གསུམ་པ་མངོན་རྟོགས་ཁྱད་པར་ཅན་སྐྱེ་རིམ་ལ། བླ་མེད་བྱང་ཆུབ་ལས་ཕྱིར་མི་ལྡོག་པའི་རྟགས། སྐུ་གསུམ་སྒྲུབ་བྱེད་ཀྱི་ལམ་བཤད་པ་གཉིས། དང་པོ་ལ། མདོར་བསྟན། རྒྱས་བཤད་གཉིས་ལས། དང་པོ་ནི། རྩ་བར། ངེས་འབྱེད་ཡན་ལག་ནས་བཟུང་སྟེ། །སོགས་ཚིགས་བཅད་གཅིག་བྱུང༌། གཉིས་པ་ནི། གཟུགས་ལ་སོགས་ལས་ལྡོག་སོགས་རྟགས། །ནས། བློ་ལྡན་མཐོང་བའི་ལམ་གནས་ཀྱི། །ཕྱིར་མི་ལྡོག་པའི་རྟགས་དག་ཡིན། །ཞེས་བྱུང༌། འཕྲོས་སྦྱོར་མཐའ་དཔྱད་གསུམ། དང་པོ་ནི། མདོ་ལས། བྱང་ཆེན་ཕྱིར་མི་ལྡོག་པའི་རྣམ་རྟགས་མཚན་མ་དག་གང་ལགས། ཞེས་པ་ནས། དེ་ནི་གང་ཅུང་ཟད་ཙམ་ཡང་བྱུང་རྒྱལ་དུ་སྨྲ་བ་མ་ཡིན་ཏེ། ཞེས་སྤྱིར་བསྟན་པ་དང༌། མདོ་ལས། ཆོས་ཐམས་ཅད་རྣམ་པ་མེད་པ་བརྟགས་མེད་པ་མཚན་མ་མེད་པའོ། །སོགས་སྦྱོར་མཐོང་སྒོམ་གསུམ་གྱི་རྟགས་བཤད་པ་གཉིས་ལས། དང་པོ་འཆད་པར་མདོར་བསྟན་དང༌། གཉིས་པ་འཆད་པར་རྒྱས་བཤད་བྱུང༌། གཉིས་པ་ནི། སྦྱོར་མཐོང་སྒོམ་གསུམ་གྱི་བྱང་སེམས་ཐབས་མཉམ་པའི་སེམས་དང་ཆོས་ཐམས་ཅད་མཚན་མེད་དུ་རྟོགས་པའི་ཤེས་རབ་གཉིས་དང་ལྡན་པ་དེ་དག་ཆོས་ཅན། ཕྱིར་མི་ལྡོག་པའི་གང་ཟག་ཏུ་ངེས་ཏེ། བདེན་འཛིན་གྱི་རྣམ་པར་མི་རྟོག་ཅིང་ལུས་བག་ཡོད་དང་ངག་དོན་ལྡན་དང་གཞན་ལ་སྐྱོན་མི་ཚོལ་བར་ལེགས་བཤད་ཁོ་ན་ལྷུར་ལེན་གྱི་བྱང་སེམས་ཡིན་པའི་ཕྱིར། མདོ་ལས། དེ་བཞིན་ཉིད་ལ་རེ་རེ་མེད་གཉིས་སུ་མེད་གཉིས་སུ་མ་ཡིན་པ་ཡང་མེད་དེ་ཅུང་ཟད་ཅིག་ཀྱང་རྣམ་པར་རྟོག་པར་མི་བྱེད་དོ། །དེ་ནི་གང་ཅུང་ཟད་ཙམ་ཡང་བྱུང་རྒྱལ་དུ་སྨྲ་བ་མ་ཡིན་ཏེ་དོན་དང་ལྡན་པའི་ཚིག་སྨྲ་ཡི་དོན་དང་མི་ལྡན་པའི་ཚིག་སྨྲ་བ་མ་ཡིན། གཞན་གྱི་བྱས་པ་དང་མ་བྱས་པ་མི་ལྟ་ཞིང་ལེགས་པར་བརྗོད་པ་ཚོལ་བ་ཡིན་ཏེ། ནས། མི་ལྡོག་པར་རིག་པར་བྱའོ། །ཞེས་སོ། །

    མཐའ་དཔྱད་པ་ལ་ཁ་ཅིག །བྱང་སེམས་སྦྱོར་ལམ་པ་དབང་རྣོན་ཡིན་ན་ཕྱིར་མི་ལྡོག་པའི་རྟགས་ཐོབ་ཅིང་དེ་ལུས་ངག་གི་མཚན་མ་ཟེར། ཁ་ཅིག །ཕྱིར་མི་ལྡོག་པའི་རྟགས་ཐོབ་པ་དང་སྦྱོར་ལམ་ཐོབ་མ་ཐག་གི་གཞི་མཐུན་མེད་ཟེར། ཡང་ཁ་ཅིག་རྟགས་ཀྱིས་དཔོགས་པ་རང་བཞིན་གྱི་རྟགས་ཟེར། ལ་ལ་འབྲས་རྟགས་ཟེར། མང་པོ་ཞིག་གཏན་ཚིགས་ཀྱིས་དཔོགས་པ་མེད་ཟེར་རོ། །འདི་དག་ལ་སྔ་ཕྱིའི་ལུགས་མང་ཡང་རིགས་པ་རེ་རེ་སྨྲ་ན། འོ་ན། ཐེག་ཆེན་གྱི་དྲོད་ཐོབ་མ་ཐག་གི་རྒྱུད་ཀྱི་གཟུགས་སོགས་ལ་བདེན་ཞེན་མངོན་གྱུར་ལོག་པ་དང་མི་ཁོམ་པ་བརྒྱད་དང་བྲལ་བའི་ཆ་ཆོས་ཅན། ལུས་ངག་གང་རུང་གི་མཚན་མ་ཡིན་པར་ཐལ། སྦྱོར་ལམ་པ་དབང་རྣོན་ཕྱིར་མི་ལྡོག་པའི་རྟགས་ཉི་ཤུ་པོ་གང་རུང་ཡིན་པའི་ཕྱིར། ཁྱབ་པ་ཁས། རྟགས་གྲུབ་སྟེ། རྩ་བར། གཟུགས་ལ་སོགས་ལས་ལྡོག་པ་དང༌། །ཐེ་ཚོམ་མི་དལ་ཟད་པ་དང༌། །ཞེས་གསུངས་པའི་ཕྱིར། འདོད་མི་ནུས་ཏེ། ལུས་ཀྱི་མ་ཡིན་ངག་གི་ཡང་མ་ཡིན་པའི་ཕྱིར། རྟགས་གཉིས་ཀ་གྲུབ་སྟེ། གཟུགས་ལ་བདེན་པར་འཛིན་པ་ཡིད་ཀྱི་ཤེས་པ་ཡིན་པའི་ཕྱིར། ལུགས་གཉིས་པ་ལ་སྦྱོར་ལམ་དྲོད་ཀྱི་རྟགས་ཐོབ་ན་དེ་གཞན་ལ་དཔོགས་དུས་ཀྱི་རྟགས་ཡིན་དགོས་པར་ཐལ། སྦྱོར་ལམ་པ་དབང་རྣོན་དྲོད་ཐོབ་མ་ཐག་ལ་རྟགས་ཐོབ་པ་མེད་པའི་ཕྱིར། ཁྱབ་སྟེ། དྲོད་ཀྱི་རྟགས་བཅུ་གཅིག་ལ་སེམས་ཀྱང་ཡོད་པའི་ཕྱིར། མ་གྲུབ་ན། དེའི་རྒྱུད་ཀྱི་སྐྱབས་གནས་ཡང་དག་ལ་ཐེ་ཚོམ་མངོན་གྱུར་ཟད་པ་དང༌། བྱམས་པའི་ཡིད་གཉིས་ཆོས་ཅན། དྲོད་ཀྱི་རྟགས་བཅུ་གཅིག་པོ་གང་རུང་མ་ཡིན་པར་ཐལ་ལོ། །འདོད་ན། རྩ་བར། བྱམས་ལུས་སོགས་དང་སྒྲིབ་པ་ནི། །རྣམ་པ་ལྔ་དང་མི་འགྲོགས་དང༌། །ཞེས་གསུངས་པ་དང་འགལ། རྩ་བར་འདོད་ན། སྦྱོར་ལམ་རྩེ་མོ་ཐོབ་མ་ཐག་ལ་རྩེ་མོའི་རྟགས་ལྡན་པ་མེད་ཅིང༌། ཆོས་མཆོག་ཐོབ་མ་ཐག་ལ་དེའི་རྟགས་ལྡན་པ་མེད་པར་ཐལ། སྦྱོར་ལམ་ལ་དེའི་ཕྱིར། འདོད་ན། ཆོས་མཆོག་ཐོབ་མ་ཐག་གི་རྒྱུད་ཀྱི་འཁོར་གསུམ་བདེན་མེད་དུ་རྟོགས་པའི་ཡེ་ཤེས་དང༌། རྩེ་མོ་བའི་རྒྱུད་ཀྱི་སེམས་གྱ་གྱུ་མེད་པ་དང༌། བཟོད་པ་བའི་རྒྱུད་ཀྱི་བདུད་ལ་བདུད་དུ་རྟོགས་པའི་ཤེས་རབ་རྣམས་ཆོས་ཅན། རྟགས་ཉི་ཤུ་གང་རུང་མ་ཡིན་པར་ཐལ་ལོ། །དེ་དག་ཐོབ་མ་ཐག་གི་དེ་མེད་པའི་ཕྱིར། འདོད་མི་ནུས་པར་སླ། ལུགས་གསུམ་པ་དང་བཞི་པ་ལ། འོ་ན། རང་བཞིན་གྱི་རྟགས་ཡང་དག་གི་སྒོ་ནས་ཕྱིར་མི་ལྡོག་པར་རྟོགས་པ་ཞིག་མེད་པར་ཐལ། རྟགས་དེ་ལ་འབྲས་རང་གང་ཡང་མེད་པའི་ཕྱིར། འདོད་ན། མདོ་ལས། རྣམ་པ་དང་རྟགས་དང་མཚན་མ་དེ་དག་དང་ལྡན་པའི་བྱང་ཆུབ་སེམས་དཔའ་ཕྱིར་མི་ལྡོག་པར་གཟུང་བར་བྱ། ཞེས་པའི་གཟུང་ཚུལ་ལ་དེ་གཉིས་གང་རུང་གི་ཤེས་པ་གཅིག་མེད་པར་ཐལ། འདོད་པའི་ཕྱིར། འདོད་མི་ནུས་ཏེ། འགྲེལ་ཆེན་ལས། གཟུང་བར་བྱའོ་ཞེས་བྱ་བ་ནི། །ནུས་པའི་རྒྱུ་ཡིས་འབྲས་སྐྱེ་བར། །རྗེས་སུ་དཔོགས་པ་གང་ཡིན་པ། །དོན་གཞན་ལ་ནི་མི་ལྟོས་ཕྱིར། །དེ་ནི་རང་བཞིན་ཡིན་པར་བརྗོད། །ཅེས་པའི་ཚུལ་གྱིས་དཔོགས་པར་བྱའོ། །ཞེས་གསུངས་པའི་ཕྱིར། དེ་ལ་ཁོ་ན་རེ། ལུས་ངག་གི་དེ་མི་དཔོགས་པར་ཐལ། གཡོ་ཅན་གྱི་ལུས་ངག་གི་ཐ་སྙད་དང་ནང་གི་བློ་མི་མཐུན་པའི་ཕྱིར་ན་མ་ཁྱབ་སྟེ། གཡོ་ཅན་གྱི་ལུས་སེམས་ཀྱི་འབྲེལ་བ་མ་ངེས་ཀྱང༌། ལུས་ངག་གི་ཐ་སྙད་ཅན་ལ་སེམས་དཔོགས་པ་མི་འཁྲུལ་བའི་ཕྱིར། རྒྱུད་གཞན་སྒྲུབ་པ་ལས། རང་ལུས་བློ་སྔོན་འགྲོ་བ་ཡི། །བྱ་བ་མཐོང་ནས་གཞན་ལ་དེ། །འཛིན་ཕྱིར་གལ་ཏེ་བློ་ཤེས་འགྱུར། །ཞེས་དང༌། ས་བཅུ་པའི་མདོ་ལས། དུ་བ་ལས་ནི་མེར་ཤེས་དང༌། །ཆུ་སྐྱར་ལས་ནི་ཆུ་ཤེས་ལྟར། །བྱང་ཆུབ་སེམས་དཔའ་བློ་ལྡན་གྱི། །རིགས་ནི་མཚན་མ་དག་ལས་ཤེས། །ཞེས་དང༌། ཉི་སྣང་ལས། རྟགས་ནི་རང་ལ་བརྟེན་ནས་མཚན་མས་བསྡུས་པའོ། །ཞེས་གསུངས་པའི་ཕྱིར་དང༌། འཇུག་པ་སོགས་དུ་མས་བཤད་པའི་ཕྱིར། ཡང་ཁ་ཅིག་ན་རེ། སྦྱོར་ལམ་བཟོད་པ་བ་ལ་དེའི་ཕྱིར་མི་ལྡོག་པའི་རྟགས་ཐོབ་པས་ཁྱབ་ཟེར་ན། རྩེ་མོ་ལ་ཡང་དེ་ལྟར་ཁྱབ་པར་ཐལ། བཟོད་པ་ལ་དེའི་ཕྱིར། ཁྱབ་སྟེ། སྦྱོར་ལམ་དྲོད་ཀྱི་རྟགས་བཅུ་གཅིག་ཐོབ་ལ་གཞན་མ་ཐོབ་པར་རྩེ་མོ་ཐོབ་མ་ཐག་ཆོས་ཅན། དེར་ཐལ། དེའི་ཕྱིར། དེས་མཐོང་ལམ་པ་དང་སྒོམ་ལམ་པ་ཡང་ཤེས་སོ། །ཡང་ཁ་ཅིག ། གཟུགས་སོགས་ལ་བདེན་འཛིན་མངོན་གྱུར་པ་ལྡོག་པ་སོགས་རྟགས་ཞེ་བཞི་གང་རུང་དང་ལྡན་པའི་སེམས་དཔའ་དེ། ཕྱིར་མི་ལྡོག་པའི་དགེ་འདུན་གྱི་མཚན་ཉིད་ཟེར་ན། སངས་འཕགས་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། དེར་ཐལ། ཐེག་ཆེན་གྱི་མི་སློབ་པའི་དགེ་འདུན་ཡིན་པའི་ཕྱིར། འདོད་ན། སེམས་དཔར་ཐལ་ལོ། །མཚན་ཉིད་དེ་སློབ་པ་ཕྱིར་མི་ལྡོག་པའི་དགེ་འདུན་གྱི་མཚན་ཉིད་ཟེར་ན། དབང་རྟུལ་མཐོང་ལམ་པ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། དེར་ཐལ། སློབ་པ་དང་ཕྱིར་མི་ལྡོག་པའི་དགེ་འདུན་གྱི་གཞི་མཐུན་ཡིན་པའི་ཕྱིར། དེར་ཐལ། དམན་ལམ་སྔོན་མ་སོང་གི་ཐེག་ཆེན་མཐོང་ལམ་པ་ཡིན་པའི་ཕྱིར། ཁྱབ་སྟེ། གསེར་འཕྲེང་ལས། རྟགས་མ་ཐོབ་ཀྱང་ས་ཐོབ་ནས་ཐེག་དམན་དུ་ལྟུང་བ་ནི་མི་སྲིད་དེ། ཞེས་གསུངས་པའི་ཕྱིར། ཡང་ཁ་ཅིག །བྱང་སེམས་ཚོགས་ལམ་པ་ལམ་གཞན་དུ་མི་འཇུག་པ་ཕྱིར་མི་ལྡོག་པའི་སློབ་པའི་དགེ་འདུན་ཡིན་ཟེར་ན། དེ་སློབ་པར་ཐལ། འདོད་པའི་ཕྱིར། འདོད་མི་ནུས་ཏེ། སློབ་པ་སྦྱོར་ལམ་ལས་དམན་པ་མ་བཤད་པའི་ཕྱིར། ཡང་ཁ་ཅིག་ན་རེ།.....ཤེས་རབ། རྒྱུད་བླ་མ་ལས། ཇི་སྲིད་ས་བརྒྱད་མ་ཐོབ་པ། །དེ་སྲིད་ཐེག་པ་དམན་པས་འཇིགས། །ཞེས་ཟེར། གཞན་དག་ན་རེ། ལུང་དེ་ལང་གཤེགས་ལས་ཟེར་བ་གཉིས་ཀ་མི་འཐད་པར་ཐལ། དེ་རྒྱུད་རྡོ་རྗེ་རྩེ་མོའི་ཚིག་ཡིན་པའི་ཕྱིར། ཡང་རོང་ཊཱིཀ་པ་ན་རེ། མ་དག་ས་བདུན་སྐབས་སུ་སྦྱོར་བའི་སྒོ་ནས་ཕྱིར་མི་ལྡོག་པའི་རྟགས་ཐོབ་ཀྱང་བསམ་པའི་སྒོ་ནས་མ་ཐོབ་སྟེ། རང་ཉིད་འབའ་ཞིག་གི་དོན་དུ་ཐར་པ་དོན་དུ་གཉེར་བའི་བྱང་འཕགས་ཡོད་པའི་ཕྱིར། ལུང་ལས། ཇི་སྲིད་ས་བརྒྱད་མ་ཐོབ་པ། །དེ་སྲིད་ཐེག་པ་དམན་པས་འཇིགས། །ཞེས་གསུངས་པའི་ཕྱིར་ཟེར་ན། འོ་ན། ཐེག་ཆེན་སེམས་བསྐྱེད་ཉམས་པའི་བྱང་འཕགས་ཡོད་པར་ཐལ། རང་ཉིད་འབའ་ཞིག་གི་དོན་དུ་ཐར་པ་དོན་དུ་གཉེར་བའི་དེ་ཡོད་པའི་ཕྱིར། རྟགས་ཁས། ཡང་ཁ་ཅིག །སྦྱོར་ལམ་པ་ཕྱིར་མི་ལྡོག་པའི་རྟགས་ཐོབ་པའི་དེ་ཡིན་ན་གཟུགས་སོགས་ལ་བདེན་ཞེན་མངོན་གྱུར་པ་འགགས་པས་ཁྱབ་ཟེར་ན། སྦྱོར་ལམ་ཕྱིར་མི་ལྡོག་པའི་རྟགས་ཐོབ་པའི་གཟུགས་ལ་བདེན་འཛིན་ལྷན་སྐྱེས་མངོན་གྱུར་རྒྱུད་ལ་ལྡན་པའི་སེམས་དཔའ་ཆོས་ཅན། དེར་ཐལ། དེའི་ཕྱིར། དེར་ཐལ། དེ་ཡོད་པའི་ཕྱིར། མ་དག་ས་བདུན་གྱི་སྐབས་སུ་བདེན་འཛིན་ལྷན་སྐྱེས་མངོན་གྱུར་འཇུག་པའི་ཕྱིར། ཡང་ཁ་ཅིག །ས་དགུ་པ་བ་ཡིན་ན། སྦྱོར་མཐོང་སྒོམ་གསུམ་གྱི་ཕྱིར་མི་ལྡོག་པའི་རྟགས་ཐོབ་པས་ཁྱབ་ཟེར་ན། སྦྱོར་མཐོང་གཉིས་ཀྱི་གནས་སྐབས་སུ་དེའི་རྟགས་མ་ཐོབ་པར་ས་བརྒྱད་པའི་གནས་སྐབས་སུ་ཐོབ་པའི་ས་དགུ་པ་བ་ཆོས་ཅན། དེར་ཐལ། དེའི་ཕྱིར། རྟགས་གྲུབ་སྟེ། དབང་རྣོན་གྱིས་སྦྱོར་ལམ་སྐབས་དང༌། དབང་འབྲིང་གིས་མཐོང་ལམ་སྐབས་སུ་དང༌། དབང་རྟུལ་གྱིས་ས་བརྒྱད་པའི་གནས་སྐབས་སུ་འཐོབ་པའི་ཕྱིར་ཏེ། རྣམ་བཤད་ལས། དབང་པོ་རྣོན་པོས་ནི་སྦྱོར་ལམ་དྲོད་ནས་དང༌། འབྲིང་པོས་མཐོང་ལམ་དང༌། དབང་པོ་ཇི་ལྟར་རྟུལ་ཡང་ས་བརྒྱད་པ་ནས་ཐོབ་པར་རྣམ་པར་བཞག་གོ །ཞེས་གསུངས་པའི་ཕྱིར། ཟླ་འོད་ལས། དབང་པོ་འབྲིང་ནི་ས་རབ་ཏུ་དགའ་བ་ལས་ཏེ། ནས། དབང་པོ་རྟུལ་པོ་ནི་ས་མི་གཡོ་བ་ལས་ཏེ། ཞེས་གསུངས་པའི་ཕྱིར།

    རང་ལུགས་ལ། བསམ་སྦྱོར་གཉིས་ཀྱི་སྒོ་ནས་གཟུགས་སོགས་ལ་བདེན་ཞེན་མངོན་གྱུར་པ་ལྡོག་པ་སོགས་རྟགས་ཞེ་བཞི་པོ་གང་རུང་ཐོབ་པའི་སེམས་དཔའ་དེ། ཕྱིར་མི་ལྡོག་པའི་རྟགས་ཐོབ་པའི་བྱང་ཆུབ་སེམས་དཔའི་དགེ་འདུན་གྱི་མཚན་ཉིད། ཕྱིར་མི་ལྡོག་པའི་རྟགས་ཞེ་བཞི་ཡོད་དེ། སྦྱོར་ལམ་དྲོད་ཀྱི་བཅུ་གཅིག རྩེ་མོའི་དྲུག བཟོད་པའི་གཉིས། ཆོས་མཆོག་གི་གཅིག་སྟེ་སྦྱོར་ལམ་གྱི་ཉི་ཤུ་དང༌། མཐོང་ལམ་སྐད་ཅིག་མ་བཅུ་དྲུག་གི་རྟགས་བཅུ་དྲུག་དང༌། སྒོམ་ལམ་གྱི་ཕྱིར་མི་ལྡོག་པའི་རྟགས་བརྒྱད་ཡོད་པ་དེའི་ཕྱིར། དང་པོ་གྲུབ་སྟེ། རྩ་བར། རྟགས་ནི་ཉི་ཤུ་དེ་དག་གིས། །དྲོད་དང་རྩེ་མོ་བཟོད་བཅས་དང༌། །ཆོས་མཆོག་རྣམས་ལ་གནས་པ་ནི། །རྫོགས་པའི་བྱང་ཆུབ་ལས་མི་ལྡོག །ཅེས་གསུངས་པའི་ཕྱིར། གཉིས་པ་གྲུབ་སྟེ། མཐོང་ལམ་སྐབས་ཀྱི་གཟུགས་སོགས་བདེན་འཛིན་ལོག་པ་དང༌། སངས་རྒྱས་ཀྱི་བྱིན་རླབས་ཀྱིས་སེམས་བརྟན་པ་ནས་ཆོས་ཀྱི་དོན་དུ་སྲོག་གཏོང་བའི་ཡེ་ཤེས་ཀྱི་བར་བཅུ་དྲུག་ཡོད་པའི་ཕྱིར། རྩ་བར། དེ་འདྲའི་སྐད་ཅིག་བཅུ་དྲུག་ནི། །བློ་ལྡན་མཐོང་བའི་ལམ་གནས་ཀྱི། །ཕྱིར་མི་ལྡོག་པའི་རྟགས་དག་ཡིན། །ཞེས་སོ། །གསུམ་པ་གྲུབ་སྟེ། ཟབ་པ་སོགས་བརྒྱད་ཡོད་པའི་ཕྱིར། རྩ་བར། སྐྱེ་བ་དང་ནི་འགག་པ་དང༌། །ནས། ཐབས་མཁས་པ་ལ་ཟབ་པ་ཉིད། །ཅེས་གསུངས་པའི་ཕྱིར། ཕྱིར་མི་ལྡོག་པའི་རྟགས་ལ་སྦྱོར་ལམ་དྲོད་ཀྱི་བཅུ་གཅིག་པོ་རེ་རེའི་སྟེང་ལ་གསུམ་གསུམ་ཡོད་དེ། དེ་རེ་རེའི་སྟེང་གི་རྣམ་པ་ནི་གཉེན་པོའི་ཕྱོགས་སམ་ལུས་ཀྱི་རྣམ་པ་གཉིས་དང༌། རྟགས་ནི་རང་ལ་གནས་པའི་མཚན་མའམ་ངག་གི་རྟགས་གཉིས་དང༌། མཚན་མ་ནི་དེའི་ལོངས་སྤྱོད་དམ་ཉམས་སུ་ལེན་འཛིན་སོགས་ལ་བྱེད་པ་ཉི་སྣང་དང་འགྲེལ་ཆེན་ལས་བཤད་པའི་ཕྱིར།

    རྩོད་སྤོང་ལ་ཁོ་ན་རེ། ཕྱིར་མི་ལྡོག་པའི་དགེ་འདུན་ཡིན་ན། ཕྱིར་མི་ལྡོག་པའི་རྟགས་ཞེ་བཞི་གང་རུང་ཐོབ་པས་ཁྱབ་པར་ཐལ། དེ་དེའི་རྟགས་ཡིན་པའི་ཕྱིར་ན་མ་ཁྱབ་སྟེ། དེའི་རྟགས་མ་ཐོབ་པའི་བྱང་འཕགས་དང༌། ཕྱིར་མི་ལྡོག་པའི་ཚོགས་ལམ་པ་ཡོད་པའི་ཕྱིར་ཏེ། ཟླ་འོད་ལས། འདིར་དབང་པོ་རབ་ཀྱི་བྱང་ཆུབ་སེམས་དཔའ་ནི་ཚོགས་ཀྱི་ས་ནས་ཀྱང༌། ཞེས་དང༌། རྣམ་བཤད་ལས། འགའ་ཞིག་རིགས་མ་ངེས་པ་ཡིན་ཡང་ཐེག་ཆེན་གྱི་ཚོགས་ལམ་ནས། ཞེས་གསུངས་པའི་ཕྱིར། རྩ་བར་འདོད་ན། འོ་ན་ཕྱིར་མི་ལྡོག་པའི་རྟགས་ཡིན་ན་ཞེ་བཞི་གང་རུང་ཡིན་དགོས་པར་ཐལ། དེ་ཐོབ་ན་ཞེ་བཞི་གང་རུང་ཐོབ་པས་ཁྱབ་པའི་ཕྱིར། འདོད་ན། སྦྱོར་ལམ་པའི་རྒྱུད་ཀྱི་བསམ་སྦྱོར་ཕུན་ཚོགས་གཉིས་ཆོས་ཅན། དེར་ཐལ། དེའི་ཕྱིར། དེའི་བསམ་སྦྱོར་ཕུན་སུམ་ཚོགས་པའི་རྟགས་ཀྱིས་གང་ཟག་དེ་ཕྱིར་མི་ལྡོག་པར་དཔོག་པའི་ཕྱིར། རྣམ་བཤད་ལས། ཐབས་ཤེས་ཁྱད་པར་ཅན་དེ་དག་དང་ལྡན་པའི་རྟགས་ལས། ཞེས་གསུངས་པའི་ཕྱིར། དེ་རྟགས་ཀྱི་གཙོ་བོར་དང་གཞན་ཕལ་པ་ཡིན་པའི་ཕྱིར། གསེར་འཕྲེང་ལས། ཐབས་ཤེས་རྒྱུན་ཤིན་ཏུ་བརྟན་པ་གཉིས་ནི་རྟགས་ཀྱི་གཙོ་བོ་ཡིན་ལ་གཞན་རྣམས་ཆ་ཙམ་དུ་རིག་པར་བྱའོ། །ཞེས་གསུངས་པའི་ཕྱིར། ཡང་ཁོ་ན་རེ། མཐོང་ལམ་ཤེས་བཟོད་སྐད་ཅིག་མ་བཅུ་དྲུག་ཕྱིར་མི་ལྡོག་པའི་རྟགས་ཡིན་པར་ཐལ། རྩ་བར། མཐོང་བའི་ལམ་ལ་བཟོད་པ་དང༌། །ཤེས་པའི་སྐད་ཅིག་བཅུ་དྲུག་ནི། །བྱང་ཆུབ་སེམས་དཔའ་མི་ལྡོག་པའི། །མཚན་ཉིད་ཡིན་པར་ཤེས་པར་བྱ། །ཞེས་གསུངས་པའི་ཕྱིར་ན་མ་ཁྱབ་སྟེ། གཟུགས་སོགས་འདུ་ཤེས་ལྡོག་པ་ནས་ཆོས་ཀྱི་དོན་དུ་སྲོག་གཏོང་བའི་རྗེས་ཐོབ་ཀྱི་ལུས་ངག་གི་བྱ་བ་བཅུ་དྲུག་ལ་རྒྱུ་ཤེས་བཟོད་བཅུ་དྲུག་གི་མིང་བཏགས་པ་གང་ཞིག །དེ་ལ་དགོས་པ་ཆེན་པོ་ཡོད་པའི་ཕྱིར། དང་པོ་གྲུབ་སྟེ། རྣམ་བཤད་ལས། ལུས་ངག་གི་ཐ་སྙད་ཁྱད་པར་ཅན་ལ་ཤེས་བཟོད་ཀྱི་མིང་གིས་བཏགས་ནས་བཤད་ཅེས་དང༌། གསེར་འཕྲེང་ལས། བཟོད་པ་དང་ཤེས་པས། ཞེས་པ་ནས། འབྲས་བུ་ལ་རྒྱུ་མིང་གིས་བཏགས་པའོ། །ཞེས་གསུངས་པའི་ཕྱིར། གཉིས་པ་གྲུབ་སྟེ། སར་གནས་ཀྱི་ལུས་ངག་གདུལ་བྱའི་དབང་མ་གཏོགས་དུས་ཐམས་ཅད་དུ་མཉམ་བཞག་དང་འདྲ་བར་ཤེས་ཆེད་དུ་བཏགས་པའི་ཕྱིར་དང༌། སྐད་ཅིག་བཅུ་དྲུག་གིས་ཐ་སྙད་བཅུ་དྲུག་སོ་སོར་སྐྱེད་པ་ཤེས་པའི་ཆེད་ཡིན་པའི་ཕྱིར། རྒྱུད་བླ་མ་ལས། རྒྱལ་སྲས་འགྱུར་མེད་ཆོས་ཉིད་འདི། །རྟོགས་ནས་མ་རིག་ལྡོངས་རྣམས་ཀྱི། །སྐྱེ་བ་ལ་སོགས་དག་ཏུ་ནི། །མཐོང་བ་གང་ཡིན་དེ་སྨད་དོ། །དེ་ནི་འཇིག་རྟེན་ཐམས་ཅད་ལས། །འདས་ཀྱང་འཇིག་རྟེན་ལས་མ་གཡོས། །འཇིག་རྟེན་དོན་དུ་འཇིག་རྟེན་ན། །འཇིག་རྟེན་དྲི་མས་མ་གོས་སྤྱོད། །ཅེས་གསུངས་པའི་ཕྱིར། རྣམ་བཤད་ལས། སེམས་ཅན་གདུལ་བའི་དགོས་པའི་དབང་མ་གཏོགས་པར་དུས་ཐམས་ཅད་དུ་མཉམ་བཞག་གི་རྟོག་པ་དང་མཐུན་པ། ཞེས་སོ། །གསེར་འཕྲེང་ལས་ཀྱང་དེའོ། །དང་པོ་ཉེར་གཉིས་སླ།

    གསུམ་པ་སྒོམ་ལམ་ཕྱིར་མི་ལྡོག་ལ་སྒོམ་ལམ་དང་དེའི་རྟགས་བཤད་པ་གཉིས། དང་པོ་ལ་སྒོམ་ལམ་གྱི་ཁྱད་ཆོས་དང༌། ཁྱད་གཞི་སྒོམ་ལམ་དང༌། སྒོམ་ལམ་གྱི་དབྱེ་བ་གསུམ། དང་པོ་ནི། རྩ་བར། སྒོམ་པའི་ལམ་ནི་ཟབ་པ་སྟེ། སོགས་ཚིགས་བཅད་གཅིག་བྱུང༌། གཉིས་པ་ནི། རྩ་བར། ངེས་འབྱེད་ཡན་ལག་དང་མཐོང་བའི། །སོགས་ཚིགས་བཅད་གཅིག་བྱུང༌། གསུམ་པ་ལ་དགུར་ཕྱེ་བ་དང༌། དེ་ལ་རྩོད་སྤོང་གཉིས། དང་པོ་ནི། རྩ་བར། དེ་ནི་རྒྱུན་ཆགས་ཡིན་པའི་ཕྱིར། །ཞེས་སོགས་ཚིགས་བཅད་གཅིག་བྱུང༌། གཉིས་པ་ལ་གྲངས་ཀྱི་རྩོད་སྤོང་དང༌། བྱེད་པའི་རྩོད་སྤོང་གཉིས། དང་པོ་ནི། རྩ་བར། གྲངས་མེད་ལ་སོགས་བསྟན་པ་རྣམས། །ཞེས་སོགས་བཞི་བྱུང༌། གཉིས་པ་ལ། དོན་ལ་ལྟོས་པའི་རྩོད་སྤོང་དང༌། ཐ་སྙད་ལ་ལྟོས་པའི་རྩོད་སྤོང་གཉིས། དང་པོ་ལ་རྩོད་པ་དང་ལན་གཉིས། དང་པོ་ནི། རྩ་བར། དངོས་པོ་བརྗོད་དུ་མེད་པ་ལ། །ཞེས་སོགས་ཚིགས་བཅད་གཅིག་བྱུང༌། གཉིས་པ་དེའི་ལན་ནི། རྩ་བར། བྱང་ཆུབ་ཇི་ལྟ་དེ་བཞིན་དུ། །ཞེས་སོགས་ཚིགས་བཅད་གཅིག་བྱུང༌། གཉིས་པ་ལ་ཐ་སྙད་པའི་རྩོད་པ་དང་ལན་གཉིས། དང་པོ་ནི། སེམས་བསྐྱེད་སྐད་ཅིག་སྔ་ཕྱི་རེ་རེ་བ་དང་ཐམས་ཅད་དུས་གཅིག་ཚོགས་པ་མ་ཡིན་པས་འཚང་རྒྱ་བ་མི་འཐད་ཅེས་པའི་རྩོད་པ་ནི། རྩ་བར། སེམས་ནི་སྔ་མས་བྱང་ཆུབ་པར། །ཞེས་རྐང་པ་གཉིས་བྱུང༌། གཉིས་པ་དེའི་ལན་ནི། མར་མེ་ལྟར་སེམས་བསྐྱེད་དེ་རེ་རེ་དང་ཚོགས་པས་མིན་ཀྱང་སྔ་མས་ཕྱི་མ་ལ་ཕན་བཏགས་པའི་སྒོ་ནས་འཚང་རྒྱའོ། །ཞེས་འཆད་པ་ནི། རྩ་བར། མར་མེ་དཔེ་ཡི་ཚུལ་གྱིས་ནི། །ཟབ་མོའི་ཆོས་ཉིད་རྣམ་པ་བརྒྱད། །ཅེས་བྱུང༌། གཉིས་པ་ཕྱིར་མི་ལྡོག་པའི་རྟགས་འཆད་པར། རྩ་བར། སྐྱེ་བ་དང་ནི་འགག་པ་དང༌། །ཞེས་སོགས་ཚིགས་བཅད་གཅིག་བྱུང༌།

                                                                                                                     རྩོམ་སྒྲིག་པ། མང་ར་བ།

           གསལ་འདེབས། 
                       རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                                                                         དྲ་བའི་སྦྲེལ་ཐགhttp://www.tb1025.cn