༄༅།།རྒྱལ་དང་རྒྱལ་བའི་སྲས་རྣམས་བཤེགས་པའི་བཤུལ། །ལེགས་གསུངས་ལེགས་ལམ་ཇི་བཞིན་ཐུགས་ཆུད་ནས། །མ་ནོར་མ་འདྲེས་རྫོགས་པར་སྟོན་མཛད་པའི།།མཁས་པའི་མཁས་པ་དེ་ལ་མགོས་ཕྱག་འཚལ། །རྣམ་རིག་གཞུང་གི་ཤིན་ཏུ་དཀའ་བའི་གནས། །ཡིད་དང་ཀུན་གཞི་གསལ་བར་བསྟན་པ་དང་།།བདག་ཉིད་དྲན་པ་གསོ་བར་བྱ་བའི་ཕྱིར། །བླ་མའི་གསུང་ལ་བརྟེན་ནས་འདིར་བཤད་བྱ། །སྨྲ་བའི་དམ་པས་ཐེག་པ་མཆོག །འཛིན་པར་ལུང་བསྟན་འཕགས་པ་ཀླུས།།ཐེག་མཆོག་རྒྱས་པར་མཛད་པའི་རྗེས། །ལུང་བསྟན་བརྙེས་པའི་ཐོགས་མེད་ཀྱིས། །སྲོལ་གཏོད་སྔོན་དུ་དབུ་མ་ཉིད། །མཚན་ཉིད་གྲུབ་པར་བྱེད་པ་དང་།།དགུ་དང་གཅིག་པུར་འདོད་པ་དགག །དོན་རྣམ་བཞི་ཡིས་ཀུན་གཞི་དང་། ཉོན་མོངས་ཅན་ཡིད་ཤེས་པར་བྱ།མཚན་ཉིད་གཉིས་ལས་ཀུན་གཞི་ནི།རྟེན་དང་བརྟེན་པའི་དབྱེ་བ་ཡིས། །མཚན་ཉིད་རྣམ་པ་གཉིས་སུ་འདོད། །དེ་ལ་རྟེན་གྱུར་ཀུན་གཞི་ནི།།དོན་དང་སེམས་ཅན་བགས་ཆགས་ལ། །རྣམ་པ་རིག་པ་མ་རིག་པ། །ལུང་དུ་མ་བསྟན་རེག་ལ་སོགས། །ལྔ་ཉིད་དང་ལྡན་ས་བོན་གྱི། །དབང་གི་གནས་དོན་ལུས་སུ་ནི།།སྣང་ཕྱིར་དམིགས་པ་དག་ཏུ་འདོད། །ཀུན་གཞིའི་གཟུང་ཆ་དག་ལ་ནི། །རྣམ་ཤེས་ལྔ་ཡིས་འཛིན་བྱེད་ཅིང་། །དྲུག་པས་ཐ་སྙད་འདོགས་པས་ན།།ཁམས་གཉིས་དག་ཏུ་ངེས་པ་སྟེ། །དེ་ལྟ་མིན་ན་གཟུགས་མེད་པ།གཟུགས་ཀྱི་འདུ་ཤེས་མ་འདས་དང་། །གཟུགས་ཅན་ས་རུ་ཐལ་འགྱུར་ཏེ།།ཤེས་ལ་གཟུགས་སུ་སྣང་བ་ལས། །མ་གཏོགས་ཕྱི་རོལ་མེད་ཕྱིར་རོ།།འོག་ནའང་སེམས་ཅན་གཅིག་གི་ནི། །ཀུན་གཞི་ལ་ནི་སྣོད་དང་བཅུད།།ཐམས་ཅད་སྣང་ན་གཟུགས་ཁམས་ཀྱི། །ལྷ་ལའང་དམྱལ་སྣང་འབྱུང་བ་དང་། །དམྱལ་བ་ལ་ཡང་ལྷ་རྣམས་ཀྱི། །སྣོད་བཅུད་སྣང་བ་འབྱུང་བ་དང་།།ཐ་མལ་རྣམས་ལ་བསྐལ་པ་ཡི། །ཡུལ་སྣ་ཚོགས་པར་སྣང་བར་འགྱུར། །དངོས་སུ་རང་གི་དབང་དོན་ནོ། །བརྒྱུད་ནས་དེ་ཡི་ཚོགས་དྲུག་གི །ཡུལ་དུ་སྣང་བར་གང་ནུས་པ།།ཀུན་གཞིའི་ཡུལ་དུའང་འཇོག་པ་ཡིན། དབང་དོན་ལས་གཞན་དྲུག་པའི་ཡུལ། །ཀུན་གཞིའི་ཡུལ་དུ་མི་འགྱུར་ཏེ། །དྲུག་པ་གཏགས་པའི་ཡུལ་ཅན་དང་།།ཀུན་གཞི་དཀྲར་འཛིན་གྱིས་དབེན་ཕྱིར། །བགས་ཆགས་བསྒོ་གཞི་ཡིན་ཕྱིར་དང་། །དགེ་དང་མི་དགེ་མངོན་གྱུར་དང་། །རྒྱུད་གཅིག་ལ་ནི་འཇུག་པའི་ཕྱིར།།མ་བསྒྲིབས་ལུང་མ་བསྟན་དུ་གྲུབ། །ལུང་མ་བསྟན་དང་མི་གསལ་ཕྱིར། །རེག་སོགས་ལྔར་ངེས་ཚོར་བ་ནི། །བར་མའོ་འདི་ལ་བདག་ཏུ་ནི། །སྦྱོར་བའི་ཕྱིར་ན་ཀུན་གཞིའོ།།ལྷག་མ་མེད་དང་རྡོ་རྗེ་ལྟའི། །བར་དུ་རྒྱུན་མི་ཆད་དུ་འཇུག །བརྟེན་པ་ས་བོན་ཀུན་གཞི་ནི། །སྒོ་བར་བྱེད་པས་བསྒོ་བཞི་ལ། །བཞག་པའི་ནུས་བའོ་སྒོ་བཞི་ནི།།བརྟན་ལུང་མ་བསྟན་བསྒོ་བྱ་ལ།།སྒོ་བར་བྱེད་དང་འབྲེལ་བ་དང་།།མཐའ་གཅིག་རྟེན་དུ་གྱུར་བ་སྟེ།།ཁྱད་པར་ལྔ་དང་ལྡན་པའོ།།ཕྱི་དང་ནང་དང་མི་གསལ་བ།།གཉིས་དང་ཀུན་རྫོབ་ཉིད་དང་ནི།།དམ་པའི་དོན་ཏེ་དེ་དག་ཀུན།།ས་བོན་རྣམ་པ་དྲུག་ཏུ་འདོད།།གཞན་ཡང་མངོན་བརྗོད་བདག་ལྟ་དང་།།སྲིད་པའི་ཡན་ལག་བག་ཆགས་གསུམ།།ཐུན་མོང་ཐུན་མོང་མ་ཡིན་དང་།།ཚོར་དང་བཅས་དང་ཚོར་མེད་པའི།།ས་བོན་རྣམ་བཞི་གནས་ངན་ལེན།།ཤིན་ཏུ་སྦྱངས་དང་སྤྱད་ཟིན་དང་།།མ་ཟིན་པ་དང་བཞི་རུའི་གསུངས།།བག་ཆགས་དེ་ཡང་རྟེན་ལས་ནི།།རྫས་གཅིག་ཐ་དད་གང་ཡང་མིན།།ས་བོན་དམིགས་རྣམ་ཡོད་པ་དང་།།འགྲོ་བ་ལྔ་ཡི་ས་བོན་རྣམས།།འཆོལ་བ་ཉིད་དུ་འགྱུར་བ་དང་།།ཁམས་ཀྱང་འཆོལ་ཕྱིར་གཅིག་ཉིད་མིན།།རྟེན་གཅིག་ལ་ནི་ཀུན་གཞི་གཉིས།།ཡོད་པར་འགྱུར་བས་སོ་སོ་མིན།།དེས་ན་རྟེན་ལས་དེ་ཉིད་དང་།།གཞན་དུ་བརྗོད་དུ་མེད་པ་སྟེ།།བཏགས་ཡོད་ཙམ་དུ་གནས་ཕྱིར་རོ།།འཇོག་བྱེད་དགེ་སོགས་གང་ཡིན་ཀྱང་།།བཞག་པའི་བག་ཆགས་ལུང་མ་བསྟན།།དགེ་དང་མི་དགེ་མཚད་ཉིད་པར།།འདོད་ལ་སྒྲུབ་བར་བྱེད་པ་མེད།།བག་ཆགས་འཇོག་པའི་ཚུལ་ལ་གསུམ།།ཆོས་ཉིད་ཀྱིས་གནས་སྔོན་མེད་བསྐྱེད།།དེ་དག་གཉིས་ཀར་འདོད་པའོ།།ཀུན་ནས་ཉོན་མོངས་ཆོས་ཐམས་ཅད།།རྒྱུའམ་འབྲས་བུའི་དངོས་པོ་རུ།།སྦྱོར་བའི་ཕྱིར་ན་ཀུན་གཞིའོ།།དེའི་ཕྱིར་དབང་ཐོབ་དགྲ་བཅོམ་ལ།།ཀུན་གཞི་ཡོད་པ་མ་ཡིན་ཏེ།།འཇོག་བྱེད་གཉིས་བོ་མེད་ཕྱིར་རོ།།

ཉོན་མོངས་ཅན་ཡིད་མཚན་ཉིད་ནི།།ཀུན་གཞི་རྣམ་སྨིན་ཆ་ཉིད་ལ། །བདག་ལྟ་བསྒྲིབས་ལ་ལུང་མ་བསྟན། །རེག་དང་ཆགས་སོགས་དགུ་ཁོ་ན། །འགོག་པ་མཉམ་བཞག་གནས་སྐབས་དུས།།དབང་ཐོབ་དགྲ་བཅོམ་མཐར་ཐུག་གོ ། ཉོན་མོངས་ཅན་དུ་འཇོག་བྱེད་པའི། །གང་ཟག་འཛིན་པ་ལོགས་གྱུར་ཀྱང་། །དེ་ཡི་རིག་ཙམ་ཡོད་ཕྱིར་དང་།།ཆོས་འཛིན་སྐྱེད་ནུས་མ་ལོག་ཕྱིར། །ཡིད་ཤེས་མེད་དང་མཉམ་པ་ཉིད། །ཐོབ་པའི་སྐྱོན་གཉིས་རིང་དུ་སྤངས། །ཡིད་ཆེས་ལུང་དང་རིག་པ་ཡིས།།རྣམ་ཤེས་དྲུག་ལས་ཐ་དད་པའི། །ཡིད་དང་ཀུན་གཞི་རྣམ་པར་ཤེས། །ཡོད་པར་ཁོང་དུ་ཆུད་པར་བྱ། །རྣལ་འབྱོར་སྤྱོད་པའི་གཞུང་ལུགས་ནས།།སྒྲུབ་བྱེད་རིག་པ་མཐའ་ཡས་པ། །གསུངས་ཀྱང་ལེན་དང་དང་པོ་གསལ། །ས་བོན་ལས་དང་ལུས་ཚོར་དང་། །སྙོམས་འཇུག་འཆི་འཕོ་མི་རུང་བ་།།བརྒྱད་དུ་འདུས་ཕྱིར་འདི་བཤད་བྱ། །ཀུན་གཞི་རྣམ་པར་ཤེས་པ་དེ། །ཐེགས་དམན་གཙུག་ལག་རྣམས་སུ་ཡང་། །ཀུན་གཞི་རྩ་བའི་རྣམ་ཤེས་དང་།།སྲིད་པ་ཡན་ལག་ཇི་སྲིད་པའི། །ཕུང་བོའི་རྣམ་གྲངས་དག་གིིས་བསྟན། །དེ་ལྟར་གསུངས་པའི་ཀུན་གཞི་ལ། །དབྱིག་བཤེས་མིའུ་ཐུང་དབྱངས་སྒྲོགས་གསུམ།།རིམ་བཞིན་ཕུང་པོ་ཚོར་བ་དང་། །འཇིག་ལྟ་གསུམ་ལ་དགོངས་ཞེས་འདོད། །ཐེག་པ་འོག་མའི་ལུགས་དག་ལ། །ཚུལ་དེ་མི་རུང་མེད་མོད་ཀྱི།།ཐེག་ཆེན་པ་རྣམས་ལུང་དེའི་དོན། །ཀུན་གཞི་རྣམ་པར་ཤེས་པ་རུ། །འདོད་པ་ཆེས་ཆེར་བཟང་བ་སྟེ། །གང་ཕྱིར་དབྱིག་བཤེས་སོགས་ཀྱིས་ནི།།བཀྲལ་བ་སྐྱོན་དང་ལྡན་ཕྱིར་རོ། །ཉོན་མོངས་ཅན་གྱི་ཡིད་མེད་ན། །མ་འདྲེས་པ་ཡི་མ་རིག་དང་། །ལྔ་པོ་དག་དང་འདྲ་བ་དང་། །སྙོམས་པར་འཇུག་པའི་བྱེ་བྲག་དང་།།ངེས་ཚིག་མེད་པའི་སྐྱོན་དུ་འགྱུར། །འདུ་ཤེས་མེད་པར་སྐྱེས་པའི་རྒྱུན། །ངར་འཛིན་མེད་པའི་སྐྱོན་དུ་འགྱུར། །ངར་འཛིན་པ་དང་ལྡན་པ་ནི།།རྣམ་པ་ཀུན་ཏུ་མི་འཐད་ཕྱིར། །ཉོན་ཡིད་ཡོད་པར་ཤེས་པར་བྱ། །བདུན་པ་ལེན་པའི་རྣམ་ཤེས་དང་།།ཀུན་གཞི་གསུམ་དུ་འཆད་པ་དང་།།དགུ་བ་དྲི་མེད་རྣམ་ཤེས་སུ།།འདོད་པ་ཡང་དག་བདེན་པའི་ལུགས།།ཚོགས་བརྒྱད་དག་ལས་ལོགས་པ་ཡི།།གཙོ་བོ་རྣམ་ཤེས་ཡོད་གྱུར་བ།།རྟག་པའི་དངོས་པོར་འགྱུར་བའི་ཕྱིར།།ཚོགས་དགུར་འདོད་ལ་སྒྲུབ་བྱེད་མེད།།ཡིད་ཤེས་གཅིག་ཉིད་དབང་དྲུག་གི།།རྟེན་ལ་སོ་སོར་རྒྱུ་བའི་ཚེ།།སོ་སོའི་མིང་དུ་བཏགས་པ་ཙམ།།བྲམ་ཟེའི་ཚོམས་དང་སྐྱེ་མཆེད་ནི།།བཅུ་གཉིས་སྟོན་པའི་མདོ་ལས་ཀྱང་།།གཅིག་པུར་གསུང་དང་རྣམ་ཤེས་དྲུག།།ཡིད་ཀྱི་སྐྱེ་མཆེད་ཡིན་གསུང་ཕྱིར།།ཤེས་ཀུན་ཡིད་ཤེས་གཅིག་པུ་བློ།།ལུང་དོན་གཞན་དུ་ནུས་ཕྱིར་དང་།།དབང་ཤེས་ཀྱིས་ཀྱང་ལྐོག་གྱུར་དང་།།འདས་དང་མ་འོངས་འཛིན་གྱུར་ཕྱིར།།ཚོགས་གཅིག་འདོད་པ་མུན་སྤྲུལ་ལོ།།དེ་ཕྱིར་ཡིད་ཆེས་ལུང་རིགས་ཀྱིས།།གྲུབ་པ་རྣམ་ཤེས་བརྒྱད་ཡིན་ཕྱིར།།གསང་བའི་གནས་ལ་མི་ཞིམ་པའི།།མཁས་བའི་བརྒྱད་ཉིད་འདོད་པར་བྱ།།ཡིད་དང་ཀུན་གཞིའི་དཀའ་བའི་གནས།།གསལ་བར་སྟོན་འདི་མཁས་མཆོག་རྣམས།།ཇི་ལྟར་བཞེད་བཞིན་བླ་མ་ཡི།།གསུང་ལ་བརྟེན་ནས་རྒྱལ་ཁམས་པ།།བློ་བཟང་གྲགས་པའི་སྦྱར་བ་ཡི།།དགེ་དུས་ཐུབ་བསྟན་རྒྱས་གྱུར་ཅིག།

                            ཡིག་གཏག་པ། ཐར་ཆོས།

                                                          རྩོམ་སྒྲིག་པ།  ཤེས་རབ་རལ་གྲི། 
གསལ་འདེབས། 
                  རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ། 
                    དྲ་བའི་སྦྲེལ་ཐགhttp://www.tb1025.cn