རྒྱ་གར་སྐད་དུ།  པྲ་ཀ་ར་ཎ་བིདྴ་ཀ་ཊཱི་ཀཱ།  བོད་སྐད་དུ།  རབ་ཏུ་བྱེད་པ་ཉི་ཤུ་པའི་འགྲེལ་བཤད།  འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། ། གང་ཐུགས་ཐུགས་རྗེ་རག་ལས་ཕྱིར། ། གཞན་གྱི་དོན་ལ་རྟག་དགྱེས་པ། ། མི་ཤེས་བཅོམ་ལ་ཕྱག་འཚལ་  {172a1} || ལོ; | ཉི་ཤུ་པ་ནི་རྣམ་པར་དབྱེ། ། ཐེག་པ་ཆེན་པོ་ལ་ཁམས་གསུམ་པ་རྣམ་པར་རིག་པ་ཙམ་དུ་རྣམ་པར་གཞག་ཅེས་བྱ་བ་ཚིག་དང་པོ་འདིས་ནི་རབ་ཏུ་བྱེད་པ་འདིའི་དགོས་པ་དང།  བྲྗོད་པར་བྱ་བའི་རང་གི་ངོ་བོ་དང།  དགོས་པའི་ཡང་དགོས་པ་དངོས་སུ་སྟོན་ཏོ། ། འབྲེལ་{172a2} པ་ནི་དོན་གྱིས་བརྟག་པར་བྱའོ། ། རབ་ཏུ་བྱེད་པའི་འབྲེལ་པ་དང།  བྲྗོད་པར་བྱ་བ་དང།  དགོས་པ་རྣམས་ངེས་པར་བྲྗོད་པར་བྱའོ། ། གཞན་དུ་ན་འབྲེལ་པ་མེད་པ་དང།  བྲྗོད་པར་བྱ་བ་མེད་པ་དང།  དགོས་པ་མེད་པ་དང།  དགོས་པའི་ཡང་དགོས་པ་མེད་པའི་རབ་ཏུ་བྱེད་པ་ནི་རྟོག་པ་སྔོན་{172a3} དུ་གཏོང་བའི་ཉན་པ་པོ་དག་ཁས་མི་ལེན་ཏེ། ། དེ་ལ་ཐེག་པ་ཆེན་པོ་ཞེས་བྱ་བ་འདིས་ནི་དགོས་པའི་ཡང་དགོས་པ་བསྟན་ཏོ། ། ཁམས་གསུམ་པ་རྣམ་པར་རིག་པ་ཙམ་དུ་རྣམ་པར་གཞག་ཅེས་བྱ་བ་འདིས་ནི་བྲྗོད་པར་བྱ་བ་དང།  དགོས་པ་བསྟན་ཏོ། ། འདིར་ཁམས་གསུམ་པ་རྣམ་པར་{172a4} རིག་པ་ཙམ་ཉིད་ལུང་དང་རིགས་པ་གཉིས་ཀྱིས་བསྟན་ཏོ། ། འདི་ནི་བྲྗོད་པར་བྱའོ། ། ཁམས་གསུམ་པ་རྣམ་པར་རིག་པ་ཙམ་ཉིད་དུ་བསྟན་པ་ནི་དགོས་པའོ། ། བསྟན་པ་དེ་ཡང་རབ་ཏུ་དབྱེ་བས་བྱེད་པའི་ཕྱིར་ཏེ།  རབ་ཏུ་བྱེད་པ་ནི་དགོས་པ་འདིའི་ཐབས་ཡིན་ནོ། ། དེ་བས་ན་རབ་ཏུ་{172a5} བྱེད་པ་དང་དགོས་པ་གཉིས་ནི་ཐབས་དང་ཐབས་ལས་བྱུང་བའི་མཚན་ཉིད་ཀྱིས་འབྲེལ་བར་གནས་སོ། ། དེ་ལྟར་གནས་པ་ལ་བརྒྱ་ལ་འགའ་ཞིག་ཁམས་གསུམ་པ་རྣམ་པར་རིག་པ་ཙམ་དུ་བསྟན་པ་འདིས་ནི་ཅི་ཞིག་བྱ་ཞེས་རྒོལ་དུ་འོང་བས་དེའི་ཕྱིར།  ཐེག་པ་ཆེན་པོ་ཞེས་བྱ་བ་འདི་{172a6} སྨོས་སོ། ། དེ་ལས་ནི་ཁམས་གསུམ་པ་རྣམ་པར་རིག་པ་ཙམ་ཉིད་དུ་བསྟན་པ་ནི་ཐག་པ་ཆེན་པོ་ཐོབ་པར་བྱ་བའི་ཕྱིར་རོ་ཞེས་བྱ་བའི་ཚིག་གི་དོན་འདི་འབྱུང་སྟེ།  འདི་ནི་རེ་ཞིག་སྤྱིའི་དོན་ནོ། ། ཡན་ལག་གི་དོན་བྲྗོད་པར་བྱ་སྟེ།  ཐེག་པ་ཆེན་པོ་ཞེས་བྱ་བ་འདིས་འདོང་པས་ན་ཐེག་པའོ། ། {172a7} ཡང་ན་འདིར་འདོང་བས་ན་ཐེག་པའོ། ། དེའི་ཐེག་པ་ཡང་ཡིན་ལ་ཆེན་པོ་ཡང་ཡིན་པས་ཐེག་པ་ཆེན་པོའོ། ། དེའི་ཕྱིར་བྱང་ཆུབ་སེམས་དཔའི་ལམ་འབྲས་བུ་དང་བཅས་པ་ལ་ཐེག་པ་ཆེན་པོ་ཞེས་བསྟན་པ་ཡིན་ནོ། ། ཆེན་པོ་ནི་དེ་མ་ཡིན་པའི་ཐེག་པ་གཞན་པས་མཆོག་ཏུ་གྱུར་པར་རིག་{172b1} པར་བྱའོ།  འདི་ལྟར་དེར་ནི་གང་ཟག་ལ་བདག་མེད་པར་ཤེས་པས་ཉོན་མོངས་པའི་སྒྲིབ་པ་ཙམ་སྤོང་བའོ། ། འདིར་ནི་གང་ཟག་དང་ཆོས་ལ་བདག་མེད་པར་ཤེས་པས་ཉོན་མོངས་པ་དང་ཤེས་བྱའི་སྒྲིབ་པ་སྤོང་བའོ། ། ཡང་ན་ཆེན་པོ་རྣམ་པ་བདུན་དང་ལྡན་པའི་ཕྱིར་ཆེན་པོ་སྟེ།  ཆེན་{172b2} པོ་རྣམ་པ་བདུན་ནི་དམིགས་པ་དང།  སྒྲུབ་པ་དང།  ཡེ་ཤེས་དང།  བརྩོན་འགྲུས་དང།  ཐབས་ལ་མཁས་པ་དང།  ཡང་དག་པར་འགྲུབ་པ་དང།  ལས་ཞེས་བྱ་བའོ། ། ལ་ནི་འདིར་རྒྱུའི་དོན་དུ་བལྟ་བར་བྱ་སྟེ།  ཐེག་པ་ཆེན་པོའི་རྒྱུ་ཐེག་པ་ཆེན་པོ་ཐོབ་པར་བྱེད་པའི་དོན་ཞེས་{172b3} བྱ་བའི་ཐ་ཚིག་གོ། ། འདི་ལྟར་འདུལ་བ་ནི་རྣམ་པ་གཉིས་ཏེ།  གང་ཟག་ལ་བདག་མེད་པར་བསྟན་པས་འདུལ་བ་དག་དང།  ཆོས་ལ་བདག་མེད་པར་བསྟན་པས་འདུལ་བ་དག་གོ། ། དེ་ལ་གང་ཟག་ལ་བདག་མེད་པར་བསྟན་པས་འདུལ་བ་དག་གི་ནི་དེ་བསྟན་པ་ལ་བརྟེན་ནས་འབྱུང་བ་དང་{172b4} འཇིག་པའི་ཆོས་ཅན་བདག་དང་བདག་གི་དང་བྲལ་བ་ཕུང་པོ་ཙམ་དུ་ཤེས་ནས་ཐོས་པ་དང་སེམས་པ་ལ་སོགས་པའི་རིམ་གྱིས་གང་ཟག་ལ་བདག་མེད་པ་ལ་འཇུག་གོ། ། བདག་མེད་པ་ལ་འཇུག་པ་དེས་ཉོན་མོངས་པའི་སྒྲིབ་པ་དང་བྲལ་ནས་མཐར་ཕྱིན་པའི་གནས་འཐོབ་སྟེ།  དེ་དག་གི་དེའི་ཐབས་{172b5} བསྟན་པ་ནི་གཞན་ནས་བྲྗོད་པ་ཉིད་དོ། ། གང་དག་ཆོས་ལ་བདག་མེད་པར་བསྟན་པས་འདུལ་བ་དེ་དག་ནི་དེ་བསྟན་པ་ལ་བརྟེན་ནས་ཆོས་ཀྱི་དབྱིངས་རབ་ཏུ་རྟོགས་པ་དང་མཐུན་པའི་བསྟན་བཅོས་ཉན་པ་དང་སེམས་པ་ལ་སོགས་པའི་རིམ་གྱིས་གཟུང་བ་དང་འཛིན་པ་རྣམ་པར་གཞིག་པའི་ཕྱིར་རོ། ། {172b6} རབ་ཏུ་བྱེད་པ་འདིས་ནི་གཟུང་བ་དང་འཛིན་པ་རྣམ་པར་གཞིག་བའི་ཐབས་ཉིད་སྟོན་ཏོ། ། རྣམ་པར་བཤིག་ནས་གཟུང་པ་དང་འཛིན་པ་དང་བྲལ་བའི་རྣམ་པར་རིག་པ་ཙམ་ཉིད་ལ་འཇུག་གོ། ། དེ་ནས་ས་དང་ཕ་རོལ་ཏུ་ཕྱིན་པ་བསྒྲུབས་པས་གཟུང་བ་དང་འཛིན་པ་མ་ལུས་པར་བསལ་ནས་ཆོས་{172b7} ཀྱི་དབྱིངས་རྟོགས་ཏེ།  དེ་བཞིན་གཤེགས་པའི་གོ་འཕང་བླ་ན་མེད་པ་འཐོབ་པས་དེ་ལ་བསམས་ནས་ཐེག་པ་ཆེན་པོ་ཐོབ་པར་བྱ་བའི་ཕྱིར་ཞེས་བཤད་དོ། ། ཁམས་གསུམ་པ་ཞེས་བྱ་བ་ནི་འདོད་པ་དང་གཟུགས་དང་གཟུགས་མེད་པ་ཞེས་བྱ་བ་དག་སྟེ།  གསུམ་པོ་ཉིད་ཁམས་ཡིན་པས་  {173a1} || ཁམས་གསུམ་པའོ། ། དེ་ལ་སེམས་དང་སེམས་ལས་བྱུང་བ་གང་དག་འདོད་པ་ལས་འདོད་ཆགས་དང་མ་བྲལ་བ་དེ་དག་ནི་འདོད་པའི་ཁམས་སོ། ། གང་དག་འདོད་པ་ལས་འདོད་ཆགས་དང་བྲལ་ལ།  གཟུགས་ལས་འདོད་ཆགས་དང་མ་བྲལ་བ་དེ་དག་ནི་གཟུགས་{173a2} ཀྱི་ཁམས་སོ། ། གང་དག་གཟུགས་ལས་འདོད་ཆགས་དང་བྲལ་ལ་གཟུགས་མེད་པ་ལས་འདོད་ཆགས་དང་མ་བྲལ་བ་དེ་དག་ནི་གཟུགས་མེད་པའི་ཁམས་སོ། ། རྣམ་པར་རིག་པ་ཙམ་ཞེས་བྱ་བ་ནི་དམིགས་པ་དང་བྲལ་བ་སྟེ།  འབའ་ཞིག་པས་རྣམ་པར་རིག་པ་ཙམ་སྟེ།  གཟུང་བ་{173a3} དང་འཛིན་པ་དང་བྲལ་བའི་སེམས་དང་སེམས་ལས་བྱུང་བ་ཞེས་བྱ་བའི་ཐ་ཚིག་གོ། ། རྣམ་པར་གཞག་པ་ཞེས་བྱ་བ་ནི་བསྟན་པའོ། ། དེ་ནི་འདི་སྐད་དུ་སེམས་དང་སེམས་ལས་བྱུང་བ་དག་ཉིད་ལ་ཁམས་གསུམ་རྣམ་པར་གཞག་གོ་ཞེས་སྟོན་ཏེ།  དཔེར་ན།  གཟུགས་མེད་ཀྱང་ནམ་མཁའ་{173a4} མཐའ་ཡས་སྐྱེ་མཆེད་ལ་སོགས་པ་ཐ་དད་པར་རྣམ་པར་གཞག་པ་བཞིན་ནོ་ཞེས་བསྟན་པར་འགྱུར་རོ། ། ཡང་ན་ཐེག་པ་ཆེན་པོ་ལ་ཞེས་བྱ་བ་ནི་ཡུལ་གྱི་ལ་སྟེ།  དེས་ཐེག་པ་ཆེན་པོ་ཞེས་བྱ་བའི་གསུང་རབ་ལ་རྣམ་པར་རིག་པ་ཙམ་ཞེས་བྱ་བར་བསྟན་པར་འགྱུར་རོ། ། ལྷག་མའི་བཤད་པ་ནི་སྔ་{173a5} མ་བཞིན་ནོ། ། དེ་ལས་ནི་ཐེག་པ་ཆེན་པོ་ཞེས་བྱ་བའི་གསུང་རབ་ལ་ཁམས་གསུམ་པ་རྣམ་པར་གཞག་པ་རིག་པ་ཙམ་ཉིད་དུ་དམ་འཆའོ་ཞེའམ་འདོགས་སོ་ཞེ་བྱ་བའི་ཐ་ཚིག་གི་དོན་འདི་འབྱུང་ངོ། ། བཤད་པ་འདི་ལ་ནི་གཟུང་བ་དང་འཛིན་པ་རྣམ་པར་གཞིག་པ་ལ་སོགས་པ་དགོས་པའི་{173a6} ཡང་དགོས་པ་ཡིན་པར་རིག་པར་བྱའོ། ། ཐེག་པ་ཆེན་པོ་ཐོབ་པར་བྱ་བའི་ཕྱིར་ལུང་དང་རིགས་པ་གཉིས་ཀྱིས་ཁམས་གསུམ་པ་རྣམ་པར་རིག་པ་ཙམ་ཉིད་དུ་དེ་བསྟན་ཞེས་གང་སྨྲས་པ་དེ་ལ།  རེ་ཞིག་ལུང་གིས་བསྟན་པའི་ཕྱིར།  ཀྱེ་རྒྱལ་བའི་སྲས་དག་ཁམས་གསུམ་པ་འདི་ནི་ཞེས་བྱ་བ་ལ་{173a7} སོགས་པ་སྨོས་སོ། ། ཡང་ན་བཤད་པ་གཉིས་པའི་དབང་དུ་བྱས་ནས་ཐེག་པ་ཆེན་པོ་ལ་རྣམ་པར་རིག་པ་ཙམ་དུ་བསྟན་ཞེས་བྱ་བ་དེ་ཇི་ལྟར་ངེས་ཞེས་རྒོལ་བ་དེའི་ཕྱིར།  ཀྱེ་རྒྱལ་བའི་སྲས་དག་ཁམས་གསུམ་པ་འདི་ནི་ཞེས་བྱ་བ་ལ་སོགས་པ་སྨོས་སོ། ། མདོ་སྡེ་ལས་ནི་ཁམས་གསུམ་པ་  {173b1} མཐའ་དག་སེམས་ཙམ་མོ་ཞེས་གསུངས་ཏེ།  གཟུགས་དང་མི་ལྡན་པ་དང།  འདུས་མ་བྱས་ནི་རྣམ་པར་ཤེས་པ་ལས་ལོགས་ཤིག་ན་མེད་ལ།  གཟུང་བ་དང་འཛིན་པ་ཡང་མེད་དོ་ཞེས་དགོངས་པའོ། ། རང་གི་སྡེ་པ་དག་ལ་རེ་ཞིག་ལུང་འདིའོ། ། གང་དང་གཞུང་གཞན་ལ་གནས་པ་{173b2} དེ་དག་ལ་ནི་རིགས་པ་བྲྗོད་དོ། ། ལུང་ནི་མཆོད་པ་དང།  བྲྗོད་པ་ཉུང་བའི་ཕྱིར་ཐོག་མ་ཉིད་དུ་གཞག་པར་རིགས་སོ། ། རྣམ་པར་རིག་པ་ཙམ་ཉིད་ཀྱི་ཕྱོགས་ལ་སྒྲའམ་མིང་གི་ཚོགས་ལ་སོགས་པ་མེད་དུ་ཟིན་ཀྱང་ཚིག་ལ་སོགས་པའི་རྣམ་པར་ཤེས་པ་ཉིད་ལུང་སྟེ།  འདི་ལྟར་དོན་ཇི་ལྟ་བ་བཞིན་དུ་{173b3} གཟིགས་པ་ལ་སོགས་པའི་ཡོན་ཏན་དང་ལྡན་པ་འགྲོ་བའི་བླ་མའི་དབང་ལས་བྱུང་སྟེ།  དེ་ལྟ་བས་ན་གཞན་ལས་འོངས་པའི་ཕྱིར་ལུང་ཞེས་བྱའོ། ། གཞན་གྱིས་ཀྱང་འདི་ངེས་པར་ཁས་བླང་པར་བྱ་སྟེ།  འདི་ལྟར་སྒྲའི་སྤྱི་ཉིད་ཚིག་ཡིན་གྱི་སྒྲའི་བྱེ་བྲག་ནི་མ་ཡིན་ནོ། ། སྒྲའི་སྤྱི་དེ་ཡང་ཤེས་པའི་གཟུང་བའི་{173b4} ཆ་ཡིན་ཏེ།  གུད་ན་དངོས་པོར་གྱུར་པ་མེད་དོ། ། དེ་བས་ན་སྒྲའི་སྤྱིའི་རྣམ་པའི་ཤེས་པ་ཉིད་ལུང་ཞེས་བསྟན་པར་འགྱུར་རོ། ། འདིར་ནི་རྣམ་པར་རིག་པ་ཙམ་དུ་དམ་བཅའ་ལ།  མདོ་སྡེ་ལས་ནི་སེམས་ཙམ་ཞེས་འབྱུང་ན་དེ་ནི་ཇི་ལྟར་ཁུངས་སུ་རུང་སྙམ་དུ་དོགས་པ་དེ་ལ།  སེམས་དང་{173b5} ཡིད་ཅེས་བྱ་བ་ལ་སོགས་པ་སྨོས་སོ། ། འདི་ནི་ཕན་ཚུན་དུ་དོན་འབྲེལ་བ་མེད་པ་མ་ཡིན་ཏེ།  འདི་ལྟར་སེམས་ཞེས་བྱ་བ་དང།  ཡིད་ཅེས་བྱ་བ་དང།  རྣམ་པར་ཤེས་པ་ཞེས་བྱ་བ་དང།  རྣམ་པར་རིག་པ་ཞེས་བྱ་བ་འདི་དག་ནི་རྣམ་གྲངས་སུ་གཏོགས་སོ། ། རྒྱུ་ཐ་དད་པ་མེད་པའི་སྒྲ་ནི་རྣམ་གྲངས་{173b6} སུ་གཏོགས་པ་ཞེས་བྱ་བ་སྟེ།  འདི་ལྟར་རིམ་ཞེས་བྱ་བ་རྣམ་གྲངས་ཀྱི་དོན་དེ་སྟོན་ཏོ། ། རྣམ་གྲངས་སུ་གཏོགས་པ་བཞི་བྲྗོད་པ་ནི་གསུང་རབ་ཀྱི་ཐ་སྙད་ལ་མགོ་རྨོངས་པ་མེད་པར་བྱ་བའི་ཕྱིར་རོ། ། གང་རབ་ཏུ་བྱེད་པ་འདི་ལས་རྣམ་པར་རིག་པ་ཞེས་བྱ་བའི་སྒྲ་སྨོས་པ་དང།  གང་ཡང་མདོ་སྡེ་{173b7} ལས་སེམས་ཞེས་བྱ་བ་འདི་གཉིས་ཀྱིས་ནི་རྣམ་པར་ཤེས་པའི་ཚོགས་བརྒྱད་བསྡུས་སོ། ། རྣམ་པར་ཤེས་པ་འདི་ཉིད་དོན་དུ་སྣང་བར་འབྱུང་སྟེ་ཞེས་འོག་ནས་འབྱུང་བ་ཡང་དེ་དང་འགལ་བ་མེད་དོ། ། འདི་ལྟར་རྣམ་པར་ཤེས་པའི་ཚོགས་དེ་དག་དོན་དུ་སྣང་བར་འདོད་དོ། ། གལ་ཏེ་ཁམས་གསུམ་པ་  {174a1} || སེམས་འབའ་ཞིག་ཙམ་ཡིན་ན།  འོ་ན་ནི་སེམས་ལས་བྱུང་བ་རྣམས་ཀྱང་མེད་པར་ཐལ་བར་འགྱུར་དུ་དོགས་པ་ལ།  སེམས་དེ་ཡང་ཞེས་བྱ་བ་ལ་སོགས་པ་སྨོས་ཏེ།  ཁམས་གསུམ་པ་གདགས་པའི་རྒྱུ་སེམས་གང་ཡིན་པ་དེ་མདོ་སྡེ་ལས་མཚུངས་པར་ལྡན་པ་དང་{174a2} བཅས་པར་དགོངས་པའོ། ། ཡང་ན་མདོ་སྡེ་ལས་སེམས་ཞེས་སྨོས་པ་གང་ཡིན་པ་དེ་རབ་ཏུ་བྱེད་པ་འདིར་མཚུངས་པར་ལྡན་པ་དང་བཅས་པར་ལྟའོ། ། སེམས་དེ་ཡང་ཞེས་བྱ་བ་ནི་ཁམས་གསུམ་པ་གདགས་པའི་རྒྱུའམ་མདོ་སྡེ་ལས་འབྱུང་བའོ། ། འདིར་ཞེས་བྱ་བ་ནི་མདོ་སྡེའམ་རབ་ཏུ་བྱེད་{174a3} པའོ། ། མཚུངས་པར་ལྡན་པ་དང་བཅས་པ་ཞེས་བྱ་བ་ནི་འདི་དག་དང་སེམས་སུ་མཚུངས་པར་ལྡན་པས་མཚུངས་པར་ལྡན་པ་དག་སྟེ།  ཚོར་བ་ལ་སོགས་པ་ལ་བྱའོ། ། མཚུངས་པར་ལྡན་པ་རྣམས་ལ་སོགས་པ་དང་ལྷན་ཅིག་འཇུག་པས་ན་མཚུངས་པར་ལྡན་པ་དང་བཅས་པའོ། ། {174a4} དགོངས་ཞེས་བྱ་བ་ནི་ཁས་ལེན་ཏོ། ། འདོད་དོ་ཞེས་བྱ་བའི་ཐ་ཚིག་གོ། ། དེ་ནི་འདི་སྐད་དུ་ཁམས་གསུམ་པ་འདི་ནི་སེམས་དང་སེམས་ལས་བྱུང་བ་ཙམ་ཡིན་གྱི།  སེམས་འབའ་ཞིག་ཙམ་ནི་མ་ཡིན་ནོ་ཞེས་བསྟན་པར་འགྱུར་རོ། ། སེམས་ཞེས་བྱ་བ་ནི་གསུང་རབ་ལས་སེམས་ལས་བྱུང་བ་{174a5} དག་ལ་ཡང་བྱ་སྟེ།  འདི་ལྟར་སེམས་བཏུལ་ན་ལེགས་ཞེས་བྱུང་སྟེ།  སེམས་ལས་བྱུང་བ་ཡང་མི་བཏུལ་བ་མ་ཡིན་ནོ། ། དེ་སྐད་དུ།  འཇིག་རྟེན་འདི་ནི་སེམས་ཀྱིས་ཁྲིད། ། ཅེས་གསུངས་ཏེ།  ཚོར་བ་དང་སྲེད་པ་ལ་སོགས་པ་སེམས་ལས་བྱུང་བ་རྣམས་ཀྱིས་ཁྲིད་པ་ཡང་ཡིན་ནོ། ། {174a6} གལ་ཏེ་སེམས་ལས་བྱུང་བ་དག་ཀྱང་ཁས་ལེན་ན་ཅིའི་ཕྱིར་ཙམ་ཞེས་བྱ་བ་སྨོས་སྙམ་དུ་དོགས་པ་དེ་ལ།  ཙམ་ཞེས་བྱ་བ་སྨོས་པ་ནི་ཞེས་བྱ་བ་ལ་སོགས་པ་སྨོས་ཏེ།  ཙམ་ཞེས་བྱ་བ་སྨོས་པ་གང་ཡིན་པ་དེ་ནི་རྣམ་པར་ཤེས་པ་ལས་མ་གཏོགས་པའི་དོན་དགག་པའི་ཕྱིར་སྨོས་ཀྱི།  སེམས་ལས་{174a7} བྱུང་བ་རྣམས་ཀྱང་དགག་པ་མ་ཡིན་ནོ། ། དོན་དགག་པའི་ཕྱིར་རོ་ཞེས་བྱ་བ་ནི་རྣམ་པར་ཤེས་པ་ལས་མ་གཏོགས་པ་གཟུང་བ་དང་འཛིན་པའི་མཚན་ཉིད་ཀྱི་དོན་དགག་པའི་ཕྱིར་རོ་ཞེས་བྱ་བའི་ཐ་ཚིག་གོ། ། དེ་ནི་འདི་སྐད་དུ་རྣམ་པར་ཤེས་པ་ལས་མ་གཏོགས་པ་གཟུང་བ་གང་ཡང་མེད་ལ།    {174b1} གང་གིས་རྣམ་པར་ཤེས་པ་དེ་ལ་འཛིན་པའི་འཛིན་པ་ཡང་མེད་དོ་ཞེས་བསྟན་པར་འགྱུར་རོ། ། གལ་ཏེ་གཟུང་བ་དང་འཛིན་པའི་མཚན་ཉིད་ཀྱི་དོན་མེད་ན་འོ་ན་སྔོན་པོ་ལ་སོགས་པར་སྣང་བ་འདི་ཅི་ཞིག།  གང་གིས་སྣང་སྙམ་དུ་དོགས་པ་དེ་ལ་རྣམ་པར་ཤེས་པ་འདི་ཉིད་དུ་སྣང་ཞེས་བྱ་བ་ལ་སོགས་པ་{174b2} སྨོས་སོ། ། སྤྲོས་པའི་བག་ཆགས་ཡོངས་སུ་སྨིན་པའི་དབང་གིས་རྣམ་པར་ཤེས་པ་ཉིད་སྔོན་པོ་ལ་སོགས་པའི་དོན་གྱི་རྣམ་པར་འབྱུང་ངོ། ། དེ་ལྟ་བུར་གྱུར་པ་བྱུང་བ་དེ་ལ་སྲོག་ཆགས་ལོགས་ཤིག་ན་ཡོད་པའི་དོན་ཞིག་མཐོང་ངོ་སྙམ་དུ་མངོན་པའི་ང་རྒྱལ་དུ་གྱུར་ཏོ། ། འདི་ལྟར་སྔོན་པོ་ལ་{174b3} སོགས་པའི་རྣམ་པ་དེ་སྣང་བ་ན་ནམ་མཁའི་ཁམས་དང་ལྷན་ཅིག་ཏུ་སྣང་ངོ། ། ནམ་མཁའི་ཁམས་དེ་སྣང་བ་ན་སྔོན་པོ་ལ་སོགས་པའི་རྣམ་པར་ཤེས་པ་དང་དེ་ལས་རིས་སུ་ཆད་པ་ལྟ་བུར་སྣང་བར་བྱེད་དོ། ། དཔེར་ན་མེ་ལོང་གི་ངོས་ལ་ཟླ་བའི་གཟུགས་བརྙན་འབྱུང་བ་ན་{174b4} ནམ་མཁའི་ཁམས་གཟུགས་བརྙན་དང་ལྷན་ཅིག་ཏུ་འབྱུང་ངོ། ། ནམ་མཁའི་ཁམས་དེ་དེར་གཟུགས་བརྙན་དུ་གྱུར་པ་ན་ཟླ་བའི་དཀྱིལ་འཁོར་དེ་མེ་ལོང་གི་ངོས་དེ་ལས་རིས་སུ་ཆད་དེ་ཁྲོན་པའི་ནང་དུ་ལྷུང་བ་བཞིན་དུ་སྣང་བར་བྱེད་དོ། ། དེ་བཞིན་དུ་རྣམ་པར་ཤེས་པ་ལ་ནམ་མཁའི་ཁམས་{174b5} སྣང་བ་ན་ཡང་རིས་སུ་ཆད་པ་ལྟ་བུར་སྔོན་པོ་ལ་སོགས་པའི་རྣམ་པར་སྣང་བར་བྱེད་དོ། ། སྔོན་པོ་ལ་སོགས་པའི་རྣམ་པ་རིས་སུ་ཆད་པ་ལྟ་བུ་དེ་ལ་བརྟེན་ནས་སྲོག་ཆགས་རྣམས་ཕྱི་རོལ་གྱི་དོན་ཞིག་མཐོང་བ་སྙམ་དུ་མངོན་པའི་ང་རྒྱལ་བྱེད་དོ། ། འདིར་དཔེ་བསྟན་པའི་ཕྱིར།  དཔེར་ན་རབ་རིབ་ཅན་{174b6} རྣམས་ཀྱིས་ཞེས་བྱ་བ་ལ་སོགས་པ་སྨོས་ཏེ།  དཔེར་ན་རབ་རིབ་ཀྱིས་ཉམས་པའི་མིག་ཅན་རྣམས་ཀྱིས་ཤེས་པ་སྐྲ་དང་ཤ་སྦྲང་དང་སྦྲང་བུ་ལ་སོགས་པའི་རྣམ་པར་འབྱུང་སྟེ།  སྐྲ་ལ་སོགས་པ་མེད་པར་ཡང་སྒྲ་ལ་སོགས་པ་མཐོང་ངོ་སྙམ་དུ་མངོན་པའི་ང་རྒྱལ་བྱེད་པ་དེ་བཞིན་དུ་གཞན་དུ་ཡང་རྣམ་{174b7} པར་ཤེས་པ་ཉིད་སྔོན་པོ་ལ་སོགས་པའི་རྣམ་པར་འབྱུང་ངོ། ། དོན་སྔོན་པོ་ལ་སོགས་པ་གུད་ན་གང་ཡང་མེད་དོ་ཞེས་བྱ་བ་ནི་མཇུག་བསྡུ་བའོ། ། རབ་རིབ་དང་ལྡན་བ་ནི་རབ་རིབ་ཅན་ནོ། ། དེ་ལྟར་རེ་ཞིག་གཟུང་བ་བཀག་གོ། ། གཟུང་བ་བཀག་ན་འཛིན་པ་ཡང་བཀག་པར་དེ་ཉིད་ཀྱིས་གྲུབ་སྟེ།    {175a1} || འདི་ལྟར་གཟུང་བ་མེད་ན་འཛིན་པ་ཡང་མེད་དོ། ། དེ་ལྟར་གཟུང་བ་བཀག་པ་ཡང། ། ཕྱི་རོལ་གྱི་དོན་དུ་སྨྲ་བས་གྲགས་པའི་གནོད་པ་བསྟན་པའི་ཕྱིར་རོ། ། འདིར་འདི་སྐད་ཅེས་བརྒལ་ཏེ་ཞེས་བྱ་བ་ལ་སོགས་པ་སྨོས་སོ། ། གལ་ཏེ་རྣམ་པར་རིག་པ་ཕྱི་རོལ་གྱི་དོན་{175a2} ལས་མ་བྱུང་ན་དེའི་ཚེ་རྣམ་པར་རིག་པ་རྣམས་ཀྱི་ཡུལ་ངེས་པ་མི་འགྲུབ།  དུས་ངེས་པ་དང།  སེམས་ངེས་པ་མེད་པ་དང།  བྱ་བ་མེད་པ་ཡང་མི་འགྲུབ་བོ་ཞེས་མདོར་བྱས་པའི་དོན་བསྡུས་པའོ། ། འདིར་ཞེས་བྱ་བ་ནི་སྔ་མའི་ཕྱོགས་འདིར་རོ། ། འདི་སྐད་བསྒྲལ་ཞེས་བྱ་བ་ནི་འོག་ནས་{175a3} འབྱུང་བའི་ཡུལ་ལ་སོགས་པ་ངེས་པ་བློ་ལ་རྣམ་པར་བཞག་ནས་འདི་ལྟར་རྟོག་པའོ། ། ཡུལ་དང་དུས་ལ་ངེས་མེད་ཅིང། ། ཞེས་བྱ་བ་ལ་ངེས་པ་ནི་རྣམ་པར་གནས་པའོ། ། ཡུལ་ལ་ལར་སྣང་ལ་ཐམས་ཅད་ན་མ་ཡིན་ཞེས་བྱ་བ་ནི་ཡུལ་ངེས་པའོ། ། རེས་འགའ་སྣང་ལ་ཐམས་ཅད་དུ་མ་ཡིན་{175a4} ཞེས་བྱ་བ་ནི་དུས་ངེས་པའོ། ། ཡུལ་དང་དུས་དེ་ན་འཁོད་པ་ཐམས་ཅད་ལ་བྱེ་བྲག་མེད་པར་སྣང་གི་གཅིག་འགའ་ལ་མ་ཡིན་ཞེས་བྱ་བ་ནི་སེམས་ངེས་པ་མེད་པའོ། ། བྱ་བ་བྱེད་པ་ནི་བྱ་བ་བྱེད་པའོ། ། བསྟན་བཅོས་བྱེད་པས་མདོའི་དོན་ཅིས་གསལ་བར་བསྟན་པའི་ཕྱིར་རོ། ། ཇི་སྐད་དུ་བསྟན་{175a5} པར་འགྱུར་ཞེ་ན་ཞེས་བྱ་བ་ལ་སོགས་པ་སྨོས་སོ། ། གལ་ཏེ་གཟུགས་ལ་སོགས་པའི་དོན་མེད་པར་གཟུགས་ལ་སོགས་པར་སྣང་བའི་རྣམ་པར་རིག་པ་འབྱུང་སྟེ།  གཟུགས་ལ་སོགས་པའི་དོན་དང་འབྲེལ་བ་མ་ཡིན་ན་དེའི་ཚེ་འདིར་ཅིའི་ཕྱིར་འདི་ལྟར་ཡུལ་ལ་ལར་གཟུགས་ལ་སོགས་པའི་{175a6} དོན་དུ་སྣང་བའི་རྣམ་པར་རིག་པ་འབྱུང་བ་ཡུལ་ཐམས་ཅད་ན་མ་ཡིན།  དེ་བཞིན་དུ་གང་ན་ཕྱི་རོལ་གྱི་དོན་མཐོང་བ་མངོན་པའི་ང་རྒྱལ་འབྱུང་བའི་ཡུལ་དེ་ཉིད་ན་རེས་འགའ་འབྱུང་གི་དུས་ཐམས་ཅད་དུ་མ་ཡིན་པ་འདི་ལ་རྒྱུ་ཅི་ཡོད།  དེ་ནི་འདི་སྐད་དུ་གང་གི་ལྟར་ན་རྣམ་པར་རིག་པ་ཕྱི་རོལ་གྱི་{175a7} དོན་ལ་རག་ལས་པ་དེ་ལྟར་ན་གང་ན་གང་གི་ཚེ་ཕྱི་རོལ་གྱི་དོན་ཡོད་པ་དེ་ཉིད་ན་དེའི་ཚེ་རྣམ་པར་རིག་པ་འབྱུང་སྟེ།  ཡུལ་དང་དུས་ངེས་པར་རིགས་སོ། ། གང་གི་ལྟར་ན་རྣམ་པར་རིག་པ་ཕྱི་རོལ་གྱི་དོན་ལ་རག་ལས་པ་མ་ཡིན་པ་དེའི་ལྟར་ན་ངེས་པར་བྱེད་པ་དོན་མེད་པས་ཡང་ན་ཐམས་ཅད་ནས་{175b1} ཐམས་ཅད་དུ་འབྱུང་ངོ། ། ཡང་ན་གང་དུ་ཡང་མི་འབྱུང་སྟེ་ནམ་ཡང་མ་ཡིན་ནོ། ། གང་དུ་ཡང་ལ་ལར་འབྱུང་ལ་ལ་ལར་མ་ཡིན་པ་དང།  དེ་བཞིན་དུ་རེས་འགའ་ནི་འབྱུང་ལ་རེས་འགའ་མི་འབྱུང་བ་དེར་མི་འགྱུར་རོ། ། དེ་ལྟར་རེ་ཞིག་ཡུལ་དང་དུས་ངེས་པ་མི་འཐད་པར་བསྟན་ཏོ། ། སེམས་{175b2} ངེས་པ་མེད་པ་མི་འཐད་པར་བསྟན་པའི་ཕྱིར།  ཡུལ་དང་དུས་དེ་ན་འཁོད་པ་ཐམས་ཅད་ཀྱི་ཞེས་བྱ་བ་ལ་སོགས་པ་སྨོས་སོ། ། གལ་ཏེ་ཕྱི་རོལ་གྱི་དོན་ཡོད་པར་མི་འདོད་ན་དེའི་ཚེ་ཅིའི་ཕྱིར་ཡུལ་དང་དུས་དེ་ན་འཁོད་པའི་སྲོག་ཆགས་ཐམས་ཅད་ཀྱི་སེམས་རྣམས་ལ་རྣམ་པར་རིག་པ་ངེས་པ་མེད་{175b3} པར་འགྱུར་ལ་འགའ་ཙམ་ལ་མ་ཡིན།  འདིར་དཔེ་བསྟན་པའི་ཕྱིར།  ཇི་ལྟར་རབ་རིབ་ཅན་ཞེས་བྱ་བ་ལ་སོགས་པ་སྨོས་སོ། ། དཔེར་ན་རབ་རིབ་ཅན་ལ་སྣང་བའི་སྐྲ་ལ་སོགས་པ་མཐོང་བར་བ་རིབ་ཅན་ཉིད་ཀྱི་སེམས་ཉིད་ལ་འབྱུང་གི།  རབ་རིབ་མེད་པ་གཞན་དག་ལ་མ་ཡིན་པ་དེ་བཞིན་{175b4} དུ; གལ་ཏེ་ཕྱི་རོལ་གྱི་དོན་མེད་པར་རྣམ་པར་རིག་པ་འབྱུང་ན་དེའི་ཚེ་གང་ལ་སྔོན་པོ་ལ་སོགས་པའི་དོན་སྣང་བའི་རྣམ་པར་རིག་པ་དེ་འབྱུང་བ་དེ་ཉིད་ལ་སྔོན་པོ་ལ་སོགས་པའི་དོན་མཐོང་ངོ་སྙམ་པའི་མངོན་པའི་ང་རྒྱལ་འབྱུང་གི་གཞན་ལ་ནི་མ་ཡིན་ནོ། ། དེ་ནི་འདི་སྐད་དུ་གཟུང་བའི་{175b5} ཆ་ལ་དོན་དུ་མཐོང་བའི་ང་རྒྱལ་འབྱུང་བ་གང་ཡིན་པ་ནི་གང་ལ་བཟུང་བའི་ཆ་ཡོད་པ་དེ་ཉིད་ཀྱི་ཡིན་གྱི་གཞན་ནི་མ་ཡིན་ནོ་ཞེས་བསྟན་པར་འགྱུར་ཏེ།  འདི་ལྟར་གཞན་གྱི་བཟུང་བའི་ཆ་ནི་གཞན་གྱིས་མི་མྱོང་ངོ། ། བྱ་བ་བྱེད་པ་ཡང་མི་འཐད་པར་བསྟན་པའི་ཕྱིར།  ཅིའི་ཕྱིར་ཞེས་བྱ་བ་ལ་སོགས་{175b6} པ་སྨོས་སོ། ། གལ་ཏེ་རྣམ་པར་རིག་པ་དོན་ལ་རག་ལས་པ་མ་ཡིན་ན་དེའི་ཚེ་ཅིའི་ཕྱིར་རབ་རིབ་ཅན་གྱིས་མཐོང་བའི་སྐྲ་དང་སྦྲང་བུ་དང་ཤ་སྦྲང་ལ་སོགས་པས་བཅིང་བ་དང་ཟ་བ་དང་སྐྱུག་པའི་བྱ་བ་མི་བྱེད་ལ།  དེ་མ་ཡིན་པའི་མིག་མ་ཉམས་པས་དམིགས་པའི་སྐྲ་ལ་སོགས་པ།  གཞན་དག་གིས་ནི་ཇི་སྐད་དུ་{175b7} བསྟན་པ་དེ་ཐམས་ཅད་བྱེད།  དེ་བཞིན་དུ་ཅིའི་ཕྱིར་གང་དག་རྨི་ལམ་ན་མཐོང་བའི་བཟའ་བ་དང་བཏུང་བ་ལ་སོགས་པ་དེ་དག་གི་ཟས་སྐོམ་ལ་སོགས་པའི་བྱ་བ་འགྲངས་པ་དང་ངོམས་པ་ལ་སོགས་པ་མི་བྱེད་ལ།  དེ་མ་ཡིན་པ་གཉིད་ཀྱིས་མ་ལོག་པའི་དུས་ན་མཐོང་བ་གཞན་དག་གིས་ནི་བྱེད།  འདི་  {176a1} || ལ་ཡང་ཅིའི་ཕྱིར་དྲི་ཟའི་གྲོང་ཁྱེར་མེད་པས་གྲོང་ཁྱེར་གྱི་བྱ་བ་ཀུན་དུ་སྲུང་བ་ལ་སོགས་པ་མི་བྱེད་ལ་དེ་མ་ཡིན་པ་རྒྱལ་པོ་དང་བློན་པོ་དང་བྲམ་ཟེ་དང་གྲོང་གི་སྐྱེ་བོ་གནས་པ་གཞན་དག་གིས་ནི་བྱེད།  ཐམས་ཅད་མེད་དུ་འདྲ་ན་དེའི་ཕྱིར་ཡང་ཐམས་ཅད་སྐྲལ་སོགས་པའི་{176a2} དོན་གྱི་བྱ་བ་བྱེད་པའམ།  ཡང་ན་གང་ཡང་མི་བྱེད་པར་འགྱུར་རོ། ། དེ་ནི་འདི་སྐད་དུ་གལ་ཏེ་སྐྲ་ལ་སོགས་པའི་དོན་གྱི་བྱ་བ་བཟུང་བའི་ཆ་ཙམ་དང་འབྲེལ་པ་ཡིན་ན་དེའི་ཚེ་ཐམས་ཅད་ལ་བཟུང་བའི་ཆ་ཡོད་དུ་མཚུངས་པས་ཐམས་ཅད་ཀྱང་དོན་བྱེད་པར་འགྱུར་རོ་ཞེས་བསྟན་པར་འགྱུར་{176a3} རོ; | གང་གི་ལྟར་ན་ཕྱི་རོལ་གྱི་དོན་ཡོད་པ་དེའི་ལྟར་ན་སྐྲ་ལ་སོགས་པ་དང།  བཟའ་བ་དང་བཏུང་བ་ལ་སོགས་པ་དང།  གྲོང་ཁྱེར་ལ་སོགས་པ་ཡང་ཡོད་དེ།  དེ་དག་རང་རང་དང་མཐུན་པའི་དོན་གྱི་བྱ་བ་ཡང་བྱེད་དོ། ། གང་དག་ཕྱི་རོལ་ན་མེད་པ་རབ་རིབ་ཅན་གྱི་སྐྲ་ལ་སོགས་པ་{176a4} དང; རྨི་ལམ་གྱི་ཟས་སྐོམ་ལ་སོགས་པ་དང།  དྲི་ཟའི་གྲོང་ཁྱེར་ལ་སོགས་པ་དེ་དག་ནི་དོན་གྱི་བྱ་བ་གང་ཡང་མི་བྱེད་དོ་ཞེས་བྱ་བ་དེ་འཐད་དོ། ། དཔེ་གསུམ་པོ་འདི་དག་ནི་འཁྲུལ་བ་རྣམ་པ་གསུམ་དུ་བསྟན་པ་ཡིན་ཏེ།  དང་པོ་ནི་རབ་རིབ་ཀྱི་འཁྲུལ་བའོ། ། གཉིས་པ་ནི་{176a5} གཉིད་དོ། ། གསུམ་པ་ནི་ཐག་རིང་བའོ། ། དེའི་ཕྱིར་དེ་ལྟར་ཡུལ་ལ་སོགས་པ་ངེས་པ་མེད་པར་བསྟན་ནས་མཇུག་བསྡུ་བའི་ཕྱིར།  འདི་དག་དོན་མེད་པར་མེད་དུ་འདྲ་ན་ཞེས་བྱ་བ་ལ་སོགས་པ་སྨོས་ཏེ།  དེ་སྐད་བསྟན་པའི་རྣམ་པའི་ཕྱི་རོལ་གྱི་དོན་མེད་ན་ཡུལ་ལ་སོགས་{176a6} པ་བཞི་མི་རུང་ངོ། ། དེ་བས་ན་གདོན་མི་ཟ་བར་ཕྱི་རོལ་གྱི་དོན་ཁས་བླང་བར་བྱའོ་ཞེས་ཕྱོགས་སྔ་མའོ། ། འདི་ལ་སློབ་དཔོན་ལན་གདབ་པར་ཅི་ལ་མ་རག་པར་ཆགས་ནས།  མི་རུང་བ་མ་ཡིན་ཏེ་ཞེས་བྱ་བ་ལ་སོགས་པ་སྨོས་སོ། ། ཡུལ་ལ་སོགས་པ་ངེས་པ་རྣམ་པ་འདི་བཞི་ནི་ཕྱི་རོལ་གྱི་དོན་{176a7} མེད་པར་མི་རུང་བ་མ་ཡིན་ཏེ་རུང་བ་ཉིད་དོ་ཞེས་དགོངས་པའོ། ། དགག་པ་གཉིས་ཀྱིས་ནི་འདིར་སྐབས་ཡིན་པར་སྟོན་ཏོ། ། ཇི་ལྟར་རུང་ཞེ་ན་དེའི་ཕྱིར།  འདི་ལྟར།  ཡུལ་ལ་སོགས་པ་ངེས་འགྲུབ་སྟེ། ། ཞེས་བྱ་བ་ལ་སོགས་པ་སྨོས་སོ། ། འདི་ལྟར་ཡུལ་དང་དུས་ངེས་ཏེ།  རྨི་ལམ་དང་འདྲ་{176b1} བར་འགྲུབ་བོ། ། འདྲ་ཞེས་བྱ་བའི་དོན་བསྟན་བའི་ཕྱིར།  རྨི་ལམ་དུ་རྨིས་བ་དང་མཚུངས་པས་ན་ཞེས་བྱ་བ་ལ་སོགས་པ་སྨོས་ཏེ།  དེའི་ཕྱིར་རྨི་ལམ་དུ་རྨིས་པ་དང་མཚུངས་སོ་ཞེས་བསྟན་པ་གང་ཡིན་པ་དེ་ཉིད་རྨི་ལམ་དང་འདྲའོ་ཞེས་བསྟན་པའོ། ། དཔེའི་དོན་རྣམ་པར་དགྲོལ་བའི་ཕྱིར་{176b2} རོ; | ཇི་ལྟ་ཞེ་ན་ཞེས་བྱ་བ་ལ་སོགས་པ་སྨོས་སོ། ། གལ་ཏེ་དོན་མེད་པར་རྣམ་པར་རིག་པ་རྣམས་ཀྱི་ཡུལ་དང་དུས་ངེས་པར་མི་འགྲུབ་ན།  རྨི་ལམ་ན་ཡང་ཕྱི་རོལ་གྱི་དོན་མེད་པར་ཡུལ་ལ་ལན་གྲོང་དང་ཀུན་དགའ་རབ་ལ་སོགས་པ་སྣང་ལ་ཐམས་ཅད་ན་ནི་མ་ཡིན་པར་ཇི་ལྟར་འགྱུར།  དེ་བཞིན་{176b3} དུ་ཡུལ་དེ་ཉིད་ན་ཡང་གྲོང་དང་ཀུན་དགའ་རབ་ལ་སོགས་པ་དེ་རེས་འགའ་སྣང་ལ་དུས་ཐམས་ཅད་དུ་མ་ཡིན་པར་ཇི་ལྟར་འགྱུར།  དོན་མེད་པར་ཡང་ཡུལ་ལ་སོགས་པ་ངེས་པར་བསྟན་ནས་མཇུག་བསྡུ་བའི་ཕྱིར།  དོན་མེད་བར་ཡང་ཞེས་བྱ་བ་ལ་སོགས་པ་སྨོས་སོ། ། ཇི་སྐད་བསྟན་པའི་{176b4} རྣམ་པས་ཕྱི་རོལ་གྱི་དོན་མེད་པར་ཡང་ཡུལ་དང་དུས་ངེས་པར་འགྲུབ་བོ། ། སེམས་ངེས་པ་མེད་པར་གྲུབ་པ་དང་དཔེ་གཞན་གྱིས་བསྟན་པའི་ཕྱིར།  སེམས་ཀྱང་ངེས་པ་མེད་ཅེས་བྱ་བ་ལ་སོགས་བ་སྨོས་སོ། ། དཔེར་ན་དོན་མེད་པར་ཡི་དགས་རྣམས་སེམས་ངེས་པ་མེད་པར་གྲུབ་བ་དེ་བཞིན་{176b5} དུ་གཞན་དུ་ཡང་འགྱུར་རོ་ཞེས་མདོར་བྱས་པའི་དོན་ཏོ། ། མདོ་ལས་མ་སྨོས་ཏེ་བྱ་བའི་ཚིག་ཁོང་ནས་དབྱུང་བའི་ཕྱིར།  གྲུབ་ཅེས་བྱ་བར་སྙེགས་སོ་ཞེས་བྱ་བ་སྨོས་ཏེ།  མདོར་ཞེས་བྱ་བ་སྔ་མ་ལས་གྲུབ་བ་སྨོས་པའི་རྗེས་སུ་བསྙག་གོ་ཞེས་དགོངས་པའོ། ། འདིར་ཡང་བཞིན་ཞེས་བྱ་བའི་{176b6} དོན་བསྟན་པའི་ཕྱིར།  ཡི་དགས་རྣམས་ཀྱི་དང་མཚུངས་བས་ཞེས་བྱ་བ་ལ་སོགས་པ་སྨོས་ཏེ།  འདིར་ནི་ཀྱེ་ཞེས་བྱ་བ་ལ་བཞིན་ཞེས་བྱ་བ་བསྟན་པར་འགྱུར་རོ། ། ཡི་དགས་རྣམས་ཀྱི་སེམས་ངེས་པ་མེད་པ་མ་བསྟན་པའི་ཕྱིར།  ཇི་ལྟར་གྲུབ་ཅེས་དྲིས་པ་དང།  བསྟན་བཅོས་བྱེད་པས་{176b7} གྲུབ་བའི་ཐབས་བསྟན་པའི་ཕྱིར་ཐམས་ཅད་ཀྱི་ཞེས་བྱ་བ་ལ་སོགས་པ་སྨོས་སོ། ། འདི་ལྟར་ཡུལ་དང་དུས་དེ་ན་འཁོད་པའི་ཡི་དགས་ཐམས་ཅད་ཀྱིས་ཀླུང་ལ་རྣག་ལ་སོགས་པར་མཐོང་སྟེ།  དེ་བས་ན་དོན་མེད་པར་ཡང་སེམས་ངེས་པ་མེད་པར་གྲུབ་བོ། ། ཚིག་གི་དོན་ཁོང་དུ་ཆུད་{177a1} || པ་ནི་ངག་གི་དོན་ཁོང་དུ་ཆུད་པའི་སྔོན་དུ་འགྲོ་བས་ཚིག་གི་དོན་རྣམ་པར་དགྲོལ་བའི་ཕྱིར།  རྣག་གིས་གང་བའི་ཀླུང་ནི་ཞེས་བྱ་བ་ལ་སོགས་པ་སྨོས་སོ། ། རྣག་གི་ཀླུང་ཞེས་བྱ་བ་འདི་ལ།  གང་བ་ཞེས་བྱ་བའི་སྒྲ་མ་སྨོས་སོ་ཞེས་སྟོན་ཏོ། ། འདིར་དཔེ་བསྟན་པའི་{177a2} ཕྱིར།  མར་གྱི་བུམ་པ་བཞིན་ནོ་ཞེས་བྱ་བ་སྨོས་ཏེ།  དཔེར་ན་མར་གྱིས་གང་བའི་བུམ་པ་ལ་མར་གྱི་བུམ་པ་ཞེས་བྱ་བ་དེ་བཞིན་དུ།  འདི་ལ་ཡང་རྣག་གིས་གང་བའི་ཀླུང་ལ་རྣག་གི་ཀླུང་ཞེས་བྱའོ། ། རྣག་མེད་པ་ལ་ཐམས་ཅད་ཀྱིས་རྣག་ཏུ་ཇི་ལྟར་མཐོང་ཞེ་ན།  ལས་ཀྱི་རྣམ་པར་སྨིན་པ་{177a3} མཚུངས་པ་ལ་གནས་པ་ཞེས་བྱ་བ་ལ་སོགས་པ་སྨོས་ཏེ།  འདི་ལྟར་རྣམ་པར་སྨིན་བ་མཚུངས་པ་ལ་གནས་པའི་ཡི་དགས་ཇི་སྙེད་པ་དེ་དག་ཀུན་གྱིས་ཀྱང་འདྲ་བར་ཀླུང་རྣག་གིས་གང་བར་མཐོང་སྟེ་གཅིག་འགས་ནི་མ་ཡིན་ནོ། ། དེ་ལ་རྣག་ཐིགས་བ་འགའ་ཡང་མེད་ན་རྣག་གིས་གང་བའི་ཀླུང་{177a4} ལྟ་ག་ལ་ཡོད་དེ།  ལས་ཀྱི་རྣམ་པར་སྨིན་པའི་དབང་གིས་ན་དེ་དག་གིས་དེ་མཐོང་ངོ། ། སོགས་པ་ཞེས་བྱ་བའི་སྒྲས་བསྡུས་པའི་དོན་བསྟན་པའི་ཕྱིར།  རྣག་གིས་གང་བ་ཇི་ལྟ་བ་བཞིན་དུ་ཞེས་བྱ་བ་ལ་སོགས་པ་སྨོས་ཏེ།  དཔེར་ན་ཁ་ཅིག་གིས་རྣག་གིས་གང་བར་མཐོང་བ་དེ་བཞིན་དུ།  {177a5} ཁ་ཅིག་གིས་གཅིན་གྱིས་གང་བ་དང།  ཁ་ཅིག་གིས་ངན་སྐྱུགས་ཀྱིས་གང་བ་དང།  ཁ་ཅིག་གིས་དབྱིག་པ་ཐོགས་པའི་མི་དག་གིས་བསྲུངས་པ་དང།  ཁ་ཅིག་གིས་ཀླུང་ལ་རལ་གྲི་ཐོགས་བ་དག་གིས་བསྲུངས་པར་མཐོང་ངོ། ། ཡི་དགས་རྣམས་ཀྱིས་ལས་ཀྱི་དབང་གིས་དབྱིག་པ་དང་རལ་{177a6} གྲི་ཐོགས་པའི་མི་འབྱུང་བར་ནི་མི་རིགས་ཏེ།  གཞན་གྱི་ལས་ཀྱིས་གཞན་དག་བྱུང་བར་གྱུར་ཏ་རེ།  དེའི་ཕྱིར་དེ་ལྟར་སེམས་ངེས་པ་མེད་པར་བསྟན་ནས་མཇུག་བསྡུ་བའི་ཕྱིར།  དེ་ལྟར་ན་ཞེས་བྱ་བ་ལ་སོགས་པ་སྨོས་སོ། ། དེ་སྐད་དུ་བསྟན་པའི་རྣམ་པས་དོན་མེད་པར་ཡང་རྣམ་པར་རིག་པ་རྣམས་{177a7} ཀྱིས་སེམས་ངེས་པ་མེད་པར་གྲུབ་བོ། ། དོན་མེད་པ་ལ་བྱ་བ་བྱེད་བ་བསྟན་པའི་ཕྱིར།  བྱ་བྱེད་རྨི་ལམ་གནོད་བ་འདྲ། ། ཞེས་བྱ་བ་སྨོས་སོ། ། དཔེར་ན་རྨི་ལམ་གྱི་གནོད་པ་དོན་མེད་པར་ཡང་གྲུབ་བ་དེ་བཞིན་དུ་དོན་བྱེད་པ་དེ་གཞན་ཡང་དོན་མེད་པར་གྲུབ་བོ་ཞེས་མདོར་བྱས་པའི་དོན་ཏོ། ། བྱ་བའི་{177b1} ཚིག་ཁོང་ནས་དབྱུང་བའི་ཕྱིར།  གྲུབ་ཅེས་བྱ་བར་རིག་པར་བྱའོ་ཞེས་བྱ་བ་སྨོས་ཏེ།  མདོར་བྱས་པ་གོང་མ་ལས་གྲུབ་ཅེས་བྱ་བའི་སྒྲ་ལ་སྙེགས་པ་འདིར་ཡང་སྦྱར་རོ་ཞེས་བྱ་བའི་ཐ་ཚིག་གོ། ། དཔེ་རྣམ་པར་དགྲོལ་བའི་ཕྱིར།  དཔེར་ན་རྨི་ལམ་ན་ཞེས་བྱ་བ་ལ་སོགས་པ་སྨོས་སོ། ། དཔེར་ན་རྨི་{177b2} ལམ་ན་སྐྱེས་པ་དང་བུད་མེད་གཉིས་མ་ཕྲད་པར་ཁུ་བ་བྱུང་བ་དེ་བཞིན་དུ་རྨི་ལམ་གྱི་གནོད་པ་འབྱུང་བ་དེ་བཞིན་དུ་སྐྲ་དང་ཤ་སྦྲང་དང་བཟའ་བ་དང་བཏུང་བ་དང།  གྲོང་ཁྱེར་དང་གྲོང་རྡལ་དང་དུག་དང་མཚོན་དང་ལྕེ་འབབ་པས་བསྒྲིབ་པར་བྱ་བའི་དོན་སྐྲ་ལ་སོགས་པ་མེད་པར་ཡང་འབྱུང་ངོ། ། གཉིས་ཀྱིས་{177b3} གཉིས་ཕྲད་པ་མེད་པར་ཡང་ཞེས་བྱ་བ་ནི་སྐྱེས་པ་དང་བུད་མེད་གཉིས་ཀྱིས་གཉིས་ཕྲད་པ་མེད་པ་ཞེས་བྱ་བའི་ཐ་ཚིག་གོ། ། དེའི་ཕྱིར་དེ་ལྟར་གོང་དུ་སྨོས་པའི་བརྒལ་བ་རྣམ་པ་བཞི་ཆར་གྱི་ལན་བཏབ་ནས་མཇུག་བསྡུ་བའི་ཕྱིར།  དེ་ལྟར་རེ་ཞིག་ཅེས་བྱ་བ་ལ་སོགས་པ་སྨོས་སོ། ། དེ་སྐད་{177b4} བསྟན་པའི་རྣམ་པས་རེ་ཞིག་དཔེ་གཞན་དང་གཞན་དག་གིས་ཡུལ་དང་དུས་ངེས་པ་ལ་སོགས་པ་བཞི་གྲུབ་བོ། ། རེ་ཞིག་ཅེས་བྱ་བའི་སྒྲ་ནི་ཡང་འགྲུབ་བོ་ཞེས་འོག་ནས་འབྱུང་བ་བསྟན་ཏོ། ། ཡང་དཔེ་གཅིག་གིས་བརྒལ་བ་བཞི་ཆར་གྱི་ལན་གདབ་པའི་ཕྱིར།  ཐམས་ཅད་སེམས་{177b5} ཅན་དམྱལ་བ་བཞིན་ཞེས་བྱ་བ་སྨོས་སོ། ། དཔེར་ན་སེམས་ཅན་དམྱལ་བ་དག་ན་དོན་མེད་པར་ཡང་ཡུལ་ངེས་པ་ལ་སོགས་པ་རྣམ་པ་བཞི་ཡོད་པ་དེ་བཞིན་དུ་གཞན་དུ་ཡང་དོན་མེད་པར་རྣམ་པ་བཞི་པོ་ཡང་ཐམས་ཅད་གྲུབ་བོ་ཞེས་མདོར་བྱས་པའི་དོན་ཏོ། ། བྱ་བའི་ཚིག་ཁོ་ནས་དབྱུང་བའི་{177b6} ཕྱིར།  གྲུབ་ཅེས་བྱ་བར་རིག་པར་བྱའོ་ཞེས་བྱ་བ་སྨོས་ཏེ།  དོན་དེ་བརྡ་ཕྲད་པར་ཟད་དོ། ། འདྲ་བའི་དོན་བསྟན་པའི་ཕྱིར།  སེམས་ཅན་དམྱལ་བ་དག་ན་ཞེས་བྱ་བ་ལ་སོགས་པ་སྨོས་ཏེ།  དོན་དེ་བརྡ་ཕྲད་པར་ཟད་དོ། ། སེམས་ཅན་དམྱལ་བ་དག་ན་ཡུལ་ལ་སོགས་པ་ངེས་པ་བཞི་མ་བསྟན་པའི་{177b7} ཕྱིར་ཇི་ལྟར་གྲུབ་ཅེས་དྲིས་བ་དང།  བསྟན་བཅོས་བྱེད་པས་གྲུབ་པ་ཉིད་དུ་བསྟན་པའི་ཕྱིར།  དམྱལ་བའི་སྲུང་མ་ཞེས་བྱ་བ་ལ་སོགས་པ་སྨོས་ཏེ།  འདི་ལྟར་སེམས་ཅན་དམྱལ་བའི་སྲུང་མ་དང།  རྫ་མ་དང།  ཟངས་པོ་ཆེ་ལ་སོགས་བ་མེད་པར་ཡང་སེམས་ཅན་དམྱལ་བ་རྣམས་ཀྱིས་  {178a1} || ཡུལ་དང་དུས་ངེས་པར་མཐོང་ངོ། ། ཡུལ་དང་དུས་དེ་ན་འཁོད་པ་ཐམས་ཅད་ཀྱིས་བྱེ་བྲག་མེད་པར་མཐོང་སྟེ།  མེད་པར་ཡང་དེ་དག་གནོད་པ་རྣམ་པ་སྣ་ཚོགས་བྱེད་དོ་ཞེས་མདོར་བྱ་བའི་དོན་ཏོ། ། བསྟན་བཅོས་བྱེད་པས་མདོར་བྱས་པའི་དོན་དེ་རྒྱ་ཆེར་བསྟན་{178a2} བའི་ཕྱིར།  དཔེར་ན་སེམས་ཅན་དམྱལ་བ་པ་དག་ན་ཞེས་བྱ་བ་ལ་སོགས་པ་སྨོས་སོ། ། དཔེར་ན་སེམས་ཅན་དམྱལ་བའི་སེམས་ཅན་རྣམས་ཀྱི་སེམས་ཅན་དམྱལ་བ་དག་ན་སེམས་ཅན་དམྱལ་བའི་སྲུང་མ་ལ་སོགས་པ་ཡུལ་ངེས་པ་དང་དུས་ངེས་པར་གྲུབ་པ་བཞིན་ནོ། ། སོགས་པའི་{178a3} སྒྲས་བསྡུས་པའི་དོན་བསྟན་པའི་ཕྱིར།  ཁྱི་དང་བྱ་རོག་ཅེས་བྱ་བ་ལ་སོགས་པ་སྨོས་ཏེ།  ཁྱི་དང་བྱ་རོག་དང་ལྕགས་ཀྱི་རིལ་སོགས་པའོ་ཞེས་ཚིག་རྣམ་པར་སྦྱར་རོ། ། འདིར་ཡང་སོགས་པ་སྨོས་པ་ནི་རྫ་མ་དང་ཟངས་པོ་ཆེ་ལ་སོགས་པ་བསྡུའོ། ། སེམས་ངེས་པ་མེད་པ་བསྟན་པའི་ཕྱིར།  {178a4} ཐམས་ཅད་ཀྱིས་ཞེས་བྱ་བ་ལ་སོགས་པ་སྨོས་ཏེ།  དོན་དེ་ཡང་བརྡ་ཕྲད་པར་ཟད་དོ། ། བྱ་བ་བྱེད་པ་བསྟན་པའི་ཕྱིར།  དེ་དག་གིས་དེ་དག་ལ་གནོད་པ་ཡང་གྲུབ་སྟེ་ཞེས་བྱ་བ་སྟེ།  གནོད་པའི་བྱེ་བྲག་རྣམ་པ་སྣ་ཚོགས་བྱེད་པར་གྲུབ་བོ། ། འདི་ལ་འདིར་འགྱུར་ཏེ།  གལ་ཏེ་སེམས་{178a5} ཅན་དམྱལ་བའི་སྲུང་མ་ལ་སོགས་པ་དག་མེད་ན་ཡུལ་ལ་སོགས་པ་ངེས་པ་རྣམ་པ་བཞི་པོ་ཇི་ལྟར་འབྱུང་སྙམ་པ་ལ།  མེད་པར་ཡང་ཞེས་བྱ་བ་ལ་སོགས་པ་སྨོས་ཏེ།  དེ་དག་མེད་ཀྱང་རྣམ་པ་བཞི་པོ་དེ་གྲུབ་བོ། ། མེད་པ་དེ་ཇི་ལྟར་གྲུབ་སྙམ་པ་ལ།  རང་གི་ལས་ཀྱི་རྣམ་པར་{178a6} སྨིན་པ་མཚུངས་པ་ཞེས་བྱ་བ་ལ་སོགས་པ་སྨོས་ཏེ།  གང་དེ་དག་གིས་སྡུག་བསྔལ་མྱོང་བར་འགྱུར་བའི་ལས་སྔོན་བྱས་པ་ལས།  དེའི་རྣམ་པར་སྨིན་པ་གང་གི་ཚེ་མངོན་དུ་གྱུར་པ་དེའི་ཚེ་སེམས་ཅན་དམྱལ་བའི་སྲུང་མ་དང།  ཁྱི་དང་བྱ་རོག་དང།  ལྕགས་ཀྱི་རི་དང།  རྫ་མ་དང་ཟངས་པོ་ཆེ་{178a7} ལ་སོགས་པའི་རྣམ་བར་ཤེས་པ་ཉིད་བྱུང་ནས་སེམས་ཅན་དམྱལ་བའི་སྲུང་མ་ལ་སོགས་པའི་སྒྱུ་ཐབས་ཀྱིས་སེམས་ཅན་དམྱལ་བ་པ་དེ་དག་སྡུག་བསྔལ་གྱི་ཚོར་བ་སྐྱེད་དེ།  ཇི་སྙེད་ཀྱི་སྡུག་བསྔལ་མྱོང་བར་འགྱུར་བའི་ལས་དེ་བྱས་པར་གྱུར་པ་དེ་དག་ཐམས་ཅད་ཀྱི་རྣམ་པར་ཤེས་པ་ཉིད་  {178b1} སེམས་ཅན་དམྱལ་བའི་སྲུང་མ་ལ་སོགས་པའི་རྣམ་པ་བྱུང་ནས་སྡུག་བསྔལ་གྱི་ཚོར་བ་བསྐྱེད་ཀྱི་གཅིག་འགའ་ལ་ནི་མ་ཡིན་ནོ། ། དེ་ཡང་མི་སྲིད་པ་མ་ཡིན་ཏེ།  རྨི་ལམ་གྱི་གནས་ན་ཡང་མཐོང་བའི་ཕྱིར་རོ། ། དཔེར་ན་སྡིག་བ་ཅན་གྱི་རྨི་ལམ་ན་ལས་ཀྱི་དབང་གིས་རྣམ་པར་{178b2} ཤེས་པ་ཉིད་སེང་གེ་དང་སྟག་དང་ཆོམ་རྐུན་ལ་སོགས་པའི་རྣམ་པར་བྱུང་ན་སྡུག་བསྔལ་དང་སྐྲག་པ་དང་འདྲ་བ་ལ་སོགས་པ་སྐྱེད་པ་དེ་བཞིན་དུ་སེམས་ཅན་དམྱལ་བ་དག་ན་ཡང་དེ་སྲིད་དོ། ། དེའི་ཕྱིར་ད་ལྟར་དཔེ་ལ་ཡུལ་ལ་སོགས་པ་ངེས་པ་རོག་དེ་དག་སེམས་ཅན་རྣམས་སུ་མི་འདོད།  འདི་ལྟར་དེ་དག་ལ་ནི་{178b3} ཕྱིར; དེ་བཞིན་དུ་གཞན་ན་ཡང་ཞེས་བྱ་བ་ལ་སོགས་པ་སྨོས་ཏེ།  དེའི་དོན་ཡང་བཤད་ཟིན་ཏོ། ། བྱེ་བྲག་ཏུ་སྨྲ་བ་སེམས་ཅན་དམྱལ་བའི་སྲུང་མ་ལ་སོགས་པ་སེམས་ཅན་རྣམས་སུ་འདོད་དེ།  འདིར་དེ་ལྟར་བརྒལ་བའི་ཕྱིར།  ཅིའི་ཕྱིར་ཞེས་བྱ་བ་ལ་སོགས་པ་སྨོས་སོ། ། ཁྱེད་{178b4} ཅིའི་རྒྱུས་སེམས་ཅན་དམྱལ་བའི་སྲུང་མ་དང།  ཁྱི་དང་བྱ་རོག་དེ་དག་སེམས་ཅན་རྣམས་སུ་མི་འདོད།  འདི་ལྟར་དེ་དག་ལ་ནི་སེམས་ཅན་གྱི་ཚུལ་ཡང་སྣང།  སེམས་ཅན་བཞིན་དུ་་བ་ཡང་ཡོད།  འདི་ལྟར་དེ་དག་ལ་བློའི་བྱ་བ་སྤྱོད་པ་དང་རྗོད་པ་ཡང་སྣང་སྟེ་དེ་གཉིས་ཀྱིས་{178b5} གཞན་ལ་སེམས་ཡོད་པར་རྗེས་སུ་དཔག་ཏུ་རུང་ངོ། ། གལ་ཏེ་དེ་དག་ལ་སེམས་ཡོད་པར་དཔག་པ་དེ་གཉིས་མེད་ན་དེའི་ཚེ་སྲོག་ཆགས་གཞན་ལ་སེམས་ཡོད་པར་རྗེས་སུ་དཔག་པ་མེད་པར་འགྱུར་ཏེ།  དེ་གཉིས་འཁྲུལ་པ་ཡོད་པའི་ཕྱིར་རོ། ། སྲོག་ཆགས་སུ་མི་རིགས་པར་{178b6} བསྟན་པའི་ཕྱིར།  མི་རིགས་པའི་ཕྱིར་རོ་ཞེས་བྱ་བ་སྨོས་སོ། ། མི་རིགས་པ་དེ་ཉིད་བསྟན་པའི་ཕྱིར།  དེ་དག་ནི་ཞེས་བྱ་བ་ལ་སོགས་པ་སྨོས་ཏེ།  འདི་ལྟར་སེམས་ཅན་དམྱལ་བའི་སྲུང་མ་དག་ནི་སེམས་ཅན་དམྱལ་བ་པ་རྣམས་སུ་མི་རིགས་སོ། ། ཅིའི་ཕྱིར་མི་རིགས་ཤེ་ན།  {178b7} དེ་བཞིན་དུ་ཞེས་བྱ་བ་ལ་སོགས་པ་སྨོས་ཏེ།  ཇི་ལྟར་སེམས་ཅན་དམྱལ་བ་པའི་སེམས་ཅན་གཞན་དག་སེམས་ཅན་དམྱལ་བའི་སྡུག་བསྔལ་སོ་སོར་མྱོང་བ་དེ་བཞིན་དུ་དེ་དག་དེ་ལྟར་མི་མྱོང་བའི་ཕྱིར་རོ། ། གང་གནོད་པ་བྱེད་པ་དེ་གནོད་པར་བྱེད་པ་བཞིན་དུ་སྡུག་བསྔལ་མི་མྱོང་སྟེ།    {179a1} || གང་སེམས་ཅན་དམྱལ་བའི་སྲུང་མ་དེ་དག་ལ་གནོད་པ་བྱེད་པ་ནི་གང་ཡང་ཡོད་སྐད་མི་གྲག་གོ། ། གང་སེམས་ཅན་བཞིན་དུ་་བ་དེ་ཡང་རང་དགའ་སྟེ་མ་ཡིན་གྱི།  སེམས་ཅན་དམྱལ་བ་རྣམས་ཀྱི་ལས་ཀྱི་དབང་གིས་སོ། ། སེམས་ཅན་གྱི་ཚུལ་ནི་{179a2} གཟུགས་ཀྱི་ལུས་དང་རི་མོའི་ལུས་ལ་ཡང་ཡོད་དེ།  དེ་ལ་འདིར་འགྱུར་ཏེ།  གཅིག་ལ་གཅིག་གནོད་པ་བྱེད་དོ་སྙམ་པ་ལ།  གཅིག་ལ་གཅིག་ཅེས་བྱ་བ་ལ་སོགས་པ་སྨོས་སོ། ། གལ་ཏེ་སེམས་ཅན་དམྱལ་བ་པ་དང།  སེམས་ཅན་དམྱལ་བ་པའི་སྲུང་མ་དག་གཅིག་ལ་གཅིག།  {179a3} གནོད་པ་བྱེད་ན་ནི་འདི་དག་ནི་སེམས་ཅན་དམྱལ་བ་པ་དག་གོ། ། འདི་དག་ནི་སེམས་ཅན་དམྱལ་བའི་སྲུང་མ་དག་གོ་ཞེས་མ་འདྲེས་པར་རྣམ་པར་གཞག་པ་མེད་པར་འགྱུར་རོ། ། འདི་ལྟར་གང་དག་གནོད་པར་བྱ་བ་དེ་དག་ནི་སེམས་ཅན་དམྱལ་བ་པ་རྣམས་སུ་འདོད།  གང་དག་གནོད་{179a4} པར་བྱེད་པ་དེ་དག་ནི་སེམས་ཅན་དམྱལ་བའི་སྲུང་མ་དག་ཏུ་འདོད་ན་གཉིས་མཚུངས་པར་གནོད་པར་བྱ་བའམ།  གནོད་པ་བྱེད་པ་དེ་ཉིད་ཡིན་ན་ནི་གང་དག་ནི་སེམས་ཅན་དམྱལ་བ་པ།  གང་དག་ནི་སེམས་ཅན་དམྱལ་བ་པའི་སྲུང་མ་ཞེས་བྲྗོད་པར་བྱ།  འདིར་གཏན་ཚིགས་ལྷག་པར་{179a5} བྱད་གཟུགས་དང་བོང་ཚོད་དང་སྟོབས་མཚུངས་པ་དག་ནི་ཞེས་བྱ་བ་ལ་སོགས་པ་སྨོས་སོ། ། གལ་ཏེ་སེམས་ཅན་དམྱལ་བའི་སྲུང་མ་དག་ཀྱང་སེམས་ཅན་དམྱལ་བ་པར་གྱུར་པ་ན་ནི་དེའི་ཚེ་གཉི་ག་ཡང་བྱད་གཟུགས་མཚུངས་པ་དང།  བོང་ཚོད་མཚུངས་པ་དང།  སྟོབས་མཚུངས་{179a6} པར་འགྱུར་རོ། ། དེའི་ཕྱིར་སེམས་ཅན་དམྱལ་བའི་སྲུང་མ་དང་སེམས་ཅན་དམྱལ་བ་པ་བྱད་གཟུགས་དང་བོང་ཚོད་དང་སྟོབས་མཚུངས་པ་དག་ནི་གཅིག་ལ་གཅིག་གནོད་པ་བྱེད་ཀྱང་ཇི་ལྟར་གྲག་པ་རྣམ་པ་དེ་ལྟ་བུར་འཇིག་པར་མི་འགྱུར་རོ། ། གྲག་པ་ནི་འདི་སྐད་དུ་གྲག་སྟེ།  སེམས་ཅན་{179a7} དམྱལ་བ་པ་དག་སེམས་ཅན་དམྱལ་བའི་སྲུང་མ་མ་རུང་བའི་ཚུལ་ཅན་ལུས་བོང་ཆེ་བ་ཤིན་ཏུ་སྟོབས་དང་ལྡན་པ་རྣམས་མཐོང་ནས་ཕྱོགས་མཐའ་དག་མུན་པར་གྱུར་ཏེ།  དེ་དག་གི་ལུས་ཀྱང་བག་འཁུམས་མགོ་ཡང་རྨོངས་སོ། ། བྱད་གཟུགས་ནི་རྐང་ལག་གནས་པའི་ཁྱད་པར་རོ། ། བོང་ཚོད་  {179b1} ནི་ཞེང་གི་ཁྱད་པར་རོ། ། སྟོབས་ནི་ལུས་ཀྱི་མཐུའོ། ། འདིར་ཡང་རིགས་པ་གཞན་བསྟན་པའི་ཕྱིར།  ལྕགས་རབ་ཏུ་འབར་བའི་ས་གཞི་ཞེས་བྱ་བ་ལ་སོགས་པ་སྨོས་སོ། ། གལ་ཏེ་སེམས་ཅན་དམྱལ་བའི་སྲུང་མ་དག་ཀྱང་སེམས་ཅན་དམྱལ་བ་བ་བཞིན་དུ་སྡུག་བསྔལ་མྱོང་བ་ནི་{179b2} དེའི་ཚེ་ཚ་བའི་སྡུག་བསྔལ་ཡང་མི་བཟོད་ན་ཇི་ལྟར་དེ་ན་སེམས་ཅན་དམྱལ་བ་པ་རྣམས་ལ་གནོད་པ་བྱེད་པར་འགྱུར།  དེ་དག་རབ་ཏུ་འབར་བའི་ས་གཞི་དེ་ལ་འགྲེ་ལྡོག་སྟེ་རང་གི་ལུས་ཀྱང་འཛིན་པར་མི་ནུས་ན་གཞན་ལ་གནོད་པ་བྱེད་པ་ལྟ་ཅི་སྨོས།  གལ་ཏེ་སེམས་ཅན་དམྱལ་བ་{179b3} པར་མ་གྱུར་དུ་ཟིན་ཀྱང་ཡི་དགས་སམ་དུད་འགྲོ་ཞིག་ནི་ཡིན་ནོ་སྙམ་པ་ལ།  དེའི་ཕྱིར།  སེམས་ཅན་དམྱལ་བ་པ་མ་ཡིན་པ་དག་ཅེས་བྱ་བ་ལ་སོགས་པ་སྨོས་སོ། ། གལ་ཏེ་སེམས་ཅན་དམྱལ་བ་པའི་སྲུང་མ་དག་ཀྱང་ཁྱི་དང་བྱ་རོག་རྣམས་སེམས་ཅན་དམྱལ་བ་པར་མི་འདོད་ན།  {179b4} དེའི་ཚེ་དུད་འགྲོ་དང་ཡི་དགས་ཀྱི་བྱེ་བྲག་ཡི་དགས་དང་དུད་འགྲོའི་འགྲོ་བས་བསྡུས་པ་དེ་དག་སེམས་ཅན་དམྱལ་བའི་འགྲོ་བར་འབྱུང་བར་ག་ལ་འགྱུར།  བྱེ་བྲག་ཏུ་སྨྲ་བས་དེའི་ལན་གདབ་པའི་ཕྱིར།  འོ་ན་དུད་འགྲོ་དག་ཀྱང་ཞེས་བྱ་བ་ལ་སོགས་པ་སྨོས་སོ། ། གལ་ཏེ་འགྲོ་བ་{179b5} གཞན་གྱིས་བསྡུས་པ་དག་འགྲོ་བ་གཞན་དུ་མི་འབྱུང་ན་མཐོ་རིས་སུ་གླང་པོ་ཆེས་སྲུང་གི་བུ་དང།  ངང་མོ་དང་ཁྲུང་ཁྲུང་དང་ནེ་ཚོ་དང་རི་སྐེགས་ལ་སོགས་པ་ཇི་ལྟར་འབྱུང་སྟེ།  དེར་ཇི་ལྟར་འབྱུང་བ་དེ་བཞིན་དུ་སེམས་ཅན་དམྱལ་བར་ཡང་དུད་འགྲོའི་བྱེ་བྲག་ཁྱི་དང་བྱ་རོག་ལ་སོགས་པ་དང།  ཡི་{179b6} དགས་ཀྱི་བྱེ་བྲག་དམྱལ་བའི་སྲུང་མ་འབྱུང་བར་འགྱུར་ཞེ་ན།  དེ་བསལ་བའི་ཕྱིར།  ཇི་ལྟར་དུད་འགྲོ་མཐོ་རིས་སུ་ཞེས་བྱ་བ་ལ་སོགས་པ་སྨོས་སོ། ། ཇི་ལྟར་དུད་འགྲོ་མཐོ་རིས་སུ་བྱུང་བ་དེ་ལྟར་སེམས་ཅན་དམྱལ་བ་པར་འབྱུང་བར་མི་རིགས་སོ། ། ཡི་དགས་རྣམས་ཀྱང་མ་ཡིན་ཏེ།  {179b7} འདི་ལྟར་དུད་འགྲོ་དང་ཡི་དགས་དེ་དག་གིས་སེམས་ཅན་དམྱལ་བ་ན་ཡོད་པའི་སྡུག་བསྔལ་མི་མྱོང་ངོ་ཞེས་མདོར་བྱས་པའི་དོན་ཏོ། ། བསྟན་བཅོས་བྱེད་པས་དཔེ་དང་མི་འདྲ་བར་བསྟན་པའི་ཐབས་ཀྱིས་མདོར་བྱས་པའི་དོན་བསྟན་པའི་ཕྱིར།  དུད་འགྲོ་གང་དག་ཅེས་བྱ་བ་ལ་སོགས་{180a1} || བ་སྨོས་སོ། ། དེ་ནི་དུད་འགྲོ་མཐོ་རིས་སུ་སྐྱེ་བ་དག་དང་མི་མཚུངས་ཏེ།  འདི་ལྟར་དུད་འགྲོ་གང་དག་མཐོ་རིས་སུ་འབྱུང་བ་དེ་དག་ནི་མཐོ་རིས་ཀྱི་སྣོད་ཀྱི་འཇིག་རྟེན་ན་བདེ་བ་གང་དག་ཡོད་པ་དེ་ལས་གང་གིས་གྲུབ་པ་དེས་མཐོ་རིས་དེར་འབྱུང་བ་དག་མཐོ་རིས་{180a2} ཀྱི་སྣོད་ཀྱི་འཇིག་རྟེན་ན་ཡོད་པའི་བདེ་བ་སོ་སོར་མྱོང་ངོ། ། གལ་ཏེ་དུད་འགྲོ་དེ་དག་ཇི་ལྟར་ལྷའི་བདེ་བ་མྱོང་ཞེ་ན།  སྨྲས་པ།  ངང་ཚུལ་ངན་པས་ནི་དེ་དག་དུད་འགྲོའི་འགྲོ་བ་འཐོབ་བོ། ། སྦྱིན་པས་ནི་ལྷའི་ལོངས་སྤྱོད་འཐོབ་སྟེ་འགལ་བ་མེད་དོ། ། འདི་ལྟར་འདོད་པ་ན་སྤྱོད་པའི་{180a3} ལས་འགྲོ་བ་གཞན་ལ་ཡང་དེ་ལས་གཞན་པའི་རྐྱེན་གྱི་དབང་གིས་འགྲོ་བ་གཞན་དུ་རྣམ་པར་སྨིན་ཏེ།  སྣོད་ཀྱི་འཇིག་རྟེན་ན་བདེ་བ་མྱོང་བར་འགྱུར་བའི་ཞེས་བྱ་བ་ནི་སྣོད་ཀྱི་འཇིག་རྟེན་དུ་བདེ་བ་ཞེས་བྱ་བར་ཚིག་རྣམ་པར་སྦྱར་རོ། ། ལས་གང་གིས་སྣོད་ཀྱི་འཇིག་རྟེན་ན་བདེ་བ་{180a4} གྲུབ་པ་དེ་སྣོད་ཀྱི་འཇིག་རྟེན་ན་བདེ་བ་མྱོང་བར་འགྱུར་བ་ཞེས་བྱའོ། ། དེ་ན་ཡོད་པའི་བདེ་བ་ཞེས་བྱ་བ་ལ།  དེ་ཞེས་བྱ་བ་ནི་མཐོ་རིས་ཀྱི་སྣོད་ཀྱི་འཇིག་རྟེན་དང་སྦྱར་ཏེ།  དེའི་ཕྱིར་མཐོ་རིས་ཀྱི་སྣོད་ཀྱི་འཇིག་རྟེན་ན་ཡོད་པ་ཞེས་བསྟན་པར་འགྱུར་རོ། ། དེ་ལ་འདིར་འགྱུར་ཏེ།  སེམས་ཅན་{180a5} དམྱལ་བར་ཡང་དེ་ལྟར་འགྱུར་རོ་སྙམ་པ་ལ་དེའི་ཕྱིར་སེམས་ཅན་དམྱལ་བའི་སྲུང་མ་ལ་སོགས་པ་དག་ནི་ཞེས་བྱ་བ་ལ་སོགས་པ་སྨོས་སོ། ། ཇི་ལྟར་གླང་པོ་ཆེས་སྲུང་གི་བུ་ལ་སོགས་པ་མཐོ་རིས་ན་བདེ་བ་མྱོང་བ་དེ་བཞིན་དུ་སེམས་ཅན་དམྱལ་བ་པའི་སྲུང་མ་ལ་སོགས་པས་སེམས་ཅན་དམྱལ་{180a6} བའི་སྣོད་ཀྱི་འཇིག་རྟེན་ན་ཡོད་པའི་སྡུག་བསྔལ་མི་མྱོང་ངོ། ། དེའི་ཕྱིར་དེ་ལྟར་དཔེ་དང་མི་འདྲ་བར་བསྟན་ནས་མཇུག་བསྡུ་བའི་ཕྱིར།  དེའི་ཕྱིར་དུད་འགྲོ་དག་དེར་ཞེས་བྱ་བ་ལ་སོགས་པ་སྨོས་སོ། ། གང་གི་ཕྱིར་སེམས་ཅན་དམྱལ་བའི་སྲུང་མ་ལ་སོགས་པ་སེམས་ཅན་དམྱལ་བའི་སྡུག་{180a7} བསྔལ་མི་མྱོང་བ་དེའི་ཕྱིར་སེམས་ཅན་དམྱལ་བ་དེར་དུད་འགྲོ་འབྱུང་བར་མི་རིགས་ཏེ།  ཡི་དགས་རྣམས་ཀྱང་མ་ཡིན་ན་ཞེས་བྱ་བར་གནས་སོ། ། དེ་ལྟར་བྱེ་བྲག་ཏུ་སྨྲ་བ་ལན་མེད་པར་བྱས་པ་དང་མདོ་སྡེ་བས་ལན་གདབ་པའི་ཕྱིར།  སེམས་ཅན་དམྱལ་བ་དེ་དག་གི་ཞེས་བྱ་བ་ལ་སོགས་པ་སྨོས་{180b1} སོ; | གལ་ཏེ་སེམས་ཅན་དམྱལ་བའི་སྲུང་མ་ལ་སོགས་པ་དེ་དག་སེམས་ཅན་གྱི་གྲངས་སུ་མི་རུང་ན་ཡང།  སེམས་ཅན་དམྱལ་བ་དེ་དག་གི་ལས་ཀྱི་རྣམ་པར་སྨིན་པའི་དབང་གིས་སེམས་ཅན་དམྱལ་བ་དེར་ས་ལ་སོགས་པ་འབྱུང་བའི་བྱེ་བྲག་དག་འབྱུང་སྟེ།  སེམས་ཅན་དམྱལ་བ་པ་{180b2} དག་པས་མདོག་གནག་པ་དང།  སེར་བ་ལ་སོགས་པ་དང།  ལག་པ་དང།  རྐང་པ་ལ་སོགས་པ་འཇིགས་སུ་རུང་བའི་བྱད་གཟུགས་དང།  ལུས་ཀྱི་ཁྲུ་ལ་སོགས་པའི་བོང་ཚོད་དང།  སེམས་ཅན་དམྱལ་བ་ཟིལ་གྱིས་གནོན་པའི་སྟོབས་ཀྱི་བྱེ་བྲག་གང་གིས་སེམས་ཅན་དམྱལ་{180b3} བའི་སྲུང་མ་ལ་སོགས་པའི་མིང་ཐོབ་བོ། ། གལ་ཏེ་སེམས་མེད་ན་ཇི་ལྟར་སེམས་ཅན་བཞིན་དུ་་ཞེ་ན།  དེའི་ཕྱིར་གང་ལག་པ་བརྐྱང་བ་ལ་སོགས་པ་སྨོས་སོ། ། སེམས་མེད་དུ་ཟིན་ཀྱང་སེམས་ཅན་དམྱལ་བ་པའི་སེམས་ཅན་རྣམས་ཀྱི་དབང་གིས་དེ་དག་གང་གི་ཕྱིར་མཚོན་ཆ་{180b4} འདེབས་པར་གཟས་པ་དང།  སོ་གཙིགས་པ་དང།  མིག་བགྲད་པ་དང།  སྨིན་མ་ཁྲོ་གཉེར་དུ་བསྡུས་པ་དང།  གཏུམ་པའི་བྱ་བ་སྣ་ཚོགས་བྱེད་པར་སྣང་བ་དེ་ལྟ་དེ་ལྟ་བུར་ཡང་འགྱུར་རོ། ། ཅིའི་ཕྱིར་དེ་དག་སྣང་ཞེ་ན།  འཇིགས་པ་བསྐྱེད་པའི་ཕྱིར་ཞེས་བྱ་བ་སྨོས་སོ། ། སེམས་ཅན་{180b5} དམྱལ་བ་པ་རྣམས་འཇིགས་པའི་སྡུག་བསྔལ་བསྐྱེད་པའི་ཕྱིར་དེ་དག་དེ་ལྟ་བུར་འགྱུར་ཏེ།  སེམས་ཅན་དམྱལ་བ་པ་དག་གིས་འཇིགས་པ་སྡུག་བསྔལ་བ་མྱོང་བར་འགྱུར་བའི་ལས་གང་སྔོན་བྱས་པ་ཉིད་ཀྱི་རྣམ་པར་སྨིན་པ་ཡིན་ནོ། ། ཇི་ལྟར་འབྱུང་བའི་བྱེ་བྲག་རྣམས་དེ་ལྟར་གྱུར་ནས་སེམས་{180b6} ཅན་དམྱལ་བ་པ་དག་ལ་དེ་ལྟར་འཇིགས་པར་བྱེད་པ་དང།  གནོད་པ་བྱེད་པའི་དཔེ་འདིར།  དཔེར་ན་ལུག་ལྟ་བུའི་རི་དག་ཅེས་བྱ་བ་ལ་སོགས་པ་སྨོས་སོ། ། དཔེར་ན་སེམས་ཅན་གྱི་གྲངས་སུ་མ་གཏོགས་ཀྱང་ལས་ཀྱི་དབང་གིས་ལུག་ལྟ་བུའི་རི་དག་འོང་བ་དང་འགྲོ་བས་སེམས་ཅན་{180b7} དམྱལ་བ་པ་དག་ལ་འཇིགས་པར་བྱེད་པ་དང།  གནོད་པར་བྱེད་པ་ལྟ་བུའོ། ། ཡང་དཔེར་ན་ལྕགས་ཀྱི་ཤལ་མ་ལིའི་ནགས་ཚལ་ལ་སེམས་ཅན་དམྱལ་བ་དག་ཡར་འཛེགས་པའི་ཚེ་ནི་ཚེར་མ་ཁ་ཐུར་དུ་ལྟ།  སླར་འབབ་པའི་ཚེ་ནི་གྱེན་དུ་ལྟ་སྟེ།  དེ་ལ་གནོད་པར་བྱེད་ཀྱང་དེ་དག་ལ་སེམས་{181a1} || ཡོད་པ་མ་ཡིན་ལ།  སེམས་ཡོད་པ་ལྟ་བུར་བྱ་བ་བྱེད་པ་དག་སྣང་བ་ལྟ་བུའོ། ། དེ་ལ་འདིར་འགྱུར་ཏེ།  ལུག་ལྟ་བུའི་རི་ལ་སོགས་པ་ཡོད་པ་མ་ཡིན་ནོ་སྙམ་པ་ལ།  དེ་དག་ནི་མེད་པ་མ་ཡིན་ནོ་ཞེས་བྱ་བ་སྨོས་ཏེ།  གང་ལུག་ལྟ་བུའི་རི་ལ་སོགས་པ་དེ་དག་ནི་མེད་པ་{181a2} མ་ཡིན་པར་ཤེས་པར་བྱ་སྟེ།  འདི་ལྟར་དེ་དག་ནི་མིག་ལ་སོགས་པ་མཉམ་པའི་གཟུང་བའོ་ཞེས་ཕྱོགས་སྔ་མའོ། ། བསྟན་བཅོས་བྱེད་པས་འདིར།  གལ་ཏེ་དེའི་ལས་ཀྱིས་དེར་ཞེས་བྱ་བ་ལ་སོགས་པ་སྨོས་སོ། ། གལ་ཏེ་སེམས་ཅན་དམྱལ་བའི་སེམས་ཅན་དེ་དག་གི་ལས་ཀྱི་དབང་{181a3} གིས་སེམས་ཅན་དམྱལ་བ་དེར་འབྱུང་བ་དག་མདོག་དང་བྱད་གཟུགས་དང་བོང་ཚོད་དང་སྟོབས་དང་ལྡན་པ་དེ་ལྟ་བུ་དག་འབྱུང་བར་འདོད་ན་ལག་པ་འདེགས་པ་ལ་སོགས་པའི་བྱ་བ་བྱེད་པ་པོར་འགྱུར་བ་དག་ཏུ་ཡང་འདོད་ན།  དེའི་ཚེ་རྣམ་པར་ཤེས་པ་ཉིད་སེམས་ཅན་དམྱལ་བའི་སྲུང་མ་ལ་{181a4} སོགས་པའི་རྣམ་པ་དག་དང།  ལག་པ་ལ་སོགས་པ་འདེགས་པའི་བྱ་བ་བྱེད་པར་འབྱུང་བ་དང་འགྱུར་བར་ཅིས་མི་འདོད་ཅེས་མདོར་བྱས་པའི་དོན་ཏོ། ། རྣམ་པར་ཤེས་པ་གྱུར་པས་ཁོང་དུ་ཆུད་པར་དཀའ་བས་དེ་ཉིད་རྣམ་པར་གྲོལ་བའི་ཕྱིར།  དེའི་ལས་རྣམས་ཀྱིས་རྣམ་པར་ཤེས་པ་ཉིད་{181a5} ཅེས་བྱ་བ་ལ་སོགས་པ་སྨོས་སོ། ། དཔེར་ན་སེམས་ཅན་དམྱལ་བའི་སེམས་ཅན་གྱི་ལས་ཀྱི་དབང་གིས་འབྱུང་བ་རྣམས་འབྱུང་བ་དང་འགྱུར་བར་ཡང་འདོད་ན།  དེ་བཞིན་དུ་རྣམ་པར་ཤེས་པ་ཉིད་དུ་ཅིའི་ཕྱིར་མི་འདོད་ལ།  ཁྱོད་ཅིའི་ཕྱིར་འབྱུང་བ་རྣམས་སུ་རྟོག།  དེ་དག་ལ་ནི་མཐུ་ལྷག་མ་ཅི་{181a6} ཡང་མི་སྣང་ངོ། ། འདི་ལྟར་དེ་དག་ཡོད་པ་ཙམ་གྱིས་འཇིགས་པ་ལ་སོགས་པ་མི་སྐྱེད་ཀྱི།  དམིགས་ནས་འཇིགས་བསྐྱེད་ཀྱི།  དམིགས་པ་ནི་དེ་དག་གི་དེའི་རྣམ་པར་ཤེས་པ་འབྱུང་བའོ། ། དེ་བས་ན་གཉི་ག་ལ་གྲུབ་པའི་རྣམ་པར་ཤེས་པ་འགྱུར་བར་བརྟག་པ་ནི་རིགས་ཀྱི་འབྱུང་བ་{181a7} རྣམས་ནི་མ་ཡིན་ཏེ།  གཉི་ག་ལམ་གྲུབ་པའི་ཕྱིར་རྨི་ལམ་ལ་སོགས་པའི་གནས་ན་ཡང་རྣམ་པར་ཤེས་པ་ཉིད་ཚིག་དང་ལུས་དང་་བ་ལ་སོགས་པ་རྣམ་པ་སྣ་ཚོགས་ཀྱི་རྣམ་པར་གྱུར་པར་གྲགས་ཀྱི།  འབྱུང་བ་རྣམས་ནི་གང་དུ་ཡང་མ་གྲགས་ཏེ།  ལས་རྣམས་ཀྱི་རྣམ་པར་ཤེས་པ་  {181b1} ཉིད་གྱུར་པར་རིགས་སོ། ། འདིར་ཡང་གཏན་ཚིགས་ལྷག་པར་ཡང། ། གཞན་ན་ལས་ཀྱི་བག་ཆགས་ལ་ཞེས་བྱ་བ་ལ་སོགས་པ་སྨོས་སོ། ། ལས་ཀྱིས་སྐྱེད་པའི་བག་ཆགས་ནི་རྣམ་པར་ཤེས་པའི་རྒྱུད་གཞན་ལ་གནས་ལ་དེའི་འབྲས་བུ་ནི་གཞན་དུ་ཕྱི་རོལ་གྱི་འབྱུང་བ་གྱུར་པར་རྟོག་ན་{181b2} རྣམ་པར་ཤེས་པའི་རྒྱུད་གང་ལ་བག་ཆགས་དེ་གནས་པ་དེ་ཉིད་ལ་དེའི་འབྲས་བུ་མི་འདོད་པའི་རྒྱུ་འདིར་བྲྗོད་དགོས་སོ་ཞེས་མདོར་བྱས་པའི་དོན་ཏོ། ། བསྟན་བཅོས་བྱེད་པས་མདོར་བྱས་པའི་དོན་དེ་རྒྱ་ཆེར་བསྟན་པའི་ཕྱིར།  སེམས་ཅན་དམྱལ་བ་རྣམས་ཀྱི་ལས་གང་གིས་ཞེས་བྱ་བ་{181b3} ལ་སོགས་པ་སྨོས་སོ། ། སེམས་ཅན་དམྱལ་བའི་སེམས་ཅན་རྣམས་ཀྱི་ལས་གང་གིས་མདོག་དང་བྱད་གཟུགས་ལ་སོགས་པའི་ཁྱད་པར་འབྱུང་བ་རྣམས་ལས་བྱུང་བ་དང།  ལག་པ་ལ་སོགས་པ་འདེགས་པ་བྱ་བའི་མཚན་ཉིད་དུ་གྱུར་པ་ཡང་རྟོག་པའི་ལས་དེའི་བག་ཆགས་གང་ཡིན་པ་{181b4} དེ་སེམས་ཅན་དེ་དག་གི་རྣམ་པར་ཤེས་པའི་རྒྱུ་དེ་ལ་གནས་ཀྱི་འབྱུང་བ་ལ་སོགས་པ་གཞན་ལ་ནི་མ་ཡིན་ཏེ།  ལས་ཀྱི་དུས་ན་སེམས་ཅན་དམྱལ་བ་རྣམས་ཀྱི་འབྱུང་བ་དག་མེད་པའི་ཕྱིར་རོ། ། གང་གི་ཚེ་རྣམ་པར་ཤེས་པའི་རྒྱུད་ལ་བག་ཆགས་གནས་པ་དེའི་ཚེ་གང་ལ་དེ་གནས་པ་དེ་ཉིད་ལ་{181b5} དེའི་དེ་འདྲ་བར་རྣམ་པར་ཤེས་པ་གྱུར་པར་རིགས་ན།  དེ་ཡང་དེར་ཁྱོད་མི་འདོད་དེ།  འབྱུང་བ་ལ་སོགས་པ་གང་ན་བག་ཆགས་མེད་པ་དེར་དེའི་འབྲས་བུར་རྟོགས་པ་འདི་ལ་གཏན་ཚིགས་ཅི་ཡོད།  འཇིག་རྟེན་ན་ནི་གང་དུས་བོན་བཏབ་པ་དེར་འབྲས་བུ་འབྱུང་སྟེ།  ཞིང་ལ་ས་བོན་བཏབ་ལ་{181b6} རིའི་རྩེ་མོར་འབྲས་བུ་འབྱུང་བ་ནི་མེད་དོ། ། འདིར་མདོ་སྡེ་བས་ལུང་གི་གཏན་ཚིགས་ཡོད་དེ་ཞེས་བྱ་བ་ལ་སོགས་པ་སྨྲས་པ་ནི་བག་ཆགས་གཞན་ན་ཡོད་ལ་འབྲས་བུ་གཞན་ན་མེད་ན་ཞེས་བྱ་བའི་གཏན་ཚིགས་ནི་ལུང་སྟེ།  འདི་ལྟར་གལ་ཏེ་རྣམ་པར་ཤེས་པ་ཉིད་གཟུགས་ལ་སོགས་པའི་{181b7} དོན་དུ་སྣང་གི་གཟུགས་ལ་སོགས་པའི་དོན་གུད་ན་མེད་ན་ནི།  དེའི་ཚེ་གཟུགས་ལ་སོགས་པ་སྐྱེ་མཆེད་བཅུ་པོ་དག་ཡོད་པར་བཅོམ་ལྡན་འདས་ཀྱིས་གསུངས་པར་མི་འགྱུར་རོ། ། དེ་བས་ན་ཁ་ཅིག་གིས་ཇི་ལྟར་འདིར་བཅོམ་ལྡན་འདས་ཀྱི་བཀའ་ཚད་མར་བྱས་ཏེ།  གཟུགས་ལ་སོགས་{182a1} || པའི་རྒྱུ་རྣམ་པར་ཤེས་པ་ལས་གུད་ན་ཡོད་པར་ཁོང་དུ་ཆུད་པ་དེ་བཞིན་དུ།  སེམས་ཅན་དམྱལ་བ་དག་ན་ཡང་སེམས་ཅན་དམྱལ་བ་པའི་སེམས་ཅན་རྣམས་ཀྱི་མིག་ལ་སོགས་པའི་རྣམ་པར་ཤེས་པའི་རྒྱུ་འབྱུང་བའི་ཁྱད་པར་དག་ལོགས་ཤིག་ན་ཡོད་པར་རྟོགས་ཏེ།  {182a2} འདི་ནི་དབང་གི་འབྲས་བུ་ཡིན་གྱི་རྣམ་པར་སྨིན་པ་དང་རྒྱུ་མཐུན་པའི་འབྲས་བུ་ནི་མ་ཡིན་ནོ། ། རྣམ་པར་སྨིན་པ་དང་རྒྱུ་མཐུན་པའི་འབྲས་བུ་ནི་ས་བོན་དང་ཡུལ་མཚུངས་པར་འདོད་དོ། ། དབང་གི་འབྲས་བུ་ནི་ས་བོན་དང་ཡུལ་མཚུངས་མི་མཚུངས་འགལ་བ་མེད་དེ།  དཔེར་ན་རྒྱུད་གཞན་གྱི་རྣམ་པར་{182a3} རིག་པའི་དབང་གིས་རྒྱུད་གཞན་ལ་རྣམ་པར་རིག་པ་དག་འབྱུང་སྟེ།  དེ་དག་ནི་དབང་གི་འབྲས་བུ་ཡང་ཡིན་ལ་ཡུལ་ཐ་དད་པ་ཡང་ཡིན་པ་དེ་བཞིན་དུ་འབྱུང་བ་གྱུར་བ་ཐ་དད་པ་ཡང་འབྱུང་སྟེ།  དབང་གི་འབྲས་བུ་ཡིན་པའི་ཕྱིར་རོ། ། འདི་ལྟར་བསྟན་བཅོས་བྱེད་པས།  འདི་ནི་གཏན་ཚིགས་མ་ཡིན་ཏེ་ཞེས་{182a4} བྱ་བ་ལ་སོགས་པ་སྨོས་སོ། ། ལུང་འདི་ནི་གཟུགས་ལ་སོགས་པ་ཕྱི་རོལ་ཡོད་པར་རབ་ཏུ་བསྒྲུབ་པའི་གཏན་ཚིགས་མ་ཡིན་ཏེ།  འདི་ལྟར་གཟུགས་ལ་སོགས་པ་བསྟན་པས་འདུལ་བའི་སྐྱེ་བོའི་ཆེད་དུ་གཟུགས་ལ་སོགས་པའི་སྐྱེ་མཆེད་རྣམས་ཡོད་པ་སྐད་དུ་དགོངས་པའི་དབང་གིས་གསུངས་ཏེ།  དཔེར་ན་རྫུས་ཏེ་བྱུང་{182a5} བའི་སེམས་ཅན་ཡོད་དོ་ཞེས་བྱ་བ་བཞིན་ནོ་ཞེས་མདོར་བྱས་པའི་དོན་ཏོ། ། བསྟན་བཅོས་བྱེད་པས་དཔེ་རྣམ་པར་དགོལ་བའི་ཕྱིར།  དཔེར་ན་བཅོམ་ལྡན་འདས་ཀྱིས་ཞེས་བྱ་བ་ལ་སོགས་པ་སྨོས་ཏེ།  བཅོམ་ལྡན་འདས་ཀྱིས་རྫུས་ཏེ་བྱུང་བའི་སེམས་ཅན་ཡོད་དོ་ཞེས་གསུངས་པ་དེ་ཡང་དགོངས་པའི་དབང་གིས་གསུངས་{182a6} པའོ; | དགོངས་པ་དེ་ཉིད་བསྟན་པའི་ཕྱིར།  ཕྱི་མ་ལ་སེམས་ཀྱི་རྒྱུད་རྒྱུན་མི་འཆད་པ་ཞེས་བྱ་བ་ལ་སོགས་པ་སྨོས་ཏེ།  སེམས་ཅན་ཁ་ཅིག་འདི་སྐད་དུ་བདག་འདི་ནི་འདི་ཉིད་དུ་རྒྱུན་ཆད་དེ་འཇིག་རྟེན་ཕ་རོལ་མེད་དོ་ཞེས་འཛེར་ཏེ།  དེ་དག་ཆད་པར་ལྟ་བ་དེས་དགེ་བ་དང་མི་དགེ་བའི་ལས་དང་དེའི་འབྲས་བུ་ལ་སྐུར་པ་{182a7} འདེབས་ཤིང་ཅི་དགའ་དགུར་བྱེད་དོ། ། དེ་བས་ན་ལྟ་བ་ངན་པའི་དྲི་མ་དེ་བཀྲུ་བའི་ཕྱིར་ཤི་བའི་འོག་ཏུ་བར་མདོའི་སྲིང་པ་ཞེས་བྱ་བ་སེམས་ཀྱི་རྒྱུད་རྒྱུན་མི་འཆད་པ་ལ་དགོངས་ཏེ།  བཅོམ་ལྡན་འདས་ཀྱིས་རྫུས་ཏེ་བྱུང་བའི་སེམས་ཅན་ཡོད་དོ་ཞེས་གསུངས་སོ། ། ཕྱི་མ་ལ་ཞེས་བྱ་བ་ནི་འཇིག་རྟེན་ཕ་རོལ་དུའོ། ། དགོངས་{182b1} ནས་ཞེས་བྱ་བ་ནི་ལྡེམ་པོར་དགོངས་པའོ། ། བཅོམ་ལྡན་འདས་ཀྱིས་དགོངས་པ་འདིས་རྫུས་ཏེ་བྱུང་བའི་སེམས་ཅན་ཡོད་དོ་ཞེས་གསུངས་ཀྱི།  ཡང་དག་པའི་དོན་དུ་ན་བདག་ནི་མེད་དོ་ཞེས་བྱ་བར་འདི་ཅི་མངོན་སྙམ་པ་ལ།  དེའི་ཕྱིར་འདི་ནི་བདག་གམ་སེམས་ཅན་མེད་ཅེས་བྱ་བ་ལ་སོགས་པ་སྨོས་ཏེ།  བཅོམ་ལྡན་འདས་{182b2} ཀྱིས་དེ་མ་ཡིན་པ་གཞན་ནས་ཆོས་ཡོད་པ་འདི་དག་ནི་རྒྱུ་དང་བཅས་པ་དག་སྟེ།  འདི་ལ་བདག་གམ་སེམས་ཅན་ནི་མེད་དོ་ཞེས་གསུངས་པའི་མདོ་སྡེ་དེ་ཚད་མར་བྱས་ནས་རྫུས་ཏེ་བྱུང་བའི་སེམས་ཅན་ཡོད་པ་སྐད་དུ་བསྟན་པ་ནི་དགོངས་པ་ཡིན་པར་ངེས་སོ། ། ཅིའི་ཕྱིར་མདོ་སྡེ་སྔ་མ་ནི་དགོངས་པ་ཡིན་ལ་ཕྱི་མ་ནི་མ་ཡིན་{182b3} ཞེ་ན; སྨྲས་པ།  འདི་ལྟར་བདག་ནི་རྟག་པའི་ཕྱིར་རྫུས་ཏེ་བྱུང་བ་མ་ཡིན་ཏེ།  འདི་ལྟར་གང་སྐྱེ་བར་འོས་པ་དེ་རྫུས་ཏེ་བྱུང་བ་ཞེས་བྱ་ན།  བདག་ནི་རྟག་པའི་ཕྱིར་མ་ཡིན་ན་དེ་ལས་འོས་པ་ཞེས་བྱ་བ་དེ་ལ་ག་ལ་ཡོད།  དེ་དག་གིས་ན་འདི་རྫུས་ཏེ་བྱུང་བར་འགྱུར།  དེ་ལྟར་དཔེ་བཤད་ནས་དངོས་དང་སྦྱར་བའི་{182b4} ཕྱིར།  དེ་བཞིན་དུ་བཅོམ་ལྡན་འདས་ཀྱིས་གཟུགས་ལ་སོགས་པའི་སྐྱེ་མཆེད་ཡོད་པར་ཞེས་བྱ་བ་ལ་སོགས་པ་སྨོས་ཏེ།  དཔེར་ན་ཆད་པར་སྨྲ་བའི་སྐྱེ་བོའི་ཆེད་དུ་རྫུས་ཏེ་བྱུང་བའི་སེམས་ཅན་ཡོད་དོ་ཞེས་གསུངས་པ་དེ་བཞིན་དུ་གཟུགས་ལ་སོགས་པ་བསྟན་པས་འདུལ་བའི་སྐྱེ་བོའི་ཆེད་དུ་གཟུགས་ལ་{182b5} སོགས་པའི་སྐྱེ་མཆེད་རྣམས་ཡོད་དོ་ཞེས་གསུངས་ཏེ།  བཀའ་དེ་ནི་དགོངས་པ་ཅན་ནོ། ། དེ་ནི་འདི་སྐད་དུ་བཀའ་དེ་ནི་དྲང་བའི་དོན་ཡིན་གྱི་ངེས་པའི་དོན་མ་ཡིན་ནོ་ཞེས་བསྟན་པར་འགྱུར་རོ། ། ཆེད་དུ་ཞེས་བྱ་བ་ནི་དོན་ནོ།  མདོ་སྡེ་པས་མདོ་སྡེ་འདིའི་དགོངས་པ་འདྲི་བའི་ཕྱིར།  འདིར་ཅི་ལས་དགོངས་ཞེས་བྱ་བར་{182b6} slos སོ; | ཇི་ལྟར་སེམས་ཀྱི་རྒྱུད་རྒྱུན་མི་འཆད་པ་ལ་དགོངས་ནས་རྫུས་ཏེ་བྱུང་བའི་སེམས་ཅན་ཡོང་དོ་ཞེས་གསུངས་པ་དེ་བཞིན་དུ་འདིར་གཟུགས་ལ་སོགས་པའི་སྐྱེ་མཆེད་ཡོད་པར་ཡང་ཅི་ལས་དགོངས་ཏེ་གསུངས་པ་བྲྗོད་དགོས་སོ། ། བསྟན་བཅོས་བྱེད་པའི་དགོངས་པ་བསྟན་པའི་ཕྱིར།  རང་གིས་བོན་གང་{182b7} ལས་སུ་ཞེས་བྱ་བ་ལ་སོགས་པ་སྨོས་སོ། ། རྣམ་པར་རིག་པའི་བག་ཆགས་ཞེས་བྱ་བ་རང་གི་ས་བོན་གང་ལས་མིག་གི་རྣམ་པར་ཤེས་པ་ལ་སོགས་པའི་རྣམ་པར་རིག་པ་བྱུང་བ་དང་སྣང་བ་འབྱུང་བ་གང་ཡིན་པ་ས་བོན་དང་སྣང་བ་དེ་དག་ནི་རྣམ་པར་རིག་པ་དེའི་ནང་དང་ཕྱིའི་སྐྱེ་མཆེད་དུ་བཅོམ་ལྡན་འདས་ཀྱིས་གསུངས་སོ་ཞེས་  {183a1} || མདོར་བྱས་པའི་དོན་ཏོ། ། དེ་ལྟར་རེ་ཞིག་སྐྱེ་མཆེད་བཅུ་རྣམ་པར་གཞག་པའི་ཕྱིར་བསྟན་ཏོ། ། ད་ནི་སོ་སོར་བསྟན་པའི་ཕྱིར།  ཇི་སྐད་བསྟན་པར་འགྱུར་ཞེ་ན་ཞེས་བྱ་བ་ལ་སོགས་པ་སྨོས་སོ། ། གཟུགས་སུ་སྣང་བའི་མིག་གི་རྣམ་པར་རིག་པ་རྣམ་པར་སྨིན་པའི་བག་ཆགས་ཞེས་བྱ་བ་{183a2} རང་གི་ས་བོན་ཡོངས་སུ་སྨིན་པར་གྱུར་པ་གང་ལས་བྱུང་བའི་ས་བོན་དེ་ནི་བཅོམ་ལྡན་འདས་ཀྱིས་རྣམ་པར་རིག་པ་དེའི་མིག་གི་སྐྱེ་མཆེད་དུ་གསུངས་སོ། ། སྣང་བ་འབྱུང་བ་གང་ཡིན་པ་དེ་ནི་དེའི་གཟུགས་ཀྱི་སྐྱེ་མཆེད་དུ་གསུངས་སོ། ། དེ་བཞིན་དུ་རྣ་བ་དང།  སྣ་དང།  ལྕེ་དང།  ལུས་ཀྱི་རྣམ་པར་རིག་{183a3} པ་རྣམས་ནི་རང་རང་གི་ས་བོན་དང།  སྣང་བ་ཡང་ཕྱིའི་སྐྱེ་མཆེད་དུ་བྲྗོད་པར་བྱའོ། ། རྣམ་པར་ཤེས་པ་ལས་སྣང་བ་བཞིན་མ་ཡིན་ན་ཐ་དད་པར་སྐྱེ་མཆེད་དུ་ཇི་ལྟར་རྣམ་པར་གཞག། ། སྨྲས་པ།  དཔེར་ན་རྣམ་པར་ཤེས་པ་དྲུག་གི་ཚོགས་ལས་ཡིད་ཀྱི་ཁམས་གུད་ན་མེད་ཀྱང་འབྲས་བུ་ལ་ལྟོས་ནས་ལོགས་ཤིག་{183a4} ཏུ་རྣམ་པར་གཞག་པ་ལྟར་འདིར་ཡང་དེ་བཞིན་ནོ། ། དེའི་ཕྱིར་དེ་ལྟར་དགོངས་པ་དང་བཅས་པ་བསྟན་ནས་མཇུག་བསྡུ་བའི་ཕྱིར།  འདི་ནི་འདིར་དགོངས་པའོ་ཞེས་བྱ་བ་སྨོས་སོ། ། ས་བོན་དང་སྣང་བ་ལ་དགོངས་ནས་གཟུགས་ལ་སོགས་པའི་སྐྱེ་མཆེད་ཡོད་པ་སྐད་དུ་གསུངས་ཀྱི།  དེ་དག་རྣམ་པར་ཤེས་{183a5} པ་ལས་གུད་ན་ཡོད་པར་ནི་མ་གསུངས་སོ། ། མདོ་སྡེ་པས་དགོངས་ཏེ་བསྟན་པའི་དགོངས་པ་དྲི་བའི་ཕྱིར།  དེ་ལྟར་ཞེས་བྱ་བ་སྨོས་སོ། ། ཇི་ལྟར་རྫུས་ཏེ་བྱུང་བའི་སེམས་ཅན་དགོངས་ཏེ་བསྟན་པའི་འབྲས་བུ་བཤད་པ་དེ་དེ་བཞིན་དུ།  གཟུགས་ལ་སོགས་པའི་སྐྱེ་མཆེད་ཡོད་པར་དགོངས་ཏེ་བསྟན་{183a6} པའི་འབྲས་བུ་ཅི་ཡིན་པ་ཡང་བྲྗོད་དགོས་སོ། ། བསྟན་བཅོས་བྱེད་པས་འབྲས་བུ་བསྟན་པའི་ཕྱིར།  དེ་ལྟར་གང་ཟག་བདག་མེད་པར་འཇུག་པར་འགྱུར་རོ་ཞེས་བྱ་བ་སྨོས་སོ། ། དེ་ཉིད་རྣམ་པར་དགྲོལ་བའི་ཕྱིར།  དེ་ལྟར་བཤད་ན་ཞེས་བྱ་བ་ལ་སོགས་པ་སྨོས་ཏེ།  གང་གི་ཕྱིར་དེ་ལྟར་སྐྱེ་མཆེད་{183a7} བཅུ་གཉིས་པོ་དག་བཤད་ན་གང་ཟག་དངོས་པོ་མེད་པར་རྟོགས་པར་འགྱུར་ཏེ།  དངོས་པོ་མེད་པ་ནི་བདག་མེད་པའོ། ། ཇི་ལྟར་ཞིག་གུ་སྙམ་པ་ལ་དྲུག་པོ་གཉིས་ལས་ཞེས་བྱ་བ་ལ་སོགས་པ་སྨོས་ཏེ།  འདི་ལྟར་མིག་ལ་སོགས་པ་ནང་གི་དྲུག་པོ་དང་གཟུགས་ལ་སོགས་པ་ཕྱི་རོལ་གྱི་དྲུག་པོ་ལས་{183b1} མིག་གི་རྣམ་པར་ཤེས་པ་ལ་སོགས་པ་རྣམ་པར་ཤེས་པ་དྲུག་འབྱུང་གི་ལྟ་བ་བོ་བདག་གཅིག་པུ་ནི་ཡང་དག་པའི་དོན་དུ་གང་ཡང་མེད་དེ།  བདག་རེག་པ་པོའི་བར་དུ་ཡང་མེད་དོ། ། འདི་ལྟར་གང་དག་ལྟ་བ་ལ་སོགས་པ་བྱེད་པ་བདག་གོ་ཞེས་བདག་ཏུ་སྨྲ་བ་རྣམས་ཀྱིས་ཁས་བླངས་པའི་ལྟ་བ་ལ་སོགས་པ་{183b2} དེ་དག་ཀྱང་ནང་དང་ཕྱིའི་སྐྱེ་མཆེད་རྣམས་ཀྱིས་བྱེད་དོ་ཞེས་གང་གི་ཚེ་བསྟན་པར་གྱུར་པ་དེའི་ཚེ་གང་ཟག་ལ་དངོས་པོ་མེད་པར་རྟོགས་སོ། ། དེ་ནི་འདི་སྐད་དུ་སྐྱེ་མཆེད་བཅུ་གཉིས་བསྟན་པར་འདུ་བྱེད་རྣམས་མིག་ལ་སོགས་པ་ལས་གཞན་པའི་བདག་གིས་བདག་མེད་པར་རྟོགས་སོ། ། འདུ་བྱེད་རྣམས་{183b3} བདག་མེད་པར་རྟོགས་ནས་དེ་དག་ལས་སེམས་སྐྱོ་སྟེ།  མཐར་ཕྱིན་པའི་གནས་ཐོབ་བོ་ཞེས་བསྟན་པར་འགྱུར་རོ། ། དེ་ལ་འདིར་འགྱུར་ཏེ།  གང་ཟག་ལ་བདག་མེད་པར་ཁོང་དུ་ཆུད་པ་ཉིད་ཀྱིས་མྱ་ངན་ལས་འདས་པ་ཐོབ་པར་གྲུབ་ན་སེམས་ཙམ་དུ་བསྟན་པ་ཅི་དོགས་སྙམ་པ་ལ།  དེའི་ཕྱིར་{183b4} གཞན་དུ་ཡང་བསྟན་པས་ཆོས་ལ་བདག་མེད་པར་ཞེས་བྱ་བ་ལ་སོགས་པ་སྨོས་སོ། ། གང་ཡང་སེམས་ཙམ་དུ་བསྟན་པས་དེས་ཆོས་ལ་བདག་མེད་པར་འཇུག་སྟེ།  དེའི་ཕྱིར་ཆོས་ལ་བདག་མེད་པ་ལ་གཞུག་པའི་དོན་དུ་སེམས་ཙམ་དུ་བསྟན་ཏོ་ཞེས་བཤད་པ་ཡིན་ནོ། ། འདིར་འཇུག་པར་བྱེད་{183b5} པས་འཇུག་པ་སྟེ།  ཁོང་དུ་ཆུད་ཅེས་བྱ་བའི་ཐ་ཚིག་གོ། ། གཞན་དུ་ཞེས་བྱ་བའི་སྒྲའི་དོན་བསྟན་པའི་ཕྱིར།  གཞན་དུ་ཡང་ཞེས་བྱ་བ་ནི་ཞེས་བྱ་བ་ལ་སོགས་པ་སྨོས་ཏེ།  དེ་ནི་གོ་སླ་བསམ་བཤད་དོ། ། སེམས་ཙམ་དུ་བསྟན་པས་ཆོས་ལ་བདག་མེད་པར་འཇུག་པ་ཡིད་མ་ཆེས་ནས་ཇི་{183b6} ལྟར་ཆོས་ལ་བདག་མེད་པར་འཇུག་ཅེས་དྲིས་ཏེ།  བསྟན་པ་འདིས་ཇི་ལྟར་ཆོས་ལ་བདག་མེད་པར་འཇུག་ཅེ་ན།  བསྟན་བཅོས་བྱེད་པས་འཇུག་པའི་ཐབས་བསྟན་པའི་ཕྱིར།  རྣམ་པར་རིག་པ་ཙམ་འདི་ཉིད་ཅེས་བྱ་བ་ལ་སོགས་པ་སྨོས་སོ། ། རྣམ་པར་རིག་པ་ཙམ་འདི་ཉིད་ལ་གཟུགས་{183b7} ལ་སོགས་པའི་རྣམ་པར་གྱུར་ནས་བྱུང་སྟེ།  སེམས་ལ་ས་ལོགས་ཤིག་ན་གཟུགས་ལ་སོགས་པའི་རང་བཞིན་ཆོས་གང་ཡང་མེད་པར་གང་གི་ཚེ།  དེ་ལྟར་རྟོགས་པར་གྱུར་པ་དེའི་ཚེ་ཆོས་ལ་བདག་མེད་པ་ལ་ཞུགས་པ་ཡིན་ནོ། ། ཆོས་ལ་བདག་མེད་པར་ཞུགས་ན་བྱང་ཆུབ་སེམས་དཔའ་  {184a1} || རྣམས་རིམ་གྱིས་དེ་བཞིན་གཤེགས་པའི་གོ་འཕང་འཐོབ་བོ། ། དེ་བས་ན་དོན་འདི་ནི་གཙོ་བོ་ཞེས་བྱའོ་ཞེས་དེ་ལྟ་བུའི་དོན་དུ་བཅོམ་ལྡན་འདས་ཀྱིས་སེམས་ཙམ་དུ་བསྟན་ཏོ། ། ཇི་ལྟར་གང་ཟག་ལ་བདག་མེད་པ་རྣམ་པ་ཐམས་ཅད་དུ་གང་ཟག་དངོས་པོ་མེད་པ་དེ་བཞིན་{184a2} དུ་ཆོས་ལ་བདག་མེད་པ་ཡང་རྣམ་པ་ཐམས་ཅད་དུ་ཆོས་མེད་པ་ལྟ་བུར་རིགས་ནས་གཞན་གྱིས་བརྒལ་བའི་ཕྱིར།  གལ་ཏེ་ཆོས་ཞེས་བྱ་བ་ལ་སོགས་པ་སྨོས་སོ། ། གལ་ཏེ་ཆོས་མེད་པ་ཆོས་ལ་བདག་མེད་པ་ཡིན་ན་ནི་རྣམ་པ་ཐམས་ཅད་དུ་ཆོས་གང་ཡང་མེད་དོ། ། དེ་ལྟ་ན་ནི་སེམས་ཙམ་དེ་ཡང་{184a3} མེད་དེ།  དེའི་ཕྱིར་ཇི་ལྟར་རྣམ་པར་གཞག་ཅེ་ན།  འདིར་སློབ་དཔོན་གྱིས་ཆོས་ནི་ཞེས་བྱ་བ་ལ་སོགས་པ་སྨོས་ཏེ།  ཐམས་ཅད་དུ་ཐམས་ཅད་ཆོས་གང་ཡང་མེད་པ་དེ་ལྟ་བུ་ནི་ཆོས་ལ་བདག་མེད་པ་ལ་འཇུག་པ་མ་ཡིན་གྱི་ཀུན་བརྟགས་པའི་ཆོས་མེད་པས་ཆོས་ལ་བདག་མེད་པ་ལ་འཇུག་གོ།  {184a4} བརྟགས་པའི་ངོ་བོ་དེ་ལ་ཡང་ཇི་ལྟ་བུ་སྙམ་པ་ལ་གང་བྱིས་པ་རྣམས་ཀྱིས་ཞེས་བྱ་བ་ལ་སོགས་པ་སྨོས་སོ། ། གང་སོ་སོའི་སྐྱེ་བོ་རྣམས་ཀྱིས་ཆོས་རྣམས་ལ་གཟུང་བ་དང་འཛིན་པའི་མཚན་ཉིད་ཀྱི་ངོ་བོ་ཉིད་དུ་སྒྲོ་བཏགས་པ་ནི་གཟུང་བ་དང་འཛིན་པའི་མཚན་ཉིད་དུ་སྒྲོ་བཏགས་པའི་བདག་ཉིད་དེས་དེ་དག་{184a5} བདག་མེད་ཀྱི།  སངས་རྒྱས་རྣམས་ཀྱི་ཡུལ་བྲྗོད་དུ་མེད་པ་གང་ཡིན་པ་ཡང་མེད་པ་ནི་མ་ཡིན་ནོ། ། དེ་ནི་འདི་སྐད་དུ་དེ་ཁོ་ན་མ་མཐོང་བ་རྣམས་ཀྱི་གང་ཆོས་རྣམས་ལ་གཟུང་བ་དང་འཛིན་པའི་དངོས་པོར་སྒྲོ་བཏགས་པ་དེ་དག་གི་དེ་མེད་ཀྱི།  དེ་དག་གི་གཞན་གྱི་དབང་དང་ཡོངས་སུ་གྲུབ་པའི་{184a6} ངོ་བོ་གང་ཡིན་པ་དེ་བཞིན་གཤེགས་པའི་ཡེ་ཤེས་ཀྱི་ཡུལ་ནི་མེད་པ་མ་ཡིན་ནོ་ཞེས་བསྟན་པར་འགྱུར་རོ། ། འདི་ལྟར་ཆོས་ལ་བདག་མེད་པ་ཞེས་བྱ་བའི་སྒྲ་ནི་མེད་པ་ཙམ་ལ་མི་བྱའི་གནས་ཀྱི་ཁྱད་པར་ལྦྱའོ། ། འདི་ལྟར་དེ་ཉིད་ལ་ཚིག་འདི་ལྟར་རྣམ་པར་སྦྱར་ཏེ།  གཞན་གྱི་དབང་དང་ཡོངས་སུ་{184a7} གྲུབ་པའི་དངོས་པོ་གཟུང་བ་དང་འཛིན་པའི་མཚན་ཉིད་ཀྱི་བདག་དང་བྲལ་བ་དེ་བདག་མེད་པའོ། ། དེའི་དངོས་པོ་ནི་བདག་མེད་པའོ། ། ཆོས་རྣམས་ལ་བདག་མེད་པ་ནི་གཞན་གྱི་དབང་ཡང་ཡོངས་སུ་གྲུབ་པའི་ཆོས་རྣམས་ལ་གཟུང་བ་དང་འཛིན་པ་མེད་ཅེས་བྱ་བའི་ཐ་ཚིག་གོ། ། དེ་བས་ན་  {184b1} གཟུང་བ་དང་འཛིན་པ་དང་བྲལ་བའི་སེམས་དང་སེམས་ལས་བྱུང་བ་རྣམས་ལ་བདག་མེད་པ་ཞེས་བསྟན་པ་ཡིན་གྱི།  མེད་པ་ཅན་ནི་མ་ཡིན་ནོ། ། གང་ཟག་ལ་བདག་མེད་པ་ཡང་གང་ཟག་མེད་པ་ཙམ་འབའ་ཞིག་མ་ཡིན་གྱི།  འདུ་བྱེད་རྣམས་ལ་གཞན་གྱིས་ཡོངས་སུ་བརྟགས་པའི་གང་{184b2} ཟག་མེད་དོ། ། བྲྗོད་དུ་མེད་པའི་བདག་ཉིད་ཀྱིས་ཞེས་བྱ་བ་ནི་བྲྗོད་པར་མི་ནུས་པར་རང་གི་ངོ་བོས་ཞེས་བྱ་བའི་ཐ་ཚིག་གོ། ། ཆོས་ལ་བདག་མེད་པ་རྣམ་པ་དེ་ལྟ་བུ་ཡོངས་སུ་འཛིན་པའི་ཡོན་ཏན་བསྟན་པའི་ཕྱིར།  དེ་ལྟར་རྣམ་པར་རིག་པ་ཙམ་ཡང་ཞེས་བྱ་བ་ལ་སོགས་པ་སྨོས་སོ། ། གལ་{184b3} ཏེ་གཟུང་བ་དང་འཛིན་པ་མེད་པ་ལ་ཆོས་ལ་བདག་མེད་པར་ཡོངས་སུ་འཛིན་ན།  དེའི་ཚེ་སེམས་དང་སེམས་ལས་བྱུང་བ་རྣམས་ཀྱང་དེ་མ་ཡིན་པ་སེམས་དང་སེམས་ལས་བྱུང་བ་གཞན་གྱིས་ཀུན་བརྟགས་པའི་གཟུང་བ་དང་འཛིན་པའི་མཚན་ཉིད་ཀྱི་བདག་ཉིད་དང་བྲལ་བར་ཁོང་དུ་ཆུད་པས་{184b4} གཟུང་བ་དང་འཛིན་པ་དང་བྲལ་བ་སེམས་དང་སེམས་ལས་བྱུང་བ་ཙམ་དུ་རྣམ་པར་གཞག་པ་མེད་པ་ཡིན་ནོ། ། སེམས་དང་སེམས་ལས་བྱུང་བ་གཟུང་བ་དང་འཛིན་པ་དང་བྲལ་བར་རྣམ་པར་གཞག་པས་ཆོས་ཐམས་ཅད་ལ་བདག་མེད་པར་འཇུ་པ་ཡིན་གྱི་ཆོས་ཡོད་པ་རྣམས་ལ་ཡང་རྣམ་{184b5} པ་ཐམས་ཅད་དུ་སྐུར་པས་མ་ཡིན་ནོ། ། ཇི་སྟེ་དེ་ལྟར་མི་འདོད་ན་ཅི་ཉེས་སྙམ་པ་ལ།  དེའི་ཕྱིར་གཞན་དུ་ན་ནི་ཞེས་བྱ་བ་ལ་སོགས་པ་སྨོས་སོ། ། གལ་ཏེ་སེམས་དང་སེམས་ལས་བྱུང་བ་གཞན་གྱིས་ཀུན་བརྟགས་པའི་གཟུང་བ་དང་འཛིན་པའི་མཚན་ཉིད་ཀྱིས་བདག་བྲལ་བ་མ་ཡིན་ན་ནི།  དེའི་ཚེ་{184b6} རྣམ་པར་རིག་པ་གཞན་གྱི་དོན་དུ་ཁས་བླངས་པར་འགྱུར་ཏེ།  དེ་བས་ན་རྣམ་པར་རིག་པ་ཙམ་དུ་མི་འགྲུབ་བོ། ། ཅིའི་ཕྱིར་སྙམ་པ་ལ།  རྣམ་པར་རིག་པ་རྣམས་དོན་དང་ལྡན་པའི་ཕྱིར་རོ་ཞེས་བྱ་བ་སྨོས་སོ། ། འདི་ལྟར་དོན་དང་ལྡན་པ་ནི་དེའི་ཚེ་རྣམ་པར་རིག་པར་མི་འགྱུར་ཏེ།  དེ་ལྟ་ན་ཡང་རྣམ་{184b7} པར་རིག་པ་ཙམ་དུ་འགྲུབ་པར་ག་ལ་འགྱུར།  འདི་ལྟར་རྣམ་པར་རིག་པ་ཙམ་གྱི་སྒྲ་ནི་གཟུང་བ་དང་འཛིན་པ་དང་བྲལ་བའི་སེམས་དང་སེམས་ལས་བྱུང་བ་དག་ལ་བྱ་ན།  གལ་ཏེ་འགའ་ཞིག་དེ་དག་འཛིན་ཏམ།  གལ་ཏེ་གཞན་དག་ལ་ཡང་འཛིན་ན་དེའི་ཚེ་རྣམ་པར་རིག་པ་ཙམ་དུག་ལ་  {185a1} || འགྲུབ།  འདི་ལྟར་གཟུགས་ཀྱི་ཕུང་པོ་འབའ་ཞིག་ལ་གཟུང་བ་དང་འཛིན་པ་དགག་པ་ནི་མ་ཡིན་གྱི་ཆོས་ཐམས་ཅད་ལའོ། ། དའི་ཕྱིར་སེམས་དང་སེམས་ལས་བྱུང་བ་རྣམས་ཀྱང་གཟུང་བ་དང་འཛིན་པ་དང་བྲལ་བར་འགྱུར་རོ། ། དེ་ལྟར་ན་ཆོས་ཐམས་ཅད་ལ་{185a2} བདག་མེད་པར་གྲུབ་པ་ཡིན་ནོ། ། གཟུང་བ་དང་འཛིན་པ་དངོས་པོ་མེད་པར་ད་དུང་གི་བར་དུ་རིགས་པ་འགའ་ཡང་མ་བྲྗོད་པས་དེའི་ཕྱིར་འདིར་ཕྱི་རོལ་གྱི་དོན་དུ་སྨྲ་བས་ཕྱིར་གཞིལ་བའི་ཕྱིར།  བཅོམ་ལྡན་འདས་ཀྱིས་དགོངས་པ་འདིས་ཞེས་བྱ་བ་ལ་སོགས་པ་སྨོས་སོ། ། རང་གིས་བོན་དང་{185a3} སྣང་བ་ལ་དགོངས་ནས་བཅོམ་ལྡན་འདས་ཀྱིས་གཟུགས་ལ་སོགས་པའི་སྐྱེ་མཆེད་ཡོད་པར་གསུངས་ཀྱི་ཡང་དག་པའི་དོན་དུ་ཡོད་པའི་གཟུགས་ལ་སོགས་པ་དེ་དག་རྣམ་པར་རིག་པ་རྣམས་ཀྱི་ཡུལ་གྱི་དངོས་པོར་གྱུར་པ་ནི་མ་ཡིན་ནོ་ཞེས་བྱ་བ་ཅི་མངོན།  དེ་ནི་འདི་སྐད་དུ་སྒྲ་ཇི་བཞིན་དུ་ན།  {185a4} གལ་ཏེ་འདིར་འགའ་ཞིག་རིགས་པ་དང་འགལ་ན་ནི་དེའི་ཚེ་དགོངས་པ་ཅན་དུ་ཡང་བརྟགས་པའི་ཡང་རིགས་ན།  འདི་ལ་ནི་སྒྲ་ཇི་བཞིན་དུ་ན་རིགས་པ་དང་འགལ་བ་འགའ་ཡང་མེད་ན་ཅིའི་ཕྱིར་རོ་ཞེས་དགོངས་པ་ཅན་དུ་ཡོངས་སུ་བརྟག་ཅེས་བསྟན་པར་འགྱུར་རོ། ། འདིར་སློབ་དཔོན་གྱིས་{185a5} རིགས་པ་དང་འགལ་བ་བསྟན་པའི་ཕྱིར།  འདི་ལྟར།  དེ་ནི་གཅིག་ན་ན་འང་ཡུལ་མིན་ལ། ། ཞེས་བྱ་བ་ལ་སོགས་པ་སྨོས་སོ། ། གཟུགས་ལ་སོགས་པའི་རགས་པ་དེ་གཅིག་པུ་ཡང་ཡུལ་མ་ཡིན་ནོ། ། རྡུལ་ཕྲ་རབ་ཕྲག་ཅན་དུ་གནས་པ་དུ་མ་ཡང་ཡུལ་མ་ཡིན་ནོ། ། རྡུལ་ཕྲ་རབ་དེ་དག་{185a6} མེད་པར་གནས་པ་ཡང་ཡུལ་མ་ཡིན་ཏེ།  འདི་ལྟར་རྡུལ་ཕྲ་རབ་ཉིད་མི་འགྲུབ་པའི་ཕྱིར་རོ་ཞེས་མདོར་བྱས་པའི་དོན་ཏོ། ། བསྟན་བཅོས་བྱེད་པས་མདར་བྱས་པའི་དོན་རྒྱ་ཆེར་བསྟན་པའི་ཕྱིར།  ཇི་སྐད་དུ་བསྟན་པར་འགྱུར་ཞེ་ན་ཞེས་བྱ་བ་ལ་སོགས་པ་སྨོས་སོ། ། གང་ཁྱེད་ཀྱི་རྣམ་པར་{185a7} ཤེས་པ་ལས་ལོགས་ཤིག་ན།  གཟུགས་དང་སྒྲ་ལ་སོགས་པའི་སྐྱེ་མཆེད་གཟུགས་དང་སྒྲ་ལ་སོགས་པའི་རྣམ་པར་རིག་པ་སོ་སོའི་ཡུལ་དུ་ཁས་བླངས་པ་དེ་གཅིག་པུ་ཞིག་ཡིན་ན་བྱེ་བྲག་པ་རྣམས་ཀྱི་ཆ་ཤས་ཀྱི་ངོ་བོར་རགས་པ་ཁྱོན་ཆེ་བ་དབང་པོའི་བློ་གཟུང་བར་འདོད་པ་ལྟ་བུ་འམ།  ཕྲག་  {185b1} ཡོད་པར་གནས་པའི་རྡུལ་ཕྲ་རབ་དུ་མ་ཡུལ་དུ་འདོད་དམ།  དེ་སྟེ་ཕན་ཚུན་ལྟོས་པ་དང་ཅས་པའི་རྡུལ་ཕྲ་རབ་དེ་དག་ཉིད་འདུས་པ་དག་དུ་འདོད་གྲང་ན།  ཕྱོགས་དང་པོའི་དབང་དུ་བྱས་ནས།  གཅིག་པུ་དེ་ནི་ཡུལ་མ་ཡིན་ཏེ་ཞེས་བྱ་བ་ལ་སོགས་པ་སྨོས་སོ། ། ཆ་ཤས་ཅན་ཞེས་བྱ་བ་{185b2} གཅིག་པུ་ནི་ཡུལ་མ་ཡིན་ཏེ།  འདི་ལྟར་ཆ་ཤས་རྣམས་ལས་མ་གཏོགས་པ་ཆ་ཤས་ཅན་གཞན་གང་ལ་ཡང་མི་འཛིན་ཏེ།  བུམ་པ་དང་སྣམ་བུ་ལ་སོགས་པ་ཐམས་ཅད་ལ་ཡང་ངེས་ཆ་དང་རྒྱུ་སྐུད་པ་ལ་སོགས་པའི་ཆ་ཤས་ཉིད་ལ་འཛིན་གྱི།  དེ་དག་ལས་གུད་ན་བུམ་པ་དང་སྣམ་བུ་ལ་{185b3} སོགས་པར་མི་འཛིན་ཏོ། ། ཕྱོགས་གཉིས་པ་བསྩལ་པའི་ཕྱིར།  དུ་མ་ཡང་ཡུལ་མ་ཡིན་ཏེ་ཞེས་བྱ་བ་སྨོས་སོ། ། དུ་མ་ཕྲག་ཅན་དུ་གནས་པ་ཡང་ཡུལ་མ་ཡིན་ཏེ།  འདི་ལྟར་རྡུལ་ཕྲ་རབ་སོ་སོ་ལ་འཛིན་པར་ཁས་མི་ལེན་ཏོ། ། འདི་ལྟར་རྣམ་པར་ཤེས་པ་ལྔའི་ཚོགས་ནི་བསགས་པ་ལ་{185b4} དམིགས་སོ་ཞེས་གཞན་དག་གིས་ཁས་བླངས་པའི་ཕྱིར་རོ། ། ཕྱོགས་གསུམ་པ་བསྩལ་བའི་ཕྱིར་རོ། ། དེ་དག་འདུས་པ་ཡང་ཡུལ་མ་ཡིན་ཏེ་ཞེས་བྱ་བ་ལ་སོགས་པ་སྨོས་སོ། ། ཕན་ཚུན་ནས་ཉེ་སྟེ་བར་མེད་པར་གནས་པའི་རྡུལ་ཕྲ་རབ་དག་ཀྱང་ཡུལ་མ་ཡིན་ཏེ།  འདི་ལྟར་རྡུལ་ཕྲ་རབ་{185b5} ཅེས་བྱ་བ་གང་ཡང་རྫས་གཅིག་ཏུ་མི་འགྲུབ་པའི་ཕྱིར་རོ། ། གལ་ཏེ་རྡུལ་ཕྲ་རབ་དག་རྫས་སུ་ཡོད་པར་གྲུབ་ན་ནི་དེའི་ཕྱིར་ཅི་དེ་དག་འདུས་པ་ཡུལ་ཡིན་ནམ།  འོན་ཏེ་ཕྲག་ཅན་དུ་གནས་པ་ཞེས་བསམ་པར་ཡང་བྱ་ན་དེ་དག་ནི་རྫས་ཡོད་པར་མ་གྲུབ་བོ། ། ཕྱི་རོལ་གྱི་དོན་དུ་སྨྲ་བ་རྡུལ་ཕྲ་རབ་མ་{185b6} གྲུབ་པར་ཡིད་མི་ཆེས་ནས་ཇི་ལྟར་མི་འགྲུབ་ཅེས་དྲིས་ཏེ།  མ་གྲུབ་པའི་རྒྱུ་གང་ཡང་མི་སྣང་ངོ་སྙམ་དུ་སེམས་སོ། ། སློབ་དཔོན་གྱིས་མ་གྲུབ་པའི་རྒྱུ་བསྟན་པའི་ཕྱིར།  འདི་ལྟར་དྲུག་གིས་གཅིག་ཅར་སྦྱར་བ་ན་ཞེས་བྱ་བ་ལ་སོགས་པ་སྨོས་སོ། ། དེ་ཉིད་རྣམ་པར་དགྲོལ་བའི་ཕྱིར།  ཕྱོགས་དྲུག་ནས་ཞེས་བྱ་{185b7} བ་ལ་སོགས་པ་སྨོས་སོ། ། གང་གི་ཚེ་དབུས་ན་འདུག་པའི་རྡུལ་ཕྲ་རབ་ལ་ཕྱོགས་དྲུག་ནས་འོངས་པའི་རྡུལ་ཕྲ་རབ་དྲུག་གིས་ཅིག་ཅར་དུ་སྦྱར་བ་དེའི་ཚེ་ཕྱོགས་གཞན་དང་གཞན་དག་ནས་སྦྱར་ཏམ།  འོན་ཏེ་གཅིག་ཁོ་ན་ནས་སྦྱར་ཞེས་བྲྗོད་པར་བྱའོ། ། གལ་ཏེ་རྡུལ་ཕྲ་རབ་དྲུག་པོ་དག་གིས་  {186a1} || གཞན་དང་གཞན་དག་ནས་ཅིག་ཅར་དུ་སྦྱར་ན་ནི་དེའི་ཚེ་དབུས་ན་འདུག་པའི་རྡུལ་ཕྲ་རབ་ཆ་དྲུག་ཏུ་འགྱུར་རོ། ། ཅིའི་ཕྱིར་སྙམ་པ་ལ།  གཅིག་གི་གོ་གང་ཡིན་པ་དེར་ཞེས་བྱ་བ་ལ་སོགས་པ་སྨོས་སོ། ། འདི་ལྟར་དབུས་སུ་འདུག་པའི་རྡུལ་ཕྲ་རབ་ཀྱི་ཕྱོགས་ཀྱི་དོས་ལ་འདུག་{186a2} པའི་རྡུལ་ཕྲ་རབ་གཅིག་གིས་ནོན་པ་གང་ཡིན་པ་དེའི་རྡུལ་ཕྲ་རབ་གཞན་གོ་སྐབས་མེད་དེ།  དེའི་ཕྱིར་དེ་ནི་ཕྱོགས་གཞན་དུ་གནས་པར་བྱ་དགོས་སོ། ། གཞན་དག་ཀྱང་དེ་བཞིན་དུ་ཆ་དྲུག་ཏུ་གྲུབ་བོ། ། དེ་ལྟར་རྡུལ་ཕྲ་རབ་ཆ་དྲུག་འདུས་པར་གྱུར་ན་དེས་དེ་རྫས་སུ་ཡོད་པར་ག་ལ་འགྱུར།  ཕྱོགས་{186a3} གཉིས་པའི་དབང་དུ་བྱས་ནས།  དྲུག་པོ་དག་ནི་གོ་གཅིག་ན་ཞེས་བྱ་བ་ལ་སོགས་པ་སྨོས་སོ། ། འདི་ཉིད་རྣམ་པར་དགྲོ་ལ་བའི་ཕྱིར།  ཇི་སྟེ་རྡུལ་ཕྲ་རབ་གཅིག་གི་གོ་གང་ཡིན་པ་དེ་ཉིད་ཅེས་བྱ་བ་ལ་སོགས་པ་སྨོས་སོ། ། ཇི་སྟེ་དབུས་ན་གནས་པའི་རྡུལ་ཕྲ་རབ་གཅིག་གི་གོ་གང་ཡིན་པ་དེ་ཉིད་ངོས་ལ་{186a4} འདུག་པའི་རྡུལ་ཕྲ་རབ་དྲུག་པོ་རྣམས་ཀྱི་གོ་ཡང་ཡིན་ན་ནི་དེས་ན་རྡུལ་ཕྲ་རབ་མང་པོ་རྣམ་པ་གོ་གཅིག་པའི་ཕྱིར་གོང་བུ་ཐམས་ཅད་རྡུལ་ཕྲ་རབ་ཙམ་དུ་འགྱུར་ཏེ།  ཚུལ་འདིས་རི་རབ་ལ་སོགས་པ་ཡང་རྡུལ་ཕྲ་རབ་ཏུ་འགྱུར་རོ། ། ཅིའི་ཕྱིར་སྙམ་པ་ལ་ཕན་ཚུན་དུ་ཐ་དད་པ་མེད་པའི་ཕྱིར་ཞེས་བྱ་བ་ལ་{186a5} སོགས་པ་སྨོས་ཏེ།  འདི་ལྟར་ཕྱོགས་འདི་ལ་རྡུལ་ཕྲ་རབ་ཐམས་ཅད་ཀྱང་ཕན་ཚུན་ཐ་དད་པ་མེད་དེ།  དེའི་ཕྱིར་དེའི་གོང་བུ་གང་ཡང་སྣང་བར་མི་འགྱུར་ཏེ།  རི་རབ་ཀྱང་སྣང་བར་མི་འགྱུར་བར་འདོད་དོ། ། ཕྱོགས་དང་པོ་ནི་ཆ་ཤས་དང་བཅས་པའི་ཕྱིར་རྫས་སུ་ཡོད་པར་འགྱུར་རོ། ། ཕྱོགས་{186a6} གཉིས་པ་ནི་ཆ་ཤས་མེད་པའི་ཕྱིར་སོགས་པ་ཡོད་པར་མི་འགྲུབ་བོ། ། དེ་བས་ན་སྣང་བར་མི་འགྱུར་རོ་ཞེས་བསྡུས་པའི་དོན་ཏོ། ། ཕྱོགས་དང་པོ་ལ་བྱེ་བྲག་ཏུ་སྨྲ་བས་ལན་གདབ་པའི་ཕྱིར།  རྡུལ་ཕྲ་རབ་རྣམས་ནི་ཞེས་བྱ་བ་ལ་སོགས་པ་སྨོས་སོ། ། གལ་ཏེ་རྡུལ་ཕྲ་རབ་རྣམས་སྦྱོར་ན་ནི་དེའི་ཕྱིར་{186a7} དྲུག་གིས་ཅིག་ཅར་དུ་སྦྱོར་བས་ཆ་དྲུག་ཏུ་ཡང་འགྱུར་ན།  དེ་དག་ནི་ཆ་ཤས་མེད་པའི་ཕྱིར་མི་སྦྱོར་རོ། ། དེ་བས་ན་འདི་ལ་ཆ་དྲུག་གི་ཉེས་པར་འགྱུར་བ་མེད་དོ། ། གལ་ཏེ་རྡུལ་ཕྲ་རབ་རྣམས་མི་སྦྱོར་ན་གང་སྦྱར་བར་བྱེད་པ་དེ་གང་གི་ཡིན་སྙམ་པ་ལ།  འདུས་པ་དག་ནི་ཞེས་བྱ་བ་ལ་སོགས་པ་  {186b1} སྨོས་ཏེ་འདུས་པ་དག་ནི་ཆ་ཤས་དང་བཅས་པའི་ཕྱིར་ཕན་ཚུན་སྦྱོར་རོ། ། དེ་བས་ན་གྲགས་པ་དང་མི་འགལ་ལོ་སྙམ་དུ་ཁས་འཆེ་བའི་བྱེ་བྲག་ཏུ་སྨྲ་བ་རྣམས་སེམས་སོ། ། བསྟན་བཅོས་བྱེད་པས་དེ་བས་ལ་བའི་ཕྱིར།  དེ་དག་ལ་འདི་སྐད་དུ་ཞེས་བྱ་བ་ལ་སོགས་པ་སྨོས་སོ། ། བྱེ་བྲག་ཏུ་སྨྲ་བ་དེ་{186b2} དག་ལ་འདི་སྐད་དུ་རྡུལ་ཕྲ་རབ་རྣམས་འདུས་པ་གང་ཡིན་པ་དེ་རྡུལ་ཕྲ་རབ་རྣམས་ལས་གཞན་ནམ་འོན་ཏེ་མ་ཡིན་ཞེས་དྲི་བར་བྱའོ། ། གལ་ཏེ་དོན་ཐ་དད་པ་མ་ཡིན་ནོ་ཞེས་ཟེར་ན་དེ་ལ་ཉེས་པར་བསྟན་པའི་ཕྱིར།  རྡུལ་ཕྲན་ཞེས་བྱ་བ་ལ་སོགས་པ་སྨོས་སོ། ། གལ་ཏེ་རྡུལ་ཕྲ་རབ་རྣམས་མི་སྦྱོར་ལ།  {186b3} འདུས་པའི་ཡང་དེ་ལས་དོན་གཞན་དུ་མི་འདོད་ན་དེའི་ཚེ་འདུས་པའི་སྦྱོར་བ་གང་ཡིན་པ་དེ་དག་གང་གི་ཡིན་པར་འདོད།  རྡུལ་ཕྲ་རབ་རྣམས་ཀྱི་ནི་མ་ཡིན་ཏེ།  ཆ་ཤས་མེད་པ་དང་ཁས་མི་ལེན་པའི་ཕྱིར་རོ། ། དེ་ནི་འདུས་པའི་ཡང་མ་ཡིན་ཏེ།  དེ་དག་ལས་དོན་གཞན་མ་ཡིན་པའི་ཕྱིར་རོ། ། དེ་དག་{186b4} ལས་དོན་གཞན་མ་ཡིན་པ་ནི་དེ་ལས་མ་བྱུང་བས་འབྲས་བུ་ཁས་བླང་དུ་མི་རུང་ངོ། ། དེའི་ཕྱིར་སྦྱོར་བ་དེ་གང་གི་ཡིན་ཞེས་བྲྗོད་པར་བྱའོ། ། མདོར་བྱས་པ་སྔ་མ་ལས་བྱེད་པའི་ཚིག་ཁོང་ནས་དབྱུང་བའི་ཕྱིར།  སྦྱོར་བ་ཞེས་བྱ་བར་སྙེགས་སོ་ཞེས་བྱ་བ་སྨོས་ཏེ།  དེ་ནི་གོ་སླ་བས་མ་བཤད་དོ། ། བརྒྱ་ལ་{186b5} བྱེ་བྲག་ཏུ་སྨྲ་བ་དེ་དག་ཉེས་པ་དེས་འཇིགས་ཏེ་འདུས་པ་ཡང་སྦྱོར་བར་མི་འདོད་དུ་དོགས་ནས།  ཆ་ཤས་ཡོད་པ་མ་ཡིན་པས་ཞེས་བྱ་བ་ལ་སོགས་པ་སྨོས་སོ། ། དེ་ཉིད་རྣམ་པར་དགྲོལ་བའི་ཕྱིར།  ཇི་སྟེ་འདུས་པ་དག་ཀྱང་ཞེས་བྱ་བ་ལ་སོགས་པ་སྨོས་སོ། ། ཇི་སྟེ་ཉེས་པ་འདི་འབྱུང་དུ་འོང་ཞེས་{186b6} ཏེ་འདུས་པ་དག་ཀྱང་ཕན་ཚུན་མི་སྦྱོར་རོ་ཞེ་ན།  དེ་ལྟ་ན་ནི་རྡུལ་ཕྲ་རབ་རྣམས་ཆ་ཤས་མེད་པའི་ཕྱིར་སྦྱོར་བ་མེད་དོ་ཞེས་མ་ཟེར་ཅིག།  ཅིའི་ཕྱིར་མི་བྲྗོད་སྙམ་པ་ལ།  འདུས་པ་ཆ་ཤས་དང་བཅས་པ་ཡང་ཞེས་བྱ་བ་ལ་སོགས་པ་སྨོས་སོ། ། འདི་ལྟར་འདུས་པ་ཆ་ཤས་དང་བཅས་པ་ཡང་སྦྱོར་{186b7} བས་ཁས་མི་ལེན་པའི་ཕྱིར་རོ། ། གལ་ཏེ་འདུས་པ་ཆ་ཤས་དང་བཅས་པ་སྦྱོར་བར་མི་འདོད་ན་ནི།  དེའི་ཚེ་རྡུལ་ཕྲ་རབ་རྣམས་ཆ་ཤས་མེད་པའི་ཕྱིར་སྦྱོར་བར་མི་འགྲུབ་བོ་ཞེས་སྨྲ་བའི་མི་རིགས་སོ། ། གང་གི་ཚེ་ཆ་ཤས་དང་བཅས་པ་ཡང་མི་འདོད་པ་དེའི་ཚེ་ཆ་ཤས་མེད་པ་ནི་སྦྱོར་བ་མེད་པའི་  {187a1} || གཏན་ཚིགས་ཡིན་ནོ་ཞེས་མ་ཟེར་ཅིག།  དེའི་ཕྱིར་དེ་ལྟར་བྱེ་བྲག་ཏུ་སྨྲ་བ་བསལ་ནས་སྔ་མའི་སྐབས་མཇུག་བསྡུ་བའི་ཕྱིར།  དེ་བས་ན་རྡུལ་ཕྲ་རབ་ཅེས་བྱ་བ་ལ་སོགས་པ་སྨོས་སོ། ། གང་གི་ཕྱིར་དེ་ལྟར་དྲུག་གིས་ཅིག་ཅར་དུ་སྦྱར་བས་རྡུལ་ཕྲ་རབ་ཆ་ཤས་དྲུག་ཏུ་འགྱུར་{187a2} བ་དེའི་ཕྱིར་རྡུལ་ཕྲ་རབ་རྫས་གཅིག་ཏུ་མི་འགྲུབ་བོ། ། ཆ་ཤས་མེད་པའི་ཕྱོགས་ལྟར་ན་ཡང་གོང་བུ་ཐམས་ཅད་མི་སྣང་བར་འགྱུར་བའི་རིགས་ཏེ་བཤད་ཟིན་ཏོ། ། ཡང་རྡུལ་ཕྲ་རབ་བསྩལ་བའི་ཕྱིར་རྡུལ་ཕྲ་རབ་སྦྱོར་བར་འདོད་ཀྱང་རུང་ཞེས་བྱ་བ་ལ་སོགས་པ་སྨོས་སོ། ། རྡུལ་ཕྲ་རབ་{187a3} སྦྱོར་བར་འདོད་ཀྱང་རུང་སྟེ།  སྦྱོར་བར་འདོད་པ་འདིས་བདག་ལ་ཅི་ཞིག་བྱ།  ཡེ་ནི་གལ་ཏེ་རྡུལ་ཕྲ་རབ་ལ་ཕྱོགས་ཀྱི་ཆ་ཐ་དད་པར་ཁས་ལེན་པ་དེའི་ཚེ།  གང་ལ་ཕྱོགས་ཆ་ཐ་དད་ཡོད། ། དེ་ནི་གཅིག་ཏུ་མི་རུང་ངོ། ། ཕྱོགས་ཀྱི་ཆ་ཐ་དད་པར་བཤད་པར་འདོད་ནས།  རྡུལ་ཕྲ་རབ་ཀྱི་ཤར་{187a4} ཕྱོགས་ཀྱི་ཆ་ཡང་གཞན་ཞེས་བྱ་བ་ལ་སོགས་པ་སྨོས་སོ། ། ཕྱོགས་ཀྱིས་མཚོན་པའི་ཆ་ནི་ཕྱོགས་ཀྱི་ཆ་སྟེ་དེ་ཡང་ཤར་ཕྱོགས་ཀྱིས་མཚོན་པ་ཡང་གཞན་པ་ནས་འོག་གི་ཕྱོགས་ཀྱིས་མཚོན་པའི་བར་དུ་ཡང་གཞན་ནོ། ། དེ་ལྟར་ཕྱོགས་ཀྱི་ཆ་ཐ་དད་ན་ཆ་དུ་མ་ཡོད་པའི་རྡུལ་ཕྲ་རབ་གཅིག་པུར་{187a5} ཇི་ལྟར་རུང།  དེ་ནི་འདི་སྐད་དུ་གང་ལ་ཆ་དེ་དག་ཡོད་པ་ནི་ཆ་ལས་ལོགས་ཤིག་ན་གཞན་གང་ཡང་མེད་དེ།  དེའི་ཕྱིར་ཆ་འདུས་པ་ཙམ་གྱི་རྡུལ་ཕྲ་རབ་དེ་གཅིག་ཏུ་ག་ལ་འགྱུར་ཞེས་བསྟན་པར་འགྱུར་རོ། ། དེ་ལ་འདིར་འགྱུར་ཏེ།  རྡུལ་ཕྲ་རབ་ལ་ཕྱོགས་ཀྱི་ཆ་ཐ་དད་པ་མེད་དོ་སྙམ་པ་ལ།  དེའི་ཕྱིར།  {187a6} གྲིབ་མ་དང་སྒྲིབ་པར་ཇི་ལྟར་འགྱུར་ཞེས་བྱ་བ་སྨོས་སོ། ། ཆ་མེད་པའི་རྡུལ་ཕྲ་རབ་ལ་གྲིབ་མ་དང་སྒྲིབ་པ་མི་འགྲུབ་བོ་ཞེས་མདོར་བྱས་པའི་དོན་བསྡུས་པའོ། ། བསྟན་བཅོས་བྱེད་པས་མདོར་བྱས་པའི་དོན་དེ་རྒྱ་ཆེར་བསྟན་པའི་ཕྱིར།  གལ་ཏེ་རྡུལ་ཕྲ་རབ་རེ་རེ་ལ་ཞེས་བྱ་བ་ལ་སོགས་པ་སྨོས་{187a7} སོ; | གལ་ཏེ་རྡུལ་ཕྲ་རབ་ཆ་ཤས་མེད་པའི་ཕྱིར་ཕྱོགས་ཀྱི་ཆ་ཐ་དད་པ་མེད་ན་དེའི་དུས་ན་ཉི་མ་ཤར་བའི་ཚེ་ངོས་གཅིག་ལ་གྲིབ་མ་འབབ་པ་གཅིག་ཏུ་ཉི་མ་ཤར་བར་ཇི་ལྟར་འགྱུར།  དེ་ལྟར་འགྱུར་དུ་མི་རུང་བ་ཅི་ཡོད་སྙམ་པ་ལ་དེའི་ཕྱིར་དེ་ལ་ནི་གང་དུ་ཉི་མ་མི་འབབ་པའི་ཞེས་བྱ་བ་ལ་སོགས་པ་  {187b1} སྨོས་ཏེ།  འདི་ལྟར་རྡུལ་ཕྲ་རབ་དེ་ལ་གང་ཉི་མས་གསལ་བར་མ་གྱུར་པའི་ཕྱོགས་གཞན་ནི་གང་ཡང་མེད་དོ། ། དེ་ལྟར་རི་ཞིག་གྲིབ་མ་མེད་པར་བསྟན་ཏོ། ། སྒྲིབ་པ་མེད་པར་བསྟན་པའི་ཕྱིར།  གལ་ཏེ་ཕྱོགས་ཀྱི་ཆ་ཞེས་བྱ་བ་ལ་སོགས་པ་སྨོས་སོ། ། གལ་ཏེ་ཆ་ཤད་མེད་པའི་ཕྱིར་ཕྱོགས་{187b2} ཀྱི་ཆ་ཐ་དད་པར་མི་འདོད་ན་དེའི་ཚེ་རྡུལ་ཕྲ་རབ་དེ་ལ་རྡུལ་ཕྲ་རབ་གཞན་གྱིས་སྒྲིབ་པར་ཡང་ཇི་ལྟར་འགྱུར།  ཅིའི་ཕྱིར་མི་འགྱུར་སྙམ་པ་ལ།  དེའི་ཕྱིར་རྡུལ་ཕྲ་རབ་གང་ལ་ཡང་ཞེས་བྱ་བ་སྨོས་ཏེ།  འདི་ལྟར་ཆ་གཞན་གང་ལ་རྡུལ་གཞན་འོངས་པས་རྡུལ་གཞན་ཐོགས་པར་རྣམ་པར་གཞག་པའི་{187b3} ཆ་གཞན་ནི་རྡུལ་ཕྲ་རབ་ལ་གང་ཡང་མེད་དོ། ། གལ་ཏེ་ཐོགས་པ་མེད་ན་ཅི་ཉེས་སྙམ་པ་ལ།  དེའི་ཕྱིར།  ཐོགས་པ་མེད་ན་ནི་ཞེས་བྱ་བ་ལ་སོགས་པ་སྨོས་སོ། ། གལ་ཏེ་རྡུལ་ཕྲ་རབ་ལ་རྡུལ་ཕྲ་རབ་གཞན་གྱིས་ཐོགས་པར་མི་བྱེད་ན།  དེའི་ཚེ་རྡུལ་ཕྲ་རབ་ཐམས་ཅད་གོ་གཅིག་ཏུ་འགྱུར་{187b4} ཏེ; དེའི་ཕྱིར།  ཐམས་ཅད་གོ་གཅིག་ཏུ་གྱུར་པས་རི་རབ་ལ་སོགས་པ་གོང་བུ་ཐམས་ཅད་རྡུལ་ཕྲ་རབ་ཙམ་དུ་འགྱུར་ཏེ།  དེ་ནི་སྔར་བཤད་ཟིན་ཏོ། ། ཕྱི་རོལ་གྱི་དོན་དུ་སྨྲ་བས་འགྲོ་བའི་ཚུལ་དུ་གྲིབ་མ་དང་སྒྲིབ་པ་ཞེས་བྱ་བ་ལ་སོགས་པ་སྨོས་སོ། ། གལ་ཏེ་རྡུལ་ཕྲ་རབ་ཆ་ཤས་མེད་པའི་{187b5} ཕྱིར་གྲིབ་མ་དང་སྒྲིབ་པ་མི་རིགས་ཀྱང་གོང་བུ་ཆ་ཤས་དང་བཅས་པ་དེ་ཡིན་པར་ཅིའི་ཕྱིར་མི་འདོད་ན།  བསྟན་བཅོས་བྱེད་པས་གོང་བུ་དཔྱད་པའི་ཕྱིར།  རྡུལ་ཕྲ་རབ་རྣམས་ལས་ཞེས་བྱ་བ་ལ་སོགས་པ་སྨོས་སོ། ། ཀྱེ་ཁྱེད་རྡུལ་ཕྲ་རབ་རྣམས་ལས་གོང་བུ་གཞན་ཞིག་ཡིན་པར་འདོད་དམ་ཅི་ན་{187b6} གྲིབ་མ་དང་སྒྲིབ་པ་དེ་དག་དེའི་ཡིན་པར་འདོད།  ག་ལྟེ་དེ་དག་ལས་དེ་གཞན་ཡིན་ན་ནི་དེ་ལྟར་ཡང་རུང་ངོ། ། མདོ་སྡེ་པས་སྨྲས་པ་མ་ཡིན་ནོ་ཞེས་བྱ་བ་སྨོས་སོ། ། ཁོ་བོ་ནི་གོང་བུ་རྡུལ་ཕྲ་རབ་ལས་གཞན་ཡིན་པར་མི་འདོད་དོ། ། བསྟན་བཅོས་བྱེད་པས།  གོང་བུ་གཞན་མིན་དེ་དེའི་མིང། ། {187b7} ཞེས་བྱ་བ་སྨོས་སོ། ། དེ་གཉིས་དགྲོལ་བའི་ཕྱིར་གལ་ཏེ་རྡུལ་ཕྲ་རབ་རྣམས་ལས་གོང་བུ་གཞན་མ་ཡིན་ན་ཞེས་བྱ་བ་ལ་སོགས་པ་སྨོས་སོ། ། གལ་ཏེ་རྡུལ་ཕྲ་རབ་རྣམས་ལས་གོང་བུ་གཞན་ཡིན་པར་མི་འདོད་ན་ནི་གྲིབ་མ་དང་སྒྲིབ་པ་དག་གོང་བུ་དེའི་ཡིན་པར་གྲུབ་པ་ཡིན་ནོ། ། ཕྱི་རོལ་གྱི་དོན་དུ་སྨྲ་བས་  {188a1} || སླར་བརྒལ་བའི་ཕྱིར།  ཡོངས་སུ་རྟོག་པ་འདི་ནི་ཞེས་བྱ་བ་ལ་སོགས་པ་སྨོས་ཏེ།  དཔེར་ན་ཆ་ཤས་གནས་པ་ཇི་ལྟ་བུ་ཞིག་གིས་གནས་པའི་གཟུགས་ལ་སོགས་པ་འཁོར་ལོ་ཞེས་བྲྗོད་ཀྱང།  དེ་དག་འཁོར་ལོའི་རང་བཞིན་མ་ཡིན་པ་དེ་བཞིན་དུ་གཟུགས་{188a2} ལ་སོགས་པ་ཞིག་པའི་མཐར་ཕྱིན་པ་ལ་ནི་རྡུལ་ཕྲ་རབ་དག་ཅེས་བྱ་བར་མེད་པར་གནས་པ་དག་ལ་ནི་འདུས་པ་ཞེས་བྱ་ཡང་དེ་དག་ནི་རྡུལ་ཕྲ་རབ་ཀྱི་ངོ་བོ་ཉིད་ཀྱང་མ་ཡིན།  འདུས་པའི་ངོ་བོ་ཉིད་ཀྱང་མ་ཡིན་ནོ། ། དེ་བས་ན་གཟུགས་ལ་སོགས་པའི་མཚན་ཉིད་གང་ཡིན་པ་དེ་ནི་མ་བཀག་{188a3} ན་རྡུལ་ཕྲ་རབ་ཅེས་སམ་འདུས་པ་ཞེས་བསམ་པ་དེས་ཅི་ཞིག་བྱ།  དེ་མ་བཀག་པས་ཕྱི་རོལ་གྱི་དོན་ཡང་མ་བཀག་པ་ཡིན་ནོ། ། བསྟན་བཅོས་བྱེད་པས་གཟུགས་ལ་སོགས་པའི་མཚན་ཉིད་དྲི་བའི་ཕྱིར།  དེ་དག་ནི་མཚན་ཉིད་གང་ཡིན་པ་ཞེས་བྱ་བ་སྨོས་སོ། ། ཀྱེ་གཟུགས་ལ་སོགས་{188a4} པའི་མཚན་ཉིད་གང་ཡིན་སྨོས་ཤིག།  ཕྱི་རོལ་གྱི་དོན་དུ་སྨྲ་བས།  མིག་ལ་སོགས་པའི་ཡུལ་ཉིད་དང་ཞེས་བྱ་བ་ལ་སོགས་པ་སྨོས་སོ། ། སྤྱིར་ན་མིག་ལ་སོགས་པའི་དབང་པོའི་ཡུལ་ཉིད་གཟུགས་ལ་སོགས་པ་མཚན་ཉིད་དང་བྱེ་བྲག་ཏུ་ན་སྔོན་པོ་དང་སེར་པོ་ལ་སོགས་པ་ཉིད་ནི་དེ་དག་གི་{188a5} མཚན་ཉིད་དོ། ། བསྟན་བཅོས་བྱེད་པས་གང་མིག་ལ་སོགས་པའི་ཡུལ་ཞེས་བྱ་བ་ལ་སོགས་པ་སྨོས་སོ། ། ཁྱོད་ཀྱིས་གང་མིག་ལ་སོགས་པའི་ཡུལ་སྔོན་པོ་དང་སེར་པོ་ལ་སོགས་པ་འདོད་པ་དེ་ཅི། ། ཆ་ཤས་ཅན་ཞེས་བྱ་བ་རྫས་གཅིག་བུ་ཞིག་གམ།  འོན་ཏེ་རྡུལ་ཕྲ་རབ་ཅེས་བྱ་བ་དུ་མ་ཞིག་ཅེས་ཁོ་བོས་དེ་དཔྱད་{188a6} པར་བྱའོ། ། ཕྱི་རོལ་གྱི་དོན་དུ་སྨྲ་བས་ཉེས་པ་མ་མཐོང་ནས།  འདིས་ཅི་ཞིག་བྱ་ཞེས་དྲིས་ཏེ།  དེ་ལྟར་བ་ཡང་ཅི་ཉེས།  བསྟན་བཅོས་བྱེད་པས།  དུ་མའི་ཞེས་བྱ་བ་ལ་སོགས་པ་སྨོས་སོ། ། དུ་མའི་ཕྱོགས་ཀྱི་ཉེས་པ་ནི། ། ཕྲ་རབ་རྡུལ་དུ་དུ་མ་འང་མིན། ། དེ་དག་འདུས་པ་འང་མ་ཡིན་ཏེ། ། {188a7} འདི་ལྟར་རྡུལ་ཕྲན་མི་འགྲུབ་ཕྱིར། ། ཞེས་བྱ་བའི་སྐབས་དེར་བཤད་ཟིན་ཏོ། ། གཅིག་བུའི་ཉེས་པ་འང་བཤད་པ་ཉིད་དེ་ཡང་བསྟན་པའི་ཕྱིར།  གཅིག་ན་རིམ་གྱིས་འགྲོ་བ་མེད། ། ཅེས་བྱ་བ་ལ་སོགས་པ་སྨོས་སོ། ། ས་ལ་སོགས་པ་ཆ་ཤས་གཅིག་པུ་ཞིག་ཡིན་དུ་ཟིན་ན་སྲོག་  {188b1} ཆགས་རྣམས་རིམ་གྱིས་འགྲོ་བར་མི་འགྱུར་རོ། ། ཚུལ་རོལ་གྱི་ཆ་དང་ཕ་རོལ་གྱི་ཐ་དད་པ་གཉིས་ཟིན་པ་དང་མ་ཟིན་པ་ཅིག་ཅར་མི་འགྱུར་རོ། ། གཅིག་ན་འདུག་པའི་གླང་པོ་ཆེ་ལ་སོགས་པ་དུ་མ་རིས་སུ་ཆད་པར་འདུག་པར་མི་འགྱུར་རོ། ། སྲོག་ཆགས་ཕྲ་མོ་རྣམས་ཀྱང་བལྟ་བར་མི་སྣང་བར་མི་{188b2} འགྱུར་རོ་ཞེས་མདོར་བྱས་པའི་དོན་ཏོ། ། བསྟན་བཅོས་བྱེད་པས་མདོར་བྱས་པའི་དོན་དེ་རྒྱ་ཆེར་བསྟན་པའི་ཕྱིར།  གལ་ཏེ་མིག་གི་ཡུལ་ཞེས་བྱ་བ་ལ་སོགས་པ་སྨོས་སོ། ། གལ་ཏེ་མིག་གི་ཡུལ་སྔོན་པོ་དང་སེར་པོ་ལ་སོགས་པ་ཇི་སྙེད་པ་ཀླུད་དང་ངམ་གྲོག་ལ་སོགས་པས་རིས་སུ་ཆད་པར་{188b3} འདོད་དེ།  དེ་དག་ཐམས་ཅད་རྫས་གཅིག་པར་རྟོག་ན་དེའི་ཚེ་སྲོག་ཆགས་རྣམས་རིམ་གྱིས་འགྲོ་བར་མི་འགྱུར་རོ། ། ཅིའི་ཕྱིར་རིམ་གྱིས་འགྲོ་བར་མི་འགྱུར་སྙམ་པ་ལ།  དེ་ཅིའི་ཕྱིར།  གོམ་པ་གཅིག་བོར་བས་ཞེས་བྱ་བ་ལ་སོགས་པ་སྨོས་ཏེ།  ཇི་ལྟར་གོམ་པ་གཅིག་པར་བས་བགྲོད་{188b4} པར་བྱ་བ་མཐའ་དག་ཏུ་སོན་པས་གོམ་པ་དོར་བས་གཞན་གྱིས་འགྲོ་ཅི་དགོས་ཏེ།  གང་དུ་རིམ་གྱིས་འགྲོ་བར་འགྱུར། ། འདི་ལྟར་ས་ནི་རིས་སུ་མ་ཆད་དེ་ཆ་ཤས་ཅན་རྫས་སུ་གཅིག་པ་ཆ་ཤས་མེད་པར་འདོད་པས་དེའི་ཕྱིར་རིམ་གྱིས་འགྲོ་བར་མི་འཐད་དོ། ། དེ་ནི་འདི་སྐད་དུ་གཅིག་ལ་{188b5} ཡུལ་གྱི་དངོས་པོར་སྔ་ཕྱི་ཐ་དད་པ་ཇི་ལྟར་འགྲུབ་ཅེས་བསྟན་པར་འགྱུར་རོ། ། འདི་གཉིས་ལ་ཉེས་པ་གཞན་བསྟན་པའི་ཕྱིར།  ཚུལ་རོལ་གྱི་ཆ་ཟིན་ལ་ཞེས་བྱ་བ་ལ་སོགས་པ་སྨོས་སོ། ། གལ་ཏེ་མིག་གི་ཡུལ་སྔོན་པོ་ལ་སོགས་པ་དེ་དག་ཐམས་ཅད་གཅིག་ཏུ་ཟིན་ན་དེའི་ཚེ་རྩིག་པ་ལ་སོགས་{188b6} པ་དག་གི་ཚུ་རོལ་གྱི་ཆ་ཟིན་ལ་ཕ་རོལ་གྱི་ཆ་མ་ཟིན་པ་ཅིག་ཅར་དུ་མི་འགྱུར་རོ། ། ཅིའི་ཕྱིར་སྙམ་པ་ལ།  དེའི་ཚེ་ཞེས་བྱ་བ་ལ་སོགས་པ་སྨོས་ཏེ།  འདི་ལྟར་དེའི་ཚེ་དངོས་པོ་གཅིག་ལ་ཟིན་པ་དང་མ་ཟིན་པ་མི་རུང་ངོ། ། ཡང་འདི་ཉིད་ལ་ཉེས་པ་གཞན་བསྟན་པའི་ཕྱིར་རོ། ། གླང་པོ་ཆེ་དང།  {188b7} ཞེས་བྱ་བ་ལ་སོགས་པ་སྨོས་སོ། ། གལ་ཏེ་རིས་སུ་ཆད་པར་སྣང་བ་ཇི་སྙེད་པ་དེ་དག་ཐམས་ཅད་གཅིག་ཏུ་ཟིན་ན།  དེའི་ཚེ་གནས་གཅིག་གི་སྟེང་ན་འདུག་པའི་གླང་པོ་ཆེ་དང་རྟ་ལ་སོགས་པ་དུ་མ་རིས་སུ་ཆད་པར་འདུག་པར་མི་འགྱུར་རོ། ། ཅིའི་ཕྱིར་སྙམ་པ་ལ།  གཅིག་གང་ན་འདུག་པ་ཞེས་  {189a1} || བྱ་བ་ལ་སོགས་པ་སྨོས་ཏེ།  འདི་ལྟར་གླང་པོ་ཆེ་གཅིག་གང་ན་འདུག་པ་དེ་ཉིད་ན་གཞན་ཡང་བ་གླང་དང་རྟ་ལ་སོགས་པ་ཡང་འཁོད་ན་ནི་དེའི་ཕྱིར་དེ་དག་རིས་སུ་ཆད་པར་ཇི་ལྟར་རུང།  འདི་ལྟར་ས་དེ་ནི་རྫས་གཅིག་པ་ཡིན་ན་གཅིག་ན་གནས་པ་རྣམས་ཡུལ་ཐ་དད་{189a2} པ་ན་འདུག་པར་ག་ལ་འགྱུར།  བརྒྱལ་གཞན་ན་ཉེས་པ་དེས་འཇིགས་ནས་གླང་པོ་ཆེ་ལ་སོགས་པ་གནས་ཕན་ཚུན་སྤངས་ཏེ་འདུག་པར་རྟོག་ཏུ་དོགས་ནས།  དེ་གཉིས་ཀྱིས་ཞེས་བྱ་བ་ལ་སོགས་པ་སྨོས་སོ། ། ཇི་སྟེ་ཡུལ་རིས་སུ་ཆད་པར་སྣང་བ་མེད་ན་མི་རུང་ཞེས་གནས་གཅིག་གིས་{189a3} སྤངས་ཏེ།  གློང་པོ་ཆེ་ལ་སོགས་པ་ཡུལ་སོ་སོ་ན་འཁོད་དེ་ཞེ་ན།  དེ་ལྟ་ན་ཡང་གླང་པོ་དང་རྟས་གང་ནོན་པ་དག་གཅིག་ཏུ་ཇི་ལྟར་རུང་སྟེ།  དེ་གཉིས་ཀྱིས་ནོན་པ་གང་ཡིན་པ་དང།  མནོན་པ་གང་ཡིན་པ་དེ་གཅིག་ཏུ་མི་འགྱུར་རོ་ཞེས་བྱ་བའི་ཐ་ཚིག་གོ། ། གཉི་གས་གཉི་གནོན་པར་བརྟག་བར་{189a4} ཡང་མི་རིགས་སོ། ། ཅིའི་ཕྱིར་སྙམ་པ་ལ།  བར་ན་དེ་དག་གིས་སྟོང་པ་ཞེས་བྱ་བ་ལ་སོགས་པ་སྨོས་ཏེ།  འདི་ལྟར་གླང་པོ་ཆེ་དང་བ་གླང་དང་རྟའི་བར་སྟོང་པ་སྣང་བའི་ཕྱིར་རོ། ། གལ་ཏེ་གླང་པོ་ཆེའི་གོར་བ་གླང་དང།  རྟས་ཁྱབ་པར་གྱུར་ལ།  བ་གླང་དང་རྟའི་གོར་ཡང་གླང་པོ་ཆེས་ཁྱབ་ན་ནི་དེའི་{189a5} བར་ཡང་དེ་དག་གིས་ཁྱབ་པར་འགྱུར་ཏེ།  དེ་བས་ན་བར་དུ་ཡང་དེ་གཉིས་གཟུང་བར་འགྱུར་རོ། ། ཡང་དེ་ཉིད་ལ་ཉེས་པ་གཞན་བསྟན་པའི་ཕྱིར།  ཆུའི་སྐྱེ་བོ་ཕྲ་མོ་ཞེས་བྱ་བ་ལ་སོགས་པ་སྨོས་ཏེ།  གལ་ཏེ་སྔོན་པོ་དང་སེར་པོ་ལ་སོགས་པ་མིག་གི་ཡུལ་ཇི་སྙེད་བ་དེ་དག་ཐམས་ཅད་གཅིག་ཏུ་ཟིན་{189a6} ན།  དེའི་ཚེ་ཆུའི་སྐྱེ་བོ་ཕྲ་མོ་རྣམས་ཀྱང་ཁང་པ་དང་རིལ་སོགས་པ་ཆེན་པོ་དག་དང་རང་བཞིན་གཅིག་པས་མིག་གིས་མི་སོད་པར་མི་འགྱུར་ཏེ།  གཅིག་པུ་རང་བཞིན་ཐ་དད་བ་མེད་པ་ལ་མིག་གིས་སོད་པ་དང་མིག་གིས་མི་སོད་པ་མི་རིགས་སོ། ། གང་གི་ཚེ་ཉེས་པ་འདི་འབྱུང་སྙམ་པ་ལ།  {189a7} གལ་ཏེ་མཚན་ཉིད་ཐ་དད་པ་ཉིད་ཀྱིས་ཞེས་བྱ་བ་ལ་སོགས་པ་སྨོས་སོ། ། གལ་ཏེ་དངོས་པོ་རྣམས་ཡུལ་ཐ་དད་པ་དང།  རྒྱུ་ཐ་དད་པ་དང།  དུས་ཐ་དད་པས་ཐ་དད་པར་མི་འདོད་ཀྱི་མཚན་ཉིད་ཐ་དད་པ་འབའ་ཞིག་གིས་དངོས་པོ་ཐ་དད་པར་ཁས་ལེན་པ་དེའི་ཚེ་ཉེས་པ་འདི་དག་འབྱུང་བར་  {189b1} འགྱུར་རོ། ། འདིར་མཚན་ཉིད་ནི་མིག་ལ་སོགས་པའི་ཡུལ་ཉིད་དང་སྔོན་པོ་ལ་སོགས་པ་ཉིད་དོ། ། གཞན་དུ་ནི་མ་ཡིན་ན་གོ་ཞེས་བྱ་བ་ལ་འདིས་ནི་ཡུལ་ཐ་དད་པ་ལ་སོགས་པ་སྟོན་ཏོ། ། དེའི་ཕྱིར་ད་ལྟར་འདི་ལ་ཉེས་པ་བསྟན་ནས་མཇུག་བསྡུ་བའི་ཕྱིར།  དེའི་ཕྱིར་ཞེས་བྱ་བ་ལ་སོགས་པ་སྨོས་ཏེ།  {189b2} གང་གི་ཕྱིར་དེ་ལྟར་གཅིག་གི་ཕྱོགས་ལ་ཉེས་པ་མང་བ་དེའི་ཕྱིར་མིག་ལ་སོགས་པའི་ཡུལ་སྔོན་པོ་ལ་སོགས་པ་ངེས་པར་རྡུལ་ཕྲ་རབ་ཐ་དད་པར་བརྟག་པར་བྱའོ། ། ཇི་ལྟར་ཉེས་པ་མེད་པ་དེ་ལྟར་ཡོད་སྙམ་པ་ལ།  དེའི་ཕྱིར་དེ་གཅིག་ཏུ་མི་འགྲུབ་བོ་ཞེས་བྱ་བ་སྨོས་ཏེ།  རྡུལ་ཕྲ་རབ་དེ་གཅིག་ཏུ་{189b3} མི་འགྲུབ་པོ་ཞེས་བསྟན་ཏོ། ། དེ་ལ་འདིར་འགྱུར་ཏེ།  མིག་ལ་སོགས་པའི་ཡུལ་གཟུགས་ལ་སོགས་པ་ཡོད་བར་འགྲུབ་སྟེ།  ཁོ་བོ་ལ་དེ་ཙམ་གྱིས་ཆོག་གི་རྡུལ་ཕྲ་རབ་གྲུབ་པས་ཅི་ཞིག་བྱ་སྙམ་པ་ལ།  དེའི་ཕྱིར་དེ་མི་འགྲུབ་པས་ཞེས་བྱ་བ་ལ་སོགས་པ་སྨོས་སོ། ། གལ་ཏེ་རྡུལ་ཕྲ་{189b4} རབ་མི་འགྲུབ་ན་གཟུགས་ལ་སོགས་པ་ཡང་མིག་ལ་སོགས་པའི་ཡུལ་ཉིད་དུ་མི་འགྲུབ་སྟེ།  དེའི་ཕྱིར་ཡུལ་མེད་པ་རྣམ་པར་རིག་པ་ཙམ་དུ་གྲུབ་པ་ཡིན་ནོ་ཞེས་བྱ་བ་ནི་མཇུག་བསྡུ་བའོ། ། འདིར་མདོ་སྡེ་པས་སླར་བརྒལ་བའི་ཕྱིར།  ཚད་མའི་དབང་གིས་ཞེས་བྱ་བ་ལ་སོགས་པ་སྨོས་སོ།  {189b5} འདི་ནི་ཡོད་དོ་འདི་ནི་མེད་དོ་ཞེས་བྱ་བ་ནི་ཚད་མའི་དབང་གིས་དམིགས་ཀྱིས་དབྱེ་བར་འགྱུར་ལ།  ཚད་མ་ཐམས་ཅད་ཀྱི་ནང་ན་ཡང་མངོན་སུམ་གྱི་ཚད་མ་ནི་མཆོག་ཡིན་གྱི།  འདི་ལྟར་མངོན་སུམ་གྱིས་ཐེ་ཚོམ་ཐམས་ཅད་ལྡོག་སྟེ་འདི་ནི་ཉེ་བའི་འབྲས་བུ་ཡང་མེད་ན་མངོན་སུམ་མཆོག་ཏུ་ཟིན་ཀྱང་{189b6} དེས་ཅིར་འགྱུར་སྙམ་པ་ལ།  དོན་དེ་མེད་ན་ཞེས་བྱ་བ་ལ་སོགས་པ་སྨོས་སོ། ། གལ་ཏེ་ཕྱི་རོལ་གྱི་དོན་མེད་ན་དེའི་ཚེ་གཟུགས་དང་སྒྲ་ལ་སོགས་པ་འདི་ནི་བདག་གི་མངོན་སུམ་མོ་སྙམ་དུ་སེམས་པའི་བློ་འདི་ཇི་ལྟར་འབྱང་ཞེས་སེམས་པའོ། ། གཞན་གྱི་འདོད་པ་ལྟར་གལ་ཏེ་གཟུགས་ལ་སོགས་{189b7} པ་མངོན་སུམ་གྱིས་མ་མྱོང་ན་དེའི་ཚེ་གཟུགས་ལ་སོགས་པ་འདི་ནི་བདག་གི་མངོན་སུམ་མོ་ཞེས་གཟུགས་ལ་སོགས་པ་མཐོང་ངོ་སྙམ་དུ་སེམས་པའི་བློ་འདི་ནི་ཇི་ལྟར་འབྱུང་ཞེས་བྱ་བ་དེ་དེའི་ལན་དུ་བསྟན་བཅོས་བྱེད་པས།  མངོན་སུམ་བློ་ནི་རྨི་སོགས་བཞིན། ། ཞེས་བྱ་བ་ལ་སོགས་པ་སྨོས་སོ།    {190a1} || དཔེར་ན་རྨི་ལམ་ལ་སོགས་པ་ལ་དོན་མེད་པར་ཡང་འདི་ནི་བདག་གི་མངོན་སུམ་མ་སྙམ་པའི་བློ་འབྱུང་བ་དེ་བཞིན་ཏེ།  རྣམ་པར་ཤེས་པ་འདི་ཉིད་དོན་དུ་སྣང་བར་འབྱུང་སྟེ།  དོན་གང་ཡང་མེད་དོ་ཞེས་བྱ་བའི་སྐབས་དེར་སྔར་བསྟན་པ་ཉིད་དོ། ། དེ་ཉིད་ལ་ཡང་གཏན་{190a2} ཚིགས་ལྷག་པར།  དེ་ཡང་གང་ཚེ་ཞེས་བྱ་བ་ལ་སོགས་པ་སྨོས་སོ། ། དེ་ཉིད་རྣམ་པར་དགྲོལ་བའི་ཕྱིར།  གང་གི་ཚེ་འདི་ནི་ཞེས་བྱ་བ་ལ་སོགས་པ་སྨོས་ཏེ།  གང་གི་ཚེ་འདི་ནི་བདག་གི་མངོན་སུམ་དུ་མཐོང་བའི་དངོས་པོ་ལ་སེམས་པ་དེ་ལྟ་བུའི་བློ་སྐད་ཅིག་མ་གསུམ་པས་འབྱུང་བ་དེའི་ཚེ་{190a3} ཁྱོད་ཀྱི་དོན་དེ་མི་སྣང་ངོ། ། ཅིའི་ཕྱིར་སྙམ་པ་ལ།  ཡིད་ཀྱི་རྣམ་པར་ཤེས་པ་ཞེས་བྱ་བ་ལ་སོགས་པ་སྨོས་སོ། ། འདི་ལྟར་ཡིད་ཀྱི་རྣམ་པར་ཤེས་པ་དེས་དེ་ལྟར་སྐད་ཅིག་མ་གསུམ་པ་ལ་གང་བཅད་པ་དང།  འདི་ལྟར་མིག་གི་རྣམ་པར་ཤེས་པ་དེའི་ཚེ་འགག་པའི་ཕྱིར་རོ། ། ད་བས་ན་རྟོག་པའི་དུས་ན་{190a4} དོན་དེ་མངོན་སུམ་དུ་ཇི་ལྟར་འདོད།  དེ་ནི་འདི་སྐད་དུ་དབང་པོའི་རྣམ་པར་ཤེས་པས་གཟུགས་ལ་སོགས་པ་མཐོང་བ་དེ་ནི་རྣམ་པར་མི་རྟོག་པ་དང།  དེའི་ཚེ་འགག་པའི་ཕྱིར་ཏེ།  དེ་ལྟར་གཟུང་བ་མི་ནུས་སོ། ། གང་དེ་ལྟར་ཡོངས་སུ་གཅོད་པ་ཡིད་ཀྱི་རྣམ་པར་ཤེས་པ་དེ་ཡང་དོན་དེའི་རང་གི་ངོ་{190a5} བོ་མི་འཛིན་ཏེ།  དེའི་ཕྱིར་དེའི་ཚེ་ཇི་ལྟར་དོན་དེ་མངོན་སུམ་དུ་འགྱུར་ཞེས་བསྟན་པར་འགྱུར་རོ། ། གལ་ཏེ་དོན་དེ་དུས་གཞན་ན་ཡང་གནས་པ།  གལ་ཏེ་ཕྱིས་མངོན་སུམ་གྱིས་འཛིན་པ་དེའི་ཚེ་ཉེས་པ་ཅི་ཡོད་སྙམ་དུ་དགོངས་པ་དེ་ལ།  ལྷག་པར་ཡང་ཞེས་བྱ་བ་ལ་སོགས་པ་སྨོས་སོ། ། {190a6} གལ་ཏེ་དོན་དེ་དུས་གཞན་ན་གནས་ན་ནི་ཉེས་པ་འདི་ཡང་མེད་ན་དོན་དེ་ནི་སྐད་ཅིག་པ་སྟེ།  དེའི་ཕྱིར་སྐད་ཅིག་པར་སྨྲ་བ་ལ་དོན་དེ་ཤིན་ཏུ་མངོན་སུམ་དུ་མི་འགྱུར་རོ། ། འདི་ལྟར་རྟོག་པའི་དུས་ན་དེའི་ཚེ་གཟུགས་དང་རོ་ལ་སོགས་པ་ནི་འགགས་ཟིན་ཏོ། ། ཡང་མདོ་སྡེ་པས་གཞན་དུ་སླར་བརྒལ་{190a7} བའི་ཕྱིར།  མྱོང་བ་མེད་པར་ཞེས་བྱ་བ་ལ་སོགས་པ་སྨོས་སོ། ། གང་མ་མྱོང་བ་དེ་ནི་ཡིད་ཀྱི་རྣམ་པར་ཤེས་པས་དྲན་པར་མི་འགྱུར་ན།  ཕྱི་རོལ་སྔོན་པོ་དང་སེར་པོ་ལ་སོགས་པ་ཡིད་ཀྱི་རྣམ་པར་ཤེས་པས་དྲན་པ་ལས་དེ་བས་ན་སྔོན་པོ་ལ་སོགས་པའི་དོན་གདོན་མི་ཟ་བར་མྱོང་བར་འགྱུར་རོ། །   {190b1} དེ་ལྟར་འགྱུར་དུ་ཟིན་ཀྱང་དེས་ཅིར་འགྱུར་སྙམ་པ་ལ།  དེ་ནི་མཐོང་བ་ཡིན་ནོ་ཞེས་བྱ་བ་ལ་སོགས་པ་སྨོས་སོ། ། དོན་གང་མྱོང་བ་དེ་གཟུགས་ལ་སོགས་པའི་དོན་མཐོང་བའོ་སྙམ་དུ་དེ་ལྟར་བསམས་ནས་མཐོང་བའི་ཡུལ་གཟུགས་ལ་སོགས་པ་མངོན་དུ་འདོད་དོ། ། སློབ་དཔོན་གྱིས་{190b2} འདིར་ལན་དུ་མྱོང་བའི་དོན་ཞེས་བྱ་བ་ལ་སོགས་པ་སྨོས་སོ། ། རྣམ་པར་ཤེས་པ་ལས་གཞན་དུ་གྱུར་པའི་དོན་དྲན་པ་ཡིན་ནོ་ཞེས་བྱ་བ་དེ་ཁོ་བོ་ལ་མ་གྲུབ་བོ། ། ཅིའི་ཕྱིར་མ་གྲུབ་སྙམ་པ་ལ།  འདི་ལྟར་ཞེས་བྱ་བ་ལ་སོགས་པ་སྨོས་སོ། ། དེ་ཉིད་དགྲོལ་བའི་ཕྱིར།  དཔེར་ན་དོན་མེད་པར་ཞེས་བྱ་བ་{190b3} ལ་སོགས་པ་སྨོས་སོ། ། དཔེར་ན་གཟུགས་ལ་སོགས་པ་ཕྱི་རོལ་ན་མེད་པར་ཡང་གཟུགས་ལ་སོགས་པའི་དོན་དུ་སྣང་བའི་མིག་གི་རྣམ་པར་ཤེས་པ་ལ་སོགས་པའི་རྣམ་པར་རིག་པ་བྱུང་བ་དེ་བཞིན་ཏེ།  ཁོ་བོས་རྣམ་པར་ཤེས་པ་འདི་ཉིད་དོན་དུ་སྣང་བར་འབྱུང་སྟེ།  དོན་གང་ཡང་མེད་དོ་ཞེས་བྱ་{190b4} བའི་བར་སྐབས་དེར་བཤད་ཟིན་ཏོ། ། དེ་ལྟར་གྱུར་དུ་ཟིན་ཀྱང་སྐབས་འདིར་ཅི་ཞིག་འགྲུབ་སྙམ་པ་ལ།  དེའི་ཕྱིར།  དེ་ལས་དྲན་པར་ཟད་ཅེས་བྱ་བ་སྨོས་སོ། ། དེ་ཉིད་དགྲོལ་བའི་ཕྱིར།  རྣམ་པར་རིག་པ་དེ་ལས་ཞེས་བྱ་བ་ལ་སོགས་པ་སྨོས་སོ། ། གཟུགས་ལ་སོགས་པར་སྣང་བའི་རྣམ་པར་{190b5} རིག་པ་དེ་ལས་རྣམ་པར་རྟོག་པའི་ཡིད་ཀྱིས་རྣམ་པར་རིག་པ་དྲན་པ་དང་མཚུངས་པར་ལྡན་པ་འབྱུང་སྟེ།  དྲན་པ་འབྱུང་བ་དེ་ལས་གཞན་མྱོང་བ་མི་འགྲུབ་པ། ། དེ་ནི་འདི་སྐད་དུ་མྱོང་བ་ནི་དྲན་པའི་རྒྱུ་ཡིན་ལ།  མྱོང་བ་ནི་བདག་ཅག་ལ་ཡོད་དོ། ། གཟུགས་ལ་སོགས་པའི་དོན་དུ་སྣང་བའི་{190b6} རྣམ་པར་ཤེས་པའོ། ། དེ་བས་ན་གཟུགས་ལ་སོགས་པའི་དོན་དུ་སྣང་བའི་རྣམ་པར་ཤེས་པ་མྱོང་བ་ཉིད་ལ་དྲན་པ་འབྱུང་གི།  དོན་གུང་ན་ཡོད་པས་ཅི་ཞིག་བྱ།  ཡང་མདོ་སྡེ་པས་གཞན་དུ་བརྒལ་བའི་ཕྱིར།  དཔེར་ན་རྨི་ལམ་གྱི་ཞེས་བྱ་བ་ལ་སོགས་པ་སྨོས་སོ། ། དཔེར་ན་རྨི་ལམ་གྱི་རྣམ་{190b7} པར་རིག་པ་ཐམས་ཅད་ཀྱི་དོན་མེད་པར་འབྱུང་བ་དེ་བཞིན་དུ་གལ་ཏེ་གཉིད་ཀྱིས་མ་ལོག་པའི་དུས་ན་ཡང་འགྱུར་ན་ནི།  དེའི་ཚེ་དཔེར་ན་རྨི་ལམ་ན་དམིགས་པའི་དོན་ནི་མེད་པར་འཇིག་རྟེན་རང་གིས་ཁོང་དུ་ཆུད་པ་དེ་བཞིན་དུ།  གཉིད་ཀྱིས་མ་ལོག་པ་ན་དམིགས་པའི་དོན་མེད་པར་འཇིག་རྟེན་  {191a1} || རང་གིས་ཁོང་དུ་ཆུད་པའི་རིགས་ན་ཁོང་དུ་མཆུད་དེ་དེའི་ཕྱིར་རྨི་ལམ་བཞིན་དུ་གཉིད་ཀྱིས་མ་ལོག་པའི་དུས་ན་འབྱུང་བའི་བློ་ཐམས་ཅད་དོན་མེད་པ་མ་ཡིན་ནོ། ། འདིར་བསྟན་བཅོས་བྱེད་པས།  དེ་ནི་གཏན་ཚིགས་སུ་མི་རུང་སྟེ་ཞེས་བྱ་བ་ལ་སོགས་པ་སྨོས་སོ། ། འདི་ནི་{191a2} རྨི་ལམ་དང་མི་འདྲ་བ་མེད་དེ།  འདི་ལྟར་ཇི་སྲིད་དུས་དཔར་མ་གྱུར་པ་དེ་སྲིད་དུ་རྨི་ལམ་གྱི་བློ་ཡང་ཡུལ་མེད་པར་ཁོད་དུ་ཆུད་པར་མི་འགྱུར་གྱི།  ནམ་སད་བར་གྱུར་བ་དེ་ན་ཁོང་དུ་ཆུད་པ་དེ་བཞིན་དུ།  གཉིད་ཀྱི་སམ་ལོག་པའི་དུས་འདི་ན་ཡང་ལོག་པར་རྣམ་པར་རྟོག་པ་ལ་གོམས་པའི་བག་{191a3} ཆགས་ཀྱི་གཉིད་ཀྱིས་ལོག་པའི་འཇིག་རྟེན་ནི་རྨི་ལམ་བཞིན་དུ་ཡང་དག་པ་མ་ཡིན་པའི་དོན་མཐོང་སྟེ།  ཇི་སྲིད་དུ་མ་སད་པ་དེ་སྲིད་དུ་གཉིད་ཀྱིས་མ་ལོག་པ་ན་དམིགས་པའི་དོན་དེ་མེད་པར་ཁོང་དུ་མ་ཆུད་དོ། ། དེ་ནི་ལོག་པ་ཡང་ཡིན་ལ་རྣམ་པར་རྟོག་པ་ཡང་ཡིན་ནོ་ཞེས་བསྡུའོ། ། དེ་ལ་གོམས་{191a4} པ་ནི་ལོག་པར་རྣམ་པར་རྟོག་པ་ལ་གོམས་པ་སྟེ།  ཡང་དང་ཡང་མངོན་དུ་གྱུར་པ་ནི་གོམས་པ་ཞེས་བྱའོ། ། ལོག་པར་རྣམ་པར་རྟོག་པ་དེ་ལས་བྱུང་བའི་བག་ཆགས་གང་ཡིན་པ་དེ་ལ་དེ་སྐད་ཅེས་བྱའོ། ། གཉིད་དང་འདྲ་བའི་བག་ཆགས་རྣམ་པ་དེ་ལྟ་བུ་དེ་ལ་གཉིད་ཅེས་བྱའོ། ། ཇི་ལྟ་བ་{191a5} བཞིན་དུ་རྟོགས་པ་མ་ཡིན་གྱི་ཞེས་བྱ་བ་ནི་མ་ནོར་བར་ཁོང་དུ་མི་ཆུང་ཅེས་བྱ་བའི་ཐ་ཚིག་གོ། ། ནམ་ཞིག་དེ་མེད་པར་ཁོང་དུ་ཆུད་པར་འགྱུར་སྙམ་པ་ལ།  གང་གི་ཚེ་དེའི་གཉེན་པོ་ཞེས་བྱ་བ་ལ་སོགས་པ་སྨོས་སོ། ། གང་གི་ཚེ་བག་ཆགས་དེའི་གཉེན་བོར་གྱུར་པ་འཇིག་རྟེན་ལས་འདས་པ་རྣམ་{191a6} བར་མི་རྟོག་པའི་ཡེ་ཤེས་ཐོབ་ནས་སད་པར་གྱུར་པ་དེའི་ཚེ་འཇིག་རྟེན་ལས་འདས་པ་དེའི་རྗེས་ལས་ཐོབ་པ་དག་པ་འཇིག་རྟེན་པའི་ཡེ་ཤེས་མངོན་དུ་འགྱུར་རོ། ། དེ་མངོན་སུམ་དུ་གྱུར་ནས་ཡུལ་མེད་པ་ཇི་ལྟ་བ་བཞིན་དུ་ཁོང་དུ་ཆུད་དེ།  དེ་ནི་འདི་སྐད་དུ་གཟུགས་ལ་སོགས་པ་བྱིས་པའི་སྐྱེ་བོས་{191a7} ཡོངས་སུ་བརྟགས་པ་དག་ནི་འཇིག་རྟེན་ལས་འདས་པའི་ཡེ་ཤེས་ཀྱི་ཡུལ་མ་ཡིན་ཏེ།  གང་དག་དེའི་ཡུལ་གྱི་དངོས་པོར་མ་གྱུར་པ་དེ་དག་གི་རྟོག་པའི་ཤེས་པ་དག་པ་འཇིག་རྟེན་པ་ཞེས་བྱ་བ་རྣམས་ཀྱིས་སེལ་ཏོ། ། དེ་བས་ན་དེ་ནི་མཚུངས་སོ། ། འཇིག་རྟེན་ལས་འདས་པ་རྣམ་པར་མི་རྟོག་པའི་  {191b1} ཡེ་ཤེས་ཐོབ་ཅེས་བྱ་བ་ནི་འཇིག་རྟེན་དང་མི་མཐུན་པས་འཇིག་རྟེན་ལས་འདས་པའོ། ། གཟུང་བ་དང་འཛིན་པའི་རྣམ་པར་རྟོག་པ་མེད་པའི་ཕྱིར་རྣམ་པར་མི་རྟོག་པའོ། ། དེའི་རྗེས་ལས་ཐོབ་པ་དག་པ་འཇིག་རྟེན་པའི་ཡེ་ཤེས་མངོན་དུ་གྱུར་ཞེས་བྱ་བ་ན་དེའི་རྗེས་ལས་ཐོབ་པ་སྟེ།  དེ་ཞེས་བྱ་བ་{191b2} ནི་འཇིག་རྟེན་ལས་འདས་པའི་ཡེ་ཤེས་དང་སྦྱར་རོ། ། རྗེས་ཞེས་བྱ་བ་ནི་སྟོབས་ལ་བྱའོ། ། དེ་ནི་དེའི་རྗེས་ལས་ཐོབ་པ་ཡང་ཡིན་ལ་དག་པ་འཇིག་རྟེན་པའི་ཡེ་ཤེས་ཀྱང་ཡིན་ནོ་ཞེས་བསྡུའོ། ། གཟུང་བ་དང་འཛིན་པར་མངོན་པར་ཞེན་པའི་བག་ཆགས་སྤངས་པའི་ཕྱིར་དག་པའོ། ། མངོན་པར་ཞེན་པ་{191b3} མེད་ཀྱང་གཟུང་བ་དང་འཛིན་པའི་རྣམ་པར་འབྱུང་བས་འཇིག་རྟེན་པའོ། ། འདིར་དེའི་སྤྱིའི་དོན་ནི་སྤྲོས་པའི་བག་ཆགས་ནང་ན་གནས་པ་ཡོངས་སུ་སྨིན་པའི་དབང་གིས་གཟུགས་ལ་སོགས་པའི་དོན་སྣང་པའི་ཤེས་པ་རྣམས་འཁོར་བའི་གནས་སུ་འཇུག་སྟེ།  གང་གི་ཚེ་འཇིག་རྟེན་ལས་འདས་{191b4} པའི་ཡེ་ཤེས་ཀྱིས་བག་ཆགས་དེ་དག་སྤངས་པར་གྱུར་པ་དེའི་ཚེ་དག་པ་འཇིག་རྟེན་པའི་ཡེ་ཤེས་བྱུང་ནས་ཡུལ་མེད་པར་རྟོགས་སོ། ། གང་མདོ་སྡེ་པས་སླར་བརྒལ་བའི་ཕྱིར།  གལ་ཏེ་རང་གི་རྒྱུར་གྱུར་པའི་ཁྱད་པར་ཉིད་ལས་ཞེས་བྱ་བ་ལ་སོགས་པ་སྨོས་སོ། ། གལ་ཏེ་རང་གི་རྒྱུད་ལ་གནས་པའི་{191b5} བག་ཆགས་གྱུར་པའི་ཁྱད་པར་གྱི་སྲོག་ཆགས་རྣམས་ཀྱི་གཟུགས་ལ་སོགས་པ་དོན་དུ་སྣང་བའི་རྣམ་པར་རིག་པ་འབྱུང་གི་སྔོན་པོ་ལ་སོགས་པའི་དོན་གྱི་ཁྱད་པར་ལས་མ་ཡིན་ན།  དེའི་ཚེ་གང་གིས་སྡིག་པའི་གྲོགས་པོ་ལ་བརྟེན་པ་ལས་སེམས་ཅན་རྣམས་ཀྱི་ལུས་ཀྱི་བྱ་བ་མི་དགེ་བའི་རྣམ་པར་རིག་{191b6} བ་ངེས་པ་དང།  དགེ་བའི་བཤེས་གཉེན་ལ་བརྟེན་པ་ལས་ལུས་ཀྱི་བྱ་བ་དགེ་བའི་རྣམ་པར་རིག་པ་ངེས་པ་དང།  དེ་བཞིན་དུ་དམ་པའི་ཆོས་མཉན་པས་ངག་གི་བྱ་བ་སྡིག་པ་ལས་ལོག་པའི་རྣམ་པའི་རྣམ་པར་རིག་པ་ངེས་པ་དང།  དམ་པ་མ་ཡིན་པའི་ཆོས་མཉན་པ་ལས་སེམས་ཅན་རྣམས་ཀྱི་དང[?] {191b7} [?]བྱ་བ་སྡིག་པ་ལ་འཇུག་པའི་རྣམ་པའི་རྣམ་པར་རིག་པ་ངེས་པར་སྡིག་པའི་གྲོགས་པོ་དང།  དགེ་བའི་བཤེས་གཉེན་ལ་བརྟེན་པ་མེད་ལ།  དམ་པ་དང་དམ་པ་མ་ཡིན་པའི་ཆོས་བསྟན་པ་མེད་ན་ཇི་ལྟར་འགྲུབ་པར་བྲྗོད་དེ།  དེ་ནི་འདི་སྐད་དུ་ཇི་ཙམ་དུ་སྡིག་པའི་གྲོགས་པོ་དང་དགེ་བའི་བཤེས་  {192a1} || གཉེན་སྤྱོད་པ་མི་དམིགས་པ་དེ་ཙམ་དུ་དེའི་རྗེས་སུ་བྱེད་མི་ནུས་སོ། ། ཇི་ཙམ་དུ་སྒྲའི་རང་བཞིན་དམ་པ་དང་དམ་པ་མ་ཡིན་པའི་ཆོས་ཐོས་པ་མེད་པ་དེ་ཙམ་དུ་དེ་དང་མཐུན་པར་སྒྲུབ་ཅིང་བྱེད་མི་ནུས་སོ་ཞེས་བསྟན་པར་འགྱུར་རོ། ། བསྟན་བཅོས་བྱེད་པས་དེ་བསྩལ་བའི་ཕྱིར།  {192a2} གཅིག་ལ་གཅིག་གི་དབང་གིས་ན། ། ཞེས་བྱ་བ་ལ་སོགས་པ་སྨོས་སོ། ། དེ་ཉིད་དགྲོལ་བའི་ཕྱིར།  སེམས་ཅན་ཐམས་ཅད་ཀྱི་ཞེས་བྱ་བ་ལ་སོགས་པ་སྨོས་སོ། ། འདི་ལྟར་སྲོག་ཆགས་ཐམས་ཅད་ཀྱི་རྣམ་པར་ཤེས་པ་ཕན་ཚུན་གྱི་དབང་གིས་རྣམ་པར་ཤེས་པ་རྣམས་ཕན་ཚུན་འབྱུང་བ་དེས་པར་{192a3} འགྱུར་རོ། ། ཅི་རིགས་སུ་སྦྱོར་རོ་ཞེས་བྱ་བ་ནི་སྡིག་པའི་གྲོགས་པོ་དང་དགེ་བའི་བཤེས་གཉེན་གྱི་སྤྱོད་པ་ལ་སློབ་པར་འདོད་པའི་དབང་གིས་དེ་དང་མཐུན་པར་བྱེད་པ་རྣམས་ཀྱི་སྡིག་པ་དང།  དགེ་བའི་ལུས་ཀྱི་ལས་ཀྱི་རྣམ་པའི་རྣམ་པར་རིག་པ་འབྱུང་གི།  ཕྱི་རོལ་ན་ལུས་ཀྱི་ལས་དང་ལུས་ནི་མེད་དོ། ། {192a4} དེ་བཞིན་དུ་དམ་པ་དང་དམ་པ་མ་ཡིན་པའི་ཆོས་སྨྲ་བར་འདོད་པའི་དབང་གིས་ཉན་པ་རྣམས་ཀྱི་དམ་པ་དང།  དམ་པ་མ་ཡིན་པའི་ཆོས་ཀྱི་རྣམ་པའི་རྣམ་པར་རིག་པ་འབྱུང་གི།  ཕྱི་རོལ་ན་སྒྲ་ནི་མེད་དེ་འདི་ལ་ཅི་རིགས་པ་ཞེས་བྱ་བའི་དོན་ནི་འདི་ཡིན་ནོ། ། གཅིག་ལ་གཅིག་ཅེས་བྱ་བའི་སྒྲ་མ་གྲགས་{192a5} པས་དེ་བས་ན་དེའི་དོན་བསྟན་པའི་ཕྱིར།  གཅིག་ལ་གཅིག་ཅེས་བྱ་བ་ལ་སོགས་པ་སྨོས་ཏེ།  དེ་ནི་གོ་སླ་བས་མ་བཤད་དོ། ། དེའི་ཕྱིར་དེ་ལྟར་བརྒལ་བའི་ལན་བཏབ་ནས།  སྲོག་ཆགས་ཀྱི་ཐ་སྙད་ཐམས་ཅད་རྣམ་པར་རིག་པ་རྣམས་ཀྱིས་ཕན་ཚུན་གྱི་དབང་གིས་འབྱུང་བར་བསྟན་པའི་{192a6} ཕྱིར།  རྒྱུད་གཞན་གྱི་རྣམ་པར་རིག་པའི་ཁྱད་པར་ཞེས་བྱ་བ་ལ་སོགས་པ་སྨོས་སོ། ། སྲོག་ཆགས་དང་འབྲེལ་བའི་ཐ་སྙད་ཐམས་ཅད་ནི་རྒྱུད་གཞན་གྱི་འགྲོ་བར་འདོད་པ་དང།  བྲྗོད་པར་འདོད་པ་ལ་སོགས་པའི་རྣམ་པར་རིག་པའི་ཁྱད་པར་ལས་རྒྱུད་གཞན་ལ་འགྲོ་བ་དང་སྨྲ་བ་ལ་སོགས་པའི་{192a7} རྣམ་པར་དག་པའི་ཁྱད་པར་འབྱུང་གི་ཕྱི་རོལ་གྱི་དོན་གྱི་ཁྱད་པར་ལུས་དང་ངག་གི་ཐ་སྙད་ཀྱི་མཚན་ཉིད་ལས་ནི་མ་ཡིན་ནོ། ། ཡང་ཕྱི་རོལ་གྱི་དོན་དུ་སྨྲ་བས་སླར་བརྒལ་བའི་ཕྱིར།  དཔེར་ན་རྨི་ལམ་གྱི་ཞེས་བྱ་བ་ལ་སོགས་པ་སྨོས་སོ། ། དཔེར་ན་རྨི་ལམ་གྱི་རྣམ་པར་རིག་པའི་དོན་མེད་པར་འདོད་  {192b1} པ་ད་བཞིན་དུ་གལ་ཏེ་གཉིད་ཀྱིས་མ་ལོག་པའི་ཡང་དོན་མེད་པར་འདོད་ན།  གཉིད་ཀྱིས་ལོག་པ་དང་མ་ལོག་པ་ན་སྦྱིན་པ་ལ་སོགས་པ་དགེ་བ་ཀུན་དུ་སྤྱད་པའི་འབྲས་བུ་ཕྱི་མ་ལ་འདོད་པར་འདྲ་བར་ཅིའི་ཕྱིར་མི་འགྱུར།  གཉིད་ཀྱིས་ལོག་པ་དང་གཉིད་ཀྱིས་མ་ལོག་པ་ན་སྲོག་གཅོད་{192b2} པ་ལ་སོགས་པ་མི་དགེ་བ་ཀུན་དུ་སྤྱོད་པའི་འབྲས་བུ་ཡང་ཕྱི་མ་ལ་མི་འདོད་པར་འདྲ་བར་ཅིའི་ཕྱིར་མི་འགྱུར།  གཉི་ག་ཡང་དོན་མེད་པར་མཚུངས་ན་གོ་སྙམ་དུ་སེམས་པའོ། ། བསྟན་བཅོས་བྱེད་པས་དེའི་ལན་དུ་སེམས་ནི་གཉིད་ཀྱིས་ནོན་པས་ན་ཞེས་བྱ་བ་ལ་སོགས་པ་སྨོས་སོ། ། འདི་ལྟར་རྨི་{192b3}ལམ་གྱི་གནས་སྐབས་ན་ནི་དགེ་བ་འམ་མི་དགེ་བ་དག་གཉིད་ཀྱིས་ནོན་པའི་སེམས་ཀྱིས་ཀྱང་བྱེད་དེ།  དེའི་ཕྱིར་གཉིད་ཀྱིས་མ་ལོག་པའི་དུས་ན་བྱེད་པའི་དགེ་བ་དང་མི་དགེ་བ་དང་རྨི་ལམ་གྱི་དགེ་བ་དང་མི་དགེ་བའི་འབྲས་བུ་མཚུངས་པ་མ་ཡིན་ཏེ།  གང་གཉིད་ཀྱིས་ནོན་པ་དེ་ནི་འདིར་འབྲས་{192b4} བུ་མི་འདྲ་བའི་རྒྱུ་ཡིན་གྱི་དོན་ཡོད་པ་ནི་མ་ཡིན་ནོ། ། འདི་ལྟར་སད་པའི་དུས་ན་་པ་དང་འདྲེས་པར་རྣམ་པར་རྟོག་པ་ངན་པས་དགེ་བའི་འབྲས་བུ་ཡང་ཆུང་བར་འགྱུར་ཏེ།  དེ་བས་ན་རྨི་ལམ་གྱི་གནོད་པ་ཡང་འབྲས་བུ་ཆུང་དུའི་རྒྱུ་ཡིན་ནོ། ། ཡང་འདི་ནི་འབྲས་བུ་མི་མཚུངས་པའི་{192b5} རྒྱུ་གཞན་ཡིན་ཏེ།  རྨི་ལམ་ན་སྦྱིན་པ་ནི་ལེན་པ་པོ་སུ་ཡང་མེད།  སུ་ལ་ཡང་ཕན་འདོགས་པ་མེད་དོ། ། དེ་བཞིན་དུ་རྨི་ལམ་ན་གསད་པར་བྱ་བ་ཡང་སུ་ཡང་མེད་ཡང་དག་པའི་དོན་དུ་སུ་ལ་ཡང་གནོད་པར་བྱེད་པ་མེད་དོ། ། གཉིད་ཀྱིས་མ་ལོག་པའི་དུས་ན་ནི་སྲོག་ཆགས་དག་ཀྱང་ཡོད་{192b6} ལ; གང་དག་ལ་སྦྱིན་པར་འདོད་པའི་དབང་གིས་ལེན་པར་སྣང་བ་འབྱུང་ཞིང་རིམ་གྱིས་བདེ་བ་མྱོང་བར་འགྱུར་བས་ཕན་འདོགས་པར་འགྱུར་རོ། ། གང་དག་ལ་གསད་པར་འདོད་པའི་དབང་གིས་མཚོན་གྱི་རྣམ་པའི་ཤེས་པ་རིག་པས་མི་བཟོད་པའི་ཚོར་བ་འབྱུང་བ་ན་འཆི་བའི་མཚན་ཉིད་གནོད་{192b7} པར་འགྱུར་རོ། ། ཡང་ཕྱི་རོལ་གྱི་དོན་དུ་སྨྲ་བས་སླར་བརྒལ་བའི་ཕྱིར།  གལ་ཏེ་འདི་དག་རྣམ་པར་རིག་པ་ཙམ་དུ་ཟད་ན་ཞེས་བྱ་བ་ལ་སོགས་པ་སྨོས་སོ། ། གལ་ཏེ་འགྲོ་བ་འདིས་མཐའ་དག་རྣམ་པར་རིག་པ་ཙམ་དུ་ཟད་ན་སེམས་ཅན་གང་ལ་ཡང་ལུས་མེད་ལ་ངག་ཀྱང་མེད་དེ།  དེའི་ཕྱིར་  {193a1} || ཤན་པ་ལ་སོགས་པས་གསོད་པ་ན་ལུག་ལ་སོགས་པ་འཆི་བར་ཇི་ལྟར་འགྱུར།  གལ་ཏེ་ཤན་པ་ལ་སོགས་པ་ལ་ལུས་དང་ངག་ཡོད་ལ་ལུག་རྣམས་ཀྱི་ལུས་ཀྱང་ཡོད་ན་དེའི་ཚེ་དེ་དག་གིས་དེ་དག་རང་གི་ལུག་ལག་དར་ཏེ་གསོད་པའམ།  གཞན་ལ་སོད་ཅེས་ཚིག་གིས་བསྒོ་བས་ལུག་རྣམས་{193a2} འཆི་བར་འགྱུར་རོ། ། ལུས་དང་ངག་མེད་ན་གསད་པར་བསམས་པ་ཙམ་གྱིས་གཞན་དག་འཆི་བར་ཇི་ལྟར་འགྱུར་ཏེ་དེ་ལྟར་འདོད་ན་ནི་གང་ཟག་འགའ་ཞིག་ཁོས་ཏེ་གནོད་པར་བྱ་བའི་སེམས་བསྐྱེད་བ་དེ་ཉིད་ཀྱིས་འཆི་བར་འགྱུར་རོ། ། ཇི་སྟེ་ཉེས་པ་འདི་དག་འབྱུང་དུ་འོང་ཞེས་དེ་དག་འཆི་བ་དེས་བྱས་པར་མི་འདོད་ན་{193a3} ནི་དེའི་ཚེ་ལུག་འཆི་བ་ཤན་པ་རྣམས་ཀྱིས་མ་བསད་པས།  ཤན་པ་ལ་སོགས་པ་སྲོག་གཅོད་པའི་ཁ་ན་མ་ཐོབ་དང་ཇི་ལྟར་ལྡན་པར་འགྱུར།  བསྟན་བཅོས་བྱེད་པས་དེ་བསལ་བའི་ཕྱིར།  འཆི་བ་གཞན་གྱི་རྣམ་རིག་གིས། ། ཞེས་བྱ་བ་ལ་སོགས་པ་སྨོས་སོ། ། རྣམ་པར་རིག་པའི་བྱེ་བྲག་གང་གིས་མཚོན་གདབ་པར་{193a4} གཟས་པས་ཕྱི་རོལ་གྱི་དོན་དུ་སྨྲ་བས་གཞན་གསོད་པར་བྱེད་དོ། ། དེ་བས་ན་རྣམ་པར་རིག་པའི་བྱེ་བྲག་མཚོན་ཆ་མེད་པ་ལས་གཞན་འཆི་བར་འགྱུར་རོ། ། དཔེར་ན་འདྲེ་ལ་སོགས་པའི་ཡིད་ཀྱི་དབང་གིས་སེམས་ཅན་གཞན་དག་གི་དྲན་པ་ཉམས་པ་ལ་སོགས་པ་བྱེད་པར་འགྱུར་རོ་ཞེས་མདོར་བྱས་པའི་དོན་ཏོ། ། བསྟན་བཅོས་{193a5} བྱེད་པས་མདོར་བྱས་པའི་དོན་དེ་རྒྱ་ཆེར་བསྟན་པའི་ཕྱིར།  དཔེར་ན་འདྲེལ་སོགས་པའི་ཡིད་ཀྱི་དབང་གིས་ཞེས་བྱ་བ་ལ་སོགས་པ་སྨོས་སོ། ། དཔེར་ན་འདྲེ་ལ་སོགས་པའི་ངན་སེམས་ཀྱི་སེམས་ཀྱི་དབང་གིས་སྲོག་ཆགས་གཞན་དག་གི་དྲན་པ་ཉམས་པར་འགྱུར་བ་དང་མཁའ་འགྲོ་མ་རྣམས་ཀྱི་གནོད་པའི་སེམས་ཀྱི་དབང་གིས་{193a6} གཞན་དག་གི་སྙིང་གི་ཁྲག་འབྱིན་པ་དང།  དེ་བཞིན་དུ་ལྷའི་བྱིན་གྱི་རླབས་ཀྱིས་རྨི་ལྟས་སུ་མཐོང་བ་དང།  དེ་བཞིན་དུ་སྔགས་མཁན་གྱི་ཡིད་ཀྱི་དབང་གིས་འབྱུང་པོའི་གདོན་ཕམ་པར་འགྱུར་བ་དང།  དེ་བཞིན་དུ་ནམ་མཁའ་ལྡིང་གི་སྔགས་བྱེད་པའི་ཡིད་ཀྱི་དབང་གིས་དུག་སེལ་ཞིང་འཕོ་བ་ལ་སོགས་པར་འགྱུར་བ་དང།  དེ་བཞིན་{193a7} དུ་རྫུ་འཕྲུལ་དང་ལྡན་པའི་ཡིད་ཀྱི་དབང་གིས་གཞན་དག་གི་འགྱུར་བ་རྣམ་པ་མང་པོ་འབྱུང་བ་དང།  དཔེར་ན་ཀཱ་ཏྱཱི་བུ་ཆེན་པོའི་བྱིན་གྱི་རླབས་ཀྱིས་ས་ར་ནས་རྨི་ལྟས་སུ་མཐོང་བ་དང།  དཔེར་ན་དྲང་སྲོང་དགོན་པ་པ་རྣམས་ཀྱི་ཡིད་འཁྲུགས་པ་ལྷམ་ཡིན་གྱི་དབང་པོ་ཐགས་ཟངས་རིས་ཕམ་ཞེས་གྲགས་པ་དེ་བཞིན་དུ་ཤན་པ་ལ་སོགས་པའི་  {193b1} གནོད་སེམས་ཀྱི་བསམ་པའི་རྣམ་པར་རིག་པའི་བྱེ་བྲག་གིས་ལུག་ལ་སོགས་པ་གཞན་དག་གི་སྲོག་གི་དབང་པོ་དང་མི་མཐུན་པའི་འགྱུར་བ་རྣམ་པ་འདི་ལྟ་བུ་དག་འབྱུང་སྟེ།  དེ་བྱུང་བས་རིས་གཅིག་པ་སྐལ་བ་འདྲ་བས་བསྡུས་པའི་སེམས་དང་སེམས་ལས་བྱུང་བའི་རྒྱུད་ཀྱི་རྒྱུན་འཆད་པའི་མཚན་ཉིད་འཆི་བར་འགྱུར་རོ། ། དེ་ལྟ་ན་གཞན་གྱི་རྣམ་{193b2} པར་རིག་པའི་བྱེ་བྲག་གིས་གཞན་དག་འཆི་བར་རིག་པར་བྱའོ། ། དེ་ལྟར་རིགས་པས་དོན་བསྟན་ཀྱང་བརྒྱལ་གཞན་དག་ཁས་མི་ལེན་ཀྱང་སྲིད་པས་དེའི་ཕྱིར།  དྲང་སྲོང་ཁྲོས་པས་དན་ཏ་ཀའི། ། དགོན་པ་ཇི་ལྟར་སྟོངས་པར་འགྱུར། ། ཞེས་བྱ་བ་སྨོས་སོ། ། དེ་ཉིད་རྣམ་པར་དགྲོལ་བའི་ཕྱིར།  གལ་ཏེ་གཞན་གྱི་རྣམ་པར་རིག་པའི་བྱེ་བྲག་གིས་{193b3} ཞེས་བྱ་བ་ལ་སོགས་པ་སྨོས་སོ། ། གལ་ཏེ་གསོད་པ་པོ་རྣམས་ཀྱིས་གསོད་པའི་བསམ་པའི་རྣམ་པར་རིག་པའི་བྱེ་བྲག་གིས་སེམས་ཅན་གསད་པར་བྱ་བ་དག་འཆི་བར་ཁྱོད་མི་འདོད་ན།  དེའི་ཚེ་ཡིད་ཀྱི་ཉེས་པ་ཁ་ན་མ་ཐོ་བ་ཆེན་པོ་དང་བཅས་པ་ཉིད་དུ་བསྒྲུབ་པར་བཞེད་ནས།  བདེ་བར་གཤེགས་པ་ཐུབ་པས་ཁྱིམ་བདག་ཉེ་བ་འཁོར་{193b4} ལ་བཀའ་སྩལ་པ།  ཁྱོད་ཀྱིས་དན་ཏ་ཀའི་དགོན་པ་ལ་སོགས་པ་དེ་དག་གནའ་སྔོན་མི་བརྒྱ་ཕྲག་དུ་མས་གང་བའི་ལྗོངས་སུ་གྱུར་པ་ཞེས་གྲགས་ན་དེ་ཇི་ལྟར་སྐད་ཅིག་ཏུ་དགོན་པར་གྱུར་ཏེ་སྟོངས་པ་དང་གཙང་མར་གྱུར་པ་ཅི་ཐོས་ཞེས་དེ་སྐད་ཅེས་བཀའ་སྩལ་པ་དང།  དེས་དྲང་སྲོང་རྣམས་ཁྲོས་པ་དེ་དག་དེ་ལྟར་གྱུར་ཅེས་བདག་གིས་{193b5} ཐོས་སོ་ཞེས་གསོལ་ཏོ། ། དེ་ཡིད་འཁྲུགས་པ་ཙམ་གྱིས་དེ་སྙེད་ཅིག་འཆི་བར་ཇི་ལྟར་འགྱུར།  དེ་ནི་འདི་སྐད་དུ་གལ་ཏེ་གསོད་པའི་རྣམ་པར་རིག་པའི་བྱེ་བྲག་གིས་གསད་པར་བྱ་བ་རྣམས་འཆི་བར་མི་འདོད་ན།  དེའི་ཚེ་དྲང་སྲོང་རྣམས་ཀྱི་ཡིད་འཁྲུགས་པ་ཙམ་གྱིས་སེམས་ཅན་དེ་སྙེད་ཅིག་འཆི་བའི་མི་རིགས་སོ་ཞེས་བྱ་བ་བསྟན་པར་{193b6} འགྱུར།  ཡིད་ཀྱི་ཉེས་པ་ཞེས་བྱ་བ་ནི་ཡིད་ཀྱི་ཉེས་པ་སྤྱད་པ་ལ་བྱའོ། ། དན་ཏ་ཀའི་དགོན་པ་དང།  མ་ཏ་གའི་དགོན་པ་དང།  ཀ་ལིཾ་ཀའི་དགོན་པ་ཞེས་བྱ་བ་དེ་དག་ནི་དགོན་པའི་མིང་ངོ། ། སྟོངས་པ་ཞེས་བྱ་བ་ནི་སྐྱེ་བ་མེད་པར་འགྱུར་བའོ། ། གཙང་མར་གྱུར་ཅེས་བྱ་བ་ནི་སྐྱེ་བོ་མེད་ན་བཤད་གཅི་མེད་པའི་ཕྱིར་གཙང་མར་གྱུར་ཅེས་བྱ་བའི་ཐ་ཚིག་{193b7} གོ། ། བརྒྱ་ལ་གཞན་དག་དྲང་སྲོང་རྣམས་ཀྱི་ཡིད་འཁྲུགས་པར་ཤེས་བཞིན་དུ་མི་མ་ཡིན་པ་སྐབས་ཚོལ་བ་དག་གིས་གསད་དོ་ཞེས་ཟེར་དུ་དོགས་ནས།  ཡིད་ཉེས་ཁ་ན་མ་ཐོ་ཆེར། ། ཞེས་བྱ་བ་ལ་སོགས་པ་སྨོས་སོ། ། དེ་ཉིད་རྣམ་པར་དགྲོལ་བའི་ཕྱིར། ། གལ་ཏེ་འདི་ལྟར་རྟོག་སྟེ་ཞེས་བྱ་བ་ལ་སོགས་པ་སྨོས་སོ། ། གལ་ཏེ་མི་མ་ཡིན་པ་གང་དག་  {194a1} || དྲང་སྲོང་རྣམས་ལ་དགའ།  དེ་དག་གི་ལུས་དང་ངག་གི་ཡུལ་དེ་ན་གནས་པའི་སེམས་ཅན་རྣམས་ཁ་བཏག་གི།  དྲང་སྲོང་དེ་དག་གི་ཡིད་འཁྲུགས་བས་དོགས་པ་ནི་མ་ཡིན་ནོ་ཞེས་དེའི་ཚེ་མི་མ་ཡིན་པ་རྣམས་ཀྱི་ལུས་དང་ངག་གི་ལས་དེ་ལུས་དང་ངག་གི་ཉེས་པ་རྣམས་པས་ཡིད་ཀྱི་ཉེས་པ་ཆེས་ཁ་ན་མཐོ་{194a2} བ་ཆེན་པོ་དང་བཅས་པར་གྲུབ་པ་ཇི་ལྟར་འགྱུར།  གང་གི་ཚེ་ཁ་ན་མ་ཐོ་བ་ཆེན་པོ་དང་བཅས་པར་གྲུབ་ཅེ་ན།  དེའི་ཡིད་འཁྲུགས་པ་ཙམ་གྱིས་ཞེས་བྱ་བ་ལ་སོགས་པ་སྨོས་སོ། ། གང་གི་ཚེ་ལུས་དང་ངག་གི་སྤྱོད་པ་མེད་པར་དྲང་སྲོང་རྣམས་ཀྱི་ཡིད་འཁྲུགས་པ་ཙམ་འབའ་ཞིག་གིས་སེམས་ཅན་དེ་སྙེད་འཆི་བར་འགྱུར་པ་{194a3} དེའི་ཚེ།  ཡིད་ཀྱི་ཉེས་པ་ཁ་ན་མ་ཐོབ་ཆེན་པོ་དང་བཅས་པ་ཉིད་དུ་འགྲུབ་བོ།  ཡང་ཕྱི་རོལ་གྱི་དོན་དུ་སྨྲ་བས་བརྒལ་བའི་ཕྱིར།  གལ་ཏེ་འདི་དག་རྣམ་པར་ཤེས་པ་ཙམ་དུ་ཟད་ན་ཞེས་བྱ་བ་ལ་སོགས་པ་སྨོས་སོ། ། གལ་ཏེ་གཟུང་བ་དང་འཛིན་པ་དང་བྲལ་བའི་སེམས་དང་སེམས་ལས་བྱུང་བ་འབའ་ཞིག་ཁོ་ནར་ཟད་ན་དེའི་{194a4} ཚེ; གཞན་གྱི་སེམས་ཤེས་པ་ཐོབ་པའི་རྣལ་འབྱོར་པས།  ཅི་གཞན་གྱི་སེམས་ཤེས་སམ།  འོན་ཏེ་མི་ཤེས་སྨྲོས་ཤིག།  གྲུབ་པའི་མཐའ་སྨྲ་བས་གཉི་གར་ཉེས་པར་མ་མཐོང་ནས།  འདིས་ཅི་ཞིག་བྱ་ཞེས་དྲིས་ཏེ།  དེ་ནི་གོ་སླ་བསམ་བཤད་དོ། ། ཕྱི་རོལ་གྱི་དོན་དུ་སྨྲ་བས་གཉི་ག་ཡང་ཉེས་པར་བསྟན་པའི་ཕྱིར།  གལ་{194a5} ཏེ་མི་ཤེས་ན་ནི་ཞེས་བྱ་བ་ལ་སོགས་པ་སྨོས་སོ། ། གལ་ཏེ་རྣལ་འབྱོར་པས་གཞན་དག་གི་སེམས་མི་ཤེས་ན་དེའི་ཚེ་གཞན་གྱི་སེམས་རིག་པ་ཞེས་ཀྱང་ཇི་སྐད་དུ་བྱ།  འདི་ལྟར་གང་གཞན་གྱི་སེམས་རིག་པ་དེ་ལ་འདི་སྐད་ཅེས་བྲྗོད་དེ།  སྒྲ་འདིའི་རྒྱུ་ནི་བྱ་བ་དེ་མེད་ན་བྱ་བར་ཇི་ལྟར་འགྱུར།  ཇི་སྟེ་ཉེས་པ་འདི་འབྱུང་དུ་{194a6} འོང་ཞེས་ཏེ་གཞན་གྱི་སེམས་ཤེས་པར་ཁས་ལེན་ན།  དེའི་ཚེ་དེ་དག་གཟུང་བ་དང་འཛིན་པའི་རྣམ་པར་འབྱུང་བས་དོན་ཇི་ལྟ་བ་བཞིན་མ་ཡིན་པར་འགྱུར་རོ། ། བསྒོམ་པ་ཤིན་ཏུ་མཐར་ཕྱིན་པའི་རྣལ་འབྱོར་པ་རྣམས་ཀྱི་ཤེས་པ་དོན་ཇི་ལྟ་བ་བཞིན་མ་ཡིན་པར་ཇི་ལྟར་འགྱུར།  དེ་ནི་འདི་སྐད་དུ་གལ་ཏེ་གཞན་གྱི་སེམས་{194a7} ཤེས་ན་དེའི་ཚེ་གཟུང་བ་དང་འཛིན་པའི་རྣམ་པར་ཁས་བླངས་པས་རྣམ་པར་རེག་པ་ཉིད་ཉམས་པར་འགྱུར་རོ། ། དོན་མི་ཤེས་ན་ནི་དེའི་ཚེ་གཞན་གྱི་སེམས་རིག་པ་ཡོད་དོ་ཞེས་མ་ཟེར་ཅིག་ཅེས་བསྟན་པར་འགྱུར་རོ། ། བསྟན་བཅོས་བྱེད་པས་དོན་ཇི་ལྟ་བ་བཞིན་མ་ཡིན་པ་དེ་ཁས་བླངས་ནས་དེ་ན་ཇི་ལྟ་བ་བཞིན་མ་ཡིན་  {194b1} པའི་དཔེ་བསྟན་པ།  དཔེར་ན་རང་སེམས་ཤེས་པ་ཅན། ། ཞེས་བྱ་བ་སྨོས་སོ། ། དཔེར་ན་སྲོག་ཆགས་རྣམས་ཀྱི་རང་གི་སེམས་འདས་པ་དང་མ་འོངས་པ་ཤེས་པ་ཡང་དོན་ཇི་ལྟ་བ་བཞིན་དུ་མ་ཡིན་ཏེ།  དེ་བཞིན་དུ་རྣལ་འབྱོར་པ་རྣམས་ཀྱིས་གཞན་གྱི་སེམས་ཤེས་པ་ཡང་དོན་ཇི་ལྟ་བ་བཞིན་མ་ཡིན་ནོ། ། གཞན་གྱི་{194b2} སེམས་རིག་པ་ཞེས་བྲྗོད་པ་ནི་རྟོགས་སོ་སྙམ་པའི་དབང་གིས་འགྱུར་རོ། ། འདི་ལྟར་དེ་དག་གི་རྣལ་འབྱོར་གྱི་དབང་གིས་རང་གི་སེམས་ཉིད་གཞན་གྱི་སེམས་དང་མཚུངས་པའི་རྣམ་པར་གསལ་བར་སྣང་བ་འབྱུང་སྟེ།  དཔེར་ན་དེ་དག་གི་རྣལ་འབྱོར་གྱི་སྟོབས་ཀྱིས་འདས་པ་དང་མ་འོངས་པའི་དངོས་པོ་རྣམ་པ་གསལ་{194b3} བར་སྣང་བའི་ཤེས་པ་འབྱུང་བ་ལྟ་བུའོ། ། དེ་ཡང་དེ་དག་གཟུང་བའི་ཆ་ལ་གཞན་གྱི་སེམས་སུ་སེམས་པ་ན་གཞན་གྱི་སེམས་རིག་གོ་ཞེས་རྟོག་པར་བྱེད་དོ། ། ཕ་རོལ་གྱི་དཔེ་མ་གྲུབ་པར་བསམས་ཏེ།  དེ་ཡང་ཇི་ལྟར་དོན་ཇི་ལྟ་བ་བཞིན་དུ་མ་ཡིན་ཞེས་དྲིས་སོ། ། གལ་ཏེ་རང་གི་སེམས་ཤེས་པ་དོན་མེད་པ་ཇི་ལྟ་བ་{194b4} བཞིན་མ་ཡིན་པར་གྲུབ་ན་ནི་དེའི་ཚེ་དཔེར་བསྟན་པ་ཡང་རིགས་ན།  དེ་ཉིད་མ་གྲུབ་ན་ཇི་ལྟ་བ་བཞིན་མ་ཡིན།  བསྟན་བཅོས་བྱེད་པས་གཉི་ག་ཡང་དོན་ཇི་ལྟ་བ་བཞིན་མ་ཡིན་པའི་གཏན་ཚིགས་སུ།  སངས་རྒྱས་ཀྱི་ཞེས་བྱ་བ་ལ་སོགས་པ་སྨོས་སོ། ། དེ་ཉིད་དགྲོལ་བའི་ཕྱིར།  ཇི་ལྟར་དེ་བྲྗོད་དུ་མེད་པའི་བདག་{194b5} ཉིད་དུ་ཞེས་བྱ་པ་ལ་སོགས་པ་སྨོས་སོ། ། རང་གི་སེམས་དེ་དང་གཞན་གྱི་སེམས་དེ་ཡང་སངས་རྒྱས་བཅོམ་ལྡན་འདས་རྣམས་ཀྱིས་ཇི་ལྟར་བྲྗོད་དུ་མེད་པའི་བདག་ཉིད་དུ་ཐུགས་སུ་ཆུད་པ་དེ་བཞིན་དུ་ཞེས་བྱ་བ་ལ་སོགས་པ་སྨོས་སོ། ། ཐུགས་སུ་ཆུད་པ་དེ་བཞིན་དུ་སྲོག་ཆགས་རྣམས་ཀྱིས་རང་གི་སེམས་མ་རིག།  {194b6} རྣལ་འབྱོར་པས་ཀྱང་གཞན་གྱི་སེམས་མི་རིག་གོ། ། དེ་ལྟ་བས་ན་རང་གི་སེམས་ཤེས་པ་དང་གཞན་གྱི་སེམས་ཤེས་པ་གཉི་ག་ཡང་དོན་ཇི་ལྟ་བ་བཞིན་དུ་མ་ཡིན་ནོ། ། སྲོག་ཆགས་རྣམས་དང།  རྣལ་འབྱོར་པས་རང་དང་གཞན་གྱི་སེམས་བྲྗོད་དུ་མེད་པའི་བདག་ཉིད་དུ་ཅིའི་ཕྱིར་མ་ཤེས་སྙམ་པ་ལ་དེའི་ཕྱིར།  {194b7} ལོག་པར་སྣང་བའི་ཕྱིར་རོ་ཞེས་བྱ་བ་སྨོས་སོ། ། འདི་ལྟར་དེ་དག་གི་སེམས་དེ་ནི་གཟུང་བ་དང་འཛིན་པའི་རྣམ་པས་ལོག་པའོ། ། དེ་ལྟར་ཡང་དག་པའི་དོན་དུ་ན་དེ་དག་གི་སེམས་དེ་ནི་གཟུང་བ་དང་འཛིན་པ་དང་བྲལ་བ་ཡིན་ན།  གཉིས་སུ་མེད་པའི་ངོ་བོའི་སེམས་ལ་གཉིས་ཀྱི་རྣམ་པ་ནི་ལོག་པ་ཡིན་ནོ། ། དེའི་ཕྱིར་  {195a1} || གཟུང་བའི་ཆས་བསྒྲིབས་པས་རང་དང་གཞན་གྱི་སེམས་ཀྱི་ངོ་བོ་ལ་སྲོག་ཆགས་རྣམས་དང།  རྣལ་འབྱོར་པས་རང་གི་སེམས་དང་གཞན་གྱི་སེམས་བྲྗོད་དུ་མེད་པའི་བདག་ཉིད་དུ་མ་རིག་སྟེ།  དེ་དག་རང་གི་གཟུང་བའི་ཆ་གཉིས་རང་དང་གཞན་གྱི་སེམས་ལྟ་བུར་རིག་པ་ན་རང་དང་གཞན་གྱི་སེམས་རིག་གོ་ཞེས་རྟོག་པར་བྱེད་ཀྱི།  {195a2} ཡང་དག་པའི་དོན་དུ་ན་རང་དང་གཞན་གྱི་སེམས་ཀྱི་རང་གི་ངོ་བོ་ལ་ནི་མ་རེག་གོ། ། དཔེར་ན་བུམ་པའི་ཁ་དོག་འདྲ་བའི་སྣམ་བུ་ཞིག་གིས་བུམ་པ་་ན་མཐོང།  སྣམ་བུ་མཐོང་ཡང་སྲོག་ཆགས་དག་བུམ་པ་མཐོང་ངོ་སྙམ་དུ་སེམས་པ་དེ་བཞིན་དུ་འདིར་ཡང་དེ་ལྟར་བལྟའོ། ། གལ་ཏེ་སྲོག་ཆགས་རྣམས་དང་རྣལ་{195a3} འབྱོར་པ་དག་གི་སེམས་ཀྱི་ངོ་བོ་གཉིས་སུ་མེད་པ་ཡིན་ན།  ཅིའི་ཕྱིར་གཉིས་ཀྱི་རྣམ་པར་འབྱུང་སྙམ་པ་ལ།  གཟུང་བ་དང་འཛིན་བ་ཞེས་བྱ་བ་ལ་སོགས་པ་སྨོས་སོ། ། འདི་ལྟར་དེ་དག་གཟུང་བ་དང་འཛིན་པར་མངོན་པར་ཞེན་པ་མ་སྤངས་པའི་ཕྱིར།  ཇི་སྲིད་དུ་དེ་མ་སྤངས་པ་དེ་སྲིད་དུ་སེམས་ཀྱི་ངོ་བོ་གཉིས་སུ་{195a4} མེད་དུ་ཟིན་ཀྱང་གཉིས་ཀྱི་རྣམ་པར་སྣང་ངོ། ། དེའི་ཕྱིར་དེ་ལྟར་རྣམ་པར་རིག་པ་ཙམ་ལ་རྒོལ་བ་ངན་པའི་ལན་བཏབ་བོ། ། ཅིའི་ཕྱིར་རྣམ་པར་རིག་པ་ཙམ་ལ་ཅུང་ཟད་ཙམ་ཞིག་བཤད་ཀྱི་དེ་རྣམ་པ་ཐམས་ཅད་དུ་ཅིའི་ཕྱིར་མ་བཤད་སྙམ་པ་ལ།  རྣམ་པར་རིག་པ་ཙམ་གྱི་ཞེས་བྱ་བ་ལ་སོགས་པ་སྨོས་སོ། ། གང་{195a5} གིས་རབ་ཏུ་བྱེད་པ་རྣམ་པར་ངེས་པ་མཐའ་ཡས་པ་དང།  གང་གཏིང་མི་དཔོགས་ཤིང་ཟབ་པའི་རྣམ་པར་རིག་པ་ཙམ་དེའི་རྣམ་པར་རིག་པ་ཙམ་དུ་འགྲུབ་པ་གང་ཡིན་པ་དེ་དག་གིས་རང་གི་ནུས་པ་དང་མཐུན་པར་བྱས་ཀྱི།  དེའི་རྣམ་པ་ཀུན་དུ་ནི་སོ་སོའི་སྐྱེ་བོ་རྣམས་ཀྱིས་བསམ་པར་མི་ནུས་ཏེ།  འདི་ལྟར་དེ་ནི་{195a6} སངས་རྒྱས་བཅོམ་ལྡན་འདས་རྣམས་ཀྱི་སྤྱོད་ཡུལ་ཁོ་ནའོ། ། བསྟན་བཅོས་བྱེད་པས་ཚིགས་སུ་བཅད་པ་ཐ་མའི་ཕྱེད་རྣམ་པར་དགྲོལ་བའི་ཕྱིར།  དེའི་རྣམ་པ་ཀུན་ཞེས་བྱ་བ་ལ་སོགས་པ་སྨོས་སོ། ། དེ་ཁོ་ན་མ་མཐོང་བ་རྟོག་པའི་དྲ་བ་མ་དྲལ་བ་བདག་འདྲ་བས་རྣམ་པར་རིག་པ་ཙམ་དེའི་རྣམ་པ་ཐམས་{195a7} ཅད་བསམ་པར་མི་ནུས་སོ། ། ཅིའི་ཕྱིར་སྙམ་པ་ལ།  རྟོག་གེའི་ཡུལ་མ་ཡིན་པའི་ཕྱིར་ཞེས་བྱ་བ་སྨོས་སོ། ། འདི་ལྟར་དོན་དམ་པ་ནི་རྟོག་པའི་ཡུལ་མ་ཡིན་ནོ། ། བསམ་པ་ནི་རྟོག་གེའོ། ། དེ་བས་ན་དེ་བསམ་པར་མི་ནུས་སོ། ། རྣམ་པར་རིག་པ་ཙམ་ནི་དོན་དམ་པ་ཡིན་ན་ཇི་ལྟར་རྟོག་གེའི་ཡུལ་དུ་འགྱུར།    {195b1} གལ་ཏེ་དེ་ཁོ་ན་མ་མཐོང་བ་དག་གིས་རྣམ་པ་ཐམས་ཅད་བསམ་པར་མི་ནུས་ན་དེ་རྣམ་པ་ཐམས་ཅད་དུ་སུའི་སྤྱོད་ཡུལ་སྙམ་པ་ལ།  སངས་རྒྱས་སྤྱོད་ཡུལ་ལོ་ཞེས་བྱ་བ་སྨོས་སོ། ། དེ་ཉིད་དགྲོལ་བའི་ཕྱིར་དེ་ནི་སངས་རྒྱས་ཞེས་བྱ་བ་ལ་སོགས་པ་སྨོས་སོ། ། སངས་རྒྱས་བཅོམ་ལྡན་འདས་རྣམས་{195b2} ཀྱིས་དེ་རྣམ་པ་ཐམས་ཅད་དུ་ཐུགས་སུ་ཆུད་དེ།  དེ་བས་ན་དེ་དག་གི་སྤྱོད་ཡུལ་ལོ། ། དེ་ཅིའི་ཕྱིར་དེ་དག་གི་སྤྱོད་ཡུལ་སྙམ་པ་ལ།  ཤེས་བྱ་ཐམས་ཅད་ཀྱི་རྣམ་པ་ཐམས་ཅད་ལ་མཁྱེན་པ་ཐོགས་པ་མི་མངའ་བའི་ཕྱིར་རོ་ཞེས་བྱ་བ་སྨོས་སོ། ། འདི་ལྟར་རྣལ་འབྱོར་པའི་གཙུག་གི་ནོར་བུ་སངས་རྒྱས་བཅོམ་{195b3} ལྡན་འདས་རྣམས་ཀྱིས་མཁྱེན་པ་ནི་ཤེས་བྱ་ཐམས་ཅད་ཀྱི་རྣམ་པ་ཐམས་ཅད་ལ་ཐོགས་པ་མི་མངའ་སྟེ།  འདི་ལྟར་ལག་མཐིལ་དུ་སྐྱུ་རུ་ར་བཞག་པ་བཞིན་དུ་དེ་དག་འཇིག་རྟེན་པ་དང།  འཇིག་རྟེན་ལས་འདས་པའི་དངོས་པོ་ཐམས་ཅད་མངོན་སུམ་དུ་མཛད་དོ། ། དེ་བས་ན་དེ་དག་གང་ལ་ཡང་ཐོགས་པར་{195b4} ག་ལ་འགྱུར་ཏེ།  འདི་ལྟར་ཤེས་བྱ་ལ་སྒྲིབ་པར་བྱེད་པའི་ཐོགས་པ་སྤངས་པའི་ཕྱིར་རོ། ། ཉི་ཤུ་པ་ནི་རྣམ་ཕྱེ་བས། ། བདག་གི་དགེ་བ་ཁ་བ་དང། ། ཟླ་བའི་ཟེར་འདྲ་གང་ཐོབ་དེས། ། འགྲོ་བ་སངས་རྒྱས་གྲུབ་པར་ཤོག།  ནུས་ལ་ལྟོས་ཏེ་བགྱིས་པས་ན། ། མི་ཤེས་དབང་གིས་ཅུང་ཟད་དུ། ། མི་འདྲར་བཤད་{195b5} བར་གྱུར་ན་ཡང། ། མཁས་པ་རྣམས་ཀྱིས་བཟོད་པར་མཛོད། ། རབ་ཏུ་བྱེད་པ་ཉི་ཤུ་བའི་འགྲེལ་བཤད།  སློབ་དཔོན་དུལ་བའི་ལྷས་མཛད་པ་རྫོགས་སོ། ། || རྒྱ་གར་གྱི་མཁན་པོ་ཛི་ན་མི་ཏྲ་དང།  ཤཱི་ལེནྡྲ་བོ་དྷི་དང།  དཱ་ན་ཤཱི་ལ་དང།  ཞུ་ཆེན་གྱི་ལོ་ཙཱ་བ་བནྡེ་ཡེ་ཤེས་སྡེས་བསྒྱུར་ཅིང་ཞུས་ཏེ་{195b6} གཏན་ལ་ཕབ་པ། །