ཀྭ་ཡེ་ཕ་མར་གྱུར་པའི་འགྲོ་བ་མ་ལུས་དྲང་བའི་ཕྱིར། ། བདག་ལ་ཡོད་པའི་ཉོན་མོངས་དུག་ལྔ་གང་དག་གིས།།སེམས་ཅན་རྣམས་ཀྱི་དུག་ལྔ་མ་ལུས་དྲང་བར་བྱ། །འདོད་ཆགས་ལ་སོགས་མེད་པའི་དགེ་བ་གང་ཡོད་རྣམས།། འགྲོ་དྲུག་སེམས་ཅན་རྣམས་ལ་སྙོམས་པར་བྲིམས་པར་བྱ།།ན་ཚ་ལ་སོགས་འབྲས་བུར་གྱུར་པའི་སྡུག་བསྔལ་གྱིས། །དེ་དང་རིགས་མཐུན་སྡུག་བསྔལ་མ་ལུས་དྲང་བར་བྱ། །ན་ཚ་ལ་སོགས་མེད་པའི་ཕན་བདེ་གང་ཡིན་དེ།།འགྲོ་དྲུག་སེམས་ཅན་རྣམས་ལ་རྟག་ཏུ་བྲིམས་པར་བྱ། །དེ་ལྟར་བྱས་ན་རང་ཉིད་འཁོར་བའི་རྒྱ་མཚོ་འདིར། །སྐད་ཅིག་ཙམ་ཡང་འཁྱམས་པའི་གོ་སྐབས་ག་ལ་སྲིད།།འོན་ཀྱང་ཇི་སྲིད་བྱང་ཆུབ་མ་ཐོབ་བར། །མྱོང་གྱུར་ཉོན་མོངས་རྒྱུ་འབྲས་ཇི་སྙེད་པ། ། ཐམས་ཅད་སྐྱེ་བ་འདི་ལ་ཡོངས་སུ་རྫོགས་པར་བྱ།དེ་ཡང་ད་ལོའི་ཟླ་བ་འདི་ལ་དྲང་བར་བྱ། །དེ་ཡང་དེ་རིང་ད་ལྟ་ཉིད་དུ་རྫོགས་བྱས་ནས། །སྡུག་བསྔལ་བགྲང་ཕྲེང་རབ་ཆད་ཙམ་གཅིག་ཐབས་སུ་བསྟེན།།བློ་འདི་འབྱོངས་པར་གྱུར་ཅིག་བྱམས་པའི་རྣལ་འབྱོར་པ། །ཞེས་བྱམས་སྙིང་རྗེ་བྱང་ཆུབ་ཀྱི་སེམས་གྱེར་སྒོམ་རྡོ་རྗེའི་གླུ་བླང་བ་འདི་བྱམས་པའི་རྣལ་འབྱོར་པ་བདག་གིས་ཡུན་དུ་ཁ་བཏོན་བྱས་ནས།རེ་ཞིག་ཆུ་བོ་གང་གཱའི་འགྲམ་དུ་ཐུགས་རྗེ་ཆེན་པོ་དང་ལྡན་པའི་བཅོམ་ལྡན་འདས་བྱམས་པ་ལྷའི་རྒྱལ་པོའི་ཆ་ལུགས་སུ་བཞུགས་ནས་བྱམས་པའི་རྣལ་འབྱོར་པ་བྱོན་ནས་འདི་སྐད་གསུངས་སོ།།ཐོས་པ་ཙམ་གྱིས་ངན་འགྲོའི་སྡུག་བསྔལ་སེལ་བའི་གླུ། །བསམ་པ་ཙམ་གྱིས་འཁོར་བའི་ལྗོན་ཤིང་བཅད་པའི་གླུ། ། བསྒོམ་པ་ཙམ་གྱིས་བྱང་ཆུབ་མྱུར་དུ་འབྱིན་པའི་གླུ།།བྱམས་པ་སྙིང་རྗེ་བྱང་ཆུབ་སེམས་ཀྱི་གླུ་འདི་མཚར། །ཉོན་མོངས་དུག་ལྔ་དགྲ་བཞིན་འཇོམས་པར་རིགས་ན་ཡང་། །ཁྱོད་ཀྱིས་འདི་ལྟར་ན་ནི་རྒྱུད་ལ་བསྟེན་པ་མཚར།།ན་ཚ་སྡུག་བསྔལ་ཀུན་ནས་བཟོད་པར་དཀའ་ན་ཡང་། །ཁྱོད་ཀྱིས་འདི་ལྟར་ན་ནི་ངོ་མཚར་རྨད་དུ་བྱུང་།། རང་དོན་ཡལ་བར་དོར་ནས་གཞན་དོན་ལྷུར་མཛད་དེ།།རང་དོན་མེད་པར་འཁོར་བར་འཁྱམས་པ་སུ་ཡི་དཀའ། །དེས་ན་རང་དོན་བསམ་པ་སྐད་ཅིག་མ་འཁྲིས་པར།། གཞན་གྱིས་མི་འདོད་བདག་གིས་ལེན་པ་དམ་པ་ཡིན།།ཐེག་པ་ཆེན་པོའི་གསུང་རབ་མཐའ་ཡས་ཡོད་མོད་ཀྱང་། །འདི་རུ་མ་འདུས་རྡུལ་ཙམ་གང་ཡང་ཡོད་མ་ཡིན། །དེ་ཕྱིར་རྣལ་འབྱོར་ཁྱོད་ཀྱི་རྡོ་རྗེའི་གླུ་བླངས་འདི།།ཐོས་བསམ་བསྟན་ནམ་སྒོམ་པའམ་ནི་བཤད་ཀྱང་རུང་། །འཇིག་རྟེན་ལྷ་དང་བཅས་པའི་སྐྱབས་གནས་དམ་པ་སྟེ། །ཕྱོགས་བཅུའི་རྒྱལ་བ་རྣམས་ཀྱི་ཐུགས་ཀྱི་ཉིང་ཁུ་དེ།།ཁྱོད་ཀྱི་བློ་ལ་ཤར་བ་ངོ་མཚར་ཤིན་ཏུ་ཆེ། །ཤིན་ཏུ་དགྱེས་པ་རྡོ་རྗེའི་གླུ་ཚིག་གི་ལན་དུ་གསུངས་པ་དང་། བྱམས་པའི་རྣལ་འབྱོར་པ་ཤིན་ཏུ་ཉམས་དགའ་ཞིང་ཐེ་ཚོམ་གྱི་མདུད་པ་གྲོལ་ནས་དཔའ་བོ་ཆེན་པོ་རྡོ་རྗེའི་གཡུལ་དུ་ཞུགས་སོ།།ཀྱེ་ཧོ། ཡང་འདི་ལྟར་ཉིན་ལན་གསུམ་མཚན་ལན་གསུམ་དུས་དང་གནས་སྐབས་དྲན་པ་དང་། བརྗེད་པ་མ་མཆིས་པར་ཆོས་འདི་བློ་ལ་སྦྱངས་ཤིང་ཁམས་སོ་རྡོ་རྗེའི་གླུ་བླངས་པ་དང་།ལྷ་དང་ཀླུ་དང་གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་།ཤ་ཟ་དང་སྲིན་པོ་ལ་སོགས་པ་མ་རང་གི་བུ་གཅིག་པུ་ལ་བྱམས་པ་བཞིན་གུས་པར་དབང་དུ་འདུས་པར་འགྱུར་རོ། །གཞན་ཡང་ཡུལ་གྱི་རྒྱལ་པོ་དང་།བློན་པོ་དང་། བཙུན་མོ་ད་། བྲམ་ཟེ་དང་། ཁྱིམ་བདག་དང་། ཁྱེའུ་དང་། བུ་མོ་དང་། དམངས་རིགས་ལ་སོགས་པ་ཐམས་ཅད་དབང་དུ་འདུས་ཏེ།དགའ་བས་རྗེས་སུ་འབྲངས་ཤིང་མཐོང་བ་དང་། ཐོས་པ་ཐམས་ཅད་ཀྱང་བྱམས་པའི་རང་བཞིན་དུ་གྱུར་ཏོ། །གཞན་ཡང་རྟ།གླང་པོ་ཆེ། མ་ཧེ་སྤྲེའུ། འདབ་ཆགས་ཆུ་རུ་སྐྱེས། རིའི་སེམས་ཅན་གཅན་གཟན་གྱི་ཚོགས། ཐ་ན་གྲོག་སྦུར་ཡན་ཆད་འགྲོ་བ་རིགས་དྲུག་རང་ལ་མི་འཇིགས་ཤིང་བག་ཕེབས་པ་ལྟར་རྣལ་འབྱོར་བའི་དྲུང་དུ་འཁོད་པར་གྱུར་ཏོ།། དེ་ལྟར་རྣལ་འབྱོར་བའི་ཐུགས་ཀྱི་དགོངས་པ་ལ་བདག་གིས་བྱམས་སྙིང་རྗེ་བྱང་ཆུབ་ཀྱི་སེམས་ཡིད་ལ་བྱས། ཚིག་ཁ་འདོན་དུ་བྱས།སྙན་པ་རྡོ་རྗེའི་གླུ་བླངས་པ་ལ་བརྟེན་ནས་ཐུགས་རྗེ་ཆེན་པོ་དང་ལྡན་པའི་བཅོམ་ལྡན་འདས་བྱམས་པས་ཞལ་མངོན་སུམ་དུ་བསྟན།དགྱེས་པའི་གསུང་བྱུང་ནས་ཐེ་ཚོམ་གྱི་དྲ་བ་ཐམས་ཅད་བཅད། དེ་ལ་བརྟེན་ནས་ཁོ་བོའི་བཟོད་པ་དང་བརྩོན་འགྲུས་ལ་སོགས་པ་ཟླ་བ་ཡར་ངོ་བཞིན་དུ་འཕེལ་བར་གྱུར།དེའི་དབང་གིས་འདི་ལྟར་འགྲོ་བ་རིགས་མི་མཐུན་པ་ཐམས་ཅད་ཀྱང་མས་བུ་མཐོང་བ་བཞིན་དུ་བདག་ལ་ཀུན་དགའ་བར་གྱུར།དེ་དག་གི་བཟང་ལན་དུ་བཅོམ་ལྡན་འདས་བྱམས་པ་ལ་ཐེག་པ་ཆེན་པོའི་མཆོད་པ་ཕུལ་བར་དགོངས་ནས་རྡོ་རྗེའི་གླུ་བླངས་པ་ནི།ཐོག་མེད་དུས་ནས་ཉེ་བར་འབྲེལ་བ་ཡི།། ཕ་མར་གྱུར་པའི་སེམས་ཅན་མ་ལུས་པ། །བྱང་ཆུབ་མཆོག་ལ་འགོད་པའི་ཡི་དམ་བསམ།།ཆོས་འདིས་བྱམས་པ་མགོན་ལ་མཆོད་པ་བགྱི། །དེ་ཚེ་རང་དོན་སྐད་ཅིག་མ་འཁྲིས་པར། །གཞན་དོན་འབའ་ཞིག་སྙིང་ལ་གོམས་པར་བྱ།།འདི་ནི་བྱང་ཆུབ་སྒྲུབ་པའི་གཙོ་བོ་ཡིན། །ཆོས་འདིས་བྱམས་པ་མགོན་ལ་མཆོད་པ་བགྱི། །བདེ་སྡུག་བཏང་སྙོམས་ཚོར་བ་ཅི་བྱུང་ཡང་།།བྱང་ཆུབ་སྒྲུབ་པའི་གྲོགས་སུ་དང་དུ་བླངས། །བསྐལ་པ་དུ་མར་བསོད་ནམས་ཅི་སོག་ཀྱང་། །ཉན་ཐོས་བསྡར་མའི་ཆོས་སུ་མ་ཤོར་བར།།ཆོས་འདིས་བྱམས་པ་མགོན་ལ་མཆོད་པ་བགྱི། །དེ་ཙམ་ཞིག་ཏུ་མི་འདོད་ཅི་བྱུང་ཡང་། །བཟོད་པའི་གོ་ཆ་ཅུང་ཟད་ཤོར་མ་གྱུར།།ལྷག་པར་དྲིན་གྱིས་བསྐྱངས་པའི་སྐྱེ་བོ་ཡིས། །ལོག་སྒྲུབ་བྱེད་ཀྱང་འཛུམ་པའི་བཞིན་གྱིས་སྐྱོང་། །ཆོས་འདིས་བྱམས་པ་མགོན་ལ་མཆོད་པ་བགྱི།།སྡང་བའི་སྐྱེ་བོའི་ཕྱོགས་ནས་སྡིག་བསགས་ཀྱང་། །ངན་པའི་བསམ་པ་སྐད་ཅིག་ཤོར་མ་གྱུར། །སྣང་སྲིད་བདུད་དང་ལྷ་འདྲེ་དགྲར་ལངས་ཀྱང་།།རང་འདོད་འཁྲི་བའི་བསྲུང་སྐྱོབ་བྱེད་མ་མྱོང་། །ཆོས་འདིས་བྱམས་པ་མགོན་ལ་མཆོད་པ་བགྱི། །ངེས་པར་འཆི་བའི་ནད་ཀྱིས་བཏབ་གྱུར་ཀྱང་།།ཆོས་མིན་དག་ལ་ཡིད་བརྟན་བཅའ་མ་མྱོང་། །སེར་སྣ་གོམས་པའི་འབྱོར་བ་ཆུང་ན་ཡང་། །ལོག་པའི་ཆོས་ལ་ལྟོ་གོས་བྱེད་མ་མྱོང་།།ཆོས་འདིས་བྱམས་པ་མགོན་ལ་མཆོད་པ་བགྱི། །ངན་པའི་གྲོགས་ཀྱིས་ཀུན་ནས་བསྐོར་ན་ཡང་། །གཉེན་པོའི་རང་ཚུགས་གང་ཡང་སྐྱེལ་མ་མྱོང་།།མདོར་ན་འགྲོ་འམ་འདུག་གམ་ཅི་བྱེད་ཀྱང་། ། མ་བརྟགས་བྱ་བ་གང་ཡང་བྱེད་མ་མྱོང་། །ཆོས་འདིས་བྱམས་པ་མགོན་ལ་མཆོད་པ་བགྱི།།དེ་ལྟར་ཡིན་མོད་འོན་ཀྱང་ཆོས་རྣམས་ལ། །བདེན་པར་རྟོགས་པ་རྡུལ་ཙམ་ཡོད་མ་མྱོང་། །འདི་ནི་བྱང་ཆུབ་སྒྲུབ་པའི་གཙོ་བོ་ཡིན།།ཆོས་འདིས་བྱམས་པ་མགོན་ལ་མཆོད་པ་བགྱི། །དེ་ལྟར་བསྒྲུབ་པའི་མཆོད་པ་དམ་པ་འདིས།། རྣལ་འབྱོར་བདག་གི་བསམ་པ་སྦྱང་བའི་ཕྱིར།།བྱམས་པའི་དཔུང་གིས་ཡོན་འདི་བཞེས་སུ་གསོལ། །བཞེས་ནས་བློ་འདི་འབྱོངས་པར་མཛད་དུ་གསོལ། །ཞེས་པའི་མཆོད་པ་དང་།བར་སྣང་ལ་མཆོད་པའི་ལྷ་མོ་ལྔ་དང་། སྒྲ་དང་འོད་ལ་སོགས་པ་ཡིད་དུ་འོང་བའི་མཆོད་པ་གཞན་ཡང་དཔག་ཏུ་མེད་པའི་རྣམ་པར་གྱུར་ཏོ།། དེའི་ཚེ་ཐེག་པ་ཆེན་པོ་ལ་བློ་སྦྱོང་པའི་སྐྱེས་བུ་དམ་པ་རྣམས་ཆོས་འདི་ངོ་མཚར་བའི་གནས་སུ་རིག་ནས། འདིའི་ཕྱོགས་སུ་དཀའ་བ་སྤྱོད་པ་དང་།ཞུ་ཞིང་ཉམས་སུ་ལེན་པ་ཡང་ད་དུང་མ་བྱུང་མོད། དེའི་ནང་ནས་གནས་ཆེན་པོ་བརྒྱ་རྩ་བརྒྱད་ཀྱི་བདག་པོ། པནཊིཏ་ལྔ་བཅུ་རྩ་གཉིས་ཀྱི་གཙུག་གི་ནོར་བུ།ཆོས་རྒྱལ་དྲུག་ཅུ་རྩ་གཉིས་ཀྱི་མངའ་གསོལ་བའི་དཔའ་བོ། འདུལ་བ་འཛིན་པ་བསམ་གྱིས་མི་ཁྱབ་པའི་མཁན་པོ། མདོ་སྡེ་འཛིན་པ་དཔག་ཏུ་མེད་པའི་བཤེས་གཉེན།མངོན་པ་འཛིན་པ་མཐའ་ཡས་པའི་སྐུར་གནས། རིག་པ་འཛིན་པ་རྒྱ་མཚོའི་བླ་མ། མདོར་ན་འགྲན་ཟླ་ཐམས་ཅད་དང་བྲལ་བའི་སྐྱེས་བུ་དམ་པ་འགྲོ་བའི་མགོན་པོ་ཨ་ཏི་ཤ་ལ་གནང་ནས་ཐུགས་རྗེ་ཆེན་པོ་དེས་ཐུགས་ཉམས་སུ་བཞེས་ཏེ།དེ་ཡང་རང་དོན་ཡལ་བར་དོར་ནས་གཞན་གྱི་དོན། །ལྷུར་མཛད་དེ་ནི་བདག་གི་བླ་མ་ལགས་ཞེས་པ་ལ་སོགས་པ་དེ་ལྟར་ལགས་སོ།།སྐྱེས་བུ་དམ་པ་དེས་རྒྱ་བོད་ཀྱི་ས་ཆ་ལ་སྐྱེས་བུ་དམ་པ་དོན་དུ་གཉེར་བ་རྣམས་ལ་ལྐོག་ཁྲིད་དུ་གདམས་པའོ། །རྒྱུད་པ་ནི་བྱམས་པ།བྱམས་པའི་རྣལ་འབྱོར་པ། དེས་ཇོ་བོ་རྗེ་ལའོ།། །། ༈ བྱམས་པའི་རྣལ་འབྱོར་པ་ལ་ཕྱག་འཚལ་ལོ། །འཁོར་བའི་གནས་སུ་དཀའ་ཐུབ་བཟོད།།སྐྱེ་བོ་ཡོངས་དེ་རང་འདོད་འཇོམས། །མི་འདོད་འཇིཊ་པས་མི་རྫི་བ། །དཔའ་བོ་རྣམས་ལ་གུས་བཏུད་ནས།།བདེ་གཤེགས་ལམ་སྲོལ་སྐྱོང་བའི་ཕྱིར།།རྒྱལ་པོ་སྙིང་སྟོབས་ཆེན་པོ་ལྟར། །གཞན་དོན་འབའ་ཞིག་རབ་བསམ་ནས། །བདག་གཞན་ངེས་པར་བརྗེ་བར་བྱ། །དེ་ལ་བདག་རྒྱུད་རེངས་པ་ངས།།བཅུད་ཀྱི་བདག་པོ་དཔའ་བོ་ལ། །བདེ་གཤེགས་གསུང་རབ་དཔང་བཞག་ནས། །ཡུས་པའི་ཚིག་གིས་གདམས་འདི་ཞུ། །ཨེ་མ་དཔའ་བོ་སྙིང་རྗེ་ཅན།།བདག་གིས་ཆགས་པའི་གནས་རྣམས་སྤངས། །འཇིགས་པའི་ལམ་ལ་དཀའ་བ་སྤྱད། །ཕྱོགས་ལས་རྒྱལ་ཏེ་དྲུང་འདིར་སླེབ། །ད་ནི་ནད་ཀྱིས་མནར་བ་ཡིས།།ལོག་སྒྲུབ་སྐྱེ་བོ་བཟོད་པའི་ཕྱིར། །མི་གཙང་འཁོར་བའི་འདམ་རྫབ་ཏུ། །མི་ཕོད་བརྫི་བའི་ཆོས་གཅིག་ཞུ། །རྡོ་རྗེ་སྙིང་པོས་ལན་གསུངས་པ༑༑དཀའ་བ་སྤྱད་ནས་འོངས་པ་ལ། །འཇིགས་དང་དུབ་པ་སྤངས་པའི་ཕྱིར། ། བློ་སྦྱོང་སེམས་དཔའི་རིམ་པ་ཡོད། །ཁ་བུབ་སྣོད་དེ་ཐོས་པས་བཟློག།ཞབས་རྡོལ་སྣོད་དེ་བསམ་པས་གྲུབ། །སྦགས་པའི་སྣོད་དེ་བསྒོམས་པས་ཁྲུས། །སྣོད་ཀྱི་སྐྱོན་སྤངས་བཅུད་འདི་ལོངས། །ཀ་ཡེ་ཐོག་མ་མེད་དུས་ནས།།ད་དུང་བདག་རྒྱུད་མ་ཐུལ་བས། །གཤིས་ངན་བདུད་ཀྱི་ཁང་པ་ནས། །ཉོན་མོངས་ལས་ཀྱི་ཕོ་ཉ་འཁོལ། །ཁྱོད་ཀྱིས་ཕ་མ་མ་བསམས་པས།།སེམས་ཅན་ཐམས་ཅད་སྡུག་བསྔལ་ཀྱང་། །ད་དུང་བག་ཕེབས་བདེ་གྱུར་ཏེ། །གཉེན་པོའི་གོ་ཆ་མི་གོན་ཨ། །དེ་ནི་གྱོད་རྡལ་ཆེན་པོ་ཡིན།།ཕྱིན་ཆད་བཟློག་པའི་གོ་བ་ལོང་། ། བདག་རྒྱུད་འགོང་པོ་མ་འཐུལ་ན། །ཕ་མའི་སྲོག་ལ་བྲབ་བོ་ཨ། །རང་གི་བདེ་སྐྱིད་འཇོམས་ངེས་ཨ།།འཁོར་བའི་གཏིང་རྡོ་མཆིའོ་ཨ། །གཤིས་ངན་རང་མགོ་མ་འཆིངས་ན། །ཐམས་ཅད་དགྲ་བོར་ལངས་གྱུར་ཏེ། །དུག་མདའ་སྙིང་ལ་ཟུག་པའི་ཚེ།།ངེས་པར་ཕུང་བར་མཆིའོ་ཨ། །རང་འདོད་ཁྱི་རྐུན་མ་ཕྱུང་བར། །གཉེན་པོའི་གོ་ཆ་དམ་གྱུར་ཀྱང་། །ནང་དུ་ཕུང་ཁྲོལ་བྱུང་བའི་ཚེ།།སྨན་ཆང་དུག་ཏུ་འཆར་རོ་ཨ། །དུག་ལྔའི་སྲོག་རྩ་མ་ཆོད་པར། ། ལེ་ལོའི་བློ་རྒྱ་བསྐྱེད་གྱུར་ཀྱང་། །ཚེ་ཐུང་རླུང་གིས་ཁྱེར་བའི་ཚེ།།སྙིང་ནས་འགྱོད་པ་མཆིས་སོ་ཨ། །དེ་ནི་བསླབ་བྱ་ཆེན་པོ་ཡིན། །ཕྱིན་ཆད་སེམས་ལ་བརྟག་ཞིག་འཚལ། །རྣམ་རྟོག་བདུད་ཀྱི་རྒྱལ་པོ་ཡིན།།གཤིས་ངན་ལས་ཀྱི་གཤིན་རྗེ་ཡིན། །རང་འདོད་དུག་གི་སྡོང་པོ་ཡིན། །སྐྱོན་འདི་སེམས་དང་ལེ་ལོ་ཅན། །ཚེ་འདིའི་ཆེ་ཐབས་བསླུ་བྲིད་ཡིན།།སྲུང་སྐྱོབ་མང་པོ་མགོ་སྐོར་ཡིན། །ལྷ་འདྲེ་མང་པོ་བརྫུན་བྲིད་ཡིན། །རྣམ་རྟོག་དགྲ་རུ་མ་ལངས་ཤིང་།། བྱས་པའི་ལས་ལ་ཟིན་པ་མེད།།སྐྱོང་བའི་འཁོར་ལ་ཁྲེལ་གཞུང་མེད་།བསགས་པའི་ནོར་ལ་སྙིང་པོ་མེད། །ཕུང་ཞིག་གཞལ་གྱིས་ཐོབ་ཅིག་ཨ། །འཆི་བདག་རང་གི་སྙིང་ལ་གནས།།སྲོག་ནི་རང་གིས་གཅོད་པར་བྱེད། །དུག་ཆུ་རང་གིས་འཐུང་བར་བྱེད། །ངེས་པར་བདུད་འདུད་སོམས་ཤིག་ཨ། །འདི་ནི་ཉམས་མྱོང་ཆེན་པོ་ཡིས།།བདག་གི་ཉེས་དམིགས་བཤད་པ་ཡིན། །གཏམ་འདི་འཇིགས་པར་རབ་བསམས་ནས། །ཕྱིན་ཆད་གོ་བར་འཚལ་ལོ་ཨ། །ངེས་པར་སྙིང་ལ་བསམ་པ་ཡི།།བྱ་བྱེད་མང་པོ་སྲོག་ལ་གཟན། །གང་ལའང་ཕན་སེམས་མ་མཆིས་པས། །སྟོན་ཆེན་མང་པོ་མི་ཁ་སྡང་། །ཕོ་ཚུགས་གཉེན་པོ་མེད་པ་ཡིས།།གྲོགས་པོ་ངན་པ་ཆོས་ལ་གཟན། །འདོད་ཡོན་སྡུག་ཁ་མ་ཁེངས་པའི། །ཆོས་པའི་གཟུགས་བརྙན་རྒྱུ་ལ་གཟན། །བྱས་ཤེས་བཀའ་དྲིན་མི་བཟོ་བའི།།ཁྲེལ་མེད་དེ་ནི་ཡོངས་ལ་གཟན། །རང་དོན་ཡལ་བར་མ་དོར་བའི།། གཞན་དོན་ཚིག་གིས་བསླུའོ་ཨ། །བློ་སྦྱོང་སེམས་དཔའི་རིམ་པ་ལས་གཞི་ཉོན་མོངས་གཏན་ལ་དབབ་པའི་ཆོས་ཡོངས་སུ་རྫོགས་པའོ།། །།

                                     རྩོམ་སྒྲིག་པ། སྟོབས་རྒྱལ།

                   གསལ་འདེབས། 

                   རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་དགོད་ན་རྩོམ་ཁུངས་དང་སྦྲེལ་ཐག་གསལ་བོར་དགོད་པར་ཞུ།

                                     དྲ་བའི་སྦྲེལ་ཐགhttp://www.tb1025.cn