༄༅།།ན་མོ་གུ་རུ།  དགེ་བའི་བཤེས་གཉེན་པོ་ཏོ་བ་དང་།  ཁ་རག་སྒོམ་ཆུང་གཉིས་གྲོགས་མཆེད་ཡིན་པ་ལ།  པོ་ཏོ་བའི་བསམ་པ་ལ།  ཁ་རག་པ་འདི།  ཆོས་རང་ཙམ་མི་ཤེས་ཀྱང་།  སྡོད་ཚུགས་རེ་བཟང་།  ད་ང་ལ་གཅིག་ཉན་ནས་བསྒོམ་ན་ལམ་དུ་འགྲོ་བ་ལ་བསམ་སྟེ།  དུས་རེ་ཤིག་འཕན་བྲག་རྒྱབ་བྱ་བར་ཆོས་སྟོན་གཅིག་གི་སར།  གཉིས་པོ་འཛོམ་སྟེ།  དགེ་བཤེས་པོ་ཏོ་བས།  ཁ་རག་སྒོམ་ཆུང་ལ་བཅོས་ཐབས་སུ་དྲིས་པ།  དེ་ཙམ་པའི་སྒོམ་སྲན་ཆེ་བ་འོར་ཆེ་སྒོམ་ཉམས་ཅི་སྐྱེས་གསུངས་པས།  ཁོང་ན་རེ།  བདག་གིས་དལ་འབྱོར་རྙེད་པར་དཀའ་བ་དང་།  འཆི་བ་མི་རྟག་པ་བསྒོམ་པས།  ཚེ་འདི་ལ་བློ་ལྡོག་དགོས་པར་གོ་ལགས།  ལས་རྒྱུ་འབྲས་ལ་ཡིད་ཆེས་པར་བསྒོམ་པས།  འདོད་པ་ལ་བློ་ལྡོག་དགོས་པར་གོ་ལགས།  འཁོར་བའི་ཉེས་དམིགས་བསྒོམ་པས་འཁོར་བ་མཐའ་དག་ལས་བློ་ལྡོག་དགོས་པར་གོ་ལགས།  བྱང་ཆུབ་ཏུ་སེམས་བསྐྱེད་ནས་བྱམས་པ་དང་སྙིང་རྗེ་བསྒོམ་པས།  རང་གཅིག་པུ་ཞི་བདེ་ལས་བློ་ལྡོག་དགོས་པར་གོ་ལགས།  ཆོས་ཐམས་ཅད་རང་བཞིན་སྐྱེ་བ་མེད་པར་བསྒོམ་པས།  གཟུང་འཛིན་གཉིས་ལས་བློ་ལྡོག་དགོས་པར་གོ་ལགས།  ཞེས་གསུངས་པས།  དགེ་བཤེས་པ་ཤིན་ཏུ་མཉེས་ཏེ།  སྔར་མ་གུས་པ་ལ་འགྱོད་ནས་ད་ཁོང་ལ་གདམས་ངག་གཅིག་ཞུ་དགོས་པར་དགོངས་ཏེ།  ཕྱིས་ཁོང་གི་དགོན་པར་བྱོན་པས།  དགོན་པའི་ཕྱོགས་བཞི་ན་ཐོ་བཞི་བཙུགས་པ་ལ་བྱང་བུ་ལ་ཡི་གེ་བྲིས་པ་རེ་བཏགས་ནས་འདུག་སྟེ།  དང་པོ་ཤར་གྱི་དེ་ཀློག་པས།  ཤར་གྱི་ཐོ་ལས།  འཆི་བདག་བདུད་ནི་མི་སྡོད་ཉེ་བར་འོང་། །དེ་ལས་ཐར་བའི་ཐབས་ནི་ཅུང་ཙམ་མེད། །ད་ལྟ་གཉིད་དང་རྨུགས་པས་མ་ཚོར་བར། །ཇི་ལྟ་བུ་ཡི་དུས་གཅིག་བདག་ལ་ནམ་ཡོད་ཨང་། །ལྷོའི་ཐོ་ལས།  ཚེ་འདིའི་ལྟོ་གོས་ཇི་ལྟར་བྱས་གྱང་ཕྱིད། །ཤི་ནས་བྱང་ཆུབ་འབྲས་བུ་བཙལ་དུ་མེད། །སང་འཆི་ནངས་འཆི་བདག་གིས་མི་ཤེས་པས། །དེ་བས་བྱང་ཆུབ་མྱུར་ཏུ་བསྒྲུབ་པར་རིགས། །ནུབ་ཀྱི་ཐོ་ལས།  སོ་ནམ་མ་བྱས་ཡོ་བྱད་མ་བསགས་ཀྱང་། །སྒོམ་ཆེན་བསེར་རམ་ལྟོགས་ནས་གྲོངས་པ་དག།སྔོར་ཆད་མཐོང་ཞིང་ཐོས་པ་ཅུང་ཡོད་དམ། །ཕྱིན་ཆད་ན་ཡང་མཐོང་ཞིང་ཐོས་མི་འགྱུར། །བྱང་གི་ཐོ་ལས།  མར་མེ་ཆུང་ངུའི་དུས་ན་རླུང་གིས་གནོད་པ་སྐྱེལ། །ནགས་ཚལ་བསྲེགས་པའི་མེ་ལ་རླུང་ཡང་གྲོགས་སུ་འགྱུར། །བརྟན་པ་མ་ཐོབ་པར་དུ་རྒྱེན་གྱིས་གནོང་པ་སྐྱེལ། །བརྟན་པ་ཐོབ་ན་རྐྱེན་ཡང་གྲོགས་སུ་འཆར། །སྒོའི་ཡ་ཐེམ་ལས།  ཚེ་ལ་ལོང་མེད་ཐ་སྙད་ཐུག་པ་གཉེན་ཡིན།བར་ཆད་དགེ་སྦྱོར་བསྐུལ་མ་ཡིན། །སྡུག་བསྔལ་སྡིག་པའི་ཕྱགས་ཤིང་ཡིན། །མི་དགའ་བྱུར་དུ་མ་ལྟ་ཨང་། །སྙན་གྲགས་བདུད་ཀྱི་ཕྱེ་གཏོར་ཡིན། །བསྙེན་བཀུར་འཆིང་བའི་ཞགས་པ་ཡིན། །བསོད་ནམས་དགེ་བའི་བར་ཆད་ཡིན། །དུག་ལ་སྨན་དུ་མ་ལྟ་ཨང་། །བློ་སྣའི་འགྲོ་ལྡོག་མ་ཤེས་ན། །ཅི་བྱས་སེམས་ལ་བདེ་དུས་མེད། །འགྲོ་ལྡོག་ཤེས་པའི་མཁས་པ་ལ། །རྐྱེན་ངན་གྲོགས་སུ་འཆར་རོ་ཨང་། །ཆོས་མིན་ཆོས་ལྟར་བཅོས་པ་ཡི། །ཆོས་ལ་བརྟེན་པའི་གཡོ་སྒྱུ་ཡིས། །ཚེ་འདིའི་ཆེ་ཐབས་མ་བསྒྲུབ་པར། །འཇིག་རྟེན་བློ་ཡིས་ཐོངས་ཤིག་ཨང་། །ཚེ་འདིའི་སྙན་གྲགས་བསོད་ནམས་དང་། །ཕྱི་མར་ངེས་པའི་འཆི་ཆོས་གཉིས། །གར་གླག་གང་ཁེ་མ་ལྟ་བར། །ངེས་པར་འཆི་ཆོས་གྱིས་ཤིག་ཨང་། །དད་ལྡན་གྱི་འཁོར་ལས་དཀོན་པ་མེད། །གཡོག་ངན་གྱི་དཔོན་ལས་སྡུག་པ་མེད། །བཟང་ངན་གྱི་དཔོན་ཆ་མ་འཛིན་པར། །ངན་པའི་དམན་ས་ཟུངས་ཤིག་ཨང་། །ཁྱོད་ནི་འཇིག་རྟེན་ཁམས་ནའང་དམན། །རང་གི་སྐྱོན་དེ་མ་སྦེད་པར། །བསོད་ནམས་ལྡན་པ་གཞན་དག་ལ། །ཕྲག་དོག་འགྲན་སེམས་འཁྲུལ་ལོ་ཨང་། །ཕྱི་སྣང་བ་ཡུལ་གྱི་འདོད་ཡོན་ལ། །ཞེན་པ་གཏིང་ནས་མ་ལོག་པའི། །རང་བཙུན་དུ་རེ་བའི་ཚུལ་འཆོས་ཀྱིས། །མི་ནག་བསླུ་རྡོ་མ་བྱེད་ཨང་། །རྒྱལ་བས་གསུངས་པའི་མདོ་སྔགས་ཀྱི། །དོན་ངེས་ཤེས་བློ་ལ་མ་ཤར་ན། །ཚིག་ཐ་སྙད་སྒྲ་ལ་ཞེན་པ་ཡིས། །མངོན་པའི་ང་རྒྱལ་མ་ཆེ་ཨང་། །ཐོག་མེད་དུས་ནས་གོམས་པ་ཡིས། །ལོག་ལྟ་ཅིག་ཅར་མི་སྤོངས་ཀྱིས། །ཧ་ཅང་བཟང་རློམ་མ་སྔ་བར། །བློ་སྐྱེད་རིམ་གྱིས་ཐོན་ཅིག་ཨང་། །འགྲན་སེམས་ཀྱི་སློབ་གཉེར་བྱས་པ་དང་། །ལོ་འདོད་སྟོན་པ་བྱས་པ་དང་། །མཁས་འདོད་ཀྱིས་ང་རྒྱལ་སྨྲས་པ་རྣམས། །ཆོས་སུ་འགྲོ་འམ་སོམས་ཤིག་ཨང་། །དོན་ངེས་ཤེས་བློ་ལ་མ་ཤར་ན། །ཚིག་གཞན་ལ་བཤད་པས་གོ་བ་མེད། །སླར་ལ་རང་ལ་ཞེ་ཁྲེལ་བསྐྱེད། །རྙེད་ཕྱིར་དམ་ཆོས་མ་བཤད་ཨང་། །སྐྱོ་ཤས་གཏིང་ནས་མ་སྐྱེས་པའི། །ཆོས་བརྒྱད་ཞེ་ཕུགས་བཞག་པ་ཡི། །གཞན་ལ་སྐྱོ་ཚུལ་འཆོས་པ་ཡིས། །ཁས་ཅང་སྡུག་སྐད་མ་ཆེ་ཨང་། །ཁ་དད་ཆེ་ལ་གཏིང་དད་ཆུང་། །ཆོས་བྱ་འོ་སྙམ་ལ་བྱ་བློ་རྒས། །འཇུག་པ་སྔ་ལ་སྨིན་པ་འཕྱི། །རང་ལ་ཁྲེལ་བར་སྒོམ་ཅིག་ཨང་། །མེ་ཡི་རང་བཞིན་ཚ་བ་བཞིན། །སེམས་ཅན་སྐྱོན་གྱི་རང་བཞིན་ཡིན། །གཞན་གྱི་སྐྱོན་ལ་མ་རྟོག་པར། །རང་སྐྱོན་རྟོག་ལ་སྤོངས་ཤིག་ཨང་། །ཐེག་ཆེན་སྟོན་པའི་བླ་མ་ཡི། །ཕྱི་རོལ་སྤྱོད་པ་མི་མཛེས་ཀྱང་། །ནང་གི་ཐུགས་དགོངས་མི་ཤེས་པས། །བླ་མའི་སྐྱོན་ལ་མ་རྟོག་ཨང་། །ཁྱོད་ཀྱི་སེམས་ལ་ཅི་མནོ་བ། །རྒྱལ་བའི་ཐུགས་ལ་སྒྲིབ་མེད་གསལ། །རང་གི་ཡི་དམ་ལྷས་ཁྲེལ་གྱིས། །བསམ་ངན་ཡིད་ལ་མ་འཁུ་ཨང་། །ལོང་བའི་དྲུང་ན་མིག་ཅན་ལྟར། །སངས་རྒྱས་བྱང་ཆུབ་སེམས་དཔའ་དག །རྟག་ཏུ་དྲི་མེད་སྤྱན་གྱིས་གཟིགས། །སྤྱོད་ངན་ཕག་ཏུ་མ་བྱེད་ཨང་། །སོ་སོའི་སྐྱེ་བོ་མགུ་དཀའ་བས། །འདྲིས་ནས་ཡོན་ཏན་མི་མཐོང་ལ། །སྐྱོན་མཐོང་ནས་ནི་སྨོད་འགྱུར་གྱིས། །རང་གཅིག་པུར་ཉམས་སུ་ལོངས་ཤིག་ཨང་། །ཚེ་འདིའི་ཕ་མ་བུ་ཚ་དང་། །གཉེན་འབྲེལ་རྩ་ལག་ཐམས་ཅད་ཀུན། །མགྲོན་པོ་གནས་མེད་དུས་འཛོམས་ཡིན། །འབྲེལ་མེད་ཡིད་ལ་གྱིས་ཤིག་ཨང་། །ལག་སྟོང་སྒྲེན་མོར་འགྲོ་ཙ་ན། །དབུལ་ཡང་ལྷག་མ་ལུས་པ་ལ། །སྡིག་བསྔོས་ལོངས་སྤྱོད་མ་གསོག་པར། །བློ་ཕུགས་སྤྲང་ལ་གཏོད་ཅིག་ཨང་། །བདག་གིས་བརྩིགས་པའི་ཁང་བ་རུ། །རྟག་དུ་བསྡད་དབང་མི་བདོག་གིས། །དགོས་མེད་མཁར་ལན་མ་བྱེད་པར། །རི་ཁྲོད་དགོན་པ་འགྲིམས་ཤིག་ཨང་། །བཟའ་མེད་ཁྱིམ་ཐབ་བྱས་པ་ན། །དགོས་མེད་དུ་བུ་ཚ་བྱུང་ནས་ནི། །ཁྲེལ་མེད་སྤྲང་བོ་བྱ་དགོས་ཀྱི། །གྲོས་ཉེས་ཆུང་མ་མ་ལེན་ཨང་། །ཞེན་ཆགས་བྲལ་བའི་དམ་པ་ལ། །ལས་ཀྱི་ཕྱག་རྒྱས་དགོས་པ་མེད། །ཞེན་ཆགས་སེམས་དང་འདྲེས་པ་ཡི། །ཕྱག་རྒྱས་ངན་འགྲོར་འཁྲིད་དོ་ཨང་། །ཆོས་མིན་སྤྱོད་པ་འབྱུང་བའི་རྒྱུ། །འོག་མའི་ངན་དཔེ་མ་བལྟ་བར། །དམན་པ་སྙིང་རྗེའི་གནས་སུ་ལྟོས། །གྲུབ་ཐོབ་ཀྱི་རྗེས་སུ་སྒོམས་ཤིག་ཨང་། །སྡིག་པའི་གྲོགས་པོ་ཐབས་ཀྱིས་སྤོངས། །མཁས་བཙུན་ཡོན་ཏན་ལྡན་པ་དང་། །འཇིག་རྟེན་བློ་ཡིས་བཏང་བ་ཡིས། །བཤེས་གཉེན་དམ་པ་བསྟེན་ཅིག་ཨང་། །བསམ་འཕེལ་ཡིད་བཞིན་ནོར་བུ་ལྟར། །བྱིན་རླབས་རང་སེམས་གུས་ལས་འབྱུང་། །ལྷ་དང་བླ་མ་དཀོན་མཆོག་ལ། །མོས་གུས་དྲག་པོ་གྱིས་ཤིག་ཨང་། །བདག་ལ་མ་ནོར་ལམ་སྟོན་པའི། །ས་མཁན་དགེ་བའི་བཤེས་གཉེན་གྱིས། །རྗེས་སུ་བསྟན་པའི་གདམས་ངག་ལ། །སྒྲུབ་པ་སྙིང་བོར་འབུངས་ཤིག་ཨང་། །རྒྱལ་བས་གསུངས་པའི་གདམས་ངག་ལ། །བློ་གྲོས་ལེགས་པར་སྦྱངས་པ་ཡིས། །མི་ཤེས་ཐེ་ཚོམ་གཉིས་དང་། །གཞོན་པའི་དུས་སུ་སློབ་ཅིག་ཨང་། །བཤེས་གཉེན་དམ་པས་མ་ཟིན་ན། །སྣོད་ངན་ཞབས་ནས་ཟགས་པ་ལྟར། །ཟག་བཅས་ཀྱི་ཤེས་པ་བརྗེད་ངེས་པས། །ཐོས་པ་བསམ་པས་སྐྱོངས་ཤིག་ཨང་། །དལ་འབྱོར་མི་ལུས་ཐོབ་པའི་རྒྱུ། །ཚུལ་ཁྲིམས་བསླབ་པ་རིན་པོ་ཆེ། །རང་གི་རྒྱུད་ལ་ཐུབ་ཚོད་ཀྱིས། །དྲི་མེད་གཙང་མ་སྲུངས་ཤིག་ཨང་། །ཤེས་པ་འཕྲོ་ལ་ལུས་ལ་གནོད། །མཁས་བཙུན་རྣམས་ཀྱིས་སྨོད་པའི་གནས། །ཉེས་པ་ཐམས་ཅད་འབྱུང་བའི་རྒྱུ། །ཆང་དང་བུད་མེད་སྤོངས་ཤིག་ཨང་། །སྐྱེ་བ་དམན་པའི་བུད་མེད་ཀྱིས། །འཁོར་ལ་ཕན་སེམས་ཆེ་བ་ན། །སྙིང་རྗེར་བརྫུས་པའི་ཆགས་པ་ཡིས། །ཆོས་ཀྱི་བར་ཆད་བྱེད་དོ་ཨང་། །བདག་ལ་སྡུག་བསྔལ་སྐྱེད་བྱེད་པའི། །ཉོན་མོངས་དགྲ་བོ་འཇོམས་པ་ལ། །འཇིགས་དང་ཞུམ་པར་མ་བྱེད་པར། །མངོན་པའི་ང་རྒྱལ་བསྐྱེད་ཅིག་ཨང་། །རང་གི་སེམས་ཀྱིས་མ་ཁྲེལ་ན། །མི་ཡི་འཕྱ་སྨོད་བྲག་ཆ་ཡིན། །བསླབ་གསུམ་དཔང་བོར་བཞག་ནས་ནི། །རང་སེམས་དྲི་མ་ཁྲུས་ཤིག་ཨང་། །ཁོང་ནད་སེལ་བའི་གཏར་སྲེག་ལྟར། །ངན་སོང་སྡུག་བསྔལ་སྤོང་བའི་གནས། །ཆོས་ཀྱི་དཀའ་ཐུབ་ཕྲ་མོ་ལ། །མི་བཟོད་འཇིགས་པར་མ་བྱེད་ཨང་། །ད་ལྟའི་སྡུག་བསྔལ་འདི་འདྲ་ཡང་། །བདག་གིས་བཟོད་པར་མི་ནུས་ན། །ངན་སོང་གསུམ་གྱི་སྡུག་བསྔལ་དེ། །བཟོད་དུ་རེ་བ་འཁྲུལ་ལོ་ཨང་། །བདག་གི་སྤྱོད་པ་འདི་འདྲས་ནི། །མི་ཡི་ལུས་ཀྱང་ཐོབ་པར་དཀའ། །སངས་རྒྱས་ཐོབ་ཏུ་རེ་བ་ཡི། །ལྟ་བ་མཐོན་པོ་འཁྲུལ་ལོ་ཨང་། །དལ་འབྱོར་མི་ལུས་རིན་པོ་ཆེ། །རྙེད་པར་དཀའ་བ་ཐོབ་པ་ལ། །ཐོབ་པ་ཡལ་བར་མ་བཏང་བར། །དུས་གཏན་གྱི་སོ་ནམ་གྱིས་ཤིག་ཨང་། །གཞན་གྱིས་བྱས་པའི་དགེ་བ་ལ། །རྗེས་སུ་དགའ་བ་བསྒོམ་བྱ་ཞིང་། །བྱ་མིན་ལས་ལ་འཇུག་འདོད་ན། །ལུས་ངག་གཡོ་བ་སྡོམས་ཤིག་ཨང་། །སེམས་ཀྱི་གླང་ཆེན་སྨྱོན་པ་ནི། །དམན་པའི་ཡུལ་ལ་རང་ཡན་ན། །ཉོན་མོངས་རླུང་འཚུབ་ལྡང་འགྱུར་གྱིས། །དྲན་པའི་ཐག་པས་ཟུངས་ཤིག་ཨང་།།ཕོ་རྒོད་ཉེ་རིང་མཐུན་འཇུག་མཁན། །ཆོས་བརྒྱད་གྲགས་པ་ལྷུར་ལེན་པ། །དགེ་སྡིག་སྤེལ་བའི་བློ་རྒྱ་ཅན། །སྡིག་དཔོན་གྱི་རྣམ་ཐར་ཡིན་ནོ་ཨང་། །ཐོས་པ་ཚིག་གི་ཞོལ་ཁང་གིས། །ཉོན་མོངས་དམག་དཔུང་ཐུབ་དཀའ་བས། །བསམ་སྒོམ་འབད་པ་དྲག་པོ་ཡིས། །ངེས་ཤེས་ཀྱི་མཁར་དཔེ་རྩིགས་ཤིག་ཨང་། །མི་ཡི་གྲུ་ལ་བརྟེན་ནས་ནི། །སྡུག་བསྔལ་ཆུ་བོ་ཆེ་ལས་སྒྲོལ། །གྲུ་འདི་ཕྱིས་ནས་རྙེད་དཀའ་བས། །རྙེད་ཚེ་ལེ་ལོ་མ་བྱེད་ཨང་། །བརྩིགས་པ་འཇིག་ཅིང་བསག་པ་ལུས། །འབྲེལ་བའི་གཉེན་རྣམས་བོར་ནས་ནི། །རང་གཅིག་པུར་ནམ་འགྲོ་ཆ་མེད་པས། །འགྲུབ་མེད་ཀྱི་བློ་སྣ་མ་མང་ཨང་། །མི་འཆི་བ་ཡི་ས་ཕྱོགས་མེད། །འཆི་ངེས་མྱུར་བ་རང་དུ་འཆི། །འཆི་ལ་ཅིས་ཀྱང་མི་ཕན་གྱིས། །ལོང་མེད་རྒྱུད་ལ་བསྟེན་ཅིག་ཨང་། །དུས་གཏན་གྱི་མཐོ་རིས་བདེ་བ་དང་། །ངན་སོང་གསུམ་གྱི་སྡུག་བསྔལ་གཉིས། །ད་ལྟ་གདམ་དབང་ཡོད་པ་ལ། །མནོ་བསམ་གཞིག་འགྲེལ་སྐྱེད་ཅིག་ཨང་། །གཡོ་སྒྱུ་ཟོལ་ཟོག་བརྫུནདང་ཁྲམ་། །མ་བྱིན་ལེན་སོགས་དམད་པའི་ལས། །ངན་སོང་སྡུག་བསྔལ་འབྱུང་བའི་རྒྱུ། །ལས་ངན་སྡུག་པ་སྤོངས་ཤིག་ཨང་། །ཚེ་འདིའི་བདེ་བ་ཡུད་ཙམ་དེ། །དུས་གཏན་གྱི་བདེ་བ་འབྱུང་འདོད་ན། །འགྲུབ་ཅིང་རང་དབང་ཡོད་དུས་སུ། །སྦྱིན་སོགས་དགེ་ལ་འབོད་ཅིག་ཨང་། །ཐམས་ཅད་སྒྱུ་མའི་བསླུ་འབྲིད་ཡིན། །བློ་ལྟོས་བྱས་ན་མི་བསླུ་བ། །དཀོན་མཆོག་གསུམ་ལས་མི་བདོག་གིས། །དུས་གཏན་ཏུ་སྐྱབས་སུ་སོང་ཞིག་ཨང་། །འཁོར་བ་བ་ལ་བདེ་བ་མེད། །མེ་བདོག་འོབས་དང་འདྲ་བ་ཡི། །སྡུག་བསྔལ་གསུམ་དང་བརྒྱད་ཀྱིས་གདུང་། །འཁོར་བའི་ཉེས་དམིགས་སྒོམས་ཤིག་ཨང་། །ཉེ་བར་ལེན་པ་སྡུག་བསྔལ་རྒྱུ། །ལས་དང་ཉོན་མོངས་ཀུན་འབྱུང་རྣམས། །བདག་མེད་ལམ་གྱིས་སྤངས་པ་ཡི། །ཞི་བདེའི་ཡོན་ཏན་སྒོམས་ཤིག་ཨང་། །ཁྲོས་པས་རང་དོན་ཡལ་བར་འདོར། །མཛའ་བཤེས་གཉེན་ཀྱང་སྐྱོ་འགྱུར་བས། །ཚིག་རྩུབ་དུག་མདའ་མ་འཕེན་པར། །རྒྱུད་ངན་ཞེ་སྡང་སྤོངས་ཤིག་ཨང་། །བདེ་འདོད་སྡུག་བསྔལ་མི་འདོད་པར། །བདག་དང་སེམས་ཅན་བློ་མཐུན་གྱིས། །རང་གི་ཉམས་ལ་དཔག་ནས་སུ། །བདག་གཞན་མཉམ་པར་སྒོམས་ཤིག་ཨང་། །སློབ་དཔོན་ཕ་མར་གྱུར་པ་ཡི། །དྲིན་ཅན་ཁམས་གསུམ་སེམས་ཅན་ལ། །གནོད་སེམས་འཚེ་བ་ཀུན་སྤངས་ནས། །བྱམས་པ་སྙིང་རྗེ་སྒོམས་ཤིག་ཨང་། །སེམས་ཅན་རྣམས་ལ་གནོད་བྱས་ན། །བུ་གཅིག་བསད་པའི་ཕ་མ་བཞིན། །ཐུགས་རྗེ་ལྡན་པའི་རྒྱལ་བ་རྣམས། །ཅིས་ཀྱང་མཉེས་ཐབས་མེད་དོ་ཨང་། །འཁོར་བའི་སྡུག་བསྔལ་ཐམས་ཅད་ཀྱང་། །ལས་དང་ཉོན་མོངས་རྒྱུ་ལས་བྱུང་། །དེ་ཡང་བདག་དོན་རྟོགས་ལས་བྱུང་། །བདག་མེད་དོན་ལ་འབོད་ཅིག་ཨང་། །གཟུང་འཛིན་གཉིས་དང་བྲལ་བ་ཡི། །ཤེས་པ་གདོད་ནས་མ་སྐྱེས་པ། །བློ་ཡི་ཡུལ་ལས་འདས་པ་ཡིས། །ཞེ་འདོད་ཀུན་དང་བྲལ་ལོ་ཨང་། །དང་བོ་བ་ཡི་རྟོག་པ་ལ། །གསལ་ཆ་ཡོད་དེ་བརྟན་ཆ་མེད། །རྟོག་པའི་རླུང་ལ་མ་བསྐུར་བར། །དྲན་པའི་ཐག་པས་ཟུངས་ཤིག་ཨང་། །གནས་ལུགས་ཅིར་ཡང་མ་འགྲུབ་པས། །མཐའ་བཞི་ངང་གིས་བྲལ་བ་ལ། །ཤེས་པ་ཅི་ཡང་མི་རྟོག་པས། །འཛིན་རྟོག་བྲལ་བར་གྱིས་ཤིག་ཨང་། །ཆོས་རྣམས་རྨི་ལམ་སྒྱུ་མ་འདྲ། །བདེན་པའི་དངོས་པོ་གང་ཡང་མེད། །མེད་བཞིན་སྣང་བའི་དངོས་པོ་ལ། །མངོན་པར་ཞེན་པ་མ་ཆེ་ཨང་། །གནས་ལུགས་དོན་ལ་མ་འགྲུབ་ཀྱང་། །རྨི་ལམ་དུས་ཀྱི་རྒྱུ་འབྲས་བཞིན། །འཁྲུལ་ངོའི་རྒྱུ་འབྲས་མི་སླུ་བས། །སྡིག་སྤོང་དགེ་ལ་འབོད་ཅིག་ཨང་། །སྔར་བྱས་སྡིག་ལ་འགྱོད་པ་སྐྱེད། །ཕྱིན་ཆད་སྲོག་ལ་བབ་ཀྱང་སྡོམ། །རྟག་ཏུ་སྐྱབས་འགྲོ་སེམས་བསྐྱེད་བྱ། །གཉེན་པོ་དགེ་ལ་འབོད་ཅིག་ཨང་། །དགེ་བའི་བསྔོ་རྒྱུ་ཆུང་ངུ་ཡང་། །མི་ཟད་འབྲས་བུ་ཆེན་པོར་བགྱིས། །དུས་གསུམ་དངོས་པོ་ཐམས་ཅད་ལ། །སེམས་བསྐྱེད་སྔོན་དུ་ཐོངས་ཤིག་ཨང་། །འདིར་བསྟན་གྲོགས་དང་བློ་བསྟུན་ན། །ངན་སོང་སྡུག་བསྔལ་ཀུན་བྲལ་ཏེ། །གནས་སྐབས་མངོན་པར་མཐོ་བ་ཡི། །ལྷ་མིའི་བདེ་བ་འབྱུང་ངོ་ཨང་། །མཐར་ཐུག་སྒྲིབ་གཉིས་བྱང་བ་དང་། །སྐུ་གསུམ་ཡེ་ཤེས་བཞི་ལྡན་ཏེ། །འཁོར་འདས་གཉིས་ལ་མི་གནས་པའི། །བླ་མེད་བྱང་ཆུབ་འགྲུབ་བོ་ཨང་། །ཁ་རག་སྒོམ་ཆུང་གིས་འཕན་བྲག་རྒྱབ་ཀྱི་དགོན་པར་བརྩམས་པ་ཨང་ཡིག་བདུན་ཅུ་རྩ་གཉིས་པ་རྫོགས་སོ།།འདི་ཡང་དགའ་ལྡན་ཆོས་འཁོར་གླིང་ནས་པར་དུ་གྲུབ།སརྦ་མངྒ་ལཾ།

རྩོམ་སྒྲིག་པ།ཤེས་རབ་རལ་གྲི།

གསལ་འདེབས།

རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།

དྲ་བའི་སྦྲེལ་ཐགhttp://www.tb1025.cn