རྒྱ་གར་སྐད་དུ། ཧེ་ཏུ་ཙཀྲ་ཧ་མཱརྠ། བོད་སྐད་དུ། གཏན་ཚིགས་ཀྱི་འཁོར་ལོ་གཏན་ལ་དབབ་པ། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ།།འཁྲུལ་པའི་དྲ་བ་འཇོམས་མཛད་པའི།།ཐམས་ཅད་མཁྱེན་ལ་ཕྱག་འཚལ་ནས།།གཏན་ཚིགས་ཚུལ་གསུམ་འཁོར་ལོ་ཡི།།གཏན་ལ་དབབ་པ་བཤད་པར་བྱ།།རྗེས་སུ་དཔག་པར་བྱ་བ་ལ།།ཡོད་དང་མེད་དང་གཉིས་ཀ་ཡི།།ཡོད་པ་ལ་ནི་ཡང་དག་སྟེ།།མེད་དང་གཉིས་ཀ་མ་གྲུབ་ཡིན།།ཐེ་ཚོམ་གཉིས་ཏེ་མ་གྲུབ་བཞིན།།མ་གྲུབ་སྦྱར་བ་དེ་བཞིན་དུ།།མཐུན་པའི་ཕྱོགས་ལ་ཡོད་པ་དང༌།།མེད་པ་དེ་བཞིན་གཉིས་ཀ་དང༌།།མི་མཐུན་ཕྱོགས་ལ་དེ་བཞིན་ནོ།།གསུམ་ལ་རྣམ་པ་གསུམ་གསུམ་སྟེ།།སྟེང་འོག་གཉིས་ལ་ཡང་དག་གོ།ལོགས་ལ་འགལ་བ་གཉིས་ཡིན་ཏེ།།ཟུར་བཞི་ཐུན་མོང་མ་ངེས་བཞིན།།དབུས་ན་ཐུན་མོང་མ་ཡིན་པའོ།།གཞལ་བྱ་བྱས་དང་མི་རྟག་དང༌།།བྱས་དང་མཉན་བྱ་རྩོལ་བྱུང་དང༌།།མི་རྟག་རྩོལ་བྱུང་ལུས་ཅན་མིན།།རྟག་དང་མི་རྟག་རྩོལ་བྱུང་དང༌།།རྟག་དང་རྟག་དང་རྟག་པ་དང༌།།རྩོལ་བྱུང་མིན་དང་མི་རྟག་དང༌།།རྟག་པ་ལ་ནི་སྒྲུབ་པ་བཀོད།།སྟེང་འོག་མི་མཐུན་ལོགས་དང་སྦྱར།།ཡང་དག་གཏན་ཚིགས་གཉིས་ཡིན་ནོ།།ལོགས་དང་མི་མཐུན་སྟེང་འོག་སྦྱར།།འགལ་བའི་གཏན་ཚིགས་གཉིས་ཡིན་ནོ།།ཟུར་བཞི་ཐ་དད་སྣོལ་མར་སྦྱར།།ཐུན་མོང་མ་ངེས་རྣམ་པ་བཞི།།ལོགས་གཉིས་ཐད་ཀར་སྦྱར་བས་ནི།།ཐུན་མོང་མ་ཡིན་མ་ངེས་པའོ།།གཏན་ཚིགས་འཁྲུལ་འཁོར་རྣམ་དགུ་ཡིས།།དཔེ་ཡི་རྣམ་པ་འདི་ལྟ་སྟེ།།ནམ་མཁའ་བུམ་དང་བུམ་མཁའ་དང༌།།བུམ་པ་གློག་དང་ནམ་མཁའ་བཞིན།།མཁའ་དང་བུམ་པ་གློག་བཞིན་དང༌།།གློག་དང་ནམ་མཁའ་བུམ་བཞིན་དང༌།།བུམ་དང་གློག་དང་མཁའ་བཞིན་དང༌།།ནམ་མཁའ་རྡུལ་ཕྲན་ལས་བུམ་བཞིན།།དེ་ནི་ངེས་པའི་དབང་བྱས་ཡིན།།ཐེ་ཚོམ་ཟ་བའི་ལུགས་ལ་ནི།།ཡོད་དང་མེད་དང་ཡོད་མེད་དང༌།།ཕྱོགས་གཅིག་མཐའ་དག་སྦྱོར་བས་སོ།།ཕྱོགས་ཆོས་དགུའི་འཁོར་ལོ་སློབ་དཔོན་ཕྱོགས་ཀྱི་གླང་པོས་མཛད་པ་རྫོགས་སོ།། །།ཟ་ཧོར་གྱི་མཁས་པ་བོ་དྷ་སིཏྭ་དང༌། དགེ་སློང་དྷརྨ་ཨཱ་ལོ་ཀས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། །།

   གསལ་འདེབས། 
            རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ། 
         རྩོམ་ཁུངས།  རྩོམ་འདིའི་སྦྲེལ་ཐགhttp://www.tb1025.cn