བདེ་བ་ཅན་གྱི་མགོན་པོ་འོད་དཔག་མེད།།
མཐོན་མཐིང་བརྩེ་བའི་སྤྱན་གྱིས་བདག་ལ་གཟིགས།།
དགྱེས་འཛུམ་ཟླ་བའི་ཞལ་རས་བདག་ལ་སྟོན།།
བྱིན་རླབས་བདུད་རྩིའི་དགའ་སྟོན་བདག་ལ་སྟོན།།
ཚེ་མཇུག་དབུགས་ཐག་ཆད་པར་ཉེ་བའི་ཚེ།།
མཚན་དཔེ་རྒྱན་ལྡན་ཁྱོད་སྐུ་བདག་དྲུང་དུ།།
མངོན་སུམ་བྱོན་ནས་ཚེ་འདིར་མ་ཆགས་པར།།
ང་ཡི་ཞིང་དུ་འགྲོ་ཞེས་གསུང་བར་ཞུ།། 
རང་ལུས་རྩ་ནས་ལྷོད་ཅིང་སོ་དྲག་ཆགས།།
སྨིག་རྒྱུ་འདྲ་བའི་ཉམས་སྣང་འཆར་བ་སོགས།།
ས་ཁམས་ཆུ་ལ་ཐིམ་པའི་རྟགས་བྱུང་ཚེ།།
མ་སྐྲག་མ་འཇིགས་གསུངས་ཤིག་འོད་དཔག་མེད།།
ཁ་སྣ་བརྫེས་ཤིང་ལྕེ་ཐུང་ཤེས་པ་ཚུལ།།
དུ་བ་ལྟ་བུའི་ཉམས་སྣང་འཆར་བ་སོགས།། 
ཆུ་ཁམས་མེ་ལ་ཐིམ་པའི་རྟགས་བྱུང་ཚེ།།
ཞལ་སྟོན་སེམས་གསོ་མཛོད་ཅིག་འོད་དཔག་མེད།།
དྲོད་སྡུད་མདངས་ཤོར་ཤིག་འབྲོས་རླངས་པ་འཕྲོ།།
སྲིན་བུ་མེ་ཁྱེར་ཉམས་སྣང་འཆར་བ་སོགས།།
མེ་ཁམས་རླུང་ལ་ཐིམ་པའི་རྟགས་བྱུང་ཚེ།།
ཆོས་སྒྲ་ལྷང་ལྷང་གསུངས་ཤིག་འོད་དཔག་མེད།།
ལུས་ནི་ཤིགས་སེ་འཐོར་ཞིང་དབུགས་ཐག་ཆད།།
མར་མེ་ལྟ་བུའི་ཉམས་སྣང་འཆར་བ་སོགས།།
རླུང་ཁམས་རྣམ་ཤེས་ཐིམ་པའི་རྟགས་བྱུང་ཚེ།།
དགྱེས་བཞིན་བསུ་མ་མཛོད་ཅིག་འོད་དཔག་མེད།།
དེ་ཚེ་ཁྱོད་ཐུགས་འོད་ཟེར་ལྕགས་ཀྱུའི་རྩེ།། 
སྤྱི་གཙུག་ཚངས་བའི་བུ་གར་རབ་ཟུག་སྟེ།།
བདག་སེམས་དབུ་མའི་ལམ་ནས་ཡར་དྲངས་ཏེ།།
བདེ་ལྡན་པདྨའི་སྦུབས་སུ་སྐྱིལ་བར་མཛོད།།
སྐད་ཅིག་དེ་རུ་ལུས་ཀྱི་སྐྱེ་མཆེད་རྫོགས།།
ཐེག་ཆེན་རིགས་ཅན་ལྟ་བུའི་ལུས་བླངས་ཏེ།།
ཁྱོད་ཞལ་མཇལ་ཞིང་ཁྱོད་གསུང་ཉམས་བླངས་ཏེ།།
ཕྱིར་མི་ལྡོག་པའི་བྱང་ཆུབ་འཐོབ་པར་ཤོག།
ཅེས་དམིགས་པ་གསལ་བའི་སྒོ་ནས་འོད་དཔག་མེད་པའི་མཚན་ཐུབ་ཚོད་དུ་བཟླ་ཞིང་བཟང་སྤྱོད་སྨོན་ལམ་གྱིས་རྒྱས་གདབ་པོ།།
ཅེས་པ་འདི་ནི་འཁོར་ལོ་སྣ་ཁའི་དགེ་བསྙེན་མ་ཤེས་རབ་སྒྲོལ་མས་ནན་ཆེར་བསྐུལ་ངོར།། དན་ཏིག་ཞབས་དྲུང་འཇིགས་མེད་རིགས་པའི་བློ་གྲོས་ཀྱིས་མདོར་བསྡུས་ཁ་གསལ་དུ་བྲིས་པའོ།།