སྨྱུང་གནས་ཀྱི་ཕྱག་བཞེས།
སྨྱུང་གནས་ཀྱི་ཕྱག་བཞེས་ཇི་ལྟར་བྱུང་བ་དང་། དེའི་ཕན་ཡོན། ཇི་ལྟར་སྲུང་ཚུལ། སྒྲ་དོན་དང་ཐེག་ཆེན་གསོ་སྦྱོང་དང་སོ་ཐར་གྱི་བསྙེན་གནས་ཡན་ལག་བརྒྱད་པ་གཉིས་མི་འདྲ་བའི་ཚུལ་བཅས་རིམ་བཞིན་བཞིན་འགོད་པ་ལ།
༼དང་པོ་ཕྱག་བཞེས་ཇི་ལྟར་བྱུང་བ་ནི༽
དགེ་སློང་མ་དཔལ་མོའི་ལུགས་ཀྱི་སྨྱུང་གནས་ཀྱི་སྒོ་ནས་སྒྲུབ་པ་བྱེད་ཚུལ་ལས་བྱུང་བ་ཞིག་སྟེ། སྔོན་དུས་དགེ་སློང་མ་དཔལ་མོ་མཛེ་ནད་དྲག་པོས་བསྙུན་པ་ལ་འཕགས་པ་སྤྱན་རས་གཟིགས་དབང་ཕྱུག་སྒྲུབ་ཅིང་སྨྱུང་གནས་ཀྱི་དཀའ་ཐུབ་ལ་བརྟེན་ནས་སྒྲུབ་པ་ཡུན་རིང་མཛད་པ་ན་འཕགས་པས་ཞལ་གཟིགས་ཤིང་རྗེས་སུ་བཟུང་བས་མཛེ་ནད་ལས་གྲོལ་ཏེ་མཆོག་གི་དངོས་གྲུབ་བརྙེས་པར་གྲགས་ལ། དེའི་ཕྱིས་ཀྱང་འཕགས་བོད་ཀྱི་མཁས་གྲུབ་གནམ་གྱིས་ས་བཀབ་ལྟ་བུའི་བླ་མ་སྐྱེས་བུ་དམ་པ་མང་བོས་ཀྱང་གདམས་པ་དེ་ཐུགས་ཉམས་སུ་བསྟར་བས་སྒྲུབ་སྦྱོང་ལ་བོགས་ཐོན་ཅིང་ལྷའི་ཞལ་དངོས་སུ་གཟིགས་པ་སོགས་ཀྱི་རྟགས་དང་མཚན་མ་ཇི་སྙེད་ཅིག་བྱུང༌ནི་རྣམ་ཐར་དག་ལས་རྒྱས་པར་འབྱུང་བས་འདིར་མི་སྤྲོ།།
༼གཉིས་པ་ཕན་ཡོན་ནི།༽
དེ་ལྟ་བུའི་གདམས་པ་བར་མ་ཆད་པའི་མན་ངག་ལ་བརྟེན་ཅིང་ཟས་བཅད་དེ་སྨྱུང་བར་གནས་པས་ལུས་ཀྱི་སྡིག་སྒྲིབ་དག་ཅིང་། ཐ་མལ་བའི་གཏམ་མི་སྨྲ་བར་ངག་བཅད་བྱས་པས་ངག་གི་སྒྲིབ་འདག་པ་དང་། ཆགས་སྡང་གི་ངན་རྟོག་བཀག་སྟེ་དད་པ་དང་ཡིད་བཟླས་བྱས་པས་ཡིད་ཀྱི་སྡིག་སྒྲིབ་དག་པ་དང་། ཡང་ལུས་ཀྱིས་ཟས་བཅད་དེ་དཀའ་ཐུབ་ལ་གནས་པས་ཕྱི་མ་རྣམས་སུ་ཡི་དྭགས་སུ་སྐྱེ་འགྱུར་གྱི་ལས་ངན་སྡིག་སྒྲུབ་འདག་པ་དང༌། ཐ་མལ་པའི་ངག་བཅད་ཀྱི་དཀའ་ཐུབ་ལ་གནས་པས་ཕྱི་མ་རྣམས་སུ་དུད་འགྲོར་སྐྱེ་འགྱུར་གྱི་ལས་ངན་སྡིག་སྒྲུབ་འདག་པ་དང་། ཡིད་ལ་ཐ་མལ་བའི་ངན་རྟོག་བཀག་སྟེ་ལྷའི་རྣམ་འབྱོར་དང་གཟུངས་སྔགས་ཟབ་མོའི་ཡིད་བཟླས་བྱས་པས་ཕྱི་མ་རྣམས་སུ་དམྱལ་བར་སྐྱེ་འགྱུར་གྱི་ལས་ངན་སྡིག་སྒྲུབ་ཀྱང་སྦྱོང་བར་གསུངས།
༼གསུམ་པ་ཇི་ལྟར་སྲུང་ཚུལ་ནི༽
བོད་ཟླ་དང་པོའི་ཚེས་གཅིག་ནས་བཅོ་ལྔའི་བར་ཆོ་འཕྲུལ་དུས་ཆེན་དང་། ས་ག་ཟླ་བའམ་བོད་ཟླ་བཞི་བའི་ཚེས་བདུན་ཉིན་སྟོན་པ་ཤཱཀྱ་ཐུབ་པ་སྐུ་འཁྲུངས་པའི་དུས་ཆེན་དང༌། ཚེས་བཅོ་ལྔའི་ཉིན་ནི་ཁོང་ལྷུམས་སུ་ཞུགས་པ་དང་སངས་རྒྱས་པ། ཡུལ་རྩ་མཆོག་གྲོང་དུ་སྐུ་མྱ་ངན་ལས་འདའ་ཚུལ་བསྟན་པའི་དུས་ཆེན་སུམ་འཛོམས་ཀྱི་ཉིན་མོ་དང། བོད་ཟླ་དྲུག་པའི་ཚེས་བཞིའི་ཉིན་ཆོས་འཁོར་བསྐོར་བའི་དུས་ཆེན་དང་། བོད་ཟླ་དགུ་བའི་ཚེས་ཉེར་གཉིས་ཉིན་སྟོན་པ་མཆོག་ལྷ་ལས་བབས་པའི་དུས་ཆེན་ཡིན་པས། གཅིག་ནས་ང་ཚོ་ནང་བ་སངས་རྒྱས་པའི་ཆོས་ལ་དད་པ་བྱེད་མཁན་རྣམས་ཀྱིས་སྟོན་པ་ཤཱཀྱ་ཐུབ་པར་གུས་བཀུར་དང་ཁོང་གི་བླ་ན་འཕགས་པའི་མཛད་རྗེས་ལ་རྗེས་དྲན་ཞུ་བ་དང༌། གཉིས་ནས་རང་གིས་ཀྱང་དུས་ཆེན་ཁྱད་པར་བ་འདི་ལ་བརྟེན་ནས་ཁོང་གིས་ལམ་སྟོན་གནང་བའི་གདམས་པ་ཟབ་མོ་ཉམས་སུ་བླངས་ཏེ་ཚོགས་གསོག་སྒྲིབ་སྦྱོང་བཟང་བོ་ཞིག་བྱེད་འདོད་ཀྱི་བློ་ཤིན་ཏུ་བརྟན་པས་ཉམས་ལེན་བྱེད་པ་དང་། ཉིན་འདི་དག་ཏུ་རབ་བྱུང་བ་དང་ཁྱིམ་པ་ཕོ་མོ་རྣམས་ཀྱིས་ཐེག་ཆེན་གསོ་སྦྱོང་བླངས་ཏེ་སྨྱུང་བར་གནས་པའང་ཡོད། སྤྱིར་སྨྱུང་གནས་ནི་སྨྱུང་པར་གནས་པ་སྟེ་ཟས་སྐོམ་མི་སྤྱོད་པར་བསམ་པ་ཁྱད་པར་བས་ལྟོགས་སྐོམ་གྱི་དཀའ་ཐུབ་ལ་གནས་པའི་དོན་ཡིན། དེ་སྲུང་པ་པོ་ལ་མི་རྣམས་ཀྱིས་སྨྱུང་གནས་པ་ཞིང་། དུས་ནི་སྔར་གྱི་དུས་ཆེན་ཁྱད་པར་དེ་དག་གིས་མཚོན་སྐྱེས་ཆེན་དམཔ་དག་གི་འཁྲུངས་འདས་དང་། རླབས་ཆེན་མཛད་པ་མཛད་པའི་ཚེས་སྤྱི་དང་། ཟླ་བ་བྱུང་ངོ་ཅོག་གི་ཉ་སྟོང་བརྒྱད་གསུམ་སོགས་བཟང་བར་བཤད། སྨྱུང་བར་གནས་ཡུན་གཅིག་ལ། ཉིན་གསུམ་དུ་གནས་དགོས་པ་ཡིན། དེ་ཡང་ཉིན་དང་བོའི་གུང་ཚུགས་ཀྱི་ཟས་གྲུབ་ནས་ཉིན་དེའི་མཚན་ཐུན་དང་པོའི་མཐའ་ཚུན་ཆད་དུ་རུང་ཇ་ཞེས་པ་རྒྱུ་དུས་རུང་གི་འོ་མ་ཆུའམ་ཇ་ཁུ་དང་མཉམ་བསྲེས་བྱས་པ་དང་། ཤིང་ཏོག་གི་ཁུ་བ་ཡིན་ཡང་རུང་འདམ་བུ་ཉག་མའི་མདོག་ལྟ་བུ་ཅུང་ཟད་སླ་བ། ཚགས་ལ་བཙག་པ་རུང་ཆུ་བཏབ་ཏེ་འཐུང་རུང་ཡང་། ཉིན་གཉིས་པ་དང་གསུམ་པའི་ཡང་ཐོ་རེངས་པར་ཆུ་ཕར་ཟད་ཐ་ན་རང་གི་མཆུ་མའང་མིད་མི་ཆོག་པར་གསུངས། ཉིན་གཉིས་པ་དང་གསུམ་པའི་ཐོ་རེངས་པར་ངག་བསྡམ་དགོས་ཀྱང་མ་ཎི་སོགས་བཏོན་ན་དགེ་བ་ཡིན་གྱི་སྐྱོན་མིན། ས་ཆ་ལ་ལར་ཐུན་གྱི་དུས་སུ་དོན་དག་གལ་ཆེན་ལ་ཐུག་དུས་ཁ་ཕྱེས་མ་བཙུམ་གྱིས་ལྡབ་ལྡིབ་ཀྱིས་སྨྲ་བའང་ཡོད་མོད་དེ་ནི་སྲུང་ཚུལ་མ་ཤེས་པའི་སྐྱོན་ཡིན། སྨྱུང་གནས་ལ་མི་རང་ངོས་དང་གཞན་སྐུལ་གྱིས་ཞུགས་པའང་ཡོད་ལ། ད་དུང་ཚོགས་པ་འདུས་ནས་ཉམས་སུ་ལེན་པའང་ཡོད་དེ། དཔེར་ན། ཨ་མདོའི་ཀན་ལྷོའི་ས་ཆ་ལ་ལ་དང་མཚོ་ལྷོ། རྨ་ལྷོའི་ས་ཆ་ལ་ལར་ལོ་རེའི་ཟླ་བཞི་བའི་ཚེས་བཅོ་ལྔ་དང་དགུ་བའི་ཉེར་གཉིས་ལ་ཁྱིམ་རེ་ནས་ཁྱིམ་སྲུང་ངམ་ནོར་ལུག་འཚོ་བའི་མི་གཅིག་གཉིས་མ་གཏོགས་ཚང་མ་ཁོ་རང་ཚོའི་དགོན་པའི་འདབས་སུ་སྒར་བཏབ་ནས་སྐྱ་སེར་དུས་གཅིག་ཏུ་སྨྱུང་བར་གནས་པ་དང་། ཡང་ཡུལ་ཁག་ཕྱོགས་འདུས་ཀྱི་སྔགས་ཁང་ངམ་མ་ཎི་ཁང་སོགས་སུ་དགེ་འདུན་པ་བཞི་སོགས་སྤྱན་དྲངས་ནས་ཐེག་ཆེན་གསོ་སྦྱོང་ལེན་པ་སྔོན་དུ་སོང་ནས་འཕགས་པ་ཐུགས་རྗེ་ཆེན་པོའི་ཆོ་ག་དང་འབྲེལ་བའི་སྒོས་མ་ཎི་དུང་སྒྲུབ་དང་སྨྱུང་གནས་སྲུང་བ་སོགས་སྔོན་གྱི་ཕྱག་སྲོལ་བཟང་པོ་མ་ཉམས་པར་རྒྱུན་གནས་ཐུབ་པའང་ཕྱོགས་གང་སར་མཐོང་རྒྱུ་ཡོད་པ་དེ་དག་ནི་བསྔགས་པའི་འོས་སུ་སྣང་ངོ།། སྨྱུང་གནས་ཀྱི་གུང་ཚུགས་ཀྱི་ཟས་ལ་ཞོ་དང་འོ་མ། གྲོ་མ་དང་། འབྲས་སིལ། རྒུན་འབྲུམ། ཀ་ར་སོགས་ཞིམ་མངར་འཛོམས་པའི་དཀར་ཟས་སོགས་འཛོམས་ན་རབ་དང་། དེ་མིན་ཡང་དམར་ཟས་དང་། སྒོག་ཙོང་སོགས་གཏན་ནས་མི་རུང་བ་ཡིན། སྨྱུང་གནས་ཀྱི་ཉིན་གསུམ་པའི་ཐོ་རེངས་ཀྱི་དུས་སུ་ཐོག་མར་འཕགས་པ་ཐུགས་རྗེ་ཆེན་པོའི་ཆོ་གའི་སྒོ་ནས་སྒྲུབ་པའི་བུམ་ཆུ་ཀ་ར་དང་མཉམ་བསྲེས་ཀྱི་ཆབ་ཉུང་ཙམ་འཐུང་རྗེས་ཐོར་ཐུག་འཐུང་བའི་ཕྱག་སྲོལ་འང་འདུག།
༼སྨྱུང་གནས་ཞེས་པའི་སྒྲ་དོན་དང་། ཐེག་ཆེན་གསོ་སྦྱོང་དང་། སོ་ཐར་བསྙེན་གནས་ཡན་ལག་བརྒྱད་པ་གཉིས་མི་འདྲ་བའི་ཚུལ་ནི།༽
སྨྱུང་གནས་ནི་ཡན་ལག་བརྒྱད་པའི་ཐེག་ཆེན་གསོ་སྦྱོང་དང་འབྲེལ་ནས་སྲུང་བ་ཆེས་མང་བས་དེ་ལ་བསྙེན་གནས་ཀྱི་ཐ་སྙད་འདོགས་པའང་ཡོད་ཀྱང་དེ་ནི་མ་གོ་བའི་བརྡ་ཞིག་སྟེ། སྤྱིར་སྨྱུང་བར་གནས་པའི་དོན་ནི་ཟས་སྐོམ་བཀག་སྟེ་ལྟོགས་པར་གནས་པའི་དོན་ཡིན་ལ། ཐེག་ཆེན་གསོ་སྦྱོང་དང་། སོ་ཐར་གྱི་བསྙེན་གནས་ཡན་ལག་བརྒྱད་པ་གཉིས་སྲུང་བྱ་ཡན་ལག་ལྔ་སྲུང་དགོས་པ་ཙམ་དུ་འདྲ་ཡང་དོན་མི་འདྲ་སྟེ། ཐེག་ཆེན་གསོ་སྦྱོང་ནི་ཀུན་སློང་བྱང་ཆུབ་ཀྱི་སེམས་བཅོས་མ་ཚུན་ཆད་དང་། དངོས་གཞི་གཞན་དོན་དུ་སྦྱིན་སོགས་ཕར་ཕྱིན་དྲུག་གི་ཉམས་ལེན་ལ་བརྩོན་པ་དང་། མཇུག་ཏུའང་ལན་དང་རྣམ་སྨིན་ལ་རེ་བ་མེད་པར་རང་དོན་ཡིད་བྱེད་ཀྱི་སེམས་པ་ཅུང་ཟད་ཙམ་དང་ཡང་མ་འདྲེས་བར་དགེ་བ་གང་བྱས་བྱང་ཆུབ་མཆོག་ཏུ་བསྔོ་བའི་ཐེག་ཆེན་གྱི་ཡན་ལག་ལྔའི་སྡོམ་པ་སྲུང་བ་ཞིག་ངེས་པར་དགོས་ལ། སོ་ཐར་གྱི་བསྙེན་གནས་ཡན་ལག་བརྒྱད་པ་ནི་བསམ་པ་རང་དོན་ཡིད་བྱེད་དང་། དངོས་གཞིའང་གཙོ་བོར་རང་རྒྱུད་ཀྱི་ཉོན་མོངས་འདུལ་ཐབས་ལ་འབད་ཅིང་། མཇུག་ཏུ་འང་མཐར་ཐུག་རང་ཉིད་ཁམས་གསུམ་འཁོར་བ་ལས་གྲོལ་བའི་དགྲ་བཅོམ་ཐོབ་པའི་ཕྱིར་ཐེག་དམན་གྱི་ཡན་ལག་ལྔའི་སྡོམ་པ་སྲུང་བ་ཙམ་གྱིས་ཆོག་པས་ན་བསྲུང་བྱའི་གྲངས་ཙམ་འདྲ་ཡང་། དགེ་བའི་འགྱུར་ཁྱད་དང་ས་ཆོད་ཆེ་ཆུང་ཡང་མི་འདྲ་བས་དོན་གཏན་ནས་མི་འདྲ། འོན་ཀྱང་དེ་གཉིས་ཉིན་ཞག་གཅིག་ཙམ་དུ་ཁས་ལེན་པ་དང༌། སྤང་བྱ་བརྒྱད་སྤོང་བར་ཁས་ལེན་པ་ཙམ་ལ་ནི་འདྲའོ།། ཇི་སྐད་དུ། རི་ལུང་བ་གསེར་གྱིས་བཀང་ན་ཡང༌། །རང་འཆི་དུས་རྡུལ་ཙམ་འཁྱེར་དབང་མེད།། གཟུངས་ཡིག་དྲུག་ཚར་གཅིག་བཏོན་ན་ཡང༌། །དེ་འཇིག་རྟེན་ཕྱི་མའི་ལམ་རྒྱགས་ཡིན། ། ཆོས་གཅིག་ལ་བྱིན་རླབས་ཆེ་བ་དེ། །སྔགས་གཟུངས་མཆོག་ཡི་གེ་དྲུག་མ་ཡིན། ། ཁོང་བྱིས་བ་ཚུན་ཆད་ཤེས་བ་དེ། །ངེད་བོད་གྱི་ཆོས་སྐལ་ཡིན་པའི་རྟགས། ། མི་སྡིག་ཅན་བཙན་ཐབས་འཚང་རྒྱའི་ཆོས། །དཀོར་བག་ཆགས་ངན་པ་སྦྱོང་བ་ལ། ། ཆེས་ཟབ་པའི་མཐར་ཐུག་སྨྱུང་གནས་ཡིན། །འདིའི་ཕན་ཡོན་ནམ་མཁའི་མཐའ་དང་མཉམ།། དུས་དེང་སང་ངན་པ་མགོ་མཐོ་ཡང༌། །ལམ་བར་དོའི་འཕྲང་རིང་བརྒལ་བའི་ཉིན། ། དགྲ་གཤིན་རྗེའི་དམག་གིས་བསྐོར་བའི་ཚེ། །ཆོས་ཚུལ་བཞིན་བྱས་བའི་མི་དེ་སྐྱིད། །ཞེས་གསུང་བ་ཡིན་ནོ།།
