ནང་པ་སངས་རྒྱས་པའི་བྱུང་ཚུལ།

    སྤེལ་དུས།  2015-12-07 10:43:35     རྩོམ་པ་པོ།   ཐུའུ་བཀྭན་ཆོས་ཀྱི་ཉི་མ    ཀློག་ཐེངས།  

        ༡གྲུབ་མཐའ་སྨྲ་བ་བཞིའི་བྱུང་ཚུལ།

གཉིས་པ་ནང་པ་སངས་རྒྱས་པའི་བྱུང་ཚུལ་ལ་གཉིས།གྲུབ་མཐའ་སྨྲ་བ་བཞིའི་བྱུང་ཚུལ་དང༌།དེ་རྣམས་ཀྱི་ལྟ་བའི་བཞེད་ཚུལ་མདོ་ཙམ་བཤད་པའོ།།
དང་པོ་ནི།བསྐལ་པ་འདི་ལ་ཐེག་ཆེན་ལྟར་ན་སངས་རྒྱས་སྟོང༌།ཐེག་དམན་ལྟར་ན་ལྔ་བརྒྱ་འབྱུང་ལ།དེ་ཡང་འཛམ་བུ་གླིང་པའི་མི་རྣམས་ཀྱི་ཚེ་ལོ་དཔག་མེད་ནས་བྲི་སྟེ་བཞི་ཁྲི་ལ་ཐུག་པའི་ཚེ་སངས་རྒྱས་འཁོར་བ་འཇིག་བྱོན།སུམ་ཁྲིའི་ཚེ་གསེར་ཐུབ་བྱོན།ཉི་ཁྲིའི་ཚེ་འོད་སྲུང་བྱོན།ཚེ་ལོ་བརྒྱ་པ་སྙིགས་མ་ལྔ་བདོ་བའི་ཚེ་བདག་ཅག་གི་སྟོན་པ་ཤཱཀྱ་ཐུབ་པ་འཇིག་རྟེན་དུ་བྱོན་ཏེ་ཆོས་ཀྱི་འཁོར་ལོ་རིམ་པ་གསུམ་བསྐོར་ཞིང༌།བཀའ་དང་པོ་བདེན་བཞིའི་ཆོས་འཁོར་གྱི་རྗེས་སུ་འབྲངས་ཏེ་ཐེག་པ་འོག་མའི་གྲུབ་མཐའ་སྨྲ་བ་ཉན་ཐོས་སྡེ་གཉིས་དང༌།འཁོར་ལོ་བར་པ་དང་ཐ་མའི་རྗེས་སུ་འབྲངས་ཏེ་ཐེག་ཆེན་གྱི་གྲུབ་མཐའ་སྨྲ་བ་དབུ་སེམས་གཉིས་བྱུང་ངོ༌།།
ཉན་ཐོས་སྡེ་གཉིས་ལས།བྱེ་བྲག་སྨྲ་བ་ནི།བྱེ་བྲག་བཤད་མཚོའམ།བྱེ་བྲག་ཏུ་བཤད་པ་ཆེན་པོ་ཞེས་བྱ་བའི་གཞུང་རྗེས་སུ་འབྲངས་པ་དང༌།དུས་གསུམ་རྫས་ཀྱི་བྱེ་བྲག་ཏུ་སྨྲ་བས་བྱེ་བྲག་ཏུ་སྨྲ་བར་གྲགས་ལ།དབྱེ་ན་རྩ་བའི་སྡེ་བཞི།གྱེས་པ་བཅོ་བརྒྱད་ཡོད་དོ།།
རྩ་བའི་སྡེ་བཞི་ནི།མཁན་པོ་དགྲ་བཅོམ་པ་འོད་སྲུང་ཆེན་པོ་ནས་བརྒྱུད་པ་ཕལ་ཆེན་སྡེ་པ།སྒྲ་གཅན་ཟིན་ནས་བརྒྱུད་པ་གཞི་ཐམས་ཅད་ཡོད་པར་སྨྲ་བ།ཀཱ་ཏྱ་ཡ་ན་ནས་བརྒྱུད་པ་གནས་བརྟན་པའི་སྡེ་པ།ཉེ་བར་འཁོར་ནས་བརྒྱུད་པ་མང་བཀུར་བའི་སྡེ་པ་རྣམས་སོ།།
གྱེས་པ་བཅོ་བརྒྱད་ནི།ཕལ་ཆེན་པ་ལས་གྱེས་པ་ལྔ་སྡེ།སློབ་དཔོན་དུལ་བ་ལྷས།ཤར་ནུབ་རི་དང་གངས་རིར་གནས།།འཇིག་རྟེན་འདས་པར་སྨྲ་བ་དང༌།།བཏགས་པར་སྨྲ་བའི་སྡེ་རྣམས་ནི།།ལྔ་ཚན་དགེ་འདུན་ཕལ་པའི་སྡེ།།ཞེས་པ་ལྟར་རོ།།གཞི་ཐམས་ཅད་ཡོད་པར་སྨྲ་བ་ལས་གྱེས་པ་བདུན་ཏེ།གཞི་ཀུན་ཡོད་དང་འོད་སྲུང་སྡེ།།ས་སྲུང་སྡེ་དང་ཆོས་སྲུང་སྡེ།།མང་ཐོས་གོས་དམར་སློབ་མར་བཅས།།ཕྱེ་སྟེ་སྨྲ་བའི་སྡེ་རྣམས་ནི།།གཞི་ཀུན་ཡོད་པར་སྨྲ་བ་ཡིན།།ཞེས་སོ།།གནས་བརྟན་པ་ལས་གྱེས་པ་གསུམ་སྟེ།རྒྱལ་བྱེད་ཚལ་གནས་འཇིགས་མེད་གནས།།གཙུག་ལག་ཁང་གནས་གནས་བརྟན་པ།།ཞེས་སོ།།མང་བཀུར་བ་ལས་གྱེས་པ་གསུམ་སྟེ།ས་སྒྲོག་རི་དང་སྲུང་བ་པ།།གནས་མ་བུ་བའི་སྡེ་རྣམས་ནི།།མང་པོས་བཀུར་བའི་སྡེ་པ་ཡིན།།ཞེས་སོ།།དེ་དག་ཀྱང་གང་གི་རྗེས་སུ་འབྲང་པའི་སློབ་དཔོན་དང༌།གནས་པའི་ཡུལ་དང༌།གྲུབ་མཐའི་འདོད་ཚུལ་ཅི་རིགས་ཀྱིས་དབྱེ་བ་བཅོ་བརྒྱད་དུ་གྱུར་པ་སྟེ།ཡུལ་དོན་སློབ་དཔོན་བྱེ་བྲག་གིས།ཐ་དད་སྡེ་པ་བཅོ་བརྒྱད་དོ།།ཞེས་སོ།།སྡེ་པ་བཅོ་བརྒྱད་དུ་གྱེས་ཚུལ་ལ་བཤད་པ་མི་མཐུན་པ་གཞན་ཡང་ཡོད་དོ།།
དེ་ཡང་སྟོན་པ་མྱ་ངན་ལས་འདས་ནས་ལོ་བརྒྱ་དང་བཅུ་དྲུག་ལོན་པ་ན་གྲོང་ཁྱེར་མེ་ཏོག་གིས་རྒྱས་པ་ཞེས་བྱ་བར་དགེ་འདུན་གྱི་གནས་བརྟན་བཞི་སྐད་རིགས་མི་མཐུན་པ་བཞིས་ལུང་འདོན་པར་བརྟེན།སློབ་མ་རྣམས་མི་མཐུན་པར་གྱུར་ཏེ་རྩ་བའི་སྡེ་བཞིར་གྱེས།དེ་དག་ཀྱང་ནང་གསེས་ཀྱིས་བཅོ་བརྒྱད་དུ་གྱུར་ཏེ་ཕན་ཚུན་རྩོད་པར་གྱུར་ཏོ།།ནམ་ཞིག་ན་རྒྱལ་པོ་ཀྲི་ཀྲིའི་རྨིས་ལྟས་ལུང་བསྟན་པའི་མདོ་བརྙེད་ནས་བལྟས་པས་སྡེ་པ་བཅོ་བརྒྱད་དུ་གྱུར་ཀྱང་རྣམ་པར་གྲོལ་བའི་འབྲས་བུ་ཉམས་པ་མེད་པར་གསུངས་པ་མཐོང་ནས་ཕན་ཚུན་མཐུན་པར་གྱུར་པ་སྟེ།བཤད་ཚུལ་གཞན་ཡང་ཡོད་དོ།།
བྱེ་བྲག་སྨྲ་བའི་སློབ་དཔོན་ནི།དབྱིག་བཤེས་དང༌།ཆོས་སྐྱོབ་དང༌།སངས་རྒྱས་ལྷ་དང༌།འདུས་བཟང་སོགས་ཡིན་པར་གྲགས་སོ།།
མདོ་སྡེ་པའམ་དཔེ་སྟོན་སྡེ་པ་ནི།མདོ་སྡེའི་རྗེས་སུ་འབྲངས་ནས་གྲུབ་མཐའ་འཇོག་པ་དང༌།ཆོས་ཐམས་ཅད་དཔེའི་སྒོ་ནས་སྟོན་པ་ལ་མཁས་པས་དེ་ལྟར་གྲགས་ལ།དབྱེ་ན་མདོ་སྡེ་ལས་ཇི་ལྟར་འབྱུང་བ་སྒྲ་ཇི་བཞིན་དུ་ཁས་ལེན་པ་ཙམ་གྱི་སྒོ་ནས་གྲུབ་པའི་མཐའ་སྨྲ་བས་ལུང་གི་རྗེས་འབྲངས་དང༌།ཚད་མ་སྡེ་བདུན་ནས་བཤད་པ་ལྟར་གྱི་རིགས་པའི་རྗེས་སུ་འབྲངས་པས་རིགས་པའི་རྗེས་འབྲང་གཉིས་ཡོད།སློབ་དཔོན་ནི་ཀུ་མ་ར་ཏ་དང༌།ཤི་རི་ར་ཏ་དང༌།བཙུན་པ་ར་ཏ་སོགས་ཡིན་པར་གྲགས་སོ།།
ཐེག་ཆེན་གྱི་གྲུབ་མཐའ་བྱུང་ཚུལ་ནི།སྟོན་པ་མྱ་ངན་ལས་འདས་ནས་ཐེག་ཆེན་གྱི་བསྟན་པ་ལྷ་དང་ཀླུའི་ཡུལ་དུ་ཤིན་ཏུ་དར་ཞིང༌།གླིང་གཞན་དུའང་ཡོད་པར་བཤད་ལ།འཛམ་བུའི་གླིང་འདིར་ནི་ས་ལ་གནས་པའི་བྱང་ཆུབ་སེམས་དཔའ་དང༌།གསང་སྔགས་ཀྱི་རྣལ་འབྱོར་བ་སྦས་པའི་བརྟུལ་ཞུགས་འཛིན་པ་མང་པོས་རང་གིས་ཉམས་སུ་ལེན་པ་དང༌།སྐལ་ལྡན་རྣམས་ལ་འཆད་པ་སོགས་ཀྱིས་ཐེག་ཆེན་གྱི་བསྟན་པ་འཛིན་སྤེལ་ཅུང་ཟད་ཡོད་མོད་ཀྱང༌།ཉན་ཐོས་སྡེ་པ་དར་རྒྱས་ཆེ་བའི་དབང་གིས་ཐེག་ཆེན་གྱི་སྡེ་སྣོད་ནུབ་པ་ལྟ་བུར་གྱུར་ཏེ་ཡུན་རིང་ཞིག་ལོན།སྐབས་ཤིག་བྲམ་ཟེ་ཆེན་པོ་ས་ར་ཧ་བྱོན་ནས་ཐེག་པ་ཆེན་པོ་གསང་སྔགས་ཀྱི་བསྟན་པ་གཙོ་བོར་སྤེལ།།དེ་ནས་རྒྱལ་བ་རང་ཉིད་ཀྱིས་ལུང་བསྟན་པ་བཞིན་སངས་རྒྱས་གཉིས་པ་ཀླུ་སྒྲུབ་དང་ཐོགས་མེད་གཉིས་བྱོན་ནས་བཅོམ་ལྡན་འདས་ཉིད་ཀྱི་བཀའ་ལ་བརྟེན་ནས་གསུང་རབ་ལ་དྲང་ངེས་ཕྱེ་སྟེ་ཐེག་པ་ཆེན་པོའི་ཟབ་རྒྱས་ཀྱི་ལམ་ཉམས་སུ་ལེན་ཚུལ་ཡོངས་སུ་རྫོགས་པ་ཉིན་མོ་ལྟར་གསལ་བར་མཛད་པ་ཤིང་རྟ་ཆེན་པོ་གཉིས་སུ་གྲགས་ཤིང༌།དེ་ནས་བརྩམས་ཏེ་ཐེག་ཆེན་གྱི་བསྟན་པ་དར་ཞིང་རྒྱས་པར་གྱུར་ཏོ།།
དེ་ཡང་མགོན་པོ་ཀླུ་སྒྲུབ་ནི།ཐེག་པ་ཆེན་པོ་སྤྱིའི་ཤིང་རྟའི་སྲོལ་འབྱེད་ཡིན་ལ།ལང་ཀར་གཤེགས་པའི་མདོ་ལས།ལྷོ་ཕྱོགས་བེ་ཏའི་ཡུལ་དུ་ནི།དགེ་སློང་དཔལ་ལྡན་ཆེར་གྲགས་པ།།དེ་མིང་ཀླུ་ཞེས་འབོད་པ་སྟེ།།ཡོད་དང་མེད་པའི་ཕྱོགས་འཇིག་པ།།ང་ཡི་ཐེག་པ་འཇིག་རྟེན་དུ།།བླ་མེད་ཐེག་པ་རབ་བཤད་ནས།།རབ་ཏུ་དགའ་བའི་ས་བསྒྲུབས་ཏེ།།བདེ་བ་ཅན་དུ་དེ་འགྲོའོ།།ཞེས་དང༌།གཞན་ཡང་འཇམ་དཔལ་རྩ་རྒྱུད་དང་རྔ་བོ་ཆེའི་མདོ་སོགས་མང་པོ་ལས་རྒྱལ་བ་རང་ཉིད་ཀྱིས་གསལ་བར་ལུང་བསྟན་པ་སྟེ།སངས་རྒྱས་མྱ་ངན་ལས་འདས་ནས་ལོ་བཞི་བརྒྱ་ལོན་པ་ན་ལྷོ་ཕྱོགས་བེ་དརྦྷའི་ཡུལ་དུ་བྲམ་ཟེའི་རིགས་སུ་འཁྲུངས།བྲམ་ཟེ་ཆེན་པོ་ས་ར་ཧས་རྗེས་སུ་བཟུང་སྟེ་རབ་ཏུ་བྱུང༌།སྐུ་ཚེ་ཞག་བདུན་ལས་མེད་པ་བསྲིངས་ཏེ་གསང་སྔགས་ཀྱི་གདམས་པ་མང་དུ་སྩལ།ནཱ་ལེནྡྲའི་མཁན་པོ་སྒྲ་གཅན་འཛིན་བཟང་པོ་ལས་བསྙེན་པར་རྫོགས་ཏེ་དགེ་སློང་དཔལ་ལྡན་ཞེས་གྲགས།ནཱ་ལེནྡྲའི་དགེ་འདུན་གྱི་ཞལ་ཏ་བ་མཛད་དེ་གསེར་འགྱུར་བྱས་ནས་དགེ་འདུན་གྱི་གདུགས་ཚོད་སྦྱར།ཉན་ཐོས་སྡེ་པ་དགེ་སློང་བདེ་བྱེད་ཞེས་བྱ་བས་རིག་པའི་རྒྱན་ཞེས་བྱ་བའི་གཞུང་འབུམ་ཕྲག་བཅུ་གཉིས་པ་བྱས་ནས་ཐེག་ཆེན་སུན་ཕྱུངས་བ་སློབ་དཔོན་འདིས་ཚར་བཅད་པ་སོགས་ཆོས་སྒྲ་ཆེན་པོ་ལན་གསུམ་དུ་བསྒྲགས།ཀླུ་ཡུལ་དུ་བྱོན་ནས་ཀླུ་མང་པོ་ལ་ཆོས་བསྟན་ཅིང་ཀླུའི་འདམ་མང་པོ་དང་ཤེར་ཕྱིན་འབུམ་པ་སོགས་འཛམ་གླིང་དུ་ནུབ་པའི་མདོ་སྡེ་མང་པོ་མི་ཡུལ་དུ་སྤྱན་དྲངས་པས་ཀླུ་སྒྲུབ་ཏུ་གྲགས།ལི་ཁ་ར་ཤིང་འཕེལ་དང༌།ས་ཊ་བེ་ས་སོགས་ཡུལ་མང་པོར་འགྲོ་དོན་མཛད།བྱང་གི་སྒྲ་མི་སྙན་དུ་བྱོན་པ་སོགས་རྫུ་འཕྲུལ་དང་ཆོས་སྟོན་པ་སོགས་ཀྱིས་འགྲོ་དོན་མཐའ་ཡས་པ་མཛད།མཆོད་རྟེན་དང་ལྷ་ཁང་མང་པོ་བཞེངས་པ་དང༌།རྡོ་རྗེ་གདན་ལ་རྡོའི་དྲ་མིག་གི་ར་བས་བསྐོར་བ་དང༌།དཔལ་ལྡན་འབྲས་སྤུངས་ཀྱི་མཆོད་རྟེན་གྱི་བཀོད་པ་བཞེངས་པ་སོགས་མཛད་པ་ཕྱག་རྗེས་ཀྱང་བསྟན་པ་ལ་ཕན་པ་དཔག་མེད་མཛད།
ཁྱད་པར་དུ་ཟབ་མོ་དབུ་མའི་ལམ་ངེས་དོན་མཐར་ཐུག་པ་ལུང་གིས་བསྒྲུབ་པ་ལ་མདོ་ཀུན་ལས་བཏུས་པ་དང༌།རིགས་པས་བསྒྲུབ་པ་ལ་རྩ་ཤེས་སོགས་རིགས་པའི་ཚོགས་དྲུག་དང༌།གཞན་ཡང་ཆོས་དབྱིངས་བསྟོད་པ་སོགས་བསྟོད་པའི་ཚོགས་དང༌།བྱང་ཆུབ་སེམས་འགྲེལ་དང་རིམ་པ་ལྔ་པ་སོགས་གསང་སྔགས་ཀྱི་སྐོར་ཏེ་མདོ་དང་རྒྱུད་སྡེའི་དགོངས་འགྲེལ་མང་པོ་མཛད་ཅིང༌།རིག་པའི་སྟོབས་ཀྱིས་སྨྲ་བ་ངན་པ་རྣམས་ཚར་བཅད།ཐེག་པ་ཆེན་པོའི་བསྟན་པ་ནུབ་པ་གཞི་ནས་གསོས་ཤིང་རྒྱལ་བའི་བསྟན་པ་ལ་རྒྱལ་བ་ཉིད་དང་མཚུངས་པར་བཀའ་དྲིན་གྱིས་ཁྱབ་པར་མཛད་དོ།།མི་ཡུལ་དུ་ལོ་དྲུག་བརྒྱའི་བར་དུ་བཞུགས།རྒྱལ་པོ་བདེ་སྤྱོད་བཟང་པོའི་བུ་གཞོན་ནུ་ནུས་ལྡན་བྱ་བས་དབུ་བསླངས་པས་གནང་སྟེ།རལ་གྲིས་མ་ཆོད་པ་ལ་རྩྭ་ཀུ་ཤས་སྲོག་ཆགས་ཀྱི་སྲོག་བཅད་པའི་རྣམ་སྨིན་ཡོད་པས་ཀུ་ཤས་ཆོད་གསུངས་ནས་བཅད་དེ།དབུ་ཁྱེར་ཕྱིན་པ་གནོད་སྦྱིན་མོས་འཕྲོགས་ཏེ་དཔག་ཚད་དུ་དོར།དབུ་དང་སྐུ་ལུས་གཉིས་མི་ཉམས་ལ་ལོ་རེ་བཞིན་ཉེ་བར་སོང་ནས་མཐར་འབྱར་ནས་སླར་ཡང་བསྟན་འགྲོའི་དོན་མཛད་ཅེས་གྲགས།རྔ་བོ་ཆེའི་མདོ་ལས་སློབ་དཔོན་འདི་ས་བདུན་པ་བར་བཤད།སྒྲོན་གསལ་ལས་སྐུ་ཚེ་འདིར་མཆོག་གི་དངོས་གྲུབ་བརྙེས་པར་བཤད་དོ།།སློབ་མ་ཡང་ཨཱརྱ་དེ་བ་དང༌།དཔའ་བོ་དང༌།ལེགས་ལྡན་འབྱེད་དང༌།སངས་རྒྱས་བསྐྱངས་དང༌།ཟླ་བ་གྲགས་པ་ལ་སོགས་པ་ཟླ་བྲལ་གྱི་མཁས་པ་མང་དུ་བྱོན།རྩ་བ་ཤེས་རབ་ཀྱི་སྒོ་ནས་དབུ་མ་བའི་ཤིང་རྟའི་སྲོལ་ཕྱེ་བ་ལ་བརྟེན་ནས་ཀླུ་སྒྲུབ་ཀྱི་རྗེས་འབྲང་རྣམས་ལ་དབུ་མ་བ་དང་ངོ་བོ་ཉིད་མེད་པར་སྨྲ་བ་ཞེས་ཟེར་རོ།།
འཕགས་པ་ལྷ་ནི་ཀླུ་སྒྲུབ་ཀྱི་སློབ་མ་གཞན་རྣམས་ཀྱིས་ཀྱང་སློབ་དཔོན་ཉིད་དང་འདྲ་བར་ཚད་མར་འཛིན་ཅིང༌།འདི་ཉིད་ཀྱིས་རྣལ་འབྱོར་སྤྱོད་པ་བཞི་བརྒྱ་པ་མཛད།ཡབ་སྲས་འདི་གཉིས་ཀྱི་དགོངས་པ་མཐར་ཐུག་ཐལ་འགྱུར་པའི་ལུགས་སུ་གནས་ཀྱང་གཞུང་གི་བསྟན་ཚོད་ལ་ཐལ་འགྱུར་བའི་ཐུན་མོང་མ་ཡིན་པའི་རྣམ་གཞག་གསལ་བར་མ་ཕྱེ་བས་ཐལ་རང་གི་ཕྱོགས་གཉིས་ཀའི་སྤྱི་ལ་བཞུགས་པས་གཞུང་ཕྱི་མོའི་དབུ་མ་བ་ཞེས་ཟེར་རོ།།སློབ་དཔོན་སངས་རྒྱས་བསྐྱངས་ཀྱིས་རྩ་ཤེས་འགྲེལ་པ་བུ་དྡྷ་པཱ་ལི་ཏ་མཛད་ཅིང༌།རྩ་བར་བཤད་པའི་རིགས་པ་རྣམས་ཀྱི་དོན་ཐལ་འགྱུར་མང་པོ་མཛད་ནས་བཀྲལ་ཞིང་རང་རྒྱུད་ཀྱི་གཏན་ཚིགས་མ་བཤད་པ་ལ།སློབ་དཔོན་ལེགས་ལྡན་འབྱེད་ཀྱིས་ཤེས་རབ་སྒྲོན་མེར་སྐྱོན་མང་དུ་བརྗོད་ཅིང༌།རང་རྒྱུད་ཀྱི་གཏན་ཚིགས་འགོད་དགོས་པའི་རྒྱུ་མཚན་མང་དུ་བཤད་ནས་རང་རྒྱུད་པའི་ཤིང་རྟའི་སྲོལ་འབྱེད་པར་མཛད།དེའི་འོག་ཏུ་སློབ་དཔོན་ཟླ་བ་གྲགས་པས་བསྟན་བཅོས་དབུ་མ་འཇུག་པ་དང༌།རྩ་ཤེས་འགྲེལ་པ་ཚིག་གསལ་བཅས་མཛད་ནས་སངས་རྒྱས་བསྐྱངས་ལ་སྐྱོན་དེ་རྣམས་མི་འཇུག་པ་དང༌།རང་རྒྱུད་ཀྱི་གཏན་ཚིགས་ཁས་ལེན་པ་ལ་གནོད་བྱེད་དང༌།ཁས་མི་ལེན་པ་ལ་སྒྲུབ་བྱེད་མང་དུ་བསྟན་ནས་འཕགས་པའི་དགོངས་པ་ཐལ་འགྱུར་དུ་བཀྲལ།འོན་ཀྱང་ཐལ་འགྱུར་བའི་ཤིང་རྟའི་སྲོལ་འབྱེད་ནི་སངས་རྒྱས་བསྐྱངས་ཡིན་པར་བཞེད་པ་དང༌།ཟླ་བ་གྲགས་པ་ཡིན་པར་བཞེད་པའི་ཕྱོགས་གཉིས་སྣང་ངོ༌།།
དེ་ལྟར་འཕགས་པའི་དགོངས་པ་ཐལ་རང་སོ་སོར་འགྲེལ་པ་རྣམས་ལ་ཕྱོགས་འཛིན་པའི་དབུ་མ་པ་ཞེས་གྲགས།སློབ་དཔོན་ཞི་འཚོས་དབུ་མ་རྒྱན་དང༌།སློབ་དཔོན་ཡེ་ཤེས་སྙིང་པོས་དབུ་མ་བདེན་གཉིས།ཀ་མ་ལ་ཤཱི་ལས་དབུ་མ་སྣང་བ་མཛད་ཅིང༌།དེ་གསུམ་ལ་རང་རྒྱུད་ཤར་གསུམ་དུ་གྲགས།རང་རྒྱུད་པ་ལ་དབྱེ་ན།གཞིའི་རྣམ་བཞག་སེམས་ཙམ་པ་དང་མཐུན་པར་ཁས་ལེན་པའི་རྣལ་འབྱོར་སྤྱོད་པ་དང༌།མདོ་སྡེ་པ་ལྟར་རྡུལ་ཕྲ་རབ་བསགས་པའི་ཕྱི་རོལ་གྱི་དོན་ཁས་ལེན་པའི་མདོ་སྡེ་སྤྱོད་པའི་དབུ་མ་རང་རྒྱུད་པ་གཉིས་དང༌།སྔ་མ་ལ་ཡང་རྣམ་བདེན་པ་དང་མཐུན་པ་དང༌།རྣམ་རྫུན་པ་དང་མཐུན་པའི་དབུ་མ་པ་གཉིས་ཡོད་པའི་ཞི་བ་འཚོ་དང༌།ཀ་མ་ལ་ཤཱི་ལ་དང༌།འཕགས་པ་གྲོལ་སྡེ་ལྟ་བུ་སྔ་མ་དང༌།སློབ་དཔོན་སེང་གེ་བཟང་པོ།ཛེ་ཏ་རི།ལྭ་བ་པ་ལྟ་བུ་ཕྱི་མ་ཡིན་ལ།ཕྱི་མ་ལ་ཡང་རྣམ་རྫུན་དྲི་བཅས་པ་དང་མཐུན་པ་དང༌།དྲི་མེད་པ་དང་མཐུན་པ་གཉིས་ཡོད་དོ།།
དབུ་མ་པའམ་ངོ་བོ་ཉིད་མེད་པར་སྨྲ་བ་ཞེས་པའི་དོན་ནི།མཐའ་གཉིས་དང་བྲལ་བའི་དབུས་ཁས་ལེན་པས་དབུ་མ་པ་དང༌།ཆོས་རྣམས་ལ་བདེན་གྲུབ་ཀྱི་ངོ་བོ་ཉིད་མེད་པར་སྨྲ་བས་ན་ངོ་བོ་ཉིད་མེད་པར་སྨྲ་བ་ཞེས་བྱ་ལ།
ཐལ་རང་གི་དོན་ནི།ཚུལ་གསུམ་རང་ངོས་ནས་གྲུབ་པའི་རྟགས་ཡང་དག་ལ་བརྟེན་ནས་བདེན་དངོས་འགོག་པར་བྱེད་པས་ན་རང་རྒྱུད་པ་དང༌།ཐལ་འགྱུར་ཙམ་གྱིས་ཕྱིར་རྒོལ་གྱི་རྒྱུད་ལ་བསྒྲུབ་བྱ་རྟོགས་པའི་རྗེས་དཔག་སྐྱེ་བར་འདོད་པས་ན་ཐལ་འགྱུར་པ་ཞེས་བརྗོད་དོ།།
སེམས་ཙམ་པའི་གྲུབ་མཐའ་བྱུང་ཚུལ་ནི།ལུགས་འདིའི་ཤིང་རྟའི་སྲོལ་འཕགས་པ་ཐོགས་མེད་ཀྱིས་ཕྱེ་བ་ཡིན་ཞིང༌།སློབ་དཔོན་འདི་ཉིད་འཇམ་དཔལ་རྩ་རྒྱུད་ལས།ང་ནི་མྱ་ངན་འདས་འོག་ཏུ།།ལོ་ནི་དགུ་བརྒྱ་ལོན་པ་ན།ཐོགས་མེད་ཅེས་བྱའི་དགེ་སློང་ནི།།བསྟན་བཅོས་དེ་ནི་དོན་ལ་མཁས།།མདོ་སྡེ་ངེས་དོན་དྲང་བའི་དོན།།རྣམ་པ་མང་པོ་རབ་ཏུ་འབྱེད།།ཅེས་དང༌།བསྟན་པ་ཡུན་རིང་གནས་བྱའི་ཕྱིར།།མདོ་ཡི་དེ་ཉིད་དོན་སྡུད་བྱེད།།ལོ་ནི་བརྒྱ་དང་ལྔ་བཅུར་འཚོ།།ཞེས་སོགས་ཀྱིས་གསལ་བར་ལུང་བསྟན་པ་སྟེ།སྟོན་པ་འདས་ནས་ལོ་དགུ་བརྒྱ་ན་བྱོན་པ་དང༌།དྲུག་བརྒྱའི་དུས་བྱོན་པའི་འདོད་པ་མི་འདྲ་བ་ཡོད་ཅིང༌།གང་ལྟར་ཡང་རྒྱ་གར་དུ་ཆོས་མངོན་པ་ལ་དགྲ་ལན་གསུམ་བྱུང་ནས་བསྟན་པ་ནུབ་པ།བྲམ་ཟེ་མོ་གསལ་བའི་ཚུལ་ཁྲིམས་ཞེས་བྱ་བས་མ་བཟོད་པར།ལུས་ལ་བུ་སྐྱེད་ལ་བསྟན་པ་དར་བར་བྱེད་དུ་གཞུག་གོ་སྙམ་སྟེ་རྒྱལ་རིགས་དང་འདུས་པ་ལས་ཐོགས་མེད་དང༌།བྲམ་ཟེ་དང་འདུས་པ་ལས་དབྱིག་གཉེན་བྱུང༌།བུ་གཉིས་ལ་བློ་རྣོ་བའི་ཆོ་ག་བྱས་ཏེ་ཆེར་སྐྱེས་པའི་ཚེ།བུ་གཉིས་ཀྱིས་ཕའི་ལས་གང་ཡིན་དྲིས་པར།མ་ན་རེ།ཁྱེད་དེའི་ཕྱིར་སྐྱེད་པ་མིན་གྱི་བསྟན་པ་དར་བའི་ཆེད་དུ་ཡིན་པས་བློ་སྦྱོང་གྱིས་ལ་བསྟན་པ་དར་བར་གྱིས་ཤིག་ཅེས་སྨྲས་པས།གཅུང་དབྱིག་གཉེན་ཁ་ཆེ་འདུས་བཟང་གི་དྲུང་དུ་བྱོན།གཅེན་གྱིས་ནི་བྱམས་པ་བསྒྲུབས་ནས་བསྟན་པ་དར་བར་བྱའོ་སྙམ་སྟེ།རི་བྱ་རྐང་གི་ཕུག་ཏུ་བྱོན་ནས་ལོ་གསུམ་དུ་བསྒྲུབས་པས་མཚན་མ་ཅུང་ཟད་ཀྱང་མ་མཐོང་བས་སྐྱོ་སྟེ་ཕྱིར་ཐོན་པ་ན།རྒན་པོ་ཤིང་བལ་གྱི་འདབ་མས་ལྕགས་ཀྱི་སྡོང་པོ་ལ་ཁབ་བྱེད་པ་མཐོང་ནས་དྲིས་པར།སྙིང་སྟོབས་ལྡན་པའི་སྐྱེས་བུ་ཡིས།།བསྒྲུབས་ན་མི་འགྲུབ་གང་ཡང་མེད།།དཀའ་ཡང་བརྣག་པ་མ་དོར་ན།།རི་བོ་རྣམས་ཀྱང་ཐལ་བར་རློག།ཅེས་ཟེར་བས་རྐྱེན་བྱས་ཏེ་ཕྱིར་ལོག་ནས།ཡང་ལོ་གསུམ་བསྒྲུབས་ནས་ཐོན་པ་ན་ཆུ་ཐིགས་ཀྱིས་བྲག་ཟད་པ་མཐོང་ནས་བརྩོན་པའི་བློ་སྐྱེས་ཏེ་ཕྱིར་ལོགཡང་ལོ་གསུམ་བསྒྲུབས་ཏེ་ཐོན་པ་ན་བྱ་སྒྲོས་བྲག་ཟད་པ་མཐོང་ནས་སྔར་ལྟར་ཕྱིར་ལོག།ཡང་ལོ་གསུམ་བསྒྲུབས་པས་མཚན་མ་མ་བྱུང་བར་སྐྱོ་སྟེ་ཐོན་ནས་ཕྱིན་པ་ན་ཁྱི་མོ་རོ་སྨད་འབུས་གཞིགས་པ།རོ་སྟོད་ཟུག་ཅིང་ཟ་བ་ཞིག་མཐོང་ནས་སྙིང་རྗེ་ལྷག་པར་སྐྱེས་ཏེ།རང་གི་ལུས་ལས་ཤ་བཅད་དེ་འབུ་བསལ་སྙམ་ནས་གསེར་གྱི་སྤུ་གྲི་གཡར་ཏེ་རང་གི་ལུས་ལས་ཤ་བཅད།ལག་པས་བླངས་ན་ཤི་ཡིས་དོགས་ཏེ་སྤྱན་ཟུམ་ནས་ལྗགས་ཀྱིས་བླང་སྙམ་པ་དང་ཁྱི་མེད་པར་རྗེ་བཙུན་འོད་དང་བཅས་པ་མཐོང་ནས།བདག་གིས་དེ་ཙམ་བསྒྲུབས་ཀྱང་རྟགས་ཙམ་ཡང་མ་བྱུང་བ་རྗེ་བཙུན་ཐུགས་རྗེ་རེ་ཆུང་ཞེས་འཁངས་པས།རྗེ་བཙུན་གྱིས་ང་དང་པོ་ནས་ཡོད་དེ་ཁྱོད་རང་གི་སྒྲིབ་པས་མ་མཐོང་ལ།ད་ལྟ་སྙིང་རྗེ་ཆེན་པོ་སྐྱེས་པས་སྒྲིབ་པ་དག་ནས་མཐོང་བ་ཡིན།ཞེས་གསུངས།དེ་ནས་ཐེག་ཆེན་དར་བར་ཞུ་འཚལ་ཞེས་ཞུས་པས།ངའི་ཆོས་གོས་ལ་འཇུས་ཤིག་གསུངས་ནས་དགའ་ལྡན་དུ་བྱོན་ཏེ་ལྷའི་གྲོ་སྐད་ཅིག་གམ་མི་ལོ་ལྔ་བཅུའམ་ལྔ་བཅུ་རྩ་གསུམ་བཞུགས་པར་གྲགས།དེར་བྱམས་པ་ལས་ཡུམ་གྱི་མདོ་དང༌།བྱམས་ཆོས་སྡེ་ལྔ་སོགས་གསན་ནས་སླར་མི་ཡུལ་དུ་བྱོན།ས་སྡེ་ལྔ་དང་སྡོམ་རྣམ་གཉིས་སོགས་མཛད་ནས་སེམས་ཙམ་པའི་ཤིང་རྟའི་སྲོལ་ཕྱེ།སའི་སྟོད་འགྲེལ་ལས།སློབ་དཔོན་འདིས་ཆོས་རྒྱུན་གྱི་ཏིང་ངེ་འཛིན་བརྙེས་པར་བཤད།ཚིག་གསལ་དུ།སློབ་དཔོན་ཐོགས་མེད་ས་གསུམ་པ་འོད་བྱེད་པ་བརྙེས་ཀྱང་དབྱིག་གཉེན་འདུལ་བའི་དོན་དུ་སེམས་ཙམ་དུ་བསྟན་པར་གསུངས།བཙུན་པ་ངོ་བོ་ཉིད་མེད་པས་ཆོས་མཆོག་ལ་གནས་པར་བཤད།དགུང་ལོ་བརྒྱར་ཟེར་ཡང་བརྒྱ་དང་ལྔ་བཅུ་བཞུགས་པར་ངེས་སོ།།
གཅུང་དབྱིག་གཉེན་ཐོག་མར་བྱེ་བྲག་སྨྲ་བ་ལ་ཞུགས་ནས་ཐེག་ཆེན་ལ་མི་མོས་པས་གཅེན་ལ་ཡང༌།ཀྱེ་མ་ཐོགས་མེད་ནགས་སུ་ལོ།།བཅུ་གཉིས་བར་དུ་ཏིང་འཛིན་བསྒྲུབས།།ཏིང་འཛིན་མ་གྲུབ་གླང་ཆེན་གྱི།།རྒྱབ་ཁལ་ལོངས་པའི་གྲུབ་མཐའ་བརྩམས།།ཞེས་སོགས་ཀྱལ་ཀ་བྱས་ཀྱང་ཕྱིས་སུ་ཐེག་ཆེན་ལ་དད་པར་གྱུར་ནས་གཅེན་ལས་བྱམས་ཆོས་སོགས་གསན་ཏེ།པྲ་ཀཱ་ར་ཎ་སྡེ་བརྒྱད་བརྩམས།དེ་ལྟར་བྱམས་ཆོས་ལྔ།ས་སྡེ་ལྔ།སྡོམ་རྣམ་གཉིས།པྲ་ཀཱ་ར་ཎ་སྡེ་བརྒྱད་རྣམས་ལ་བྱམས་པ་དང་འབྲེལ་བའི་ཆོས་ཉི་ཤུ་ཞེས་གྲགས་སོ།།
དབྱིག་གཉེན་ལ་སློབ་མ་རང་ལས་མཁས་པ་བཞི་བྱུང་སྟེ།ཚད་མ་རང་ལས་མཁས་པ་སློབ་དཔོན་ཕྱོགས་ཀྱི་གླང་པོ།འདུལ་བ་རང་ལས་མཁས་པ་ཡོན་ཏན་འོད།ཕར་ཕྱིན་རང་ལས་མཁས་པ་འཕགས་པ་གྲོལ་སྡེ།མངོན་པ་རང་ལས་མཁས་པ་བློ་གྲོས་བརྟན་པ་རྣམས་སོ།།དེ་ལྟར་ཐོགས་མེད་ཀྱིས་ཕྱེ་བའི་ཤིང་རྟའི་སྲོལ་འཛིན་པའི་རྗེས་འབྲང་རྣམས་ལ་སེམས་ཙམ་པའམ་རྣམ་རིག་པ་ཞེས་ཟེར་ཏེ།ཆོས་ཐམས་ཅད་སེམས་ཀྱི་བདག་ཉིད་ཙམ་དུ་སྨྲ་བས་ན་དེ་ལྟར་གྲགས་སོ།།དབྱེ་ན།དབང་ཤེས་ལ་རགས་པར་སྣང་བ་སྣང་བ་ལྟར་དུ་གྲུབ་པར་འདོད་པ་དང༌།དེ་ལྟར་མ་གྲུབ་པར་འདོད་པའི་དབང་གིས་སེམས་ཙམ་རྣམ་བདེན་པ་དང༌།རྣམ་རྫུན་པ་གཉིས་ཡོད་ལ།རྣམ་བདེན་པ་ལ།གཟུང་འཛིན་གྲངས་མཉམ་པ།སྒོ་ང་ཕྱེད་ཚལ་བ།སྣ་ཚོགས་གཉིས་མེད་པ་གསུམ་ཡོད་དོ།།འདི་གསུམ་གྱི་ཁྱད་པར་ལ་མཁས་པ་རྣམས་བཞེད་པ་མི་མཐུན་པས་འདིར་མ་བཀོད་ལ།རྣམ་རྫུན་པ་ལ།སེམས་ཀྱི་ངོ་བོ་མ་རིག་པའི་བག་ཆགས་ཀྱི་དྲི་མས་བསླད་པར་འདོད་པས་དྲི་བཅས་པ་དང༌།མ་བསླད་པར་འདོད་པས་དྲི་མེད་རྣམ་རྫུན་པ་གཉིས།ཡང་སེམས་ཙམ་པ་ལ་ལུང་གི་རྗེས་འབྲང་དང༌།རིགས་པའི་རྗེས་འབྲང་གཉིས་སུ་ཡང་འབྱེད་དེ།རིམ་པ་བཞིན་ས་སྡེ་ལྔའི་རྗེས་འབྲང་དང༌།ཚད་མ་སྡེ་བདུན་གྱི་རྗེས་འབྲང་རྣམས་སོ།།དེ་ལྟར་སློབ་དཔོན་ཀླུ་སྒྲུབ་དང་འཕགས་པ་ཐོགས་མེད་གཉིས་ཀྱིས་དབུ་སེམས་ཀྱི་ཤིང་རྟའི་སྲོལ་ཕྱེ་བ་ལ་བརྟེན་ནས་ཐེག་པ་ཆེན་པོའི་བསྟན་པ་དབྱར་དུས་ཀྱི་ཆུ་བོ་ལྟར་འཕེལ་ཞིང་རྒྱས་པར་གྱུར་ཏེ།མཁས་པ་དང་གྲུབ་པའི་དབང་ཕྱུག་བྱེ་བ་ཁྲག་ཁྲིག་རིམ་པར་བྱོན་ནས་སངས་རྒྱས་ཀྱི་བསྟན་པ་ཉི་མ་ལྟར་གསལ་བར་མཛད་པ་ཡིན་ནོ།།
རྩོམ་ཁུངས།   ཐུའུ་བཀྭན་གྲུབ་མཐའ།
 
 
བརྒྱུད་འགོད།