ་འདོད་པ་ཐལ་རང་གཉིས་ཀའི་ཐུན་མོང་བའི་ལུགས་སོ།།དགག་བྱ་དེ་འགོག་པའི་རིགས་པ་གནད་ཆེ་བ་ནི་རྣམ་བདུན་གྱི་དཔྱད་པ་དང༌།དེ་བསྡུ་ན་གཅིག་དུ་བྲལ་གྱི་དཔྱད་པ་གཉིས་སུ་འདུ་ཞིང༌།དེའི་སྒོ་ནས་དཔྱོད་ཚུལ་ནི་གྲགས་ཆེ་བ་ལྟར་རོ།།དཔྱད་པའི་སྟོབས་ཀྱིས་མཉམ་གཞག་ཏུ་བློ་དེའི་དབང་གིས་བཞག་པ་མིན་པའི་ཡོད་པ་ཁེགས་པ་ལ་ཐལ་རང་གཉིས་ཀ་ཁྱད་པར་མེད་ཀྱང་རྗེས་ཐོབ་ཏུ་ནི་རང་རྒྱུད་པས་རང་མཚན་གྱིས་གྲུབ་པའི་དོན་ཆོས་སྒྱུ་མ་ལྟ་བུ་ཞིག་འདོད་ལ།ཐལ་འགྱུར་བས་ནི་མཉམ་གཞག་ཏུ་བདེན་པ་དེ་ལྟ་བུ་བཀག་ཤུལ་དུ་ལྷག་མ་ཅི་ལུས་བལྟས་པས།མིང་ཙམ་ཞིག་ལྷག་མར་ལུས་པར་བཞེད་དེ།འདི་ནི་ཐུན་མོང་མ་ཡིན་པའི་ཁྱད་པར་རོ།།

དེ་ལྟར་གང་ཟག་རང་སྐྱ་ཐུབ་པའི་རྫས་ཡོད་དུ་འཛིན་པ་ལྷན་སྐྱེས་དང༌།དེའི་ཞེན་ཡུལ་སུན་ཕྱུངས་པ་ལ་བརྟེན་ནས་འཁོར་བ་ལས་གྲོལ་བར་འདོད་པ་ནི་རང་རྒྱུད་པ་མན་ཆད་མཐུན་ནོ།།

རང་རྒྱུད་པས་ཆོས་དང་གང་ཟག་གཉིས་ཀ་བློ་ལ་སྣང་བའི་དབང་གིས་བཞག་པ་མིན་པར་དོན་གྱི་སྡོད་ལུགས་ཀྱི་ངོས་ནས་གྲུབ་པར་འཛིན་པ་ཆོས་ཀྱི་བདག་འཛིན་ཕྲ་མོ་དང་ཤེས་སྒྲིབ་ཏུ་བཞེད་ཅིང༌།ཤེས་སྒྲིབ་ལ་ཕྲ་རགས་དགུ་དང་ཐོག་མཐའ་གཉིས་ལ་གཉིས་གཉིས་ཕྱེ་བའི་བཅུ་གཅིག་ས་དང་པོ་ནས་རྒྱུན་མཐའི་བར་གྱི་སྒོམ་ལམ་བཅུ་གཅིག་གིས་སྤངས་པའི་སྒོ་ནས་རྣམ་མཁྱེན་ཐོབ་པར་བཞེད་དོ།།

ཐལ་འགྱུར་བའི་ཁྱད་ཆོས་ཀྱི་དགག་བྱ་དང་འགོག་ཚུལ་ནི།མིང་གི་ཐ་སྙད་ཀྱི་དབང་གིས་བཞག་པ་ཙམ་མ་ཡིན་པའི་ཡོད་པར་འཛིན་པ་བདེན་འཛིན་ཕྲ་མོ་དང༌།དེའི་ཞེན་ཡུལ་མིང་དང་ཐ་སྙད་ཀྱི་དབང་གིས་བཞག་པའི་ཡོད་པ་དེ་གང་ཟག་གི་སྟེང་དུ་ཡོད་པར་འཛིན་པ་གང་ཟག་གི་བདག་འཛིན་དང༌།ཆོས་ཀྱི་སྟེང་དུ་ཡོད་པར་འཛིན་པ་ནི་ཆོས་ཀྱི་བདག་འཛིན་ཡིན་ལ།དེ་ལྟར་འཛིན་པའི་ལྷན་སྐྱེས་གཉིས་ཀའང་འཁོར་བའི་རྩ་བར་གྱུར་པའི་མ་རིག་པ་དང་ཉོན་སྒྲིབ་ཏུ་བཞེད་དོ།།དེ་འདྲའི་ལྷན་སྐྱེས་ཀྱིས་འཛིན་པ་དེ་ངེས་པར་བྱེད་པ་ལ་ཐ་སྙད་ཀྱི་དབང་གིས་བཞག་ལུགས་སམ།རྟོག་བཏགས་འཇོག་ལུགས་ལེགས་པར་ངེས་པ་ལ་རག་ལས་པར་གསུངས་ཏེ་གནད་ཤིན་ཏུ་ཆེའོ།།

ལུགས་འདིའི་གང་ཟག་འཇོག་ཚུལ་ནི།ཕུང་པོ་ཚོགས་པ་གང་ཟག་གི་གདགས་གཞི་དང༌།གང་ཟག་དེའི་བཏགས་ཆོས་དང༌།ཐ་སྙད་དུ་ངའོ་སྙམ་པའི་བློ་གང་ཟག་འཇོག་བྱེད་ཀྱི་བློ་ཡིན་པར་ངེས་པའི་སྒོ་ནས་ཤེས་དགོས་ཤིང༌།ཕུང་པོ་ཚོགས་པ་ལ་བརྟེན་ནས་ངའོ་སྙམ་པའི་བློ་དེའི་ཡུལ་གྱི་ང་ཙམ་དེ་ལ་བདག་གམ་གང་ཟག་ཅེས་བྱ་ལ།དེ་ནི་ཐ་སྙད་དུ་ཡོད་ཅིང་ལས་འབྲས་ཀྱི་རྟེན་དུ་གྱུར་པའི་བདག་ཅེས་བྱའོ།།

དེའི་ལུགས་ཀྱི་དེ་ཁོ་ན་ཉིད་ལ་དཔྱོད་མཚམས་དངོས་ནི།རང་རྒྱུད་ཀྱི་ངའམ་བདག་འདི་ཐ་སྙད་བཏགས་པའི་དབང་གིས་བཞག་པ་ཙམ་གྱིས་མ་ཚིམ་པར་གང་དུ་གྲུབ་ཅེས་འཚོལ་བ་འདི་ནས་ཡིན་ལ།དེའི་ཚུལ་ཡང་ང་འདིར་སྡོད་དོ།།ངས་མཐོང་ངོ༌།།ངས་ཚོར་རོ།།ངས་དྲན་ནོ།།ཞེས་སོགས་ཀྱི་ཐ་སྙད་འདི་ཙམ་གྱིས་ཚིམ་དགོས་པ་ཡིན་གྱི།དེ་ཙམ་གྱིས་མ་ཚིམ་པར་དཔྱད་ན་རང་གི་མིག་སྣ་སོགས་རེ་རེ་བ་དང་ཚོགས་པ་ཡང་ང་མ་ཡིན་པས།དེ་ལས་དོན་གཞན་དུ་ཡང་ང་མེད་པས་དེ་ནི་ང་རང་བཞིན་གྱིས་མེད་པའི་མེད་ཚུལ་ལོ་ཞེས་བཞེད།རང་རྒྱུད་པ་མན་ཆད་ཀྱིས་དེ་འདྲའི་རང་བཞིན་མེད་པའི་དོན་གཏན་མེད་དུ་བཟུང་ནས།དེ་ལྟར་འཛིན་ན་ཆད་ལྟར་འཕུལ་བར་བྱེད་དོ།།ཐལ་འགྱུར་བས་རང་བཞིན་གྱིས་མེད་པས་མེད་གོ་མི་ཆོད་ཅིང༌།ཐ་སྙད་དུ་ཡོད་པས་ཡོད་གོ་ཆོད་པས།ཆོས་ཐམས་ཅད་རང་བཞིན་གྱིས་མེད་ཀྱང་ཐ་སྙད་དུ་རྣམ་བཞག་ཐམས་ཅད་འཐད་པའི་རྟེན་འབྱུང་གིས་མཐའ་གཉིས་ཀ་སེལ་བར་བྱེད་དེ།ལུགས་འདིའི་ཁྱད་ཆོས་ཐུན་མོང་མ་ཡིན་པའོ།།དེས་ན་ཐལ་རང་གཉིས་ལ་དགག་བྱའི་ངོས་འཛིན་མི་འདྲ་བའི་ཁྱད་པར་གཉིས་དང༌།དེའི་དབང་གིས་དེ་ཁོ་ན་ཉིད་ལ་དཔྱོད་མཚམས་ཀྱང་མི་འདྲ་བ་གཉིས་ཡོད་ལ།འདིའི་མཚམས་ལེགས་པར་མ་ངེས་ན་ཐལ་རང་གཉིས་ཀྱི་ཁྱད་པར་ཕྲ་མོ་འབྱེད་དཀའོ།།

ཐལ་འགྱུར་བའི་ལུགས་ཀྱི་ཤེས་སྒྲིབ་འདོད་ཚུལ་ནི།རྐྱེན་དང་ཕྲད་ཀྱང་ཉོན་མོངས་དངོས་སུ་བསྐྱེད་པར་མི་ནུས་པའི་ཉོན་མོངས་ཀྱི་བག་ཆགས་དང༌།དེའི་འབྲས་བུ་གཉིས་སྣང་འཁྲུལ་པའི་བདེན་སྣང་ཙམ་ཞིག་ལ་བྱ་ཞིང༌།འདི་ལ་ཕྲ་རགས་གསུམ་མམ་བཞིར་བྱས་པ་དག་པས་གསུམ་གྱིས་སྤོང་བའི་སྒོ་ནས་རྣམ་པ་ཐམས་ཅད་མཁྱེན་པའི་ཡེ་ཤེས་ཐོབ་པར་བཞེད་པ་ཡིན་ནོ།།

ལུགས་འདིར་གང་ཟག་རང་སྐྱ་ཐུབ་པའི་རྫས་ཡོད་དུ་འཛིན་པ་གང་ཟག་གི་བདག་འཛིན་རགས་པར་འདོད་པ་ཙམ་རང་རྒྱུད་པ་སོགས་དང་འདྲ་མོད།འོན་ཀྱང་རང་རྒྱུད་པ་སོགས་ཀྱིས་བདག་འཛིན་ཕྲ་མོར་འདོད་པའི་རྫས་ཡོད་དུ་འཛིན་པ་ལྷན་སྐྱེས་དེ་ཡང་འདི་པས་ཀུན་བཏགས་སུ་བཞེད་དེ།ལེགས་བཤད་སྙིང་པོར།རྫས་ཡོད་ཀྱི་བདག་དེ་ནི་ཕྱི་རོལ་པས་ཕུང་པོ་ལས་དོན་གཞན་དུ་བཏགས་པའི་ནང་གི་བྱེད་པའི་སྐྱེས་བུ་ཡོད་པར་གཟུང་བའི་ཡུལ་ཡིན་ལ་ཞེས་སོ།།དེས་ན་འདི་པའི་ལུགས་ཀྱི་རྫས་ཡོད་དུ་འཛིན་པ་ལྷན་སྐྱེས་ནི།ཕུང་པོ་དང་མཚན་ཉིད་མི་མཐུན་པར་འཛིན་པ་མ་ཡིན་གྱི།ཚོང་དཔོན་ཚོང་པ་ལས་ཟུར་དུ་མི་བཀར་བ་ལྟར་ཕུང་པོ་ལས་ཟུར་དུ་མི་བཀར་བར་ཕུང་པོའི་རང་བཞིན་གྱིས་ཕུང་པོ་ལ་དབང་བསྒྱུར་ཅིང་ཕུང་པོ་ཚུར་བདག་ལ་ལྟོས་ཀྱང་བདག་ཕར་ལ་མི་ལྟོས་པ་ཚོང་དཔོན་ལྟར་གྲུབ་པར་འཛིན་པ་ཞིག་ལ་འཇོག་པར་གསུངས་སོ།།

༢བདག་མེད་ཕྲ་རགས་ཀྱི་འཇོག་ཚུལ།

བྱེ་བྲག་སྨྲ་བས་གཞི་གྲུབ་ན་ཆོས་བདག་ཡིན་པས་ཁྱབ་པར་འདོད་པས།ཆོས་ཀྱི་བདག་མེད་ཕྲ་རགས་ཀྱི་རྣམ་བཞག་ཁས་མི་ལེན་ལ།གང་ཟག་རྟག་གཅིག་རང་དབང་ཅན་དུ་གྲུབ་པས་སྟོང་པ་གང་ཟག་གི་བདག་མེད་རགས་པ་དང༌།གང་ཟག་རང་སྐྱ་ཐུབ་པའི་རྫས་ཡོད་ཀྱིས་སྟོང་པ་གང་ཟག་གི་བདག་མེད་ཕྲ་མོར་འཇོག་ཅིང༌།བདག་མེད་ཕྲ་མོ་དང་གང་ཟག་གི་བདག་མེད་ཕྲ་མོ་དོན་གཅིག་ཏུ་འདོད་དོ།།

སྡེ་པ་བཅོ་བརྒྱད་ཀྱི་ནང་ཚན་མང་བཀུར་སྡེ་ལྔས་རང་སྐྱ་ཐུབ་པའི་རྫས་ཡོད་ཀྱི་བདག་ཁས་ལེན་པས།དེས་སྟོང་པ་གང་ཟག་གི་བདག་མེད་ཕྲ་མོར་མི་འདོད་དོ།།ཐལ་འགྱུར་བ་མ་གཏོགས་རང་རྒྱུད་པ།སེམས་ཙམ་པ།མདོ་སྡེ་པ།བྱེ་བྲག་སྨྲ་བ་བཞི་གས་གང་ཟག་གི་བདག་མེད་ཕྲ་རགས་འཇོག་ཚུལ་འདྲ་ཞིང༌།ཐལ་འགྱུར་བ་དང༌།སེམས་ཙམ་པ།མདོ་སྡེ་པ་གསུམ་གའི་ལུགས་ལ་གང་ཟག་གི་བདག་མེད་ཕྲ་མོ་སྟོང་ཉིད་དུ་འདོད་དོ།།བྱེ་སྨྲའི་ལུགས་ལ།མཚན་ཉིད་གསུམ་གྱི་རྣམ་བཞག་མི་འཇོག་ཅིང༌།སྟོང་ཉིད་མེད་པར་འདོད་དོ།།ཞེས་གྲགས་ཀྱང༌།མཛོད་གནས་བརྒྱད་པ་ལས།མཚན་མེད་ཞི་བའི་རྣམ་པ་དང༌།།སྟོང་ཉིད་བདག་མེད་སྟོང་ཉིད་དུ།།ཞེས་སོགས་ལ་དཔགས་ན་སྟོང་བདག་མེད་གཉིས་ལ་སྟོང་ཉིད་ཀྱི་ཐ་སྙད་ཡོད་པ་འདྲའོ།།མདོ་སྡེ་པས་གང་ཟག་གི་བདག་མེད་ཕྲ་རགས་འདོད་ཚུལ་དང༌།ཆོས་ཀྱི་བདག་མེད་ཁས་མི་ལེན་པ་སྔ་མ་དང་འདྲ་ལ།མཚན་ཉིད་གསུམ་ལས།གཞན་དབང་བདེན་གྲུབ་དང༌།ཀུན་བཏགས་དང༌།ཡོངས་གྲུབ་གཉིས་བདེན་མེད་དུ་འདོད།ཡོངས་གྲུབ་བདེན་མེད་ཡིན་ན།གང་ཟག་གི་བདག་མེད་ཕྲ་མོ་ཡོངས་གྲུབ་དང་སྟོང་ཉིད་གཉིས་ཀ་ཡིན་པས།བར་ཆད་མེད་ལམ་གྱི་སྣང་ཡུལ་དུ་མི་རུང༌།དེས་ན་བར་ཆད་མེད་ལམ་གྱི་དངོས་གཞལ་འཇོག་མི་ཐུབ་པར་འགྱུར་རོ་སྙམ་ན།འདིའི་ལུགས་ལ་གང་ཟག་གི་བདག་མེད་ཕྲ་མོ་དེ་ཐེག་པ་གསུམ་གའི་བར་ཆད་མེད་ལམ་ཀྱི་ཤུགས་གཞལ་དང༌།གང་ཟག་གི་བདག་གིས་དབེན་པའི་འདུ་བྱེད་དེ་དེའི་དངོས་གཞལ་དང་སྣང་ཡུལ་དུ་འདོད་པས་སྐྱོན་མེད་དོ།།བྱེ་སྨྲ་ལྟར་ན་དམིགས་པ་མི་རྟག་སོགས་བཅུ་དྲུག་ཅི་རིགས་སེམས་རྟེན་བསམ་གཏན་བཞི་པའི་རབ་མཐའ་དང་འབྲེལ་བར་ཉམས་སུ་བླངས་པས་རང་རྒྱལ་དང་བྱང་སེམས་ཀྱི་ལམ་ཕྱི་མ་བཞི་བགྲོད་ལ།དམིགས་པ་མི་རྟག་སོགས་ཅི་རིགས་ཟག་མེད་ས་དགུ་ཅི་རིགས་ལ་བརྟེན་ནས་ཉམས་སུ་བླངས་པས་ཉན་ཐོས་ཀྱི་དགྲ་བཅོམ་འཐོབ་དགོས་སོ།།

མདོ་སྡེ་པའི་ལུགས་ལ་ཐེག་པ་གསུམ་གའི་ལམ་ཕྱི་མ་བཞི་ག་བདག་གིས་དབེན་པའི་འདུ་བྱེད་ཁོ་ན་དམིགས་རྣམ་བྱས་པའི་སྟེང་ནས་གསར་དུ་སྐྱེ་དགོས་སམ་སྙམ་སྟེ་དཔྱད་བར་བྱའོ།།སེམས་ཙམ་པ།རང་རྒྱུད་པ།ཐལ་འགྱུར་པ་གསུམ་གྱིས་བར་ཆད་མེད་ལམ་གྱི་ཤུགས་གཞལ་མེད་པར་འདོད་ཅིང༌།སེམས་ཙམ་པ་དང༌།ཐལ་འགྱུར་བས་དེའི་དངོས་ཀྱི་གཞལ་བྱ་ལ་སྟོང་ཉིད་ཕྲ་མོས་ཁྱབ་པར་བཞེད་ལ།རང་རྒྱུད་པས་ཆོས་ཀྱི་བདག་མེད་ཕྲ་རགས་དང༌།གང་ཟག་གི་བདག་མེད་ཕྲ་མོ་རྣམས་འཇོག་གོ།

སེམས་ཙམ་པའི་ལུགས་ལ་གང་ཟག་གི་བདག་མེད་ཕྲ་རགས་འཇོག་ཚུལ་སྔ་མ་གཉིས་དང་མཐུན་ལ།ཅུང་ཟད་མི་འདྲ་བ་ནི།གང་ཟག་གི་བདག་མེད་ཕྲ་མོ་སྟོང་ཉིད་དུ་འདོད་ཅིང༌།ཆོས་ཀྱི་བདག་མེད་ལ།རང་འཛིན་རྟོག་པའི་ཞེན་གཞིར་རང་གི་མཚན་ཉིད་ཀྱིས་གྲུབ་པས་སྟོང་པ་དང༌།གཟུང་འཛིན་གཉིས་སྟོང་དང་ཕྱི་རོལ་དོན་སྟོང་རྣམས་ཆོས་ཀྱི་བདག་མེད་ཕྲ་མོ་དང༌།རྡུལ་ཕྲན་ཆ་མེད་བསགས་པའི་ཕྱི་རོལ་དོན་གྱིས་སྟོང་པ་དེ་ཆོས་ཀྱི་བདག་མེད་རགས་པར་འཇོག་ཅིང༌།བདག་མེད་ཕྲ་མོ་གཉིས་ཀ་སྟོང་ཉིད་དུ་འདོད་དོ།།

རྣལ་འབྱོར་སྤྱོད་པའི་དབུ་མ་རང་རྒྱུད་པས་ཀྱང་གང་ཟག་གི་བདག་མེད་ཕྲ་རགས་འདོད་ཚུལ་བྱེ་སྨྲ་དང་འདྲ་ལ།ཆོས་ཀྱི་བདག་མེད་ལ།གཟུང་འཛིན་གཉིས་སྟོང་དང༌།ཕྱི་རོལ་དོན་སྟོང་དང༌།རང་འཛིན་རྟོག་པའི་ཞེན་གཞིར་རང་གི་མཚན་ཉིད་ཀྱིས་གྲུབ་པས་སྟོང་པ་རྣམས་ནི་ཆོས་ཀྱི་བདག་མེད་རགས་པ་དང༌།བདེན་གྲུབ་ཀྱིས་སྟོང་པ་བདེན་མེད།དོན་དམ་བདེན་པ་རྣམས་ཆོས་ཀྱི་བདག་མེད་ཕྲ་མོར་འདོད་དོ།།ཆོས་ཐམས་ཅད་ཐ་སྙད་དུ་རང་གི་མཚན་ཉིད་དུ་གྲུབ་པར་འདོད་པས།རྟོག་པས་བཏགས་ཙམ་དང༌།མིང་བརྡས་བཞག་ཙམ་ཁས་མི་ལེན་པར།ཆོས་ཐམས་ཅད་བློའམ་རྟོག་པ་ལ་སྣང་བའི་དབང་གིས་བཞག་ཙམ་དུ་འདོད་དོ།།མདོ་སྡེ་སྤྱོད་པའི་དབུ་མ་རང་རྒྱུད་པས།གང་ཟག་གི་བདག་མེད་ཕྲ་རགས་གཉིས་དང༌།ཆོས་ཀྱི་བདག་མེད་ཕྲ་མོ་འཇོག་ཚུལ་གོང་དང་འདྲ་ལ།རགས་པ་འཇོག་ཚུལ་མི་འདྲ་སྟེ།རྡུལ་ཕྲ་རབ་ཆ་མེད་བསགས་པའི་ཕྱི་རོལ་མེད་པ་ཆོས་ཀྱི་བདག་མེད་རགས་པར་འདོད་པ་སེམས་ཙམ་པ་དང་མཐུན་ནོ།།གཞི་གྲུབ་ན་རང་འཛིན་རྟོག་པའི་ཞེན་གཞིར་རང་གི་མཚན་ཉིད་ཀྱིས་གྲུབ་པ་དང༌།ཕྱི་རོལ་དོན་དུ་གྲུབ་པ་གཉིས་ཀ་ཡིན་པས་ཁྱབ་པར་འདོད་དོ།།ཐལ་འགྱུར་བའི་ལུགས་ལ།གང་ཟག་རང་སྐྱ་ཐུབ་པའི་རྫས་ཡོད་ཀྱིས་གྲུབ་པས་སྟོང་པ་གང་ཟག་གི་བདག་མེད་རགས་པ་དང༌།གང་ཟག་རང་བཞིན་གྱིས་གྲུབ་པས་སྟོང་པ་གང་ཟག་གིས་བདག་མེད་ཕྲ་མོ་དང༌།རྡུལ་ཕྲན་ཆ་མེད་བསགས་པའི་རགས་པ་དང༌།དེ་འཛིན་པའི་ཚད་མ་རྫས་གཞན་གྱིས་སྟོང་པ་ཆོས་ཀྱི་བདག་མེད་རགས་པ་དང༌།གདགས་གཞིའི་ཕུང་པོ་བདེན་པས་སྟོང་པ་ཆོས་ཀྱི་བདག་མེད་ཕྲ་མོར་བཞེད།བདག་མེད་ཕྲ་མོ་གཉིས་དགག་བྱའི་སྒོ་ནས་མ་ཡིན་པར་སྟོང་གཞིའི་སྒོ་ནས་འབྱེད་དེ།གཞི་གང་ཟག་གི་སྟེང་དུ་དགག་བྱ་བདེན་གྲུབ་བཀག་པ་གང་ཟག་གི་བདག་མེད་ཕྲ་མོ་དང༌།གཞི་ཕུང་སོགས་ཀྱི་སྟེང་དུ་དེ་བཀག་པ་ཆོས་ཀྱི་བདག་མེད་ཕྲ་མོར་འཇོག་པས་སོ།།གང་ཟག་དང་ཆོས་ཀྱི་བདག་མེད་ཕྲ་མོ་གཉིས་ལ་ཕྲ་རགས་ཀྱི་ཁྱད་པར་མེད་ཅིང་གནས་ལུགས་མཐར་ཐུག་ཏུ་བཞེད་དོ།།

གྲུབ་མཐའ་སྨྲ་བ་བཞིས་རང་རང་གི་ལུགས་ཀྱི་རྟག་ཆད་ཀྱི་མཐའ་སྤོང་ཚུལ་ནི།བྱེ་བྲག་སྨྲ་བ་རྣམས་འབྲས་བུ་སྐྱེ་བའི་ཚེ་རྒྱུ་འགག་པས་རྟག་པའི་མཐའ་སྤོང་ལ།རྒྱུའི་མཇུག་ཐོགས་སུ་འབྲས་བུ་འབྱུང་བས་ཆད་པའི་མཐའ་སྤོང་ཞེས་སྨྲ།མདོ་སྡེ་པ་དག་འདུས་བྱས་རྣམས་རྒྱུན་མ་ཆད་པར་འཇུག་པས་ཆད་མཐའ་སྤོང་ཞིང༌།སྐད་ཅིག་གིས་འཇིག་པས་རྟག་མཐའ་ལས་གྲོལ་ཞེས་འདོད།སེམས་ཙམ་པ་རྣམས་ཀུན་བཏགས་བདེན་པར་མ་གྲུབ་པས་རྟག་མཐའ་སྤོང་ལ།གཞན་དབང་བདེན་པར་གྲུབ་པས་ཆད་མཐའ་སྤོང་ཞེས་ཟེར།དབུ་མ་པ་རྣམས་ཆོས་ཐམས་ཅད་ཐ་སྙད་དུ་ཡོད་པས་ཆད་མཐའ་དང་དོན་དམ་དུ་མེད་པས་རྟག་མཐའ་ལས་གྲོལ་ཞེས་བཞེད་པར་གསུངས་ཏེ།དེ་ལྟ་ན་བྱེ་མདོ་གཉིས་ཀྱིས་མི་རྟག་པ་རྟོགས་པའི་ཡེ་ཤེས་དབུ་མའི་ལམ་མཐར་ཐུག་ཏུ་བཞེད་དགོས་པ་འདྲའོ།།

འོན་ཀྱང་རང་རང་གི་ལུགས་ཀྱི་བདག་མེད་ཕྲ་རགས་རེ་རེའི་སྟེང་ནས་ཀྱང་མཐའ་གཉིས་སྤོང་བ་ངེས་པར་དགོས་པས་འདི་སྤྱིའམ་མཚན་གཞི་ཙམ་ཞིག་ལ་དགོངས་པར་མངོན་ནོ།།ཐལ་འགྱུར་བས་གཞལ་ན་རང་རྒྱུད་པ་མན་ཆད་ཀྱི་རང་སྡེ་མཐའ་དག་རྟག་ཆད་ཀྱི་མཐའ་གཉིས་ཀར་ལྷུང་ཡང༌།རང་རང་གི་ལུགས་ལ་རྟག་ཆད་ཀྱི་མཐའ་གཉིས་དང་བྲལ་བའི་དབུས་ཁས་ལེན་པར་རློམ་ནས་དབུ་མ་པར་ཁས་འཆེ་བར་བྱེད་དོ།།

དེས་ན་གྲུབ་མཐའ་དེ་དག་ལ་མཆོག་དམན་གྱི་ཁྱད་པར་ཡོད་མོད།འོན་ཀྱང་ཐེག་པ་ཆེན་པོའི་གྲུབ་མཐའ་མཆོག་ཡིན་ཅེས་ཐེག་པ་དམན་པའི་གྲུབ་མཐའ་ལ་བརྙས་པ་མི་རུང་སྟེ་དེ་དག་ཀྱང་སངས་རྒྱས་ཀྱི་རྗེས་སུ་འབྲང་བ་ཡིན་པའི་ཕྱིར་དང༌།དེར་མ་ཟད་ཐམས་ཅད་མཁྱེན་པ་དགེ་འདུན་རྒྱ་མཚོས།གྲུབ་མཐའ་འོག་མ་འོག་མའི་ལྟ་བ་གོང་མ་གོང་མའི་ལམ་སྟེགས་སུ་གསུངས་པ་བཞིན།སོ་སོའི་ཐུན་མོང་མ་ཡིན་པའི་ཁས་ལེན་རེ་གཉིས་མ་གཏོགས་རྟག་གཅིག་རང་དབང་ཅན་གྱི་བདག་གིས་སྟོང་པ་དང༌།རང་སྐྱ་ཐུབ་པའི་རྫས་ཡོད་ཀྱིས་སྟོང་པའི་བདག་མེད་དང༌།གཟུང་འཛིན་གཉིས་སྟོང་གི་དེ་ཁོ་ན་ཉིད་དང༌།ཆོས་ཐམས་ཅད་རང་མཚན་གྱིས་ཡོད་ཀྱང་དོན་དམ་པར་ངོ་བོ་ཉིད་མེད་པ་དང༌།ཆོས་ཐམས་ཅད་ཐ་སྙད་དུ་ཡང་རང་མཚན་གྱིས་གྲུབ་པ་རྡུལ་ཙམ་ཡང་མེད་པ་ལ་རྒྱུ་འབྲས་འཆིང་གྲོལ་གྱི་བྱ་བྱེད་ཐམས་ཅད་བཞག་ཆོག་པའི་བདག་མེད་ཀྱི་རིམ་པ་རྣམས་ཕྱི་མ་ཕྱི་མ་ལས་སྔ་མ་སྔ་མ་རྟོགས་སླ་བ་དང༌།སྔ་མ་རྣམས་ཕྱི་མ་ལ་འཇུག་པའི་ཐབས་སུ་འགྱུར་བ་མདོ་དང་ཤིང་རྟ་ཆེན་པོ་རྣམས་དང༌།རྗེ་བདག་ཉིད་ཆེན་པོའི་ལེགས་བཤད་རྣམས་སུ་གསུངས་པ་ལྟར་ཡིན་ཅིང༌།གང་ཟག་འགའ་ཞིག་ལ་གྲུབ་མཐའ་འོག་མའི་ལྟ་བ་བསྟན་ནས་རིམ་གྱིས་གོང་མར་ཁྲིད་ན་དོན་དུ་འགྱུར་བ་ལས།ཐོག་མ་ཉིད་ནས་ལྟ་བ་མཐོན་པོ་བསྟན་ན་ཕན་པ་ལས་གནོད་པ་ཆེ་བར་འགྱུར་བའང་ཡོད་པས་སོ།།ཕྱི་ནང་གི་གྲུབ་མཐའ་སོ་སོའི་འདོད་ཚུལ་རྣམས་ནི་ཞིབ་པར་གྲུབ་མཐའི་བསྟན་བཅོས་རྣམས་སུ་རྒྱས་པར་འབྱུང་བས་འདིར་མ་སྤྲོས་སོ།།

སྨྲས་པ།གང་ཞིག་རྟོགས་ན་རང་དང་གཞན་གྱི་བསྟན་པའི་ཁྱད་པར་ཤེས།།མཁས་པའི་མདུན་སར་ངོ་མཚར་གཏམ་གྱི་རོལ་མོ་སྒྲོགས་ལ་དབང༌།།ཡིད་འོང་གྲགས་པའི་བ་དན་གཟུར་གནས་སྐྱེ་བོས་སྒྲེང་བྱེད་པ།།ཨེ་མ་གྲུབ་མཐའི་དེ་ཉིད་འབྱེད་ལ་སུ་ཞིག་བརྩོན་མི་བྱེད།།དེ་ལྟ་ན་ཡང་སྔོན་རབས་ཀྱི།།མཁས་པ་དུ་མས་གཏམ་འདི་ཉིད།།རྒྱ་ཆེར་གསལ་བར་མཛད་ཟིན་ཕྱིར།།གྲུབ་ཟིན་བསྒྲུབས་ལ་དགོས་པ་ཅི།།གལ་ཏེ་ལེགས་བཤད་གསར་པའི་རིན་ཆེན་ཚོགས།།ཕྱུར་བུར་སྤུངས་ཀྱང་ཚོང་དཔོན་ཕྱུག་པོ་ཡི།།དབྱིག་གི་སྙིང་པོ་དབུལ་པོའི་གྲོང་ཁྱེར་གྱི།།སྲང་པར་བཀྲམ་བཞིན་སུ་ལ་དོན་དུ་འགྱུར།།རྒྱ་བོད་མཁས་པའི་ལེགས་བཤད་གླེགས་བམ་ཀུན།།དངོས་པོར་འདུ་ཤེས་ཙམ་གྱིས་ཁང་ཕུག་གི།དཔེ་ཁྲིའི་རྒྱུན་དུ་ངལ་བསོའི་དུས་འདི་འདྲར།།བདག་ལྟ་སྙིང་ལས་ཆུང་ངུར་གཞོལ་ལ་སྤྲོ།།དེ་ཕྱིར་འདིར་ནི་བརྗོད་བྱའི་ལུས།།ཁོ་ལག་རྫོགས་པ་མཚོན་པའི་ཆེད།།འཕགས་ཡུལ་གྲུབ་མཐའི་ཡན་ལག་མཆོག།ཉུག་ཙམ་སྟོན་པས་ཆོག་ཤེས་བགྱིས།།ཞེས་པའང་བར་སྐབས་ཀྱི་ཚིགས་སུ་བཅད་པའོ།།

རྩོམ་ཁུངས། ཐུའུ་བཀྭན་གྲུབ་མཐའ།