ཆ་ཤས་ཀྱི་ཡན་ལག་ཅེས་བྱ་བའི་རབ་ཏུ་བྱེད་པ།

ཡོང་ཁུངས།   བསྟན་འགྱུར།     སྤེལ་དུས།  2015-12-06 13:36:00     རྩོམ་པ་པོ།   སློབ་དཔོན་འཕགས་པ་ལྷ།    ཀློག་ཐེངས།  

                                                  img_8505.jpg

 

              རྒྱ་གར་སྐད་དུ།  ཧསྟ་བཱ་ས་ནཱ་མ་པྲ་ཀར་ཎ། བོད་སྐད་དུ། ཆ་ཤས་ཀྱི་ཡན་ལག་ཅེས་བྱ་བའི་རབ་ཏུ་བྱེད་པ།།བཅོམ་ལྡན་འདས་ངག་གི་དབང་པོ་ལ་ཕྱག་འཚལ་ལོ།།ཐག་པ་ལ་ནི་སྦྲུལ་སྙམ་འཛིན།།ཐག་པར་མཐོང་ན་དོན་མེད་དོ།།དེ་ཡི་ཆ་མཐོང་དེ་ལ་ནི།།སྦྲུལ་བཞིན་ཤེས་པ་འཁྲུང་པ་ཡིན།།བརྟག་པའི་དངོས་པོ་ཐམས་ཅད་ལ།།རང་གི་ངོ་བོ་བརྟགས་པ་ན།།གཞན་གྱི་ཀུན་རྫོབ་ཤེས་པ་ཡིས།།སྤྱོད་ཡུལ་ཇི་སྙེད་བརྟགས་པ་ཡིན།།ཆ་མེད་བརྟག་པར་བྱ་མིན་ཕྱིར།།ཐ་མ་ཡང་ནི་མེད་པར་མཚུངས།།དེ་ཕྱིར་མཁས་པས་འཁྲུལ་པ་ཙམ།།ཡང་དག་དོན་དུ་མིན་པར་བརྟག།འཁྲུལ་ན་དེ་ཡང་མ་དག་ཕྱིར།།ཇི་ལྟར་སྣང་བ་དེ་ལྟར་མེད།།དོན་ཡོད་མ་ཡིན་སྣང་བ་ནི།།ཇི་ལྟར་དེ་ཡི་བདག་ཉིད་འགྱུར།།གང་ཞིག་ཞིབ་མོའི་བློ་ཡིས་ནི།།ཐམས་ཅད་བརྟགས་པ་ཁོ་ནར་ཤེས།།བློ་ལྡན་དེས་ནི་ཆགས་ལ་སོགས།།བདེ་བར་སྦྲུལ་གྱིས་སྐྲག་བཞིན་སྤངས།།འཇིག་རྟེན་པ་ཡི་དོན་རྟོགས་པས།།འཇིག་རྟེན་བཞིན་དུ་བསྒྲུབ་པར་བྱ།།ཀུན་ནས་ཉོན་མོངས་སྤང་འདོད་པས།།དམ་པའི་དོན་གྱིས་བཙལ་བར་བྱ།།དེ་ལྟར་རང་བཞིན་ཡོངས་ཤེས་པའི།།རྣལ་འབྱོར་པས་ནི་གཟུགས་སོགས་ལ།།ཉེ་བར་སྤྱོད་པས་ཐུབ་པ་ཡི།།བརྟུལ་ཞུགས་ཀྱི་འབྲས་མྱུར་དུ་འགྲུབ།།ཆ་ཤས་ཀྱི་ཡན་ལག་ཅེས་བྱ་བའི་རབ་ཏུ་བྱེད་པ་སློབ་དཔོན་འཕགས་པ་ལྷས་མཛད་པ་རྫོགས་སོ།། །།རྒྱ་གར་གྱི་མཁན་པོ་ཤྲདྡྷ་ཀར་ཝ་རྨ་དང༌། བོད་ཀྱི་ལོ་ཙཱ་བ་རིན་ཆེན་བཟང་པོས་བསྒྱུར་བའོ།།

 

 གསལ་འདེབས། 
            རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ། 
         རྩོམ་ཁུངས།  རྩོམ་འདིའི་སྦྲེལ་ཐགhttp://www.tb1025.cn 

 

 

བརྒྱུད་འགོད།