ལན། སྔར་གྱི་འདོད་པ་དེ་དག་ལས་འཕགས་པས་བཞེད་པ་ཉིད་རིགས་ཏེ། འཕགས་པས་མངོན་པ་མཛོད་ལྟར་འཆད་ཀྱིན་ཡོད་ལ་མངོན་པ་མཛོད་ལྟར་ན་དབང་བོ་རྟུལ་དང་རྣོན་པོ་དག །ཅེས་པའི་དངོས་བསྟན་ལ་འཕགས་པ་བརྒྱད་པ་དང་ཆགས་བྲལ་སྔོན་སོང་གི་ཞུགས་པ་དབང་བོ་རྣོ་རྟུལ་སོགས་འཇོག་གིན་ཡོད་པས་འཕགས་པས་ཀྱང་དེ་ལྟར་འཆད་པས་ན་འདོད་པ་དེ་དག་ལས་འཕགས་པའི་དགོངས་པ་ཉིད་རིགས་པའི་ཕྱིར་རོ། །དེར་ལྟར་འཆད་དེ། གསེར་ཕྲེང་ལས། གང་དཔེར་བྱེད་ཅེ་ན། འཕགས་པས་ནི་ཐོད་རྒལ་བ་དང་རིམ་གྱིས་པ་གཉིས་དང་མཚུངས་པར་བཤད་དེ། དེ་ཡང་དབང་བོ་རྣོ་རྟུལ་གཉིས་དང་དད་ཐོབ་གཉིས་ནི་ཐོད་རྒལ་བའི་ཞུགས་གནས་བཞི་དང་། ལྷག་མ་རྣམས་མཐར་གྱིས་པ་དང་སྦྱར་ཞིང་དེ་དག་ཀྱང་མཛོད་དང་མཐུན་པར་འཆད་དོ། །ཞེས་གསུངས། འདོད་པ་གཞན་རྣམས་ལ། བོད་སྔ་མ་ཁ་ཅིག་དང་། རྒྱན་སྣང་། གྲགས་ཆ། ཐུབ་དགོངས་དང་ཟླ་འོད། འབུམ་འགྲེལ་སོགས་ལྔ་འཇོག་ལ། འདོད་པ་དེ་དག་མི་རིགས་ཏེ། བོད་སྔ་མ་ཁ་ཅིག་གིས་འཕགས་པའི་ལུགས་ལ་འོག་མིན་འགྲོ་དང་སྲིད་རྩེར་འགྲོ་འཕར་གསུམ་སོགས་ལྔ་བོ་གོང་འཕོ་ཞེས་གཅིག་ཏུ་བགྲངས་ནས་དགེ་འདུན་ཉི་ཤུའི་ལྔ་བར་འཇོག་ཅེས་བཤད་པ་དེ་མི་འཐད་པ་དང་། ཨ་བྷའི་འདོད་པའང་མི་འཐད་དེ། གསེར་ཕྲེང་ལས། སྤྱིར་ཨ་བྷྱ་ཀ་ར་རང་ལ་ཡིད་བརྟན་ཐུབ་པ་མི་སྣང་སྟེ། ཟླ་འོད་ལས། ཞེས་པ་ནས། སྲིད་རྩེར་འགྲོ་ལ་གཟུགས་ཀྱི་ཆགས་བཅོམ་དང་མཐོང་ཆོས་ཞི་དང་ལུས་མངོན་བྱེད་གཉིས་གཅིག་ཏུ་བགྲངས་ནས་གཉིས་བྱེད་པར་མངོན་ལ་གཞན་རྣམས་སློབ་དཔོན་གྱི་འགྲེལ་ཆུང་འདི་ཇི་བཞིན་དུ་བཤད་པའི་ཕྱིར་རོ། །ཞེས་གསུངས། 

རྒྱན་སྣང་དང་འགྲེལ་ཆུང་གཉིས་ཀྱིས་དགོངས་པའང་མངོན་པ་མཛོད་ལྟར་ན་མི་རིགས་ཏེ། རྒྱན་སྣང་དང་འགྲེལ་ཆུང་དུ། དབང་བོ་རྟུལ་དང་རྣོན་པོ་དག་ཅེས་པས་དངོས་བསྟན་ལ་འཕགས་པ་བརྒྱད་པ་དབང་བོ་རྣོ་རྟུལ་གཉིས་སུ་དང་རྒྱུན་ཞུགས་འབྲས་གནས་སོགས་བསྟན་པར་བཞེད་པ་ལས་དེའི་དངོས་བསྟན་ལ་ཐོད་རྒལ་བ་ཡོད་པར་མི་བཞེད་དོ། །མི་བཞེད་དེ། གསེར་ཕྲེང་ལས། སློབ་དཔོན་གྱིས་ནི་རྒྱན་སྣང་དུ་ཐམས་ཅད་ཀྱང་མཐར་གྱིས་པ་དང་མཚུངས་པར་བཤད་ཅིང་གཙོ་བོར་ཀུན་ལས་བཏུས་དང་མཐུན་པར་འཆད་དོ། །ཞེས་གསུངས། གསེར་ཕྲེང་ལས། མི་རིགས་ཏེ། ཕྱིར་འོང་དད་ཐོབ་ཁྱད་པར་ཅན་ཕྱིར་མི་འོང་ཞུགས་པ་ཡིན་ཀྱང་དེའི་ཕྱིར་འོང་ཞུགས་པར་འགལ་བས་སོ། །ཞེས་པའི་རྩོད་པ་ནི། གསེར་ཕྲེང་ལས། གལ་ཏེ་དད་ཐོབ་འབྲས་བུ་བར་བ་གཉིས་ལ་ཞུགས་པ་དེ་ཆགས་བྲལ་སྔོན་སོང་དུ་འགལ་ཡང་མཐར་གྱིས་པའི་ཞུགས་པའོ།། ཞེ་ན། ཞེས་པ་དེ་ཡིན་ལ། རྩོད་པ་དེའི་དོན་ནི། དད་ཐོབ་ཅེས་པའི་བརྡ་དེ་ཆགས་བྲལ་སྔོན་སོང་གི་ཞུགས་པ་བར་བ་གཉིས་ལ་སྦྱར་ན་འགལ་ཡང་། དད་ཐོབ་ཅེས་པའི་བརྡ་དེ་འབྲས་བུ་རིམ་གྱིས་པའི་ཞུགས་པ་བར་ལ་གཉིས་ལ་སྦྱར་ན་མི་འགལ་ཞེ་ན། 

རྩོད་ལན་ནི།  མི་རིགས་ཏེ། འདོད་པའི་ཉོན་མོངས་བརྒྱད་པ་དང་དགུ་བ་ཆགས་བྲལ་གྱིས་སྤངས་པའི་འབྲས་བུ་རིམ་གྱིས་པའི་ཕྱིར་འོང་དད་ཐོབ་ཁྱད་པར་ཅན་དེ་འབྲས་བུ་རིམ་གྱིས་པའི་ཕྱིར་མི་འོང་ཞུགས་པ་ཡིན་ཀྱང་འབྲས་བུ་རིམ་གྱིས་པའི་ཕྱིར་འོང་ཞུགས་པ་མིན་པའམ་དེ་ཡིན་པར་འགལ་བས་སོ། །ཞེས་པའི་དོན་ནོ། །འགལ་བར་ཐལ། འབྲས་བུ་རིམ་གྱིས་པའི་ཕྱིར་འོང་ཞུགས་པ་ཡིན་ན་འདོད་པའི་ཉོན་མོངས་བདུན་པ་དང་བརྒྱད་པ་ཕར་ཞོག་དྲུག་པ་ཆགས་བྲལ་གྱིས་མ་སྤངས་པས་ཁྱབ་པའི་ཕྱིར། ཁྱབ་སྟེ། གསེར་ཕྲེང་གི་རྩོད་པ་འདིའི་གོང་དུ། རང་ལུགས་ལ་འདོད་པའི་ཉོན་མོངས་བདུན་པ་དང་བརྒྱད་པ་དགུ་བར་ཆགས་བྲལ་བྱས་ན་འབྲས་གནས་ཐོབ་པའི་ཚེ་དད་ཐོབ་ཅེས་པའི་མིང་ངམ་བརྡ་འཐོབ་བོ། །ཞེས་གསུངས་སོ། །ཡང་ན་ཆགས་བྲལ་སྔོན་སོང་གི་ཕྱིར་འོང་ཞུགས་པ་ལ་མཐོང་ལམ་གྱི་སྔོན་དུ་འདོད་ཉོན་དྲུག་པ་ནས་བརྒྱད་པའི་བར་ཆགས་བྲལ་བྱས་པ་ཡོད་ཀྱང་འབྲས་བུ་རིམ་གྱིས་པའི་ཕྱིར་འོང་ཞུགས་པ་ལ་མཐོང་ལམ་གྱི་སྔོན་དུ་དེ་དག་ལ་ཆགས་བྲལ་བྱས་པ་མེད་དོ། །

 རྩོམ་སྒྲིག་པ།ཤེས་རབ་རལ་གྲི།

གསལ་འདེབས།

རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།

དྲ་བའི་སྦྲེལ་ཐགhttp://www.tb1025.cn