གཉིས་པ་མཐོང་ལམ་རྩེ་སྦྱོར་ལ། སྤང་བྱ་རྟོག་པ་བཤད་པ་དང། གཉེན་པོ་རྩེ་སྦྱོར་བཤད་པ་གཉིས། དང་པོ་ལ། གཟུང་འཛིན་གྱི་རྣམ་རྟོག་མདོར་བསྟན་རྒྱས་བཤད་གཉིས་ལས། དང་པོ་འཇུག་ལྡོག་གི་གཟུང་རྟོག་གཉིས་སྟོན་པར། འཇུག་པ་དང་ནི་ལྡོག་པ་ལ། །སོགས་བྱུང། གཉིས་པ་རྫས་བཏགས་ཀྱི་འཛིན་རྟོག་གཉིས་སྟོན་པར། སོ་སོ་སྐྱེ་བོ་འཕགས་དབྱེ་བས། །སོགས་བྱུང། གཉིས་པ་རྒྱས་བཤད་ལ། གཟུང་རྟོག་དང་འཛིན་རྟོག་གཉིས་ལས། དང་པོ་འཇུག་པ་གཟུང་རྟོག་དགུ་སྟོན་པར། ངོ་བོ་ཉིད་དང་རིགས་དང་ནི། །སོགས་བྱུང། ལྡོག་པ་གཟུང་རྟོག་དགུ་སྟོན་པར། སྲིད་དང་ཞི་བར་ལྟུང་བའི་ཕྱིར། །སོགས་བྱུང། གཉིས་པ་འཛིན་རྟོག་གི་རྫས་འཛིན་དགུ་སྟོན་པར། འཛིན་པ་དང་ནི་འདོར་བ་དང། །སོགས་བྱུང། བཏགས་འཛིན་དགུ་སྟོན་པར། ཆེད་བཞིན་ངེས་པར་མི་འབྱུང་དང། །སོགས་བྱུང། འདི་ལ་འཕྲོས་དང། མཐའ་དཔྱད་པ་གཉིས། དང་པོ་ནི། མདོ་ལས། རབ་འབྱོར་འདི་ཇི་སྙམ་དུ་སེམས། སྒྱུ་མ་ལྟ་བུའི་སེམས་དེ་ཁྱོད་ཀྱིས་ཡང་དག་པར་མཐོང་བས། ནས། ཤིང་གི་འཕྲུུལ་འཁོར་གྱི་དཔེ་གསུངས་པའི་བར་གྱིས་འཇུག་ལྡོག་ཤུགས་ལ་བཤད་པ་དངོས་སུ་སྟོན་པར། ངོ་བོ་ཉིད། སོགས་བྱུང། མདོ་ལས། རབ་འབྱོར་འདི་ལྟ་སྟེ། དཔེར་ན་འཁོར་ལོས་སྒྱུར་བའི་རྒྱལ་པོ། ཞེས་པ་ནས། དཔུང་གི་ཚོགས་ཡན་ལག་བཞི་དང་ལྡན་པའི་སྔོན་དུ་འདོང་ངོ་། །ཞེས་སོགས་ཀྱིས་ལྡོག་པ་གཟུང་རྟོག་ཤུགས་ལ་བཤད་པ་དངོས་སུ་སྟོན་པར། སྲིད་དང་ཞི་བར། སོགས་བྱུང། མདོ་ལས། བཅོམ་ལྡན་འདས་ཤེར་ཕྱིན་ནི་ཆོས་གང་ཡང་འཛིན་པ་དང་གཏོང་བར་མི་བགྱིད་ལགས་སོ། །ནས། འདི་ནི་གཟུགས་སོ་འདིའི་གཟུགས་སོ་ཞེས་མངོན་པར་ཆགས་པ་མེད་དོ། །ཞེས་སོགས་ཀྱིས་ཤེས་སྒྲིབ་རྫས་འཛིན་རྟོག་པ་ཤུགས་ལ་བསྟན་པ་དངོས་སུ་སྟོན་པར། འཛིན་པ་དང་ནི་འདོར་བ་དང། །སོགས་བྱུང། མདོ་ལས། རབ་འབྱོར་འདི་ལྟ་སྟེ། འཁོར་ལོས་སྒྱུར་བའི་རྒྱལ་པོ་ནི་རྟ་ཟུང་བཞིའི་ཤིང་རྟ་ལ་ཞོན་ཅིང་ལམ་གཉའ་ནས་འགྲོའོ། །ནས། དགྲ་དང་ཕྱིར་རྒོལ་བ་རྣམས་ཀྱིས་ཐུབ་པར་དཀའོ། །ཞེས་སོགས་ཀྱིས་ཤེས་སྒྲིབ་བཏགས་འཛིན་ཤུགས་ལ་བཤད་པ་དངོས་སུ་སྟོན་པར། ཆེད་བཞིན་ངེས་པར་མི་འབྱུང་དང། །སོགས་བྱུང།

    མཐའ་དཔྱད་པ་ལ་ཁ་ཅིག་ན་རེ། མདོ་དང་བསྟན་བཅོས་གཉིས་ཀྱི་བཤད་ཚུལ་འདྲ་ཟེར་ན། འོ་ན། མདོ་ལས་ཡུལ་དགུ་བཞི་སོ་དྲུག་བདེན་མེད་དུ་དངོས་སུ་བསྟན་པ་མ་ཡིན་པར་ཐལ། བསྟན་བཅོས་ཀྱིས་བདེན་འཛིན་སོ་དྲུག་དངོས་སུ་བསྟན་པའི་ཕྱིར། ཁྱབ་སྟེ། དེ་ལྟ་ན་བདེན་འཛིན་སོ་དྲུག་དང་ཞེན་ཡུལ་བདེན་གྲུབ་སོ་དྲུག་དངོས་སུ་བསྟན་པ་དེ་ཡིན་པའི་ཕྱིར། རྩ་བར་འདོད་མི་ནུས་ཏེ། དངོས་སུ་གཉེན་པོ་རྟོགས་པའི་ཤེར་ཕྱིན་བསྟན་ནས་ཤུགས་ལ་གཟུང་འཛིན་གྱི་རྟོག་པ་སོ་དྲུག་བཤད་པའི་ཕྱིར། དཔེར་ན། ཤེས་སྒྲིབ་རྫས་འཛིན་དགུ་བཞིན་ནོ། །གསེར་འཕྲེང་ལས། ཡུམ་ནི་རྣམ་པར་མི་རྟོག་པའོ། །ཞེས་སོགས་ཏེ། གཉེན་པོའི་སྒོ་ནས་བསྟན་ཏོ། །ཞེས་དང། དེའི་ཤུགས་ཀྱིས་གཉེན་པོ་དགུ་ལས་བཟློག་པའི་ཆོས་དགུ་རྫས་འཛིན་གྱི་ཡུལ་དུ་བསྟན་བཅོས་ལས་སོ། །ཞེས་གསུངས་པའི་ཕྱིར། ཁྱབ་སྟེ། རྫས་འཛིན་གྱི་ཡུལ་དུ་ཞེས་པ་དང་གཉེན་པོའི་སྒོ་ནས་ཞེས་པ་གཉིས་ཀྱི་དོན་གྲུབ་པའི་ཕྱིར། ཁ་ཅིག་ན་རེ། རྫས་འཛིན་སོ་སྐྱེའི་རྟེན་ཅན་དུ་བཤད་ནས་བཏགས་འཛིན་སོ་སྐྱེའི་རྟེན་ཅན་དུ་མ་བཤད་པ་མི་འཐད་པར་ཐལ། སོ་སོ་སྐྱེ་བོ་ལ་ཡང་བཏགས་འཛིན་རྟོག་པ་ཡོད་པའི་ཕྱིར་ན་མ་ཁྱབ། རྟགས་གྲུབ་སྟེ། སོ་སོ་སྐྱེ་བོ་ལ་ཡང་གང་ཟག་བདེན་སྟོང་སྒྱུ་མ་ལྟ་བུ་ལ་སྐྱེས་བུར་བཏགས་པའི་འཛིན་པ་ལ་དམིགས་ནས་ལོངས་སྤྱོད་པ་པོར་བདེན་པར་འཛིན་པ་ཡོད་པའི་ཕྱིར། དེར་ཐལ། དེ་ལ་གང་ཟག་བདེན་མེད་དུ་རྟོགས་པ་ཡོད་པའི་ཕྱིར། འགྲེལ་ཆེན་ལས། སོ་སོའི་སྐྱེ་བོ་རྣམས་ཀྱིས་ཀྱང་ཆོས་ཐམས་ཅད་བདག་མེད་པའོ་ཞེས་ཤེས་པ་མ་ཡིན་ནམ་འཛིན་པའི་རྣམ་པར་རྟོག་པར་བཞག་པ་དང་པོ་ནི་མ་ཁྱབ་པ་ཡིན་ནོ་ཞེ་ན། ཞེས་གསུངས་པའི་ཕྱིར། རྩ་བར་འདོད་མི་ནུས་ཏེ། སོ་སྐྱེས་གང་ཟག་གི་བདག་མེད་རྟོགས་པ་ཡོད་ཀྱང་མངོན་སུམ་དུ་རྟོགས་པ་མེད་པས་རྫས་འཛིན་སོ་སྐྱེའི་རྟེན་ཅན་དང། འཕགས་པ་ལ་དེ་མངོན་སུམ་དུ་རྟོགས་པ་ཡོད་པས་བཏགས་འཛིན་འཕགས་པའི་རྟེན་ཅན་དུ་བཤད་པའི་ཕྱིར། དང་པོ་གྲུབ་སྟེ། འགྲེལ་ཆེན་ལས། དེ་རྣམས་ཀྱི་དེ་ནི་ལྷག་པར་མོས་པའི་ཡིད་ལ་བྱེད་པ་ཡིན་པས་འདིར་ནི་དེ་ཁོ་ན་ཉིད་ཡིད་ལ་བྱེད་པ་ཡིན་པར་བཞེད་པས་མི་མཚུངས་སོ། །ཞེས་གསུངས་པའི་ཕྱིར། གཉིས་པ་གྲུབ་སྟེ། འགྲེལ་ཆེན་ལས། འཕགས་པ་རྣམས་དེ་སྐད་དུ་གསུངས་པ་ནི་ཐ་སྙད་པ་ཡིན་གྱི་དོན་དམ་པ་མ་ཡིན་པས་ཡང་དག་པ་མ་ཡིན་ནོ། །ཞེས་གསུངས་པའི་ཕྱིར། འདི་སྔར་རྒྱས་པར་བཤད་ཟིན་ཏོ། །ཡང་སྐབས་འདིའི་དོན་ལ་སྦྱར་ན་སྐྱེས་བུ་ལོངས་སྤྱོད་པ་པོར་བདེན་པར་འཛིན་པའི་རྫས་འཛིན་སོ་སྐྱེའི་རྟེན་ཅན་ཡིན་པར་ཐལ། དེ་དག་གིས་དེ་མ་སྤངས་ཤིང་འཕགས་པ་དག་གི་རྒྱུད་ལ་མི་ལྡན་པའི་ཕྱིར། དེར་ཐལ། མཐོང་སྤང་གི་སྐབས་ཀྱི་དེ་ཡིན་པའི་ཕྱིར། ཤནྟི་པས། མཐོང་བའི་སྤང་བར་བྱ་བའི་སྐབས་ཡིན་པའི་ཕྱིར། ཞེས་གསུངས་པའི་ཕྱིར། ཡང་ཁ་ཅིག །མཐོང་ལམ་རྩེ་སྦྱོར་དང་བཟོད་པ་བརྒྱད་ལས་མེད་ཟེར་ན། གཟུང་འཛིན་གྱི་རྟོག་པ་སོ་དྲུག་པོ་ཁམས་ཀྱི་ཕྱེ་ན་བརྒྱ་རྩ་བརྒྱད་ཡོད་པ་ལྟར་མཐོང་ལམ་རྩེ་སྦྱོར་དང་བཟོད་པ་བརྒྱ་རྩ་བརྒྱད་མི་རུང་བར་ཐལ། དམ་བཅའ་དེའི་ཕྱིར། འདོད་མི་ནུས་ཏེ། མཐོང་སྤང་གཟུང་བ་དང་འཛིན་པའི་རྣམ་རྟོག་གིས་དབྱེ་བ་ལྟར་མཐོང་ལམ་རྩེ་སྦྱོར་དང་བར་ཆད་མེད་ལམ་ལྡོག་པས་དབྱེར་ཡོད་པའི་ཕྱིར། གསེར་འཕྲེང་ལས། སྐད་ཅིག་གཅིག་པའི་བཟོད་པ་ཡིས་བསྡུས་པ་དེ་རྩེ་སྦྱོར་འདིར་མཐོང་ལམ་ཡིན་ཏེ། ཞེས་དང། ཡང་དེ་ཉིད་ལས། མཐོང་ལམ་རྩེ་མོ་དེ་རྫོགས་པར་སྐྱེས་པ་ནས་མཐོང་སྤང་གི་གཟུང་བ་དང་འཛིན་པའི་རྣམ་པར་རྟོག་པ་བརྒྱ་རྩ་བརྒྱད་སྤངས་པས། ཞེས་གསུངས་པའི་ཕྱིར། ཡང་ཁ་ཅིག་ན་རེ། སོ་སོའི་སྐྱེ་བོའི་བདག་རྫས་ཡོད་དུ་འཛིན་པའི་བློ་རྫས་འཛིན་དང་སོ་སྐྱེ་ཁོ་ནར་ཡོད། འཕགས་པའི་བདག་བཏགས་ཡོད་དུ་འཛིན་པའི་བློ་བཏགས་འཛིན་དང་འཕགས་པ་ཁོ་ནར་ཡོད་ཅིང། དེ་གཉིས་ཤེས་སྒྲིབ་འཛིན་རྟོག་གཉིས་ཀྱི་ཡུལ་ཡིན་ཞིང། འཛིན་རྟོག་གཉིས་སྐྱེ་འཕགས་གཉིས་ཀར་ཡོད་ཟེར་བ་མི་འཐད་པར་ཐལ། རྩ་བ་དང་འགྲེལ་པ་ཉི་སྣང་སོགས་ལས་སེམས་ཅན་རྫས་ཡོད་དང་བཏགས་ཡོད་དུ་འཛིན་པ་འཛིན་རྟོག་གཉིས་སུ་གསུངས་ཤིང་འཛིན་པ་གཉིས་དང་ཡུལ་དང་ཡུལ་ཅན་དུ་མ་བཤད་པའི་ཕྱིར། རྩ་བར། སོ་སོའི་སྐྱེ་བོ་འཕགས་དབྱེ་བས། །སེམས་ཅན་རྫས་དང་བཏགས་ཡོད་པར། །རྣམ་རྟོག་འཛིན་པ་དག་ཏུ་འདོད། །ཅེས་དང། འགྲེལ་པ་ལས། སོ་སོའི་སྐྱེ་བོ་དང་འཕགས་པའི་གང་ཟག་དག་གོ་རིམ་བཞིན་དུ་སྐྱེས་བུ་རྫས་དང་བཏགས་པར་ཡོད་པའི་རྟེན་ཅན་གྱི་འཛིན་པ་དག་ཡོད་པས། ཞེས་གསུངས་པའི་ཕྱིར། ཁྱབ་སྟེ། རྩ་བར་སེམས་ཅན་ཞེས་དང། འགྲེལ་པ་ལས་སྐྱེས་བུ་ཞེས་འཛིན་རྟོག་གི་ཡུལ་གསལ་བར་བཤད་པའི་ཕྱིར། གསེར་འཕྲེང་ལས། དེ་ནི་ཆེས་མི་འཐད་དེ། རྩོད་པའི་སྐབས་སུ་རྟོག་པ་དང་པོ་དང་གཉིས་པའི་རྣམ་བཞག་མ་ཁྱབ་བོ་ཞེས་རྟོག་པ་གཉིས་ལ་བརྩད་ཅིང། ཞེས་གསུངས་པའི་ཕྱིར། འགྲེལ་བཤད་ཚིག་གསལ་ལས། སོ་སྐྱེ་ཡུལ་དུ་བྱས་ནས་རྫས་ཡོད་དུ་འཛིན་པ་དང་འཕགས་པ་ཡུལ་དུ་བྱས་ནས་བཏགས་ཡོད་དུ་འཛིན་པ། ཞེས་བཤད་པ་དེ་ཡང་མི་འཐད་པར་ཐལ། འཕགས་སེང་གཉིས་ཀ་དང་མི་མཐུན་པའི་ཕྱིར། ཉི་སྣང་ལས། དེ་ལ་སོ་སོ་སྐྱེ་བོའི་རྣམ་པར་རྟོག་པ་དང་པོ་སྐྱེས་བུ་རྫས་སུ་ཡོད་པ་ལ་བརྟེན་པ་ནི། ཞེས་དང། དེ་ཉིད་ལས། གཉིས་པ་འཕགས་པའི་གང་ཟག་འཛིན་པའི་རྣམ་པར་རྟོག་པ་སྐྱེས་བུ་བཏགས་པར་ཡོད་པ་ལ་བརྟེན་པ་ནི། ཞེས་གསུངས་པའི་ཕྱིར། ཁྱབ་སྟེ། དེས་དེ་གཉིས་རྟེན་དུ་བཤད་ཀྱི་ཡུལ་དུ་མ་བཤད་པའི་ཕྱིར། འགྲེལ་ཆེན་ལས་ཀྱང། སོ་སོ་སྐྱེ་བོ་དང་འཕགས་པའི་གང་ཟག་དག་ལ་གོ་རིམ་བཞིན་དུ་སྐྱེས་བུ་རྫས་དང་བཏགས་པར་ཡོད་པའི་རྟེན་ཅན་གྱི་འཛིན་པའི་རྣམ་རྟོག་གཉིས་ཡོད་པས། ཞེས་གསུངས་པའི་ཕྱིར། སྤང་བྱ་རྟོག་པའི་དཀའ་གནས་བཤད་ཅིང་རྒྱས་པར་སྔར་བཀྲོལ་ཟིན་ཏོ། །

    གཉིས་པ་གཉེན་པོ་མཐོང་ལམ་རྩེ་སྦྱོར་ལ་འབྲས་བུ་བྱང་ཆེན་དང། མཐོང་ལམ་གྱི་ངོ་བོ་གཉིས། དང་པོ་སྟོན་པར། དྲི་མ་ཟད་དང་མི་སྐྱེ་བའི། །སོགས་བྱུང། འདི་ལ་འཕྲོས་ནི། མདོ་ལས། ཀུན་དགའ་བོ་ཡུམ་ནི་ཟད་པར་བྱ་བར་སེམས་པ་དེ་ནི་ནམ་མཁའ་ཟད་པར་འདོད་དུ་ཟད་དོ། །ཡུམ་ནི་མ་ཟད་མི་ཟད་ཟད་པར་མི་འགྱུར་རོ། །ནས། རྣམ་མཁྱེན་བར་ལ་གསུངས་ཤིང། ཆོས་དེ་དག་ལ་ནི་སྐྱེ་བ་ཡང་མེད་ན་དེ་དག་ཟད་པར་འགྱུར་བ་ལྟ་ག་ལ་ཡོད། ཅེས་པའི་དོན་བཤད་པར་འདི་བྱུང། །མཐའ་དཔྱད་པ་ལ་ཁ་ཅིག་ན་རེ། སྒྲིབ་གཉིས་ཀྱི་དྲི་མ་ཟད་སྐྱེ་བདེན་པར་མེད་པར་མངོན་སུམ་དུ་རྟོགས་པའི་མཐར་ཐུག་གི་ཡེ་ཤེས་དེ། བྱང་ཆུབ་ཆེན་པོའི་མཚན་ཉིད་ཟེར་ན། འོ་ན། སྐུ་བཞི་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། དེར་ཐལ། བྱང་ཆུབ་ཆེན་པོ་ལ་སྐུ་བཞི་ཡོད་པའི་ཕྱིར། འགྲེལ་པ་ལས། ཆོས་ཀྱི་སྐུ་ལ་སོགས་པ་ཇི་ལྟ་བ་བཞིན་གྱི་བདག་ཉིད་བྱང་ཆུབ་ཆེན་པོ་ཡིན་པར་བརྗོད་དོ། །ཞེས་གསུངས་པའི་ཕྱིར། བྱས་པ་ལ་ཁོ་ན་རེ། བྱང་ཆུབ་ཆེན་པོ་ལ་སྐུ་བཞི་ཡོད་པ་མི་འཐད་པར་ཐལ། འདིའི་ཐད་ཀྱི་འགྲེལ་ཆེན་ལས། ཆོས་ཀྱི་སྐུ་ཤེས་རབ་ཀྱི་ཕ་རོལ་ཏུ་ཕྱིན་པ་ཇི་ལྟ་བ་བཞིན་གྱི་བདག་ཉིད་བྱང་ཆུབ་ཆེན་པོ་ཡིན་པར་བརྗོད། ཅེས་སོགས་སྒྲ་མི་འབྱུང་བའི་ཕྱིར་ན་མ་ཁྱབ། འོ་ན། བྱེད་མཚན་བཅུ་གཅིག་དང་བསལ་བྱ་ལོག་སྒྲུབ་བཅུ་དྲུག་གྲངས་འདྲེན་ཚུལ་འགྲེལ་ཆེན་དང་འགྲེལ་པ་འདི་གཉིས་མཐུན་པར་ཐལ། ཁྱོད་ཀྱི་དེ་སྒྲུབ་བྱེད་ཡིན་པའི་ཕྱིར། འདོད་མི་ནུས་ཏེ། དེ་དག་འགྲེལ་ཆེན་དང་འགྲེལ་པ་མི་མཐུན་པ་མངོན་སུམ་གྱིས་གྲུབ་པའི་ཕྱིར། གཞན་ཡང། མཚན་ཉིད་དེ་ཆོས་ཅན། བྱང་ཆུབ་ཆེན་པོ་ཁས་ལེན་མཁན་ཡིན་ན། ཁྱོད་ཁས་ལེན་པས་ཁྱབ་པར་ཐལ། ཁྱོད་དེའི་མཚན་ཉིད་ཡིན་པའི་ཕྱིར། འདོད་ན། སེམས་ཙམ་པས་དེ་ཁས་ལེན་པར་ཐལ་ལོ། །འདོད་པའི་ཕྱིར། འདོད་མི་ནུས་ཏེ། དེས་དྲི་མ་ཟད་སྐྱེ་གཉིས་བདེན་གྲུབ་ཏུ་འདོད་པའི་ཕྱིར། དེར་ཐལ། དེས་དངོས་པོ་བདེན་གྲུབ་ཏུ་འདོད་པའི་ཕྱིར། གཞན་ཡང། ཐེག་ཆེན་གྱི་མཐོང་ལམ་ཆོས་བཟོད་ཆོས་ཅན། མཚན་ཉིད་དེར་ཐལ། བྱང་ཆུབ་ཆེན་པོ་ཡིན་པའི་ཕྱིར། རྟགས་གྲུབ་སྟེ། གནས་སྐབས་ཀྱི་བྱང་ཆུབ་ཆེན་པོ་ཡིན་པའི་ཕྱིར། དེར་ཐལ། ཐེག་ཆེན་གྱི་སྦྱོར་ལམ་ཆོས་མཆོག་ཐ་མའི་ཡེ་ཤེས་དེ་རང་འབྲས་བྱང་ཆེན་དངོས་སུ་འབྱིན་བྱེད་ཡིན་པའི་ཕྱིར། དེར་ཐལ། ཚོགས་སྒྲུབ་ཡིན་པའི་ཕྱིར། ཡང་ཁ་ཅིག་ན་རེ། དེའི་ཐད་ཀྱི་པཎ་ཆེན་འབུམ་ཕྲག་གསུམ་པའི་རྒྱ་དཔེ་ལ་སོགས་སྒྲ་མེད་པས་སོགས་སྒྲ་མི་འཐད་ཟེར་ན། དེ་སྒྲུབ་བྱེད་དུ་མི་རུང་བར་ཐལ། རྒྱ་དཔེ་དེ་མ་དག་པར་མངོན་པར་ཕྱིར། དེར་ཐལ། འགྲེལ་པར་སོགས་སྒྲ་ཡོད་པའི་ཕྱིར། དེར་ཐལ། འགྲེལ་བཤད་གཉིས་ཀར་སོགས་སྒྲའི་བཤད་པ་མཛད་པའི་ཕྱིར། ཚིག་གསལ་ལས། ཆོས་ཀྱི་སྐུ་ལ་སོགས་པ་ཞེས་བྱ་བས་ནི་སྐུ་བཞི་ཆར་གཟུང་སྟེ། ཞེས་དང། གསེར་འཕྲེང་ལས། ཚིག་གསལ་ལས་སྐུ་ལྷག་མ་སོགས་ཁོང་ནས་བཏོན་ཞིང་རྟོགས་དཀར་ཡང་སོགས་སྒྲ་ཡོད་པས་སོ། །ཞེས་གསུངས་པའི་ཕྱིར། ཡང་ཁ་ཅིག་ན་རེ། གནས་སྐབས་ཀྱི་བྱང་ཆུབ་མེད་ཟེར་ན། འོ་ན། རྣམ་བཤད་ལས། མཐའི་བྱང་ཆེན་གྱི་རྒྱུ་ཡང་སྟོན་པ་ཡིན་མོད་ཀྱི། གནས་སྐབས་ཀྱི་བྱང་ཆུབ་ཆེན་པོ་མཐོང་ལམ་རྩེ་སྦྱོར་གྱི་རྒྱུ་སྟོན་པ་ལ་ངེས་པར་སྦྱར་བར་བྱ་བ་ཁོ་ནའོ། །ཞེས་གསུངས་པ་མི་འཐད་པར་ཐལ། རྩ་བར། དེ་ཡི་རྒྱུ་ནི་ཡོངས་གཏོད་དང། །ཞེས་པའི་བྱང་ཆུབ་ཆེན་པོ་དེ་ལ་གནས་སྐབས་དང་མཐར་ཐུག་གི་བྱང་ཆེན་གཉིས་མེད་པའི་ཕྱིར། དེར་ཐལ། གནས་སྐབས་ཀྱི་བྱང་ཆུབ་ཆེན་པོ་མེད་པའི་ཕྱིར། ཁྱབ་སྟེ། དེ་ཞེས་པས་གནས་སྐབས་དང་མཐར་ཐུག་གི་བྱང་ཆེན་བསྟན་ཅིང། རྒྱུ་ནི་ཡོངས་གཏོད་ཅེས་པས་བྱང་ཆུབ་ཆེན་པོ་དེ་གཉིས་ཀྱི་རྒྱུར་གཞུང་ཤེར་ཕྱིན་མི་ཉམས་པར་གཏོད་ཚུལ་བཤད་པའི་ཕྱིར། མདོ་ལས། ཀུན་དགའ་བོ་དེ་བས་ན་ཤེར་ཕྱིན་ཟབ་མོ་འདི་ཁྱོད་ལ་གཏད་ཀྱིས། ཞེས་གསུངས་པའི་ཕྱིར།

    རང་ལུགས་ལ། དྲི་མ་ཟད་སྐྱེ་བདེན་མེད་དུ་མངོན་སུམ་དུ་རྟོགས་པའི་ཡེ་ཤེས་མཐར་ཐུག་དེ། འདིར་བསྟན་བྱང་ཆུབ་ཆེན་པོའི་མཚན་ཉིད། སྤྱིར་བྱང་ཆུབ་ཆེན་པོ་ལ་སྐུ་གསུམ་ཡོད། རྩོད་སྤོང་ལ་ཁོ་ན་རེ། གནས་སྐབས་ཀྱི་བྱང་ཆེན་དེ་འདིར་བསྟན་བྱང་ཆུབ་ཡིན་པར་ཐལ། དེ་བསྟན་པའི་ཕྱིར་ན་མ་ཁྱབ། རྟགས་གྲུབ་སྟེ། སྔར་བསྒྲུབས་ཟིན་དེའི་ཕྱིར།

    གཉིས་པ་ལ་དངོས་སྨྲའི་ཁས་ལེན་རིགས་པས་བཀག་པར་མ་ཟད་ནང་འགལ་སྟོན་པར། གཞན་གྱི་ཆོས་རྣམས་ཀྱང་ཡོད་ལ། །ཞེས་སོགས་དང། འགྲེལ་པར། དེ་ཡང་སྐྱེ་བ་དང་འཇིག་པས་སྟོང་པའི་ཕྱིར་ཞེས་སོགས་ཀྱི་མཐའ་དཔྱད་པ་ལ་གསུམ། དང་པོ་ལ་ཁ་ཅིག་ན་རེ། རྣལ་འབྱོར་གྱི་ས་འདི་དག་གི་དང་པོ་གཉིས་ཉན་ཐོས་སྡེ་པ་དང་སེམས་ཙམ་པ་ཁོ་ནར་སྦྱོར་བ་མི་འཐད་པར་ཐལ། དེ་དག་གི་ཐུན་མོང་མ་ཡིན་པའི་དོན་རྣམས་སྐབས་འདིར་དགག་བྱ་ཡིན་པའི་ཕྱིར། དེར་ཐལ། དེ་དག་གི་དོན་དམ་པར་འདོད་པ་འདི་དག་གིས་ཀུན་རྫོབ་ཏུ་འདོད་པའི་ཕྱིར། བདེན་གཉིས་ལས། གཞན་གྱིས་དོན་དམ་བྱས་གང་ཡིན། །དེ་ནི་གཞན་གྱིས་ཀུན་རྫོབ་འདོད། །ཅེས་གསུངས་པའི་ཕྱིར། ཡང་ཁ་ཅིག་ན་རེ། རྣལ་འབྱོར་གྱི་ས་བཞིར་བྱས་ནས་གཉིས་པ་རང་སངས་རྒྱས་ཀྱི་ལྟ་བ་དང་མཐུན། གསུམ་པ་སེམས་ཙམ་པའི་ལྟ་བ་དང་མཐུན་པའི་རྣལ་འབྱོར་གྱི་ས་བསྟན་ཟེར་བ་མི་འཐད་པར་ཐལ། རང་རྒྱལ་དང་སེམས་ཙམ་པའི་ལྟ་བ་མཐུན་པར་བཤད་ཟིན་པས་འདི་ཡང་ཁེགས་པའི་ཕྱིར། ཡང་ཁ་ཅིག་ན་རེ། གཉིས་པས་ཕྱི་རོལ་དོན་ལ་ལྟོས་པའི་གཟུང་འཛིན་རྫས་གཞན་གྱིས་སྟོང་པར་རྟོགས་པའི་རྣལ་འབྱོར་གྱི་ས་བསྟན། གསུམ་པས་ནང་ཤེས་པ་ལ་ལྟོས་པའི་གཟུང་འཛིན་རྫས་གཞན་གྱིས་སྟོང་པ་རྟོགས་པའི་རྣལ་འབྱོར་གྱི་ས་བསྟན་ཟེར་བ་ཡང་མ་བརྟག་ཉམས་དགའ་བ་ཙམ་ལས་དོན་མི་འཐད་པར་ཐལ། རྣལ་འབྱོར་གྱི་ས་གཉིས་པར་ལྷན་ཅིག་དམིགས་ངེས་ཀྱི་རྟགས་ཀྱིས་ལྟ་བ་བསྟན་པའི་ཕྱིར། ཁྱབ་སྟེ། དེ་ལས་ལྷག་པའི་ལྟ་བ་སེམས་ཙམ་པ་སུས་ཀྱང་ཁས་མ་བླངས་པའི་ཕྱིར། གཞན་ཡང་རྣལ་འབྱོར་གྱི་ས་བཞིར་བྱེད་པ་ཡང་ཤིན་ཏུ་མི་འཐད་པར་ཐལ། སྔོན་པོ་སྔོ་སྣང་ཤེས་པ་ལས་རྫས་གཞན་ཡིན་པ་ཁེགས་ནས། སྔོ་སྣང་ཤེས་པ་སྔོན་པོ་ལས་རྫས་ཐ་དད་པའི་གཟུང་འཛིན་རྫས་གཞན་མ་ཁེགས་པའི་གང་ཟག་གི་ཡིན་པ་མེད་པའི་ཕྱིར། རྣམ་འགྲེལ་ལས། དེ་ལ་གཅིག་ནི་མེད་པས་ཀྱང། །གཉིས་ཀའང་ཉམས་པར་འགྱུར་བ་ཡིན། །ཞེས་གསུངས་པའི་ཕྱིར་དང། རྣམ་འགྲེལ་ལས། དེ་ཕྱིར་གཉིས་སྟོང་གང་ཡིན་པ། །དེ་ནི་དེ་ཡིའང་དེ་ཉིད་ཡིན། །ཞེས་གསུངས་པའི་ཕྱིར་རོ། །ཁོ་ན་རེ། རྣལ་འབྱོར་གྱི་ས་གཉིས་པར་སྔོན་པོ་ཕྱི་དོན་ཡིན་པ་ཁེགས་ཀྱང་ནང་ཤེས་པ་ལ་ལྟོས་པའི་གཟུང་བྱ་རྫས་གཞན་ཙམ་མི་ཁེགས་པས་གཟུང་འཛིན་རྫས་གཞན་གྱིས་སྟོང་པ་རྣལ་འབྱོར་གྱི་ས་གསུམ་པས་སྟོན་ཟེར་བའང་ཤིན་ཏུ་མི་རིགས་པར་ཐལ། སྔ་མ་འགོག་པའི་རིགས་པས་ཕྱི་མ་ཁེགས་པའི་ཕྱིར། རྣམ་འགྲེལ་ལས། དེར་ཡང་བརྩད་པ་མཚུངས་ཕྱིར་ཏེ། །ཞེས་གསུངས་པའི་ཕྱིར། ཁྱབ་སྟེ། སེམས་ཙམ་པའི་ལྟ་བ་ལྷན་ཅིག་དམིགས་ངེས་ཀྱི་རྟགས་ལ་བརྟེན་ནས་རྫོགས་པར་རྟོགས་ནུས་ལ་དེ་ལས་གོང་ན་དབུ་མ་པའི་ལྟ་བ་མ་གཏོགས་མེད་པའི་ཕྱིར། རིན་ཆེན་འཕྲེང་བ་ལས། ཁ་ཅིག་ལ་ནི་གཉིས་རྟེན་པ། །ཁ་ཅིག་ལ་ནི་གཉིས་མི་རྟེན། །ཟབ་མོ་ཁུ་འཁྲིགས་ཅན་འཇིགས་པ། །སྟོང་ཉིད་སྙིང་རྗེའི་སྙིང་པོ་ཅན། །བྱང་ཆུབ་སྒྲུབ་པ་ཁ་ཅིག་ལ། །ཞེས་གསུངས་པའི་ཕྱིར། ཁྱབ་སྟེ། རྐང་པ་དང་པོས་བྱེ་མདོ་གཉིས་ལྟར་གཟུང་འཛིན་རྫས་ཐ་དད་དང། གཉིས་པས་གཟུང་འཛིན་གཉིས་མེད་དང། གསུམ་པས་ཟབ་མོ་དབུ་མའི་ལྟ་བ་སྟོན་པར་བཤད་པའི་ཕྱིར།

    གཉིས་པ་རང་ལུགས་ནི། མངོན་པར་རྟོགས་པའི་རྒྱན་འདིར་ལྟ་བ་ལ་ལྟོས་པའི་ཐེག་པའི་རིམ་པ་གསུམ་བསྟན་ཏེ། ཆུང་ངུ་གང་ཟག་གི་བདག་མེད་རྟོགས་པའི་ལྟ་བ་དང། འབྲིང་པོ་གཟུང་འཛིན་རྫས་གཞན་གྱིས་སྟོང་པར་རྟོགས་པའི་ལྟ་བ་དང། ཆེན་པོ་བདག་མེད་རྟོགས་པའི་ལྟ་བ་བསྟན་པའི་ཕྱིར། དེ་ལྟར་སྟོན་པའི་རྒྱུ་མཚན་ནི་འདིས་རྗེས་སུ་གཟུང་རྒྱུའི་གདུལ་བྱ་དེ་ལ་རིགས་ཅན་གསུམ་དུ་ངེས་པ་དང་བསྒོམ་བྱའི་བདག་མེད་ཕྲ་རགས་གསུམ་དང། སྤང་བྱའི་སྒྲིབ་པ་གསུམ་དང། ཐོབ་བྱའི་བྱང་ཆུབ་དེ་ལ་མཆོག་འབྲིང་དམན་གསུམ་ཡོད་པའི་ཕྱིར། དེ་ལ་དགོངས་ནས་མཆོད་བརྗོད་དུ་དང་པོར་གཞི་ཤེས་དང། དེ་ནས་ལམ་ཤེས་གསུམ་དང། རྣམ་མཁྱེན་དང། མཁྱེན་གསུམ་གྱི་ཤེས་མཚན་གསུམ་དང། སྦྱོར་བ་གསུམ་དང། འདིར་རྣལ་འབྱོར་གྱི་ས་གསུམ་བསྟན་པའི་ཕྱིར། དེ་ལྟར་བསྟན་པའི་དགོས་པ་ཡོད་དེ། རྒྱན་གྱི་ཆེད་དུ་བྱ་བའི་གདུལ་བྱ་དེས་ཀྱང་དང་པོར་གང་ཟག་གི་བདག་མེད་དང། དེ་རྗེས་སུ་གཟུང་འཛིན་རྫས་གཞན་གྱིས་སྟོང་པ་དང། དེ་རྗེས་ཆོས་ཐམས་ཅད་བདེན་མེད་དུ་གཏན་ལ་ཕབ་ནས་སྒོམ་པའི་རིམ་པ་ཤེས་པའི་ཆེད་ཡིན་པའི་ཕྱིར་ཏེ། དེ་དོན་དུ་གཉེར་བའི་གདུལ་བྱ་རྗེས་སུ་འཛིན་པར་འདོད་དགོས་པ་དེའི་ཕྱིར། རྣམ་འགྲེལ་ལས། བརྩེ་ལྡན་སྡུག་བསྔལ་གཞོམ་པའི་ཕྱིར། །ཐབས་རྣམས་ལ་ནི་མངོན་སྦྱོར་མཛད། །ཐབས་བྱུང་དེ་རྒྱུ་ལྐོག་གྱུར་པས། །དེ་འཆད་པ་ནི་དཀའ་བ་ཡིན། །ཞེས་གསུངས་པའི་ཕྱིར། འོ་ན། གཞུང་ཚན་པ་བཞི་འབྱུང་བའི་རྒྱུ་མཚན་ཅི་ཡིན་ཞེ་ན། ཡོད་དེ། རྣལ་འབྱོར་ཀྱིས་ས་གཉིས་པར་མཉམ་བཞག་ཏུ་སྒོམ་ཚུལ་དང། རྗེས་ཐོབ་ཏུ་ཡིད་ལ་བྱེད་ཚུལ་བསྟན་པའི་ཆེད་ཡིན་པའི་ཕྱིར། དང་པོ་དང་ཐ་མ་གཉིས་ལ་དེ་ལྟར་དངོས་སུ་མ་སྨོས་ཀྱང་གོ་ནུས་ཏེ། བར་པས་བཤད་ཚུལ་དེ་གཉིས་ལ་ཡོད་པར་རྟོགས་ནུས་པའི་ཕྱིར། འདིར་རྣལ་འབྱོར་གྱི་ས་གསུམ་བསྟན་པ་ནི་རྣལ་འབྱོར་སྤྱོད་པའི་དབུ་མ་པའི་སྒོམ་རིམ་ལས་བསྟན་པ་ཡིན་ཏེ། རིགས་ཅན་གསུམ་གྱི་ལྟ་བའི་སྒོམ་ཚུལ་བསྟན་པའི་ཕྱིར་ཏེ། སྒོམ་རིམ་དང་པོ་ལས། དེ་ལ་འཕགས་པ་ལང་གཤེགས་ལས། ཤེས་རབ་སྒོམ་པའི་རིམ་པ་མདོར་བཀའ་བསྩལ་ཏེ། སེམས་ཙམ་ལ་ནི་རབ་བརྟེན་ནས། །ཕྱི་རོལ་དོན་ལ་མི་བརྟག་གོ །དེ་བཞིན་ཉིད་ཀྱི་དམིགས་གནས་ནས། །སེམས་ཙམ་ལས་ཀྱང་བཟླ་བར་བྱ། །ནས། ཡེ་ཤེས་དམ་པ་བདག་མེད་པར། །སྣང་བ་མེད་པས་མཐོང་བར་འགྱུར། །ཞེས་གསུངས་པའི་ཕྱིར། ཁྱབ་སྟེ། ཚིག་གསལ་ལས་ཀྱང། དེ་ལ་སྐྱེ་བ་དང་འཇིག་པས་སྟོང་པའི་ཕྱིར་ཞེས་བྱ་བ་ལ་སོགས་པས་སྙིང་པོའི་དོན་སྒོམ་པའི་རིམ་པ་ཡིད་ལ་བྱ་བ་འདི་ནི། ཞེས་དང། རྟོགས་དཀའ་ལས་ཀྱང། ཐམས་ཅད་དུ་འགྲོ་བའི་བདག་མེད་བསྟན་པ་ནི་བྱང་ཆུབ་ཇི་ལྟ་བུ་ཡིན་པ་བླ་མའི་མན་ངག་མདོར་བསྡུས་ཏེ་བསྟན་པས་འཇུག་པའི་སྒོ་ནས། ཞེས་གསུངས་པའི་ཕྱིར་དང། གསེར་འཕྲེང་ལས། འདིར་བསྟན་པ་བཞི་དབུ་མའི་སྒོམ་རིམ་དུ་འགྲེལ་བཤད་གཉིས་ཀྱང་བཞེད་དེ། ཞེས་དང། རྣམ་བཤད་ལས་ཀྱང། འདིར་རྣལ་འབྱོར་གྱི་ས་བཤད་པ་འདི་དག་མངོན་པར་རྟོགས་པའི་རྒྱན་ལས་ཇི་ལྟར་གསུངས་པའི་སྙིང་པོའི་དོན་སྒོམ་པའི་རིམ་པ་སྟོན་པ་ཡིན་ལ། ཞེས་གསུངས་པའི་ཕྱིར། བྱང་སེམས་ཚོགས་ལམ་པས་སྐྱེ་འཇིག་ཅན་གྱི་རྟགས་ཀྱིས་ཉེར་ལེན་གྱི་ཕུང་པོ་གང་ཟག་གི་བདག་མེད་དུ་བསམ་བྱུང་གིས་གཏན་ལ་ཕབ་ནས་སྒོམ་པ་ལ་ཆོས་ཅན། དགོས་པ་ཡོད་དེ། གདུལ་བྱ་ཉན་ཐོས་ཀྱི་རིགས་ཅན་རྗེས་སུ་འཛིན་པ་དང་གང་ཟག་གི་བདག་འཛིན་སྤང་བར་བྱ་བའི་ཆེད་ཡིན་པའི་ཕྱིར། བྱང་སེམས་ཚོགས་ལམ་པས་ལྷན་ཅིག་དམིགས་ངེས་ཀྱི་རྟགས་ཀྱིས་སྔོན་པོ་སྔོན་འཛིན་རྫས་གཞན་གྱིས་སྟོང་པར་གཏན་ལ་ཕབ་ནས་སྒོམ་པ་ལ་ཆོས་ཅན། དགོས་པ་ཡོད་དེ། གདུལ་བྱ་རང་རྒྱལ་གྱི་རིགས་ཅན་རྗེས་སུ་གཟུང་བ་དང་ཕྱི་རོལ་དོན་འཛིན་གྱི་རྟོག་པ་སྤོང་ཆེད་ཡིན་པའི་ཕྱིར། འདི་ནི་སྐབས་གཉིས་པ་དང་གསུམ་པའི་གཞི་ཤེས་སྒོམ་ཚུལ་ཡིན་ཏེ། དེ་ཡང་ཐེག་ཆེན་ཚོགས་ལམ་ནས་མཐོང་ལམ་བར་དུ་སྒོམ་མོ། །བྱང་སེམས་ཚོགས་ལམ་པས་རྟེན་འབྲེལ་གྱི་རྟགས་ཀྱིས་གཉིས་མེད་ཀྱི་ཤེས་པ་བདེན་མེད་དུ་གཏན་ལ་ཕབ་ནས་སྒོམ་པ་ལ་ཆོས་ཅན། དགོས་པ་ཡོད་དེ། ཉོན་མོངས་པ་དང་ཤེས་བྱའི་སྒྲིབ་པ་སྤང་བར་བྱ་བའི་ཆེད་ཡིན་པའི་ཕྱིར།

རྩོད་པ་སྤོང་བ་ལ་ཁོ་ན་རེ། ཁྱོད་ཆོས་དེ་དང་ཕན་ཚུན་ཐ་དད་གང་ཞིག །ཁྱོད་དམིགས་བྱེད་ཀྱི་ཚད་མ་ཡིན་ན་དེ་དམིགས་བྱེད་ཀྱི་ཚད་མ་ཡིན་པས་ཁྱབ་པ་དེ། ཁྱོད་ཆོས་དེ་དང་ལྷན་ཅིག་དམིགས་ངེས་ཡིན་པའི་མཚན་ཉིད་ཟེར་ན། སྔོན་པོ་ཆོས་ཅན། ཁྱོད་དམིགས་བྱེད་ཀྱི་ཚད་མ་ཡིན་ན་སྔོན་འཛིན་ཚད་མ་དམིགས་བྱེད་ཀྱི་ཚད་མ་ཡིན་པས་ཁྱབ་པ་དང། སྔོན་འཛིན་ཚད་མ་དམིགས་བྱེད་ཀྱི་ཚད་མ་ཡིན་ན་ཁྱོད་དམིགས་བྱེད་ཀྱི་ཚད་མ་ཡིན་པས་ཁྱབ་པར་ཐལ། ཁྱོད་སྔོན་འཛིན་ཚད་མ་དང་ལྷན་ཅིག་དམིགས་ངེས་ཡིན་པའི་ཕྱིར། འདོད་ན། སྔོན་འཛིན་ཚད་མ་ཉམས་སུ་མྱོང་བའི་རང་རིག་མངོན་སུམ་ཚད་མ་ཆོས་ཅན། སྔོན་པོ་ཉམས་མྱོང་གི་ཚད་མར་ཐལ་ལོ། །སྔོན་འཛིན་ཚད་མ་ཉམས་མྱོང་གི་ཚད་མ་ཡིན་པའི་ཕྱིར། དེ་ཡོད་པའི་ཕྱིར། མ་གྲུབ་ན། སྔོན་འཛིན་ཚད་མ་ཆོས་ཅན། ཁྱོད་ཉམས་མྱོང་གི་རང་རིག་ཚད་མ་ཡོད་པར་ཐལ། ཁྱོད་ཚད་མ་ཡིན་པའི་ཕྱིར། རྩ་བར་འདོད་ན། དེ་ཆོས་ཅན། ཁྱོད་ཀྱི་དངོས་ཡུལ་ལ་ཤེས་པས་མ་ཁྱབ་པར་ཐལ་ལོ། །འདོད་པའི་ཕྱིར། འདོད་ན། འཛིན་རྣམ་མ་ཡིན་པར་ཐལ་ལོ། །གཞན་ཡང། སྔོན་འཛིན་མིག་ཤེས་ཆོས་ཅན། སྔོན་འཛིན་ཚད་མ་དམིགས་པར་ཐལ་ལོ། །སྔོན་པོ་དམིགས་པའི་ཚད་མ་ཡིན་པའི་ཕྱིར། འདོད་མི་ནུས་ཏེ། རྣམ་འགྲེལ་ལས། དབང་པོའི་སེམས་ནི་ངེས་ཕྱིར་དང། །ཞེས་གསུངས་པའི་ཕྱིར། ཡང་ཁ་ཅིག་ན་རེ། སྔོན་པོ་དང་སྔོན་འཛིན་གྱི་ཤེས་པ་ལྷན་ཅིག་དམིགས་ངེས་ཡིན་ཟེར་ན། སྔོན་པོ་ཆོས་ཅན། སྔོན་འཛིན་ཤེས་པ་ཡོད་ན་ཁྱོད་ཡོད་པས་ཁྱབ་པར་ཐལ། ཁྱོད་དེ་དང་ལྷན་ཅིག་དམིགས་ངེས་ཡིན་པའི་ཕྱིར། ཁྱབ་སྟེ། ཆོས་མཆོག་གི་འགྲེལ་པ་ལས། ལྷན་ཅིག་པ་ནི་དུས་མཉམ་པའོ། །དམིགས་པ་ནི་རྟོགས་པའོ། །ངེས་པ་ནི་ཁྱབ་པའོ། །ཞེས་གསུངས་པའི་ཕྱིར། རྩ་བར་འདོད་ན། སྔོན་པོ་ཚད་མས་མ་དམིགས་པའི་ས་ཕྱོགས་ཆོས་ཅན། སྔོན་པོ་ཡོད་པར་ཐལ། སྔོན་འཛིན་ཤེས་པ་ཡོད་པའི་ཕྱིར། དེར་ཐལ། སྔོན་པོ་ཞེས་པའི་སྒྲ་ཡོད་པའི་ཕྱིར། ཁྱབ་སྟེ། རྟོག་ཡུལ་ན་ཡོད་པ་དེ། སྔོན་པོ་ཞེས་པའི་སྒྲ་ཆོས་ཐམས་ཅད་ལ་འཇུག་རུང་དུ་སྒྲུབ་པའི་རྟགས་ཡང་དག་ཡིན་པའི་ཕྱིར། གོང་དུ་འདོད་ན། སྔོན་པོ་མེད་པར་ཐལ། སྔོན་པོའི་དགག་གཞི་ཡིན་པའི་ཕྱིར། ཡང་ཁོ་ན་རེ། སྔོན་པོ་དང་སྔོ་སྣང་དབང་ཤེས་ལྷན་ཅིག་དམིགས་ངེས་ཡིན་ཞེ་ན། སྔོར་སྣང་དབང་ཤེས་ཡོད་ན་ཁྱོད་ཡོད་དགོས་པར་ཐལ། ཁྱོད་དང་སྔོར་སྣང་དབང་ཤེས་ལྷན་ཅིག་དམིགས་ངེས་ཡིན་པའི་ཕྱིར། རྟགས་ཁས། འདོད་ན། སྔོན་པོ་ཚད་མས་མ་དམིགས་པའི་ས་ཕྱོགས་ཆོས་ཅན། དེར་ཐལ། དེའི་ཕྱིར། རྟགས་གྲུབ་སྟེ། གངས་རི་སྔོན་པོར་སྣང་བའི་དབང་ཤེས་ཡོད་པའི་ཕྱིར། དེར་ཐལ། ཆོས་དེ་སྣང་བའི་དབང་ཤེས་ཡོད་ན་ཆོས་དེ་ཡོད་མི་དགོས་པའི་ཕྱིར། མ་གྲུབ་ན། ཟླ་གཅིག་ཟླ་གཉིས་ཡིན་པ་ཡོད་པར་ཐལ། ཟླ་གཅིག་ཟླ་གཉིས་ཡིན་པ་སྣང་བའི་དབང་ཤེས་ཡོད་པའི་ཕྱིར། རིགས་པའི་དབང་ཕྱུག་གིས། རྣམ་ཤེས་འཁྲུལ་བས་ཟླ་བ་གཉིས། །མེད་པར་ཐ་དད་མཐོང་བ་བཞིན། །ཞེས་པའི་ལུང་དོན་གྲུབ་པའི་ཕྱིར། འདོད་མི་ནུས་ཏེ། གཅིག་ཡིན་ན་དུ་མ་མ་ཡིན་དགོས་པའི་ཕྱིར། ཡང་ཁ་ཅིག་ན་རེ། ལྷན་ཅིག་དམིགས་ངེས་ཀྱི་དོན་རང་རིག་མངོན་སུམ་གཅིག་གིས་ཅིག་ཅར་དམིགས་པས་ཁྱབ་པའི་དོན་ཡིན་ཟེར་ན། འོ་ན། སྔོན་འཛིན་མིག་ཤེས་མྱོང་བའི་རང་རིག་གིས་སྔོན་པོ་ལ་དངོས་སུ་དམིགས་པར་ཐལ་ལོ། །སྔོན་པོ་དང་སྔོན་འཛིན་དབང་ཤེས་ལྷན་ཅིག་དམིགས་ངེས་ཡིན་པའི་ཕྱིར། རྟགས་གྲུབ་སྟེ། རྣམ་ངེས་ལས། ལྷན་ཅིག་དམིགས་པ་ངེས་པའི་ཕྱིར། །སྔོ་དང་དེ་བློ་གཞན་མ་ཡིན། །ཞེས་གསུངས་པའི་ཕྱིར། འདོད་ན། སྔོན་འཛིན་དབང་ཤེས་མྱོང་བའི་རང་རིག་ཆོས་ཅན། གཞན་རིག་ཡིན་པར་ཐལ་ལོ། །འདོད་པ་དེའི་ཕྱིར། འཁོར་གསུམ། འདོད་ན། མིག་ཤེས་ཀྱི་འཛིན་རྣམ་ལ་གཟུང་རྣམ་འཛིན་རྣམ་གཉིས་ཡོད་པར་ཐལ་ལོ། །འདོད་པ་དེའི་ཕྱིར།

    ཡང་ཁ་ཅིག་ན་རེ། སེམས་ཅན་ཐམས་ཅད་ཀྱི་བློ་ལ་ལྟོས་པའི་ལྷན་ཅིག་དམིགས་ངེས་ཡིན་པའི་ཕྱིར། ཞེས་པ་རྟགས་སུ་འགོད་ཟེར་ན། ཤིན་ཏུ་མི་རུང་བར་ཐལ། སེམས་ཅན་ཐམས་ཅད་ཀྱི་བློ་དང་ལྷན་ཅིག་དམིགས་ངེས་ཡིན་པ་གཞི་མ་གྲུབ་པའི་ཕྱིར། དེ་ལ་ཁོ་ན་རེ། རྟགས་མ་གྲུབ་སྟེ། སེམས་ཅན་གཅིག་གི་བློས་སྔོན་པོ་དམིགས་ན་སྔོན་འཛིན་མིག་ཤེས་ཀྱང་དམིགས་པས་ཁྱབ་པས་དེ་ཙམ་གྱིས་སེམས་ཅན་ཐམས་ཅད་ཀྱི་བློ་ལ་ལྟོས་པའི་ལྷན་ཅིག་དམིགས་ངེས་འཇོག་པའི་ཕྱིར་ཟེར་ན། འོ་ན། ཤེས་བྱ་ཆོས་ཅན། བདག་མེད་མངོན་སུམ་དུ་རྟོགས་པའི་ཤེས་རབ་དང་དེའི་སྤང་བྱ་བདག་འཛིན་གཉིས་སེམས་ཅན་ཐམས་ཅད་ཀྱི་རྒྱུད་ལ་ལྟོས་པའི་སྤང་གཉེན་ཡིན་པར་ཐལ། སེམས་ཅན་གཅིག་གི་རྒྱུད་ལ་བདག་མེད་རྟོགས་པའི་ཤེས་རབ་སྐྱེས་ན་དེའི་སྤང་བྱ་བདག་འཛིན་སྤོང་བ་བཞིན་དུ་སེམས་ཅན་གང་གི་རྒྱུད་ལ་ཡང་ཤེས་རབ་དེ་སྐྱེས་ན་སྤང་བྱ་བདག་འཛིན་དེ་སྤོང་བས་ཁྱབ་པའི་ཕྱིར། འདོད་ན། བདག་མེད་མངོན་སུམ་དུ་རྟོགས་པའི་ཤེས་རབ་དེ་སེམས་ཅན་ཐམས་ཅད་ཀྱི་རྒྱུད་ལ་ལྟོས་པའི་གཉེན་པོར་ཐལ་ལོ། །འདོད་པའི་ཕྱིར། འདོད་ན། རང་རྒྱུད་ལ་གཉེན་པོ་བདེན་མེད་རྟོགས་པའི་ཤེས་རབ་དེ་མེད་པའི་སེམས་ཅན་མི་སྲིད་པར་ཐལ་ལོ། །ཡང་མང་པོ་ན་རེ། ལྷན་ཅིག་དམིགས་ངེས་ཀྱི་དོན་སྔོན་པོ་དངོས་སུ་དམིགས་ན་བློ་དེས་སྔོན་འཛིན་མིག་ཤེས་ཀྱང་དངོས་སུ་དམིགས་པས་ཁྱབ། སྔོན་འཛིན་མིག་ཤེས་དངོས་སུ་དམིགས་པ་ན་བློ་དེས་སྔོན་པོ་ཡང་དངོས་སུ་དམིགས་པས་ཁྱབ་ཟེར་རོ། །འོ་ན། སྔོན་འཛིན་མིག་ཤེས་དེས་སྔོན་འཛིན་མིག་ཤེས་དངོས་སུ་དམིགས་པར་ཐལ། སྔོན་འཛིན་མིག་ཤེས་དེས་སྔོན་པོ་དངོས་སུ་དམིགས་པའི་ཕྱིར། འཁོར་གསུམ། འདོད་ན། སྔོན་འཛིན་མིག་ཤེས་སྔོན་འཛིན་མིག་ཤེས་ལ་རང་རིག་ཡིན་པར་ཐལ་ལོ། །འདོད་པའི་ཕྱིར། འདོད་ན། ཤེས་པ་རྣམས་རང་གི་ངོ་བོ་ལ་རང་རིག་ཡིན་པར་ཐལ། སྔོན་འཛིན་མིག་ཤེས་ལ་དེའི་ཕྱིར། འདོད་ན། སྒྲ་མི་རྟག་རྟོགས་ཀྱི་རྗེས་དཔག་ཚད་མ་རང་གི་ངོ་བོ་ལ་རང་རིག་ཡིན་པར་ཐལ་ལོ། །ཤེས་པ་ཐམས་ཅད་ལ་དེའི་ཕྱིར། འདོད་ན། སྒྲ་མི་རྟག་རྟོགས་ཀྱི་རྗེས་དཔག་ཚད་མའི་ངོ་བོ་ཆོས་ཅན། ཁྱོད་སྒྲ་མི་རྟག་རྟོགས་ཀྱི་རྗེས་དཔག་ཚད་མའི་དངོས་ཡུལ་ཡིན་པར་ཐལ། དེ་ཁྱོད་དངོས་སུ་འཇལ་བའི་ཚད་མ་ཡིན་པའི་ཕྱིར། རྟགས་ཁས། མ་གྲུབ་ན། དེ་ཁྱོད་ལ་རང་རིག་མངོན་སུམ་ཡིན་པ་བུད། འདོད་ན། དེ་ཆོས་ཅན། ཁྱོད་རང་རྒྱུད་ལྡན་གྱི་གང་ཟག་གི་ངོར་ལྐོག་གྱུར་ཡིན་པར་ཐལ། ཁྱོད་རང་རྒྱུད་ལྡན་གྱི་གང་ཟག་གི་རྒྱུད་ཀྱི་རྗེས་དཔག་ཚད་མའི་གཞལ་བྱ་ཡིན་པའི་ཕྱིར། རྟགས་ཁས། འདོད་ན། རང་བློ་རང་ལ་ལྐོག་གྱུར་དུ་ཐལ་ལོ། །

    གཞན་ཡང། རྗེས་དཔག་ཆོས་ཅན། ཁྱོད་རྟོག་བྲལ་ཡིན་པར་ཐལ། ཁྱོད་གཟུང་ཡུལ་རང་མཚན་གསལ་བར་སྣང་བའི་ཤེས་པ་ཡིན་པའི་ཕྱིར། མ་གྲུབ་ན། དེར་ཐལ། རང་གི་ངོ་བོ་རང་མཚན་མངོན་སུམ་དུ་སྣང་བའི་རང་རིག་ཡིན་པའི་ཕྱིར། འཁོར་གསུམ། འདོད་མི་ནུས་ཏེ། རྟོག་པ་ཡིན་པའི་ཕྱིར། རྗེས་དཔག་ཡིན་པའི་ཕྱིར། འཁོར་གསུམ། གཞན་ཡང། དབང་ཤེས་ཀྱི་ཡུལ་ཕྱི་རོལ་ཁོ་ན་མ་ཡིན་པར་ཐལ། སྔོན་འཛིན་མིག་ཤེས་ཀྱིས་སྔོན་འཛིན་མིག་ཤེས་རྟོགས་པའི་ཕྱིར། འཁོར་གསུམ། འདོད་མི་ནུས་ཏེ། དབང་ཤེས་ཀྱི་ཡུལ་ཕྱི་རོལ་ཁོ་ན་ཡིན་པའི་ཕྱིར། རྣམ་འགྲེལ་ལས། དབང་པོའི་སེམས་ནི་ངེས་ཕྱིར་དང། །ཞེས་གསུངས་པའི་ཕྱིར། འཁོར་གསུམ། ཡང་ཁ་ཅིག །ལྷན་ཅིག་དམིགས་ངེས་ཞེས་པའི་དམིགས་པ་ཚད་མས་དམིགས་པར་འདོད་བཞིན་དུ་ལྷན་ཅིག་དམིགས་ངེས་ཀྱི་རྟགས་ཀྱི་མཐུན་དཔེར་ཟླ་གཉིས་དང་ཟླ་བ་གཉིས་སྣང་གི་དབང་ཤེས་བཞིན་ཟེར། འོ་ན། ཟླ་གཅིག་ཟླ་གཉིས་ཚད་མས་དམིགས་པར་ཐལ། དམིགས་པའི་དོན་ཚད་མས་དམིགས་པ་ལ་བྱེད་ཅིང་ཟླ་གཅིག་ཟླ་གཉིས་ལྷན་ཅིག་དམིགས་ངེས་ཀྱི་མཐུན་དཔེ་ཡིན་པ་དེའི་ཕྱིར། ཁྱབ་སྟེ། མདོར་ན་སྔོ་སོགས་དབང་ཤེས་ལས་དོན་གཞན་མིན་བཞིན་དུ་སྣང་བའི་དཔེར་འགོད་རིགས་ཀྱང། གཞན་ལ་ལྷན་ཅིག་དམིགས་ངེས་ཡིན་པར་སྒྲུབ་པའི་མཐུན་དཔེར་འགོད་མི་རིགས་པའི་ཕྱིར་ཏེ། ཇི་སྐད་དུ། རྣམ་ཤེས་འཁྲུལ་བས་ཟླ་བ་གཉིས། །མེད་པར་ཐ་དད་མཐོང་བ་བཞིན། །ཞེས་གསུངས་པའི་ཕྱིར། ཡང་ཁ་ཅིག་ན་རེ། སྔོན་འཛིན་མིག་ཤེས་དང་དེ་ལ་སྣང་བའི་སྔོན་པོ་གཉིས་ནི་གཅིག་དངོས་སུ་དམིགས་པའི་བློས་གཅིག་ཤོས་ཀྱང་དངོས་སུ་དམིགས་པར་འདོད་ཀྱི། སྔོན་པོ་ཙམ་དང་མ་ཡིན་ནོ་ཞེ་ན། འོ་ན། ལྷས་སྦྱིན་དང་མཆོད་སྦྱིན་གཉིས་ཀྱི་མིག་ཤེས་གཉིས་ཀྱིས་ཡུལ་སྔོན་པོ་གཅིག་ཐུན་མོང་དུ་དངོས་སུ་དམིགས་པའི་ཚེ་དེ་འདྲ་བའི་ལྷས་སྦྱིན་གྱི་མིག་ཤེས་ཆོས་ཅན། ཁྱོད་མཆོད་སྦྱིན་གྱི་མིག་ཤེས་དེས་དངོས་སུ་དམིགས་པར་ཐལ། ཁྱོད་ཀྱིས་མཆོད་སྦྱིན་གྱི་མིག་ཤེས་ལ་སྣང་བའི་སྔོན་པོ་དེ་དངོས་སུ་དམིགས་པའི་ཕྱིར། དེར་ཐལ། སྔོན་པོ་ལ་ལྟ་བའི་ལྷས་སྦྱིན་དང་མཆོད་སྦྱིན་གྱི་མིག་ཤེས་གཉིས་ཀས་སྔོན་པོ་གཅིག་ལ་ཐུན་མོང་དུ་དམིགས་པའི་ཕྱིར་ན། རིགས་རྒྱན་གྱིས་མ་ཁྱབ་སྟེ། གཅིག་ལ་སྣང་བ་གཅིག་ཤོས་ལ་མི་སྣང་ཟེར། སྡེ་བདུན་རྒྱན་ལྟར་ན་གཅིག་ལ་སྣང་བ་གཅིག་ཤོས་ལ་མི་སྣང་བ་རྟགས་མ་གྲུབ་སྟེ། དེ་གཉིས་རིགས་མཐུན་གྱི་བག་ཆགས་སད་པའི་མིག་ཤེས་ཅན་ཡིན་པའི་ཕྱིར། རྣམ་འགྲེལ་ལས། རིགས་མཐུན་བག་ཆགས་སད་པ་ཅན། །ཞེས་གསུངས་པའི་ཕྱིར། དེས་ན་སྡེ་བདུན་རྒྱན་ལྟར་ན། སྔོན་པོ་དང་སྔོན་འཛིན་ཚད་མ་དུས་མཉམ་དུ་ཚད་མས་དམིགས་པས་ཁྱབ་ཀྱང་སྔོན་པོ་དམིགས་བྱེད་ཀྱི་ཚད་མ་གཅིག་གིས་སྔོན་འཛིན་ཀྱང་གྲུབ་པར་མི་བཞེད་པའི་ཕྱིར། འདི་ལེགས་པར་སེམས་ཏེ། ཆོས་མཆོག་གིས་འགྲེལ་པ་ལས། ཤེས་བྱ་དམིགས་པ་ནི་ཤེས་པ་དམིགས་པའི་བདག་ཉིད་ཅན་ཡིན་གྱི་གཞན་དུ་ནི་མ་ཡིན་ལ་ཤེས་པ་དམིགས་པ་ཡང་ཤེས་བྱ་དམིགས་པའི་བདག་ཉིད་ཡིན་ནོ། །ཞེས་གསུངས་པའི་ཕྱིར། ཁྱབ་སྟེ། ཤེས་བྱ་དམིགས་པ་ནི་ཤེས་པ་དམིགས་པ་དང་བདག་གཅིག་འབྲེལ་དང་ཤེས་པ་དམིགས་པ་ཡང་ཤེས་བྱ་དམིགས་པ་དང་བདག་ཉིད་གཅིག་པ་ཅན་གྱི་འབྲེལ་པར་བཤད་པའི་ཕྱིར། འདི་རིགས་རྒྱན་གྱི་ཡང་དགོངས་པར་སྣང་ངོ་། །བཙུན་པ་དགེ་འདུན་སྲུང་བ་ན་རེ། རྫས་གཅིག་པ་དང་ལྷན་ཅིག་པ་འགལ་བར་ཐལ། ལྷན་ཅིག་པ་ལ་རྫས་གཞན་གྱིས་ཁྱབ་པའི་ཕྱིར། དེ་སྐད་དུ། ཕྱི་རོལ་དོན་གྲུབ་ལས། ལྷན་ཅིག་གཟུང་བ་གཅིག་འཛིན་བློ། །གཅིག་པར་འདོད་ན་དེ་མ་གྲུབ། །ཅེས་སོ། །དེ་ཤིན་ཏུ་མི་འཐད་པར་ཐལ། ལྷན་ཅིག་དམིགས་ངེས་ཡིན་ན་རྫས་གཞན་མ་ཡིན་པས་ཁྱབ་པའི་ཕྱིར། དེར་ཐལ། ཕན་ཚུན་ཐ་དད་གཅིག་དམིགས་ན་གཅིག་ཤོས་དམིགས་དགོས་ན་འབྲེལ་བ་གྲུབ་པས་ཁྱབ་ཅིང། ལྷན་ཅིག་གམ་དུས་མཉམ་དུ་དམིགས་དགོས་པས་དེ་བྱུང་འབྲེལ་ཁེགས་པའི་ཕྱིར། ཁྱབ་སྟེ། དེ་ལྟར་ན་ལྷན་ཅིག་དམིགས་ངེས་ཡིན་ན་བདག་གཅིག་འབྲེལ་ཡིན་པས་ཁྱབ་པའི་ཕྱིར། ཁྱབ་ཅིང། རྟགས་གྲུབ་སྟེ། ཕན་ཚུན་བདག་ཉིད་གཅིག་ཡིན་ན་རྫས་གཞན་མ་ཡིན་དགོས་པའི་ཕྱིར། རྣམ་ངེས་ལས། རང་བཞིན་ཐ་དད་པ་ལ་ནི་འདི་འཐད་པ་མ་ཡིན་ཏེ། འབྲེལ་པའི་རྒྱུ་མཚན་མེད་པའི་ཕྱིར། ཞེས་གསུངས་པའི་ཕྱིར། ཡང་དགེ་འདུན་སྲུང་བ་ན་རེ། ལྷན་ཅིག་དམིགས་ངེས་ལ་རྫས་གཞན་ཡིན་པས་ཁྱབ་པར་ཐལ། སེམས་སེམས་བྱུང་གཉིས་ལྷན་ཅིག་དམིགས་ངེས་ཡིན་ཀྱང་རྫས་གཞན་ཡིན་པ་གང་ཞིག།།སངས་རྒྱས་ཀྱི་ཡེ་ཤེས་དང་སེམས་ཅན་གྱི་ཤེས་པ་ལྷན་ཅིག་དམིགས་ངེས་ཡིན་ཀྱང་རྫས་གཞན་ཡིན་ཟེར་ཏེ། དེ་ཉིད་ཀྱིས། སངས་རྒྱས་ཡེ་ཤེས་གཞན་སེམས་དང། །སེམས་དང་སེམས་ལས་བྱུང་རྣམས་ཀྱིས། །གཏན་ཚིགས་འདི་ནི་འཁྲུལ་ཕྱིར་རོ། །ཞེས་སོ། །དེའི་རྟགས་རེ་རེ་ནས་མ་གྲུབ་སྟེ། སེམས་སེམས་བྱུང་གཉིས་ལྷན་ཅིག་དམིགས་ངེས་མ་ཡིན་པ་གང་ཞིག །སངས་རྒྱས་ཀྱི་ཡེ་ཤེས་དང་སེམས་ཅན་གྱི་ཤེས་པ་གཉིས་ཀྱང་ལྷན་ཅིག་དམིགས་ངེས་མ་ཡིན་པའི་ཕྱིར། དང་པོ་གྲུབ་སྟེ། སེམས་མ་དམིགས་པར་སེམས་བྱུང་དམིགས་པ་ཡོད་ཅིང་སེམས་བྱུང་མ་དམིགས་པར་སེམས་དམིགས་པ་ཡོད་པའི་ཕྱིར། དེར་ཐལ། དེ་གཉིས་སོ་སོར་ཚད་མས་དེ་ལྟར་དམིགས་པ་ཡོད་པའི་ཕྱིར། ཆོས་མཆོག་གི་འགྲེལ་པ་ལས། སེམས་དང་སེམས་ལས་བྱུང་བས་ཀྱང་འཁྲུལ་པར་མི་འགྱུར་ཏེ། དེ་དག་རྣམས་ཀྱང་སོ་སོར་བདག་ཉིད་ཡང་དག་པར་རིག་པའི་ཕྱིར་རོ། །ཞེས་གསུངས་པའི་ཕྱིར། གཉིས་པ་གྲུབ་སྟེ། སེམས་ཅན་གྱི་ཤེས་པ་དམིགས་ཀྱང་སངས་རྒྱས་ཀྱི་ཡེ་ཤེས་མ་དམིགས་པ་མཐའ་ཡས་ཡོད་པའི་ཕྱིར། འདི་དག་དཀའ་གནས་མཐར་ཐུག་ཡིན་པས་ཅུང་ཟད་བཤད་དོ། །ཡང་ཁ་ཅིག །ལྷན་ཅིག་དམིགས་ངེས་ཀྱི་དོན་གཅིག་ཡོད་པའི་ཡུལ་དུས་དེར་གཅིག་ཤོས་ཀྱང་ཡོད་པས་ཁྱབ་པ་ཡིན་ཟེར་ན། འོ་ན། བུ་རམ་གྱི་རོ་གཟུགས་ད་ལྟར་བ་ཡང་ལྷན་ཅིག་དམིགས་ངེས་ཡིན་པར་ཐལ་ལོ། །ལྷན་ཅིག་དམིགས་ངེས་ཀྱི་གོ་དོན་འཐད་པའི་ཕྱིར། འདོད་ན། བུ་རམ་གྱི་གཟུགས་མཐོང་ན་བུ་རམ་གྱི་རོ་མྱོང་བས་ཁྱབ་པར་ཐལ་ལོ། །འདོད་པའི་ཕྱིར། འཁོར་གསུམ། དེ་བས་ན་ལྷན་ཅིག་དམིགས་པར་ངེས་པའི་དོན་འདི་ཡིན་ཏེ། ལྷན་ཅིག་ཅེས་པ་སྐབས་འདིར་ཡུལ་དུས་གཅིག་པའི་དོན་དང། དམིགས་པ་ནི་ཚད་མས་དམིགས་པ་དང། ངེས་པ་ནི་ཁྱབ་པའི་དོན་ཡིན་པས། གཅིག་ཚད་མས་མྱོང་བའི་དུས་སུ་དེའི་གཅིག་ཤོས་ཀྱང་མྱོང་པས་ཁྱབ་ལ། གཅིག་ཤོས་ཚད་མས་མྱོང་དུས་ཀྱང་གཅིག་ཚད་མས་མྱོང་བས་ཁྱབ་ཅེས་པའི་དོན་ཡིན་པའི་ཕྱིར་ཏེ། དཔེར་ན། སྔོན་པོ་སྔོན་འཛིན་མངོན་སུམ་ཚད་མས་མྱོང་དུས་སྔོན་འཛིན་མངོན་སུམ་ཡང་རང་མྱོང་བའི་རང་རིག་མངོན་སུམ་ཚད་མས་མྱོང་བས་ཁྱབ་ལ། སྔོན་འཛིན་མངོན་སུམ་ཚད་མ་རང་རིག་མངོན་སུམ་ཚད་མས་མྱོང་བའི་དུས་སུ་སྔོན་པོ་ཡང་སྔོན་འཛིན་མངོན་སུམ་ཚད་མས་མྱོང་བས་ཁྱབ་ཅེས་པ་ལྟ་བུ་ཡིན་པའི་ཕྱིར་ཏེ། རྣམ་ངེས་ལས། ལྷན་ཅིག་དམིགས་པ་ངེས་པའི་ཕྱིར། །སྔོ་དང་དེ་བློ་གཞན་མ་ཡིན། །ཞེས་དང། སྔོན་པོ་དང་ནི་དེའི་བློ་དག །ལྷན་ཅིག་དམིགས་པ་ངེས་པའི་ཕྱིར། །ཞེས་དང། ཆོས་མཆོག་གི་འགྲེལ་པ་ལས། ཤེས་བྱ་དམིགས་པ་ནི་ཤེས་པ་དམིགས་པའི་བདག་ཉིད་ཅན་ཡིན་གྱི་གཞན་དུ་ནི་མིན་ལ། ཤེས་པ་དམིགས་པ་ཡང་ཤེས་བྱ་དམིགས་པའི་བདག་ཉིད་ཡིན་ནོ། །ཞེས་གསུངས་པའི་ཕྱིར། དེས་ཕན་ཚུན་ཡུལ་ཡུལ་ཅན་ལ་བདག་གཅིག་འབྲེལ་ཡིན་པས་ཁྱབ་པ་བསྟན་པའི་ཕྱིར། རང་བཞིན་ཐ་དད་པ་ལ་ལྷན་ཅིག་དམིགས་ངེས་ཀྱི་འབྲེལ་བ་མི་རུང་པའི་ཕྱིར། རྣམ་ངེས་ལས། རང་བཞིན་ཐ་དད་པ་ལ་ནི་འདི་འཐད་པ་མ་ཡིན་ཏེ། འབྲེལ་བའི་རྒྱུ་མཚན་མེད་པའི་ཕྱིར། ཞེས་གསུངས་པའི་ཕྱིར། སྡེ་བདུན་རྒྱན་ལས། དེ་བས་ན་ལྷན་ཅིག་དམིགས་པར་ངེས་པའི་དོན་ནི་འདི་ཡིན་ཏེ། ཞེས་པ་ནས། སྔོན་འཛིན་མངོན་སུམ་ཚད་མས་མྱོང་བས་ཁྱབ་ཅེས་པ་ལྟ་བུ། ཞེས་དང། རིགས་རྒྱན་ལས་ཀྱང། སྔོན་པོ་ཆོས་ཅན། སྔོན་འཛིན་ཤེས་པ་དང་ལྷན་ཅིག་དམིགས་ངེས་ཡིན་ཏེ། སྔོན་འཛིན་ཤེས་པ་དང་ཐ་དད་གང་ཞིག །ཁྱོད་དམིགས་ན་སྔོན་འཛིན་ཤེས་པ་དམིགས་པའི་བདག་ཉིད་དུ་སྐྱེས་པས་ཁྱབ། དེ་དམིགས་ན་ཡང་ཁྱོད་དམིགས་བྱེད་ཀྱི་བདག་ཉིད་དུ་སྐྱེས་པས་ཁྱབ་པའི་ཕྱིར། ཞེས་སོ། །

    གཉིས་པ་མཐོང་ལམ་རྩེ་མོས་སྒྲིབ་པ་སྤོང་ཚུལ་སྟོན་པར། དེ་ནས་སེང་གེ་རྣམ་བསྒྱིངས་པའི། །ཞེས་སོགས་བྱུང། འཕྲོས་དང་མཐའ་དཔྱད་པ་གཉིས། དང་པོ་ནི། མདོ་ལས། རབ་འབྱོར། དེ་རྣམ་ཐར་བརྒྱད་པོ་དེ་དག་དང། མཐར་གྱིས་གནས་པའི་སྙོམས་འཇུག་དགུ་པོ་དེ་དག་ཕྱེ་ཞིང། སེང་གེ་རྣམ་པར་བསྒྱིངས་པའི་ཏིང་ངེ་འཛིན་ལ་སྙོམས་པར་འཇུག་གོ །ནས། རྟེན་ཅིང་འབྲེལ་བར་འབྱུང་བ། ཞེས་སོགས་ཀྱི་དོན་སྟོན་པར་འདི་བྱུང། མཐའ་དཔྱད་པ་ལ་གསུམ་ལས། དང་པོ་ལ། ཤནྟི་པའི་དག་ལྡན་ལས། སྐབས་འདིའི་སེང་གེ་རྣམ་བསྒྱིངས་དེ་ཐོད་རྒལ་སྦྱོར་བའི་སེང་གེ་རྣམ་བསྒྱིངས་དེ་ཡིན་པར་བཤད་དེ། གསེར་འཕྲེང་ལས། སེང་གེ་རྣམ་བསྒྱིངས་ནི། ནས། ཐོད་རྒལ་གྱི་སྦྱོར་བ་ལ་བཤད་པའི་སེང་གེ་རྣམ་བསྒྱིངས་དེ་ཡིན་པར་འཆད། ཅེས་གསུངས་པའི་ཕྱིར། དེ་མི་འཐད་པར་ཐལ། ཚིག་དོན་གང་ལའང་དེ་གཉིས་མི་གཅིག་པའི་ཕྱིར། དེར་ཐལ། ཚིག་ལ་དེ་གཉིས་གཅིག་པ་མི་འཐད་པ་གང་ཞིག །དེ་གཉིས་འགལ་བ་ཡིན་པའི་ཕྱིར། དང་པོ་གྲུབ་སྟེ། དྲུག་ཚན་དྲུག་རྫོགས་རྗེས་ཀྱི་སེང་གེ་རྣམ་བསྒྱིངས་སྐབས་སུ་རྟེན་འབྲེལ་རྟོགས་ཚུལ་མདོ་ལ་མེད་པའི་ཕྱིར། ཉི་ཁྲི་ལས། དེ་སེང་གེ་རྣམ་པར་བསྒྱིངས་པའི་ཏིང་ངེ་འཛིན་དེ་བཏང་ནས་ཐོད་རྒལ་གྱི་ཏིང་ངེ་འཛིན་ལ་སྙོམས་པར་འཇུག་གོ །རབ་འབྱོར། བྱང་ཆེན་གྱི་ཏིང་ངེ་འཛིན་གྱི་ཐོད་རྒལ་གང་ཞེ་ན། ཞེས་གསུངས་པའི་ཕྱིར། དེ་སྐད་དུ། གསེེར་འཕྲེང་ལས། དྲུག་ཚན་དྲུག་རྫོགས་རྗེས་སུ་གསུངས་པའི་སེང་གེ་རྣམ་བསྒྱིངས་ཀྱི་སྐབས་སུ་རྟེན་འབྲེལ་རྟོགས་ཚུལ་མདོ་ལ་མེད་པས་སོ། །ཞེས་གསུངས་པའི་ཕྱིར། རྟགས་གཉིས་པ་གྲུབ་སྟེ། སེང་གེ་རྣམ་བསྒྱིངས་གཉིས་གསུངས་པའི་དང་པོ་མཐོང་ལམ་རྩེ་སྦྱོར་དང། གཉིས་པ་སྒོམ་ལམ་རྩེ་སྦྱོར་ཡིན་པ་འཕགས་སེང་གཉིས་ཀས་བཤད་པའི་ཕྱིར། དང་པོོ་གྲུབ་སྟེ། ཉི་སྣང་ལས། དེ་ལ་དབང་དུ་བྱ་བའི་ཕྱིར་ཏིང་ངེ་འཛིན་ལ་སྙོམས་པར་འཇུག་པ་ནི། དེ་ནས་སེང་གེ་རྣམ་བསྒྱིངས་པའི། །ཞེས་པ་ནས། མཐོང་པའི་ལམ་བཤད་ཟིན་ཏོ། །ཞེས་དང། འགྲེལ་ཆེན་ལས། མཐོང་བའི་ལམ་ཐོབ་པའི་རྣལ་འབྱོར་པ་དེ་ཉོན་མོངས་པ་དང་ཤེས་བྱའི་སྒྲིབ་པའི་འཇིགས་པ་མེད་པའི་ཕྱིར། ཏིང་ངེ་འཛིན་རྣམ་པར་བསྒྱིངས་པ། ནས། དེ་ལྟར་མཐོང་བའི་ལམ་བརྗོད་ནས། ཞེས་གསུངས་པའི་ཕྱིར། གཉིས་པ་གྲུབ་སྟེ། ཉི་སྣང་ལས། སྒོམ་པའི་ལམ་ཡང་མཐར་གྱིས་གནས་པའི་སྙོམས་པར་འཇུག་པ་དགུས་བསྡུས་པ་ཡིན་ལ་དེ་དག་ཀྱང་ཐོད་རྒལ་གྱི་སྙོམས་པར་འཇུག་པས་བསྡུས་པ་ཡིན་ཏེ། ཞེས་དང། བརྒྱད་སྟོང་ལས། རབ་འབྱོར་ཐབས་ལ་མཁས་པ་ཐམས་ཅད་ཡོངས་སུ་གཟུང་བར་འདོད་པས། ཞེས་དང། དེའི་འགྲེལ་ཆེན་ལས། ཐབས་ལ་མཁས་པ་ཐམས་ཅད་ནི་འདིར་སྒོམ་པའི་ལམ་ཡིན་ནོ། །དེ་ཡང་མཐར་གྱིས་གནས་པའི་སྙོམས་པར་འཇུག་པ་དགུས་བསྡུས་པ་ཡིན་ལ། དེ་ཡང་ཐོད་རྒལ་གྱི་སྙོམས་པར་འཇུག་པས་བསྡུས་པ་ཡིན་པར་ཤེས་པར་བྱའོ། །ཞེས་གསུངས་པའི་ཕྱིར། དེས་ན་སེང་གེ་རྣམ་བསྒྱིངས་ཀྱི་ཏིང་ངེ་འཛིན་ཐོད་རྒལ་གྱི་སྦྱོར་བའི་སེང་གེ་རྣམ་བསྒྱིངས་ཁོ་ནར་བཤད་པ་མི་འཐད་པར་ཐལ། སེང་གེ་རྣམ་བསྒྱིངས་སྔ་ཕྱི་གཉིས་གསུངས་པའི་སྔ་མ་མཐོང་ལམ་དང། ཕྱི་མ་ཐོད་རྒལ་གྱི་དེ་སྒོམ་ལམ་ལ་བཤད་པ་མདོ་དང་བསྟན་བཅོས་མངོན་རྟོགས་རྒྱན་གྱི་དགོངས་པ་ཡིན་པའི་ཕྱིར། གསེར་འཕྲེང་ལས། དེས་ན་སེང་གེ་རྣམ་བསྒྱིངས་གཉིས་གསུངས་པའི་དང་པོ་ནི་མཐོང་རྩེ་ལ་དབང་བྱ་བའི་ཕྱིར་དང། གཉིས་པ་ནི། ཐོད་རྒལ་ལ་འཇུག་པའི་ཆེད་དུ་འཕགས་པ་དང་སློབ་དཔོན་རྣམས་བཞེད་པ་ཉིད་མདོ་བསྟན་བཅོས་ཀྱི་དགོངས་པའོ། །ཞེས་གསུངས་པའི་ཕྱིར།

    གཉིས་པ་རང་ལུགས་ལ། རྒྱལ་སྲས་ཀྱི་ཏིང་འཛིན་ཐམས་ཅད་ཏིང་ངེ་འཛིན་བཞིས་བསྡུས་པར་བཤད་པ་ལྟར་ཡིན། སྐབས་འདིའི་སེང་གེ་རྣམ་བསྒྱིངས་སྔ་མ་མཐོང་ལམ་དང་ཕྱི་མ་སྒོམ་ལམ་ལ་བྱེད་པར་འཕགས་སེང་གིས་གསུངས་པའི་ཕྱིར། །རྩོད་སྤོང་ལ་ཁོ་ན་རེ། ཉི་སྣང་ལས། རྣམ་པར་བསྒྱིངས་པའི་ཏིང་ངེ་འཛིན་ལ་སྙོམས་པར་ཞུགས་ཏེ། རྟེན་ཅིང་འབྲེལ་བར་འབྱུང་བ་ལ་སོ་སོར་རྟོགས་པའི་རྗེས་ལ་མཐར་གྱིས་གནས་པའི་སྙོམས་པར་འཇུག་པ་དགུ་དང་མཉམ་པར་མ་བཞག་པའི་སེམས་ཀྱིས་ལུགས་དང་མཐུན་པ་དང་ལུགས་དང་མི་མཐུན་པར། ཞེས་གསུངས་པ་མི་འཐད་པར་ཐལ། དེར་སེང་གེ་རྣམ་བསྒྱིངས་ཞེས་པ་གཅིག་ལས་མ་བྱུང་བའི་ཕྱིར་ན་མ་ཁྱབ་སྟེ། མཐར་གྱིས་གནས་པའི་སྙོམས་པར་འཇུག་པ་དགུ་དང། ཞེས་པས་སེང་གེ་རྣམ་བསྒྱིངས་ཕྱི་མ་བསྟན་པའི་ཕྱིར་རོ། །

སྨྲས་པ།

འཕགས་ཡུལ་འཛམ་གླིང་གསལ་བར་བྱེད་པའི་རྒྱན། །

མཁས་མཆོག་ཟླ་བའི་ངོ་ནའང་ར་རི་ཅན། །

ཐུབ་བསྟན་བཅུ་གཉིས་བདག་པོའི་འོད་སྟོང་གིས། །

བཅོམ་པའི་མཁས་གྲུབ་བྱེ་བའི་འདབ་མ་བཞད། །

ཁེངས་པའི་མེ་ཁྱེར་ངང་ཚུལ་མི་འཛིན་ཀྱང། །འཆར་ནུབ་མེད་པར་ཤེས་བྱ་ཀུན་གསལ་བའི། །ནོར་བུའི་སྒྲོན་མེ་སྤྱན་སྟོང་ལྡན་པས་ཀྱང། །རྙེད་མིན་དམ་པའི་བཀའ་དྲིན་དྲན་ཕྱག་བྱས། །ཞེས་པའང་བར་སྐབས་ཀྱི་ཚིགས་སུ་བཅད་པའོ། །

                                                                                                                             རྩོམ་སྒྲིག་པ། མང་ར་བ།

             གསལ་འདེབས། 
                       རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                                                                         དྲ་བའི་སྦྲེལ་ཐགhttp://www.tb1025.cn