༄༅། །དཀོན་མཆོག་གསུམ་ལ་ཕྱག་འཚལ་ལོ། །བདག་ལ་བརྟེན་ནས་སེམས་བསྐྱེད་པའི། །དྲི་མ་མེད་པའི་སྦྱིན་པ་ལ། །བརྟེན་ནས་ཡོན་བདག་ཉིད་གྲོལ་ཏེ། །དེ་ལ་ཡོན་བདག་མི་རེ་ཞིང་། །འཇིག་རྟེན་རེ་བ་ཞི་བར་ཤོག །

སྒོ་གསུམ་དྲི་མ་མེད་པ་ཡི། །ཚུལ་ཁྲིམས་རྒྱན་དང་ལྡན་པར་ཤོག །

སྦྱིན་པ་འདི་ཡི་བྱིན་རླབས་ཀྱིས། །རྟག་ཏུ་ལོངས་སྤྱོད་ལྡན་པར་ཤོག །

ལོངས་སྤྱོད་དེ་ལ་མ་ཆགས་ཤིང་། །སེམས་ཅན་ཀུན་ལ་སྙིང་རྗེ་བས། །སྟོང་པའི་སེམས་དང་ལྡན་པར་ཤོག །

སྦྱིན་པ་འདི་ཡི་བྱིན་རླབས་ཀྱིས། །དུས་འདིར་བར་དུ་གཅོད་པ་ཡི། །བགེགས་རྣམས་མ་ལུས་ཞི་གྱུར་ནས། །རྐྱེན་རྣམས་མ་ལུས་བཟློག་པར་ཤོག །

བསྲུང་བར་གྱུར་པའི་ལྷ་རྣམས་ཀྱིས། །གཡེལ་བ་མེད་པར་བསྲུང་བར་ཤོག །ཡིད་ཆེས་རྟེན་དེ་འཕེལ་བར་ཤོག །

འདི་དང་ཕྱི་མ་གཉིས་ཀར་ཡང་། །མི་རྣམས་ཀུན་གྱིས་བཀུར་བར་ཤོག །

ཤིན་ཏུ་ཕྲ་བར་གྱུར་པ་ཡི། །སྦྱིན་པ་ཤིན་ཏུ་ཆུང་གྱུར་ཀྱང་། །སེམས་ཀྱིས་ཐོངས་པའི་སྦྱིན་པ་འདི། །དཔག་ཏུ་མེད་པ་འཕེལ་གྱུར་ཏེ། །བྱང་ཆུབ་ཐོབ་པའི་རྟེན་དུ་ཤོག །

བླ་མེད་བྱང་ཆུབ་ཐོབ་གྱུར་ནས། །འགྲོ་བ་འདྲེན་པའི་དཔལ་དུ་ཤོག །      །།

དཀོན་མཆོག་གསུམ་ལ་ཕྱག་འཚལ་ལོ། །བདག་ཀྱང་དེ་ལ་མ་ཆགས་ཤིང་། །

ཁེ་དང་རྙེད་པ་བཀུར་སྟི་དང་། །འཇིག་རྟེན་སྙན་གྲགས་ཞི་བར་ཤོག །

ཆགས་པ་མེད་པ་རྔམ་སེམས་ཀྱིས། །གཞན་ལ་རེ་བ་མེད་པར་ཤོག །ཕྱོགས་འཛིན་ངོ་བསྲུང་མེད་པར་ཤོག །

བདག་གི་དགེ་བ་མཐར་ཕྱིན་ནས། །དྲི་མ་མེད་པའི་དགེ་བ་ཡིས། །གཞན་གྱི་བསོད་ནམས་འཕེལ་ནུས་ཤོག །

དྲི་མ་མེད་པས་ཀུན་དག་ཤོག །བརྗོད་པའི་སྟོབས་ཀྱིས་ཀུན་བྲལ་ཤོག །

བདག་གཞན་དགེ་བ་མ་ཆད་པའི། །བར་ཆད་མེད་པའི་བརྩོན་འགྲུས་ཀྱིས། །བྱང་ཆུབ་འབྲས་བུ་ཐོབ་ནས་ཀྱང་། །ངན་འགྲོ་དེ་ལ་དགོད་པ་དང་། །ཐེག་པ་ཆུང་ངུར་སེམས་བསྐྱེད་ནས། །ཐེག་ཆེན་ས་ལ་འགོད་ནུས་ཤོག །

སློབ་དཔོན་ཀཱ་མ་ལ་ཤཱི་ལའི་སྨོན་ལམ་མུ་གཉིས་མ་ཞེས་བྱ་བ་རྫོགས་སོ།།    

རྩོམ་སྒྲིག་པ།  ཤེས་རབ་རལ་གྲི།

གསལ་འདེབས།

རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།ལྷག་པར་འཕྲིན་སྟེགས་དག་གིས་འགོད་དུས原创བྱས་ཏེ་འགོད་མི་ཆོག

དྲ་བའི་སྦྲེལ་ཐགhttp://www.tb1025.cn