བཙན་དུག་ནགས་སུ་རྨ་བྱ་རྒྱུ་བ་ཞེས་བྱ་བ།རྗེ་བཙུན་གཤིན་རྗེའི་གཤེད་ལ་ཕྱག་འཚལ་ལོ། །རྒྱལ་བུ་ཐམས་ཅད་སྒྲོལ་དུ་གྱུར་པ་ན། །བུ་དང་བུ་མོ་རྒྱལ་སྲིད་སྦྱིན་པ་ལྟར།།ཤིན་ཏུ་འཕྲེང་བའི་ནོར་དང་འཁོར་ལ་སོགས།། འཕངས་པ་མེད་པར་ཡོངས་སུ་བཏང་བར་བྱ། །རྒྱལ་བུ་སྙིང་སྟོབས་ཆེན་པོར་གྱུར་པ་ན།།སྟག་མོ་རང་གི་ཤ་ཡིས་གསོས་པ་ལྟར། །ཤིན་ཏུ་གཅེས་པའི་སྒྱུ་ལུས་ཕུང་པོ་འདི། །ཤ་ཟའི་ཚོགས་ལ་དགའ་བར་སྦྱིན་པར་བྱ།།རྒྱལ་པོ་བྱམས་པའི་སྟོབས་སུ་གྱུར་པ་ན། །གནོད་སྦྱིན་རང་གི་ཁྲག་གིས་གསོས་པ་ལྟར།། བཅད་པར་དཀའ་བའི་སྙིང་ཁྲག་དྲོན་མོ་འདི།།ཁྲག་འཐུང་དག་ལ་བརྩེ་བས་སྦྱིན་པར་བྱ། །ཚོང་དཔོན་ཁྱེའུ་ཆུ་འབེབས་གྱུར་པ་ན། །བདེ་གཤེགས་མཚན་བརྗོད་ཉ་རྣམས་དྲངས་པ་ལྟར།།ཆོས་ཀྱིས་ཕོངས་པའི་སྐྱེ་བོ་ཐམས་ཅད་ལ།  དམ་པའི་ཆོས་ཀྱི་སྦྱིན་པ་བཏང་བར་བྱ། །རྒྱལ་བུ་དགེ་སྟོན་ཆེན་པོར་གྱུར་པ་ན། །སྡིག་སྟོན་ལོག་སྒྲུབ་ཐུགས་རྗེས་བཟོད་པ་ལྟར།།འཁོར་གྱི་ལོག་སྒྲུབ་གཤིས་ངན་འཁུགས་པ་ལ། །སྙིང་རྗེ་ཆེན་པོས་ལྷག་པར་བརྩེ་བར་བྱ། །བྱང་ཆུབ་སེམས་དཔའ་སྤྲེའུར་གྱུར་པ་ན།།སྡིག་ཅན་ཁྲོན་པའི་གནས་ནས་དྲངས་པ་ལྟར། །ངན་པ་དག་ལ་ཕན་བཏགས་མི་ཤོད་ཀྱང་། །བཟང་ལན་མི་འདོད་ཐུགས་རྗེས་དྲངས་པར་བྱ།།ཀྱེ་ཧུད་ཕ་མར་མ་གྱུར་སུ་ཡང་མེད། འཁོར་བའི་གནས་ན་བདེ་བ་སྐད་ཅིག་མེད། ། ངན་པའི་ཚོགས་ལ་ངན་ལན་བོང་ར་འདྲ།།ད་ནི་ཐུབ་ཆེན་དཔའ་བོའི་རྣམ་ཐར་འདི། །གུས་པས་བླངས་ནས་གཉེན་པོ་མི་བསྐྱེད་ན།  །དཔའ་བོ་འཇུག་པའི་ལག་ལེན་ཡོང་མི་སྲིད། །དེ་ཕྱིར་སྲོག་ལ་བསྡོས་ལ་དཀའ་སྤྱད་སྟོན།།བདེ་བར་གཤེགས་པ་འདས་ཚུལ་བསྟན་རྗེས་སུ། །དེ་ཡི་རྗེས་སུ་སློབ་པར་འདོད་པ་རྣམས།། འདི་འདྲའི་ལག་ལེན་རྒྱུད་ལ་མ་བརྟེན་ན།།སྐྱེ་བོ་རྣམས་ཀྱི་བདེ་སྐྱིད་ཟད་དགོས་ཡོད། །དེ་ཕྱིར་དཔའ་བོ་རྣམས་ཀྱི་སྐྱིད་ཆོས་འདི། །ཅི་ལ་ཐུག་ཀྱང་དཀའ་སྤྱད་སྲོག་ལ་གཏོང་།།འདི་ནི་དཔའ་བོ་འཇུག་པའི་ལག་ལེན་ཏེ། །ལེའུ་དང་པོ་དུག་གི་བཅུད་ལེན་ཡིན།། །།

                       བཙན་དུག་ནགས་སུ་རྨ་བྱ་རྒྱུ་བ་ཞེས་བྱ་བ། །རྗེ་བཙུན་གཤིན་རྗེའི་གཤེད་ལ་ཕྱག་འཚལ་ལོ།།ཆོས་འདི་གསན་དང་དཔའ་བོ་དོན་གཉེར་ཀུན། །འཁོར་བའི་ནགས་ན་རྨ་བྱ་མཛེས་པ་དང་། །ཉོན་མོངས་དུག་ལྔ་ལྗོན་པའི་ཤིང་དྲུང་དུ།།དུག་གིས་སྨིན་པའི་སྨན་ལ་དགར་མི་ཚོར། །འདོད་ཆགས་ལས་ཀྱི་དུག་ཆུ་འཁོལ་མ་ལ། །འདོད་ཆགས་ལྟ་བུར་གཞན་དང་མ་བསྟུན་ན༑༑འདོད་ཆགས་ཅན་གྱིས་ལོག་སྒྲུབ་བྱས་དོགས་ཡོད། །འདོད་ཆགས་ལྟ་བུའི་དུག་འདི་གཞོམ་པར་བྱ། །ཞེ་སྡང་དུག་གི་མེ་ཏོག་འབར་བ་ལ།།གཤིན་རྗེའི་གཤེད་ལྟར་ཁྲོ་ཚུལ་མ་བསྟན་ན། །ཞེ་སྡང་ཅན་གྱིས་བར་ཆད་བྱས་དོགས་ཡོད། ། ཞེ་སྡང་ལྟ་བུའི་དགྲ་བགེགས་བསྒྲལ་བར་བྱ།།གཏི་མུག་དུག་གི་འདམ་རྫབ་སྦྱར་བ་ལ། །མི་རོ་ལྟ་བུར་བཟོད་སྲན་མ་བསྐྱེད་ན། །གཤིས་ངན་རྣམས་གྱིས་སྡིག པ་བསགས་དོགས་ཡོད།།གཏི་མུག་ལྟ་བུར་མཉམ་ཉིད་བསྒོམ་པར་བྱ། །ཕྲག་དོག་དུག་གི་ལྗོན་ཤིང་རྒྱས་པ་ལ། །ང་ཁྱོད་ལྟ་བུར་ཕྱི་ནང་མ་ཕྱེ་ན། །མུ་སྟེགས་སོགས་ཀྱིས་བསྟན་པ་བཤིག་ཉེན་ཡོད།།དེ་ཕྱིར་ཕྲག་དོག་ལྟ་བུར་དམ་ཆོས་སྐྱོངས།། ང་རྒྱལ་དུག་གི་ལྗོན་ཤིང་འབར་བ་ལ། །ང་རྒྱལ་ལྟ་བུར་ཁྲོ་ཚུལ་མ་བཟུང་ན། །བདུད་ཀྱི་ཚོགས་ཀྱིས་མགོ་སྐོར་བྱེད་ཉེན་ཡོད། །དེ་ཕྱིར་ཐུབ་བསྟན་བཟུང་ལ་ཕས་རྒོལ་གཞོམ། །དེ་ལྟར་དུག་གི་དཔུང་ཚོགས་མ་ལུས་པ།།བདེན་མེད་སྣང་སྟོང་སྒྱུ་མ་ལྟ་བུའི་ཉམས། །ང་བདག་འཆིང་བ་གཅིག་ཏུ་ཚུར་སྡོམ་ལ། །རྨ་བྱ་ལྟ་བུར་ཟས་སུ་ཟ་བར་བྱ། །གཞན་གྱི་བློ་ལ་སྣ་ཚོགས་ཀུན་སྟོན་ཀྱང་།།ཕུགས་སུ་གཉེན་པོའི་བཙན་ཚུགས་མ་ཤོར་བར། །དགེ་སྡིག་དག་གི་བླང་དོར་སྲོག་ལ་བསྡོས། །སྡུག་བསྔལ་གྱུར་ཀྱང་བྱང་ཆུབ་དང་དུ་བླངས།།འདི་ལྟར་ཤེས་བྱ་ཀུན་ལ་མཁས་ན་ཡང་། །རང་གི་བདེ་སྐྱིད་ཁྱད་དུ་མ་བསད་ན། །རྙེད་པའི་དབང་གིས་ཆགས་སྡང་ཞུགས་ཉེན་ཡོད།།དེ་ཕྱིར་རང་འདོད་ཁྱི་རྐུན་བཞིན་དུ་བརྡུང་།། མཁས་པ་རྣམས་ཀྱི་དྲུང་དུ་བསྟེན་གྱུར་ཞིང་། །གཞུང་ལུགས་རྣམས་ལ་བློ་གྲོས་མ་སྦྱངས་ན།།མཁས་པ་རྣམས་ལ་སྒྲོ་སྐུར་བྱས་དོགས་ཡོད། །དེ་ཕྱིར་ཤེས་བྱ་ཀུན་ལ་གོམས་པར་བྱ། །ཉིན་དང་མཚན་དུ་སྡུག་བསྔལ་གྱུར་ན་ཡང་།།འཁོར་བ་སྤྱི་ཡི་ཉེས་དམིགས་མ་བསམས་ན། །ད་དུང་སྡུག་བསྔལ་རྒྱུ་ལ་འཇུག་དོགས་ཡོད། །དེ་ཕྱིར་ལས་ཀྱི་ཉེས་དམིགས་སྙིང་ལ་གཟེར།།དེ་ལྟར་ཡིན་མོད་མི་འདོད་སྡུག་བསྔལ་རྣམས། །བདག་འཛིན་འཇོམས་པའི་གཉེན་པོར་བསྟེན་པར་བྱ།། བདུད་དམག་བྱེ་བ་དུང་ཕྱུར་དགྲར་ལངས་ཀྱང་།།ངའོ་སྙམ་པའི་འཇིགས་སྐྲག་སྤང་བར་བྱ། །གཞན་དོན་བྱས་པས་ངན་འགྲོར་ཤོར་སྲིད་ཀྱང་། །འགྱོད་པ་མེད་པས་ཉམས་དགའ་བསྟེན་པར་བྱ།།དབུགས་ལེན་གཤེད་མས་ལུས་ལ་བྲབ་གྱུར་ཀྱང་། །བདག་ལ་ཕན་པའི་རིམ་གྲོ་བསྟེན་མི་བྱ། །སེམས་ཅན་ཡོངས་ཀྱི་ལས་ངན་འཁུར་དགོས་ཀྱང་།།ཁུར་འོས་འཁུར་བས་སྡུག་ཡུས་ཆུང་བར་བྱ། འགོ་བའི་ནད་ཀྱིས་ལུས་ལ་བཏབ་གྱུར་ཀྱང་། །རང་གི་ནོངས་པས་ལོག་པའི་ཐབས་མི་བྱ།།འདི་ལྟར་མི་འདོད་ཐོག་ཏུ་མ་བབས་ན། །འདོད་པའི་ཐོག་ཏུ་ནམ་ཡང་འཇུག་མི་སྲིད། །མཁས་པས་སྤྱད་ན་མི་འདོད་མ་ལུས་པ།།འདོད་དགུའི་འབྱུང་གནས་ཡིན་པས་དང་དུ་བླངས། །འདི་ལྟར་ལོག་སྒྲུབ་དང་དུ་ལེན་པ་ཡིས།། སེམས་དཔའ་རྣམས་ཀྱི་གོ་ཆ་མ་གྱོན་ན།།འཁོར་བ་པ་ལ་བདེ་བ་ཡོང་མི་སྲིད།། དེ་ཕྱིར་མི་འདོད་དང་དུ་བླངས་པར་བྱ། །འདི་ནི་ཐུབ་པ་ཆེན་པོའི་རྣམ་ཐར་ལས།།དམ་པ་རྣམས་ཀྱིས་བསླབ་པར་བྱ་བའི་ཆོས། །དཔའ་བོ་རྣམས་ཀྱི་འཇིག་པར་བྱ་བ་སྟེ༑ ༑ལེའུ་གཉིས་པ་དུག་གི་བཅུད་ལེན་ཡིན།།

                 བཙན་དུག་ནགས་སུ་རྨ་བྱ་རྒྱུ་བ་ཞེས་བྱ་བ། །རྗེ་བཙུན་གཤིན་རྗེའི་གཤེད་ལ་ཕྱག་འཚལ་ལོ། །བློ་ལྡན་གང་གིས་ཉིན་མཚན་དུས་དྲུག་ཏུ།།འཁོར་བ་སྤྱི་དང་དགོས་ཀྱི་སྐྱོན་རྣམས་ལ། །བརྟགས་ཤིང་དཔྱད་པས་ཤིན་ཏུ་སྐྲག་གྱུར་ནས། །སོ་སོར་ཐར་པའི་སྡོམ་པ་བླངས་ཏེ་བསྲུང་།།རང་ཉིད་ཐར་པའི་སྡོམ་པ་སྟོན་པ་ན། །འགྲོ་བ་འདི་དག་ཕ་དང་མར་བཅད་དེ། །དེ་དག་དོན་དུ་སྨོན་འཇག་སྡོམ་པ་བླངས།།བྱམས་བརྩེའི་སེམས་ཀྱིས་སྨོན་འཇུག་བསྟེན་པ་ན། ། རང་ཉིད་འཁོར་བའི་ནགས་སུ་སྡུག་བསྔལ་ཀྱང་། །ཅིར་ཡང་མི་སེམས་སྡུག་བསྔལ་གཞན་དོན་དུ།།སྲོག་དང་བསྡོས་ནས་དཀའ་སྤྱད་བསྟེན་པར་བྱ། །དེ་ཚེ་མ་རུངས་སྐྱེ་བ་མཐའ་ཡས་དང་། །ལོག་སྒྲུབ་མཐའ་ལས་འདས་པ་མྱོང་བ་ན།། རྨི་ལམ་སྒྱུ་མ་ལྟ་བུར་སྲོག་དང་བྲལ། །རང་བཞིན་བརྟགས་ལ་ཆོས་ཀྱི་དབྱིངས་སུ་བསམ། །དེ་ལྟར་བདེན་མེད་སྣང་མེད་མངོན་གྱུར་ཚེ།།ལྷག་པར་སྤོབས་པ་བསྐྱེད་དེ་འཇིགས་སྐྲག་ལ། །ཅི་ཡང་མི་སེམས་གང་དུའང་མི་རྟོགས་པར། ། གཞན་དོན་འབའ་ཞིག་ལྷུན་གྱིས་གྲུབ་པར་བྱེད།།འདི་འདྲའི་ཉམས་ལེན་ཁུར་དུ་འཁུར་བ་ན། །ནག་པོའི་ཕྱོགས་ཀྱིས་ཆེས་ཆེར་མ་བཟོད་ནས། །བར་དུ་གཅོད་པའི་སྤྲིན་ཕུང་འཁྲིགས་པ་ན།།རྣམ་དག་མཁའ་ལ་སྔགས་ཀྱི་རླུང་གིས་གཏོར། །དྲག་པོའི་སྔགས་ཀྱི་ཧཱུ་སྒྲ་སྒྲོགས་པ་ན། །ཁྲོ་བོ་དྲག་པོའི་ང་རྒྱལ་སྐྱེད་སྲིད་པས།།ཕུང་པོ་སྒྱུ་མའི་གྲོང་ཁྱེར་ལྟ་བུ་ལ། །སྒྲ་ནི་སྤྲུལ་པའི་གླུ་དབྱངས་ལྟ་བུར་ཤེས། །གང་ཡང་རང་སེམས་སྣ་ཚོགས་སྤྲུལ་པ་ལས།།ངོས་བཟུང་མེད་དེ་སྤྲུལ་པའི་ཡིད་ཤེས་བཞིན། །ཡེ་ནས་ཡོད་མ་མྱོང་བས་རང་སར་སློད། ། ཆོས་ཀྱི་དབྱིངས་གཟིགས་བདེན་པར་གྲོལ་བར་བྱ།།གང་ཡང་ཅི་ལྟར་དགྲ་དང་འདྲེར་ལངས་ཀྱང་། །གང་དུའང་མི་སེམས་སྤྱིར་ཡང་མི་ལྡོག་པར། །རང་གཞན་ཆགས་སྡང་རྟོགས་པའི་ཐོག་ཏུ་རྫི།།དྲན་སྣང་ཁྲོ་བོ་གཤིན་རྗེ་གཤེད་དུ་བལྟ། ། དེ་ཚེ་ཕ་མ་འགྲོ་བ་མ་ལུས་པ། །ཡིན་ངེས་སྙམ་དུ་ཐེ་ཚོམ་མེད་པར་བསྡུ། །ཉེ་རིང་མེད་པར་ཐུགས་རྗེའི་དཀྱིལ་དུ་སྦ།།ཕྱོགས་རིས་མེད་པར་བདེན་པ་གཉིས་ཀྱིས་བསྐྱངས། །འདི་ལྟར་གོམས་ན་ཐུབ་པའི་རྣམ་ཐར་ཡིན། །འདི་ལྟར་བགྱིས་ན་དཀོན་མཆོག་འཛུམ་པ་འཆོར།།འདི་འདྲའི་མི་ལ་ཆོས་སྐྱོང་ངང་གིས་འཁོར། །མཁྱེན་པར་མཛོད་ཅིག་ཐུབ་པའི་སྲས་པོ་རྣམས། །བདག་གིས་ཁྲེལ་མེད་ཆོས་ལ་ཐོ་ལེས་གདབ།།བག་མེད་ཆོས་ལ་བསམས་ཏེ་སྐྱུག་བྲོ་བལྟ། །འདི་ཡང་དཔའ་བོ་འཇུག་པའི་ལག་ལེན་ཏེ། །ལེའུ་གསུམ་པ་དུག་གི་བཅུད་ལེན་ཡིན།།

                བཙན་དུག་ནགས་སུ་རྨ་བྱ་རྒྱུ་བ་ཞེས་བྱ་བ། །རྗེ་བཙུན་གཤིན་རྠེའི་གཤེད་ལ་ཕྱག་འཚལ་ལོ། །ཉེ་བར་འཁོར་ལྟར་བཙུན་པའི་མཐར་ཐུག་ཅིང་།།  རྟ་ཐུལ་བཞིན་དུ་བག་ཡོད་མཛེས་གྱུར་ཀྱང་།།བྱང་ཆུབ་ལམ་ལ་ཕ་མ་མི་འདྲེན་ན། ། རང་བདེའི་ཐར་པ་རྟོགས་པས་རྫི་རྒྱུ་ཡིན། །རིག་པའི་གནས་ལ་མཁས་པའི་མཐུ་ཐོབ་ཅིང་།།སྙན་པའི་གྲགས་པས་བླུན་པོ་ཀུན་དགའ་ཡང་། །བསྟན་པའི་ཁུར་ཆེན་སྤྱི་བོས་མི་ལེན་ན། །སྨྱོན་པའི་བྲོ་རྡུང་བཞིན་དུ་དོར་བྱ་ཞིང་།།བླ་མ་ལྟ་བུར་ཀུན་གྱིས་འཁུར་ན་ཡང་། །བསྟན་པ་སྤྱི་ཡི་ཁུར་ཆེན་མི་འཁུར་ཞིང་།  །རང་གི་འདོད་པ་དང་དུ་ལེན་བྱེད་ན། །འཕགས་པ་རྣམས་ཀྱི་ཐོ་ལེས་བཏབ་བྱ་ཡིན།། བཟང་པོ་ལྟ་བུར་ཀུན་གྱིས་རློམ་ན་ཡང་། །ལོག་ལྟའི་ནགས་སུ་བདག་ལྟ་འཁྲུགས་པ་ཡིས། །སྟག་མོ་བུ་ཟན་བཞིན་དུ་འཇིགས་པ་སྟེ།།བཀའ་སྡོད་བསྲུང་མ་རྣམས་ཀྱིས་བསྒྲལ་བྱ་ཡིན། །ངུར་སྨྲིག་གོས་ཅན་ཞི་དུལ་མཛེས་གྱུར་ཀྱང་། །བྱི་ལ་བཞིན་དུ་བསམ་པ་མ་རུངས་པའི།།དམ་པའི་གཟུགས་ཅན་གསོ་རུ་མེད་པ་འདི། ། མ་མོ་རྣམས་ཀྱི་ཁ་རུ་གདབ་བྱ་ཡིན། །ཁྲི་ཁྲག་དགུའི་གཙོ་བོར་འདུག་གྱུར་ཀྱང་།།ཁྱབ་འཇུག་བཞིན་དུ་རང་རྒྱུད་མ་ཐུལ་བའི། །ཆགས་སྡང་འོད་ཟེར་ཕྱོགས་བཅུར་འཕྲོ་བ་འདི། །གཤིན་རྗེ་གཤེད་ཀྱི་ཞལ་དུ་གདབ་བྱ་ཡིན།།འཛུམ་ཞིང་དེས་པས་ཐམས་ཅད་སྐྱོང་ན་ཡང་། །བདག་གི་རྗེས་སློབ་ཟག་པ་འཕེལ་བྱེད་པ།། མི་དད་ཅན་གྱི་གཙོ་བོར་གྲགས་པ་དེ།།གནས་ལུགས་སྡོམ་པའི་ཚང་དུ་སྤང་བྱ་ཡིན་།ཁྱིམ་ནས་བྱུང་ཞིང་བསྟན་པའི་སྒོར་ཞུགས་ཀྱང་། །ཁྱིམ་པ་བཞིན་དུ་བྱ་བ་མཐའ་ཡས་ཤིང་།།བླང་དོར་ཐམས་ཅད་ཁྱད་དུ་གསོད་པ་དེ། །དྲང་སྲོང་རྣམས་ཀྱིས་དམོད་པའི་བསྒྲུབ་བྱ་ཡིན། །ངུར་སྨྲིག་གྱོན་ནས་ཚུལ་ཁྲིམས་མི་བསྲུང་ཞིང་།།འདོད་པའི་ལས་ལ་སྣང་བ་འབྱམས་གྱུར་ནས། དམ་པ་རྣམས་ལ་སྒྲོ་སྐུར་འདེབས་པ་དེ། །མཁའ་འགྲོ་རྣམས་ཀྱིས་ཕ་རོལ་བསྒྲལ་བྱ་ཡིན།།རྙེད་པའི་ཆེད་དུ་དམ་པའི་གཟུགས་བཟུང་ནས། །ཁྱི་ཕག་བཞིན་དུ་འདོད་ཡོན་སྤྱོད་བྱེད་ཅིང་། །སྔགས་སུ་ཁས་བླངས་ཐམས་ཅད་བསླུ་བ་དེ།།རྡོ་རྗེ་འཛིན་པས་ཐབ་ཏུ་གཞུག་བྱ་ཡིན། ། ཐེག་ཆེན་སྐད་དུ་ལས་འབྲས་ཁྱད་གསོད་ཅིང་། །སྟོང་པའི་རྦད་ཀྱིས་འཁོར་ཚོགས་བསླུ་བ་ཡིས།།འགོང་པོ་བཞིན་དུ་སྐུ་རུ་རྫུ་བ་དེ། །དམ་ཚིག་ཅན་གྱི་སྔགས་ཀྱིས་བསྒྲལ་བྱ་ཡིན། །བསྟན་པ་སྤྱི་ལ་ཡོང་ཡེ་མི་ཕན་པས། །སྔགས་དང་མན་ངག་ཟབ་མོར་རློམ་པ་དང་།།རྟོག་པས་སྦྱར་བའི་ཚིགས་བཅད་ངན་པ་རྣམས། ། དམ་པ་རྣམས་ཀྱིས་དམངས་སུ་དབབ་བྱ་ཡིན། །ངེས་པར་བསྟན་པ་སྤྱི་ལ་གནོད་བྱེད་ན།།རེ་ཞིག་གང་གིས་གང་ལ་ཕན་གྱུར་ཀྱང་། །ཚད་ནད་ཅན་ལ་འབྲས་ཆང་བླུད་པ་ལྟར། །ཕན་བྱ་ངན་པ་ཆུ་ལ་སྐུར་བྱ་ཡིན།།ཐོས་པ་ཆུང་ངུའི་གྲུབ་ཐོབ་ངན་པ་དག །ཐུན་མོང་མཐོང་བས་མཆོག་ཏུ་ང་རྒྱལ་ཏེ། །ལམ་རིམ་མེད་པས་བླུན་པོ་འཁྲིད་པ་རྣམས།།མཁས་པ་རྣམས་ཀྱིས་ཁྱི་དམའ་དབབ་བྱ་ཡིན།། སངས་རྒྱས་བསྟན་ལ་དགྲ་བོ་ལངས་པ་ན། །སོ་སོའི་ཐར་ལ་བཟང་པོར་རློམ་གྱུར་ནས།།ལེགས་པར་བཤད་པའི་འབུལ་ཆོག་མི་བྱེད་པར། །བསྟན་པ་འཇིག་ལ་དམ་པ་མཚར་རེ་ཆེ། །འདི་ལྟར་སོ་སོར་ཐར་པ་ཕར་ཞོག་གིས།།རང་ཉིད་ངན་འགྲོ་ཆེན་པོར་འགྲོ་དགོས་པས། །བསྟན་པ་བཤིག་པའི་དགྲ་བགེགས་མི་སྒྲོལ་རེ།། དམ་ཉམས་དགྲ་བགེགས་ཕ་རོལ་བསྒྲལ་བྱ་ཡིན།།ཉོན་མོངས་ལས་ཀྱིས་བདས་པའི་གཏི་མུག་ཅན། །བསྟན་དང་སེམས་ཅན་སྤྱི་ལ་མི་སེམས་པར། ། རང་ལ་གནོད་པ་བྱས་པའི་དགྲ་བོ་ལ།།ཁྲོས་ནས་སྔགས་ཀྱིས་ཕ་རོལ་སྒྲོལ་བ་དེ། ། ཚུལ་ཁྲིམས་འཆལ་ལམ་མ་འཆལ་མཚར་རེ་ཆེ། །གང་ཡང་རྒྱལ་བ་རྣམས་ཀྱིས་ཁྲེལ་བ་ཡི།།རང་དོན་ལས་ནི་རྣམ་པ་ཀུན་མི་བསྟེན། །ཕྱོགས་བཅུའི་རྒྱལ་བ་རྣམས་ཀྱིས་བསྔགས་གྱུར་ན། །ཇི་ལྟར་གྱུར་ལ་དེ་ལྟར་སྒྲུབ་པར་རིགས།།མཁྱེན་པར་མཛོད་ཅིག་བློ་དང་ལྡན་པ་རྣམས། །ལག་ལེན་ཐམས་ཅད་ཐོག་མཐའ་དག་ནས་བྱ།། ཆོས་དང་འགལ་བ་སྲོག་དང་བསྡོས་ལ་སྤང་།།སྤྱི་ལ་མི་གནོད་རང་ལ་ཅི་ཕན་བྱ། །བླུན་པོས་རིམ་གྱིས་མཐོང་བར་མ་གྱུར་ཀྱང་། །མཁས་པ་རྣམས་ལ་ལྷང་ངེ་སོ་སོར་གསལ།།འདི་ཡང་དཔའ་པོ་འཇུག་པར་བྱ་བ་སྟེ། །ལེའུ་བཞི་པ་དུག་གི་བཅུད་ལེན་ཡིན། ། 

                      བཙན་དུག་ནགས་སུ་རྨ་བྱ་རྒྱུ་བ་ཞེས་བྱ་བ། རྗེ་བཙུན་གཤིན་རྗེའི་གཤེད་ལ་ཕྱག་འཚལ་ལོ།།གང་ལ་བསམ་པ་ངན་ཞིང་སྡང་ཞུགས་པའི། །ནག་པོའི་ཕྱོགས་རྣམས་མ་ལུས་དྲུང་འདིར་ཤོག །ཤ་ཟ་ཁྲག་འཐུང་བྱེ་བ་དུང་ཕྱུར་རྣམས།།ལུས་ཅན་བདག་གི་དྲུང་དུ་དེ་རིང་ཤོག །ལྷ་དང་ཀླུ་དང་གནོད་སྦྱིན་ཚོགས་རྣམས་དང་། དྲི་ཟ་ལྷ་མ་ཡིན་དང་ལྟོ་ཕྱེའི་ཚོགས།།མཁའ་ལ་རྒྱུ་བའི་ཡི་དྭགས་མཐའ་ཡས་དང་། ལན་ཆགས་འབྱུང་པོའི་ཚོགས་རྣམས་དྲུང་འདིར་ཤོག །ལྷན་ཅིག་སྐྱེས་པའི་ལྷ་དང་དྲང་སྲོང་དང་།།བགེགས་དང་ལོག་འདྲེན་གདོན་ཆེན་བཅོ་བརྒྱད་དང་། །མ་མོ་རྣམས་དང་ལས་མགོན་ཐམས་ཅད་དང་། སྐྱབས་གསུམ་འཕགས་པའི་ཚོགས་རྣམས་གནས་འདིར་འཁོད།།དེ་ལྟར་མ་ཚང་མེད་པར་འཁོར་འདས་རྣམས། །དཔང་པོ་ཉིད་དུ་དྲུང་འདིར་འཁོད་པ་ལ། ཐེ་ཚོམ་མེད་པར་བདག་གིས་དམ་བཅས་པའི།།རླབས་པོ་ཆེ་ཡི་གཏམ་འདི་བཤད་ཀྱིས་ཉོན། །སྔོན་ཆད་རྒྱུ་རྐྱེན་སྐལ་བ་བཟང་པོ་ཡིས། །དེང་སང་འབྱོར་པ་བཅུ་ལྡན་ལུས་འདི་ཐོབ།།ཡ་མཚན་སྐྱེས་པས་ཉིན་མཚན་རངས་གྱུར་ནས། ། ད་ནི་ཕན་བདེའི་དཔལ་ལ་ཅིས་མི་སྤྱོད། །སྨོན་ལམ་དག་པས་ཁྱིམ་ནས་རབ་ཏུ་བྱོན།། རང་འདོད་སྤངས་ནས་སྨོན་འཇུག་གོས་སུ་གྱོན། །སེམས་མཆོག་རྙེད་ནས་གཞན་དོན་ཁུར་དུ་འཁུར། །ལམ་ལ་ཞུགས་ནས་བདེ་མཆོག་ཟས་སུ་བཟས།།ཡང་འདི་གསན་དང་ཐམས་ཅད་འདུས་པའི་ཚོགས། །ནག་པོའི་ཕྱོགས་ཀྱི་གདུག་རྩུབ་འདི་འདྲ་ཞིག །སྐལ་མེད་རྣམས་ཀྱི་བསོད་ནམས་འདི་འདྲ་བས།།ཁོ་བོ་བདེ་བ་ཅན་དུ་སྨོན་མ་གྱུར། །ཚོགས་མ་བསགས་པའི་འབྱུང་པོ་མཐའ་ཡས་ཤིང་། ། ངན་སོང་རྣམས་གྱི་སྡུག་བསྔལ་ངོ་དྲག་པས།།སྡིག་སྤྱོད་རྣམས་ཀྱི་སྤྱོད་པ་འདི་འདྲ་ན༑ ༑ཞི་བདེའི་གནས་སུ་ཁོ་བོ་དགར་མ་ཚོར། །བྱིས་པ་རྣམས་ཀྱི་གཉེན་པོ་བསྒྱུར་སླ་ཞིང་།།བདུད་སྡེ་རྣམས་ཀྱི་བསམ་སྦྱོར་འདི་འདྲ་ན། །མི་རྟག་ཚེ་ལ་སྡོད་པའི་སྐབས་མེད་པས། །དབེན་པའི་གནས་སུ་འདུག་ལ་དགར་མ་ཚོར།།བསྟན་པ་འདི་ལ་སྡང་བའི་དགྲ་མང་ཞིང་། །བཙན་སར་ཕྱིན་པའི་གྲུབ་ཐོབ་འདི་འདྲ་ལ། །སྙིགས་མའི་དུས་འདིར་སྣང་ཚུལ་ལུགས་ངན་པས།།ཁོ་བོ་མཁའ་སྤྱོད་གནས་སུ་དགར་མ་ཚོར། །ད་ནི་འཇིག་རྟེན་ཁམས་རྣམས་ཐམས་ཅད་ཀྱི། །མཐུ་ཆེན་ཐམས་ཅད་བདག་གི་དགྲར་ལངས་ཀྱང་།།ཁོ་བོ་བ་སྤུ་ཙམ་ཡང་མི་གཡོ་བར། ། འཁོར་བའི་གནས་འདིར་གོ་ཆ་བགོ་བར་བྱ། །གང་ན་འགོ་བའི་ནད་ཀྱིས་ཐེབས་གྱུར་ཏེ།།རིམས་ནད་ཆེན་པོས་འཇིག་རྟེན་གཡོས་པ་ན། །སྨན་པ་ཉིད་དམ་ནད་པའི་གཡོག་དག་ཏུ། །དྲག་པོའི་གོ་ཆ་ཆེན་པོ་བགོ་བར་བྱ།།མ་ནུས་སེམས་ཅན་དྲིན་གྱིས་སྐྱབས་པའི་ཚེ། །ལོག་སྒྲུབ་ཆེན་པོས་སྡུག་སུན་ཕྱུང་བ་ན། ལྷག་པར་དེ་ལ་ཕན་ཞིང་བརྩེ་བ་ཡི།།དཔའ་བོ་རྣམས་ཀྱིས་གོ་ཆ་བགོ་བར་བྱ། །གང་ན་སྟག་མོ་མི་ཟན་འཇིགས་པ་རྣམས། །མི་ཡི་སྲོག་ལ་འཇབ་ཅིང་རྒྱུག་པ་ན།། སེམས་ཅན་དོན་དུ་ཐེ་ཚོམ་མི་ཟ་བར། །ཕྱོགས་དེར་བགྲོད་པའི་གོ་ཆ་བགོ་བར་བྱ། ། འཇིག་རྟེན་དག་ན་ཤིན་ཏུ་མི་འདོད་པའི།།ལྟས་ངན་སྣ་ཚོགས་དམག་ཏུ་འཐིབས་པ་རྣམས། །དགྲ་དག་གཤིས་ངན་རང་ཉིད་གཞོམ་པའི་ཕྱིར། །གཡང་དུ་ལེན་པའི་གོ་ཆ་བགོ་བར་བྱ།།འཇིག་རྟེན་དག་ན་ཤིན་ཏུ་མི་མཁོ་བའི། །ལས་དང་ཉོན་མོངས་སྒྱུ་མ་འཁྲུགས་པ་རྣམས། །བདག་ཏུ་འཛིན་པའི་སྲོག་དང་བྲལ་བའི་ཕྱིར།།དང་དུ་ལེན་པའི་གོ་ཆ་བགོ་བར་བྱ། །ཕཊ་ཡ་ཧོ་ཡི་འཆི་བདག་མཱ་ར་ཡ༑ ༑སྐྱིད་འདོད་འགོང་པོའི་སྲོག་ལ་ཛ་ལ་ར། །སྙོམ་ལས་ལོ་ལོའི་མགོ་ལ་ཆེམས་སེ་ཆེམས།།འཁོར་བའི་འབྲེལ་ཐག་རྦད་རྦད་ཆོད་ལར་མཛོད། །བདག་ཅག་འཁོར་བ་འདི་རུ་སྡུག་བསྔལ་བས། །འདི་ཡི་ལན་རྩ་རྡོ་རུ་གཏུགས་པ་ན།། རྣམ་རྟོག་སྙིང་གི་གཞལ་ཡས་ཡ་གི་ན། །ངའོ་ཞེས་པའི་རྒྱལ་པོ་ཞུགས་པ་མཐོང་། ། དེ་ལ་ལེ་ལན་བདས་ཤིང་འཐབ་པ་ན།།ཅི་ཟེར་ང་ནི་ཐོག་མེད་དུས་ནས་ཞུགས། ། ཕྱི་ནང་བར་གསུམ་ཡོངས་སུ་བདག་གིས་ཁྱབ། །བདེན་བརྫུན་ཚོགས་དྲུག་གཙོ་བོ་ཡོངས་ལ་དྲིས།།བདག་ཉིད་བདག་གི་དགྲ་ཡིས་སུ་ལ་འཐབ། །བདག་ཉིད་མགོན་ཡིན་ཐམས་ཅད་སུ་ལ་སྐྱོབས། །བྱ་དང་མི་བྱ་ཡོངས་ལ་དཔང་པོ་རང་།།རང་གིས་རང་ཉིད་ཐུལ་ན་གྲོལ་བར་འགྱུར། །གཞན་གྱིས་གཞན་ཞིག་འདུལ་ན་འཐབ་རྩོད་འགྱུར། །འཐབ་ཅིང་རྩོད་པའི་དྲུང་ན་སྡིག་ཅན་མཚང་།།ངེས་ཏེ་ཆགས་སྡང་ཅན་ལ་གྲོལ་སྐབས་མེད། །དེས་ན་རྟོགས་པ་མེད་པའི་རྣལ་འབྱོར་དེ། །ཨ་ལ་ལ་དེ་སྐད་བྱ་བ་ཅི་ལ་ཟེར།།ཡོད་པར་འཛིན་པའི་སྲོག་ལ་མཱ་ར་ཡ། །མེད་པར་འཛིན་པའི་སྲོག་ལ་ཛ་ལ་ར། །བདག་འཛིན་རྒྱལ་པོས་ལན་ན་གཙོ་བོ་ཆོམས།གཙོ་བོ་ཡིད་ཀྱི་རྣམ་ཤེས་མ་ཐུལ་ན། །བདག་འཛིན་རྒྱལ་པོས་འགབ་ལ་འཁྲིད་ཉེན་ཡོད། །གཙོ་བོ་ཡིད་ཀྱི་རྣམ་ཤེས་ཐུལ་བ་ན།།མིག་སོགས་གཙོ་བོ་གཞན་ཡང་བརླག་པར་འགྱུར། །དེས་ན་ཡིད་ཀྱི་རྣམ་ཤེས་འདི་ཐུལ་དང་། །གཟུགས་སྒྲ་དྲི་རོ་ལ་སོགས་ཡོད་མ་མཆིས།།བདག་དང་བདག་གིར་འཛིན་པ་ཡོད་མི་འགྱུར། །རྣམ་རྟོག་རྒྱལ་པོ་རྐྱེན་དང་བྲལ་བར་མཆིས། །དེ་ལྟར་རྒྱལ་པོ་དེ་ལ་སྨྲས་པ་ན།།རྣམ་རྟོག་རང་གྲོལ་ཆོས་ཀྱི་དབྱིངས་སུ་གོ།ཚོགས་དྲུག་མི་བདེན་སྒྱུ་མའི་གླང་པོ་འདྲ། །གཟུང་འཛིན་མི་བདེན་སྤྲུལ་པའི་འཕྲིན་ལས་འདྲ།།དེ་ལ་སོགས་པའི་རྣམ་རྟོག་དྲུང་ནས་ཕྱུང་། །གཟུང་འཛིན་མེད་པ་བདག་ལྟའི་དབྱིངས་སུ་བསྒྱུར། །ང་ཁྱོད་མེད་པས་ཆགས་སྡང་གཉུག་མར་ཞོག།རི་བོང་རྭ་ལྟར་རྣོ་རྟུལ་མི་མངའ་བའི། །དབང་པོ་རབ་འབྲིང་འཆི་བའི་སྲོག་དང་ཕྲོལ། ། མོ་གཤམ་བུ་ལྟར་སྤྱང་གླང་མི་མངའ་བའི།།འཁོར་འདས་ཐམས་ཅད་མཉམ་ཉིད་གཅིག་ཏུ་དྲིལ། །རུས་སྦལ་སྤུ་ལྟར་རིང་ཐུང་མི་མངའ་བའི། །སྐྱེ་འཇིག་ཐམས་ཅད་དབུ་མ་ཆེན་པོར་སློང་།།བྲག་ཆ་ལྟ་བུར་ཡེ་ནས་སྟོང་པ་ཡི། །ཐ་སྙད་ཆོས་རྣམས་དམ་པ་གཅིག་ཏུ་དྲིལ། །ཨ་ཨ་སྐྱེ་མེད་ནམ་མཁའ་ལྟ་བུའི་ངང་།།ཨི་ཨི་འཇིགས་མེད་སྤྲོས་པ་བྲལ་བའི་སྐུ། །ཨོཾ་ཨོཾ་སྣ་ཚོགས་རྣམ་དག་ཆོས་སྐུར་ངོ་འཕྲོད་ནས། །ཀ་རུ་ཎྀ་ཀའི་ཐུགས་རྗེས་འཛིན་པར་ཤོག།འདི་ལྟར་བཙན་དུག་ནགས་སུ་རྨ་བྱ་རྒྱུ་བ་ཞེས་བྱ་བ། ཤེས་བྱ་རབ་འབྱམས་ལ་བློ་གྲོས་ཀྱི་མིག་བྱང་ནས་ལས་རྒྱུ་འབྲས་ལ་བསླུ་བ་མེད་པའི་མཐུ་སྟོབས་ཐོབ་ཅིང་།ལྟ་བ་གཉིས་སུ་མེད་པའི་དོན་ལ་ཐེ་ཚོམ་མེད་པར་གྱུར་པ། རི་ནག་པོའི་ཁོང་ན་གནས་པའི་རྣལ་འབྱོར་བ་ངྷརྨ་རཀྵི་ཞེས་བྱ་བ་བདག་གིས་སེམས་ཅན་ལ་དམིགས་པ་མེད་པའི་སྙིང་རྗེ་ཆེན་པོས་ཀུན་ནས་བླངས་ནས་སྦྱར་བ་དགེ་ལེགས་སུ་གྱུར་ཅིག། །། སརྦ་ཤུ་བྷཾ  །།

                                          རྩོམ་སྒྲིག་པ།  སྟོབས་རྒྱལ།

               གསལ་འདེབས། 

                         རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་དགོད་ན་རྩོམ་ཁུངས་དང་སྦྲེལ་ཐག་གསལ་བོར་དགོད་པར་ཞུ།

                          དྲ་བའི་སྦྲེལ་ཐགhttp://www.tb1025.cn