བློ་སྦྱོང་སེམས་དཔའི་རིམ་པ་ལས་རང་རྒྱུད་ངན་པ་དམའ་དབབ་པའི་ཆོས་བཞུགས་སོ། །
རང་འདོད་འཁྲིབ་མ་ཞུགས་པས། །ཐེག་དམན་ལྟ་བར་མི་ལྟང་ཞིང༌། །སྲིད་པའི་བཙོན་རར་མ་བསྡམས་པའི། །གྲོལ་བ་དེ་ལ་ཕྱག་འཚལ་ལོ། །ངའོ་བྱ་བ་མགོ་བསྐོར་ཡིན། །དགོས་ཞེས་བྱ་བ་ངོ་དགའ་ཡིན། །གཞན་མ་ཞེས་པ་དགྲ་ཚིག་ཡིན། །མི་དགོས་ཅེས་པ་བར་ཆད་ཡིན། །བདག་གཞན་ཅེས་པ་འབྱེད་ཚིག་ཡིན། །ཆགས་སྡང་ཞེས་པ་འཁྲུག་པ་ཡིན། །འདི་འདྲའི་རྣམ་དབྱེ་སུ་བྱེད་པ། །དེ་ནི་ཟབ་མོའི་ཆོས་ལས་ཉམས། །མཁས་པས་དགྲ་བོ་འཇོམས་འདོད་ན། །དང་པོ་ང་བདག་ཁྱད་དུ་བསད། །གང་གིས་སྐུར་པ་བཏབ་གྱུར་ཀྱང༌། །དེ་ལ་དག་མཚང་རྣམས་མི་བྱེད། །གང་གིས་གནོད་པ་སྐྱལ་གྱུར་ཀྱང༌། །ཁ་འཛིན་ཤགས་འདེབས་ཡང་མི་བྱེད། །ལུས་སྲོགལོངས་སྤྱོད་བྲལ་གྱུར་ཀྱང༌། །རང་གི་བསགས་པས་ལན་ནོ་ཞེས། །ལྷག་པར་རང་ལ་སྙིང་ཚིམ་སྦྲེང༌། །གང་གིས་འདྲེ་གདོན་རྦད་གྱུར་ཀྱང༌། །དེ་ལ་ཁུ་འཁྲིགས་མི་བྱ་སྟེ། །གཞན་གྱི་བསམ་པ་ཚིམ་པར་བྱ། །མི་ཕོད་བསམ་པ་རྫི་བ་སྟེ། །སྙིང་དང་འདྲ་བའི་འཁོར་ལ་སོགས། །ཤ་ལ་བརྩེ་བས་ཕྲོགས་གྱུར་ཀྱང༌། །རང་ལ་འགལ་མེད་སྙིང་ཚིམ་བསྒྲང༌། །ཡོན་བདག་དྲིན་ལན་ལོག་མཇལ་ཚེ། །སྐད་ཅིག་ཙམ་ཡང་མི་འཁྲུགས་པར། །བཟོད་བསྐུལ་བཀའ་དྲིན་དྲན་པར་བྱ། །ད་ནི་སྡིག་པ་སྤོང་བའི་ཐབས། །ཞེ་སྡང་མེད་པར་དབྱེ་པར་བཤད། །དེ་ལ་བཀའ་དྲིན་བྱམས་པ་བསྒོམ། །རང་ལ་སྙིང་ཚིམ་ཐོ་ལེས་བཏབ། །དེ་ལྟར་བཟོད་པ་མ་ཐོབ་བར། །གྲོགས་ནི་གཤིས་ངན་དག་དང་འགྲོགས། །དེ་ལ་དམིགས་རྐྱེན་རབ་བྱས་ནས། །འཁོར་བ་པ་ཡི་སྐྱོན་བསམ་ཞིང༌། །སྙིང་རྗེ་ཆེན་པ་ལྷག་པར་བསྒོམ། །གནས་མལ་ས་ཕུག་གད་སྐྱིབས་དང་། །ཁང་རུལ་ཐགས་པ་འཛགས་པ་དང་། །ལྷ་ཁང་ཕྱུགས་ལྷས་འབྲོག་སྟོང་དང་། །གཅོང་རོང་ཡིད་མི་དགའ་བར་བསྡད། །དེ་ཚེ་ཤེས་པ་མི་དགའ་ཤིང༌། །ཀླུང་དུ་བསྡད་ན་རི་ལ་འགྲོ། །དེར་ནི་སྡོད་སྙིང་མི་འདོད་དེ། །གསོ་དང་སྐྱིབས་དང་ཟུར་ལ་སྙེག །ཡང་ཡང་སྡོད་ས་རབ་སྤོ་ཞིང༌། །ཤེས་པ་མི་དགའ་སྐྱོ་བ་ན། །རང་ལ་ཤགས་འདེབས་འདི་ལྟར་བྱ། །ཁྱོད་ཀྱི་ཤེས་སྤྱོད་འདི་འདྲ་ན། །གནས་མལ་འདི་ཡང་ཡང་རབ་ཡིན། །བློ་སེམས་འདི་ཀུན་བདེ་མོ་ཡིན། །གཞན་དུ་ཁྱོད་ཀྱི་སྡུག་སྲན་འདིས། །དམྱལ་བར་མ་སྐྱེས་མཁར་རྗ་ཆེ། །བཙོ་བསྲེགས་མ་མྱོང་མཁར་རྗེ་ཆེ། །ཡི་དགས་བཀྲེས་སྐོམ་གྲོང་ཁྱེར་དུ། །བསྐལ་བར་མ་སྐྱེས་མཁར་རྗེ་ཆེ། །མི་གཙང་སྲིན་པོའི་གྲོང་ཁྱེར་དུ། །འདམ་རྫབ་ཆེན་པོར་རབ་འཕྱོ་ཞིང༌། །བསྐལ་བར་མ་སྐྱེས་མཁར་རྗེ་ཆེ། །གཞན་ཡང་འཇིགས་པ་རབ་བསམས་ཤིང༌། །བདག་ལ་ཁྲེལ་བརྡས་ཆོས་སོ་བྱ། །ལྟོ་ལ་གྱོང་སྐུར་དཀའ་ཐུབ་བྱ ། །གོས་ལ་གྱོང་སྐུར་དམན་ཆ་བཟུང༌། །བདེ་སྐྱིད་ཁྱད་བསད་གཉེན་པོ་བསྒོམ། །བྱ་བྱེད་ལིངས་བསྐྱུར་བྱར་མེད་བསྟེན། །ཅི་བྱེད་བྱང་ཆུབ་གྲོགས་སུ་བསྒྱུར། །བློ་སྦྱོང་སེམས་དཔའི་རིམ་པ་ལས་རང་རྒྱུད་ངན་པ་དམའ་དབབ་པའི་ཆོས་ཡོངས་སུ་རྫོགས་སོ།། །།
རྩོམ་སྒྲིག་པ། མང་ར་བ།
གསལ་འདེབས།
རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
དྲ་བའི་སྦྲེལ་ཐགhttp://www.tb1025.cn