༄༅།།རྒྱ་གར་སྐད་དུ།བོ་དྷི་པཱ་ཐ་པྲ་དཱི་པཾ།བོད་སྐད་དུ།བྱང་ཆུབ་ལམ་གྱི་སྒྲོན་མ།བྱང་ཆུབ་སེམས་དཔའ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ།།

དུས་གསུམ་རྒྱལ་བ་ཐམས་ཅད་དག་དང་དེ་ཡི་ཆོས།།དགེ་འདུན་རྣམས་ལ་གུས་པ་ཆེན་པོས་ཕྱག་བྱས་ཏེ།།སློབ་མ་བཟང་པོ་བྱང་ཆུབ་འོད་ཀྱིས་བསྐུལ་གྱུར་པས།།བྱང་ཆུབ་ལམ་གྱི་སྒྲོན་མ་རབ་ཏུ་གསལ་བར་བྱ།།ཆུང་ངུ་འབྲིང་དང་མཆོག་གྱུར་པས།།སྐྱེས་བུ་གསུམ་དུ་ཤེས་པར་བྱ།།དེ་དག་མཚན་ཉིད་རབ་གསལ་བའི།།སོ་སོའི་དབྱེ་བས་བྲི་བར་བྱ།།གང་ཞིག་ཐབས་ནི་གང་དག་གིས།།འཁོར་བའི་བདེ་བ་ཙམ་དག་ལ།།རང་ཉིད་དོན་དུ་གཉེར་བྱེད་པ།།དེ་ནི་སྐྱེས་བུ་ཐ་མར་ཤེས།།སྲིད་པའི་བདེ་ལ་རྒྱབ་ཕྱོགས་ཤིང༌།།སྡིག་པའི་ལས་ལས་ལྡོག་བདག་ཉིད།།གང་ཞིག་རང་ཞི་ཙམ་དོན་གཉེར།།སྐྱེས་བུ་དེ་ནི་འབྲིང་ཞེས་བྱ།།རང་རྒྱུད་གཏོགས་པའི་སྡུག་བསྔལ་གྱིས།།གང་ཞིག་གཞན་གྱི་སྡུག་བསྔལ་ཀུན།།ཡང་དག་ཟད་པར་ཀུན་ནས་འདོད།།སྐྱེས་བུ་དེ་ནི་མཆོག་ཡིན་ནོ།།སེམས་ཅན་དམ་པ་བྱང་ཆུབ་མཆོག།འདོད་པར་གྱུར་བ་དེ་དག་ལ།།བླ་མ་རྣམས་ཀྱིས་བསྟན་པ་ཡི།།ཡང་དག་ཐབས་ནི་བཤད་པར་བྱ།།རྫོགས་སངས་བྲིས་སྐུ་ལ་སོགས་དང༌།།མཆོད་རྟེན་དམ་ཆོས་མངོན་ཕྱོགས་ནས།།མེ་ཏོག་བདུག་སྤོས་དངོས་པོ་དག།ཅི་འབྱོར་བ་ཡི་མཆོད་པར་བྱ།།ཀུན་བཟང་སྤྱོད་ལས་གསུངས་པ་ཡི།།མཆོད་པ་རྣམ་པ་བདུན་དག་ཀྱང༌།།བྱང་ཆུབ་སྙིང་པོའི་མཐར་ཐུག་པར།།མི་ལྡོག་པ་ཡི་སེམས་དག་གིས།།དཀོན་མཆོག་གསུམ་ལ་རབ་དད་ཅིང༌།།པུས་མོའི་ལྷ་ང་སར་བཙུགས་ནས།།ཐལ་མོ་སྦྱར་བ་བྱས་ནས་ནི།།དང་པོར་སྐྱབས་འགྲོ་ལན་གསུམ་བྱ།།དེ་ནས་སེམས་ཅན་ཐམས་ཅད་ལ།།བྱམས་པའི་སེམས་ནི་སྔོན་འགྲོ་བས།།ངན་སོང་གསུམ་དང་སྐྱེ་སོགས་དང༌།།འཆི་འཕོ་སོགས་ཀྱིས་སྡུག་བསྔལ་བའི།།འགྲོ་བ་མ་ལུས་ལ་བལྟས་ཏེ།།སྡུག་བསྔལ་གྱིས་ནི་སྡུག་བསྔལ་བ།།སྡུག་བསྔལ་སྡུག་བསྔལ་རྒྱུ་མཚན་ལས།།འགྲོ་བ་ཐར་པར་འདོད་པ་ཡིས།།ལྡོག་པ་མེད་པར་དམ་འཆའ་བའི།།བྱང་ཆུབ་སེམས་ནི་བསྐྱེད་པར་བྱ།།དེ་ལྟར་སྨོན་པའི་སེམས་དག་ནི།།བསྐྱེད་པའི་ཡོན་ཏན་གང་ཡིན་པ།།དེ་ནི་སྡོང་པོ་བཀོད་པ་ཡི།།མདོ་ལས་བྱམས་པས་རབ་ཏུ་བཤད།།དེ་ཡི་མདོ་ཀློག་པའམ་བླ་མ་ལས་མཉན་ཏེ།།རྫོགས་པའི་བྱང་ཆུབ་སེམས་ཀྱི་ཡོན་ཏན་མཐའ་མེད་པ།།རྣམ་པར་ཤེས་པར་བྱས་ལ་དེ་གནས་རྒྱུ་མཚན་དུ།།དེ་ལྟར་ཡང་དང་ཡང་དུ་སེམས་ནི་བསྐྱེད་པར་བྱ།།དཔལ་བྱིན་གྱིས་ཞུས་མདོ་དག་ལས།།དེ་ཡི་བསོད་ནམས་རབ་བསྟན་པ།།གང་ཚེ་ཚིགས་བཅད་གསུམ་ཙམ་དུ།།མདོར་བསྡུས་པ་ནི་འདིར་བྲི་བྱ།།བྱང་ཆུབ་སེམས་ཀྱི་བསོད་ནམས་གང༌།།དེ་ལ་གལ་ཏེ་གཟུགས་མཆིས་ན།།ནམ་མཁའི་ཁམས་ནི་ཀུན་བཀང་སྟེ།།དེ་ནི་དེ་བས་ལྷག་པར་འགྱུར།།གངྒཱའི་བྱེ་མའི་གྲངས་སྙེད་ཀྱི།།སངས་རྒྱས་ཞིང་རྣམས་མི་གང་གིས།།རིན་ཆེན་དག་གིས་ཀུན་བཀང་སྟེ།།འཇིག་རྟེན་མགོན་ལ་ཕུལ་བ་བས།།གང་གིས་ཐལ་མོ་སྦྱར་བགྱིས་ཏེ།།བྱང་ཆུབ་ཏུ་ནི་སེམས་བཏུད་ན།།མཆོད་པ་འདི་ནི་ཁྱད་པར་འཕགས།།དེ་ལ་མཐའ་ནི་མ་མཆིས་སོ།།བྱང་ཆུབ་སྨོན་པའི་སེམས་དག་བསྐྱེད་ནས་ནི།།འབད་པ་མང་པོས་ཀུན་དུ་སྤེལ་བྱ་ཞིང༌།།འདི་ནི་སྐྱེ་བ་གཞན་དུའང་དྲན་དོན་དུ།།ཇི་སྐད་བཤད་པའི་བསླབ་པའང་ཡོངས་སུ་བཟུང༌།།འཇུག་སེམས་བདག་ཉིད་སྡོམ་པ་མ་གཏོགས་པར།།ཡང་དག་སྨོན་པ་འཕེལ་བར་འགྱུར་མ་ཡིན།།རྫོགས་པའི་བྱང་ཆུབ་སྡོམ་པ་སྤེལ་འདོད་པས།།དེ་ཕྱིར་འབད་པས་འདི་ནི་ངེས་པར་བླང༌།།སོ་སོར་ཐར་པ་རིགས་བདུན་གྱི།།རྟག་ཏུ་སྡོམ་གཞན་ལྡན་པ་ལ།།བྱང་ཆུབ་སེམས་དཔའི་སྡོམ་པ་ཡི།།སྐལ་པ་ཡོད་ཀྱི་གཞན་དུ་མིན།།སོ་སོར་ཐར་པ་རིགས་བདུན་དུ།།དེ་བཞིན་གཤེགས་པས་བཤད་པ་ལ།།ཚངས་སྤྱོད་དཔལ་ནི་མཆོག་ཡིན་ཏེ།།དགེ་སློང་སྡོམ་པ་དག་ཏུ་བཞེད།།བྱང་ཆུབ་སེམས་དཔའི་ས་དག་གི །ཚུལ་ཁྲིམས་ལེ་འུ་གསུངས་ཆོག་གིས།།ཡང་དག་མཚན་ཉིད་ལྡན་པ་ཡི།།བླ་མ་བཟང་ལས་སྡོམ་པ་བླང༌།།སྡོམ་པའི་ཆོ་ག་ལ་མཁས་དང༌།།བདག་ཉིད་གང་ཞིག་སྡོམ་ལ་གནས།།སྡོམ་པ་འབོགས་བཟོད་སྙིང་རྗེར་ལྡན།།བླ་མ་བཟང་པོར་ཤེས་པར་བྱ།།དེ་ལ་འབད་པས་འདི་འདྲ་བའི།།གལ་ཏེ་བླ་མ་མ་རྙེད་ན།།དེ་ལས་གཞན་སྡོམ་ནོད་པ་ཡི།།ཆོ་ག་ཡང་དག་བཤད་པར་བྱ།།དེ་ལ་སྔོན་ཚེ་འཇམ་པའི་དཔལ།།ཨཾ་བ་རཱ་ཛར་གྱུར་པ་ཡིས།།ཇི་ལྟར་བྱང་ཆུབ་ཐུགས་བསྐྱེད་པ།།འཇམ་དཔལ་གྱི་ནི་སངས་རྒྱས་ཞིང༌།།རྒྱན་གྱི་མདོ་ལས་བཤད་པ་ལྟར།།དེ་བཞིན་འདིར་ནི་རབ་གསལ་བྲི།།མགོན་པོ་རྣམས་ཀྱི་སྤྱན་སྔ་རུ།།རྫོགས་པའི་བྱང་ཆུབ་སེམས་བསྐྱེད་ཅིང༌།།འགྲོ་བ་ཐམས་ཅད་མགྲོན་དུ་གཉེར།།དེ་དག་འཁོར་བ་ལས་བསྒྲལ་ལོ།།གནོད་སེམས་ཁྲོ་བའི་སེམས་ཉིད་དང༌།།སེར་སྣ་དང་ནི་ཕྲག་དོག་ཉིད།།དེང་ནས་བཟུང་སྟེ་བྱང་ཆུབ་དག །ཐོབ་ཀྱི་བར་དུ་མི་བྱའོ།།ཚངས་པར་སྤྱོད་པ་སྤྱད་བྱ་ཞིང༌།།སྡིག་དང་འདོད་པ་སྤང་བར་བྱ།།ཚུལ་ཁྲིམས་སྡོམ་པ་ལ་དགའ་བས།།སངས་རྒྱས་རྗེས་སུ་བསླབ་པར་བྱ།།བདག་ཉིད་མྱུར་བའི་ཚུལ་གྱིས་ནི།།བྱང་ཆུབ་ཐོབ་པར་མི་སྤྲོ་ཞིང༌།།སེམས་ཅན་གཅིག་གི་རྒྱུ་ཡིས་ནི།།ཕྱི་མའི་མུ་མཐར་གནས་པར་བྱ།།ཚད་མེད་བསམ་གྱིས་མི་ཁྱབ་པའི།།ཞིང་དག་རྣམ་པར་སྦྱང་བར་བྱ།།མིང་ནས་གཟུང་བ་བྱས་པ་དང་།།ཕྱོགས་བཅུ་དག་ཏུ་རྣམ་པར་གནས།།བདག་གི་ལུས་དང་ངག་གི་ལས།།ཐམས་ཅད་དུ་ནི་དག་པར་བྱ།།ཡིད་ཀྱི་ལས་ཀྱང་དག་བྱ་སྟེ།།མི་དགེའི་ལས་རྣམས་མི་བྱའོ།།རང་གི་ལུས་ངག་སེམས་ནི་རྣམ་དག་རྒྱུ།།འཇུག་པའི་སེམས་ཀྱི་བདག་ཉིད་སྡོམ་གནས་པས།།ཚུལ་ཁྲིམས་བསླབ་པ་གསུམ་ལ་ལེགས་བསླབས་ན།།ཚུལ་ཁྲིམས་བསླབ་པ་གསུམ་ལ་གུས་ཆེར་འགྱུར།།དེ་བས་རྣམ་དག་རྫོགས་བྱང་ཆུབ།།སེམས་དཔའི་སྡོམ་པའི་སྡོམ་དག་ནི།།འབད་པར་བྱས་པས་རྫོགས་བྱང་ཆུབ།།ཚོགས་ནི་ཡོངས་སུ་རྫོགས་པར་འགྱུར།བསོད་ནམས་ཡེ་ཤེས་རང་བཞིན་གྱི།།ཚོགས་ནི་ཡོངས་སུ་རྫོགས་པ་ཡི།།རྒྱུ་ནི་སངས་རྒྱས་ཐམས་ཅད་དག།མངོན་ཤེས་སྐྱེད་པ་ཉིད་དུ་བཞེད།།ཇི་ལྟར་འདབ་གཤོག་མ་རྒྱས་པའི།།བྱ་ནི་མཁའ་ལ་འཕུར་མི་ནུས།།དེ་བཞིན་མངོན་ཤེས་སྟོབས་བྲལ་བས།།སེམས་ཅན་དོན་བྱེད་ནུས་པ་མིན།།མངོན་ཤེས་ལྡན་པས་ཉིན་མཚན་གྱི།།བསོད་ནམས་དག་ནི་གང་ཡིན་དེ།།མངོན་ཤེས་དག་དང་བྲལ་གྱུར་ལ།།སྐྱེ་བ་བརྒྱར་ཡང་ཡོད་མ་ཡིན།།མྱུར་དུ་རྫོགས་པའི་བྱང་ཆུབ་ཚོགས།།ཡོངས་སུ་རྫོགས་པར་འདོད་གྱུར་པ།།དེས་ནི་འབད་བྱས་མངོན་ཤེས་དག །འགྲུབ་པར་འགྱུར་གྱིས་ལེ་ལོས་མིན།།ཞི་གནས་གྲུབ་པ་མ་ཡིན་པས།།མངོན་ཤེས་འབྱུང་བར་མི་འགྱུར་ལ།།དེ་ཕྱིར་ཞི་གནས་འགྲུབ་པའི་ཕྱིར།།ཡང་ནས་ཡང་དུ་འབད་པར་བྱ།།ཞི་གནས་ཡན་ལག་རྣམས་ཉམས་པས།།རབ་ཏུ་འབད་དེ་བསྒོམས་བྱས་ཀྱང༌།།ལོ་ནི་སྟོང་ཕྲག་དག་གིས་ཀྱང༌།།ཏིང་འཛིན་འགྲུབ་པར་མི་འགྱུར་རོ།།དེ་ཕྱིར་ཏིང་འཛིན་ཚོགས་ལེའུ་ལས།།གསུངས་པའི་ཡན་ལག་ལ་ལེགས་གནས།།དམིགས་པ་གང་རུང་གཅིག་དག་ལ།།ཡིད་ནི་དགེ་ལ་གཞག་པར་བྱ།།རྣལ་འབྱོར་ཞི་གནས་གྲུབ་གྱུར་ན།།མངོན་ཤེས་དག་ཀྱང་འགྲུབ་པར་འགྱུར།།ཤེས་རབ་ཕ་རོལ་ཕྱིན་སྦྱོར་དང༌།།བྲལ་བས་སྒྲིབ་པ་ཟད་མི་འགྱུར།།དེ་ཕྱིར་ཉོན་མོངས་ཤེས་བྱ་ཡི།།སྒྲིབ་པ་མ་ལུས་སྤང་བའི་ཕྱིར།།ཤེས་རབ་ཕ་རོལ་ཕྱིན་རྣལ་འབྱོར།།རྟག་ཏུ་ཐབས་བཅས་བསྒོམ་པར་བྱ།།ཐབས་དང་བྲལ་བའི་ཤེས་རབ་དང༌།།ཤེས་རབ་བྲལ་བའི་ཐབས་དག་ཀྱང༌།།གང་ཕྱིར་འཆིང་བ་ཞེས་གསུངས་པ།།དེ་བས་གཉིས་ཀ་སྤང་མི་བྱ།།ཤེས་རབ་གང་དང་ཐབས་གང་ཞེས།།ཐེ་ཚོམ་དག་ནི་སྤང་བྱའི་ཕྱིར།།ཐབས་རྣམས་དང་ནི་ཤེས་རབ་ཀྱི།།ཡང་དག་དབྱེ་བ་གསལ་བར་བྱ།།ཤེས་རབ་ཕ་རོལ་ཕྱིན་སྤངས་པའི།།སྦྱིན་པའི་ཕ་རོལ་ཕྱིན་ལ་སོགས།།དགེ་བའི་ཆོས་རྣམས་ཐམས་ཅད་དག།རྒྱལ་བ་རྣམས་ཀྱིས་ཐབས་སུ་བཤད།།ཐབས་གོམས་དབང་གིས་བདག་ཉིད་ཀྱིས།།གང་ཞིག་ཤེས་རབ་རྣམ་བསྒོམ་པ།།དེས་ནི་བྱང་ཆུབ་མྱུར་དུ་ཐོབ།།བདག་མེད་གཅིག་པུ་བསྒོམས་པས་མིན།།ཕུང་པོ་ཁམས་དང་སྐྱེ་མཆེད་རྣམས།།སྐྱེ་བ་མེད་པར་རྟོགས་གྱུར་པའི།།རང་བཞིན་སྟོང་ཉིད་ཤེས་པ་ནི།།ཤེས་རབ་ཅེས་ནི་ཡོངས་སུ་བཤད།།ཡོད་པ་སྐྱེ་བ་རིགས་མིན་ཏེ།།མེད་པའང་ནམ་མཁའི་མེ་ཏོག་བཞིན།།ཉེས་པ་གཉིས་ཀར་ཐལ་འགྱུར་ཕྱིར།།གཉིས་ཀ་དག་ཀྱང་འབྱུང་བ་མིན།།དངོས་པོ་རང་ལས་མི་སྐྱེ་ཞིང༌།།གཞན་དང་གཉིས་ཀ་ལས་ཀྱང་མིན།།རྒྱུ་མེད་ལས་མིན་དེ་ཡི་ཕྱིར།།ངོ་བོ་ཉིད་ཀྱིས་རང་བཞིན་མེད།།ཡང་ན་ཆོས་རྣམས་ཐམས་ཅད་དག།གཅིག་དང་དུ་མས་རྣམ་དཔྱད་ན།།ངོ་བོ་ཉིད་ནི་མི་དམིགས་པས།།རང་བཞིན་མེད་པ་ཉིད་དུ་ངེས།།སྟོང་ཉིད་བདུན་ཅུའི་རིགས་པ་དང༌།།དབུ་མ་རྩ་བ་སོགས་ལས་ཀྱང༌།།དངོས་པོ་རྣམས་ཀྱི་རང་བཞིན་ནི།།སྟོང་པ་ཉིད་དུ་གྲུབ་བཤད་པར།།གང་ཕྱིར་གཞུང་ནི་མངས་འགྱུར་པས།།དེ་ཕྱིར་འདིར་ནི་མ་སྤྲོས་ལ།།གྲུབ་པའི་གྲུབ་མཐའ་ཙམ་ཞིག་ཏུ།།བསྒོམ་པའི་དོན་དུ་རབ་ཏུ་བཤད།།དེ་བས་ཆོས་རྣམས་མ་ལུས་པའི།།རང་བཞིན་དག་ནི་མི་དམིགས་པས།།བདག་མེད་པ་ནི་སྒོམ་གང་ཉིད།།འདིར་ནི་ཤེས་རབ་སྒོམ་པ་ཡིན།།ཤེས་རབ་ཀྱིས་ནི་ཆོས་རྣམས་ཀུན།།གང་གི་རང་བཞིན་མ་མཐོང་བཞིན།།ཤེས་རབ་དེ་ཉིད་རིག་དཔྱད་པ།།རྣམ་རྟོག་མེད་པར་དེ་བསྒོམ་བྱ།།རྣམ་རྟོག་ལས་བྱུང་སྲིད་པ་འདི།།རྣམ་པར་རྟོག་པའི་བདག་ཉིད་དེ།།དེ་ཕྱིར་མ་ལུས་རྟོགས་སྤངས་པ།།མྱ་ངན་འདས་པ་མཆོག་ཡིན་ནོ།།དེ་ལྟར་ཡང་ནི་བཅོམ་ལྡན་གྱིས།རྣམ་རྟོག་མ་རིག་ཆེན་པོ་སྟེ།།འཁོར་བའི་རྒྱ་མཚོར་ལྟུང་བར་བྱེད།།རྟོག་མེད་ཏིང་འཛིན་ལ་གནས་པ།།ནམ་མཁའ་བཞིན་དུ་རྟོག་མེད་གསལ།།ཞེས་གསུངས་སོ།།རྣམ་པར་མི་རྟོག་པ་ལ་འཇུག་པའི་གཟུངས་ལས་ཀྱང༌།དམ་ཆོས་འདི་ལ་རྒྱལ་བའི་སྲས།།རྣམ་པར་མི་རྟོག་བསམས་གྱུར་ན།།རྣམ་རྟོག་བགྲོད་དཀའ་རྣམས་འདས་ཏེ།།རིམ་གྱིས་མི་རྟོག་ཐོབ་པར་འགྱུར།།ཞེས་གསུངས་སོ།།ལུང་དང་རིགས་པ་དག་གིས་ནི།།ཆོས་རྣམས་ཐམས་ཅད་སྐྱེ་མེད་པའི།།རང་བཞིན་མེད་པར་ངེས་བྱས་ནས།།རྣམ་པར་རྟོག་མེད་བསྒོམ་པར་བྱ།།དེ་ལྟར་དེ་ཉིད་བསྒོམ་བྱས་ན།།རིམ་གྱིས་དྲོད་སོགས་ཐོབ་བྱས་ནས།།རབ་དགའ་ལ་སོགས་ཐོབ་འགྱུར་ཏེ།།སངས་རྒྱས་བྱང་ཆུབ་ཡུན་མི་རིང༌།།སྔགས་མཐུ་ཉིད་ལས་གྲུབ་པ་ཡི།།ཞི་དང་རྒྱས་སོགས་ལས་རྣམས་ཀྱིས།།བུམ་པ་བཟང་གྲུབ་ལ་སོགས་པའི།།གྲུབ་ཆེན་བརྒྱད་སོགས་སྟོབས་ཀྱིས་ཀྱང༌།།བདེ་བ་ཡིས་ནི་བྱང་ཆུབ་ཚོགས།།ཡོངས་སུ་རྫོགས་པར་འདོད་པ་དང༌།།བྱ་བ་སྤྱོད་སོགས་རྒྱུད་གསུངས་པའི།།གལ་ཏེ་གསང་སྔགས་སྤྱོད་འདོད་ན།།དེ་ཚེ་སློབ་དཔོན་དབང་བསྐུར་ཕྱིར།།བསྙེན་བཀུར་རིན་ཆེན་སོགས་སྦྱིན་དང༌།།བཀའ་བསྒྲུབ་ལ་སོགས་ཐམས་ཅད་ཀྱིས།།བླ་མ་དམ་པ་མཉེས་པར་བྱ།།བླ་མ་མཉེས་པར་གྱུར་པ་ཡིས།།ཡོངས་རྫོགས་སློབ་དཔོན་དབང་བསྐུར་བས།།སྡིག་ཀུན་རྣམ་དག་བདག་ཉིད་ནི།།དངོས་གྲུབ་འགྲུབ་པའི་སྐལ་ལྡན་འགྱུར།།དང་པོ་སངས་རྒྱས་རྒྱུད་ཆེན་ལས།།རབ་ཏུ་འབད་པས་བཀག་པའི་ཕྱིར།།གསང་བ་ཤེས་རབ་དབང་བསྐུར་ནི།།ཚངས་པར་སྤྱོད་པས་བླང་མི་བྱ།།གལ་ཏེ་དབང་བསྐུར་དེ་འཛིན་ན།།ཚངས་སྤྱོད་དཀའ་ཐུབ་ལ་གནས་པས།།བཀག་པ་སྤྱད་པར་གྱུར་བའི་ཕྱིར།།དཀའ་ཐུབ་སྡོམ་པ་དེ་ཉམས་ཏེ།།བརྟུལ་ཞུགས་ཅན་དེ་ཕམ་པ་ཡི།།ལྟུང་བ་དག་ནི་འབྱུང་འགྱུར་ཞིང༌།།དེ་ནི་ངན་སོང་ངེས་ལྷུང་བས།།གྲུབ་པ་ནམ་ཡང་ཡོད་མ་ཡིན།།རྒྱུད་ཀུན་ཉན་དང་འཆད་པ་དང༌།།སྦྱིན་སྲེག་མཆོད་སྦྱིན་སོགས་བྱེད་པ།།སློབ་དཔོན་དབང་བསྐུར་བསྙེས་འགྱུར་ཞིང༌།།དེ་ཉིད་རིག་ལ་ཉེས་པ་མེད།།གནས་བརྟན་མར་མེ་མཛད་དཔལ་གྱིས།།མདོ་སོགས་ཆོས་ལས་བཤད་མཐོང་བ།།བྱང་ཆུབ་འོད་ཀྱིས་གསོལ་བཏབ་ནས།།བྱང་ཆུབ་ལམ་བཤད་མདོར་བསྡུས་བྱས།།བྱང་ཆུབ་ལམ་གྱི་སྒྲོན་མ་སློབ་དཔོན་ཆེན་པོ་དཔལ་མར་མེ་མཛད་ཡེ་ཤེས་ཀྱིས་མཛད་པ་རྫོགས་སོ།།རྒྱ་གར་གྱི་མཁན་པོ་ཆེན་པོ་དྰི་པཾ་ཀ་ར་ཤྲྰི་ཛྙྰ་ན་དང༌།བོད་ཀྱི་ལོ་ཙྪ་པ་དགེ་སློང་དགེ་བའི་བློ་གྲོས་ཀྱིས་བསྒྱུར་ཅིང་གཏན་ལ་ཕབ་པའོ།།

ལྗོངས་འདིར་ཐུབ་བསྟན་ཡུངས་འབྲུ་ཕྲ་མོའི་ལུས།།ཐོབ་ཚེ་ཉ་གང་ཟླ་བར་སྒྲུབ་པའི་བཤེས།།ཚད་མའི་སྟོན་པ་མཉམ་མེད་ཨ་ཏི་ཤའི།།བཀའ་དྲིན་བསམས་ཀྱིན་དད་པའི་མེ་ཏོག་འཛུམ།།རྒྱལ་བའི་ཆོས་ཕུང་རྒྱ་མཚོའི་སྙིང་བོའི་བཅུད།།འཁྲུལ་བྲལ་ཤིང་རྟ་ཆེན་པོའི་ལམ་གྱི་སྲོལ།།བྱང་ཆུབ་ལམ་གྱི་རིམ་པར་དྲིལ་བའི་གཞུང་།།འདི་ཀོ་གསེར་ཆོས་འབུམ་གྱིས་དོ་ཟླས་དབེན།།དེ་ཕྱིར་ལྷག་བསམ་ཁ་བའི་མདངས་ལྡན་པས།།ཀུན་ནས་བསླངས་ཏེ་དཔར་དུ་བསྐྲུན་པའི་དགེས།།བློ་བཟང་ཚད་མའི་སྐྱེས་བའི་གྲུབ་པའི་མཐའ།།རང་དང་གཞན་གྱི་རྒྱུད་ལ་རྒྱས་བར་ཤོག།ནམ་ཞིག་མ་གྷ་ངྷ་ཡི་ས་འཛིན་སྤོར།།མི་ཕམ་ཆོས་ཀྱི་ཉི་མ་ཤར་བའི་ཚེ།།འདུས་བ་དང་པོར་སྨིན་ཅིང་གྲོལ་གྱུར་ཏེ།།མཐའ་ཡས་འགྲོ་བ་མ་ལུས་དེར་འགོད་ཤོག།འདི་ནི་སུ་ངྷྰིཿམིང་ཅན་གྱིས་བྲིས།། 

རྩོམ་སྒྲིག་པ།  ཤེས་རབ་རལ་གྲི།

གསལ་འདེབས།

རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།ལྷག་པར་འཕྲིན་སྟེགས་དག་གིས་འགོད་དུས原创བྱས་ཏེ་འགོད་མི་ཆོག

དྲ་བའི་སྦྲེལ་ཐགhttp://www.tb1025.cn